| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
2. ஸதிபட்டா²னவாரோ
2. Satipaṭṭhānavāro
41. ‘‘‘அயங் காயே காயானுபஸ்ஸனா’தி மே, பி⁴க்க²வே, புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³…பே॰… ஆலோகோ உத³பாதி³. ஸா கோ² பனாயங் காயே காயானுபஸ்ஸனா பா⁴வேதப்³பா³தி மே, பி⁴க்க²வே,…பே॰… பா⁴விதாதி மே, பி⁴க்க²வே, புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³…பே॰… ஆலோகோ உத³பாதி³’’.
41. ‘‘‘Ayaṃ kāye kāyānupassanā’ti me, bhikkhave, pubbe ananussutesu dhammesu cakkhuṃ udapādi…pe… āloko udapādi. Sā kho panāyaṃ kāye kāyānupassanā bhāvetabbāti me, bhikkhave,…pe… bhāvitāti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
‘‘அயங் வேத³னாஸு…பே॰… அயங் சித்தே… அயங் த⁴ம்மேஸு த⁴ம்மானுபஸ்ஸனாதி மே, பி⁴க்க²வே, புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³…பே॰… ஆலோகோ உத³பாதி³. ஸா கோ² பனாயங் த⁴ம்மேஸு த⁴ம்மானுபஸ்ஸனா பா⁴வேதப்³பா³தி மே, பி⁴க்க²வே…பே॰… பா⁴விதாதி மே, பி⁴க்க²வே, புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³…பே॰… ஆலோகோ உத³பாதி³’’.
‘‘Ayaṃ vedanāsu…pe… ayaṃ citte… ayaṃ dhammesu dhammānupassanāti me, bhikkhave, pubbe ananussutesu dhammesu cakkhuṃ udapādi…pe… āloko udapādi. Sā kho panāyaṃ dhammesu dhammānupassanā bhāvetabbāti me, bhikkhave…pe… bhāvitāti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
அயங் காயே காயானுபஸ்ஸனாதி புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³…பே॰… ஆலோகோ உத³பாதி³…பே॰… ஸா கோ² பனாயங் காயே காயானுபஸ்ஸனா பா⁴வேதப்³பா³தி…பே॰… பா⁴விதாதி புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³…பே॰… ஆலோகோ உத³பாதி³.
Ayaṃ kāye kāyānupassanāti pubbe ananussutesu dhammesu cakkhuṃ udapādi…pe… āloko udapādi…pe… sā kho panāyaṃ kāye kāyānupassanā bhāvetabbāti…pe… bhāvitāti pubbe ananussutesu dhammesu cakkhuṃ udapādi…pe… āloko udapādi.
சக்கு²ங் உத³பாதீ³தி – கேனட்டே²ன…பே॰… ஆலோகோ உத³பாதீ³தி – கேனட்டே²ன? சக்கு²ங் உத³பாதீ³தி – த³ஸ்ஸனட்டே²ன…பே॰… ஆலோகோ உத³பாதீ³தி – ஓபா⁴ஸட்டே²ன.
Cakkhuṃ udapādīti – kenaṭṭhena…pe… āloko udapādīti – kenaṭṭhena? Cakkhuṃ udapādīti – dassanaṭṭhena…pe… āloko udapādīti – obhāsaṭṭhena.
சக்கு²ங் த⁴ம்மோ, த³ஸ்ஸனட்டோ² அத்தோ²…பே॰… ஆலோகோ த⁴ம்மோ, ஓபா⁴ஸட்டோ² அத்தோ². இமே பஞ்ச த⁴ம்மா பஞ்ச அத்தா² காயவத்து²கா ஸதிபட்டா²னவத்து²கா…பே॰… வேத³னாவத்து²கா ஸதிபட்டா²னவத்து²கா… சித்தவத்து²கா ஸதிபட்டா²னவத்து²கா… த⁴ம்மவத்து²கா ஸதிபட்டா²னவத்து²கா ஸதிபட்டா²னாரம்மணா ஸதிபட்டா²னகோ³சரா ஸதிபட்டா²னஸங்க³ஹிதா ஸதிபட்டா²னபரியாபன்னா ஸதிபட்டா²னே ஸமுதா³க³தா ஸதிபட்டா²னே டி²தா ஸதிபட்டா²னே பதிட்டி²தா.
Cakkhuṃ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā kāyavatthukā satipaṭṭhānavatthukā…pe… vedanāvatthukā satipaṭṭhānavatthukā… cittavatthukā satipaṭṭhānavatthukā… dhammavatthukā satipaṭṭhānavatthukā satipaṭṭhānārammaṇā satipaṭṭhānagocarā satipaṭṭhānasaṅgahitā satipaṭṭhānapariyāpannā satipaṭṭhāne samudāgatā satipaṭṭhāne ṭhitā satipaṭṭhāne patiṭṭhitā.
த⁴ம்மசக்கந்தி கேனட்டே²ன த⁴ம்மசக்கங்? த⁴ம்மஞ்ச பவத்தேதி சக்கஞ்சாதி – த⁴ம்மசக்கங். சக்கஞ்ச பவத்தேதி த⁴ம்மஞ்சாதி – த⁴ம்மசக்கங். த⁴ம்மேன பவத்தேதீதி – த⁴ம்மசக்கங். த⁴ம்மசரியாய பவத்தேதீதி – த⁴ம்மசக்கங். த⁴ம்மே டி²தோ பவத்தேதீதி – த⁴ம்மசக்கங். த⁴ம்மே பதிட்டி²தோ பவத்தேதீதி – த⁴ம்மசக்கங் …பே॰… அமதோக³த⁴ங் நிப்³பா³னங் பரியோஸானட்டே²ன த⁴ம்மோ. தங் த⁴ம்மங் பவத்தேதீதி – த⁴ம்மசக்கங்.
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ …pe… amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 2-3. ஸதிபட்டா²னவாராதி³வண்ணனா • 2-3. Satipaṭṭhānavārādivaṇṇanā
