| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
২. সতিপট্ঠানৰারো
2. Satipaṭṭhānavāro
৪১. ‘‘‘অযং কাযে কাযানুপস্সনা’তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি। সা খো পনাযং কাযে কাযানুপস্সনা ভাৰেতব্বাতি মে, ভিক্খৰে,…পে॰… ভাৰিতাতি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি’’।
41. ‘‘‘Ayaṃ kāye kāyānupassanā’ti me, bhikkhave, pubbe ananussutesu dhammesu cakkhuṃ udapādi…pe… āloko udapādi. Sā kho panāyaṃ kāye kāyānupassanā bhāvetabbāti me, bhikkhave,…pe… bhāvitāti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
‘‘অযং ৰেদনাসু…পে॰… অযং চিত্তে… অযং ধম্মেসু ধম্মানুপস্সনাতি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি। সা খো পনাযং ধম্মেসু ধম্মানুপস্সনা ভাৰেতব্বাতি মে, ভিক্খৰে…পে॰… ভাৰিতাতি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি’’।
‘‘Ayaṃ vedanāsu…pe… ayaṃ citte… ayaṃ dhammesu dhammānupassanāti me, bhikkhave, pubbe ananussutesu dhammesu cakkhuṃ udapādi…pe… āloko udapādi. Sā kho panāyaṃ dhammesu dhammānupassanā bhāvetabbāti me, bhikkhave…pe… bhāvitāti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
অযং কাযে কাযানুপস্সনাতি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি…পে॰… সা খো পনাযং কাযে কাযানুপস্সনা ভাৰেতব্বাতি…পে॰… ভাৰিতাতি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি।
Ayaṃ kāye kāyānupassanāti pubbe ananussutesu dhammesu cakkhuṃ udapādi…pe… āloko udapādi…pe… sā kho panāyaṃ kāye kāyānupassanā bhāvetabbāti…pe… bhāvitāti pubbe ananussutesu dhammesu cakkhuṃ udapādi…pe… āloko udapādi.
চক্খুং উদপাদীতি – কেনট্ঠেন…পে॰… আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন…পে॰… আলোকো উদপাদীতি – ওভাসট্ঠেন।
Cakkhuṃ udapādīti – kenaṭṭhena…pe… āloko udapādīti – kenaṭṭhena? Cakkhuṃ udapādīti – dassanaṭṭhena…pe… āloko udapādīti – obhāsaṭṭhena.
চক্খুং ধম্মো, দস্সনট্ঠো অত্থো…পে॰… আলোকো ধম্মো, ওভাসট্ঠো অত্থো। ইমে পঞ্চ ধম্মা পঞ্চ অত্থা কাযৰত্থুকা সতিপট্ঠানৰত্থুকা…পে॰… ৰেদনাৰত্থুকা সতিপট্ঠানৰত্থুকা… চিত্তৰত্থুকা সতিপট্ঠানৰত্থুকা… ধম্মৰত্থুকা সতিপট্ঠানৰত্থুকা সতিপট্ঠানারম্মণা সতিপট্ঠানগোচরা সতিপট্ঠানসঙ্গহিতা সতিপট্ঠানপরিযাপন্না সতিপট্ঠানে সমুদাগতা সতিপট্ঠানে ঠিতা সতিপট্ঠানে পতিট্ঠিতা।
Cakkhuṃ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā kāyavatthukā satipaṭṭhānavatthukā…pe… vedanāvatthukā satipaṭṭhānavatthukā… cittavatthukā satipaṭṭhānavatthukā… dhammavatthukā satipaṭṭhānavatthukā satipaṭṭhānārammaṇā satipaṭṭhānagocarā satipaṭṭhānasaṅgahitā satipaṭṭhānapariyāpannā satipaṭṭhāne samudāgatā satipaṭṭhāne ṭhitā satipaṭṭhāne patiṭṭhitā.
ধম্মচক্কন্তি কেনট্ঠেন ধম্মচক্কং? ধম্মঞ্চ পৰত্তেতি চক্কঞ্চাতি – ধম্মচক্কং। চক্কঞ্চ পৰত্তেতি ধম্মঞ্চাতি – ধম্মচক্কং। ধম্মেন পৰত্তেতীতি – ধম্মচক্কং। ধম্মচরিযায পৰত্তেতীতি – ধম্মচক্কং। ধম্মে ঠিতো পৰত্তেতীতি – ধম্মচক্কং। ধম্মে পতিট্ঠিতো পৰত্তেতীতি – ধম্মচক্কং …পে॰… অমতোগধং নিব্বানং পরিযোসানট্ঠেন ধম্মো। তং ধম্মং পৰত্তেতীতি – ধম্মচক্কং।
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ …pe… amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ২-৩. সতিপট্ঠানৰারাদিৰণ্ণনা • 2-3. Satipaṭṭhānavārādivaṇṇanā
