| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៨. សតិបដ្ឋានកថា
8. Satipaṭṭhānakathā
៣០១. សព្ពេ ធម្មា សតិបដ្ឋានាតិ? អាមន្តា។ សព្ពេ ធម្មា សតិ សតិន្ទ្រិយំ សតិពលំ សម្មាសតិ សតិសម្ពោជ្ឈង្គោ ឯកាយនមគ្គោ ខយគាមី ពោធគាមី អបចយគាមី អនាសវា អសំយោជនិយា អគន្ថនិយា អនោឃនិយា អយោគនិយា អនីវរណិយា អបរាមដ្ឋា អនុបាទានិយា អសំកិលេសិកា, សព្ពេ ធម្មា ពុទ្ធានុស្សតិ ធម្មានុស្សតិ សង្ឃានុស្សតិ សីលានុស្សតិ ចាគានុស្សតិ ទេវតានុស្សតិ អានាបានស្សតិ មរណានុស្សតិ កាយគតាសតិ ឧបសមានុស្សតីតិ? ន ហេវំ វត្តព្ពេ…បេ.…។
301. Sabbe dhammā satipaṭṭhānāti? Āmantā. Sabbe dhammā sati satindriyaṃ satibalaṃ sammāsati satisambojjhaṅgo ekāyanamaggo khayagāmī bodhagāmī apacayagāmī anāsavā asaṃyojaniyā aganthaniyā anoghaniyā ayoganiyā anīvaraṇiyā aparāmaṭṭhā anupādāniyā asaṃkilesikā, sabbe dhammā buddhānussati dhammānussati saṅghānussati sīlānussati cāgānussati devatānussati ānāpānassati maraṇānussati kāyagatāsati upasamānussatīti? Na hevaṃ vattabbe…pe….
សព្ពេ ធម្មា សតិបដ្ឋានាតិ? អាមន្តា។ ចក្ខាយតនំ សតិបដ្ឋានន្តិ? ន ហេវំ វត្តព្ពេ…បេ.… ចក្ខាយតនំ សតិបដ្ឋានន្តិ ? អាមន្តា។ ចក្ខាយតនំ សតិ សតិន្ទ្រិយំ សតិពលំ សម្មាសតិ សតិសម្ពោជ្ឈង្គោ ឯកាយនមគ្គោ ខយគាមី ពោធគាមី អបចយគាមី អនាសវំ អសំយោជនិយំ…បេ.… អសំកិលេសិកំ, ចក្ខាយតនំ ពុទ្ធានុស្សតិ ធម្មានុស្សតិ សង្ឃានុស្សតិ សីលានុស្សតិ ចាគានុស្សតិ ទេវតានុស្សតិ អានាបានស្សតិ មរណានុស្សតិ កាយគតាសតិ ឧបសមានុស្សតីតិ? ន ហេវំ វត្តព្ពេ…បេ.… សោតាយតនំ… ឃានាយតនំ… ជិវ្ហាយតនំ… កាយាយតនំ… រូបាយតនំ… សទ្ទាយតនំ… គន្ធាយតនំ… រសាយតនំ… ផោដ្ឋព្ពាយតនំ… រាគោ… ទោសោ… មោហោ… មានោ… ទិដ្ឋិ… វិចិកិច្ឆា… ថិនំ… ឧទ្ធច្ចំ… អហិរិកំ… អនោត្តប្បំ សតិបដ្ឋានន្តិ? ន ហេវំ វត្តព្ពេ…បេ.… អនោត្តប្បំ សតិបដ្ឋានន្តិ? អាមន្តា។ អនោត្តប្បំ សតិ សតិន្ទ្រិយំ សតិពលំ សម្មាសតិ…បេ.… កាយគតាសតិ ឧបសមានុស្សតីតិ? ន ហេវំ វត្តព្ពេ…បេ.…។
Sabbe dhammā satipaṭṭhānāti? Āmantā. Cakkhāyatanaṃ satipaṭṭhānanti? Na hevaṃ vattabbe…pe… cakkhāyatanaṃ satipaṭṭhānanti ? Āmantā. Cakkhāyatanaṃ sati satindriyaṃ satibalaṃ sammāsati satisambojjhaṅgo ekāyanamaggo khayagāmī bodhagāmī apacayagāmī anāsavaṃ asaṃyojaniyaṃ…pe… asaṃkilesikaṃ, cakkhāyatanaṃ buddhānussati dhammānussati saṅghānussati sīlānussati cāgānussati devatānussati ānāpānassati maraṇānussati kāyagatāsati upasamānussatīti? Na hevaṃ vattabbe…pe… sotāyatanaṃ… ghānāyatanaṃ… jivhāyatanaṃ… kāyāyatanaṃ… rūpāyatanaṃ… saddāyatanaṃ… gandhāyatanaṃ… rasāyatanaṃ… phoṭṭhabbāyatanaṃ… rāgo… doso… moho… māno… diṭṭhi… vicikicchā… thinaṃ… uddhaccaṃ… ahirikaṃ… anottappaṃ satipaṭṭhānanti? Na hevaṃ vattabbe…pe… anottappaṃ satipaṭṭhānanti? Āmantā. Anottappaṃ sati satindriyaṃ satibalaṃ sammāsati…pe… kāyagatāsati upasamānussatīti? Na hevaṃ vattabbe…pe….
សតិ សតិបដ្ឋានា, សា ច សតីតិ? អាមន្តា។ ចក្ខាយតនំ សតិបដ្ឋានំ, តញ្ច សតីតិ? ន ហេវំ វត្តព្ពេ…បេ.… សតិ សតិបដ្ឋានា, សា ច សតីតិ? អាមន្តា។ សោតាយតនំ…បេ.… កាយាយតនំ… រូបាយតនំ…បេ.… ផោដ្ឋព្ពាយតនំ… រាគោ… ទោសោ… មោហោ…បេ.… អនោត្តប្បំ សតិបដ្ឋានំ, តញ្ច សតីតិ? ន ហេវំ វត្តព្ពេ…បេ.…។
Sati satipaṭṭhānā, sā ca satīti? Āmantā. Cakkhāyatanaṃ satipaṭṭhānaṃ, tañca satīti? Na hevaṃ vattabbe…pe… sati satipaṭṭhānā, sā ca satīti? Āmantā. Sotāyatanaṃ…pe… kāyāyatanaṃ… rūpāyatanaṃ…pe… phoṭṭhabbāyatanaṃ… rāgo… doso… moho…pe… anottappaṃ satipaṭṭhānaṃ, tañca satīti? Na hevaṃ vattabbe…pe….
ចក្ខាយតនំ សតិបដ្ឋានំ, តញ្ច ន សតីតិ? អាមន្តា។ សតិ សតិបដ្ឋានា, សា ច ន សតីតិ? ន ហេវំ វត្តព្ពេ…បេ.… សោតាយតនំ…បេ.… កាយាយតនំ… រូបាយតនំ…បេ.… ផោដ្ឋព្ពាយតនំ… រាគោ … ទោសោ… មោហោ…បេ.… អនោត្តប្បំ សតិបដ្ឋានំ, តញ្ច ន សតីតិ? អាមន្តា ។ សតិ សតិបដ្ឋានា, សា ច ន សតីតិ? ន ហេវំ វត្តព្ពេ…បេ.…។
Cakkhāyatanaṃ satipaṭṭhānaṃ, tañca na satīti? Āmantā. Sati satipaṭṭhānā, sā ca na satīti? Na hevaṃ vattabbe…pe… sotāyatanaṃ…pe… kāyāyatanaṃ… rūpāyatanaṃ…pe… phoṭṭhabbāyatanaṃ… rāgo … doso… moho…pe… anottappaṃ satipaṭṭhānaṃ, tañca na satīti? Āmantā . Sati satipaṭṭhānā, sā ca na satīti? Na hevaṃ vattabbe…pe….
៣០២. ន វត្តព្ពំ – ‘‘សព្ពេ ធម្មា សតិបដ្ឋានា’’តិ? អាមន្តា។ ននុ សព្ពេ ធម្មេ អារព្ភ សតិ សន្តិដ្ឋតីតិ? អាមន្តា។ ហញ្ចិ សព្ពេ ធម្មេ អារព្ភ សតិ សន្តិដ្ឋតីតិ, តេន វត រេ វត្តព្ពេ – ‘‘សព្ពេ ធម្មា សតិបដ្ឋានា’’តិ។
302. Na vattabbaṃ – ‘‘sabbe dhammā satipaṭṭhānā’’ti? Āmantā. Nanu sabbe dhamme ārabbha sati santiṭṭhatīti? Āmantā. Hañci sabbe dhamme ārabbha sati santiṭṭhatīti, tena vata re vattabbe – ‘‘sabbe dhammā satipaṭṭhānā’’ti.
សព្ពំ ធម្មំ អារព្ភ សតិ សន្តិដ្ឋតីតិ សព្ពេ ធម្មា សតិបដ្ឋានាតិ? អាមន្តា។ សព្ពំ ធម្មំ អារព្ភ ផស្សោ សន្តិដ្ឋតីតិ សព្ពេ ធម្មា ផស្សបដ្ឋានាតិ? ន ហេវំ វត្តព្ពេ…បេ.…។
Sabbaṃ dhammaṃ ārabbha sati santiṭṭhatīti sabbe dhammā satipaṭṭhānāti? Āmantā. Sabbaṃ dhammaṃ ārabbha phasso santiṭṭhatīti sabbe dhammā phassapaṭṭhānāti? Na hevaṃ vattabbe…pe….
សព្ពំ ធម្មំ អារព្ភ សតិ សន្តិដ្ឋតីតិ សព្ពេ ធម្មា សតិបដ្ឋានាតិ? អាមន្តា។ សព្ពំ ធម្មំ អារព្ភ វេទនា សន្តិដ្ឋតិ… សញ្ញា សន្តិដ្ឋតិ… ចេតនា សន្តិដ្ឋតិ… ចិត្តំ សន្តិដ្ឋតីតិ សព្ពេ ធម្មា ចិត្តបដ្ឋានាតិ? ន ហេវំ វត្តព្ពេ…បេ.…។
Sabbaṃ dhammaṃ ārabbha sati santiṭṭhatīti sabbe dhammā satipaṭṭhānāti? Āmantā. Sabbaṃ dhammaṃ ārabbha vedanā santiṭṭhati… saññā santiṭṭhati… cetanā santiṭṭhati… cittaṃ santiṭṭhatīti sabbe dhammā cittapaṭṭhānāti? Na hevaṃ vattabbe…pe….
សព្ពេ ធម្មា សតិបដ្ឋានាតិ? អាមន្តា។ សព្ពេ សត្តា ឧបដ្ឋិតសតិនោ សតិយា សមន្នាគតា សតិយា សមោហិតា; សព្ពេសំ សត្តានំ សតិ បច្ចុបដ្ឋិតាតិ? ន ហេវំ វត្តព្ពេ…បេ.…។
Sabbe dhammā satipaṭṭhānāti? Āmantā. Sabbe sattā upaṭṭhitasatino satiyā samannāgatā satiyā samohitā; sabbesaṃ sattānaṃ sati paccupaṭṭhitāti? Na hevaṃ vattabbe…pe….
៣០៣. សព្ពេ ធម្មា សតិបដ្ឋានាតិ? អាមន្តា។ ននុ វុត្តំ ភគវតា – ‘‘អមតំ តេ, ភិក្ខវេ, ន បរិភុញ្ជន្តិ យេ កាយគតាសតិំ ន បរិភុញ្ជន្តិ។ អមតំ តេ, ភិក្ខវេ, បរិភុញ្ជន្តិ យេ កាយគតាសតិំ បរិភុញ្ជន្តី’’តិ 1។ អត្ថេវ សុត្តន្តោតិ? អាមន្តា។ សព្ពេ សត្តា កាយគតាសតិំ បរិភុញ្ជន្តិ បដិលភន្តិ អាសេវន្តិ ភាវេន្តិ ពហុលីករោន្តីតិ? ន ហេវំ វត្តព្ពេ…បេ.…។
303. Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘amataṃ te, bhikkhave, na paribhuñjanti ye kāyagatāsatiṃ na paribhuñjanti. Amataṃ te, bhikkhave, paribhuñjanti ye kāyagatāsatiṃ paribhuñjantī’’ti 2. Attheva suttantoti? Āmantā. Sabbe sattā kāyagatāsatiṃ paribhuñjanti paṭilabhanti āsevanti bhāventi bahulīkarontīti? Na hevaṃ vattabbe…pe….
សព្ពេ ធម្មា សតិបដ្ឋានាតិ? អាមន្តា។ ននុ វុត្តំ ភគវតា – ‘‘ឯកាយនោ អយំ, ភិក្ខវេ, មគ្គោ សត្តានំ វិសុទ្ធិយា សោកបរិទេវានំ សមតិក្កមាយ ទុក្ខទោមនស្សានំ អត្ថង្គមាយ ញាយស្ស អធិគមាយ និព្ពានស្ស សច្ឆិកិរិយាយ យទិទំ ចត្តារោ សតិបដ្ឋានា’’តិ 3! អត្ថេវ សុត្តន្តោតិ? អាមន្តា? សព្ពេ ធម្មា ឯកាយនមគ្គោតិ? ន ហេវំ វត្តព្ពេ…បេ.…។
Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘ekāyano ayaṃ, bhikkhave, maggo sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya yadidaṃ cattāro satipaṭṭhānā’’ti 4! Attheva suttantoti? Āmantā? Sabbe dhammā ekāyanamaggoti? Na hevaṃ vattabbe…pe….
សព្ពេ ធម្មា សតិបដ្ឋានាតិ? អាមន្តា។ ននុ វុត្តំ ភគវតា – ‘‘រញ្ញោ, ភិក្ខវេ, ចក្កវត្តិស្ស បាតុភាវា សត្តន្នំ រតនានំ បាតុភាវោ ហោតិ។ កតមេសំ សត្តន្នំ? ចក្ករតនស្ស បាតុភាវោ ហោតិ, ហត្ថិរតនស្ស បាតុភាវោ ហោតិ, អស្សរតនស្ស… មណិរតនស្ស… ឥត្ថិរតនស្ស … គហបតិរតនស្ស… បរិណាយករតនស្ស បាតុភាវោ ហោតិ ។ រញ្ញោ, ភិក្ខវេ, ចក្កវត្តិស្ស បាតុភាវា ឥមេសំ សត្តន្នំ រតនានំ បាតុភាវោ ហោតិ។
Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘rañño, bhikkhave, cakkavattissa pātubhāvā sattannaṃ ratanānaṃ pātubhāvo hoti. Katamesaṃ sattannaṃ? Cakkaratanassa pātubhāvo hoti, hatthiratanassa pātubhāvo hoti, assaratanassa… maṇiratanassa… itthiratanassa … gahapatiratanassa… pariṇāyakaratanassa pātubhāvo hoti . Rañño, bhikkhave, cakkavattissa pātubhāvā imesaṃ sattannaṃ ratanānaṃ pātubhāvo hoti.
‘‘តថាគតស្ស, ភិក្ខវេ, បាតុភាវា អរហតោ សម្មាសម្ពុទ្ធស្ស សត្តន្នំ ពោជ្ឈង្គរតនានំ បាតុភាវោ ហោតិ។ កតមេសំ សត្តន្នំ? សតិសម្ពោជ្ឈង្គរតនស្ស បាតុភាវោ ហោតិ, ធម្មវិចយសម្ពោជ្ឈង្គរតនស្ស បាតុភាវោ ហោតិ, វីរិយសម្ពោជ្ឈង្គរតនស្ស បាតុភាវោ ហោតិ, បីតិសម្ពោជ្ឈង្គរតនស្ស បាតុភាវោ ហោតិ, បស្សទ្ធិសម្ពោជ្ឈង្គរតនស្ស បាតុភាវោ ហោតិ, សមាធិសម្ពោជ្ឈង្គរតនស្ស បាតុភាវោ ហោតិ, ឧបេក្ខាសម្ពោជ្ឈង្គរតនស្ស បាតុភាវោ ហោតិ។ តថាគតស្ស, ភិក្ខវេ, បាតុភាវា អរហតោ សម្មាសម្ពុទ្ធស្ស ឥមេសំ សត្តន្នំ ពោជ្ឈង្គរតនានំ បាតុភាវោ ហោតី’’តិ 5។ អត្ថេវ សុត្តន្តោតិ? អាមន្តា។ តថាគតស្ស បាតុភាវា អរហតោ សម្មាសម្ពុទ្ធស្ស សព្ពេ ធម្មា សតិសម្ពោជ្ឈង្គរតនាវ ហោន្តីតិ? ន ហេវំ វត្តព្ពេ…បេ.… សព្ពេ ធម្មា សតិបដ្ឋានាតិ? អាមន្តា។ សព្ពេ ធម្មា សម្មប្បធានា… ឥទ្ធិបាទា… ឥន្ទ្រិយា… ពលា… ពោជ្ឈង្គាតិ? ន ហេវំ វត្តព្ពេ…បេ.…។
‘‘Tathāgatassa, bhikkhave, pātubhāvā arahato sammāsambuddhassa sattannaṃ bojjhaṅgaratanānaṃ pātubhāvo hoti. Katamesaṃ sattannaṃ? Satisambojjhaṅgaratanassa pātubhāvo hoti, dhammavicayasambojjhaṅgaratanassa pātubhāvo hoti, vīriyasambojjhaṅgaratanassa pātubhāvo hoti, pītisambojjhaṅgaratanassa pātubhāvo hoti, passaddhisambojjhaṅgaratanassa pātubhāvo hoti, samādhisambojjhaṅgaratanassa pātubhāvo hoti, upekkhāsambojjhaṅgaratanassa pātubhāvo hoti. Tathāgatassa, bhikkhave, pātubhāvā arahato sammāsambuddhassa imesaṃ sattannaṃ bojjhaṅgaratanānaṃ pātubhāvo hotī’’ti 6. Attheva suttantoti? Āmantā. Tathāgatassa pātubhāvā arahato sammāsambuddhassa sabbe dhammā satisambojjhaṅgaratanāva hontīti? Na hevaṃ vattabbe…pe… sabbe dhammā satipaṭṭhānāti? Āmantā. Sabbe dhammā sammappadhānā… iddhipādā… indriyā… balā… bojjhaṅgāti? Na hevaṃ vattabbe…pe….
សតិបដ្ឋានកថា និដ្ឋិតា។
Satipaṭṭhānakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៨. សតិបដ្ឋានកថាវណ្ណនា • 8. Satipaṭṭhānakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៨. សតិបដ្ឋានកថាវណ្ណនា • 8. Satipaṭṭhānakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៨. សតិបដ្ឋានកថាវណ្ណនា • 8. Satipaṭṭhānakathāvaṇṇanā
