| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൮. സതിപട്ഠാനകഥാ
8. Satipaṭṭhānakathā
൩൦൧. സബ്ബേ ധമ്മാ സതിപട്ഠാനാതി? ആമന്താ. സബ്ബേ ധമ്മാ സതി സതിന്ദ്രിയം സതിബലം സമ്മാസതി സതിസമ്ബോജ്ഝങ്ഗോ ഏകായനമഗ്ഗോ ഖയഗാമീ ബോധഗാമീ അപചയഗാമീ അനാസവാ അസംയോജനിയാ അഗന്ഥനിയാ അനോഘനിയാ അയോഗനിയാ അനീവരണിയാ അപരാമട്ഠാ അനുപാദാനിയാ അസംകിലേസികാ, സബ്ബേ ധമ്മാ ബുദ്ധാനുസ്സതി ധമ്മാനുസ്സതി സങ്ഘാനുസ്സതി സീലാനുസ്സതി ചാഗാനുസ്സതി ദേവതാനുസ്സതി ആനാപാനസ്സതി മരണാനുസ്സതി കായഗതാസതി ഉപസമാനുസ്സതീതി? ന ഹേവം വത്തബ്ബേ…പേ॰….
301. Sabbe dhammā satipaṭṭhānāti? Āmantā. Sabbe dhammā sati satindriyaṃ satibalaṃ sammāsati satisambojjhaṅgo ekāyanamaggo khayagāmī bodhagāmī apacayagāmī anāsavā asaṃyojaniyā aganthaniyā anoghaniyā ayoganiyā anīvaraṇiyā aparāmaṭṭhā anupādāniyā asaṃkilesikā, sabbe dhammā buddhānussati dhammānussati saṅghānussati sīlānussati cāgānussati devatānussati ānāpānassati maraṇānussati kāyagatāsati upasamānussatīti? Na hevaṃ vattabbe…pe….
സബ്ബേ ധമ്മാ സതിപട്ഠാനാതി? ആമന്താ. ചക്ഖായതനം സതിപട്ഠാനന്തി? ന ഹേവം വത്തബ്ബേ…പേ॰… ചക്ഖായതനം സതിപട്ഠാനന്തി ? ആമന്താ. ചക്ഖായതനം സതി സതിന്ദ്രിയം സതിബലം സമ്മാസതി സതിസമ്ബോജ്ഝങ്ഗോ ഏകായനമഗ്ഗോ ഖയഗാമീ ബോധഗാമീ അപചയഗാമീ അനാസവം അസംയോജനിയം…പേ॰… അസംകിലേസികം, ചക്ഖായതനം ബുദ്ധാനുസ്സതി ധമ്മാനുസ്സതി സങ്ഘാനുസ്സതി സീലാനുസ്സതി ചാഗാനുസ്സതി ദേവതാനുസ്സതി ആനാപാനസ്സതി മരണാനുസ്സതി കായഗതാസതി ഉപസമാനുസ്സതീതി? ന ഹേവം വത്തബ്ബേ…പേ॰… സോതായതനം… ഘാനായതനം… ജിവ്ഹായതനം… കായായതനം… രൂപായതനം… സദ്ദായതനം… ഗന്ധായതനം… രസായതനം… ഫോട്ഠബ്ബായതനം… രാഗോ… ദോസോ… മോഹോ… മാനോ… ദിട്ഠി… വിചികിച്ഛാ… ഥിനം… ഉദ്ധച്ചം… അഹിരികം… അനോത്തപ്പം സതിപട്ഠാനന്തി? ന ഹേവം വത്തബ്ബേ…പേ॰… അനോത്തപ്പം സതിപട്ഠാനന്തി? ആമന്താ. അനോത്തപ്പം സതി സതിന്ദ്രിയം സതിബലം സമ്മാസതി…പേ॰… കായഗതാസതി ഉപസമാനുസ്സതീതി? ന ഹേവം വത്തബ്ബേ…പേ॰….
Sabbe dhammā satipaṭṭhānāti? Āmantā. Cakkhāyatanaṃ satipaṭṭhānanti? Na hevaṃ vattabbe…pe… cakkhāyatanaṃ satipaṭṭhānanti ? Āmantā. Cakkhāyatanaṃ sati satindriyaṃ satibalaṃ sammāsati satisambojjhaṅgo ekāyanamaggo khayagāmī bodhagāmī apacayagāmī anāsavaṃ asaṃyojaniyaṃ…pe… asaṃkilesikaṃ, cakkhāyatanaṃ buddhānussati dhammānussati saṅghānussati sīlānussati cāgānussati devatānussati ānāpānassati maraṇānussati kāyagatāsati upasamānussatīti? Na hevaṃ vattabbe…pe… sotāyatanaṃ… ghānāyatanaṃ… jivhāyatanaṃ… kāyāyatanaṃ… rūpāyatanaṃ… saddāyatanaṃ… gandhāyatanaṃ… rasāyatanaṃ… phoṭṭhabbāyatanaṃ… rāgo… doso… moho… māno… diṭṭhi… vicikicchā… thinaṃ… uddhaccaṃ… ahirikaṃ… anottappaṃ satipaṭṭhānanti? Na hevaṃ vattabbe…pe… anottappaṃ satipaṭṭhānanti? Āmantā. Anottappaṃ sati satindriyaṃ satibalaṃ sammāsati…pe… kāyagatāsati upasamānussatīti? Na hevaṃ vattabbe…pe….
സതി സതിപട്ഠാനാ, സാ ച സതീതി? ആമന്താ. ചക്ഖായതനം സതിപട്ഠാനം, തഞ്ച സതീതി? ന ഹേവം വത്തബ്ബേ…പേ॰… സതി സതിപട്ഠാനാ, സാ ച സതീതി? ആമന്താ. സോതായതനം…പേ॰… കായായതനം… രൂപായതനം…പേ॰… ഫോട്ഠബ്ബായതനം… രാഗോ… ദോസോ… മോഹോ…പേ॰… അനോത്തപ്പം സതിപട്ഠാനം, തഞ്ച സതീതി? ന ഹേവം വത്തബ്ബേ…പേ॰….
Sati satipaṭṭhānā, sā ca satīti? Āmantā. Cakkhāyatanaṃ satipaṭṭhānaṃ, tañca satīti? Na hevaṃ vattabbe…pe… sati satipaṭṭhānā, sā ca satīti? Āmantā. Sotāyatanaṃ…pe… kāyāyatanaṃ… rūpāyatanaṃ…pe… phoṭṭhabbāyatanaṃ… rāgo… doso… moho…pe… anottappaṃ satipaṭṭhānaṃ, tañca satīti? Na hevaṃ vattabbe…pe….
ചക്ഖായതനം സതിപട്ഠാനം, തഞ്ച ന സതീതി? ആമന്താ. സതി സതിപട്ഠാനാ, സാ ച ന സതീതി? ന ഹേവം വത്തബ്ബേ…പേ॰… സോതായതനം…പേ॰… കായായതനം… രൂപായതനം…പേ॰… ഫോട്ഠബ്ബായതനം… രാഗോ … ദോസോ… മോഹോ…പേ॰… അനോത്തപ്പം സതിപട്ഠാനം, തഞ്ച ന സതീതി? ആമന്താ . സതി സതിപട്ഠാനാ, സാ ച ന സതീതി? ന ഹേവം വത്തബ്ബേ…പേ॰….
Cakkhāyatanaṃ satipaṭṭhānaṃ, tañca na satīti? Āmantā. Sati satipaṭṭhānā, sā ca na satīti? Na hevaṃ vattabbe…pe… sotāyatanaṃ…pe… kāyāyatanaṃ… rūpāyatanaṃ…pe… phoṭṭhabbāyatanaṃ… rāgo … doso… moho…pe… anottappaṃ satipaṭṭhānaṃ, tañca na satīti? Āmantā . Sati satipaṭṭhānā, sā ca na satīti? Na hevaṃ vattabbe…pe….
൩൦൨. ന വത്തബ്ബം – ‘‘സബ്ബേ ധമ്മാ സതിപട്ഠാനാ’’തി? ആമന്താ. നനു സബ്ബേ ധമ്മേ ആരബ്ഭ സതി സന്തിട്ഠതീതി? ആമന്താ. ഹഞ്ചി സബ്ബേ ധമ്മേ ആരബ്ഭ സതി സന്തിട്ഠതീതി, തേന വത രേ വത്തബ്ബേ – ‘‘സബ്ബേ ധമ്മാ സതിപട്ഠാനാ’’തി.
302. Na vattabbaṃ – ‘‘sabbe dhammā satipaṭṭhānā’’ti? Āmantā. Nanu sabbe dhamme ārabbha sati santiṭṭhatīti? Āmantā. Hañci sabbe dhamme ārabbha sati santiṭṭhatīti, tena vata re vattabbe – ‘‘sabbe dhammā satipaṭṭhānā’’ti.
സബ്ബം ധമ്മം ആരബ്ഭ സതി സന്തിട്ഠതീതി സബ്ബേ ധമ്മാ സതിപട്ഠാനാതി? ആമന്താ. സബ്ബം ധമ്മം ആരബ്ഭ ഫസ്സോ സന്തിട്ഠതീതി സബ്ബേ ധമ്മാ ഫസ്സപട്ഠാനാതി? ന ഹേവം വത്തബ്ബേ…പേ॰….
Sabbaṃ dhammaṃ ārabbha sati santiṭṭhatīti sabbe dhammā satipaṭṭhānāti? Āmantā. Sabbaṃ dhammaṃ ārabbha phasso santiṭṭhatīti sabbe dhammā phassapaṭṭhānāti? Na hevaṃ vattabbe…pe….
സബ്ബം ധമ്മം ആരബ്ഭ സതി സന്തിട്ഠതീതി സബ്ബേ ധമ്മാ സതിപട്ഠാനാതി? ആമന്താ. സബ്ബം ധമ്മം ആരബ്ഭ വേദനാ സന്തിട്ഠതി… സഞ്ഞാ സന്തിട്ഠതി… ചേതനാ സന്തിട്ഠതി… ചിത്തം സന്തിട്ഠതീതി സബ്ബേ ധമ്മാ ചിത്തപട്ഠാനാതി? ന ഹേവം വത്തബ്ബേ…പേ॰….
Sabbaṃ dhammaṃ ārabbha sati santiṭṭhatīti sabbe dhammā satipaṭṭhānāti? Āmantā. Sabbaṃ dhammaṃ ārabbha vedanā santiṭṭhati… saññā santiṭṭhati… cetanā santiṭṭhati… cittaṃ santiṭṭhatīti sabbe dhammā cittapaṭṭhānāti? Na hevaṃ vattabbe…pe….
സബ്ബേ ധമ്മാ സതിപട്ഠാനാതി? ആമന്താ. സബ്ബേ സത്താ ഉപട്ഠിതസതിനോ സതിയാ സമന്നാഗതാ സതിയാ സമോഹിതാ; സബ്ബേസം സത്താനം സതി പച്ചുപട്ഠിതാതി? ന ഹേവം വത്തബ്ബേ…പേ॰….
Sabbe dhammā satipaṭṭhānāti? Āmantā. Sabbe sattā upaṭṭhitasatino satiyā samannāgatā satiyā samohitā; sabbesaṃ sattānaṃ sati paccupaṭṭhitāti? Na hevaṃ vattabbe…pe….
൩൦൩. സബ്ബേ ധമ്മാ സതിപട്ഠാനാതി? ആമന്താ. നനു വുത്തം ഭഗവതാ – ‘‘അമതം തേ, ഭിക്ഖവേ, ന പരിഭുഞ്ജന്തി യേ കായഗതാസതിം ന പരിഭുഞ്ജന്തി. അമതം തേ, ഭിക്ഖവേ, പരിഭുഞ്ജന്തി യേ കായഗതാസതിം പരിഭുഞ്ജന്തീ’’തി 1. അത്ഥേവ സുത്തന്തോതി? ആമന്താ. സബ്ബേ സത്താ കായഗതാസതിം പരിഭുഞ്ജന്തി പടിലഭന്തി ആസേവന്തി ഭാവേന്തി ബഹുലീകരോന്തീതി? ന ഹേവം വത്തബ്ബേ…പേ॰….
303. Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘amataṃ te, bhikkhave, na paribhuñjanti ye kāyagatāsatiṃ na paribhuñjanti. Amataṃ te, bhikkhave, paribhuñjanti ye kāyagatāsatiṃ paribhuñjantī’’ti 2. Attheva suttantoti? Āmantā. Sabbe sattā kāyagatāsatiṃ paribhuñjanti paṭilabhanti āsevanti bhāventi bahulīkarontīti? Na hevaṃ vattabbe…pe….
സബ്ബേ ധമ്മാ സതിപട്ഠാനാതി? ആമന്താ. നനു വുത്തം ഭഗവതാ – ‘‘ഏകായനോ അയം, ഭിക്ഖവേ, മഗ്ഗോ സത്താനം വിസുദ്ധിയാ സോകപരിദേവാനം സമതിക്കമായ ദുക്ഖദോമനസ്സാനം അത്ഥങ്ഗമായ ഞായസ്സ അധിഗമായ നിബ്ബാനസ്സ സച്ഛികിരിയായ യദിദം ചത്താരോ സതിപട്ഠാനാ’’തി 3! അത്ഥേവ സുത്തന്തോതി? ആമന്താ? സബ്ബേ ധമ്മാ ഏകായനമഗ്ഗോതി? ന ഹേവം വത്തബ്ബേ…പേ॰….
Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘ekāyano ayaṃ, bhikkhave, maggo sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya yadidaṃ cattāro satipaṭṭhānā’’ti 4! Attheva suttantoti? Āmantā? Sabbe dhammā ekāyanamaggoti? Na hevaṃ vattabbe…pe….
സബ്ബേ ധമ്മാ സതിപട്ഠാനാതി? ആമന്താ. നനു വുത്തം ഭഗവതാ – ‘‘രഞ്ഞോ, ഭിക്ഖവേ, ചക്കവത്തിസ്സ പാതുഭാവാ സത്തന്നം രതനാനം പാതുഭാവോ ഹോതി. കതമേസം സത്തന്നം? ചക്കരതനസ്സ പാതുഭാവോ ഹോതി, ഹത്ഥിരതനസ്സ പാതുഭാവോ ഹോതി, അസ്സരതനസ്സ… മണിരതനസ്സ… ഇത്ഥിരതനസ്സ … ഗഹപതിരതനസ്സ… പരിണായകരതനസ്സ പാതുഭാവോ ഹോതി . രഞ്ഞോ, ഭിക്ഖവേ, ചക്കവത്തിസ്സ പാതുഭാവാ ഇമേസം സത്തന്നം രതനാനം പാതുഭാവോ ഹോതി.
Sabbe dhammā satipaṭṭhānāti? Āmantā. Nanu vuttaṃ bhagavatā – ‘‘rañño, bhikkhave, cakkavattissa pātubhāvā sattannaṃ ratanānaṃ pātubhāvo hoti. Katamesaṃ sattannaṃ? Cakkaratanassa pātubhāvo hoti, hatthiratanassa pātubhāvo hoti, assaratanassa… maṇiratanassa… itthiratanassa … gahapatiratanassa… pariṇāyakaratanassa pātubhāvo hoti . Rañño, bhikkhave, cakkavattissa pātubhāvā imesaṃ sattannaṃ ratanānaṃ pātubhāvo hoti.
‘‘തഥാഗതസ്സ, ഭിക്ഖവേ, പാതുഭാവാ അരഹതോ സമ്മാസമ്ബുദ്ധസ്സ സത്തന്നം ബോജ്ഝങ്ഗരതനാനം പാതുഭാവോ ഹോതി. കതമേസം സത്തന്നം? സതിസമ്ബോജ്ഝങ്ഗരതനസ്സ പാതുഭാവോ ഹോതി, ധമ്മവിചയസമ്ബോജ്ഝങ്ഗരതനസ്സ പാതുഭാവോ ഹോതി, വീരിയസമ്ബോജ്ഝങ്ഗരതനസ്സ പാതുഭാവോ ഹോതി, പീതിസമ്ബോജ്ഝങ്ഗരതനസ്സ പാതുഭാവോ ഹോതി, പസ്സദ്ധിസമ്ബോജ്ഝങ്ഗരതനസ്സ പാതുഭാവോ ഹോതി, സമാധിസമ്ബോജ്ഝങ്ഗരതനസ്സ പാതുഭാവോ ഹോതി, ഉപേക്ഖാസമ്ബോജ്ഝങ്ഗരതനസ്സ പാതുഭാവോ ഹോതി. തഥാഗതസ്സ, ഭിക്ഖവേ, പാതുഭാവാ അരഹതോ സമ്മാസമ്ബുദ്ധസ്സ ഇമേസം സത്തന്നം ബോജ്ഝങ്ഗരതനാനം പാതുഭാവോ ഹോതീ’’തി 5. അത്ഥേവ സുത്തന്തോതി? ആമന്താ. തഥാഗതസ്സ പാതുഭാവാ അരഹതോ സമ്മാസമ്ബുദ്ധസ്സ സബ്ബേ ധമ്മാ സതിസമ്ബോജ്ഝങ്ഗരതനാവ ഹോന്തീതി? ന ഹേവം വത്തബ്ബേ…പേ॰… സബ്ബേ ധമ്മാ സതിപട്ഠാനാതി? ആമന്താ. സബ്ബേ ധമ്മാ സമ്മപ്പധാനാ… ഇദ്ധിപാദാ… ഇന്ദ്രിയാ… ബലാ… ബോജ്ഝങ്ഗാതി? ന ഹേവം വത്തബ്ബേ…പേ॰….
‘‘Tathāgatassa, bhikkhave, pātubhāvā arahato sammāsambuddhassa sattannaṃ bojjhaṅgaratanānaṃ pātubhāvo hoti. Katamesaṃ sattannaṃ? Satisambojjhaṅgaratanassa pātubhāvo hoti, dhammavicayasambojjhaṅgaratanassa pātubhāvo hoti, vīriyasambojjhaṅgaratanassa pātubhāvo hoti, pītisambojjhaṅgaratanassa pātubhāvo hoti, passaddhisambojjhaṅgaratanassa pātubhāvo hoti, samādhisambojjhaṅgaratanassa pātubhāvo hoti, upekkhāsambojjhaṅgaratanassa pātubhāvo hoti. Tathāgatassa, bhikkhave, pātubhāvā arahato sammāsambuddhassa imesaṃ sattannaṃ bojjhaṅgaratanānaṃ pātubhāvo hotī’’ti 6. Attheva suttantoti? Āmantā. Tathāgatassa pātubhāvā arahato sammāsambuddhassa sabbe dhammā satisambojjhaṅgaratanāva hontīti? Na hevaṃ vattabbe…pe… sabbe dhammā satipaṭṭhānāti? Āmantā. Sabbe dhammā sammappadhānā… iddhipādā… indriyā… balā… bojjhaṅgāti? Na hevaṃ vattabbe…pe….
സതിപട്ഠാനകഥാ നിട്ഠിതാ.
Satipaṭṭhānakathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൮. സതിപട്ഠാനകഥാവണ്ണനാ • 8. Satipaṭṭhānakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൮. സതിപട്ഠാനകഥാവണ്ണനാ • 8. Satipaṭṭhānakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൮. സതിപട്ഠാനകഥാവണ്ണനാ • 8. Satipaṭṭhānakathāvaṇṇanā
