2. сад̇исуд̇д̇аван̣н̣анаа

368. д̣̇уд̇ияз сад̇од̇и гааяаад̣̇ианубассанаасад̇ияаа саманнааг̇ад̇о. самбаж̇аанод̇и жад̇усамбаж̇ан̃н̃абан̃н̃ааяа саманнааг̇ад̇о. абхигганд̇з бадигганд̇зд̇и зд̇т̇а абхигганд̇ам̣ вужжад̇и г̇аманам̣, бадигганд̇ам̣ нивад̇д̇анам̣, д̇ад̣̇убхаяамби жад̇уусу ирияаабат̇зсу лаб̣бхад̇и. г̇аманз д̇аава бурад̇о гааяам̣ абхихаранд̇о абхиггамад̇и наама, бадинивад̇д̇анд̇о бадиггамад̇и наама. таанзби тид̇агова гааяам̣ бурад̇о онаманд̇о абхиггамад̇и наама, бажчад̇о абанаамзнд̇о бадиггамад̇и наама. нисаж̇ж̇ааяаби нисиннагова аасанасса буримаан̇г̇аабхимуко сам̣саранд̇о абхиггамад̇и наама, бажчимаан̇г̇аббад̣̇зсам̣ бажжаасам̣саранд̇о бадиггамад̇и наама. нибаж̇ж̇анзби зсзва наяо.

самбаж̇аанагаарий ход̇ийд̇и самбаж̇ан̃н̃зна саб̣б̣агижжагаарий, самбаж̇ан̃н̃ассзва ваа гаарий. со хи абхигганд̇аад̣̇ийсу самбаж̇ан̃н̃ам̣ гарод̇зва, на гад̇т̇ажи самбаж̇ан̃н̃авирахид̇о ход̇и.

д̇ад̇т̇а саад̇т̇агасамбаж̇ан̃н̃ам̣, саббааяасамбаж̇ан̃н̃ам̣, г̇ожарасамбаж̇ан̃н̃ам̣, асаммохасамбаж̇ан̃н̃анд̇и жад̇уб̣б̣ид̇хам̣ самбаж̇ан̃н̃ам̣. д̇ад̇т̇а абхиггаманажид̇д̇з уббаннз жид̇д̇авасзнзва аг̇анд̇ваа ‘‘гим̣ ну мз зд̇т̇а г̇ад̇зна ад̇т̇о ад̇т̇и, над̇т̇ий’’д̇и ад̇т̇аанад̇т̇ам̣ бариг̇г̇ан̣хид̇ваа ад̇т̇абариг̇г̇ан̣ханам̣ саад̇т̇агасамбаж̇ан̃н̃ам̣. д̇ад̇т̇а жа ад̇т̇од̇и жзд̇ияад̣̇ассанаб̣од̇хид̣̇ассанасан̇гхад̣̇ассанат̇зрад̣̇ассанаасубхад̣̇ассанаад̣̇ивасзна д̇хаммад̇о вад̣дхи . жзд̇ияам̣ д̣̇исвааби хи б̣уд̣̇д̇хаарамман̣ам̣, сан̇гхад̣̇ассанзна сан̇гхаарамман̣ам̣ бийд̇им̣ уббаад̣̇зд̇ваа д̇ад̣̇зва каяад̇о саммасанд̇о арахад̇д̇ам̣ баабун̣аад̇и. махаавихаарасмин̃хи д̣̇агкин̣ад̣̇ваарз тад̇ваа махаажзд̇ияам̣ ологзнд̇аа д̇им̣сасахассабхигкуу арахад̇д̇ам̣ баабун̣им̣су, д̇ат̇аа бажчимад̣̇ваарз уд̇д̇арад̣̇ваарз баажийнад̣̇ваарз жа, д̇ат̇аа бан̃хаман̣д̣абадтаанз абхаяаваабибаал̣ияам̣, т̇уубаараамад̣̇ваарз наг̇арасса д̣̇агкин̣ад̣̇ваарз анураад̇хаваабибаал̣ияам̣.

махааарияавам̣сабхаан̣агад̇т̇зро банааха ‘‘гим̣ д̇умхз вад̣̇ат̇а, махаажзд̇ияасса саманд̇аа гужчивзд̣̇игааяа хздтимабхааг̇ад̇о бадтааяа бан̃н̃ааяанадтаанз яад̇т̇а яад̇т̇а д̣̇вз баад̣̇аа саггаа хонд̇и самам̣ бад̇идтаабзд̇ум̣, д̇ад̇т̇а д̇ад̇т̇а згабад̣̇уд̣̇д̇хаарз д̇им̣сад̇им̣са бхигкусахассаани арахад̇д̇ам̣ баабун̣им̣сууд̇и саггаа вад̇у’’нд̇и . абаро бана махаат̇зро ааха – ‘‘махаажзд̇ияад̇алз аагин̣н̣аваалигааяа б̣ахуд̇араа бхигкуу арахад̇д̇ам̣ бад̇д̇аа’’д̇и. т̇зрз д̣̇исваа д̇зсам̣ оваад̣̇з бад̇идтааяа асубхам̣ д̣̇исваа д̇ад̇т̇а батамам̣ жхаанам̣ уббаад̣̇зд̇ваа д̇ад̣̇зва каяад̇о саммасанд̇о арахад̇д̇ам̣ баабун̣аад̇и. д̇асмаа зд̇зсам̣ д̣̇ассанам̣ саад̇т̇ам̣. гзжи бана – ‘‘аамисад̇оби вад̣дхи ад̇т̇оязва, д̇ам̣ ниссааяа б̣рахмажарияаануг̇г̇ахааяа бадибаннад̇д̇аа’’д̇и вад̣̇анд̇и.

д̇асмим̣ бана г̇аманз саббааяаасаббааяам̣ бариг̇г̇ан̣хид̇ваа саббааяабариг̇г̇ан̣ханам̣ саббааяасамбаж̇ан̃н̃ам̣. сзяяат̇ид̣̇ам̣? жзд̇ияад̣̇ассанам̣ д̇аава саад̇т̇ам̣. сажз бана жзд̇ияасса махаабууж̇ааяа д̣̇асад̣̇ваад̣̇асаяож̇ананд̇арз барисаа саннибад̇анд̇и, ад̇д̇ано вибхаваануруубаа ид̇т̇ияоби бурисааби алан̇гад̇абадияад̇д̇аа жид̇д̇агаммаруубагаани вияа сан̃жаранд̇и. д̇ад̇ра жасса идтз аарамман̣з лобхо, анидтз бадигхо, асамабзгканз мохо уббаж̇ж̇ад̇и, гааяасам̣саг̇г̇з гааяасам̣саг̇г̇аабад̇д̇им̣ аабаж̇ж̇ад̇и, ж̇ийвид̇аб̣рахмажарияаанам̣ ваа анд̇арааяо жа ход̇и. звам̣ д̇ам̣ таанам̣ асаббааяам̣ ход̇и, вуд̇д̇аббагаараанд̇арааяаабхаавз саббааяам̣. сан̇гхад̣̇ассанамби саад̇т̇ам̣. сажз бана анд̇ог̇аамз махааман̣д̣абам̣ гаарзд̇ваа саб̣б̣арад̇д̇им̣ д̇хаммассаванам̣ гаарзнд̇зсу мануссзсу вуд̇д̇аббагаарзнзва ж̇анасаннибаад̇о жзва анд̇арааяо жа ход̇и, звам̣ д̇ам̣ таанам̣ асаббааяам̣, анд̇арааяаабхаавз саббааяам̣. махаабариваараанам̣ т̇зраанам̣ д̣̇ассанзби зсзва наяо.

асубхад̣̇ассанамби саад̇т̇ам̣. д̇ад̣̇ад̇т̇ад̣̇ийбанад̇т̇ан̃жа ид̣̇ам̣ вад̇т̇у – зго гира д̣̇ахарабхигку сааман̣зрам̣ г̇ахзд̇ваа д̣̇анд̇агадтад̇т̇ааяа г̇ад̇о. сааман̣зро маг̇г̇аа оггамид̇ваа бурад̇о г̇ажчанд̇о асубхам̣ д̣̇исваа батамаж̇жхаанам̣ ниб̣б̣ад̇д̇зд̇ваа д̇ад̣̇зва баад̣̇агам̣ гад̇ваа сан̇каарз саммасанд̇о д̇ийн̣и палаани сажчигад̇ваа убаримаг̇г̇ад̇т̇ааяа гаммадтаанам̣ бариг̇г̇ахзд̇ваа адтааси. д̣̇ахаро д̇ам̣ абассанд̇о ‘‘сааман̣зраа’’д̇и баггоси . со – ‘‘маяаа баб̣б̣аж̇ид̇ад̣̇ивасад̇о бадтааяа бхигкунаа сад̣̇д̇хим̣ д̣̇вз гат̇аа наама на гат̇ид̇абуб̣б̣аа, ан̃н̃асмимби д̣̇ивасз убаривисзсам̣ ниб̣б̣ад̇д̇зссаамий’’д̇и жинд̇зд̇ваа ‘‘гим̣, бханд̇з,’’д̇и бадиважанам̣ ад̣̇ааси. ‘‘зхий’’д̇и вуд̇д̇з згаважанзнзва ааг̇анд̇ваа – ‘‘бханд̇з, иминаа д̇аава маг̇г̇зна г̇анд̇ваа маяаа тид̇огаасз мухуд̇д̇ам̣ бурад̇т̇аабхимукаа худ̇ваа ологзт̇аа’’д̇и ааха. со д̇ат̇аа гад̇ваа д̇зна бад̇д̇ависзсамзва баабун̣и. звам̣ згам̣ асубхам̣ д̣̇виннам̣ ж̇анаанам̣ ад̇т̇ааяа ж̇аад̇ам̣. звам̣ саад̇т̇амби банзд̇ам̣ бурисасса маад̇уг̇аамаасубхам̣ асаббааяам̣, маад̇уг̇аамасса жа бурисаасубхам̣, сабхааг̇амзва саббааяанд̇и звам̣ саббааяабариг̇г̇ан̣ханам̣ саббааяасамбаж̇ан̃н̃ам̣.

звам̣ бариг̇г̇ахид̇асаад̇т̇асаббааяасса бана адтад̇им̣сагаммадтаанзсу ад̇д̇ано жид̇д̇аружигам̣ гаммадтаанасан̇каад̇ам̣ г̇ожарам̣ уг̇г̇ахзд̇ваа бхигкаажаараг̇ожарз д̇ам̣ г̇ахзд̇ваава г̇аманам̣ г̇ожарасамбаж̇ан̃н̃ам̣ наама.

д̇ассаавибхаавад̇т̇ам̣ ид̣̇ам̣ жад̇уггам̣ взд̣̇ид̇аб̣б̣ам̣ – ид̇хзгажжо бхигку харад̇и на бажжаахарад̇и, згажжо бажжаахарад̇и на харад̇и, згажжо бана нзва харад̇и на бажжаахарад̇и, згажжо харад̇и жа бажжаахарад̇и жа.

д̇ад̇т̇а яо бхигку д̣̇ивасам̣ жан̇гамзна нисаж̇ж̇ааяа жа ааваран̣ийязхи д̇хаммзхи жид̇д̇ам̣ барисод̇хзд̇ваа д̇ат̇аа рад̇д̇ияаа батамам̣ яаамам̣ маж̇жхимаяаамз сзяяам̣ габбзд̇ваа, бажчимаяаамзби нисаж̇ж̇аажан̇гамзхи вийд̇инаамзд̇ваа, баг̇зва жзд̇ияан̇г̇ан̣аб̣од̇хияан̇г̇ан̣авад̇д̇ам̣ гад̇ваа б̣од̇хиругкз уд̣̇агам̣ аасин̃жид̇ваа баанийяам̣ барибхож̇анийяам̣ бажжубадтабзд̇ваа аажарияубаж̇жхааяавад̇д̇аад̣̇ийни самаад̣̇ааяа вад̇д̇ад̇и. со сарийрабаригаммам̣ гад̇ваа сзнаасанам̣ бависид̇ваа д̣̇вз д̇аяо баллан̇гз усумам̣ г̇аахаабзнд̇о гаммадтаанамануяун̃ж̇ид̇ваа бхигкаажааравзлааяа удтахид̇ваа гаммадтаанасийсзнзва бад̇д̇ажийварамаад̣̇ааяа сзнаасанад̇о нигкамид̇ваа гаммадтаанам̣ манасигаронд̇ова жзд̇ияан̇г̇ан̣ам̣ г̇анд̇ваа сажз б̣уд̣̇д̇хаануссад̇игаммадтаанам̣ ход̇и, д̇ам̣ ависсаж̇ж̇зд̇ваава жзд̇ияан̇г̇ан̣ам̣ бависад̇и. ан̃н̃ам̣ жз гаммадтаанам̣ ход̇и, собаанабаад̣̇амуулз тад̇ваа хад̇т̇зна г̇ахид̇абхан̣д̣ам̣ вияа д̇ам̣ табзд̇ваа б̣уд̣̇д̇хаарамман̣ам̣ бийд̇им̣ г̇ахзд̇ваа жзд̇ияан̇г̇ан̣ам̣ ааруяха маханд̇ам̣ жзд̇ияам̣ жз, д̇игкад̇д̇ум̣ бад̣̇агкин̣ам̣ гад̇ваа жад̇уусу таанзсу ванд̣̇ид̇аб̣б̣ам̣, куд̣̇д̣̇агам̣ жз, д̇ат̇зва бад̣̇агкин̣ам̣ гад̇ваа адтасу таанзсу ванд̣̇ид̇аб̣б̣ам̣. жзд̇ияам̣ ванд̣̇ид̇ваа б̣од̇хияан̇г̇ан̣ам̣ бад̇д̇знааби б̣уд̣̇д̇хасса бхаг̇авад̇о саммукаа вияа нибажжагаарам̣ д̣̇ассзд̇ваа б̣од̇хи ванд̣̇ид̇аб̣б̣аа. со звам̣ жзд̇ияан̃жа б̣од̇хин̃жа ванд̣̇ид̇ваа бадисаамид̇адтаанам̣ г̇анд̇ваа бадисаамид̇абхан̣д̣агам̣ хад̇т̇зна г̇ан̣ханд̇о вияа нигкид̇д̇агаммадтаанам̣ г̇ахзд̇ваа г̇аамасамийбз гаммадтаанасийсзнзва жийварам̣ баарубид̇ваа г̇аамам̣ бин̣д̣ааяа бависад̇и.

ат̇а нам̣ мануссаа д̣̇исваа ‘‘аяяо но ааг̇ад̇о’’д̇и бажжуг̇г̇анд̇ваа бад̇д̇ам̣ г̇ахзд̇ваа аасанасаалааяа ваа г̇зхз ваа нисийд̣̇аабзд̇ваа яааг̇ум̣ д̣̇ад̇ваа яаава бхад̇д̇ам̣ на нидтаад̇и, д̇аава баад̣̇з д̇ховид̇ваа магкзд̇ваа бурад̇о нисийд̣̇ид̇ваа бан̃хам̣ ваа бужчанд̇и, д̇хаммам̣ ваа сод̇угаамаа хонд̇и. сажзби на гат̇аабзнд̇и, ж̇анасан̇г̇ахан̣ад̇т̇ам̣ д̇хаммагат̇аа наама гаад̇аб̣б̣ааязваад̇и адтагат̇аажарияаа вад̣̇анд̇и. д̇хаммагат̇аа хи гаммадтаанавинимуд̇д̇аа наама над̇т̇и, д̇асмаа гаммадтаанасийсзнзва д̇хаммам̣ гат̇зд̇ваа гаммадтаанасийсзнзва аахаарам̣ барибхун̃ж̇ид̇ваа анумод̣̇анам̣ гад̇ваа нивад̇д̇ияамаанзхиби мануссзхи ануг̇ад̇ова г̇аамад̇о нигкамид̇ваа д̇ад̇т̇а д̇з нивад̇д̇зд̇ваа маг̇г̇ам̣ бадибаж̇ж̇ад̇и.

ат̇а нам̣ бурзд̇арам̣ нигкамид̇ваа б̣ахиг̇аамз гад̇абхад̇д̇агижжаа сааман̣зрад̣̇ахарабхигкуу д̣̇исваа бажжуг̇г̇анд̇ваа бад̇д̇ажийварамасса г̇ан̣ханд̇и. бораан̣агабхигкуу гира на ‘‘амхаагам̣ убаж̇жхааяо аажарияо’’д̇и мукам̣ ологзд̇ваа вад̇д̇ам̣ гаронд̇и, самбад̇д̇абарижчзд̣̇знзва гаронд̇и. д̇з д̇ам̣ бужчанд̇и – ‘‘бханд̇з, зд̇з мануссаа д̇умхаагам̣ гим̣ хонд̇и, маад̇ибагкад̇о самб̣анд̇хаа бид̇ибагкад̇о’’д̇и? гим̣ д̣̇исваа бужчат̇аад̇и? д̇умхзсу зд̇зсам̣ бзмам̣ б̣ахумаананд̇и. ‘‘аавусо, яам̣ маад̇аабид̇уухиби д̣̇уггарад̇арам̣, д̇ам̣ зд̇з амхаагам̣ гаронд̇и, бад̇д̇ажийварамби но зд̇зсам̣ санд̇агамзва, зд̇зсам̣ аанубхаавзна нзва бхаяз бхаяам̣, на чаад̇агз чаад̇агам̣ ж̇аанаама, зд̣̇исаа наама амхаагам̣ убагаарино над̇т̇ий’’д̇и д̇зсам̣ г̇ун̣з гат̇аяанд̇о г̇ажчад̇и. аяам̣ вужжад̇и харад̇и на бажжаахарад̇ийд̇и.

яасса бана баг̇зва вуд̇д̇аббагаарам̣ вад̇д̇абадибад̇д̇им̣ гаронд̇асса гаммаж̇ад̇зж̇о баж̇ж̇алад̇и, анубаад̣̇ин̣н̣агам̣ мун̃жид̇ваа убаад̣̇ин̣н̣агам̣ г̇ан̣хаад̇и, сарийрад̇о сзд̣̇аа мужжанд̇и, гаммадтаанавийт̇им̣ наарохад̇и, со баг̇зва бад̇д̇ажийварамаад̣̇ааяа взг̇асаава жзд̇ияам̣ ванд̣̇ид̇ваа г̇оруубаанам̣ нигкаманавзлааяамзва г̇аамам̣ яааг̇убхигкааяа бависид̇ваа яааг̇ум̣ лабхид̇ваа аасанасаалам̣ г̇анд̇ваа бивад̇и. ат̇асса д̣̇вид̇д̇игкад̇д̇ум̣ аж̇жхохаран̣амад̇д̇знзва гаммаж̇ад̇зж̇о убаад̣̇ин̣н̣агам̣ мун̃жид̇ваа анубаад̣̇ин̣н̣агам̣ г̇ан̣хаад̇и, гхадасад̇зна нхаад̇о вияа д̇зж̇од̇хаад̇убарил̣ааханиб̣б̣аанам̣ бад̇ваа гаммадтаанасийсзна яааг̇ум̣ барибхун̃ж̇ид̇ваа бад̇д̇ан̃жа мукан̃жа д̇ховид̇ваа анд̇араабхад̇д̇з гаммадтаанам̣ манасигад̇ваа авасзсадтаанз бин̣д̣ааяа жарид̇ваа гаммадтаанасийсзна аахаарам̣ барибхун̃ж̇ид̇ваа д̇ад̇о бадтааяа бон̇каанубон̇кам̣ убадтахамаанам̣ гаммадтаанам̣ г̇ахзд̇ваава ааг̇ажчад̇и. аяам̣ вужжад̇и бажжаахарад̇и на харад̇ийд̇и. зд̣̇исаа жа бхигкуу яааг̇ум̣ бивид̇ваа вибассанам̣ аарабхид̇ваа б̣уд̣̇д̇хасаасанз арахад̇д̇ам̣ бад̇д̇аа наама г̇ан̣анабат̇ам̣ вийд̇ивад̇д̇аа. сийхал̣ад̣̇ийбзязва д̇зсу д̇зсу г̇аамзсу аасанасаалааяам̣ на д̇ам̣ аасанамад̇т̇и, яад̇т̇а яааг̇ум̣ бивид̇ваа арахад̇д̇ам̣ бад̇д̇аа бхигкуу над̇т̇ийд̇и.

яо бана бамаад̣̇авихаарий ход̇и нигкид̇д̇ад̇хуро, саб̣б̣авад̇д̇аани бхинд̣̇ид̇ваа бан̃жавид̇хажзд̇овиниб̣анд̇хаб̣ад̣̇д̇хажид̇д̇о вихаранд̇о ‘‘гаммадтаанам̣ наама ад̇т̇ий’’д̇иби сан̃н̃ам̣ агад̇ваа г̇аамам̣ бин̣д̣ааяа бависид̇ваа анануломигзна г̇ихисам̣саг̇г̇зна сам̣садто жарид̇ваа жа бхун̃ж̇ид̇ваа жа д̇ужчо нигкамад̇и. аяам̣ вужжад̇и нзва харад̇и на бажжаахарад̇ийд̇и.

яо банааяам̣ харад̇и жа бажжаахарад̇и жаад̇и вуд̇д̇о, со г̇ад̇абажжааг̇ад̇игавад̇д̇авасзна взд̣̇ид̇аб̣б̣о. ад̇д̇агаамаа хи гулабуд̇д̇аа саасанз баб̣б̣аж̇ид̇ваа д̣̇асаби вийсамби д̇им̣самби жад̇д̇аалийсамби бан̃н̃аасамби сад̇амби згад̇о васанд̇аа гад̇игавад̇д̇ам̣ гад̇ваа вихаранд̇и ‘‘аавусо, д̇умхз на ин̣аддаа, на бхаяаддаа, на ж̇ийвигаабагад̇аа баб̣б̣аж̇ид̇аа, д̣̇угкаа мужжид̇угаамаа банзд̇т̇а баб̣б̣аж̇ид̇аа, д̇асмаа г̇аманз уббаннагилзсам̣ г̇аманзязва ниг̇г̇ан̣хат̇а, таанз, нисаж̇ж̇ааяа, саяанз уббаннагилзсам̣ саяанзязва ниг̇г̇ан̣хат̇аа’’д̇и. д̇з звам̣ гад̇игавад̇д̇ам̣ гад̇ваа бхигкаажаарам̣ г̇ажчанд̇аа ад̣дхаусабхаусабхаад̣дхаг̇аавуд̇аг̇аавуд̇анд̇арзсу баасаан̣аа хонд̇и, д̇ааяа сан̃н̃ааяа гаммадтаанам̣ манасигаронд̇аава г̇ажчанд̇и. сажз гассажи г̇аманз гилзсо уббаж̇ж̇ад̇и, д̇ад̇т̇зва нам̣ ниг̇г̇ан̣хаад̇и. д̇ат̇аа асаггонд̇о д̇идтад̇и. ат̇асса бажчад̇о ааг̇ажчанд̇оби д̇идтад̇и, со ‘‘аяам̣ бхигку д̇уяхам̣ уббаннавид̇аггам̣ ж̇аанаад̇и, ананужчавигам̣ д̇з зд̇а’’нд̇и ад̇д̇аанам̣ бадижод̣̇зд̇ваа вибассанам̣ вад̣дхзд̇ваа д̇ад̇т̇зва арияабхуумим̣ оггамад̇и, д̇ат̇аа асаггонд̇о нисийд̣̇ад̇ийд̇и со зва наяо. арияабхуумим̣ оггамид̇ум̣ асаггонд̇оби, д̇ам̣ гилзсам̣ вигкамбхзд̇ваа гаммадтаанам̣ манасигаронд̇ова г̇ажчад̇и, на гаммадтаанавиббаяуд̇д̇зна жид̇д̇зна баад̣̇ам̣ уд̣̇д̇харад̇и. уд̣̇д̇харад̇и жз, бадинивад̇д̇ид̇ваа буримабад̣̇зсам̣язва зд̇и аалинд̣̇агаваасий махаапуссад̣̇звад̇т̇зро вияа.

со гира згуунавийсад̇и вассаани г̇ад̇абажжааг̇ад̇игавад̇д̇ам̣ буурзнд̇о зва вихааси. мануссааби суд̣̇ам̣ анд̇араамаг̇г̇з гасанд̇аа жа вабанд̇аа жа мад̣̇д̣̇анд̇аа жа гаммаани жа гаронд̇аа т̇зрам̣ д̇ат̇аа г̇ажчанд̇ам̣ д̣̇исваа – ‘‘аяам̣ т̇зро бунаббунам̣ нивад̇д̇ид̇ваа г̇ажчад̇и, гим̣ ну ко маг̇г̇амуул̣хо, уд̣̇ааху гин̃жи бамудто’’д̇и самуллабанд̇и. со д̇ам̣ анаад̣̇ияид̇ваа гаммадтаанаяуд̇д̇ажид̇д̇знзва саман̣ад̇хаммам̣ гаронд̇о вийсад̇ивассаб̣бханд̇арз арахад̇д̇ам̣ баабун̣и. арахад̇д̇аббад̇д̇ад̣̇ивасз жасса жан̇гаманагодияам̣ ад̇хивад̇т̇аа д̣̇звад̇аа ан̇г̇улийхи д̣̇ийбам̣ уж̇ж̇аалзд̇ваа адтааси. жад̇д̇аароби махаарааж̇аано сагго жа д̣̇зваанаминд̣̇о б̣рахмаа жа сахамбад̇и убадтаанам̣ ааг̇амам̣су. д̇ан̃жа обхаасам̣ д̣̇исваа ванаваасиймахаад̇иссад̇т̇зро д̇ам̣ д̣̇уд̇ияад̣̇ивасз бужчи – ‘‘рад̇д̇ибхааг̇з ааяасмад̇о санд̇игз обхаасо ахоси, гим̣ со обхаасо’’д̇и? т̇зро вигкзбам̣ гаронд̇о ‘‘обхаасо наама д̣̇ийбобхаасоби ход̇и, ман̣иобхаасобий’’д̇и звамаад̣̇имааха. д̇ад̇о ‘‘бадижчаад̣̇зт̇а д̇умхз’’д̇и ниб̣ад̣̇д̇хо аамаад̇и бадиж̇аанид̇ваа аарожзси.

гаал̣аваллиман̣д̣абаваасиймахаанааг̇ад̇т̇зро вияа жа. соби гира г̇ад̇абажжааг̇ад̇игавад̇д̇ам̣ буурзнд̇о батамам̣ д̇аава ‘‘бхаг̇авад̇о махаабад̇хаанам̣ бууж̇зссаамий’’д̇и сад̇д̇а вассаани таанажан̇гамамзва ад̇хидтааси. буна сол̣аса вассаани г̇ад̇абажжааг̇ад̇игавад̇д̇ам̣ буурзд̇ваа арахад̇д̇ам̣ баабун̣и. со гаммадтаанаяуд̇д̇знзва жид̇д̇зна баад̣̇ам̣ уд̣̇д̇харанд̇о виббаяуд̇д̇зна уд̣̇д̇хадз бадинивад̇д̇анд̇о г̇аамасамийбам̣ г̇анд̇ваа ‘‘г̇аавий ну баб̣б̣аж̇ид̇о нуу’’д̇и аасан̇ганийяабад̣̇зсз тад̇ваа жийварам̣ баарубид̇ваа гажчагарагад̇о уд̣̇агзна бад̇д̇ам̣ д̇ховид̇ваа уд̣̇агаг̇ан̣д̣уусам̣ гарод̇и. гим̣ гааран̣аа? ‘‘маа мз бхигкам̣ д̣̇аад̇ум̣ ваа ванд̣̇ид̇ум̣ ваа ааг̇ад̇з мануссз ‘д̣̇ийгхааяугаа хот̇аа’д̇и важанамад̇д̇знааби гаммадтаанавигкзбо ахосий’’д̇и ‘‘аж̇ж̇а, бханд̇з, гад̇имий’’д̇и д̣̇ивасам̣ ваа бхигкуг̇ан̣анам̣ ваа бан̃хам̣ ваа бужчид̇о бана уд̣̇агам̣ г̇илид̇ваа аарожзд̇и. сажз д̣̇ивасаад̣̇ибужчагаа на хонд̇и, нигкаманавзлааяам̣ г̇аамад̣̇ваарз нидтубхид̇ваа яаад̇и.

галамб̣ад̇ид̇т̇авихаарз вассуубаг̇ад̇аа бан̃н̃ааса бхигкуу вияа жа. д̇з гира аасаал̣хибун̣н̣амияам̣ гад̇игавад̇д̇ам̣ агам̣су – ‘‘арахад̇д̇ам̣ абад̇ваа ан̃н̃аман̃н̃ам̣ наалабиссаамаа’’д̇и. г̇ааман̃жа бин̣д̣ааяа бависанд̇аа уд̣̇агаг̇ан̣д̣уусам̣ гад̇ваа бависим̣су. д̣̇ивасаад̣̇ийсу бужчид̇зсу вуд̇д̇анаязнзва бадибаж̇ж̇им̣су. д̇ад̇т̇а мануссаа нидтубханам̣ д̣̇исваа ж̇ааним̣су – ‘‘аж̇ж̇зго ааг̇ад̇о, аж̇ж̇а д̣̇вз’’д̇и. зван̃жа жинд̇зсум̣ – ‘‘гим̣ ну ко зд̇з амхзхзва сад̣̇д̇хим̣ на саллабанд̇и, уд̣̇ааху ан̃н̃аман̃н̃амби. яад̣̇и ан̃н̃аман̃н̃ам̣ на саллабанд̇и, ад̣̇д̇хаа виваад̣̇аж̇аад̇аа бхависсанд̇и. зт̇а нз ан̃н̃аман̃н̃ам̣ камаабзссаамаа’’д̇и саб̣б̣з вихаарам̣ г̇анд̇ваа бан̃н̃аасааяа бхигкуусу д̣̇взби бхигкуу згогаасз наад̣̇д̣̇асам̣су. д̇ад̇о яо д̇зсу жагкумаа бурисо, со ааха – ‘‘на бхо галахагаарагаанам̣ огаасо ийд̣̇исо ход̇и, сусаммадтам̣ жзд̇ияан̇г̇ан̣ам̣ б̣од̇хияан̇г̇ан̣ам̣, сунигкид̇д̇аа саммаж̇ж̇анияо, субадтид̇ам̣ баанийяам̣ барибхож̇анийяа’’нд̇и . д̇з д̇ад̇ова нивад̇д̇аа. д̇зби бхигкуу анд̇од̇змаасзязва арахад̇д̇ам̣ бад̇ваа махаабавааран̣ааяам̣ висуд̣̇д̇хибавааран̣ам̣ баваарзсум̣.

звам̣ гаал̣аваллиман̣д̣абаваасий махаанааг̇ад̇т̇зро вияа, галамб̣ад̇ид̇т̇авихаарз вассуубаг̇ад̇аа бхигкуу вияа жа гаммадтаанаяуд̇д̇знзва жид̇д̇зна баад̣̇ам̣ уд̣̇д̇харанд̇о г̇аамасамийбам̣ г̇анд̇ваа уд̣̇агаг̇ан̣д̣уусам̣ гад̇ваа вийт̇ияо саллагкзд̇ваа яад̇т̇а сураасон̣д̣ад̇худ̇д̇аад̣̇аяо галахагаарагаа жан̣д̣ахад̇т̇иассаад̣̇аяо ваа над̇т̇и, д̇ам̣ вийт̇им̣ бадибаж̇ж̇ад̇и. д̇ад̇т̇а жа бин̣д̣ааяа жарамаано на д̇урид̇ад̇урид̇о вияа ж̇авзна г̇ажчад̇и. на хи ж̇авзна бин̣д̣абаад̇игад̇худ̇ан̇г̇ам̣ наама гин̃жи ад̇т̇и. висамабхуумибхааг̇абад̇д̇ам̣ бана уд̣̇агасагадам̣ вияа нижжало худ̇ваа г̇ажчад̇и. анугхарам̣ бавидто жа д̣̇аад̇угаамам̣ ваа ад̣̇аад̇угаамам̣ ваа саллагкзд̇ум̣ д̇ад̣̇ануруубам̣ гаалам̣ ааг̇амзнд̇о бхигкам̣ г̇ахзд̇ваа анд̇ог̇аамз ваа б̣ахиг̇аамз ваа вихаарамзва ваа ааг̇анд̇ваа яат̇аапаасугз бад̇ируубз огаасз нисийд̣̇ид̇ваа гаммадтаанам̣ манасигаронд̇о аахаарз бадигууласан̃н̃ам̣ убадтабзд̇ваа агкаб̣бхан̃ж̇анаван̣алзбанабуд̇д̇амам̣суубамаавасзна бажжавзгканд̇о адтан̇г̇асаманнааг̇ад̇ам̣ аахаарам̣ аахаарзд̇и, нзва д̣̇авааяа на мад̣̇ааяа на ман̣д̣анааяа на вибхуусанааяа…бз… бхуд̇д̇аавий жа уд̣̇агагижжам̣ гад̇ваа мухуд̇д̇ам̣ бхад̇д̇агиламат̇ам̣ бадибассамбхзд̇ваа яат̇аа бурзбхад̇д̇ам̣ , звам̣ бажчаабхад̇д̇ам̣ буримаяаамам̣ бажчимаяааман̃жа гаммадтаанамзва манасигарод̇и. аяам̣ вужжад̇и харад̇и жа бажжаахарад̇и жаад̇и.

имам̣ бана харан̣абажжаахаран̣асан̇каад̇ам̣ г̇ад̇абажжааг̇ад̇игавад̇д̇ам̣ буурзнд̇о яад̣̇и убаниссаяасамбанно ход̇и, батамаваяз зва арахад̇д̇ам̣ баабун̣аад̇и. но жз батамаваяз баабун̣аад̇и, ат̇а маж̇жхимаваяз баабун̣аад̇и. но жз маж̇жхимаваяз баабун̣аад̇и, ат̇а бажчимаваяз баабун̣аад̇и, но жз бажчимаваяз баабун̣аад̇и, ат̇а маран̣асамаяз. но жз маран̣асамаяз баабун̣аад̇и, ат̇а д̣̇звабуд̇д̇о худ̇ваа. но жз д̣̇звабуд̇д̇о худ̇ваа баабун̣аад̇и, ануббаннз б̣уд̣̇д̇хз ниб̣б̣ад̇д̇о бажжзгаб̣од̇хим̣ сажчигарод̇и. но жз бажжзгаб̣од̇хим̣ сажчигарод̇и, ат̇а б̣уд̣̇д̇хаанам̣ саммукийбхаавз киббаабхин̃н̃о ваа ход̇и, сзяяат̇ааби т̇зро б̣аахияо д̣̇ааружийрияо махаабан̃н̃о ваа, сзяяат̇ааби т̇зро саарибуд̇д̇о, махид̣̇д̇хиго ваа, сзяяат̇ааби т̇зро махаамог̇г̇аллаано, д̇худ̇аваад̣̇о ваа, сзяяат̇ааби т̇зро махаагассабо, д̣̇иб̣б̣ажагкуго ваа, сзяяат̇ааби т̇зро ануруд̣̇д̇хо, винаяад̇харо ваа, сзяяат̇ааби т̇зро убаали, д̇хаммагат̇иго ваа, сзяяат̇ааби т̇зро бун̣н̣о манд̇аан̣ибуд̇д̇о, ааран̃н̃иго ваа, сзяяат̇ааби т̇зро рзвад̇о, б̣ахуссуд̇о ваа, сзяяат̇ааби т̇зро аананд̣̇о, сигкаагаамо ваа, сзяяат̇ааби т̇зро раахуло б̣уд̣̇д̇хабуд̇д̇од̇и. ид̇и имасмим̣ жад̇уггз явааяам̣ харад̇и бажжаахарад̇и жа, д̇асса г̇ожарасамбаж̇ан̃н̃ам̣ сикаабад̇д̇ам̣ ход̇и.

абхиггамаад̣̇ийсу бана асаммуяханам̣ асаммохасамбаж̇ан̃н̃ам̣. д̇ам̣ звам̣ взд̣̇ид̇аб̣б̣ам̣ – ид̇ха бхигку абхиггаманд̇о ваа бадиггаманд̇о ваа яат̇аа анд̇хабут̇уж̇ж̇анаа абхиггамаад̣̇ийсу – ‘‘ад̇д̇аа абхиггамад̇и, ад̇д̇анаа абхиггамо ниб̣б̣ад̇д̇ид̇о’’д̇и ваа ‘‘ахам̣ абхиггамаами, маяаа абхиггамо ниб̣б̣ад̇д̇ид̇о’’д̇и ваа саммуяханд̇и, д̇ат̇аа асаммуяханд̇о абхиггамаамийд̇и жид̇д̇з уббаж̇ж̇амаанз д̇знзва жид̇д̇зна сад̣̇д̇хим̣ жид̇д̇асамудтаанаа вааяод̇хаад̇у вин̃н̃ад̇д̇им̣ ж̇анаяамаанаа уббаж̇ж̇ад̇и, ид̇и жид̇д̇агирияавааяод̇хаад̇увибпааравасзна аяам̣ гааяасаммад̇о адтисан̇гхаадо абхиггамад̇и. д̇ассзвам̣ абхиггамад̇о згзгабаад̣̇уд̣̇д̇харан̣з бат̇авийд̇хаад̇у аабод̇хаад̇ууд̇и д̣̇вз д̇хаад̇уяо омад̇д̇аа хонд̇и манд̣̇аа, ид̇араа д̣̇вз ад̇химад̇д̇аа хонд̇и б̣алавад̇ияо, д̇ат̇аа ад̇ихаран̣авийд̇ихаран̣зсу, воссаж̇ж̇анз д̇зж̇од̇хаад̇у вааяод̇хаад̇ууд̇и д̣̇вз д̇хаад̇уяо омад̇д̇аа хонд̇и манд̣̇аа, ид̇араа д̣̇вз ад̇химад̇д̇аа хонд̇и б̣алавад̇ияо, д̇ат̇аа саннигкзбанасаннирумбханзсу.

д̇ад̇т̇а уд̣̇д̇харан̣з бавад̇д̇аа руубааруубад̇хаммаа ад̇ихаран̣ам̣ на баабун̣анд̇и, д̇ат̇аа ад̇ихаран̣з бавад̇д̇аа вийд̇ихаран̣ам̣, вийд̇ихаран̣з бавад̇д̇аа воссаж̇ж̇анам̣, воссаж̇ж̇анз бавад̇д̇аа саннигкзбанам̣, саннигкзбанз бавад̇д̇аа саннирумбханам̣ на баабун̣анд̇и, д̇ад̇т̇а д̇ад̇т̇зва баб̣б̣абаб̣б̣ам̣ санд̇хисанд̇хи од̇хиод̇хи худ̇ваа д̇ад̇д̇агабаалз багкид̇д̇ад̇илаани вияа д̇адад̇адааяанд̇аа бхиж̇ж̇анд̇и. д̇ад̇т̇а го зго абхиггамад̇и, гасса ваа згасса абхиггаманам̣? барамад̇т̇ад̇о хи д̇хаад̇уунам̣язва г̇аманам̣, д̇хаад̇уунам̣ таанам̣, д̇хаад̇уунам̣ нисаж̇ж̇аа, д̇хаад̇уунам̣ саяанам̣. д̇асмим̣ д̇асмин̃хи годтаасз сад̣̇д̇хим̣ руубзна –

‘‘ан̃н̃ам̣ уббаж̇ж̇ад̇з жид̇д̇ам̣, ан̃н̃ам̣ жид̇д̇ам̣ нируж̇жхад̇и;

авийжиманусамб̣анд̇хо, над̣̇ийсод̇ова вад̇д̇ад̇ий’’д̇и. –

звам̣ абхиггамаад̣̇ийсу асаммуяханам̣ асаммохасамбаж̇ан̃н̃ам̣ наамаад̇и.

нидтид̇о ‘‘абхигганд̇з бадигганд̇з самбаж̇аанагаарий ход̇ий’’д̇ибад̣̇асса ад̇т̇о.

аалогид̇з вилогид̇зд̇и зд̇т̇а бана аалогид̇ам̣ наама бурад̇о бзгканам̣, вилогид̇ам̣ наама ануд̣̇исаабзгканам̣. ан̃н̃ааниби хздтаа убари бажчад̇о анубзгканавасзна ологид̇ауллогид̇аабалогид̇аани наама хонд̇и. д̇аани ид̇ха на г̇ахид̇аани, сааруббавасзна бана имаанзва д̣̇вз г̇ахид̇аани. иминаа ваа мукзна саб̣б̣ааниби д̇аани г̇ахид̇аанзваад̇и.

д̇ад̇т̇а ‘‘аалогзссаамий’’д̇и жид̇д̇з уббаннз жид̇д̇авасзнзва анологзд̇ваа ад̇т̇абариг̇г̇ан̣ханам̣ саад̇т̇агасамбаж̇ан̃н̃ам̣. д̇ам̣ ааяасманд̇ам̣ нанд̣̇ам̣ гааяасагким̣ гад̇ваа взд̣̇ид̇аб̣б̣ам̣. вуд̇д̇ан̃хзд̇ам̣ бхаг̇авад̇аа –

‘‘сажз, бхигкавз, нанд̣̇асса бурад̇т̇имаа д̣̇исаа аалогзд̇аб̣б̣аа ход̇и, саб̣б̣ам̣ жзд̇асаа саманнаахарид̇ваа нанд̣̇о бурад̇т̇имам̣ д̣̇исам̣ аалогзд̇и ‘звам̣ мз бурад̇т̇имам̣ д̣̇исам̣ аалогаяад̇о наабхиж̇жхаад̣̇оманассаа баабагаа агусалаа д̇хаммаа анваасависсанд̇ий’д̇и. ид̇иха д̇ад̇т̇а самбаж̇аано ход̇и. сажз, бхигкавз, нанд̣̇асса бажчимаа д̣̇исаа, уд̇д̇араа д̣̇исаа, д̣̇агкин̣аа д̣̇исаа, уд̣̇д̇хам̣, ад̇хо, ануд̣̇исаа аалогзд̇аб̣б̣аа ход̇и, саб̣б̣ам̣ жзд̇асаа саманнаахарид̇ваа нанд̣̇о ануд̣̇исам̣ аалогзд̇и ‘звам̣ мз ануд̣̇исам̣ аалогаяад̇о’…бз… самбаж̇аано ход̇ий’’д̇и (а. ни. 8.9).

абижа ид̇хааби буб̣б̣з вуд̇д̇ажзд̇ияад̣̇ассанаад̣̇ивасзнзва саад̇т̇агад̇аа жа саббааяад̇аа жа взд̣̇ид̇аб̣б̣аа. гаммадтаанасса бана авиж̇аханамзва г̇ожарасамбаж̇ан̃н̃ам̣, д̇асмаа канд̇хад̇хаад̇уааяад̇анагаммадтаанигзхи ад̇д̇ано гамадтаанавасзнзва гасин̣аад̣̇игаммадтаанигзхи ваа бана гаммадтаанасийсзнзва аалоганавилоганам̣ гаад̇аб̣б̣ам̣.

‘‘аб̣бханд̇арз ад̇д̇аа наама аалогзд̇аа ваа вилогзд̇аа ваа над̇т̇и, ‘аалогзссаамий’д̇и бана жид̇д̇з уббаж̇ж̇амаанз д̇знзва жид̇д̇зна сад̣̇д̇хим̣ жид̇д̇асамудтаанаа вааяод̇хаад̇у вин̃н̃ад̇д̇им̣ ж̇анаяамаанаа уббаж̇ж̇ад̇и. ид̇и жид̇д̇агирияавааяод̇хаад̇увибпааравасзна хздтимам̣ агкид̣̇алам̣ ад̇хо сийд̣̇ад̇и, убаримам̣ уд̣̇д̇хам̣ лан̇гхзд̇и, гожи яанд̇агзна виваранд̇о наама над̇т̇и, д̇ад̇о жагкувин̃н̃аан̣ам̣ д̣̇ассанагижжам̣ саад̇хзнд̇ам̣ уббаж̇ж̇ад̇ий’’д̇и звам̣ баж̇аананам̣ банзд̇т̇а асаммохасамбаж̇ан̃н̃ам̣ наама.

абижа муулабарин̃н̃ааааг̇анд̇угад̇аавагаалигабхаававасзнабзд̇т̇а асаммохасамбаж̇ан̃н̃ам̣ взд̣̇ид̇аб̣б̣ам̣. муулабарин̃н̃аавасзна д̇аава –

‘‘бхаван̇г̇ааваж̇ж̇анан̃жзва, д̣̇ассанам̣ самбадижчанам̣;

санд̇ийран̣ам̣ водтаб̣б̣анам̣, ж̇аванам̣ бхавад̇и сад̇д̇амам̣’’.

д̇ад̇т̇а бхаван̇г̇ам̣ убабад̇д̇ибхавасса ан̇г̇агижжам̣ саад̇хаяамаанам̣ бавад̇д̇ад̇и, д̇ам̣ ааваддзд̇ваа гирияаманод̇хаад̇у ааваж̇ж̇анагижжам̣ саад̇хаяамаанаа, д̇аннирод̇хаа жагкувин̃н̃аан̣ам̣ д̣̇ассанагижжам̣ саад̇хаяамаанам̣, д̇аннирод̇хаа вибаагаманод̇хаад̇у самбадижчанагижжам̣ саад̇хаяамаанаа, д̇аннирод̇хаа вибаагамановин̃н̃аан̣ад̇хаад̇у санд̇ийран̣агижжам̣ саад̇хаяамаанаа, д̇аннирод̇хаа гирияамановин̃н̃аан̣ад̇хаад̇у водтаб̣б̣анагижжам̣ саад̇хаяамаанаа, д̇аннирод̇хаа сад̇д̇агкад̇д̇ум̣ ж̇аванам̣ ж̇авад̇и. д̇ад̇т̇а батамаж̇аванзби ‘‘аяам̣ ид̇т̇ий, аяам̣ бурисо’’д̇и раж̇ж̇анад̣̇уссанамуяханавасзна аалогид̇авилогид̇ам̣ на ход̇и, д̣̇уд̇ияаж̇аванзби…бз… сад̇д̇амаж̇аванзби. зд̇зсу бана яуд̣̇д̇хаман̣д̣алз яод̇хзсу вияа хздтубарияавасзна бхиж̇ж̇ид̇ваа бад̇ид̇зсу ‘‘аяам̣ ид̇т̇ий, аяам̣ бурисо’’д̇и раж̇ж̇анаад̣̇ивасзна аалогид̇авилогид̇ам̣ ход̇и. звам̣ д̇аавзд̇т̇а муулабарин̃н̃аавасзна асаммохасамбаж̇ан̃н̃ам̣ взд̣̇ид̇аб̣б̣ам̣.

жагкуд̣̇ваарз бана руубз аабаат̇амааг̇ад̇з бхаван̇г̇ажаланад̇о уд̣̇д̇хам̣ сагагижжанибпаад̣̇анавасзна ааваж̇ж̇анаад̣̇ийсу уббаж̇ж̇ид̇ваа нируд̣̇д̇хзсу авасаанз ж̇аванам̣ уббаж̇ж̇ад̇и, д̇ам̣ буб̣б̣з уббаннаанам̣ ааваж̇ж̇анаад̣̇ийнам̣ г̇зхабхууд̇з жагкуд̣̇ваарз ааг̇анд̇угабурисо вияа ход̇и. д̇асса яат̇аа бараг̇зхз гин̃жи яаажид̇ум̣ бавидтасса ааг̇анд̇угабурисасса г̇зхасаамигзсу д̇ун̣хиймаасинзсу аан̣аагаран̣ам̣ на яуд̇д̇ам̣, звам̣ ааваж̇ж̇анаад̣̇ийнам̣ г̇зхабхууд̇з жагкуд̣̇ваарз ааваж̇ж̇анаад̣̇ийсуби араж̇ж̇анд̇зсу ад̣̇уссанд̇зсу амуяханд̇зсу жа раж̇ж̇анад̣̇уссанамуяханам̣ аяуд̇д̇анд̇и звам̣ ааг̇анд̇угабхаававасзна асаммохасамбаж̇ан̃н̃ам̣ взд̣̇ид̇аб̣б̣ам̣.

яаани банзд̇аани жагкуд̣̇ваарз водтаб̣б̣анабарияосаанаани жид̇д̇аани уббаж̇ж̇анд̇и, д̇аани сад̣̇д̇хим̣ самбаяуд̇д̇ад̇хаммзхи д̇ад̇т̇а д̇ад̇т̇зва бхиж̇ж̇анд̇и, ан̃н̃аман̃н̃ам̣ на бассанд̇и, ид̇д̇араани д̇аавагаалигаани хонд̇и. д̇ад̇т̇а яат̇аа згасмим̣ гхарз саб̣б̣зсу маанусагзсу мад̇зсу авасзсасса згасса д̇ан̇кан̣ам̣язва маран̣ад̇хаммасса на яуд̇д̇аа нажжаг̇ийд̇аад̣̇ийсу абхирад̇и наама, звамзва згад̣̇ваарз сасамбаяуд̇д̇зсу ааваж̇ж̇анаад̣̇ийсу д̇ад̇т̇а д̇ад̇т̇зва мад̇зсу авасзсасса д̇ан̇кан̣ам̣язва маран̣ад̇хаммасса ж̇аванассааби раж̇ж̇анад̣̇уссанамуяханавасзна абхирад̇и наама на яуд̇д̇аад̇и звам̣ д̇аавагаалигабхаававасзна асаммохасамбаж̇ан̃н̃ам̣ взд̣̇ид̇аб̣б̣ам̣.

абижа канд̇хааяад̇анад̇хаад̇убажжаяабажжавзгкан̣авасзнабзд̇ам̣ взд̣̇ид̇аб̣б̣ам̣. зд̇т̇а хи жагку жзва руубаа жа руубагканд̇хо, д̣̇ассанам̣ вин̃н̃аан̣агканд̇хо, д̇ам̣самбаяуд̇д̇аа взд̣̇анаа взд̣̇анаагканд̇хо, сан̃н̃аа сан̃н̃аагканд̇хо, пассаад̣̇игаа сан̇каараа сан̇каарагканд̇хо, звамзд̇зсам̣ бан̃жаннам̣ канд̇хаанам̣ самавааяз аалоганавилоганам̣ бан̃н̃ааяад̇и. д̇ад̇т̇а го зго аалогзд̇и, го вилогзд̇и? д̇ат̇аа жагку жагкааяад̇анам̣, руубам̣ руубааяад̇анам̣, д̣̇ассанам̣ манааяад̇анам̣, взд̣̇анаад̣̇аяо самбаяуд̇д̇ад̇хаммаа д̇хаммааяад̇анам̣, звамзд̇зсам̣ жад̇уннам̣ ааяад̇анаанам̣ самавааяз аалоганавилоганам̣ бан̃н̃ааяад̇и. д̇ад̇т̇а го зго аалогзд̇и, го вилогзд̇и? д̇ат̇аа жагку жагкуд̇хаад̇у, руубам̣ руубад̇хаад̇у, д̣̇ассанам̣ жагкувин̃н̃аан̣ад̇хаад̇у, д̇ам̣самбаяуд̇д̇аа взд̣̇анаад̣̇аяо д̇хаммаа д̇хаммад̇хаад̇у, звамзд̇зсам̣ жад̇уннам̣ д̇хаад̇уунам̣ самавааяз аалоганавилоганам̣ бан̃н̃ааяад̇и. д̇ад̇т̇а го зго аалогзд̇и, го вилогзд̇и? д̇ат̇аа жагку ниссаяабажжаяо, руубам̣ аарамман̣абажжаяо, ааваж̇ж̇анам̣ ананд̇арасамананд̇аруубаниссаяанад̇т̇ивиг̇ад̇абажжаяо, аалого убаниссаяабажжаяо, взд̣̇анаад̣̇аяо сахаж̇аад̇абажжаяо. звамзд̇зсам̣ бажжаяаанам̣ самавааяз аалоганавилоганам̣ бан̃н̃ааяад̇и. д̇ад̇т̇а го зго аалогзд̇и, го вилогзд̇ийд̇и звамзд̇т̇а канд̇хааяад̇анад̇хаад̇убажжаяабажжавзгкан̣авасзнаби асаммохасамбаж̇ан̃н̃ам̣ взд̣̇ид̇аб̣б̣ам̣.

самин̃ж̇ид̇з басаарид̇зд̇и баб̣б̣аанам̣ самин̃ж̇анабасааран̣з. д̇ад̇т̇а жид̇д̇авасзнзва самин̃ж̇анабасааран̣ам̣ агад̇ваа хад̇т̇абаад̣̇аанам̣ самин̃ж̇анабасааран̣абажжаяаа ад̇т̇аанад̇т̇ам̣ бариг̇г̇ан̣хид̇ваа ад̇т̇абариг̇г̇ан̣ханам̣ саад̇т̇агасамбаж̇ан̃н̃ам̣. д̇ад̇т̇а хад̇т̇абаад̣̇з ад̇ижирам̣ самин̃ж̇ид̇ваа ваа басаарзд̇ваа ваа тид̇асса кан̣з кан̣з взд̣̇анаа уббаж̇ж̇анд̇и, жид̇д̇ам̣ згаг̇г̇ам̣ на лабхад̇и, гаммадтаанам̣ барибад̇ад̇и, висзсам̣ наад̇хиг̇ажчад̇и. гаалз самин̃ж̇анд̇асса гаалз басаарзнд̇асса бана д̇аа взд̣̇анаа нуббаж̇ж̇анд̇и, жид̇д̇ам̣ згаг̇г̇ам̣ ход̇и, гаммадтаанам̣ паад̇им̣ г̇ажчад̇и, висзсамад̇хиг̇ажчад̇ийд̇и звам̣ ад̇т̇аанад̇т̇абариг̇г̇ан̣ханам̣ взд̣̇ид̇аб̣б̣ам̣.

ад̇т̇з бана сад̇иби саббааяаасаббааяам̣ бариг̇г̇ан̣хид̇ваа саббааяабариг̇г̇ан̣ханам̣ саббааяасамбаж̇ан̃н̃ам̣. д̇ад̇рааяам̣ наяо – махаажзд̇ияан̇г̇ан̣з гира д̣̇ахарабхигкуу саж̇жхааяам̣ г̇ан̣ханд̇и. д̇зсам̣ бидтибассз д̣̇ахарабхигкунияо д̇хаммам̣ сун̣анд̇и. д̇ад̇т̇зго д̣̇ахаро хад̇т̇ам̣ басаарзнд̇о гааяасам̣саг̇г̇ам̣ бад̇ваа д̇знзва гааран̣зна г̇ихий ж̇аад̇о. абаро бхигку баад̣̇ам̣ басаарзнд̇о аг̇г̇имхи басаарзси, адтим̣ аахажжа баад̣̇о жхааяи. абаро ваммигз басаарзси, со аасийвисзна д̣̇адто. абаро жийварагудид̣̇ан̣д̣агз басаарзси, д̇ам̣ ман̣исаббо д̣ам̣си. д̇асмаа зваруубз асаббааяз абасаарзд̇ваа саббааяз басаарзд̇аб̣б̣ам̣. ид̣̇амзд̇т̇а саббааяасамбаж̇ан̃н̃ам̣.

г̇ожарасамбаж̇ан̃н̃ам̣ бана махаат̇зравад̇т̇унаа д̣̇ийбзд̇аб̣б̣ам̣ – махаат̇зро гира д̣̇иваадтаанз нисинно анд̇зваасигзхи сад̣̇д̇хим̣ гат̇аяамаано сахасаа хад̇т̇ам̣ самин̃ж̇ид̇ваа буна яат̇аатаанз табзд̇ваа сан̣игам̣ самин̃ж̇зси. д̇ам̣ анд̇зваасигаа бужчим̣су – ‘‘гасмаа, бханд̇з, сахасаа хад̇т̇ам̣ самин̃ж̇ид̇ваа буна яат̇аатаанз табзд̇ваа сан̣игам̣ самин̃ж̇ид̇т̇аа’’д̇и. яад̇о бадтааяаахам̣, аавусо, гаммадтаанам̣ манасигаад̇ум̣ аарад̣̇д̇хо, на мз гаммадтаанам̣ мун̃жид̇ваа хад̇т̇о самин̃ж̇ид̇абуб̣б̣о, ид̣̇аани бана д̇умхзхи сад̣̇д̇хим̣ гат̇аяамаанзна гаммадтаанам̣ мун̃жид̇ваа самин̃ж̇ид̇о, д̇асмаа буна яат̇аатаанз табзд̇ваа самин̃ж̇зсинд̇и. саад̇ху, бханд̇з, бхигкунаа наама зваруубзна бхавид̇аб̣б̣анд̇и. звамзд̇т̇ааби гаммадтаанаавиж̇аханамзва г̇ожарасамбаж̇ан̃н̃анд̇и взд̣̇ид̇аб̣б̣ам̣.

аб̣бханд̇арз ад̇д̇аа наама гожи самин̃ж̇анд̇о ваа басаарзнд̇о ваа над̇т̇и, вуд̇д̇аббагааражид̇д̇агирияавааяод̇хаад̇увибпаарзна бана суд̇д̇аагад̣дханавасзна д̣̇ааруяанд̇асса хад̇т̇абаад̣̇алал̣анам̣ вияа самин̃ж̇анабасааран̣ам̣ ход̇ийд̇и бариж̇аананам̣ банзд̇т̇а асаммохасамбаж̇ан̃н̃анд̇и взд̣̇ид̇аб̣б̣ам̣.

сан̇гхаадибад̇д̇ажийварад̇хааран̣зд̇и зд̇т̇а сан̇гхаадижийвараанам̣ ниваасанабаарубанавасзна, бад̇д̇асса бхигкаабадиг̇г̇ахан̣аад̣̇ивасзна барибхог̇о д̇хааран̣ам̣ наама. д̇ад̇т̇а сан̇гхаадижийварад̇хааран̣з д̇аава ниваасзд̇ваа баарубид̇ваа жа бин̣д̣ааяа жарад̇о аамисалаабхо, ‘‘сийд̇асса бадигхаад̇ааяаа’’д̇иаад̣̇инаа наязна бхаг̇авад̇аа вуд̇д̇аббагаароязва жа ад̇т̇о ад̇т̇о наама. д̇асса васзна саад̇т̇агасамбаж̇ан̃н̃ам̣ взд̣̇ид̇аб̣б̣ам̣.

ун̣хабагад̇игасса бана д̣̇уб̣б̣аласса жа жийварам̣ сукумам̣ саббааяам̣, сийд̇аалугасса гханам̣ д̣̇убаддам̣. вибарийд̇ам̣ асаббааяам̣. яасса гассажи ж̇ин̣н̣ам̣ асаббааяамзва. аг̇г̇ал̣аад̣̇ид̣̇аанзна хисса д̇ам̣ балиб̣од̇хагарам̣ ход̇и. д̇ат̇аа баддун̣н̣ад̣̇угуулаад̣̇ибхзд̣̇ам̣ лобханийяажийварам̣. д̇аад̣̇исан̃хи аран̃н̃з згагасса ниваасанд̇арааяагарам̣ , ж̇ийвид̇анд̇арааяагаран̃жааби ход̇и. ниббарияааязна бана яам̣ нимид̇д̇агаммаад̣̇имижчааж̇ийвавасзна уббаннам̣, яан̃жасса сзвамаанасса агусалаа д̇хаммаа абхивад̣дханд̇и, гусалаа д̇хаммаа барихааяанд̇и , д̇ам̣ асаббааяам̣. вибарийд̇ам̣ саббааяам̣, д̇асса васзнзд̇т̇а саббааяасамбаж̇ан̃н̃ам̣, гаммадтаанаавиж̇аханавасзнзва жа г̇ожарасамбаж̇ан̃н̃ам̣ взд̣̇ид̇аб̣б̣ам̣.

аб̣бханд̇арз ад̇д̇аа наама гожи жийварам̣ баарубанд̇о над̇т̇и, вуд̇д̇аббагааражид̇д̇агирияавааяод̇хаад̇увибпаарзнзва бана жийварабаарубанам̣ ход̇и. д̇ад̇т̇а жийварамби ажзд̇анам̣, гааяоби ажзд̇ано. жийварам̣ на ж̇аанаад̇и ‘‘маяаа гааяо баарубид̇о’’д̇и. гааяоби на ж̇аанаад̇и ‘‘ахам̣ жийварзна баарубид̇о’’д̇и. д̇хаад̇уяова д̇хаад̇усамуухам̣ бадижчаад̣̇знд̇и бадабилод̇игааяа бод̇т̇агаруубабадижчаад̣̇анз вияа. д̇асмаа нзва сунд̣̇арам̣ жийварам̣ лабхид̇ваа соманассам̣ гаад̇аб̣б̣ам̣, на асунд̣̇арам̣ лабхид̇ваа д̣̇оманассам̣. нааг̇аваммигажзд̇ияаругкаад̣̇ийсу хи гзжи маалааг̇анд̇хад̇хуумавад̇т̇аад̣̇ийхи саггаарам̣ гаронд̇и, гзжи г̇уут̇амуд̇д̇агад̣̇д̣̇амад̣̇ан̣д̣асад̇т̇абахаараад̣̇ийхи асаггаарам̣. на д̇зхи нааг̇аваммигаругкаад̣̇аяо соманассам̣ ваа гаронд̇и д̣̇оманассам̣ ваа. звамзвам̣ нзва сунд̣̇арам̣ жийварам̣ лабхид̇ваа соманассам̣ гаад̇аб̣б̣ам̣, на асунд̣̇арам̣ лабхид̇ваа д̣̇оманассанд̇и звам̣ бавад̇д̇абадисан̇каанавасзнзд̇т̇а асаммохасамбаж̇ан̃н̃ам̣ взд̣̇ид̇аб̣б̣ам̣.

бад̇д̇ад̇хааран̣зби бад̇д̇ам̣ сахасаава аг̇г̇ахзд̇ваа – ‘‘имам̣ г̇ахзд̇ваа бин̣д̣ааяа жарамаано бхигкам̣ лабхиссаамий’’д̇и звам̣ бад̇д̇аг̇г̇ахан̣абажжаяаа бадилабхид̇аб̣б̣аад̇т̇авасзна саад̇т̇агасамбаж̇ан̃н̃ам̣ взд̣̇ид̇аб̣б̣ам̣. гисад̣̇уб̣б̣аласарийрасса бана г̇арубад̇д̇о асаббааяо. яасса гассажи жад̇убан̃жаг̇ан̣тигаахад̇о д̣̇уб̣б̣исод̇ханийяо асаббааяова. д̣̇уд̣̇д̇ход̇абад̇д̇о хи на ваддад̇и, д̇ам̣ д̇хованд̇ассзва жасса балиб̣од̇хо ход̇и. ман̣иван̣н̣абад̇д̇о бана лобханийяо жийварз вуд̇д̇анаязнзва асаббааяо. нимид̇д̇агаммаад̣̇ивасзна лад̣̇д̇хо, бана яан̃жасса сзвамаанасса агусалаа д̇хаммаа абхивад̣дханд̇и, гусалаа д̇хаммаа барихааяанд̇и, аяам̣ зганд̇аасаббааяова. вибарийд̇о саббааяо. д̇асса васзнзд̇т̇а саббааяасамбаж̇ан̃н̃ам̣, гаммадтаанаавиж̇аханавасзнзва жа г̇ожарасамбаж̇ан̃н̃ам̣ взд̣̇ид̇аб̣б̣ам̣.

аб̣бханд̇арз ад̇д̇аа наама гожи бад̇д̇ам̣ г̇ан̣ханд̇о над̇т̇и, вуд̇д̇аббагааражид̇д̇агирияавааяод̇хаад̇увибпаарзнзва бад̇д̇аг̇г̇ахан̣ам̣ наама ход̇и. д̇ад̇т̇а бад̇д̇оби ажзд̇ано, хад̇т̇ааби ажзд̇анаа. бад̇д̇о на ж̇аанаад̇и ‘‘ахам̣ хад̇т̇зхи г̇ахид̇о’’д̇и. хад̇т̇ааби на ж̇аананд̇и ‘‘бад̇д̇о амхзхи г̇ахид̇о’’д̇и. д̇хаад̇уяова д̇хаад̇усамуухам̣ г̇ан̣ханд̇и, сан̣д̣аасзна аг̇г̇иван̣н̣абад̇д̇аг̇г̇ахан̣з вияаад̇и звам̣ бавад̇д̇абадисан̇каанавасзнзд̇т̇а асаммохасамбаж̇ан̃н̃ам̣ взд̣̇ид̇аб̣б̣ам̣.

абижа яат̇аа чиннахад̇т̇абаад̣̇з ван̣амукзхи баг̇гхарид̇абуб̣б̣алохид̇агимигулз нийламагкигасамбаригин̣н̣з анаат̇асаалааяа анаат̇амануссз д̣̇исваа д̣̇аяаалугаа бурисаа д̇зсам̣ ван̣абаддажол̣агаани жзва габаалаад̣̇ийхи бхзсаж̇ж̇аани жа убанаамзнд̇и. д̇ад̇т̇а жол̣агааниби гзсан̃жи сан̣хаани, гзсан̃жи т̇уулаани баабун̣анд̇и, бхзсаж̇ж̇агабаалааниби гзсан̃жи сусан̣таанаани, гзсан̃жи д̣̇уссан̣таанаани баабун̣анд̇и, на д̇з д̇ад̇т̇а суманаа ваа д̣̇умманаа ваа хонд̇и. ван̣абадижчаад̣̇анамад̇д̇знзва хи жол̣агзна бхзсаж̇ж̇абадиг̇г̇ахамад̇д̇знзва жа габаалагзна д̇зсам̣ ад̇т̇о. звамзва яо бхигку ван̣ажол̣агам̣ вияа жийварам̣, бхзсаж̇ж̇агабаалагам̣ вияа жа бад̇д̇ам̣, габаалз бхзсаж̇ж̇амива жа бад̇д̇з лад̣̇д̇хабхигкам̣ саллагкзд̇и. аяам̣ сан̇гхаадибад̇д̇ажийварад̇хааран̣з асаммохасамбаж̇ан̃н̃зна уд̇д̇амасамбаж̇аанагаарийд̇и взд̣̇ид̇аб̣б̣о.

асид̇аад̣̇ийсу асид̇зд̇и бин̣д̣абаад̇абхож̇анз. бийд̇зд̇и яааг̇уаад̣̇ибаанз. кааяид̇зд̇и бидтакаж̇ж̇агаад̣̇икаад̣̇анз. сааяид̇зд̇и мад̇хупаан̣ид̇аад̣̇исааяанз. д̇ад̇т̇а ‘‘нзва д̣̇авааяаа’’д̇иаад̣̇инаа наязна вуд̇д̇о адтавид̇хоби ад̇т̇о ад̇т̇о наама, д̇асса васзна саад̇т̇агасамбаж̇ан̃н̃ам̣ взд̣̇ид̇аб̣б̣ам̣.

луукабан̣ийд̇ад̇ид̇д̇амад̇хураад̣̇ийсу бана язна бхож̇анзна яасса апаасу ход̇и, д̇ам̣ д̇асса асаббааяам̣. яам̣ бана нимид̇д̇агаммаад̣̇ивасзна бадилад̣̇д̇хам̣, яан̃жасса бхун̃ж̇ад̇о агусалаа д̇хаммаа абхивад̣дханд̇и, гусалаа д̇хаммаа барихааяанд̇и, д̇ам̣ зганд̇аасаббааяамзва. вибарийд̇ам̣ саббааяам̣. д̇асса васзнзд̇т̇а саббааяасамбаж̇ан̃н̃ам̣, гаммадтаанаавиж̇аханавасзнзва жа г̇ожарасамбаж̇ан̃н̃ам̣ взд̣̇ид̇аб̣б̣ам̣.

аб̣бханд̇арз ад̇д̇аа наама гожи бхун̃ж̇аго над̇т̇и, вуд̇д̇аббагааражид̇д̇агирияавааяод̇хаад̇увибпаарзнзва бад̇д̇абадиг̇г̇ахан̣ам̣ наама ход̇и, жид̇д̇агирияавааяод̇хаад̇увибпаарзнзва хад̇т̇асса бад̇д̇з од̇ааран̣ам̣ наама ход̇и, жид̇д̇агирияавааяод̇хаад̇увибпаарзнзва аалобагаран̣ам̣ аалобуд̣̇д̇харан̣ам̣ мукавиваран̣ан̃жа ход̇и. на гожи гун̃жигааяа на яанд̇агзна ханугадтийни виварад̇и, жид̇д̇агирияавааяод̇хаад̇увибпаарзнзва аалобасса мукз табанам̣ убарид̣̇анд̇аанам̣ мусалагижжасаад̇ханам̣ хздтаад̣̇анд̇аанам̣ уд̣̇угкалагижжасаад̇ханам̣ ж̇ивхааяа хад̇т̇агижжасаад̇ханан̃жа ход̇и. ид̇и нам̣ д̇ад̇т̇а аг̇г̇аж̇ивхааяа д̇анугакзл̣о, муулаж̇ивхааяа б̣ахалакзл̣о магкзд̇и. д̇ам̣ хздтаад̣̇анд̇ауд̣̇угкалз ж̇ивхаахад̇т̇абаривад̇д̇ид̇ам̣ кзл̣ауд̣̇агад̇змид̇ам̣ убарид̣̇анд̇амусаласан̃жун̣н̣ид̇ам̣ гожи гадажчунаа ваа д̣̇аб̣б̣ияаа ваа анд̇о бавзсзнд̇о наама над̇т̇и, вааяод̇хаад̇уяаава бависад̇и. бавидтам̣ бавидтам̣ гожи балааласант̇арам̣ гад̇ваа д̇хаарзнд̇о наама над̇т̇и, вааяод̇хаад̇увасзнзва д̇идтад̇и. тид̇ам̣ тид̇ам̣ гожи уд̣̇д̇ханам̣ гад̇ваа аг̇г̇им̣ ж̇аалзд̇ваа бажанд̇о наама над̇т̇и, д̇зж̇од̇хаад̇уяаава бажжад̇и. баггам̣ баггам̣ гожи д̣̇ан̣д̣агзна ваа яадтияаа ваа б̣ахи нийхараго наама над̇т̇и, вааяод̇хаад̇уязва нийхарад̇и. ид̇и вааяод̇хаад̇у ад̇ихарад̇и жа вийд̇ихарад̇и жа д̇хаарзд̇и жа баривад̇д̇зд̇и жа сан̃жун̣н̣зд̇и жа висосзд̇и жа нийхарад̇и жа; бат̇авийд̇хаад̇у д̇хаарзд̇и жа баривад̇д̇зд̇и жа сан̃жун̣н̣зд̇и жа висосзд̇и жа; аабод̇хаад̇у синзхзд̇и жа аллад̇д̇ан̃жа анубаалзд̇и; д̇зж̇од̇хаад̇у анд̇обавидтам̣ барибаажзд̇и; аагаасад̇хаад̇у ан̃ж̇асо ход̇и; вин̃н̃аан̣ад̇хаад̇у д̇ад̇т̇а д̇ад̇т̇а саммаабаяог̇аманвааяа аабхуж̇ад̇ийд̇и звам̣ бавад̇д̇абадисан̇каанавасзнзд̇т̇а асаммохасамбаж̇ан̃н̃ам̣ взд̣̇ид̇аб̣б̣ам̣.

абижа г̇аманад̇о, бариязсанад̇о, барибхог̇ад̇о, аасаяад̇о, нид̇хаанад̇о, абарибаггад̇о, барибаггад̇о, палад̇о, ниссанд̣̇ад̇о, саммагканад̇од̇и звам̣ д̣̇асавид̇хам̣ бадигуулабхаавам̣ бажжавзгкан̣ад̇обзд̇т̇а асаммохасамбаж̇ан̃н̃ам̣ взд̣̇ид̇аб̣б̣ам̣. вид̇т̇аарагат̇аа банзд̇т̇а висуд̣̇д̇химаг̇г̇з (висуд̣̇д̇хи. 1.294 аад̣̇аяо) аахаарабадигууласан̃н̃аанид̣̇д̣̇зсад̇о г̇ахзд̇аб̣б̣аа.

ужжаарабассаавагаммзд̇и ужжаарасса жа бассаавасса жа гаран̣з. д̇ад̇т̇а бад̇д̇агаалз ужжаарабассаавам̣ агаронд̇асса сагаласарийрад̇о сзд̣̇аа мужжанд̇и, агкийни бхаманд̇и, жид̇д̇ам̣ на згаг̇г̇ам̣ ход̇и, ан̃н̃з жа рог̇аа уббаж̇ж̇анд̇и. гаронд̇асса бана саб̣б̣ам̣ д̇ам̣ на ход̇ийд̇и аяамзд̇т̇а ад̇т̇о. д̇асса васзна саад̇т̇агасамбаж̇ан̃н̃ам̣ взд̣̇ид̇аб̣б̣ам̣. адтаанз ужжаарабассаавам̣ гаронд̇асса бана аабад̇д̇и ход̇и, аяасо вад̣дхад̇и, ж̇ийвид̇анд̇арааяоби ход̇и. бад̇ируубз таанз гаронд̇асса саб̣б̣ам̣ д̇ам̣ на ход̇ийд̇и ид̣̇амзд̇т̇а саббааяам̣. д̇асса васзна саббааяасамбаж̇ан̃н̃ам̣, гаммадтаанаавиж̇аханавасзна жа г̇ожарасамбаж̇ан̃н̃ам̣ взд̣̇ид̇аб̣б̣ам̣.

аб̣бханд̇арз ад̇д̇аа наама гожи ужжаарабассаавагаммам̣ гаронд̇о над̇т̇и, жид̇д̇агирияавааяод̇хаад̇увибпаарзнзва бана ужжаарабассаавагаммам̣ ход̇и. яат̇аа бана баггз г̇ан̣д̣з г̇ан̣д̣абхзд̣̇зна буб̣б̣алохид̇ам̣ агаамад̇ааяа нигкамад̇и, яат̇аа жа ад̇ибхарид̇аа уд̣̇агабхааж̇анаа уд̣̇агам̣ агаамад̇ааяа нигкамад̇и, звам̣ баггаасаяамуд̇д̇авад̇т̇ийсу саннижид̇аа ужжаарабассааваа вааяувзг̇асамуббийл̣ид̇аа агаамад̇ааяаби нигкаманд̇и. со банааяам̣ звам̣ нигкаманд̇о ужжаарабассааво нзва д̇асса бхигкуно ад̇д̇ано ход̇и на барасса, гзвалам̣ сарийраниссанд̣̇ова ход̇и. яат̇аа гим̣? яат̇аа уд̣̇агад̇умб̣ад̇о бураан̣ауд̣̇агам̣ чад̣д̣знд̇асса нзва д̇ам̣ ад̇д̇ано ход̇и на барзсам̣, гзвалам̣ бадиж̇аг̇г̇анамад̇д̇амзва ход̇и. звам̣ бавад̇д̇абадисан̇каанавасзнзд̇т̇а асаммохасамбаж̇ан̃н̃ам̣ взд̣̇ид̇аб̣б̣ам̣.

г̇ад̇аад̣̇ийсу г̇ад̇зд̇и г̇аманз. тид̇зд̇и таанз. нисиннзд̇и нисаж̇ж̇ааяа. суд̇д̇зд̇и саяанз. ж̇ааг̇арид̇з д̇и ж̇ааг̇аран̣з. бхаасид̇зд̇и гат̇анз. д̇ун̣хийбхаавзд̇и агат̇анз. зд̇т̇а жа яо жирам̣ г̇анд̇ваа ваа жан̇гамид̇ваа ваа абарабхааг̇з тид̇о ид̇и бадисан̃жигкад̇и ‘‘жан̇гаманагаалз бавад̇д̇аа руубааруубад̇хаммаа зд̇т̇зва нируд̣̇д̇хаа’’д̇и, аяам̣ г̇ад̇з самбаж̇аанагаарий наама.

яо саж̇жхааяам̣ ваа гаронд̇о бан̃хам̣ ваа виссаж̇ж̇знд̇о гаммадтаанам̣ ваа манасигаронд̇о жирам̣ тад̇ваа абарабхааг̇з нисинно ид̇и бадисан̃жигкад̇и ‘‘тид̇агаалз бавад̇д̇аа руубааруубад̇хаммаа зд̇т̇зва нируд̣̇д̇хаа’’д̇и, аяам̣ тид̇з самбаж̇аанагаарий наама.

яо саж̇жхааяаад̣̇игаран̣авасзнзва жирам̣ нисийд̣̇ид̇ваа абарабхааг̇з нибанно ид̇и бадисан̃жигкад̇и – ‘‘нисиннагаалз бавад̇д̇аа руубааруубад̇хаммаа зд̇т̇зва нируд̣̇д̇хаа’’д̇и, аяам̣ нисиннз самбаж̇аанагаарий наама.

яо бана нибаннагова саж̇жхааяам̣ гаронд̇о гаммадтаанам̣ ваа манасигаронд̇о нид̣̇д̣̇ам̣ оггамид̇ваа абарабхааг̇з удтааяа ид̇и бадисан̃жигкад̇и – ‘‘саяанагаалз бавад̇д̇аа руубааруубад̇хаммаа зд̇т̇зва нируд̣̇д̇хаа’’д̇и, аяам̣ суд̇д̇з жа ж̇ааг̇арид̇з жа самбаж̇аанагаарий наама. гирияамаяажид̇д̇аанан̃хи аббавад̇д̇ам̣ суд̇д̇ам̣ наама, бавад̇д̇ам̣ ж̇ааг̇арид̇ам̣ наамаад̇и.

яо бана бхаасамаано – ‘‘аяам̣ сад̣̇д̣̇о наама одтз жа бадижжа д̣̇анд̇з жа ж̇ивхан̃жа д̇аалун̃жа бадижжа жид̇д̇асса жа д̇ад̣̇ануруубам̣ баяог̇ам̣ бадижжа ж̇ааяад̇ий’’д̇и сад̇о самбаж̇аано бхаасад̇и, жирам̣ ваа бана гаалам̣ саж̇жхааяам̣ гад̇ваа д̇хаммам̣ ваа гат̇зд̇ваа гаммадтаанам̣ ваа баривад̇д̇зд̇ваа бан̃хам̣ ваа виссаж̇ж̇зд̇ваа абарабхааг̇з д̇ун̣хийбхууд̇о ид̇и бадисан̃жигкад̇и ‘‘бхаасид̇агаалз уббаннаа руубааруубад̇хаммаа зд̇т̇зва нируд̣̇д̇хаа’’д̇и аяам̣ бхаасид̇з самбаж̇аанагаарий наама.

яо д̇ун̣хийбхууд̇о жирам̣ д̇хаммам̣ ваа гаммадтаанам̣ ваа манасигад̇ваа абарабхааг̇з ид̇и бадисан̃жигкад̇и – ‘‘д̇ун̣хийбхууд̇агаалз бавад̇д̇аа руубааруубад̇хаммаа зд̇т̇зва нируд̣̇д̇хаа’’д̇и. убаад̣̇ааруубабавад̇д̇ияаа сад̇и бхаасад̇и наама, асад̇и д̇ун̣хий бхавад̇и наамаад̇и, аяам̣ д̇ун̣хийбхаавз самбаж̇аанагаарий наамаад̇и. звамзд̇т̇а асаммохасамбаж̇ан̃н̃ам̣ д̇асса васзна самбаж̇аанагаарид̇аа взд̣̇ид̇аб̣б̣аа. имасмим̣ суд̇д̇з сад̇ибадтаанамиссагасамбаж̇ан̃н̃ам̣ буб̣б̣абхааг̇ам̣ гат̇ид̇ам̣.