| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༨. སཏིཔཊྛཱནཀཐཱ
8. Satipaṭṭhānakathā
༣༠༡. སབྦེ དྷམྨཱ སཏིཔཊྛཱནཱཏི? ཨཱམནྟཱ། སབྦེ དྷམྨཱ སཏི སཏིནྡྲིཡཾ སཏིབལཾ སམྨཱསཏི སཏིསམྦོཛ྄ཛྷངྒོ ཨེཀཱཡནམགྒོ ཁཡགཱམཱི བོདྷགཱམཱི ཨཔཙཡགཱམཱི ཨནཱསཝཱ ཨསཾཡོཛནིཡཱ ཨགནྠནིཡཱ ཨནོགྷནིཡཱ ཨཡོགནིཡཱ ཨནཱིཝརཎིཡཱ ཨཔརཱམཊྛཱ ཨནུཔཱདཱནིཡཱ ཨསཾཀིལེསིཀཱ, སབྦེ དྷམྨཱ བུདྡྷཱནུསྶཏི དྷམྨཱནུསྶཏི སངྒྷཱནུསྶཏི སཱིལཱནུསྶཏི ཙཱགཱནུསྶཏི དེཝཏཱནུསྶཏི ཨཱནཱཔཱནསྶཏི མརཎཱནུསྶཏི ཀཱཡགཏཱསཏི ཨུཔསམཱནུསྶཏཱིཏི? ན ཧེཝཾ ཝཏྟབྦེ…པེ॰…།
301. Sabbe dhammā satipaṭṭhānāti? Āmantā. Sabbe dhammā sati satindriyaṃ satibalaṃ sammāsati satisambojjhaṅgo ekāyanamaggo khayagāmī bodhagāmī apacayagāmī anāsavā asaṃyojaniyā aganthaniyā anoghaniyā ayoganiyā anīvaraṇiyā aparāmaṭṭhā anupādāniyā asaṃkilesikā, sabbe dhammā buddhānussati dhammānussati saṅghānussati sīlānussati cāgānussati devatānussati ānāpānassati maraṇānussati kāyagatāsati upasamānussatīti? Na hevaṃ vattabbe…pe….
སབྦེ དྷམྨཱ སཏིཔཊྛཱནཱཏི? ཨཱམནྟཱ། ཙཀྑཱཡཏནཾ སཏིཔཊྛཱནནྟི? ན ཧེཝཾ ཝཏྟབྦེ…པེ॰… ཙཀྑཱཡཏནཾ སཏིཔཊྛཱནནྟི ? ཨཱམནྟཱ། ཙཀྑཱཡཏནཾ སཏི སཏིནྡྲིཡཾ སཏིབལཾ སམྨཱསཏི སཏིསམྦོཛ྄ཛྷངྒོ ཨེཀཱཡནམགྒོ ཁཡགཱམཱི བོདྷགཱམཱི ཨཔཙཡགཱམཱི ཨནཱསཝཾ ཨསཾཡོཛནིཡཾ…པེ॰… ཨསཾཀིལེསིཀཾ, ཙཀྑཱཡཏནཾ བུདྡྷཱནུསྶཏི དྷམྨཱནུསྶཏི སངྒྷཱནུསྶཏི སཱིལཱནུསྶཏི ཙཱགཱནུསྶཏི དེཝཏཱནུསྶཏི ཨཱནཱཔཱནསྶཏི མརཎཱནུསྶཏི ཀཱཡགཏཱསཏི ཨུཔསམཱནུསྶཏཱིཏི? ན ཧེཝཾ ཝཏྟབྦེ…པེ॰… སོཏཱཡཏནཾ… གྷཱནཱཡཏནཾ… ཛིཝ྄ཧཱཡཏནཾ… ཀཱཡཱཡཏནཾ… རཱུཔཱཡཏནཾ… སདྡཱཡཏནཾ… གནྡྷཱཡཏནཾ… རསཱཡཏནཾ… ཕོཊྛབྦཱཡཏནཾ… རཱགོ… དོསོ… མོཧོ… མཱནོ… དིཊྛི… ཝིཙིཀིཙྪཱ… ཐིནཾ… ཨུདྡྷཙྩཾ… ཨཧིརིཀཾ… ཨནོཏྟཔྤཾ སཏིཔཊྛཱནནྟི? ན ཧེཝཾ ཝཏྟབྦེ…པེ॰… ཨནོཏྟཔྤཾ སཏིཔཊྛཱནནྟི? ཨཱམནྟཱ། ཨནོཏྟཔྤཾ སཏི སཏིནྡྲིཡཾ སཏིབལཾ སམྨཱསཏི…པེ॰… ཀཱཡགཏཱསཏི ཨུཔསམཱནུསྶཏཱིཏི? ན ཧེཝཾ ཝཏྟབྦེ…པེ॰…།
Sabbe dhammā satipaṭṭhānāti? Āmantā. Cakkhāyatanaṃ satipaṭṭhānanti? Na hevaṃ vattabbe…pe… cakkhāyatanaṃ satipaṭṭhānanti ? Āmantā. Cakkhāyatanaṃ sati satindriyaṃ satibalaṃ sammāsati satisambojjhaṅgo ekāyanamaggo khayagāmī bodhagāmī apacayagāmī anāsavaṃ asaṃyojaniyaṃ…pe… asaṃkilesikaṃ, cakkhāyatanaṃ buddhānussati dhammānussati saṅghānussati sīlānussati cāgānussati devatānussati ānāpānassati maraṇānussati kāyagatāsati upasamānussatīti? Na hevaṃ vattabbe…pe… sotāyatanaṃ… ghānāyatanaṃ… jivhāyatanaṃ… kāyāyatanaṃ… rūpāyatanaṃ… saddāyatanaṃ… gandhāyatanaṃ… rasāyatanaṃ… phoṭṭhabbāyatanaṃ… rāgo… doso… moho… māno… diṭṭhi… vicikicchā… thinaṃ… uddhaccaṃ… ahirikaṃ… anottappaṃ satipaṭṭhānanti? Na hevaṃ vattabbe…pe… anottappaṃ satipaṭṭhānanti? Āmantā. Anottappaṃ sati satindriyaṃ satibalaṃ sammāsati…pe… kāyagatāsati upasamānussatīti? Na hevaṃ vattabbe…pe….
སཏི སཏིཔཊྛཱནཱ, སཱ ཙ སཏཱིཏི? ཨཱམནྟཱ། ཙཀྑཱཡཏནཾ སཏིཔཊྛཱནཾ, ཏཉྩ སཏཱིཏི? ན ཧེཝཾ ཝཏྟབྦེ…པེ॰… སཏི སཏིཔཊྛཱནཱ, སཱ ཙ སཏཱིཏི? ཨཱམནྟཱ། སོཏཱཡཏནཾ…པེ॰… ཀཱཡཱཡཏནཾ… རཱུཔཱཡཏནཾ…པེ॰… ཕོཊྛབྦཱཡཏནཾ… རཱགོ… དོསོ… མོཧོ…པེ॰… ཨནོཏྟཔྤཾ སཏིཔཊྛཱནཾ, ཏཉྩ སཏཱིཏི? ན ཧེཝཾ ཝཏྟབྦེ…པེ॰…།
Sati satipaṭṭhānā, sā ca satīti? Āmantā. Cakkhāyatanaṃ satipaṭṭhānaṃ, tañca satīti? Na hevaṃ vattabbe…pe… sati satipaṭṭhānā, sā ca satīti? Āmantā. Sotāyatanaṃ…pe… kāyāyatanaṃ… rūpāyatanaṃ…pe… phoṭṭhabbāyatanaṃ… rāgo… doso… moho…pe… anottappaṃ satipaṭṭhānaṃ, tañca satīti? Na hevaṃ vattabbe…pe….
ཙཀྑཱཡཏནཾ སཏིཔཊྛཱནཾ, ཏཉྩ ན སཏཱིཏི? ཨཱམནྟཱ། སཏི སཏིཔཊྛཱནཱ, སཱ ཙ ན སཏཱིཏི? ན ཧེཝཾ ཝཏྟབྦེ…པེ॰… སོཏཱཡཏནཾ…པེ॰… ཀཱཡཱཡཏནཾ… རཱུཔཱཡཏནཾ…པེ॰… ཕོཊྛབྦཱཡཏནཾ… རཱགོ … དོསོ… མོཧོ…པེ॰… ཨནོཏྟཔྤཾ སཏིཔཊྛཱནཾ, ཏཉྩ ན སཏཱིཏི? ཨཱམནྟཱ ། སཏི སཏིཔཊྛཱནཱ, སཱ ཙ ན སཏཱིཏི? ན ཧེཝཾ ཝཏྟབྦེ…པེ॰…།
Cakkhāyatanaṃ satipaṭṭhānaṃ, tañca na satīti? Āmantā. Sati satipaṭṭhānā, sā ca na satīti? Na hevaṃ vattabbe…pe… sotāyatanaṃ…pe… kāyāyatanaṃ… rūpāyatanaṃ…pe… phoṭṭhabbāyatanaṃ… rāgo … doso… moho…pe… anottappaṃ satipaṭṭhānaṃ, tañca na satīti? Āmantā . Sati satipaṭṭhānā, sā ca na satīti? Na hevaṃ vattabbe…pe….
༣༠༢. ན ཝཏྟབྦཾ – ‘‘སབྦེ དྷམྨཱ སཏིཔཊྛཱནཱ’’ཏི? ཨཱམནྟཱ། ནནུ སབྦེ དྷམྨེ ཨཱརབྦྷ སཏི སནྟིཊྛཏཱིཏི? ཨཱམནྟཱ། ཧཉྩི སབྦེ དྷམྨེ ཨཱརབྦྷ སཏི སནྟིཊྛཏཱིཏི, ཏེན ཝཏ རེ ཝཏྟབྦེ – ‘‘སབྦེ དྷམྨཱ སཏིཔཊྛཱནཱ’’ཏི།
302. Na vattabbaṃ – ‘‘sabbe dhammā satipaṭṭhānā’’ti? Āmantā. Nanu sabbe dhamme ārabbha sati santiṭṭhatīti? Āmantā. Hañci sabbe dhamme ārabbha sati santiṭṭhatīti, tena vata re vattabbe – ‘‘sabbe dhammā satipaṭṭhānā’’ti.
སབྦཾ དྷམྨཾ ཨཱརབྦྷ སཏི སནྟིཊྛཏཱིཏི སབྦེ དྷམྨཱ སཏིཔཊྛཱནཱཏི? ཨཱམནྟཱ། སབྦཾ དྷམྨཾ ཨཱརབྦྷ ཕསྶོ སནྟིཊྛཏཱིཏི སབྦེ དྷམྨཱ ཕསྶཔཊྛཱནཱཏི? ན ཧེཝཾ ཝཏྟབྦེ…པེ॰…།
Sabbaṃ dhammaṃ ārabbha sati santiṭṭhatīti sabbe dhammā satipaṭṭhānāti? Āmantā. Sabbaṃ dhammaṃ ārabbha phasso santiṭṭhatīti sabbe dhammā phassapaṭṭhānāti? Na hevaṃ vattabbe…pe….
སབྦཾ དྷམྨཾ ཨཱརབྦྷ སཏི སནྟིཊྛཏཱིཏི སབྦེ དྷམྨཱ སཏིཔཊྛཱནཱཏི? ཨཱམནྟཱ། སབྦཾ དྷམྨཾ ཨཱརབྦྷ ཝེདནཱ སནྟིཊྛཏི… སཉྙཱ སནྟིཊྛཏི… ཙེཏནཱ སནྟིཊྛཏི… ཙིཏྟཾ སནྟིཊྛཏཱིཏི སབྦེ དྷམྨཱ ཙིཏྟཔཊྛཱནཱཏི? ན ཧེཝཾ ཝཏྟབྦེ…པེ॰…།
Sabbaṃ dhammaṃ ārabbha sati santiṭṭhatīti sabbe dhammā satipaṭṭhānāti? Āmantā. Sabbaṃ dhammaṃ ārabbha vedanā santiṭṭhati… saññā santiṭṭhati… cetanā santiṭṭhati… cittaṃ santiṭṭhatīti sabbe dhammā cittapaṭṭhānāti? Na hevaṃ vattabbe…pe….
སབྦེ དྷམྨཱ སཏིཔཊྛཱནཱཏི? ཨཱམནྟཱ། སབྦེ སཏྟཱ ཨུཔཊྛིཏསཏིནོ སཏིཡཱ སམནྣཱགཏཱ སཏིཡཱ སམོཧིཏཱ; སབྦེསཾ སཏྟཱནཾ སཏི པཙྩུཔཊྛིཏཱཏི? ན ཧེཝཾ ཝཏྟབྦེ…པེ॰…།
Sabbe dhammā satipaṭṭhānāti? Āmantā. Sabbe sattā upaṭṭhitasatino satiyā samannāgatā satiyā samohitā; sabbesaṃ sattānaṃ sati paccupaṭṭhitāti? Na hevaṃ vattabbe…pe….
༣༠༣. སབྦེ དྷམྨཱ སཏིཔཊྛཱནཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཨམཏཾ ཏེ, བྷིཀྑཝེ, ན པརིབྷུཉྫནྟི ཡེ ཀཱཡགཏཱསཏིཾ ན པརིབྷུཉྫནྟི། ཨམཏཾ ཏེ, བྷིཀྑཝེ, པརིབྷུཉྫནྟི ཡེ ཀཱཡགཏཱསཏིཾ པརིབྷུཉྫནྟཱི’’ཏི 1། ཨཏྠེཝ སུཏྟནྟོཏི? ཨཱམནྟཱ། སབྦེ སཏྟཱ ཀཱཡགཏཱསཏིཾ པརིབྷུཉྫནྟི པཊིལབྷནྟི ཨཱསེཝནྟི བྷཱཝེནྟི བཧུལཱིཀརོནྟཱིཏི? ན ཧེཝཾ ཝཏྟབྦེ…པེ॰…།
303. Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘amataṃ te, bhikkhave, na paribhuñjanti ye kāyagatāsatiṃ na paribhuñjanti. Amataṃ te, bhikkhave, paribhuñjanti ye kāyagatāsatiṃ paribhuñjantī’’ti 2. Attheva suttantoti? Āmantā. Sabbe sattā kāyagatāsatiṃ paribhuñjanti paṭilabhanti āsevanti bhāventi bahulīkarontīti? Na hevaṃ vattabbe…pe….
སབྦེ དྷམྨཱ སཏིཔཊྛཱནཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཨེཀཱཡནོ ཨཡཾ, བྷིཀྑཝེ, མགྒོ སཏྟཱནཾ ཝིསུདྡྷིཡཱ སོཀཔརིདེཝཱནཾ སམཏིཀྐམཱཡ དུཀྑདོམནསྶཱནཾ ཨཏྠངྒམཱཡ ཉཱཡསྶ ཨདྷིགམཱཡ ནིབྦཱནསྶ སཙྪིཀིརིཡཱཡ ཡདིདཾ ཙཏྟཱརོ སཏིཔཊྛཱནཱ’’ཏི 3! ཨཏྠེཝ སུཏྟནྟོཏི? ཨཱམནྟཱ? སབྦེ དྷམྨཱ ཨེཀཱཡནམགྒོཏི? ན ཧེཝཾ ཝཏྟབྦེ…པེ॰…།
Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘ekāyano ayaṃ, bhikkhave, maggo sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya yadidaṃ cattāro satipaṭṭhānā’’ti 4! Attheva suttantoti? Āmantā? Sabbe dhammā ekāyanamaggoti? Na hevaṃ vattabbe…pe….
སབྦེ དྷམྨཱ སཏིཔཊྛཱནཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘རཉྙོ, བྷིཀྑཝེ, ཙཀྐཝཏྟིསྶ པཱཏུབྷཱཝཱ སཏྟནྣཾ རཏནཱནཾ པཱཏུབྷཱཝོ ཧོཏི། ཀཏམེསཾ སཏྟནྣཾ? ཙཀྐརཏནསྶ པཱཏུབྷཱཝོ ཧོཏི, ཧཏྠིརཏནསྶ པཱཏུབྷཱཝོ ཧོཏི, ཨསྶརཏནསྶ… མཎིརཏནསྶ… ཨིཏྠིརཏནསྶ … གཧཔཏིརཏནསྶ… པརིཎཱཡཀརཏནསྶ པཱཏུབྷཱཝོ ཧོཏི ། རཉྙོ, བྷིཀྑཝེ, ཙཀྐཝཏྟིསྶ པཱཏུབྷཱཝཱ ཨིམེསཾ སཏྟནྣཾ རཏནཱནཾ པཱཏུབྷཱཝོ ཧོཏི།
Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘rañño, bhikkhave, cakkavattissa pātubhāvā sattannaṃ ratanānaṃ pātubhāvo hoti. Katamesaṃ sattannaṃ? Cakkaratanassa pātubhāvo hoti, hatthiratanassa pātubhāvo hoti, assaratanassa… maṇiratanassa… itthiratanassa … gahapatiratanassa… pariṇāyakaratanassa pātubhāvo hoti . Rañño, bhikkhave, cakkavattissa pātubhāvā imesaṃ sattannaṃ ratanānaṃ pātubhāvo hoti.
‘‘ཏཐཱགཏསྶ, བྷིཀྑཝེ, པཱཏུབྷཱཝཱ ཨརཧཏོ སམྨཱསམྦུདྡྷསྶ སཏྟནྣཾ བོཛ྄ཛྷངྒརཏནཱནཾ པཱཏུབྷཱཝོ ཧོཏི། ཀཏམེསཾ སཏྟནྣཾ? སཏིསམྦོཛ྄ཛྷངྒརཏནསྶ པཱཏུབྷཱཝོ ཧོཏི, དྷམྨཝིཙཡསམྦོཛ྄ཛྷངྒརཏནསྶ པཱཏུབྷཱཝོ ཧོཏི, ཝཱིརིཡསམྦོཛ྄ཛྷངྒརཏནསྶ པཱཏུབྷཱཝོ ཧོཏི, པཱིཏིསམྦོཛ྄ཛྷངྒརཏནསྶ པཱཏུབྷཱཝོ ཧོཏི, པསྶདྡྷིསམྦོཛ྄ཛྷངྒརཏནསྶ པཱཏུབྷཱཝོ ཧོཏི, སམཱདྷིསམྦོཛ྄ཛྷངྒརཏནསྶ པཱཏུབྷཱཝོ ཧོཏི, ཨུཔེཀྑཱསམྦོཛ྄ཛྷངྒརཏནསྶ པཱཏུབྷཱཝོ ཧོཏི། ཏཐཱགཏསྶ, བྷིཀྑཝེ, པཱཏུབྷཱཝཱ ཨརཧཏོ སམྨཱསམྦུདྡྷསྶ ཨིམེསཾ སཏྟནྣཾ བོཛ྄ཛྷངྒརཏནཱནཾ པཱཏུབྷཱཝོ ཧོཏཱི’’ཏི 5། ཨཏྠེཝ སུཏྟནྟོཏི? ཨཱམནྟཱ། ཏཐཱགཏསྶ པཱཏུབྷཱཝཱ ཨརཧཏོ སམྨཱསམྦུདྡྷསྶ སབྦེ དྷམྨཱ སཏིསམྦོཛ྄ཛྷངྒརཏནཱཝ ཧོནྟཱིཏི? ན ཧེཝཾ ཝཏྟབྦེ…པེ॰… སབྦེ དྷམྨཱ སཏིཔཊྛཱནཱཏི? ཨཱམནྟཱ། སབྦེ དྷམྨཱ སམྨཔྤདྷཱནཱ… ཨིདྡྷིཔཱདཱ… ཨིནྡྲིཡཱ… བལཱ… བོཛ྄ཛྷངྒཱཏི? ན ཧེཝཾ ཝཏྟབྦེ…པེ॰…།
‘‘Tathāgatassa, bhikkhave, pātubhāvā arahato sammāsambuddhassa sattannaṃ bojjhaṅgaratanānaṃ pātubhāvo hoti. Katamesaṃ sattannaṃ? Satisambojjhaṅgaratanassa pātubhāvo hoti, dhammavicayasambojjhaṅgaratanassa pātubhāvo hoti, vīriyasambojjhaṅgaratanassa pātubhāvo hoti, pītisambojjhaṅgaratanassa pātubhāvo hoti, passaddhisambojjhaṅgaratanassa pātubhāvo hoti, samādhisambojjhaṅgaratanassa pātubhāvo hoti, upekkhāsambojjhaṅgaratanassa pātubhāvo hoti. Tathāgatassa, bhikkhave, pātubhāvā arahato sammāsambuddhassa imesaṃ sattannaṃ bojjhaṅgaratanānaṃ pātubhāvo hotī’’ti 6. Attheva suttantoti? Āmantā. Tathāgatassa pātubhāvā arahato sammāsambuddhassa sabbe dhammā satisambojjhaṅgaratanāva hontīti? Na hevaṃ vattabbe…pe… sabbe dhammā satipaṭṭhānāti? Āmantā. Sabbe dhammā sammappadhānā… iddhipādā… indriyā… balā… bojjhaṅgāti? Na hevaṃ vattabbe…pe….
སཏིཔཊྛཱནཀཐཱ ནིཊྛིཏཱ།
Satipaṭṭhānakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༨. སཏིཔཊྛཱནཀཐཱཝཎྞནཱ • 8. Satipaṭṭhānakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༨. སཏིཔཊྛཱནཀཐཱཝཎྞནཱ • 8. Satipaṭṭhānakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༨. སཏིཔཊྛཱནཀཐཱཝཎྞནཱ • 8. Satipaṭṭhānakathāvaṇṇanā
