| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
8. ஸதிபட்டா²னகதா²
8. Satipaṭṭhānakathā
34. ஸாவத்தி²னிதா³னங் . ‘‘சத்தாரோமே , பி⁴க்க²வே, ஸதிபட்டா²னா. கதமே சத்தாரோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். வேத³னாஸு…பே॰… சித்தே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். இமே கோ², பி⁴க்க²வே, சத்தாரோ ஸதிபட்டா²னா’’தி.
34. Sāvatthinidānaṃ . ‘‘Cattārome , bhikkhave, satipaṭṭhānā. Katame cattāro? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ. Vedanāsu…pe… citte… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Ime kho, bhikkhave, cattāro satipaṭṭhānā’’ti.
35. [க] கத²ங் காயே காயானுபஸ்ஸீ விஹரதி? இதே⁴கச்சோ பத²வீகாயங் அனிச்சதோ அனுபஸ்ஸதி, நோ நிச்சதோ; து³க்க²தோ அனுபஸ்ஸதி, நோ ஸுக²தோ; அனத்ததோ அனுபஸ்ஸதி, நோ அத்ததோ; நிப்³பி³ந்த³தி, நோ நந்த³தி; விரஜ்ஜதி, நோ ரஜ்ஜதி; நிரோதே⁴தி, நோ ஸமுதே³தி, படினிஸ்ஸஜ்ஜதி, நோ ஆதி³யதி . அனிச்சதோ அனுபஸ்ஸந்தோ நிச்சஸஞ்ஞங் பஜஹதி, து³க்க²தோ அனுபஸ்ஸந்தோ ஸுக²ஸஞ்ஞங் பஜஹதி, அனத்ததோ அனுபஸ்ஸந்தோ அத்தஸஞ்ஞங் பஜஹதி, நிப்³பி³ந்த³ந்தோ நந்தி³ங் பஜஹதி, விரஜ்ஜந்தோ ராக³ங் பஜஹதி, நிரோதெ⁴ந்தோ ஸமுத³யங் பஜஹதி, படினிஸ்ஸஜ்ஜந்தோ ஆதா³னங் பஜஹதி. இமேஹி ஸத்தஹி ஆகாரேஹி காயங் அனுபஸ்ஸதி. காயோ உபட்டா²னங், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தங் காயங் அனுபஸ்ஸதி. தேன வுச்சதி – ‘‘காயே காயானுபஸ்ஸனாஸதிபட்டா²னா’’.
35. [Ka] kathaṃ kāye kāyānupassī viharati? Idhekacco pathavīkāyaṃ aniccato anupassati, no niccato; dukkhato anupassati, no sukhato; anattato anupassati, no attato; nibbindati, no nandati; virajjati, no rajjati; nirodheti, no samudeti, paṭinissajjati, no ādiyati . Aniccato anupassanto niccasaññaṃ pajahati, dukkhato anupassanto sukhasaññaṃ pajahati, anattato anupassanto attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Imehi sattahi ākārehi kāyaṃ anupassati. Kāyo upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ kāyaṃ anupassati. Tena vuccati – ‘‘kāye kāyānupassanāsatipaṭṭhānā’’.
பா⁴வனாதி சதஸ்ஸோ பா⁴வனா – தத்த² ஜாதானங் த⁴ம்மானங் அனதிவத்தனட்டே²ன பா⁴வனா, இந்த்³ரியானங் ஏகரஸட்டே²ன பா⁴வனா, தது³பக³வீரியவாஹனட்டே²ன பா⁴வனா, ஆஸேவனட்டே²ன பா⁴வனா.
Bhāvanāti catasso bhāvanā – tattha jātānaṃ dhammānaṃ anativattanaṭṭhena bhāvanā, indriyānaṃ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā.
இதே⁴கச்சோ ஆபோகாயங்…பே॰… தேஜோகாயங்… வாயோகாயங்… கேஸகாயங்… லோமகாயங்… ச²விகாயங்… சம்மகாயங்… மங்ஸகாயங்… ருதி⁴ரகாயங்… ந்ஹாருகாயங் 1 … அட்டி²காயங்… அட்டி²மிஞ்ஜகாயங் அனிச்சதோ அனுபஸ்ஸதி, நோ நிச்சதோ; து³க்க²தோ அனுபஸ்ஸதி, நோ ஸுக²தோ ; அனத்ததோ அனுபஸ்ஸதி, நோ அத்ததோ; நிப்³பி³ந்த³தி, நோ நந்த³தி; விரஜ்ஜதி, நோ ரஜ்ஜதி, நிரோதே⁴தி, நோ ஸமுதே³தி; படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞங் பஜஹதி, து³க்க²தோ அனுபஸ்ஸந்தோ ஸுக²ஸஞ்ஞங் பஜஹதி, அனத்ததோ அனுபஸ்ஸந்தோ அத்தஸஞ்ஞங் பஜஹதி, நிப்³பி³ந்த³ந்தோ நந்தி³ங் பஜஹதி, விரஜ்ஜந்தோ ராக³ங் பஜஹதி, நிரோதெ⁴ந்தோ ஸமுத³யங் பஜஹதி, படினிஸ்ஸஜ்ஜந்தோ ஆதா³னங் பஜஹதி . இமேஹி ஸத்தஹி ஆகாரேஹி காயங் அனுபஸ்ஸதி. காயோ உபட்டா²னங், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தங் காயங் அனுபஸ்ஸதி. தேன வுச்சதி – ‘‘காயே காயானுபஸ்ஸனாஸதிபட்டா²னா’’.
Idhekacco āpokāyaṃ…pe… tejokāyaṃ… vāyokāyaṃ… kesakāyaṃ… lomakāyaṃ… chavikāyaṃ… cammakāyaṃ… maṃsakāyaṃ… rudhirakāyaṃ… nhārukāyaṃ 2 … aṭṭhikāyaṃ… aṭṭhimiñjakāyaṃ aniccato anupassati, no niccato; dukkhato anupassati, no sukhato ; anattato anupassati, no attato; nibbindati, no nandati; virajjati, no rajjati, nirodheti, no samudeti; paṭinissajjati, no ādiyati. Aniccato anupassanto niccasaññaṃ pajahati, dukkhato anupassanto sukhasaññaṃ pajahati, anattato anupassanto attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati . Imehi sattahi ākārehi kāyaṃ anupassati. Kāyo upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ kāyaṃ anupassati. Tena vuccati – ‘‘kāye kāyānupassanāsatipaṭṭhānā’’.
பா⁴வனாதி சதஸ்ஸோ பா⁴வனா – தத்த² ஜாதானங் த⁴ம்மானங் அனதிவத்தனட்டே²ன பா⁴வனா, இந்த்³ரியானங் ஏகரஸட்டே²ன பா⁴வனா, தது³பக³வீரியவாஹனட்டே²ன பா⁴வனா, ஆஸேவனட்டே²ன பா⁴வனா. ஏவங் காயே காயானுபஸ்ஸீ விஹரதி.
Bhāvanāti catasso bhāvanā – tattha jātānaṃ dhammānaṃ anativattanaṭṭhena bhāvanā, indriyānaṃ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā. Evaṃ kāye kāyānupassī viharati.
[க²] கத²ங் வேத³னாஸு வேத³னானுபஸ்ஸீ விஹரதி? இதே⁴கச்சோ ஸுக²ங் வேத³னங் அனிச்சதோ அனுபஸ்ஸதி, நோ நிச்சதோ…பே॰… படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞங் பஜஹதி…பே॰… படினிஸ்ஸஜ்ஜந்தோ ஆதா³னங் பஜஹதி. இமேஹி ஸத்தஹி ஆகாரேஹி வேத³னங் அனுபஸ்ஸதி. வேத³னா உபட்டா²னங், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தங் வேத³னங் அனுபஸ்ஸதி. தேன வுச்சதி – ‘‘வேத³னாஸு வேத³னானுபஸ்ஸனாஸதிபட்டா²னா’’.
[Kha] kathaṃ vedanāsu vedanānupassī viharati? Idhekacco sukhaṃ vedanaṃ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṃ pajahati…pe… paṭinissajjanto ādānaṃ pajahati. Imehi sattahi ākārehi vedanaṃ anupassati. Vedanā upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ vedanaṃ anupassati. Tena vuccati – ‘‘vedanāsu vedanānupassanāsatipaṭṭhānā’’.
பா⁴வனாதி சதஸ்ஸோ பா⁴வனா…பே॰… ஆஸேவனட்டே²ன பா⁴வனா…பே॰… இதே⁴கச்சோ து³க்க²ங் வேத³னங்…பே॰… அது³க்க²மஸுக²ங் வேத³னங்… ஸாமிஸங் ஸுக²ங் வேத³னங்… நிராமிஸங் ஸுக²ங் வேத³னங்… ஸாமிஸங் து³க்க²ங் வேத³னங்… நிராமிஸங் து³க்க²ங் வேத³னங்… ஸாமிஸங் அது³க்க²மஸுக²ங் வேத³னங்… நிராமிஸங் அது³க்க²மஸுக²ங் வேத³னங்… சக்கு²ஸம்ப²ஸ்ஸஜங் வேத³னங்… ஸோதஸம்ப²ஸ்ஸஜங் வேத³னங்… கா⁴னஸம்ப²ஸ்ஸஜங் வேத³னங்… ஜிவ்ஹாஸம்ப²ஸ்ஸஜங் வேத³னங்… காயஸம்ப²ஸ்ஸஜங் வேத³னங்… மனோஸம்ப²ஸ்ஸஜங் வேத³னங் அனிச்சதோ அனுபஸ்ஸதி, நோ நிச்சதோ…பே॰… படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞங் பஜஹதி…பே॰… படினிஸ்ஸஜ்ஜந்தோ ஆதா³னங் பஜஹதி. இமேஹி ஸத்தஹி ஆகாரேஹி வேத³னங் அனுபஸ்ஸதி. வேத³னா உபட்டா²னங், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தங் வேத³னங் அனுபஸ்ஸதி. தேன வுச்சதி – ‘‘வேத³னாஸு வேத³னானுபஸ்ஸனாஸதிபட்டா²னா’’.
Bhāvanāti catasso bhāvanā…pe… āsevanaṭṭhena bhāvanā…pe… idhekacco dukkhaṃ vedanaṃ…pe… adukkhamasukhaṃ vedanaṃ… sāmisaṃ sukhaṃ vedanaṃ… nirāmisaṃ sukhaṃ vedanaṃ… sāmisaṃ dukkhaṃ vedanaṃ… nirāmisaṃ dukkhaṃ vedanaṃ… sāmisaṃ adukkhamasukhaṃ vedanaṃ… nirāmisaṃ adukkhamasukhaṃ vedanaṃ… cakkhusamphassajaṃ vedanaṃ… sotasamphassajaṃ vedanaṃ… ghānasamphassajaṃ vedanaṃ… jivhāsamphassajaṃ vedanaṃ… kāyasamphassajaṃ vedanaṃ… manosamphassajaṃ vedanaṃ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṃ pajahati…pe… paṭinissajjanto ādānaṃ pajahati. Imehi sattahi ākārehi vedanaṃ anupassati. Vedanā upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ vedanaṃ anupassati. Tena vuccati – ‘‘vedanāsu vedanānupassanāsatipaṭṭhānā’’.
பா⁴வனாதி சதஸ்ஸோ பா⁴வனா…பே॰… ஏவங் வேத³னாஸு வேத³னானுபஸ்ஸீ விஹரதி.
Bhāvanāti catasso bhāvanā…pe… evaṃ vedanāsu vedanānupassī viharati.
[க³] கத²ங் சித்தே சித்தானுபஸ்ஸீ விஹரதி? இதே⁴கச்சோ ஸராக³ங் சித்தங் அனிச்சதோ அனுபஸ்ஸதி, நோ நிச்சதோ…பே॰… படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞங் பஜஹதி…பே॰… படினிஸ்ஸஜ்ஜந்தோ ஆதா³னங் பஜஹதி . இமேஹி ஸத்தஹி ஆகாரேஹி சித்தங் அனுபஸ்ஸதி. சித்தங் உபட்டா²னங், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தங் சித்தங் அனுபஸ்ஸதி. தேன வுச்சதி – ‘‘சித்தே சித்தானுபஸ்ஸனாஸதிபட்டா²னா’’.
[Ga] kathaṃ citte cittānupassī viharati? Idhekacco sarāgaṃ cittaṃ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṃ pajahati…pe… paṭinissajjanto ādānaṃ pajahati . Imehi sattahi ākārehi cittaṃ anupassati. Cittaṃ upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ cittaṃ anupassati. Tena vuccati – ‘‘citte cittānupassanāsatipaṭṭhānā’’.
பா⁴வனாதி சதஸ்ஸோ பா⁴வனா…பே॰… ஆஸேவனட்டே²ன பா⁴வனா.
Bhāvanāti catasso bhāvanā…pe… āsevanaṭṭhena bhāvanā.
இதே⁴கச்சோ வீதராக³ங் சித்தங்…பே॰… ஸதோ³ஸங் சித்தங்… வீததோ³ஸங் சித்தங்… ஸமோஹங் சித்தங்… வீதமோஹங் சித்தங்… ஸங்கி²த்தங் சித்தங்… விக்கி²த்தங் சித்தங்… மஹக்³க³தங் சித்தங்… அமஹக்³க³தங் சித்தங்… ஸஉத்தரங் சித்தங்… அனுத்தரங் சித்தங்… ஸமாஹிதங் சித்தங்… அஸமாஹிதங் சித்தங்… விமுத்தங் சித்தங்… அவிமுத்தங் சித்தங்… சக்கு²விஞ்ஞாணங்… ஸோதவிஞ்ஞாணங்… கா⁴னவிஞ்ஞாணங்… ஜிவ்ஹாவிஞ்ஞாணங்… காயவிஞ்ஞாணங்… மனோவிஞ்ஞாணங் அனிச்சதோ அனுபஸ்ஸதி, நோ நிச்சதோ…பே॰… படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞங் பஜஹதி…பே॰… படினிஸ்ஸஜ்ஜந்தோ ஆதா³னங் பஜஹதி. இமேஹி ஸத்தஹி ஆகாரேஹி சித்தங் அனுபஸ்ஸதி. சித்தங் உபட்டா²னங், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தங் சித்தங் அனுபஸ்ஸதி. தேன வுச்சதி – ‘‘சித்தே சித்தானுபஸ்ஸனாஸதிபட்டா²னா’’.
Idhekacco vītarāgaṃ cittaṃ…pe… sadosaṃ cittaṃ… vītadosaṃ cittaṃ… samohaṃ cittaṃ… vītamohaṃ cittaṃ… saṃkhittaṃ cittaṃ… vikkhittaṃ cittaṃ… mahaggataṃ cittaṃ… amahaggataṃ cittaṃ… sauttaraṃ cittaṃ… anuttaraṃ cittaṃ… samāhitaṃ cittaṃ… asamāhitaṃ cittaṃ… vimuttaṃ cittaṃ… avimuttaṃ cittaṃ… cakkhuviññāṇaṃ… sotaviññāṇaṃ… ghānaviññāṇaṃ… jivhāviññāṇaṃ… kāyaviññāṇaṃ… manoviññāṇaṃ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṃ pajahati…pe… paṭinissajjanto ādānaṃ pajahati. Imehi sattahi ākārehi cittaṃ anupassati. Cittaṃ upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ cittaṃ anupassati. Tena vuccati – ‘‘citte cittānupassanāsatipaṭṭhānā’’.
பா⁴வனாதி சதஸ்ஸோ பா⁴வனா…பே॰… ஆஸேவனட்டே²ன பா⁴வனா. ஏவங் சித்தே சித்தானுபஸ்ஸீ விஹரதி.
Bhāvanāti catasso bhāvanā…pe… āsevanaṭṭhena bhāvanā. Evaṃ citte cittānupassī viharati.
[க⁴] கத²ங் த⁴ம்மேஸு த⁴ம்மானுபஸ்ஸீ விஹரதி? இதே⁴கச்சோ ட²பெத்வா காயங் ட²பெத்வா வேத³னங் ட²பெத்வா சித்தங் தத³வஸேஸே த⁴ம்மே அனிச்சதோ அனுபஸ்ஸதி, நோ நிச்சதோ; து³க்க²தோ அனுபஸ்ஸதி, நோ ஸுக²தோ; அனத்ததோ அனுபஸ்ஸதி, நோ அத்ததோ; நிப்³பி³ந்த³தி, நோ நந்த³தி; விரஜ்ஜதி, நோ ரஜ்ஜதி; நிரோதே⁴தி, நோ ஸமுதே³தி; படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞங் பஜஹதி, து³க்க²தோ அனுபஸ்ஸந்தோ ஸுக²ஸஞ்ஞங் பஜஹதி, அனத்ததோ அனுபஸ்ஸந்தோ அத்தஸஞ்ஞங் பஜஹதி, நிப்³பி³ந்த³ந்தோ நந்தி³ங் பஜஹதி, விரஜ்ஜந்தோ ராக³ங் பஜஹதி, நிரோதெ⁴ந்தோ ஸமுத³யங் பஜஹதி, படினிஸ்ஸஜ்ஜந்தோ ஆதா³னங் பஜஹதி. இமேஹி ஸத்தஹி ஆகாரேஹி தே த⁴ம்மே அனுபஸ்ஸதி. த⁴ம்மா உபட்டா²னங், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தே த⁴ம்மே அனுபஸ்ஸதி. தேன வுச்சதி – ‘‘த⁴ம்மேஸு த⁴ம்மானுபஸ்ஸனாஸதிபட்டா²னா’’.
[Gha] kathaṃ dhammesu dhammānupassī viharati? Idhekacco ṭhapetvā kāyaṃ ṭhapetvā vedanaṃ ṭhapetvā cittaṃ tadavasese dhamme aniccato anupassati, no niccato; dukkhato anupassati, no sukhato; anattato anupassati, no attato; nibbindati, no nandati; virajjati, no rajjati; nirodheti, no samudeti; paṭinissajjati, no ādiyati. Aniccato anupassanto niccasaññaṃ pajahati, dukkhato anupassanto sukhasaññaṃ pajahati, anattato anupassanto attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Imehi sattahi ākārehi te dhamme anupassati. Dhammā upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena te dhamme anupassati. Tena vuccati – ‘‘dhammesu dhammānupassanāsatipaṭṭhānā’’.
பா⁴வனாதி சதஸ்ஸோ பா⁴வனா – தத்த² ஜாதானங் த⁴ம்மானங் அனதிவத்தனட்டே²ன பா⁴வனா, இந்த்³ரியானங் ஏகரஸட்டே²ன பா⁴வனா, தது³பக³வீரியவாஹனட்டே²ன பா⁴வனா, ஆஸேவனட்டே²ன பா⁴வனா. ஏவங் த⁴ம்மேஸு த⁴ம்மானுபஸ்ஸீ விஹரதீதி.
Bhāvanāti catasso bhāvanā – tattha jātānaṃ dhammānaṃ anativattanaṭṭhena bhāvanā, indriyānaṃ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā. Evaṃ dhammesu dhammānupassī viharatīti.
ஸதிபட்டா²னகதா² நிட்டி²தா.
Satipaṭṭhānakathā niṭṭhitā.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / ஸதிபட்டா²னகதா²வண்ணனா • Satipaṭṭhānakathāvaṇṇanā
