| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৮. সতিপট্ঠানকথা
8. Satipaṭṭhānakathā
৩৪. সাৰত্থিনিদানং । ‘‘চত্তারোমে , ভিক্খৰে, সতিপট্ঠানা। কতমে চত্তারো? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। ৰেদনাসু…পে॰… চিত্তে… ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। ইমে খো, ভিক্খৰে, চত্তারো সতিপট্ঠানা’’তি।
34. Sāvatthinidānaṃ . ‘‘Cattārome , bhikkhave, satipaṭṭhānā. Katame cattāro? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ. Vedanāsu…pe… citte… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Ime kho, bhikkhave, cattāro satipaṭṭhānā’’ti.
৩৫. [ক] কথং কাযে কাযানুপস্সী ৰিহরতি? ইধেকচ্চো পথৰীকাযং অনিচ্চতো অনুপস্সতি, নো নিচ্চতো; দুক্খতো অনুপস্সতি, নো সুখতো; অনত্ততো অনুপস্সতি, নো অত্ততো; নিব্বিন্দতি, নো নন্দতি; ৰিরজ্জতি, নো রজ্জতি; নিরোধেতি, নো সমুদেতি, পটিনিস্সজ্জতি, নো আদিযতি । অনিচ্চতো অনুপস্সন্তো নিচ্চসঞ্ঞং পজহতি, দুক্খতো অনুপস্সন্তো সুখসঞ্ঞং পজহতি, অনত্ততো অনুপস্সন্তো অত্তসঞ্ঞং পজহতি, নিব্বিন্দন্তো নন্দিং পজহতি, ৰিরজ্জন্তো রাগং পজহতি, নিরোধেন্তো সমুদযং পজহতি, পটিনিস্সজ্জন্তো আদানং পজহতি। ইমেহি সত্তহি আকারেহি কাযং অনুপস্সতি। কাযো উপট্ঠানং, নো সতি। সতি উপট্ঠানঞ্চেৰ সতি চ। তায সতিযা তেন ঞাণেন তং কাযং অনুপস্সতি। তেন ৰুচ্চতি – ‘‘কাযে কাযানুপস্সনাসতিপট্ঠানা’’।
35. [Ka] kathaṃ kāye kāyānupassī viharati? Idhekacco pathavīkāyaṃ aniccato anupassati, no niccato; dukkhato anupassati, no sukhato; anattato anupassati, no attato; nibbindati, no nandati; virajjati, no rajjati; nirodheti, no samudeti, paṭinissajjati, no ādiyati . Aniccato anupassanto niccasaññaṃ pajahati, dukkhato anupassanto sukhasaññaṃ pajahati, anattato anupassanto attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Imehi sattahi ākārehi kāyaṃ anupassati. Kāyo upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ kāyaṃ anupassati. Tena vuccati – ‘‘kāye kāyānupassanāsatipaṭṭhānā’’.
ভাৰনাতি চতস্সো ভাৰনা – তত্থ জাতানং ধম্মানং অনতিৰত্তনট্ঠেন ভাৰনা, ইন্দ্রিযানং একরসট্ঠেন ভাৰনা, তদুপগৰীরিযৰাহনট্ঠেন ভাৰনা, আসেৰনট্ঠেন ভাৰনা।
Bhāvanāti catasso bhāvanā – tattha jātānaṃ dhammānaṃ anativattanaṭṭhena bhāvanā, indriyānaṃ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā.
ইধেকচ্চো আপোকাযং…পে॰… তেজোকাযং… ৰাযোকাযং… কেসকাযং… লোমকাযং… ছৰিকাযং… চম্মকাযং… মংসকাযং… রুধিরকাযং… ন্হারুকাযং 1 … অট্ঠিকাযং… অট্ঠিমিঞ্জকাযং অনিচ্চতো অনুপস্সতি, নো নিচ্চতো; দুক্খতো অনুপস্সতি, নো সুখতো ; অনত্ততো অনুপস্সতি, নো অত্ততো; নিব্বিন্দতি, নো নন্দতি; ৰিরজ্জতি, নো রজ্জতি, নিরোধেতি, নো সমুদেতি; পটিনিস্সজ্জতি, নো আদিযতি। অনিচ্চতো অনুপস্সন্তো নিচ্চসঞ্ঞং পজহতি, দুক্খতো অনুপস্সন্তো সুখসঞ্ঞং পজহতি, অনত্ততো অনুপস্সন্তো অত্তসঞ্ঞং পজহতি, নিব্বিন্দন্তো নন্দিং পজহতি, ৰিরজ্জন্তো রাগং পজহতি, নিরোধেন্তো সমুদযং পজহতি, পটিনিস্সজ্জন্তো আদানং পজহতি । ইমেহি সত্তহি আকারেহি কাযং অনুপস্সতি। কাযো উপট্ঠানং, নো সতি। সতি উপট্ঠানঞ্চেৰ সতি চ। তায সতিযা তেন ঞাণেন তং কাযং অনুপস্সতি। তেন ৰুচ্চতি – ‘‘কাযে কাযানুপস্সনাসতিপট্ঠানা’’।
Idhekacco āpokāyaṃ…pe… tejokāyaṃ… vāyokāyaṃ… kesakāyaṃ… lomakāyaṃ… chavikāyaṃ… cammakāyaṃ… maṃsakāyaṃ… rudhirakāyaṃ… nhārukāyaṃ 2 … aṭṭhikāyaṃ… aṭṭhimiñjakāyaṃ aniccato anupassati, no niccato; dukkhato anupassati, no sukhato ; anattato anupassati, no attato; nibbindati, no nandati; virajjati, no rajjati, nirodheti, no samudeti; paṭinissajjati, no ādiyati. Aniccato anupassanto niccasaññaṃ pajahati, dukkhato anupassanto sukhasaññaṃ pajahati, anattato anupassanto attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati . Imehi sattahi ākārehi kāyaṃ anupassati. Kāyo upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ kāyaṃ anupassati. Tena vuccati – ‘‘kāye kāyānupassanāsatipaṭṭhānā’’.
ভাৰনাতি চতস্সো ভাৰনা – তত্থ জাতানং ধম্মানং অনতিৰত্তনট্ঠেন ভাৰনা, ইন্দ্রিযানং একরসট্ঠেন ভাৰনা, তদুপগৰীরিযৰাহনট্ঠেন ভাৰনা, আসেৰনট্ঠেন ভাৰনা। এৰং কাযে কাযানুপস্সী ৰিহরতি।
Bhāvanāti catasso bhāvanā – tattha jātānaṃ dhammānaṃ anativattanaṭṭhena bhāvanā, indriyānaṃ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā. Evaṃ kāye kāyānupassī viharati.
[খ] কথং ৰেদনাসু ৰেদনানুপস্সী ৰিহরতি? ইধেকচ্চো সুখং ৰেদনং অনিচ্চতো অনুপস্সতি, নো নিচ্চতো…পে॰… পটিনিস্সজ্জতি, নো আদিযতি। অনিচ্চতো অনুপস্সন্তো নিচ্চসঞ্ঞং পজহতি…পে॰… পটিনিস্সজ্জন্তো আদানং পজহতি। ইমেহি সত্তহি আকারেহি ৰেদনং অনুপস্সতি। ৰেদনা উপট্ঠানং, নো সতি। সতি উপট্ঠানঞ্চেৰ সতি চ। তায সতিযা তেন ঞাণেন তং ৰেদনং অনুপস্সতি। তেন ৰুচ্চতি – ‘‘ৰেদনাসু ৰেদনানুপস্সনাসতিপট্ঠানা’’।
[Kha] kathaṃ vedanāsu vedanānupassī viharati? Idhekacco sukhaṃ vedanaṃ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṃ pajahati…pe… paṭinissajjanto ādānaṃ pajahati. Imehi sattahi ākārehi vedanaṃ anupassati. Vedanā upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ vedanaṃ anupassati. Tena vuccati – ‘‘vedanāsu vedanānupassanāsatipaṭṭhānā’’.
ভাৰনাতি চতস্সো ভাৰনা…পে॰… আসেৰনট্ঠেন ভাৰনা…পে॰… ইধেকচ্চো দুক্খং ৰেদনং…পে॰… অদুক্খমসুখং ৰেদনং… সামিসং সুখং ৰেদনং… নিরামিসং সুখং ৰেদনং… সামিসং দুক্খং ৰেদনং… নিরামিসং দুক্খং ৰেদনং… সামিসং অদুক্খমসুখং ৰেদনং… নিরামিসং অদুক্খমসুখং ৰেদনং… চক্খুসম্ফস্সজং ৰেদনং… সোতসম্ফস্সজং ৰেদনং… ঘানসম্ফস্সজং ৰেদনং… জিৰ্হাসম্ফস্সজং ৰেদনং… কাযসম্ফস্সজং ৰেদনং… মনোসম্ফস্সজং ৰেদনং অনিচ্চতো অনুপস্সতি, নো নিচ্চতো…পে॰… পটিনিস্সজ্জতি, নো আদিযতি। অনিচ্চতো অনুপস্সন্তো নিচ্চসঞ্ঞং পজহতি…পে॰… পটিনিস্সজ্জন্তো আদানং পজহতি। ইমেহি সত্তহি আকারেহি ৰেদনং অনুপস্সতি। ৰেদনা উপট্ঠানং, নো সতি। সতি উপট্ঠানঞ্চেৰ সতি চ। তায সতিযা তেন ঞাণেন তং ৰেদনং অনুপস্সতি। তেন ৰুচ্চতি – ‘‘ৰেদনাসু ৰেদনানুপস্সনাসতিপট্ঠানা’’।
Bhāvanāti catasso bhāvanā…pe… āsevanaṭṭhena bhāvanā…pe… idhekacco dukkhaṃ vedanaṃ…pe… adukkhamasukhaṃ vedanaṃ… sāmisaṃ sukhaṃ vedanaṃ… nirāmisaṃ sukhaṃ vedanaṃ… sāmisaṃ dukkhaṃ vedanaṃ… nirāmisaṃ dukkhaṃ vedanaṃ… sāmisaṃ adukkhamasukhaṃ vedanaṃ… nirāmisaṃ adukkhamasukhaṃ vedanaṃ… cakkhusamphassajaṃ vedanaṃ… sotasamphassajaṃ vedanaṃ… ghānasamphassajaṃ vedanaṃ… jivhāsamphassajaṃ vedanaṃ… kāyasamphassajaṃ vedanaṃ… manosamphassajaṃ vedanaṃ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṃ pajahati…pe… paṭinissajjanto ādānaṃ pajahati. Imehi sattahi ākārehi vedanaṃ anupassati. Vedanā upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ vedanaṃ anupassati. Tena vuccati – ‘‘vedanāsu vedanānupassanāsatipaṭṭhānā’’.
ভাৰনাতি চতস্সো ভাৰনা…পে॰… এৰং ৰেদনাসু ৰেদনানুপস্সী ৰিহরতি।
Bhāvanāti catasso bhāvanā…pe… evaṃ vedanāsu vedanānupassī viharati.
[গ] কথং চিত্তে চিত্তানুপস্সী ৰিহরতি? ইধেকচ্চো সরাগং চিত্তং অনিচ্চতো অনুপস্সতি, নো নিচ্চতো…পে॰… পটিনিস্সজ্জতি, নো আদিযতি। অনিচ্চতো অনুপস্সন্তো নিচ্চসঞ্ঞং পজহতি…পে॰… পটিনিস্সজ্জন্তো আদানং পজহতি । ইমেহি সত্তহি আকারেহি চিত্তং অনুপস্সতি। চিত্তং উপট্ঠানং, নো সতি। সতি উপট্ঠানঞ্চেৰ সতি চ। তায সতিযা তেন ঞাণেন তং চিত্তং অনুপস্সতি। তেন ৰুচ্চতি – ‘‘চিত্তে চিত্তানুপস্সনাসতিপট্ঠানা’’।
[Ga] kathaṃ citte cittānupassī viharati? Idhekacco sarāgaṃ cittaṃ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṃ pajahati…pe… paṭinissajjanto ādānaṃ pajahati . Imehi sattahi ākārehi cittaṃ anupassati. Cittaṃ upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ cittaṃ anupassati. Tena vuccati – ‘‘citte cittānupassanāsatipaṭṭhānā’’.
ভাৰনাতি চতস্সো ভাৰনা…পে॰… আসেৰনট্ঠেন ভাৰনা।
Bhāvanāti catasso bhāvanā…pe… āsevanaṭṭhena bhāvanā.
ইধেকচ্চো ৰীতরাগং চিত্তং…পে॰… সদোসং চিত্তং… ৰীতদোসং চিত্তং… সমোহং চিত্তং… ৰীতমোহং চিত্তং… সংখিত্তং চিত্তং… ৰিক্খিত্তং চিত্তং… মহগ্গতং চিত্তং… অমহগ্গতং চিত্তং… সউত্তরং চিত্তং… অনুত্তরং চিত্তং… সমাহিতং চিত্তং… অসমাহিতং চিত্তং… ৰিমুত্তং চিত্তং… অৰিমুত্তং চিত্তং… চক্খুৰিঞ্ঞাণং… সোতৰিঞ্ঞাণং… ঘানৰিঞ্ঞাণং… জিৰ্হাৰিঞ্ঞাণং… কাযৰিঞ্ঞাণং… মনোৰিঞ্ঞাণং অনিচ্চতো অনুপস্সতি, নো নিচ্চতো…পে॰… পটিনিস্সজ্জতি, নো আদিযতি। অনিচ্চতো অনুপস্সন্তো নিচ্চসঞ্ঞং পজহতি…পে॰… পটিনিস্সজ্জন্তো আদানং পজহতি। ইমেহি সত্তহি আকারেহি চিত্তং অনুপস্সতি। চিত্তং উপট্ঠানং, নো সতি। সতি উপট্ঠানঞ্চেৰ সতি চ। তায সতিযা তেন ঞাণেন তং চিত্তং অনুপস্সতি। তেন ৰুচ্চতি – ‘‘চিত্তে চিত্তানুপস্সনাসতিপট্ঠানা’’।
Idhekacco vītarāgaṃ cittaṃ…pe… sadosaṃ cittaṃ… vītadosaṃ cittaṃ… samohaṃ cittaṃ… vītamohaṃ cittaṃ… saṃkhittaṃ cittaṃ… vikkhittaṃ cittaṃ… mahaggataṃ cittaṃ… amahaggataṃ cittaṃ… sauttaraṃ cittaṃ… anuttaraṃ cittaṃ… samāhitaṃ cittaṃ… asamāhitaṃ cittaṃ… vimuttaṃ cittaṃ… avimuttaṃ cittaṃ… cakkhuviññāṇaṃ… sotaviññāṇaṃ… ghānaviññāṇaṃ… jivhāviññāṇaṃ… kāyaviññāṇaṃ… manoviññāṇaṃ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṃ pajahati…pe… paṭinissajjanto ādānaṃ pajahati. Imehi sattahi ākārehi cittaṃ anupassati. Cittaṃ upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena taṃ cittaṃ anupassati. Tena vuccati – ‘‘citte cittānupassanāsatipaṭṭhānā’’.
ভাৰনাতি চতস্সো ভাৰনা…পে॰… আসেৰনট্ঠেন ভাৰনা। এৰং চিত্তে চিত্তানুপস্সী ৰিহরতি।
Bhāvanāti catasso bhāvanā…pe… āsevanaṭṭhena bhāvanā. Evaṃ citte cittānupassī viharati.
[ঘ] কথং ধম্মেসু ধম্মানুপস্সী ৰিহরতি? ইধেকচ্চো ঠপেত্ৰা কাযং ঠপেত্ৰা ৰেদনং ঠপেত্ৰা চিত্তং তদৰসেসে ধম্মে অনিচ্চতো অনুপস্সতি, নো নিচ্চতো; দুক্খতো অনুপস্সতি, নো সুখতো; অনত্ততো অনুপস্সতি, নো অত্ততো; নিব্বিন্দতি, নো নন্দতি; ৰিরজ্জতি, নো রজ্জতি; নিরোধেতি, নো সমুদেতি; পটিনিস্সজ্জতি, নো আদিযতি। অনিচ্চতো অনুপস্সন্তো নিচ্চসঞ্ঞং পজহতি, দুক্খতো অনুপস্সন্তো সুখসঞ্ঞং পজহতি, অনত্ততো অনুপস্সন্তো অত্তসঞ্ঞং পজহতি, নিব্বিন্দন্তো নন্দিং পজহতি, ৰিরজ্জন্তো রাগং পজহতি, নিরোধেন্তো সমুদযং পজহতি, পটিনিস্সজ্জন্তো আদানং পজহতি। ইমেহি সত্তহি আকারেহি তে ধম্মে অনুপস্সতি। ধম্মা উপট্ঠানং, নো সতি। সতি উপট্ঠানঞ্চেৰ সতি চ। তায সতিযা তেন ঞাণেন তে ধম্মে অনুপস্সতি। তেন ৰুচ্চতি – ‘‘ধম্মেসু ধম্মানুপস্সনাসতিপট্ঠানা’’।
[Gha] kathaṃ dhammesu dhammānupassī viharati? Idhekacco ṭhapetvā kāyaṃ ṭhapetvā vedanaṃ ṭhapetvā cittaṃ tadavasese dhamme aniccato anupassati, no niccato; dukkhato anupassati, no sukhato; anattato anupassati, no attato; nibbindati, no nandati; virajjati, no rajjati; nirodheti, no samudeti; paṭinissajjati, no ādiyati. Aniccato anupassanto niccasaññaṃ pajahati, dukkhato anupassanto sukhasaññaṃ pajahati, anattato anupassanto attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Imehi sattahi ākārehi te dhamme anupassati. Dhammā upaṭṭhānaṃ, no sati. Sati upaṭṭhānañceva sati ca. Tāya satiyā tena ñāṇena te dhamme anupassati. Tena vuccati – ‘‘dhammesu dhammānupassanāsatipaṭṭhānā’’.
ভাৰনাতি চতস্সো ভাৰনা – তত্থ জাতানং ধম্মানং অনতিৰত্তনট্ঠেন ভাৰনা, ইন্দ্রিযানং একরসট্ঠেন ভাৰনা, তদুপগৰীরিযৰাহনট্ঠেন ভাৰনা, আসেৰনট্ঠেন ভাৰনা। এৰং ধম্মেসু ধম্মানুপস্সী ৰিহরতীতি।
Bhāvanāti catasso bhāvanā – tattha jātānaṃ dhammānaṃ anativattanaṭṭhena bhāvanā, indriyānaṃ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā. Evaṃ dhammesu dhammānupassī viharatīti.
সতিপট্ঠানকথা নিট্ঠিতা।
Satipaṭṭhānakathā niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / সতিপট্ঠানকথাৰণ্ণনা • Satipaṭṭhānakathāvaṇṇanā
