| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
६. सतपत्तङ्गपञ्हो
6. Satapattaṅgapañho
६. ‘‘भन्ते नागसेन, ‘सतपत्तस्स एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, सतपत्तो रवित्वा परेसं खेमं वा भयं वा आचिक्खति, एवमेव खो, महाराज, योगिना योगावचरेन परेसं धम्मं देसयमानेन विनिपातं भयतो दस्सयितब्बं, निब्बानं खेमतो दस्सयितब्बं। इदं, महाराज, सतपत्तस्स एकं अङ्गं गहेतब्बं। भासितम्पेतं, महाराज, थेरेन पिण्डोलभारद्वाजेन –
6. ‘‘Bhante nāgasena, ‘satapattassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, satapatto ravitvā paresaṃ khemaṃ vā bhayaṃ vā ācikkhati, evameva kho, mahārāja, yoginā yogāvacarena paresaṃ dhammaṃ desayamānena vinipātaṃ bhayato dassayitabbaṃ, nibbānaṃ khemato dassayitabbaṃ. Idaṃ, mahārāja, satapattassa ekaṃ aṅgaṃ gahetabbaṃ. Bhāsitampetaṃ, mahārāja, therena piṇḍolabhāradvājena –
‘‘‘निरये भयसन्तासं, निब्बाने विपुलं सुखं।
‘‘‘Niraye bhayasantāsaṃ, nibbāne vipulaṃ sukhaṃ;
उभयानेतानत्थानि दस्सेतब्बानि योगिना’’’ति॥
Ubhayānetānatthāni dassetabbāni yoginā’’’ti.
सतपत्तङ्गपञ्हो छट्ठो।
Satapattaṅgapañho chaṭṭho.
