| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
(༩) ༤. སཏིཝགྒོ
(9) 4. Sativaggo
༡. སཏིསམྤཛཉྙསུཏྟཾ
1. Satisampajaññasuttaṃ
༨༡. ‘‘སཏིསམྤཛཉྙེ , བྷིཀྑཝེ, ཨསཏི སཏིསམྤཛཉྙཝིཔནྣསྶ ཧཏཱུཔནིསཾ ཧོཏི ཧིརོཏྟཔྤཾ། ཧིརོཏྟཔྤེ ཨསཏི ཧིརོཏྟཔྤཝིཔནྣསྶ ཧཏཱུཔནིསོ ཧོཏི ཨིནྡྲིཡསཾཝརོ། ཨིནྡྲིཡསཾཝརེ ཨསཏི ཨིནྡྲིཡསཾཝརཝིཔནྣསྶ ཧཏཱུཔནིསཾ ཧོཏི སཱིལཾ། སཱིལེ ཨསཏི སཱིལཝིཔནྣསྶ ཧཏཱུཔནིསོ ཧོཏི སམྨཱསམཱདྷི། སམྨཱསམཱདྷིམྷི ཨསཏི སམྨཱསམཱདྷིཝིཔནྣསྶ ཧཏཱུཔནིསཾ ཧོཏི ཡཐཱབྷཱུཏཉཱཎདསྶནཾ། ཡཐཱབྷཱུཏཉཱཎདསྶནེ ཨསཏི ཡཐཱབྷཱུཏཉཱཎདསྶནཝིཔནྣསྶ ཧཏཱུཔནིསོ ཧོཏི ནིབྦིདཱཝིརཱགོ། ནིབྦིདཱཝིརཱགེ ཨསཏི ནིབྦིདཱཝིརཱགཝིཔནྣསྶ ཧཏཱུཔནིསཾ ཧོཏི ཝིམུཏྟིཉཱཎདསྶནཾ། སེཡྻཐཱཔི, བྷིཀྑཝེ, རུཀྑོ སཱཁཱཔལཱསཝིཔནྣོ། ཏསྶ པཔཊིཀཱཔི ན པཱརིཔཱུརིཾ གཙྪཏི, ཏཙོཔི… ཕེགྒུཔི… སཱརོཔི ན པཱརིཔཱུརིཾ གཙྪཏི། ཨེཝམེཝཾ ཁོ, བྷིཀྑཝེ, སཏིསམྤཛཉྙེ ཨསཏི སཏིསམྤཛཉྙཝིཔནྣསྶ ཧཏཱུཔནིསཾ ཧོཏི ཧིརོཏྟཔྤཾ; ཧིརོཏྟཔྤེ ཨསཏི ཧིརོཏྟཔྤཝིཔནྣསྶ ཧཏཱུཔནིསོ ཧོཏི…པེ॰… ཝིམུཏྟིཉཱཎདསྶནཾ།
81. ‘‘Satisampajaññe , bhikkhave, asati satisampajaññavipannassa hatūpanisaṃ hoti hirottappaṃ. Hirottappe asati hirottappavipannassa hatūpaniso hoti indriyasaṃvaro. Indriyasaṃvare asati indriyasaṃvaravipannassa hatūpanisaṃ hoti sīlaṃ. Sīle asati sīlavipannassa hatūpaniso hoti sammāsamādhi. Sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ. Yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo. Nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ. Seyyathāpi, bhikkhave, rukkho sākhāpalāsavipanno. Tassa papaṭikāpi na pāripūriṃ gacchati, tacopi… pheggupi… sāropi na pāripūriṃ gacchati. Evamevaṃ kho, bhikkhave, satisampajaññe asati satisampajaññavipannassa hatūpanisaṃ hoti hirottappaṃ; hirottappe asati hirottappavipannassa hatūpaniso hoti…pe… vimuttiñāṇadassanaṃ.
‘‘སཏིསམྤཛཉྙེ, བྷིཀྑཝེ, སཏི སཏིསམྤཛཉྙསམྤནྣསྶ ཨུཔནིསསམྤནྣཾ ཧོཏི ཧིརོཏྟཔྤཾ། ཧིརོཏྟཔྤེ སཏི ཧིརོཏྟཔྤསམྤནྣསྶ ཨུཔནིསསམྤནྣོ ཧོཏི ཨིནྡྲིཡསཾཝརོ། ཨིནྡྲིཡསཾཝརེ སཏི ཨིནྡྲིཡསཾཝརསམྤནྣསྶ ཨུཔནིསསམྤནྣཾ ཧོཏི སཱིལཾ། སཱིལེ སཏི སཱིལསམྤནྣསྶ ཨུཔནིསསམྤནྣོ ཧོཏི སམྨཱསམཱདྷི། སམྨཱསམཱདྷིམྷི སཏི སམྨཱསམཱདྷིསམྤནྣསྶ ཨུཔནིསསམྤནྣཾ ཧོཏི ཡཐཱབྷཱུཏཉཱཎདསྶནཾ། ཡཐཱབྷཱུཏཉཱཎདསྶནེ སཏི ཡཐཱབྷཱུཏཉཱཎདསྶནསམྤནྣསྶ ཨུཔནིསསམྤནྣོ ཧོཏི ནིབྦིདཱཝིརཱགོ ། ནིབྦིདཱཝིརཱགེ སཏི ནིབྦིདཱཝིརཱགསམྤནྣསྶ ཨུཔནིསསམྤནྣཾ ཧོཏི ཝིམུཏྟིཉཱཎདསྶནཾ། སེཡྻཐཱཔི, བྷིཀྑཝེ, རུཀྑོ སཱཁཱཔལཱསསམྤནྣོ། ཏསྶ པཔཊིཀཱཔི པཱརིཔཱུརིཾ གཙྪཏི, ཏཙོཔི… ཕེགྒུཔི… སཱརོཔི པཱརིཔཱུརིཾ གཙྪཏི། ཨེཝམེཝཾ ཁོ, བྷིཀྑཝེ, སཏིསམྤཛཉྙེ སཏི སཏིསམྤཛཉྙསམྤནྣསྶ ཨུཔནིསསམྤནྣཾ ཧོཏི ཧིརོཏྟཔྤཾ; ཧིརོཏྟཔྤེ སཏི ཧིརོཏྟཔྤསམྤནྣསྶ ཨུཔནིསསམྤནྣོ ཧོཏི…པེ॰… ཝིམུཏྟིཉཱཎདསྶན’’ནྟི། པཋམཾ།
‘‘Satisampajaññe, bhikkhave, sati satisampajaññasampannassa upanisasampannaṃ hoti hirottappaṃ. Hirottappe sati hirottappasampannassa upanisasampanno hoti indriyasaṃvaro. Indriyasaṃvare sati indriyasaṃvarasampannassa upanisasampannaṃ hoti sīlaṃ. Sīle sati sīlasampannassa upanisasampanno hoti sammāsamādhi. Sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃ. Yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo . Nibbidāvirāge sati nibbidāvirāgasampannassa upanisasampannaṃ hoti vimuttiñāṇadassanaṃ. Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṃ gacchati, tacopi… pheggupi… sāropi pāripūriṃ gacchati. Evamevaṃ kho, bhikkhave, satisampajaññe sati satisampajaññasampannassa upanisasampannaṃ hoti hirottappaṃ; hirottappe sati hirottappasampannassa upanisasampanno hoti…pe… vimuttiñāṇadassana’’nti. Paṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡-༢. སཏིསམྤཛཉྙསུཏྟཝཎྞནཱ • 1-2. Satisampajaññasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. སདྡྷཱསུཏྟཱདིཝཎྞནཱ • 1-10. Saddhāsuttādivaṇṇanā
