| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
8. ஸதிபட்டா²னகதா²வண்ணனா
8. Satipaṭṭhānakathāvaṇṇanā
301. இதா³னி ஸதிபட்டா²னகதா² ஹோதி. ‘‘தத்த² – சதுன்னங், பி⁴க்க²வே, ஸதிபட்டா²னானங் ஸமுத³யஞ்ச அத்த²ங்க³மஞ்ச தே³ஸெஸ்ஸாமீ’’தி (ஸங்॰ நி॰ 5.408) ஸதிபட்டா²னஸங்யுத்தே வுத்தனயேனேவ யேஸங் காயாத³யோ ஸதியா ஆரம்மணத⁴ம்மே க³ஹெத்வா ‘‘ஸப்³பே³ த⁴ம்மா ஸதிபட்டா²னா’’தி லத்³தி⁴, ஸெய்யதா²பி ஏதரஹி அந்த⁴கானங். அந்த⁴கா நாம புப்³ப³ஸேலியா, அபரஸேலியா, ராஜகி³ரியா, ஸித்³த⁴த்தி²காதி இமே பச்சா² உப்பன்னநிகாயா. தேஸங் லத்³தி⁴விவேசனத்த²ங் புச்சா² ஸகவாதி³ஸ்ஸ, படிஞ்ஞா பரவாதி³ஸ்ஸ. தத்த² யஸ்மா ‘‘பதிட்டா²தி ஏதேஸூதி பட்டா²னா . கா பதிட்டா²தி? ஸதி. ஸதியா பட்டா²னா ஸதிபட்டா²னா’’தி இமினா அத்தே²ன ஸதிகோ³சராபி ஸதிபட்டா²னா. ‘‘பதிட்ட²ஹந்தீதி பட்டா²னா. கா பதிட்ட²ஹந்தி? ஸதியோ. ஸதியோவ பட்டா²னா ஸதிபட்டா²னா’’தி இமினா அத்தே²ன ஸதியோவ ஸதிபட்டா²னா. தஸ்மா த்³வேபி வாதா³ பரியாயேன யுஜ்ஜந்தி. யே பன தங் பரியாயங் பஹாய ஏகந்தேனேவ ‘‘ஸப்³பே³ த⁴ம்மா ஸதிபட்டா²னா’’தி வத³ந்தி, தே ஸந்தா⁴ய புச்சா² ஸகவாதி³ஸ்ஸ, ஆரம்மணவஸேன படிஞ்ஞா பரவாதி³ஸ்ஸ. ஸப்³பே³ த⁴ம்மா ஸதீதி அனுயுத்தஸ்ஸ பன ஸப்³பே³ஸங் ஸதிஸபா⁴வாபா⁴வதோ படிக்கே²போ தஸ்ஸேவ. தத்த² க²யகா³மீதிஆதீ³னி மக்³க³விஸேஸனானி. ஏகாயனமக்³கோ³ ஹி கிலேஸானங் க²யபூ⁴தங் நிப்³பா³னங் க³ச்ச²தீதி க²யகா³மீ. சத்தாரி ஸச்சானி பு³ஜ்ஜ²ந்தோ க³ச்ச²தீதி போ³த⁴கா³மீ. வட்டங் அபசினந்தோ க³ச்ச²தீதி அபசயகா³மீ. ஏவமேதேஹி பதே³ஹி ‘‘கிங் தே ஸப்³பே³ த⁴ம்மா ஏவரூபோ தே ஏகாயனோ மக்³கோ³ ஹோதீ’’தி புச்ச²தி. அனாஸவா அஸங்யோஜனியாதிஆதீ³னிபி லோகுத்தரபா⁴வங் புச்ச²னத்தா²ய வுத்தானி. பு³த்³தா⁴னுஸ்ஸதீதிஆதீ³னி பபே⁴த³புச்சா²வஸேன வுத்தானி.
301. Idāni satipaṭṭhānakathā hoti. ‘‘Tattha – catunnaṃ, bhikkhave, satipaṭṭhānānaṃ samudayañca atthaṅgamañca desessāmī’’ti (saṃ. ni. 5.408) satipaṭṭhānasaṃyutte vuttanayeneva yesaṃ kāyādayo satiyā ārammaṇadhamme gahetvā ‘‘sabbe dhammā satipaṭṭhānā’’ti laddhi, seyyathāpi etarahi andhakānaṃ. Andhakā nāma pubbaseliyā, aparaseliyā, rājagiriyā, siddhatthikāti ime pacchā uppannanikāyā. Tesaṃ laddhivivecanatthaṃ pucchā sakavādissa, paṭiññā paravādissa. Tattha yasmā ‘‘patiṭṭhāti etesūti paṭṭhānā. Kā patiṭṭhāti? Sati. Satiyā paṭṭhānā satipaṭṭhānā’’ti iminā atthena satigocarāpi satipaṭṭhānā. ‘‘Patiṭṭhahantīti paṭṭhānā. Kā patiṭṭhahanti? Satiyo. Satiyova paṭṭhānā satipaṭṭhānā’’ti iminā atthena satiyova satipaṭṭhānā. Tasmā dvepi vādā pariyāyena yujjanti. Ye pana taṃ pariyāyaṃ pahāya ekanteneva ‘‘sabbe dhammā satipaṭṭhānā’’ti vadanti, te sandhāya pucchā sakavādissa, ārammaṇavasena paṭiññā paravādissa. Sabbe dhammā satīti anuyuttassa pana sabbesaṃ satisabhāvābhāvato paṭikkhepo tasseva. Tattha khayagāmītiādīni maggavisesanāni. Ekāyanamaggo hi kilesānaṃ khayabhūtaṃ nibbānaṃ gacchatīti khayagāmī. Cattāri saccāni bujjhanto gacchatīti bodhagāmī. Vaṭṭaṃ apacinanto gacchatīti apacayagāmī. Evametehi padehi ‘‘kiṃ te sabbe dhammā evarūpo te ekāyano maggo hotī’’ti pucchati. Anāsavā asaṃyojaniyātiādīnipi lokuttarabhāvaṃ pucchanatthāya vuttāni. Buddhānussatītiādīni pabhedapucchāvasena vuttāni.
சக்கா²யதனங் ஸதிபட்டா²னந்திஆதி³ ஸப்³ப³த⁴ம்மானங் பபே⁴த³புச்சா²வஸேன வுத்தங். தத்தா²பி ஸதிவஸேன படிக்கே²போ, ஆரம்மணவஸேன படிஞ்ஞாதி. ஏவங் ஸப்³ப³பஞ்ஹேஸு அத்தோ² வேதி³தப்³போ³. ஸுத்தஸாத⁴னா உத்தானத்தா²யேவாதி.
Cakkhāyatanaṃsatipaṭṭhānantiādi sabbadhammānaṃ pabhedapucchāvasena vuttaṃ. Tatthāpi sativasena paṭikkhepo, ārammaṇavasena paṭiññāti. Evaṃ sabbapañhesu attho veditabbo. Suttasādhanā uttānatthāyevāti.
ஸதிபட்டா²னகதா²வண்ணனா நிட்டி²தா.
Satipaṭṭhānakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / 8. ஸதிபட்டா²னகதா² • 8. Satipaṭṭhānakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 8. ஸதிபட்டா²னகதா²வண்ணனா • 8. Satipaṭṭhānakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 8. ஸதிபட்டா²னகதா²வண்ணனா • 8. Satipaṭṭhānakathāvaṇṇanā
