| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
2. සතිපට්‌ඨානවාරො
2. Satipaṭṭhānavāro
41. ‘‘‘අයං කායෙ කායානුපස්‌සනා’ති මෙ, භික්‌ඛවෙ, පුබ්‌බෙ අනනුස්‌සුතෙසු ධම්‌මෙසු චක්‌ඛුං උදපාදි…පෙ.… ආලොකො උදපාදි. සා ඛො පනායං කායෙ කායානුපස්‌සනා භාවෙතබ්‌බාති මෙ, භික්‌ඛවෙ,…පෙ.… භාවිතාති මෙ, භික්‌ඛවෙ, පුබ්‌බෙ අනනුස්‌සුතෙසු ධම්‌මෙසු චක්‌ඛුං උදපාදි…පෙ.… ආලොකො උදපාදි’’.
41. ‘‘‘Ayaṃ kāye kāyānupassanā’ti me, bhikkhave, pubbe ananussutesu dhammesu cakkhuṃ udapādi…pe… āloko udapādi. Sā kho panāyaṃ kāye kāyānupassanā bhāvetabbāti me, bhikkhave,…pe… bhāvitāti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
‘‘අයං වෙදනාසු…පෙ.… අයං චිත්‌තෙ… අයං ධම්‌මෙසු ධම්‌මානුපස්‌සනාති මෙ, භික්‌ඛවෙ, පුබ්‌බෙ අනනුස්‌සුතෙසු ධම්‌මෙසු චක්‌ඛුං උදපාදි…පෙ.… ආලොකො උදපාදි. සා ඛො පනායං ධම්‌මෙසු ධම්‌මානුපස්‌සනා භාවෙතබ්‌බාති මෙ, භික්‌ඛවෙ…පෙ.… භාවිතාති මෙ, භික්‌ඛවෙ, පුබ්‌බෙ අනනුස්‌සුතෙසු ධම්‌මෙසු චක්‌ඛුං උදපාදි…පෙ.… ආලොකො උදපාදි’’.
‘‘Ayaṃ vedanāsu…pe… ayaṃ citte… ayaṃ dhammesu dhammānupassanāti me, bhikkhave, pubbe ananussutesu dhammesu cakkhuṃ udapādi…pe… āloko udapādi. Sā kho panāyaṃ dhammesu dhammānupassanā bhāvetabbāti me, bhikkhave…pe… bhāvitāti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
අයං කායෙ කායානුපස්‌සනාති පුබ්‌බෙ අනනුස්‌සුතෙසු ධම්‌මෙසු චක්‌ඛුං උදපාදි…පෙ.… ආලොකො උදපාදි…පෙ.… සා ඛො පනායං කායෙ කායානුපස්‌සනා භාවෙතබ්‌බාති…පෙ.… භාවිතාති පුබ්‌බෙ අනනුස්‌සුතෙසු ධම්‌මෙසු චක්‌ඛුං උදපාදි…පෙ.… ආලොකො උදපාදි.
Ayaṃ kāye kāyānupassanāti pubbe ananussutesu dhammesu cakkhuṃ udapādi…pe… āloko udapādi…pe… sā kho panāyaṃ kāye kāyānupassanā bhāvetabbāti…pe… bhāvitāti pubbe ananussutesu dhammesu cakkhuṃ udapādi…pe… āloko udapādi.
චක්‌ඛුං උදපාදීති – කෙනට්‌ඨෙන…පෙ.… ආලොකො උදපාදීති – කෙනට්‌ඨෙන? චක්‌ඛුං උදපාදීති – දස්‌සනට්‌ඨෙන…පෙ.… ආලොකො උදපාදීති – ඔභාසට්‌ඨෙන.
Cakkhuṃ udapādīti – kenaṭṭhena…pe… āloko udapādīti – kenaṭṭhena? Cakkhuṃ udapādīti – dassanaṭṭhena…pe… āloko udapādīti – obhāsaṭṭhena.
චක්‌ඛුං ධම්‌මො, දස්‌සනට්‌ඨො අත්‌ථො…පෙ.… ආලොකො ධම්‌මො, ඔභාසට්‌ඨො අත්‌ථො. ඉමෙ පඤ්‌ච ධම්‌මා පඤ්‌ච අත්‌ථා කායවත්‌ථුකා සතිපට්‌ඨානවත්‌ථුකා…පෙ.… වෙදනාවත්‌ථුකා සතිපට්‌ඨානවත්‌ථුකා… චිත්‌තවත්‌ථුකා සතිපට්‌ඨානවත්‌ථුකා… ධම්‌මවත්‌ථුකා සතිපට්‌ඨානවත්‌ථුකා සතිපට්‌ඨානාරම්‌මණා සතිපට්‌ඨානගොචරා සතිපට්‌ඨානසඞ්‌ගහිතා සතිපට්‌ඨානපරියාපන්‌නා සතිපට්‌ඨානෙ සමුදාගතා සතිපට්‌ඨානෙ ඨිතා සතිපට්‌ඨානෙ පතිට්‌ඨිතා.
Cakkhuṃ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā kāyavatthukā satipaṭṭhānavatthukā…pe… vedanāvatthukā satipaṭṭhānavatthukā… cittavatthukā satipaṭṭhānavatthukā… dhammavatthukā satipaṭṭhānavatthukā satipaṭṭhānārammaṇā satipaṭṭhānagocarā satipaṭṭhānasaṅgahitā satipaṭṭhānapariyāpannā satipaṭṭhāne samudāgatā satipaṭṭhāne ṭhitā satipaṭṭhāne patiṭṭhitā.
ධම්‌මචක්‌කන්‌ති කෙනට්‌ඨෙන ධම්‌මචක්‌කං? ධම්‌මඤ්‌ච පවත්‌තෙති චක්‌කඤ්‌චාති – ධම්‌මචක්‌කං. චක්‌කඤ්‌ච පවත්‌තෙති ධම්‌මඤ්‌චාති – ධම්‌මචක්‌කං. ධම්‌මෙන පවත්‌තෙතීති – ධම්‌මචක්‌කං. ධම්‌මචරියාය පවත්‌තෙතීති – ධම්‌මචක්‌කං. ධම්‌මෙ ඨිතො පවත්‌තෙතීති – ධම්‌මචක්‌කං. ධම්‌මෙ පතිට්‌ඨිතො පවත්‌තෙතීති – ධම්‌මචක්‌කං …පෙ.… අමතොගධං නිබ්‌බානං පරියොසානට්‌ඨෙන ධම්‌මො. තං ධම්‌මං පවත්‌තෙතීති – ධම්‌මචක්‌කං.
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ …pe… amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 2-3. සතිපට්‌ඨානවාරාදිවණ්‌ණනා • 2-3. Satipaṭṭhānavārādivaṇṇanā
