| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
২. সতিপট্ঠানৰারো
2. Satipaṭṭhānavāro
৩১. ‘‘‘অযং কাযে কাযানুপস্সনা’তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি। সা খো পনাযং কাযে কাযানুপস্সনা ভাৰেতব্বাতি মে, ভিক্খৰে,…পে॰… ভাৰিতাতি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি’’।
31. ‘‘‘Ayaṃ kāye kāyānupassanā’ti me, bhikkhave, pubbe ananussutesu dhammesu cakkhuṃ udapādi…pe… āloko udapādi. Sā kho panāyaṃ kāye kāyānupassanā bhāvetabbāti me, bhikkhave,…pe… bhāvitāti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
‘‘অযং ৰেদনাসু…পে॰… অযং চিত্তে…পে॰… অযং ধম্মেসু ধম্মানুপস্সনাতি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি। সা খো পনাযং ধম্মেসু ধম্মানুপস্সনা ভাৰেতব্বা তি…পে॰… ভাৰিতাতি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি’’।
‘‘Ayaṃ vedanāsu…pe… ayaṃ citte…pe… ayaṃ dhammesu dhammānupassanāti me, bhikkhave, pubbe ananussutesu dhammesu cakkhuṃ udapādi…pe… āloko udapādi. Sā kho panāyaṃ dhammesu dhammānupassanā bhāvetabbā ti…pe… bhāvitāti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
[ক] ‘‘‘অযং কাযে কাযানুপস্সনা’তি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি…পে॰… সা খো পনাযং কাযে কাযানুপস্সনা ভাৰেতব্বাতি…পে॰… ভাৰিতাতি পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদি’’।
[Ka] ‘‘‘ayaṃ kāye kāyānupassanā’ti pubbe ananussutesu dhammesu cakkhuṃ udapādi…pe… āloko udapādi…pe… sā kho panāyaṃ kāye kāyānupassanā bhāvetabbāti…pe… bhāvitāti pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi’’.
চক্খুং উদপাদীতি – কেনট্ঠেন? ঞাণং উদপাদীতি – কেনট্ঠেন? পঞ্ঞা উদপাদীতি – কেনট্ঠেন? ৰিজ্জা উদপাদীতি – কেনট্ঠেন? আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন। ঞাণং উদপাদীতি – ঞাতট্ঠেন। পঞ্ঞা উদপাদীতি – পজাননট্ঠেন। ৰিজ্জা উদপাদীতি – পটিৰেধট্ঠেন। আলোকো উদপাদীতি – ওভাসট্ঠেন।
Cakkhuṃ udapādīti – kenaṭṭhena? Ñāṇaṃ udapādīti – kenaṭṭhena? Paññā udapādīti – kenaṭṭhena? Vijjā udapādīti – kenaṭṭhena? Āloko udapādīti – kenaṭṭhena? Cakkhuṃ udapādīti – dassanaṭṭhena. Ñāṇaṃ udapādīti – ñātaṭṭhena. Paññāudapādīti – pajānanaṭṭhena. Vijjā udapādīti – paṭivedhaṭṭhena. Āloko udapādīti – obhāsaṭṭhena.
চক্খুং ধম্মো, ঞাণং ধম্মো, পঞ্ঞা ধম্মো, ৰিজ্জা ধম্মো, আলোকো ধম্মো। ইমে পঞ্চ ধম্মা ধম্মপটিসম্ভিদায আরম্মণা চেৰ হোন্তি গোচরা চ। যে তস্সা আরম্মণা তে তস্সা গোচরা। যে তস্সা গোচরা তে তস্সা আরম্মণা। তেন ৰুচ্চতি – ‘‘ধম্মেসু ঞাণং ধম্মপটিসম্ভিদা’’।
Cakkhuṃ dhammo, ñāṇaṃ dhammo, paññā dhammo, vijjā dhammo, āloko dhammo. Ime pañca dhammā dhammapaṭisambhidāya ārammaṇā ceva honti gocarā ca. Ye tassā ārammaṇā te tassā gocarā. Ye tassā gocarā te tassā ārammaṇā. Tena vuccati – ‘‘dhammesu ñāṇaṃ dhammapaṭisambhidā’’.
দস্সনট্ঠো অত্থো, ঞাতট্ঠো অত্থো, পজাননট্ঠো অত্থো, পটিৰেধট্ঠো অত্থো, ওভাসট্ঠো অত্থো। ইমে পঞ্চ অত্থা অত্থপটিসম্ভিদায আরম্মণা চেৰ হোন্তি গোচরা চ। যে তস্সা আরম্মণা তে তস্সা গোচরা। যে তস্সা গোচরা তে তস্সা আরম্মণা। তেন ৰুচ্চতি – ‘‘অত্থেসু ঞাণং অত্থপটিসম্ভিদা’’।
Dassanaṭṭho attho, ñātaṭṭho attho, pajānanaṭṭho attho, paṭivedhaṭṭho attho, obhāsaṭṭho attho. Ime pañca atthā atthapaṭisambhidāya ārammaṇā ceva honti gocarā ca. Ye tassā ārammaṇā te tassā gocarā. Ye tassā gocarā te tassā ārammaṇā. Tena vuccati – ‘‘atthesu ñāṇaṃ atthapaṭisambhidā’’.
পঞ্চ ধম্মে সন্দস্সেতুং ব্যঞ্জননিরুত্তাভিলাপা, পঞ্চ অত্থে সন্দস্সেতুং ব্যঞ্জননিরুত্তাভিলাপা । ইমা দস নিরুত্তিযো নিরুত্তিপটিসম্ভিদায আরম্মণা চেৰ হোন্তি গোচরা চ। যে তস্সা আরম্মণা তে তস্সা গোচরা। যে তস্সা গোচরা তে তস্সা আরম্মণা। তেন ৰুচ্চতি – ‘‘নিরুত্তীসু ঞাণং নিরুত্তিপটিসম্ভিদা’’।
Pañca dhamme sandassetuṃ byañjananiruttābhilāpā, pañca atthe sandassetuṃ byañjananiruttābhilāpā . Imā dasa niruttiyo niruttipaṭisambhidāya ārammaṇā ceva honti gocarā ca. Ye tassā ārammaṇā te tassā gocarā. Ye tassā gocarā te tassā ārammaṇā. Tena vuccati – ‘‘niruttīsu ñāṇaṃ niruttipaṭisambhidā’’.
পঞ্চসু ধম্মেসু ঞাণানি, পঞ্চসু অত্থেসু ঞাণানি, দসসু নিরুত্তীসু ঞাণানি। ইমানি ৰীসতি ঞাণানি পটিভানপটিসম্ভিদায আরম্মণা চেৰ হোন্তি গোচরা চ। যে তস্সা আরম্মণা তে তস্সা গোচরা। যে তস্সা গোচরা তে তস্সা আরম্মণা। তেন ৰুচ্চতি – ‘‘পটিভানেসু ঞাণং পটিভানপটিসম্ভিদা’’।
Pañcasu dhammesu ñāṇāni, pañcasu atthesu ñāṇāni, dasasu niruttīsu ñāṇāni. Imāni vīsati ñāṇāni paṭibhānapaṭisambhidāya ārammaṇā ceva honti gocarā ca. Ye tassā ārammaṇā te tassā gocarā. Ye tassā gocarā te tassā ārammaṇā. Tena vuccati – ‘‘paṭibhānesu ñāṇaṃ paṭibhānapaṭisambhidā’’.
কাযে কাযানুপস্সনাসতিপট্ঠানে পন্নরস ধম্মা, পন্নরস অত্থা, তিংস নিরুত্তিযো, সট্ঠি ঞাণানি।
Kāye kāyānupassanāsatipaṭṭhāne pannarasa dhammā, pannarasa atthā, tiṃsa niruttiyo, saṭṭhi ñāṇāni.
[খ-ঘ] ‘‘অযং ৰেদনাসু…পে॰… অযং চিত্তে…পে॰… অযং ধম্মেসু ধম্মানুপস্সনাতি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি…পে॰… সা খো পনাযং ধম্মেসু ধম্মানুপস্সনা ভাৰেতব্বা তি…পে॰… ভাৰিতাতি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি…পে॰…’’।
[Kha-gha] ‘‘ayaṃ vedanāsu…pe… ayaṃ citte…pe… ayaṃ dhammesu dhammānupassanāti pubbe ananussutesu dhammesu cakkhuṃ udapādi…pe… āloko udapādi…pe… sā kho panāyaṃ dhammesu dhammānupassanā bhāvetabbā ti…pe… bhāvitāti pubbe ananussutesu dhammesu cakkhuṃ udapādi…pe… āloko udapādi…pe…’’.
ধম্মেসু ধম্মানুপস্সনা সতিপট্ঠানে পন্নরস ধম্মা, পন্নরস অত্থা, তিংস নিরুত্তিযো, সট্ঠি ঞাণানি।
Dhammesu dhammānupassanā satipaṭṭhāne pannarasa dhammā, pannarasa atthā, tiṃsa niruttiyo, saṭṭhi ñāṇāni.
চতূসু সতিপট্ঠানেসু সট্ঠি ধম্মা, সট্ঠি অত্থা, ৰীসতিসতনিরুত্তিযো, চত্তালীসঞ্চ দ্ৰে চ ঞাণসতানি।
Catūsu satipaṭṭhānesu saṭṭhi dhammā, saṭṭhi atthā, vīsatisataniruttiyo, cattālīsañca dve ca ñāṇasatāni.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ২-৩. সতিপট্ঠানৰারাদিৰণ্ণনা • 2-3. Satipaṭṭhānavārādivaṇṇanā
