| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
2. сад̇исуд̇д̇аван̣н̣анаа
2. Satisuttavaṇṇanā
368. сарад̇ийд̇и сад̇о. аяам̣ бана на яааяа гааяажи сад̇ияаа сад̇о, ат̇а ко зд̣̇исааяаад̇и д̣̇ассзнд̇о ‘‘гааяаад̣̇ианубассанаасад̇ияаа’’д̇и ааха. жад̇усамбаж̇ан̃н̃абан̃н̃ааяаад̇и жад̇уб̣б̣ид̇хасамбаж̇ан̃н̃абан̃н̃ааяа, абхиггаманам̣ абхигганд̇анд̇и ааха – ‘‘абхигганд̇ам̣ вужжад̇и г̇амана’’нд̇и. д̇ат̇аа бадиггаманам̣ бадигганд̇анд̇и вуд̇д̇ам̣ – ‘‘бадигганд̇ам̣ нивад̇д̇ана’’нд̇и. нивад̇д̇анан̃жа нивад̇д̇имад̇д̇ам̣, нивад̇д̇ид̇ваа бана г̇аманам̣ г̇аманамзва. гааяам̣ абхихаранд̇о абхиг̇аманавасзна гааяам̣ наамзнд̇о. таананисаж̇ж̇аасаяанзсу яо г̇аманаад̣̇ивид̇хинаа гааяасса бурад̇о абхихааро, со абхиггамо, бажчад̇о абахаран̣ам̣ бадиггамод̇и д̣̇ассзнд̇о ‘‘таанзбий’’д̇иаад̣̇имааха. аасанассаад̇и бийтагаад̣̇иаасанасса. буримаан̇г̇аабхимукод̇и аданигаад̣̇ибуримааваяаваабхимуко. сам̣саранд̇од̇и сам̣саббанд̇о. бажжаасам̣саранд̇од̇и бадиаасаббанд̇о. зсзва наяод̇и иминаа сарийрассзва абхимукасам̣саббанабадиаасаббанаани нид̣̇ассзд̇и.
368. Saratīti sato. Ayaṃ pana na yāya kāyaci satiyā sato, atha kho edisāyāti dassento ‘‘kāyādianupassanāsatiyā’’ti āha. Catusampajaññapaññāyāti catubbidhasampajaññapaññāya, abhikkamanaṃ abhikkantanti āha – ‘‘abhikkantaṃ vuccati gamana’’nti. Tathā paṭikkamanaṃ paṭikkantanti vuttaṃ – ‘‘paṭikkantaṃ nivattana’’nti. Nivattanañca nivattimattaṃ, nivattitvā pana gamanaṃ gamanameva. Kāyaṃ abhiharanto abhigamanavasena kāyaṃ nāmento. Ṭhānanisajjāsayanesu yo gamanādividhinā kāyassa purato abhihāro, so abhikkamo, pacchato apaharaṇaṃ paṭikkamoti dassento ‘‘ṭhānepī’’tiādimāha. Āsanassāti pīṭhakādiāsanassa. Purimaaṅgābhimukhoti aṭanikādipurimāvayavābhimukho. Saṃsarantoti saṃsappanto. Paccāsaṃsarantoti paṭiāsappanto. Eseva nayoti iminā sarīrasseva abhimukhasaṃsappanapaṭiāsappanāni nidasseti.
саммаа баж̇аананам̣ самбаж̇аанам̣. д̇зна ад̇д̇анаа гаад̇аб̣б̣агижжасса гаран̣асийло самбаж̇аанагаарийд̇и ааха – ‘‘самбаж̇ан̃н̃зна саб̣б̣агижжагаарий’’д̇и. самбаж̇аанамзва хи самбаж̇ан̃н̃ам̣. самбаж̇ан̃н̃ассзва ваа гаарийд̇и самбаж̇ан̃н̃ассзва гаран̣асийло. самбаж̇ан̃н̃ам̣ гарод̇зваад̇и абхигганд̇аад̣̇ийсу асаммохам̣ уббаад̣̇зд̇и зва, самбаж̇аанассзва ваа гааро зд̇асса ад̇т̇ийд̇и самбаж̇аанагаарий.
Sammā pajānanaṃ sampajānaṃ. Tena attanā kātabbakiccassa karaṇasīlo sampajānakārīti āha – ‘‘sampajaññena sabbakiccakārī’’ti. Sampajānameva hi sampajaññaṃ. Sampajaññasseva vā kārīti sampajaññasseva karaṇasīlo. Sampajaññaṃ karotevāti abhikkantādīsu asammohaṃ uppādeti eva, sampajānasseva vā kāro etassa atthīti sampajānakārī.
д̇хаммад̇о вад̣дхид̇асан̇каад̇зна саха ад̇т̇зна вад̇д̇ад̇ийд̇и саад̇т̇агам̣, абхигганд̇аад̣̇и, саад̇т̇агасса самбаж̇аананам̣ саад̇т̇агасамбаж̇ан̃н̃ам̣. саббааяасса ад̇д̇ано убагаараавахасса хид̇асса самбаж̇аананам̣ саббааяасамбаж̇ан̃н̃ам̣. абхиггамаад̣̇ийсу бхигкаажаараг̇ожарз, ан̃н̃ад̇т̇ааби жа бавад̇д̇зсу авиж̇ахид̇з гаммадтаанасан̇каад̇з г̇ожарз самбаж̇ан̃н̃ам̣ г̇ожарасамбаж̇ан̃н̃ам̣. абхиггамаад̣̇ийсу асаммуяханамзва самбаж̇ан̃н̃ам̣ асаммохасамбаж̇ан̃н̃ам̣. бариг̇г̇ан̣хид̇ваад̇и д̇улаяид̇ваа д̇ийрзд̇ваа, бадисан̇кааяаад̇и ад̇т̇о. сан̇гхад̣̇ассанзнзва убосат̇абавааран̣аад̣̇иад̇т̇ам̣ г̇аманам̣ сан̇г̇ахид̇ам̣. асубхад̣̇ассанаад̣̇ийд̇и аад̣̇и-сад̣̇д̣̇зна гасин̣абаригаммаад̣̇ийнам̣ сан̇г̇ахо д̣̇адтаб̣б̣о. сан̇кзбад̇о вуд̇д̇амад̇т̇ам̣ виварид̇ум̣ ‘‘жзд̇ияам̣ д̣̇исвааби хий’’д̇иаад̣̇и вуд̇д̇ам̣. арахад̇д̇ам̣ баабун̣аад̇ийд̇и уггадтанид̣̇д̣̇зсо зсо. самат̇авибассануббаад̣̇анамби хи бхигкуно вуд̣̇д̇хи зва. д̣̇агкин̣ад̣̇ваарзд̇и жзд̇ияан̇г̇ан̣асса д̣̇агкин̣ад̣̇ваарз, д̇ат̇аа бажчимад̣̇ваарзд̇иаад̣̇ийсу. абхаяавааби баал̣ияанд̇и абхаяаваабияаа бурад̇т̇имад̇ийрз.
Dhammato vaḍḍhitasaṅkhātena saha atthena vattatīti sātthakaṃ, abhikkantādi, sātthakassa sampajānanaṃ sātthakasampajaññaṃ. Sappāyassa attano upakārāvahassa hitassa sampajānanaṃ sappāyasampajaññaṃ. Abhikkamādīsu bhikkhācāragocare, aññatthāpi ca pavattesu avijahite kammaṭṭhānasaṅkhāte gocare sampajaññaṃ gocarasampajaññaṃ. Abhikkamādīsu asammuyhanameva sampajaññaṃ asammohasampajaññaṃ. Pariggaṇhitvāti tulayitvā tīretvā, paṭisaṅkhāyāti attho. Saṅghadassaneneva uposathapavāraṇādiatthaṃ gamanaṃ saṅgahitaṃ. Asubhadassanādīti ādi-saddena kasiṇaparikammādīnaṃ saṅgaho daṭṭhabbo. Saṅkhepato vuttamatthaṃ vivarituṃ ‘‘cetiyaṃ disvāpi hī’’tiādi vuttaṃ. Arahattaṃ pāpuṇātīti ukkaṭṭhaniddeso eso. Samathavipassanuppādanampi hi bhikkhuno vuddhi eva. Dakkhiṇadvāreti cetiyaṅgaṇassa dakkhiṇadvāre, tathā pacchimadvāretiādīsu. Abhayavāpi pāḷiyanti abhayavāpiyā puratthimatīre.
б̣уд̣̇д̇хавам̣са-арияавам̣са-жзд̇ияавам̣са-д̣̇ийбавам̣саад̣̇ивам̣сагат̇анад̇о махааарияавам̣сабхаан̣аго т̇зро. бан̃н̃ааяанадтаанзд̇и жзд̇ияасса бан̃н̃ааяанадтаанз. згабад̣̇уд̣̇д̇хаарзд̇и бад̣̇уд̣̇д̇хаарабад̇идтаанабаривад̇д̇анам̣ агад̇ваа згасмим̣язва авадтаанз. гзжийд̇и абхаяаг̇ириваасино.
Buddhavaṃsa-ariyavaṃsa-cetiyavaṃsa-dīpavaṃsādivaṃsakathanato mahāariyavaṃsabhāṇako thero. Paññāyanaṭṭhāneti cetiyassa paññāyanaṭṭhāne. Ekapaduddhāreti paduddhārapatiṭṭhānaparivattanaṃ akatvā ekasmiṃyeva avaṭṭhāne. Kecīti abhayagirivāsino.
д̇асмим̣ банаад̇и саад̇т̇агасамбаж̇ан̃н̃авасзна бариг̇г̇ахид̇аад̇т̇зби г̇аманз. ад̇т̇о наама д̇хаммад̇о вад̣дхийд̇и яам̣ саад̇т̇аганд̇и ад̇хиббзд̇ам̣ г̇аманам̣, д̇ам̣ саббааяамзваад̇и сияаа гассажи аасан̇гаад̇и д̇аннивад̇д̇анад̇т̇ам̣ ‘‘жзд̇ияад̣̇ассанам̣ д̇ааваа’’д̇иаад̣̇и аарад̣̇д̇хам̣. жид̇д̇агаммаруубагаани вияаад̇и жид̇д̇агаммагад̇аа бадимааяо вияа, яанд̇абаяог̇зна ваа вижид̇д̇агаммаа бадимааяа сад̣̇исаа яанд̇аруубагаа вияа. асамабзгканам̣ г̇зхассид̇аан̃н̃аан̣убзгкаавасзна аарамман̣з аяонисо ологанаад̣̇и. яам̣ санд̇хааяа вуд̇д̇ам̣ ‘‘жагкунаа руубам̣ д̣̇исваа уббаж̇ж̇ад̇и убзгкаа б̣ааласса муул̣хасса бут̇уж̇ж̇анассаа’’д̇иаад̣̇и (ма. ни. 3.308). хад̇т̇иаад̣̇исаммад̣̇д̣̇зна ж̇ийвид̇анд̇арааяо. висабхааг̇аруубад̣̇ассанаад̣̇инаа б̣рахмажарияанд̇арааяо.
Tasmiṃ panāti sātthakasampajaññavasena pariggahitaatthepi gamane. Attho nāma dhammato vaḍḍhīti yaṃ sātthakanti adhippetaṃ gamanaṃ, taṃ sappāyamevāti siyā kassaci āsaṅkāti tannivattanatthaṃ ‘‘cetiyadassanaṃ tāvā’’tiādi āraddhaṃ. Cittakammarūpakāni viyāti cittakammakatā paṭimāyo viya, yantapayogena vā vicittakammā paṭimāya sadisā yantarūpakā viya. Asamapekkhanaṃ gehassitaaññāṇupekkhāvasena ārammaṇe ayoniso olokanādi. Yaṃ sandhāya vuttaṃ ‘‘cakkhunā rūpaṃ disvā uppajjati upekkhā bālassa mūḷhassa puthujjanassā’’tiādi (ma. ni. 3.308). Hatthiādisammaddena jīvitantarāyo. Visabhāgarūpadassanādinā brahmacariyantarāyo.
баб̣б̣аж̇ид̇ад̣̇ивасад̇о бадтааяа бхигкуунам̣ анувад̇д̇анагат̇аа аажин̣н̣аа, ананувад̇д̇анагат̇аа бана д̇ассаа абараа д̣̇уд̇ияаа наама ход̇ийд̇и ааха – ‘‘д̣̇вз гат̇аа наама на гат̇ид̇абуб̣б̣аа’’д̇и. званд̇и иминаа ‘‘сажз банаа’’д̇иаад̣̇игам̣ саб̣б̣амби вуд̇д̇аагаарам̣ бажжаамасад̇и, на ‘‘бурисасса маад̇уг̇аамаасубха’’нд̇иаад̣̇игам̣ вужжамаанам̣.
Pabbajitadivasato paṭṭhāya bhikkhūnaṃ anuvattanakathā āciṇṇā, ananuvattanakathā pana tassā aparā dutiyā nāma hotīti āha – ‘‘dve kathā nāma na kathitapubbā’’ti. Evanti iminā ‘‘sace panā’’tiādikaṃ sabbampi vuttākāraṃ paccāmasati, na ‘‘purisassa mātugāmāsubha’’ntiādikaṃ vuccamānaṃ.
яог̇агаммасса бавад̇д̇идтаанад̇ааяа бхааванааяа аарамман̣ам̣ гаммадтаанам̣ вужжад̇ийд̇и ааха ‘‘гаммадтаанасан̇каад̇ам̣ г̇ожара’’нд̇и. уг̇г̇ахзд̇ваад̇и яат̇аа уг̇г̇аханимид̇д̇ам̣ уббаж̇ж̇ад̇и, звам̣ уг̇г̇ахагосалласса самбаад̣̇анавасзна уг̇г̇ахзд̇ваа.
Yogakammassa pavattiṭṭhānatāya bhāvanāya ārammaṇaṃ kammaṭṭhānaṃ vuccatīti āha ‘‘kammaṭṭhānasaṅkhātaṃ gocara’’nti. Uggahetvāti yathā uggahanimittaṃ uppajjati, evaṃ uggahakosallassa sampādanavasena uggahetvā.
харад̇ийд̇и гаммадтаанам̣ бавад̇д̇зд̇и, яаава бин̣д̣абаад̇абадиггамаа ануяун̃ж̇ад̇ийд̇и ад̇т̇о. на бажжаахарад̇ийд̇и аахааруубабхог̇ад̇о яаава д̣̇иваадтаанубасан̇гаманаа гаммадтаанам̣ на бадинзд̇и. самаад̣̇ааяа вад̇д̇ад̇и саммаа аад̣̇ияид̇ваа д̇зсам̣ вад̇д̇аанам̣ барибууран̣авасзна вад̇д̇ад̇и. сарийрабаригамманд̇и мукад̇хованаад̣̇исарийрабадиж̇аг̇г̇анам̣. д̣̇вз д̇аяо баллан̇гзд̇и д̣̇вз д̇аяо нисаж̇ж̇ааваарз д̣̇вз д̇ийн̣и ун̣хаасанаани. д̇знааха – ‘‘усумам̣ г̇аахаабзнд̇о’’д̇и. гаммадтаанасийсзнзваад̇и гаммадтаанамукзнзва гаммадтаанам̣ авиж̇аханд̇о зва. д̇зна ‘‘бад̇д̇оби ажзд̇ано’’д̇иаад̣̇инаа бавад̇д̇зд̇аб̣б̣агаммадтаанам̣, яат̇аабарихарияамаанам̣ ваа гаммадтаанам̣ авиж̇ахид̇ваад̇и д̣̇ассзд̇и. д̇ат̇зваад̇и д̇игкад̇д̇умзва. барибхог̇ажзд̇ияад̇о сарийражзд̇ияам̣ г̇аруд̇аранд̇и гад̇ваа ‘‘жзд̇ияам̣ ванд̣̇ид̇ваа’’д̇и жзд̇ияаванд̣̇анааяа батамам̣ гаран̣ийяад̇аа вуд̇д̇аа. д̇ат̇аа хи адтагат̇ааяам̣ – ‘‘жзд̇ияам̣ б̣аад̇хаяамаанаа б̣од̇хисаакаа харид̇аб̣б̣аа’’д̇и вуд̇д̇аа. б̣уд̣̇д̇хаг̇ун̣аануссаран̣авасзнзва б̣од̇хин̃жа бан̣ибаад̇агаран̣анд̇и ааха – ‘‘б̣уд̣̇д̇хасса бхаг̇авад̇о саммукаа вияа нибажжагаарам̣ д̣̇ассзд̇ваа’’д̇и. г̇аамасамийбзд̇и г̇аамасса убажаарадтаанз.
Haratīti kammaṭṭhānaṃ pavatteti, yāva piṇḍapātapaṭikkamā anuyuñjatīti attho. Na paccāharatīti āhārūpabhogato yāva divāṭṭhānupasaṅkamanā kammaṭṭhānaṃ na paṭineti. Samādāya vattati sammā ādiyitvā tesaṃ vattānaṃ paripūraṇavasena vattati. Sarīraparikammanti mukhadhovanādisarīrapaṭijagganaṃ. Dve tayo pallaṅketi dve tayo nisajjāvāre dve tīṇi uṇhāsanāni. Tenāha – ‘‘usumaṃ gāhāpento’’ti. Kammaṭṭhānasīsenevāti kammaṭṭhānamukheneva kammaṭṭhānaṃ avijahanto eva. Tena ‘‘pattopi acetano’’tiādinā pavattetabbakammaṭṭhānaṃ, yathāparihariyamānaṃ vā kammaṭṭhānaṃ avijahitvāti dasseti. Tathevāti tikkhattumeva. Paribhogacetiyato sarīracetiyaṃ garutaranti katvā ‘‘cetiyaṃ vanditvā’’ti cetiyavandanāya paṭhamaṃ karaṇīyatā vuttā. Tathā hi aṭṭhakathāyaṃ – ‘‘cetiyaṃ bādhayamānā bodhisākhā haritabbā’’ti vuttā. Buddhaguṇānussaraṇavaseneva bodhiñca paṇipātakaraṇanti āha – ‘‘buddhassa bhagavato sammukhā viya nipaccakāraṃ dassetvā’’ti. Gāmasamīpeti gāmassa upacāraṭṭhāne.
ж̇анасан̇г̇ахан̣ад̇т̇анд̇и ‘‘маяи агат̇знд̇з зд̇зсам̣ го гат̇зссад̇ий’’д̇и д̇хаммаануг̇г̇ахзна ж̇анасан̇г̇ахан̣ад̇т̇ам̣. д̇асмаад̇и яасмаа ‘‘д̇хаммагат̇аа наама гат̇зд̇аб̣б̣аа зваа’’д̇и адтагат̇аажарияаа вад̣̇анд̇и, яасмаа жа д̇хаммагат̇аа гаммадтаанавинимуд̇д̇аа наама над̇т̇и, д̇асмаа. гаммадтаанасийсзнзваад̇и ад̇д̇анаа барихарияамаанам̣ гаммадтаанам̣ авиж̇аханд̇о д̇ад̣̇ануг̇ун̣ам̣язва д̇хаммагат̇ам̣ гат̇зд̇ваа. анумод̣̇анам̣ гад̇ваад̇и зд̇т̇ааби ‘‘гаммадтаанасийсзнзваа’’д̇и аанзд̇ваа самб̣анд̇хид̇аб̣б̣ам̣. самбад̇д̇абарижчзд̣̇знзваад̇и барижид̇о абарижид̇од̇иаад̣̇ивибхааг̇ам̣ агад̇ваа самбад̇д̇агодияаа зва, самааг̇амамад̇д̇знзваад̇и ад̇т̇о. бхаязд̇и баражаггаад̣̇ибхаяз.
Janasaṅgahaṇatthanti ‘‘mayi akathente etesaṃ ko kathessatī’’ti dhammānuggahena janasaṅgahaṇatthaṃ. Tasmāti yasmā ‘‘dhammakathā nāma kathetabbā evā’’ti aṭṭhakathācariyā vadanti, yasmā ca dhammakathā kammaṭṭhānavinimuttā nāma natthi, tasmā. Kammaṭṭhānasīsenevāti attanā parihariyamānaṃ kammaṭṭhānaṃ avijahanto tadanuguṇaṃyeva dhammakathaṃ kathetvā. Anumodanaṃ katvāti etthāpi ‘‘kammaṭṭhānasīsenevā’’ti ānetvā sambandhitabbaṃ. Sampattaparicchedenevāti paricito aparicitotiādivibhāgaṃ akatvā sampattakoṭiyā eva, samāgamamattenevāti attho. Bhayeti paracakkādibhaye.
гаммаж̇ад̇зж̇од̇и г̇ахан̣им̣ санд̇хааяааха. гаммадтаанавийт̇им̣ наарохад̇и куд̣̇аабариссамзна гиланд̇агааяад̇д̇аа самаад̇хаанаабхаавад̇о. авасзсадтаанзд̇и яааг̇уяаа аг̇г̇ахид̇адтаанз. бон̇каанубон̇канд̇и гаммадтаанубадтаанасса авижчзд̣̇а-д̣̇ассанамзд̇ам̣, яат̇аа бон̇каанубон̇кам̣ бавад̇д̇ааяа сарабадибаадияаа анавижчзд̣̇о, звамзд̇ассаби гаммадтаанубадтаанассаад̇и вуд̇д̇ам̣ ход̇и.
Kammajatejoti gahaṇiṃ sandhāyāha. Kammaṭṭhānavīthiṃ nārohati khudāparissamena kilantakāyattā samādhānābhāvato. Avasesaṭṭhāneti yāguyā aggahitaṭṭhāne. Poṅkhānupoṅkhanti kammaṭṭhānupaṭṭhānassa aviccheda-dassanametaṃ, yathā poṅkhānupoṅkhaṃ pavattāya sarapaṭipāṭiyā anavicchedo, evametassapi kammaṭṭhānupaṭṭhānassāti vuttaṃ hoti.
нигкид̇д̇ад̇хуро бхааванаануяог̇з. вад̇д̇абадибад̇д̇ияаа абууран̣зна саб̣б̣авад̇д̇аани бхинд̣̇ид̇ваа. гаамз авийд̇арааг̇о ход̇и. гааяз авийд̇арааг̇о. руубз авийд̇арааг̇о. яаавад̣̇ад̇т̇ам̣ уд̣̇араавад̣̇зхам̣ бхун̃ж̇ид̇ваа сзяяасукам̣ бассасукам̣ мид̣̇д̇хасукам̣ ануяуд̇д̇о вихарад̇и. ан̃н̃ад̇арам̣ д̣̇званигааяам̣ бан̣ид̇хааяа б̣рахмажарияам̣ жарад̇ий’’д̇и (д̣̇ий. ни. 3.320; ма. ни. 1.186) звам̣ вуд̇д̇ам̣ бан̃жавид̇хажзд̇овиниб̣анд̇хажид̇д̇о. жарид̇ваад̇и бавад̇д̇ид̇ваа.
Nikkhittadhuro bhāvanānuyoge. Vattapaṭipattiyā apūraṇena sabbavattāni bhinditvā. Kāme avītarāgo hoti. Kāye avītarāgo. Rūpe avītarāgo. Yāvadatthaṃ udarāvadehaṃ bhuñjitvā seyyasukhaṃ passasukhaṃ middhasukhaṃ anuyutto viharati. Aññataraṃ devanikāyaṃ paṇidhāya brahmacariyaṃ caratī’’ti (dī. ni. 3.320; ma. ni. 1.186) evaṃ vuttaṃ pañcavidhacetovinibandhacitto. Caritvāti pavattitvā.
г̇ад̇абажжааг̇ад̇игавад̇д̇авасзнаад̇и бхааванаасахид̇ам̣язва бхигкааяа г̇ад̇абажжааг̇ад̇ам̣ г̇аманабажжааг̇аманам̣ зд̇асса ад̇т̇ийд̇и г̇ад̇абажжааг̇ад̇игам̣, д̇ад̣̇зва вад̇д̇ам̣, д̇асса васзна. ад̇д̇ано хид̇асукам̣ гаамзнд̇и ижчанд̇ийд̇и ад̇д̇агаамаа, д̇хаммажчанд̣̇аванд̇о. ‘‘д̇хаммо’’д̇и хи хид̇ам̣ д̇ам̣нимид̇д̇аган̃жа суканд̇и. ат̇а ваа вин̃н̃уунам̣ д̇хаммаанам̣ ад̇д̇анияад̇д̇аа ад̇д̇абхаавабарижчаннад̇д̇аа жа ад̇д̇аа наама д̇хаммо. д̇знааха бхаг̇аваа – ‘‘ад̇д̇ад̣̇ийбаа, бхигкавз, вихарат̇а ад̇д̇асаран̣аа’’д̇иаад̣̇и (сам̣. ни. 3.43). д̇ам̣ гаамзнд̇и ижчанд̇ийд̇и ад̇д̇агаамаа. усабхам̣ наама вийсад̇и яадтияо. д̇ааяа сан̃н̃ааяаад̇и д̇ааяа баасаан̣асан̃н̃ааяа, ‘‘зд̇д̇агам̣ таанамааг̇ад̇аа’’д̇и ж̇аананд̇аад̇и ад̇хиббааяо. со зва наяо аяам̣ бхигкууд̇иаад̣̇иго яо таанз вуд̇д̇о, со зва нисаж̇ж̇ааяаби наяо. бажчад̇о ааг̇ажчанд̇аанам̣ чиннабхад̇д̇абхаавабхаязнаби яонисоманасигаарам̣ бариб̣руухзд̇и.
Gatapaccāgatikavattavasenāti bhāvanāsahitaṃyeva bhikkhāya gatapaccāgataṃ gamanapaccāgamanaṃ etassa atthīti gatapaccāgatikaṃ, tadeva vattaṃ, tassa vasena. Attano hitasukhaṃ kāmenti icchantīti attakāmā, dhammacchandavanto. ‘‘Dhammo’’ti hi hitaṃ taṃnimittakañca sukhanti. Atha vā viññūnaṃ dhammānaṃ attaniyattā attabhāvaparicchannattā ca attā nāma dhammo. Tenāha bhagavā – ‘‘attadīpā, bhikkhave, viharatha attasaraṇā’’tiādi (saṃ. ni. 3.43). Taṃ kāmenti icchantīti attakāmā. Usabhaṃ nāma vīsati yaṭṭhiyo. Tāya saññāyāti tāya pāsāṇasaññāya, ‘‘ettakaṃ ṭhānamāgatā’’ti jānantāti adhippāyo. So eva nayo ayaṃ bhikkhūtiādiko yo ṭhāne vutto, so eva nisajjāyapi nayo. Pacchato āgacchantānaṃ chinnabhattabhāvabhayenapi yonisomanasikāraṃ paribrūheti.
мад̣̇д̣̇анд̇аад̇и д̇хан̃н̃агаран̣адтаанз саалисийсаани мад̣̇д̣̇анд̇аа. махаабад̇хаанам̣ бууж̇зссаамийд̇и амхаагам̣ ад̇т̇ааяа логанаат̇зна ча вассаани гад̇ам̣ д̣̇уггаражарияам̣ зваахам̣ яат̇аасад̇д̇и бууж̇зссаамийд̇и. бадибад̇д̇ибууж̇аа хи сад̇т̇убууж̇аа, на аамисабууж̇аад̇и. таанажан̇гамамзваад̇и ад̇хидтаад̇аб̣б̣аирияаабат̇агаалавасзна вуд̇д̇ам̣, на бхож̇анаад̣̇игаалзсу авассам̣ гаад̇аб̣б̣анисаж̇ж̇ааяа бадигкзбавасзна.
Maddantāti dhaññakaraṇaṭṭhāne sālisīsāni maddantā. Mahāpadhānaṃ pūjessāmīti amhākaṃ atthāya lokanāthena cha vassāni kataṃ dukkaracariyaṃ evāhaṃ yathāsatti pūjessāmīti. Paṭipattipūjā hi satthupūjā, na āmisapūjāti. Ṭhānacaṅkamamevāti adhiṭṭhātabbairiyāpathakālavasena vuttaṃ, na bhojanādikālesu avassaṃ kātabbanisajjāya paṭikkhepavasena.
вийт̇им̣ од̇арид̇ваа ид̇о жид̇о анологзд̇ваа батамамзва вийт̇ияо саллагкзд̇аб̣б̣аад̇и ааха ‘‘вийт̇ияо саллагкзд̇ваа’’д̇и. яам̣ санд̇хааяа вужжад̇и – ‘‘баасаад̣̇игзна абхигганд̇знаа’’д̇иаад̣̇и. д̇ам̣ д̣̇ассзд̇ум̣ ‘‘д̇ад̇т̇а жаа’’д̇иаад̣̇и вуд̇д̇ам̣. аахаарз бадигууласан̃н̃ам̣ убадтабзд̇ваад̇иаад̣̇ийсу яам̣ вад̇д̇аб̣б̣ам̣, д̇ам̣ хздтаа вуд̇д̇амзва. адтан̇г̇асаманнааг̇ад̇анд̇и ‘‘яаавад̣̇зва имасса гааяасса тид̇ияаа’’д̇иаад̣̇инаа (ма. ни. 1.23; 2.24; 3.75; сам̣. ни. 4.120; а. ни. 6.58; 8.9) вуд̇д̇зхи адтахи ан̇г̇зхи саманнааг̇ад̇ам̣ гад̇ваа. нзва д̣̇авааяаад̇иаад̣̇и бана бадигкзбад̣̇ассанам̣.
Vīthiṃ otaritvā ito cito anoloketvā paṭhamameva vīthiyo sallakkhetabbāti āha ‘‘vīthiyo sallakkhetvā’’ti. Yaṃ sandhāya vuccati – ‘‘pāsādikena abhikkantenā’’tiādi. Taṃ dassetuṃ ‘‘tattha cā’’tiādi vuttaṃ. Āhāre paṭikūlasaññaṃ upaṭṭhapetvātiādīsu yaṃ vattabbaṃ, taṃ heṭṭhā vuttameva. Aṭṭhaṅgasamannāgatanti ‘‘yāvadeva imassa kāyassa ṭhitiyā’’tiādinā (ma. ni. 1.23; 2.24; 3.75; saṃ. ni. 4.120; a. ni. 6.58; 8.9) vuttehi aṭṭhahi aṅgehi samannāgataṃ katvā. Neva davāyātiādi pana paṭikkhepadassanaṃ.
бажжзгаб̣од̇хим̣ сажчигарод̇и, яад̣̇и убаниссаяасамбанно ход̇ийд̇и самб̣анд̇хо. ид̣̇ан̃жа яат̇аа хздтаа д̇ийсу таанзсу, звам̣ ид̇о барзсу таанзсу убанзд̇ваа самб̣анд̇хид̇аб̣б̣ам̣. д̇ад̇т̇а бажжзгаб̣од̇хияаа убаниссаяасамбад̣̇аа габбаанам̣ д̣̇вз асан̇кязяяаани сад̇асахассан̃жа д̇аж̇ж̇ам̣ бун̃н̃ан̃аан̣асамбхаарасамбхаран̣ам̣, саавагаб̣од̇хияам̣ аг̇г̇асаавагаанам̣ згам̣ асан̇кязяяам̣ габбасад̇асахассан̃жа, махаасаавагаанам̣ габбасад̇асахассамзва д̇аж̇ж̇ам̣ самбхаарасамбхаран̣ам̣, ид̇арзсам̣ ад̇ийд̇аасу ж̇аад̇ийсу виваддасанниссаяавасзна ниб̣б̣ад̇д̇ид̇ам̣ ниб̣б̣зд̇хабхааг̇ияам̣ гусалам̣. б̣аахияо д̣̇ааружийрияод̇и б̣аахияависаяз ж̇аад̇асам̣вад̣̇д̇хад̇ааяа б̣аахияо, д̣̇ааружийрабарихаран̣зна д̣̇ааружийрияод̇и лад̣̇д̇хасаман̃н̃о. со хи ааяасмаа ‘‘д̇асмаад̇иха д̇з, б̣аахияа, звам̣ сигкид̇аб̣б̣ам̣ – д̣̇идтз д̣̇идтамад̇д̇ам̣ бхависсад̇ий’’д̇иаад̣̇ивасаббавад̇д̇зна (уд̣̇аа. 10) сам̣кид̇д̇знзва оваад̣̇зна киббад̇арам̣ висзсам̣ ад̇хиг̇ажчи. д̇зна вуд̇д̇ам̣ ‘‘киббаабхин̃н̃о ваа ход̇и сзяяат̇ааби т̇зро б̣аахияо д̣̇ааружийрияо’’д̇и. звам̣ махаабан̃н̃о ваад̇иаад̣̇ийсу яат̇аарахам̣ вад̇д̇аб̣б̣анд̇и.
Paccekabodhiṃ sacchikaroti, yadi upanissayasampanno hotīti sambandho. Idañca yathā heṭṭhā tīsu ṭhānesu, evaṃ ito paresu ṭhānesu upanetvā sambandhitabbaṃ. Tattha paccekabodhiyā upanissayasampadā kappānaṃ dve asaṅkhyeyyāni satasahassañca tajjaṃ puññañāṇasambhārasambharaṇaṃ, sāvakabodhiyaṃ aggasāvakānaṃ ekaṃ asaṅkhyeyyaṃ kappasatasahassañca, mahāsāvakānaṃ kappasatasahassameva tajjaṃ sambhārasambharaṇaṃ, itaresaṃ atītāsu jātīsu vivaṭṭasannissayavasena nibbattitaṃ nibbedhabhāgiyaṃ kusalaṃ. Bāhiyo dārucīriyoti bāhiyavisaye jātasaṃvaddhatāya bāhiyo, dārucīrapariharaṇena dārucīriyoti laddhasamañño. So hi āyasmā ‘‘tasmātiha te, bāhiya, evaṃ sikkhitabbaṃ – diṭṭhe diṭṭhamattaṃ bhavissatī’’tiādivasappavattena (udā. 10) saṃkhitteneva ovādena khippataraṃ visesaṃ adhigacchi. Tena vuttaṃ ‘‘khippābhiñño vā hoti seyyathāpi thero bāhiyo dārucīriyo’’ti. Evaṃ mahāpañño vātiādīsu yathārahaṃ vattabbanti.
д̇анд̇и асаммуяханам̣. званд̇и ид̣̇аани вужжамаанаагаарад̣̇ассанам̣. ад̇д̇аа абхиггамад̇ийд̇и иминаа анд̇хабут̇уж̇ж̇анасса д̣̇идтиг̇г̇аахавасзна абхиггамз саммуяханам̣ д̣̇ассзд̇и, ахам̣ абхиггамаамийд̇и бана иминаа маанаг̇г̇аахавасзна, д̇ад̣̇убхаяам̣ бана д̇ан̣хааяа винаа на ход̇ийд̇и д̇ан̣хааг̇г̇аахавасзнаби саммуяханам̣ д̣̇ассид̇амзва ход̇и, ‘‘д̇ат̇аа асаммуяханд̇о’’д̇и вад̇ваа д̇ам̣ асаммуяханам̣ язна гханавиниб̣бхог̇зна ход̇и, д̇ам̣ д̣̇ассзнд̇о ‘‘абхиггамаамийд̇и жид̇д̇з уббаж̇ж̇амаанз’’д̇иаад̣̇имааха. д̇ад̇т̇а яасмаа вааяод̇хаад̇уяаа ануг̇ад̇аа д̇зж̇од̇хаад̇у уд̣̇д̇харан̣асса бажжаяо. уд̣̇д̇харан̣аг̇ад̇игаа хи д̇зж̇од̇хаад̇ууд̇и уд̣̇д̇харан̣з вааяод̇хаад̇уяаа д̇ассаа ануг̇ад̇абхааво, д̇асмаа имаасам̣ д̣̇виннамзд̇т̇а д̇хаад̇уунам̣ саамад̇т̇ияад̇о ад̇химад̇д̇ад̇аа, ид̇араасан̃жа омад̇д̇ад̇аад̇и д̣̇ассзнд̇о ‘‘згзгабаад̣̇уд̣̇д̇харан̣з…бз… б̣алавад̇ияо’’д̇и ааха. яасмаа бана д̇зж̇од̇хаад̇уяаа ануг̇ад̇аа вааяод̇хаад̇у ад̇ихаран̣авийд̇ихаран̣аанам̣ бажжаяо. д̇ирияаг̇ад̇игааяа хи вааяод̇хаад̇уяаа ад̇ихаран̣авийд̇ихаран̣зсу саад̇исаяо б̣яаабаарод̇и д̇зж̇од̇хаад̇уяаа д̇ассаануг̇ад̇абхааво, д̇асмаа имаасам̣ д̣̇виннамзд̇т̇а саамад̇т̇ияад̇о ад̇химад̇д̇ад̇аа, ид̇араасан̃жа омад̇д̇ад̇аад̇и д̣̇ассзнд̇о ‘‘д̇ат̇аа ад̇ихаран̣авийд̇ихаран̣зсуу’’д̇и ааха. сад̇иби ануг̇аманаануг̇анд̇аб̣б̣ад̇аависзсз д̇зж̇од̇хаад̇увааяод̇хаад̇убхаавамад̇д̇ам̣ санд̇хааяа д̇ат̇аа-сад̣̇д̣̇аг̇г̇ахан̣ам̣.
Tanti asammuyhanaṃ. Evanti idāni vuccamānākāradassanaṃ. Attā abhikkamatīti iminā andhaputhujjanassa diṭṭhiggāhavasena abhikkame sammuyhanaṃ dasseti, ahaṃ abhikkamāmīti pana iminā mānaggāhavasena, tadubhayaṃ pana taṇhāya vinā na hotīti taṇhāggāhavasenapi sammuyhanaṃ dassitameva hoti, ‘‘tathā asammuyhanto’’ti vatvā taṃ asammuyhanaṃ yena ghanavinibbhogena hoti, taṃ dassento ‘‘abhikkamāmīti citte uppajjamāne’’tiādimāha. Tattha yasmā vāyodhātuyā anugatā tejodhātu uddharaṇassa paccayo. Uddharaṇagatikā hi tejodhātūti uddharaṇe vāyodhātuyā tassā anugatabhāvo, tasmā imāsaṃ dvinnamettha dhātūnaṃ sāmatthiyato adhimattatā, itarāsañca omattatāti dassento ‘‘ekekapāduddharaṇe…pe… balavatiyo’’ti āha. Yasmā pana tejodhātuyā anugatā vāyodhātu atiharaṇavītiharaṇānaṃ paccayo. Tiriyagatikāya hi vāyodhātuyā atiharaṇavītiharaṇesu sātisayo byāpāroti tejodhātuyā tassānugatabhāvo, tasmā imāsaṃ dvinnamettha sāmatthiyato adhimattatā, itarāsañca omattatāti dassento ‘‘tathā atiharaṇavītiharaṇesū’’ti āha. Satipi anugamanānugantabbatāvisese tejodhātuvāyodhātubhāvamattaṃ sandhāya tathā-saddaggahaṇaṃ.
д̇ад̇т̇а агганд̇адтаанад̇о баад̣̇асса угкибанам̣ уд̣̇д̇харан̣ам̣, тид̇адтаанам̣ ад̇иггамид̇ваа бурад̇о харан̣ам̣ ад̇ихаран̣ам̣. ругкакаан̣уаад̣̇ибарихаран̣ад̇т̇ам̣, бад̇идтид̇абаад̣̇агхадданабарихаран̣ад̇т̇ам̣ ваа бассзна харан̣ам̣ вийд̇ихаран̣ам̣. яаава бад̇идтид̇абаад̣̇о, д̇аава аахаран̣ам̣ ад̇ихаран̣ам̣, д̇ад̇о барам̣ харан̣ам̣ вийд̇ихаран̣анд̇и аяам̣ ваа зд̇зсам̣ висзсо. яасмаа бат̇авийд̇хаад̇уяаа ануг̇ад̇аа аабод̇хаад̇у воссаж̇ж̇анасса бажжаяо. г̇аруд̇арасабхааваа хи аабод̇хаад̇ууд̇и воссаж̇ж̇анз бат̇авийд̇хаад̇уяаа д̇ассаануг̇ад̇абхааво, д̇асмаа д̇аасам̣ д̣̇виннамзд̇т̇а саамад̇т̇ияад̇о ад̇химад̇д̇ад̇аа, ид̇араасан̃жа омад̇д̇ад̇аад̇и д̣̇ассзнд̇о ааха ‘‘воссаж̇ж̇анз…бз… б̣алавад̇ияо’’д̇и. яасмаа бана аабод̇хаад̇уяаа ануг̇ад̇аа бат̇авийд̇хаад̇у саннигкзбанасса бажжаяо. бад̇идтаабхаавз вияа бад̇идтаабанзби д̇ассаа саад̇исаяагижжад̇д̇аа аабод̇хаад̇уяаа д̇ассаа ануг̇ад̇абхааво, д̇ат̇аа гхадданагирияааяа бат̇авийд̇хаад̇уяаа васзна саннирумбханасса сиж̇жханад̇о д̇ад̇т̇ааби бат̇авийд̇хаад̇уяаа аабод̇хаад̇уануг̇ад̇абхааво, д̇асмаа вуд̇д̇ам̣ – ‘‘д̇ат̇аа саннигкзбанасаннирумбханзсуу’’д̇и.
Tattha akkantaṭṭhānato pādassa ukkhipanaṃ uddharaṇaṃ, ṭhitaṭṭhānaṃ atikkamitvā purato haraṇaṃ atiharaṇaṃ. Rukkhakhāṇuādipariharaṇatthaṃ, patiṭṭhitapādaghaṭṭanapariharaṇatthaṃ vā passena haraṇaṃ vītiharaṇaṃ. Yāva patiṭṭhitapādo, tāva āharaṇaṃ atiharaṇaṃ, tato paraṃ haraṇaṃ vītiharaṇanti ayaṃ vā etesaṃ viseso. Yasmā pathavīdhātuyā anugatā āpodhātu vossajjanassa paccayo. Garutarasabhāvā hi āpodhātūti vossajjane pathavīdhātuyā tassānugatabhāvo, tasmā tāsaṃ dvinnamettha sāmatthiyato adhimattatā, itarāsañca omattatāti dassento āha ‘‘vossajjane…pe… balavatiyo’’ti. Yasmā pana āpodhātuyā anugatā pathavīdhātu sannikkhepanassa paccayo. Patiṭṭhābhāve viya patiṭṭhāpanepi tassā sātisayakiccattā āpodhātuyā tassā anugatabhāvo, tathā ghaṭṭanakiriyāya pathavīdhātuyā vasena sannirumbhanassa sijjhanato tatthāpi pathavīdhātuyā āpodhātuanugatabhāvo, tasmā vuttaṃ – ‘‘tathā sannikkhepanasannirumbhanesū’’ti.
д̇ад̇т̇аад̇и д̇асмим̣ абхиггаманз, д̇зсу ваа вуд̇д̇зсу уд̣̇д̇харан̣аад̣̇ийсу часу годтаасзсу. уд̣̇д̇харан̣зд̇и уд̣̇д̇харан̣агкан̣з. руубааруубад̇хаммаад̇и уд̣̇д̇харан̣аагаарзна бавад̇д̇аа руубад̇хаммаа д̇ам̣самудтаабагаа аруубад̇хаммаа жа. ад̇ихаран̣ам̣ на баабун̣анд̇и кан̣амад̇д̇аавадтаанад̇о. д̇ад̇т̇а д̇ад̇т̇зваад̇и яад̇т̇а яад̇т̇а уббаннаа, д̇ад̇т̇а д̇ад̇т̇зва. на хи д̇хаммаанам̣ д̣̇зсанд̇арасан̇гаманам̣ ад̇т̇и. баб̣б̣ам̣ баб̣б̣анд̇иаад̣̇и уд̣̇д̇харан̣аад̣̇игодтаасз санд̇хааяа сабхааг̇асанд̇ад̇ивасзна вуд̇д̇анд̇и взд̣̇ид̇аб̣б̣ам̣. ад̇иид̇д̇аро хи руубад̇хаммаанамби бавад̇д̇игкан̣о, г̇аманассаад̣̇аанам̣ д̣̇звабуд̇д̇аанам̣ хздтубарияааязна бадимукам̣ д̇хааванд̇аанам̣ сираси баад̣̇з жа б̣ад̣̇д̇хакурад̇хаараасамааг̇амад̇оби сийгхад̇аро. яат̇аа д̇илаанам̣ бхаж̇ж̇ияамаанаанам̣ д̇адад̇адааяанзна бхзд̣̇о лагкийяад̇и, звам̣ сан̇кад̇ад̇хаммаанам̣ уббаад̣̇знаад̇и д̣̇ассанад̇т̇ам̣ ‘‘д̇адад̇адааяанд̇аа’’д̇и вуд̇д̇ам̣. уббаннаа хи зганд̇ад̇о бхиж̇ж̇анд̇ийд̇и.
Tatthāti tasmiṃ abhikkamane, tesu vā vuttesu uddharaṇādīsu chasu koṭṭhāsesu. Uddharaṇeti uddharaṇakkhaṇe. Rūpārūpadhammāti uddharaṇākārena pavattā rūpadhammā taṃsamuṭṭhāpakā arūpadhammā ca. Atiharaṇaṃ na pāpuṇanti khaṇamattāvaṭṭhānato. Tattha tatthevāti yattha yattha uppannā, tattha tattheva. Na hi dhammānaṃ desantarasaṅkamanaṃ atthi. Pabbaṃ pabbantiādi uddharaṇādikoṭṭhāse sandhāya sabhāgasantativasena vuttanti veditabbaṃ. Atiittaro hi rūpadhammānampi pavattikkhaṇo, gamanassādānaṃ devaputtānaṃ heṭṭhupariyāyena paṭimukhaṃ dhāvantānaṃ sirasi pāde ca baddhakhuradhārāsamāgamatopi sīghataro. Yathā tilānaṃ bhajjiyamānānaṃ taṭataṭāyanena bhedo lakkhīyati, evaṃ saṅkhatadhammānaṃ uppādenāti dassanatthaṃ ‘‘taṭataṭāyantā’’ti vuttaṃ. Uppannā hi ekantato bhijjantīti.
сад̣̇д̇хим̣ руубзнаад̇и ид̣̇ам̣ д̇асса д̇асса жид̇д̇асса нирод̇хзна сад̣̇д̇хим̣ нируж̇жханагаруубад̇хаммавасзна вуд̇д̇ам̣, яам̣ д̇ад̇о сад̇д̇арасамажид̇д̇асса уббаад̣̇агкан̣з уббаннам̣. ан̃н̃ат̇аа яад̣̇и руубааруубад̇хаммаа самаанагкан̣аа сияум̣, ‘‘руубам̣ г̇арубарин̣аамам̣ д̣̇анд̇ханирод̇ха’’нд̇иаад̣̇иважанзхи вирод̇хо сияаа. д̇ат̇аа – ‘‘наахам̣, бхигкавз, ан̃н̃ам̣ згад̇хаммамби саманубассаами, яам̣ звам̣ лахубаривад̇д̇ам̣, яат̇аяид̣̇ам̣ жид̇д̇а’’нд̇и (а. ни. 1.48) звамаад̣̇ибаал̣ияаа жа. жид̇д̇ажзд̇асигаа хи саарамман̣асабхааваа яат̇ааб̣алам̣ ад̇д̇ано аарамман̣абажжаяабхууд̇амад̇т̇ам̣ вибхаавзнд̇ааязва уббаж̇ж̇анд̇ийд̇и д̇зсам̣ д̇ам̣сабхааванибпад̇д̇иананд̇арам̣ нирод̇хо, руубад̇хаммаа бана анаарамман̣аа багаасзд̇аб̣б̣аа. звам̣ д̇зсам̣ багаасзд̇аб̣б̣абхааванибпад̇д̇и сол̣асахи жид̇д̇зхи ход̇ийд̇и д̇ан̇кан̣ааяугад̇аа д̇зсам̣ ижчид̇аа, лахугавин̃н̃аан̣асса висаяасан̇г̇ад̇имад̇д̇абажжаяад̇ааяа д̇ин̣н̣ам̣ канд̇хаанам̣, висаяасан̇г̇ад̇имад̇д̇ад̇ааяа жа вин̃н̃аан̣асса лахубаривад̇д̇ид̇аа, д̣̇анд̇хамахаабхууд̇абажжаяад̇ааяа руубад̇хаммаанам̣ д̣̇анд̇хабаривад̇д̇ид̇аа. наанаад̇хаад̇уяаа яат̇аабхууд̇ан̃аан̣ам̣ ко бана д̇ат̇ааг̇ад̇ассзва, д̇зна жа бурзж̇аад̇абажжаяо руубад̇хаммова вуд̇д̇о, бажчааж̇аад̇абажжаяо жа д̇ассзваад̇и руубааруубад̇хаммаанам̣ самаанагкан̣ад̇аа на яуж̇ж̇ад̇зва, д̇асмаа вуд̇д̇анаязнзвзд̇т̇а ад̇т̇о взд̣̇ид̇аб̣б̣о.
Saddhiṃ rūpenāti idaṃ tassa tassa cittassa nirodhena saddhiṃ nirujjhanakarūpadhammavasena vuttaṃ, yaṃ tato sattarasamacittassa uppādakkhaṇe uppannaṃ. Aññathā yadi rūpārūpadhammā samānakkhaṇā siyuṃ, ‘‘rūpaṃ garupariṇāmaṃ dandhanirodha’’ntiādivacanehi virodho siyā. Tathā – ‘‘nāhaṃ, bhikkhave, aññaṃ ekadhammampi samanupassāmi, yaṃ evaṃ lahuparivattaṃ, yathayidaṃ citta’’nti (a. ni. 1.48) evamādipāḷiyā ca. Cittacetasikā hi sārammaṇasabhāvā yathābalaṃ attano ārammaṇapaccayabhūtamatthaṃ vibhāventāyeva uppajjantīti tesaṃ taṃsabhāvanipphattianantaraṃ nirodho, rūpadhammā pana anārammaṇā pakāsetabbā. Evaṃ tesaṃ pakāsetabbabhāvanipphatti soḷasahi cittehi hotīti taṅkhaṇāyukatā tesaṃ icchitā, lahukaviññāṇassa visayasaṅgatimattapaccayatāya tiṇṇaṃ khandhānaṃ, visayasaṅgatimattatāya ca viññāṇassa lahuparivattitā, dandhamahābhūtapaccayatāya rūpadhammānaṃ dandhaparivattitā. Nānādhātuyā yathābhūtañāṇaṃ kho pana tathāgatasseva, tena ca purejātapaccayo rūpadhammova vutto, pacchājātapaccayo ca tassevāti rūpārūpadhammānaṃ samānakkhaṇatā na yujjateva, tasmā vuttanayenevettha attho veditabbo.
ан̃н̃ам̣ уббаж̇ж̇ад̇з жид̇д̇ам̣, ан̃н̃ам̣ жид̇д̇ам̣ нируж̇жхад̇ийд̇и яам̣ буримуббаннам̣ жид̇д̇ам̣, д̇ам̣ ан̃н̃ам̣, д̇ам̣ бана нируж̇жханд̇ам̣ абарасса ананд̇араад̣̇ибажжаяо худ̇ваа зва нируж̇жхад̇ийд̇и д̇ат̇аалад̣̇д̇хабажжаяам̣ ан̃н̃ам̣ уббаж̇ж̇ад̇з жид̇д̇ам̣. яад̣̇и звам̣ д̇зсам̣ анд̇аро лаб̣бхзяяаад̇и, нод̇и ааха ‘‘авийжиманубаб̣анд̇хо’’д̇и. яат̇аа вийжи анд̇аро на лаб̣бхад̇и, ‘‘д̇ад̣̇звзд̇а’’нд̇и ависзсавид̣̇уу ман̃н̃анд̇и, звам̣ ану ану баб̣анд̇хо жид̇д̇асанд̇аано руубасанд̇аано жа над̣̇ийсод̇ова над̣̇ияам̣ уд̣̇агаббаваахо вияа вад̇д̇ад̇и.
Aññaṃuppajjate cittaṃ, aññaṃ cittaṃ nirujjhatīti yaṃ purimuppannaṃ cittaṃ, taṃ aññaṃ, taṃ pana nirujjhantaṃ aparassa anantarādipaccayo hutvā eva nirujjhatīti tathāladdhapaccayaṃ aññaṃ uppajjate cittaṃ. Yadi evaṃ tesaṃ antaro labbheyyāti, noti āha ‘‘avīcimanupabandho’’ti. Yathā vīci antaro na labbhati, ‘‘tadeveta’’nti avisesavidū maññanti, evaṃ anu anu pabandho cittasantāno rūpasantāno ca nadīsotova nadiyaṃ udakappavāho viya vattati.
абхимукам̣ логид̇ам̣ аалогид̇анд̇и ааха ‘‘бурад̇обзгкана’’нд̇и. яасмаа яам̣д̣̇исаабхимуко г̇ажчад̇и д̇идтад̇и нисийд̣̇ад̇и ваа, д̇ад̣̇абхимукам̣ бзгканам̣ аалогид̇ам̣ , д̇асмаа д̇ад̣̇ануг̇ад̇ам̣ вид̣̇исаалоганам̣ вилогид̇анд̇и ааха ‘‘вилогид̇ам̣ наама ануд̣̇исаабзгкана’’нд̇и. саммаж̇ж̇анабарибхан̣д̣аад̣̇игаран̣з ологид̇асса, уллогаахаран̣аад̣̇ийсу уллогид̇асса, бажчад̇о ааг̇ажчанд̇асса бариссаяасса бариваж̇ж̇анаад̣̇ивасзна абалогид̇асса жа сияаа самбхавод̇и ааха – ‘‘иминаа ваа мукзна саб̣б̣ааниби д̇аани г̇ахид̇аанзваа’’д̇и.
Abhimukhaṃ lokitaṃ ālokitanti āha ‘‘puratopekkhana’’nti. Yasmā yaṃdisābhimukho gacchati tiṭṭhati nisīdati vā, tadabhimukhaṃ pekkhanaṃ ālokitaṃ , tasmā tadanugataṃ vidisālokanaṃ vilokitanti āha ‘‘vilokitaṃ nāma anudisāpekkhana’’nti. Sammajjanaparibhaṇḍādikaraṇe olokitassa, ullokāharaṇādīsu ullokitassa, pacchato āgacchantassa parissayassa parivajjanādivasena apalokitassa ca siyā sambhavoti āha – ‘‘iminā vā mukhena sabbānipi tāni gahitānevā’’ti.
гааяасагкинд̇и гааязна сажчигад̇аванд̇ам̣, бажжагкагааринанд̇и ад̇т̇о. сохааяасмаа вибассанаагаалз зва ‘‘яамзваахам̣ инд̣̇риязсу аг̇уд̇д̇ад̣̇ваарад̇ам̣ ниссааяа саасанз анабхирад̇иаад̣̇ивиббагаарам̣ бад̇д̇о, д̇амзва судту ниг̇г̇ахзссаамий’’д̇и уссаахаж̇аад̇о б̣алавахирод̇д̇аббо, д̇ад̇т̇а жа гад̇аад̇хигаарад̇д̇аа инд̣̇рияасам̣варз уггам̣сабаарамиббад̇д̇о, д̇знзва нам̣ сад̇т̇аа – ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ инд̣̇риязсу г̇уд̇д̇ад̣̇ваараанам̣ яад̣̇ид̣̇ам̣ нанд̣̇о’’д̇и (а. ни. 1.230) зд̇ад̣̇аг̇г̇з табзси.
Kāyasakkhinti kāyena sacchikatavantaṃ, paccakkhakārinanti attho. Sohāyasmā vipassanākāle eva ‘‘yamevāhaṃ indriyesu aguttadvārataṃ nissāya sāsane anabhiratiādivippakāraṃ patto, tameva suṭṭhu niggahessāmī’’ti ussāhajāto balavahirottappo, tattha ca katādhikārattā indriyasaṃvare ukkaṃsapāramippatto, teneva naṃ satthā – ‘‘etadaggaṃ, bhikkhave, mama sāvakānaṃ bhikkhūnaṃ indriyesu guttadvārānaṃ yadidaṃ nando’’ti (a. ni. 1.230) etadagge ṭhapesi.
саад̇т̇агад̇аа жа саббааяад̇аа жа взд̣̇ид̇аб̣б̣аа аалогид̇авилогид̇ассаад̇и аанзд̇ваа самб̣анд̇хо. д̇асмаад̇и гаммадтаанаавиж̇аханассзва г̇ожарасамбаж̇ан̃н̃абхаавад̇од̇и вуд̇д̇амзвад̇т̇ам̣ хзд̇убхаавзна бажжаамасад̇и. ад̇д̇ано гаммадтаанавасзнзва аалоганавилоганам̣ гаад̇аб̣б̣ам̣, канд̇хаад̣̇игаммадтаанигзхи ан̃н̃о убааяо на г̇авзсид̇аб̣б̣од̇и ад̇хиббааяо. яасмаа аалогид̇аад̣̇исаман̃н̃ааби д̇хаммамад̇д̇ассзва бавад̇д̇ивисзсо, д̇асмаа д̇асса яаат̇аавад̇о баж̇аананам̣ асаммохасамбаж̇ан̃н̃анд̇и д̣̇ассзд̇ум̣ ‘‘аб̣бханд̇арз’’д̇иаад̣̇и вуд̇д̇ам̣. жид̇д̇агирияавааяод̇хаад̇увибпааравасзнаад̇и гирияамаяажид̇д̇асамудтаанавааяод̇хаад̇уяаа жаланаагаарабавад̇д̇ивасзна. ад̇хо сийд̣̇ад̇ийд̇и т̇огам̣ од̇арад̇и. уд̣̇д̇хам̣ лан̇гхзд̇ийд̇и лан̇гханд̇ам̣ вияа убари г̇ажчад̇и.
Sātthakatā ca sappāyatā ca veditabbā ālokitavilokitassāti ānetvā sambandho. Tasmāti kammaṭṭhānāvijahanasseva gocarasampajaññabhāvatoti vuttamevatthaṃ hetubhāvena paccāmasati. Attano kammaṭṭhānavaseneva ālokanavilokanaṃ kātabbaṃ, khandhādikammaṭṭhānikehi añño upāyo na gavesitabboti adhippāyo. Yasmā ālokitādisamaññāpi dhammamattasseva pavattiviseso, tasmā tassa yāthāvato pajānanaṃ asammohasampajaññanti dassetuṃ ‘‘abbhantare’’tiādi vuttaṃ. Cittakiriyavāyodhātuvipphāravasenāti kiriyamayacittasamuṭṭhānavāyodhātuyā calanākārapavattivasena. Adho sīdatīti thokaṃ otarati. Uddhaṃ laṅghetīti laṅghantaṃ viya upari gacchati.
ан̇г̇агижжам̣ саад̇хаяамаананд̇и бад̇хаанабхууд̇ам̣ ан̇г̇агижжам̣ нибпаад̣̇знд̇ам̣, убабад̇д̇ибхавасса сарийрам̣ худ̇ваад̇и ад̇т̇о. батамаж̇аванзби…бз… сад̇д̇амаж̇аванзби на ход̇ийд̇и ид̣̇ам̣ бан̃жад̣̇вааравин̃н̃аан̣авийт̇ияам̣ ‘‘ид̇т̇ий бурисо’’д̇и раж̇ж̇анаад̣̇ийнам̣ абхаавам̣ санд̇хааяа вуд̇д̇ам̣. д̇ад̇т̇а хи ааваж̇ж̇анаводтаб̣б̣анаанам̣ аяонисо ааваж̇ж̇анаводтаб̣б̣анавасзна идтз ид̇т̇ируубаад̣̇имхи лобхамад̇д̇ам̣, анидтз бадигхамад̇д̇ам̣ уббаж̇ж̇ад̇и. манод̣̇ваарз бана ‘‘ид̇т̇ий бурисо’’д̇и раж̇ж̇анаад̣̇и ход̇и, д̇асса бан̃жад̣̇ваараж̇аванам̣ муулам̣, яат̇аавуд̇д̇ам̣ ваа саб̣б̣ам̣ бхаван̇г̇аад̣̇и. звам̣ манод̣̇ваараж̇аванасса муулабхууд̇ад̇хаммабариж̇аананавасзнзва муулабарин̃н̃аа вуд̇д̇аа, ааг̇анд̇угад̇аавагаалигад̇аа бана бан̃жад̣̇ваараж̇аванассзва абуб̣б̣абхаававасзна жзва ид̇д̇арабхаававасзна жа вуд̇д̇аа. хздтубарияавасзна бхиж̇ж̇ид̇ваа бад̇ид̇зсууд̇и хздтимасса убаримасса жа абараабарам̣ бхан̇г̇аббад̇д̇имааха.
Aṅgakiccaṃ sādhayamānanti padhānabhūtaṃ aṅgakiccaṃ nipphādentaṃ, upapattibhavassa sarīraṃ hutvāti attho. Paṭhamajavanepi…pe… sattamajavanepi na hotīti idaṃ pañcadvāraviññāṇavīthiyaṃ ‘‘itthī puriso’’ti rajjanādīnaṃ abhāvaṃ sandhāya vuttaṃ. Tattha hi āvajjanavoṭṭhabbanānaṃ ayoniso āvajjanavoṭṭhabbanavasena iṭṭhe itthirūpādimhi lobhamattaṃ, aniṭṭhe paṭighamattaṃ uppajjati. Manodvāre pana ‘‘itthī puriso’’ti rajjanādi hoti, tassa pañcadvārajavanaṃ mūlaṃ, yathāvuttaṃ vā sabbaṃ bhavaṅgādi. Evaṃ manodvārajavanassa mūlabhūtadhammaparijānanavaseneva mūlapariññā vuttā, āgantukatāvakālikatā pana pañcadvārajavanasseva apubbabhāvavasena ceva ittarabhāvavasena ca vuttā. Heṭṭhupariyavasena bhijjitvā patitesūti heṭṭhimassa uparimassa ca aparāparaṃ bhaṅgappattimāha.
д̇анд̇и ж̇аванам̣. д̇асса ж̇аванасса на яуд̇д̇анд̇и самб̣анд̇хо. ааг̇анд̇уго аб̣бхааг̇ад̇о. уд̣̇аяаб̣б̣аяабарижчинно д̇аавад̇аго гаало зд̇зсанд̇и д̇аавагаалигаани.
Tanti javanaṃ. Tassa javanassa na yuttanti sambandho. Āgantuko abbhāgato. Udayabbayaparicchinno tāvatako kālo etesanti tāvakālikāni.
зд̇ам̣ асаммохасамбаж̇ан̃н̃ам̣. самавааязд̇и саамаг̇г̇ияам̣. д̇ад̇т̇аад̇и бан̃жагканд̇хавасзна аалоганавилоганз бан̃н̃ааяамаанз д̇аб̣б̣инимуд̇д̇о – го зго аалогзд̇и, го вилогзд̇и. убаниссаяабажжаяод̇и ид̣̇ам̣ суд̇д̇анд̇анаязна барияааяад̇о вуд̇д̇ам̣. сахаж̇аад̇абажжаяод̇и нид̣̇ассанамад̇д̇амзд̇ам̣ ан̃н̃аман̃н̃асамбаяуд̇д̇аад̇т̇иавиг̇ад̇аад̣̇ибажжаяаанамби лаб̣бханад̇о.
Etaṃ asammohasampajaññaṃ. Samavāyeti sāmaggiyaṃ. Tatthāti pañcakkhandhavasena ālokanavilokane paññāyamāne tabbinimutto – ko eko āloketi, ko viloketi. Upanissayapaccayoti idaṃ suttantanayena pariyāyato vuttaṃ. Sahajātapaccayoti nidassanamattametaṃ aññamaññasampayuttaatthiavigatādipaccayānampi labbhanato.
гаалзд̇и самин̃ж̇ид̇ум̣ яуд̇д̇агаалз самин̃ж̇анд̇асса, д̇ат̇аа басаарзд̇ум̣ яуд̇д̇агаалз басаарзнд̇асса. ‘‘ман̣исаббо наама згаа саббаж̇аад̇ий’’д̇и вад̣̇анд̇и. лал̣ананд̇и гамбанам̣, лийл̣аагаран̣ам̣ ваа.
Kāleti samiñjituṃ yuttakāle samiñjantassa, tathā pasāretuṃ yuttakāle pasārentassa. ‘‘Maṇisappo nāma ekā sappajātī’’ti vadanti. Laḷananti kampanaṃ, līḷākaraṇaṃ vā.
ун̣хабагад̇иго барил̣аахаб̣ахулагааяо. сийласса вид̣̇уусанзна ахид̇аавахад̇д̇аа мижчааж̇ийвавасзна уббаннам̣ асаббааяам̣. ‘‘жийварамби ажзд̇ана’’нд̇иаад̣̇инаа жийварасса вияа гааяоби ажзд̇анод̇и гааяасса ад̇д̇асун̃н̃ад̇аавибхааванзна ‘‘аб̣бханд̇арз’’д̇иаад̣̇инаа вуд̇д̇амзвад̇т̇ам̣ барид̣̇ийбзнд̇о ид̇арийд̇арасанд̇осасса гааран̣ам̣ д̣̇ассзд̇и. д̇знааха ‘‘д̇асмаа’’д̇иаад̣̇и.
Uṇhapakatiko pariḷāhabahulakāyo. Sīlassa vidūsanena ahitāvahattā micchājīvavasena uppannaṃ asappāyaṃ. ‘‘Cīvarampi acetana’’ntiādinā cīvarassa viya kāyopi acetanoti kāyassa attasuññatāvibhāvanena ‘‘abbhantare’’tiādinā vuttamevatthaṃ paridīpento itarītarasantosassa kāraṇaṃ dasseti. Tenāha ‘‘tasmā’’tiādi.
жад̇убан̃жаг̇ан̣тигаахад̇од̇и аахад̇ажад̇убан̃жаг̇ан̣тиго, жад̇убан̃жаг̇ан̣тигаахи ваа хад̇асобхо.
Catupañcagaṇṭhikāhatoti āhatacatupañcagaṇṭhiko, catupañcagaṇṭhikāhi vā hatasobho.
адтавид̇хоби ад̇т̇од̇и адтавид̇хоби баяож̇анависзсо. махаасивад̇т̇зраваад̣̇авасзна ‘‘имасса гааяасса тид̇ияаа’’д̇иаад̣̇инаа наязна вуд̇д̇о д̣̇адтаб̣б̣о. имасмим̣ багкз ‘‘нзва д̣̇авааяаад̇иаад̣̇инаа наязнаа’’д̇и бана ид̣̇ам̣ бадигкзбан̇г̇ад̣̇ассанамукзна баал̣и ааг̇ад̇аад̇и гад̇ваа вуд̇д̇анд̇и д̣̇адтаб̣б̣ам̣.
Aṭṭhavidhopi atthoti aṭṭhavidhopi payojanaviseso. Mahāsivattheravādavasena ‘‘imassa kāyassa ṭhitiyā’’tiādinā nayena vutto daṭṭhabbo. Imasmiṃ pakkhe ‘‘neva davāyātiādinā nayenā’’ti pana idaṃ paṭikkhepaṅgadassanamukhena pāḷi āgatāti katvā vuttanti daṭṭhabbaṃ.
бат̇авийсанд̇хаарагаж̇аласса д̇ам̣санд̇хаарагавааяунаа вияа барибхуд̇д̇асса аахаарасса вааяод̇хаад̇уяаава аасаяз авадтаананд̇и ааха – ‘‘вааяод̇хаад̇увасзнзва д̇идтад̇ий’’д̇и. ад̇ихарад̇ийд̇и яаава мукаа абхихарад̇и. вийд̇ихарад̇ийд̇и д̇ад̇о гужчияам̣ вимиссам̣ гаронд̇о харад̇и. ад̇ихарад̇ийд̇и ваа мукад̣̇ваарам̣ ад̇иггаамзнд̇о харад̇и. вийд̇ихарад̇ийд̇и гужчиг̇ад̇ам̣ бассад̇о харад̇и. баривад̇д̇зд̇ийд̇и абараабарам̣ жаарзд̇и. зд̇т̇а жа аахаарасса д̇хааран̣абаривад̇д̇анасан̃жун̣н̣анависосанаани бат̇авийд̇хаад̇усахид̇аа зва вааяод̇хаад̇у гарод̇и, на гзвалаад̇и д̇аани бат̇авийд̇хаад̇уяаа гижжабхаавзна вуд̇д̇аани, саа зва д̇хааран̣аад̣̇ийни гижжаани гаронд̇асса саад̇хааран̣аад̇и вуд̇д̇аани. аллад̇д̇ан̃жа анубаалзд̇ийд̇и яат̇аа вааяод̇хаад̇уаад̣̇ийхи ан̃н̃зхи висосанам̣ на ход̇и, д̇ат̇аа анубаалзд̇и аллабхаавам̣. д̇зж̇од̇хаад̇ууд̇и г̇ахан̣ийсан̇каад̇аа д̇зж̇од̇хаад̇у. саа хи анд̇обавидтам̣ аахаарам̣ барибаажзд̇и. ан̃ж̇асо ход̇ийд̇и аахаарасса бависанаад̣̇ийнам̣ маг̇г̇о ход̇и. аабхуж̇ад̇ийд̇и бариязсанавасзна, аж̇жхохаран̣аж̇ин̣н̣ааж̇ин̣н̣ад̇аад̣̇ибадисам̣взд̣̇анавасзна жа ааваж̇ж̇зд̇и, виж̇аанаад̇ийд̇и ад̇т̇о. д̇ам̣д̇ам̣виж̇аананасса бажжаяабхууд̇оязва хи баяог̇о ‘‘саммаабаяог̇о’’д̇и вуд̇д̇о. язна хи баяог̇зна бариязсанаад̣̇и нибпаж̇ж̇ад̇и, со д̇аб̣б̣исаяавиж̇аананамби нибпаад̣̇зд̇и наама д̇ад̣̇авинаабхаавад̇о. ат̇а ваа саммаабаяог̇ам̣ саммаабадибад̇д̇им̣ анвааяа ааг̇амма аабхуж̇ад̇и саманнаахарад̇и. аабхог̇абуб̣б̣аго хи саб̣б̣оби вин̃н̃аан̣аб̣яаабаарод̇и д̇ат̇аа вуд̇д̇ам̣.
Pathavīsandhārakajalassa taṃsandhārakavāyunā viya paribhuttassa āhārassa vāyodhātuyāva āsaye avaṭṭhānanti āha – ‘‘vāyodhātuvaseneva tiṭṭhatī’’ti. Atiharatīti yāva mukhā abhiharati. Vītiharatīti tato kucchiyaṃ vimissaṃ karonto harati. Atiharatīti vā mukhadvāraṃ atikkāmento harati. Vītiharatīti kucchigataṃ passato harati. Parivattetīti aparāparaṃ cāreti. Ettha ca āhārassa dhāraṇaparivattanasañcuṇṇanavisosanāni pathavīdhātusahitā eva vāyodhātu karoti, na kevalāti tāni pathavīdhātuyā kiccabhāvena vuttāni, sā eva dhāraṇādīni kiccāni karontassa sādhāraṇāti vuttāni. Allattañca anupāletīti yathā vāyodhātuādīhi aññehi visosanaṃ na hoti, tathā anupāleti allabhāvaṃ. Tejodhātūti gahaṇīsaṅkhātā tejodhātu. Sā hi antopaviṭṭhaṃ āhāraṃ paripāceti. Añjaso hotīti āhārassa pavisanādīnaṃ maggo hoti. Ābhujatīti pariyesanavasena, ajjhoharaṇajiṇṇājiṇṇatādipaṭisaṃvedanavasena ca āvajjeti, vijānātīti attho. Taṃtaṃvijānanassa paccayabhūtoyeva hi payogo ‘‘sammāpayogo’’ti vutto. Yena hi payogena pariyesanādi nipphajjati, so tabbisayavijānanampi nipphādeti nāma tadavinābhāvato. Atha vā sammāpayogaṃ sammāpaṭipattiṃ anvāya āgamma ābhujati samannāharati. Ābhogapubbako hi sabbopi viññāṇabyāpāroti tathā vuttaṃ.
г̇аманад̇од̇и бхигкаажааравасзна г̇ожараг̇аамам̣ уд̣̇д̣̇исса г̇аманад̇о. бариязсанад̇од̇и г̇ожараг̇аамз бхигкад̇т̇ам̣ аахин̣д̣анад̇о. барибхог̇ад̇од̇и аахаарасса барибхун̃ж̇анад̇о. аасаяад̇од̇и бид̇д̇аад̣̇иаасаяад̇о. аасаяад̇и зд̇т̇а згаж̇жхам̣ бавад̇д̇амааноби гаммаб̣алававад̇т̇ид̇о худ̇ваа марияаад̣̇авасзна ан̃н̃аман̃н̃ам̣ асан̇гарад̇о саяад̇и д̇идтад̇и бавад̇д̇ад̇ийд̇и аасаяо, аамаасаяасса убари д̇идтанаго бид̇д̇аад̣̇иго. марияаад̣̇ад̇т̇о хи аяамаагааро. нид̇хзд̇и яат̇аабхуд̇д̇о аахааро нижид̇о худ̇ваа д̇идтад̇и зд̇т̇аад̇и нид̇хаанам̣, аамаасаяо, д̇ад̇о нид̇хаанад̇о. абарибаггад̇од̇и г̇ахан̣ийсан̇каад̇зна гаммаж̇ад̇зж̇зна авибаггад̇о. барибаггад̇од̇и яат̇аабхуд̇д̇асса аахаарасса вибаггабхаавад̇о. палад̇од̇и нибпад̇д̇ид̇о. ниссанд̣̇ад̇од̇и ид̇о жид̇о жа виссанд̣̇анад̇о . саммагканад̇од̇и саб̣б̣асо магканад̇о. аяамзд̇т̇а сан̇кзбо, вид̇т̇ааро бана висуд̣̇д̇химаг̇г̇асам̣ван̣н̣анааяа (висуд̣̇д̇хи. махаадий. 1.294) г̇ахзд̇аб̣б̣о.
Gamanatoti bhikkhācāravasena gocaragāmaṃ uddissa gamanato. Pariyesanatoti gocaragāme bhikkhatthaṃ āhiṇḍanato. Paribhogatoti āhārassa paribhuñjanato. Āsayatoti pittādiāsayato. Āsayati ettha ekajjhaṃ pavattamānopi kammabalavavatthito hutvā mariyādavasena aññamaññaṃ asaṅkarato sayati tiṭṭhati pavattatīti āsayo, āmāsayassa upari tiṭṭhanako pittādiko. Mariyādattho hi ayamākāro. Nidheti yathābhutto āhāro nicito hutvā tiṭṭhati etthāti nidhānaṃ, āmāsayo, tato nidhānato. Aparipakkatoti gahaṇīsaṅkhātena kammajatejena avipakkato. Paripakkatoti yathābhuttassa āhārassa vipakkabhāvato. Phalatoti nipphattito. Nissandatoti ito cito ca vissandanato . Sammakkhanatoti sabbaso makkhanato. Ayamettha saṅkhepo, vitthāro pana visuddhimaggasaṃvaṇṇanāya (visuddhi. mahāṭī. 1.294) gahetabbo.
сарийрад̇о сзд̣̇аа мужжанд̇ийд̇и взг̇асанд̇хааран̣зна уббаннабарил̣аахад̇о сарийрад̇о сзд̣̇аа мужжанд̇и. ан̃н̃з жа рог̇аа ган̣н̣асуулабхаг̇анд̣̇араад̣̇аяо. адтаанзд̇и мануссаамануссабариг̇г̇ахз аяуд̇д̇адтаанз кзд̇д̇ад̣̇звааяад̇анаад̣̇игз. гуд̣̇д̇хаа хи мануссаа амануссааби ваа ж̇ийвид̇агкаяам̣ баабзнд̇и. виссадтад̇д̇аа нзва д̇асса бхигкуно ад̇д̇ано, гассажи аниссаж̇ж̇ид̇ад̇д̇аа ж̇иг̇ужчанийяад̇д̇аа жа на барасса, уд̣̇агад̇умб̣ад̇од̇и взл̣унаал̣иаад̣̇иуд̣̇агабхааж̇анад̇о. д̇анд̇и чад̣д̣ид̇ауд̣̇агам̣.
Sarīrato sedā muccantīti vegasandhāraṇena uppannapariḷāhato sarīrato sedā muccanti. Aññe ca rogā kaṇṇasūlabhagandarādayo. Aṭṭhāneti manussāmanussapariggahe ayuttaṭṭhāne khettadevāyatanādike. Kuddhā hi manussā amanussāpi vā jīvitakkhayaṃ pāpenti. Vissaṭṭhattā neva tassabhikkhuno attano, kassaci anissajjitattā jigucchanīyattā ca na parassa, udakatumbatoti veḷunāḷiādiudakabhājanato. Tanti chaḍḍitaudakaṃ.
зд̇т̇а жа зго ирияаабат̇о д̣̇вийсу таанзсу ааг̇ад̇о, со буб̣б̣з абхиггамабадиггамаг̇ахан̣зна. ‘‘г̇аманзби бурад̇о бажчад̇о жа гааяасса абхихаран̣ам̣ вуд̇д̇анд̇и ид̇ха г̇аманамзва г̇ахид̇а’’нд̇и абарз. яасмаа ид̇ха самбаж̇ан̃н̃агат̇ааяам̣ асаммохасамбаж̇ан̃н̃амзва д̇хурам̣, д̇асмаа анд̇аранд̇арз ирияаабат̇з бавад̇д̇аанам̣ руубааруубад̇хаммаанам̣ д̇ад̇т̇а д̇ад̇т̇зва нирод̇хад̣̇ассанавасзна самбаж̇аанагаарид̇аа г̇ахид̇аад̇и. маж̇жхимабхаан̣агаа бана звам̣ вад̣̇анд̇и – зго хи бхигку г̇ажчанд̇о ан̃н̃ам̣ жинд̇знд̇о, ан̃н̃ам̣ вид̇аггзнд̇о г̇ажчад̇и, зго гаммадтаанам̣ ависсаж̇ж̇зд̇ваава г̇ажчад̇и, д̇ат̇аа зго д̇идтанд̇о, нисийд̣̇анд̇о, саяанд̇о ан̃н̃ам̣ жинд̇знд̇о, ан̃н̃ам̣ вид̇аггзнд̇о саяад̇и, зго гаммадтаанам̣ ависсаж̇ж̇зд̇ваава саяад̇и. зд̇д̇агзна бана на баагадам̣ ход̇ийд̇и жан̇гаманзна д̣̇ийбзнд̇и. яо бхигку жан̇гаманам̣ од̇арид̇ваа жан̇гаманагодияам̣ тид̇о бариг̇г̇ан̣хаад̇и – ‘‘баажийнажан̇гаманагодияам̣ бавад̇д̇аа руубааруубад̇хаммаа бажчимажан̇гаманагодим̣ аббад̇ваа зд̇т̇зва нируд̣̇д̇хаа, бажчимажан̇гаманагодияам̣ бавад̇д̇ааби баажийнажан̇гаманагодим̣ аббад̇ваа зд̇т̇зва нируд̣̇д̇хаа, жан̇гаманамаж̇жхз бавад̇д̇аа убхо годияо аббад̇ваа зд̇т̇зва нируд̣̇д̇хаа, жан̇гаманз бавад̇д̇аа руубааруубад̇хаммаа таанам̣ аббад̇ваа зд̇т̇зва нируд̣̇д̇хаа, таанз бавад̇д̇аа нисаж̇ж̇ам̣ аббад̇ваа зд̇т̇зва нируд̣̇д̇хаа, нисаж̇ж̇ааяа бавад̇д̇аа саяанам̣ аббад̇ваа зд̇т̇зва нируд̣̇д̇хаа’’д̇и, звам̣ бариг̇г̇ан̣ханд̇о бариг̇г̇ан̣ханд̇о зва жид̇д̇ам̣ бхаван̇г̇ам̣ од̇аарзд̇и, удтаханд̇о бана гаммадтаанам̣ г̇ахзд̇ваава удтахад̇и. аяам̣ бхигку г̇ад̇аад̣̇ийсу самбаж̇аанагаарий наама ход̇ийд̇и.
Ettha ca eko iriyāpatho dvīsu ṭhānesu āgato, so pubbe abhikkamapaṭikkamagahaṇena. ‘‘Gamanepi purato pacchato ca kāyassa abhiharaṇaṃ vuttanti idha gamanameva gahita’’nti apare. Yasmā idha sampajaññakathāyaṃ asammohasampajaññameva dhuraṃ, tasmā antarantare iriyāpathe pavattānaṃ rūpārūpadhammānaṃ tattha tattheva nirodhadassanavasena sampajānakāritā gahitāti. Majjhimabhāṇakā pana evaṃ vadanti – eko hi bhikkhu gacchanto aññaṃ cintento, aññaṃ vitakkento gacchati, eko kammaṭṭhānaṃ avissajjetvāva gacchati, tathā eko tiṭṭhanto, nisīdanto, sayanto aññaṃ cintento, aññaṃ vitakkento sayati, eko kammaṭṭhānaṃ avissajjetvāva sayati. Ettakena pana na pākaṭaṃ hotīti caṅkamanena dīpenti. Yo bhikkhu caṅkamanaṃ otaritvā caṅkamanakoṭiyaṃ ṭhito pariggaṇhāti – ‘‘pācīnacaṅkamanakoṭiyaṃ pavattā rūpārūpadhammā pacchimacaṅkamanakoṭiṃ appatvā ettheva niruddhā, pacchimacaṅkamanakoṭiyaṃ pavattāpi pācīnacaṅkamanakoṭiṃ appatvā ettheva niruddhā, caṅkamanamajjhe pavattā ubho koṭiyo appatvā ettheva niruddhā, caṅkamane pavattā rūpārūpadhammā ṭhānaṃ appatvā ettheva niruddhā, ṭhāne pavattā nisajjaṃ appatvā ettheva niruddhā, nisajjāya pavattā sayanaṃ appatvā ettheva niruddhā’’ti, evaṃ pariggaṇhanto pariggaṇhanto eva cittaṃ bhavaṅgaṃ otāreti, uṭṭhahanto pana kammaṭṭhānaṃ gahetvāva uṭṭhahati. Ayaṃ bhikkhu gatādīsu sampajānakārī nāma hotīti.
звамби суд̇д̇з гаммадтаанам̣ авибхууд̇ам̣ ход̇и, гаммадтаанам̣ авибхууд̇ам̣ на гаад̇аб̣б̣ам̣, д̇асмаа со бхигку яаава саггод̇и, д̇аава жан̇гамид̇ваа тад̇ваа нисийд̣̇ид̇ваа саяамаано звам̣ бариг̇г̇ахзд̇ваа саяад̇и – ‘‘гааяо ажзд̇ано ман̃жо ажзд̇ано, гааяо на ж̇аанаад̇и ‘ахам̣ ман̃жз саяид̇о’д̇и, ман̃жоби на ж̇аанаад̇и ‘маяи гааяо саяид̇о’д̇и, ажзд̇ано гааяо ажзд̇анз ман̃жз саяид̇о’’д̇и, звам̣ бариг̇г̇ан̣ханд̇о зва жид̇д̇ам̣ бхаван̇г̇ам̣ од̇аарзд̇и, баб̣уж̇жханд̇о гаммадтаанам̣ г̇ахзд̇ваава баб̣уж̇жхад̇ийд̇и аяам̣ суд̇д̇з самбаж̇аанагаарий наама ход̇и. гааяигаад̣̇игирияааниб̣б̣ад̇д̇анзна д̇аммаяад̇д̇аа ааваж̇ж̇анагирияааниб̣б̣ад̇д̇агад̇д̇аа ааваж̇ж̇анагирияаасамудтид̇ад̇д̇аа жа ж̇аванам̣, саб̣б̣амби ваа чад̣̇ваараббавад̇д̇ам̣ гирияаамаяабавад̇д̇ам̣ наама, д̇асмим̣ сад̇и ж̇ааг̇арид̇ам̣ наама ход̇ийд̇и бариг̇г̇ан̣ханд̇о ж̇ааг̇арид̇з самбаж̇аанагаарий наама. абижа рад̇д̇инд̣̇ивам̣ ча годтаасз гад̇ваа бан̃жа годтаасз ж̇аг̇г̇анд̇оби ж̇ааг̇арид̇з самбаж̇аанагаарий наама ход̇ийд̇и.
Evampi sutte kammaṭṭhānaṃ avibhūtaṃ hoti, kammaṭṭhānaṃ avibhūtaṃ na kātabbaṃ, tasmā so bhikkhu yāva sakkoti, tāva caṅkamitvā ṭhatvā nisīditvā sayamāno evaṃ pariggahetvā sayati – ‘‘kāyo acetano mañco acetano, kāyo na jānāti ‘ahaṃ mañce sayito’ti, mañcopi na jānāti ‘mayi kāyo sayito’ti, acetano kāyo acetane mañce sayito’’ti, evaṃ pariggaṇhanto eva cittaṃ bhavaṅgaṃ otāreti, pabujjhanto kammaṭṭhānaṃ gahetvāva pabujjhatīti ayaṃ sutte sampajānakārī nāma hoti. Kāyikādikiriyānibbattanena tammayattā āvajjanakiriyānibbattakattā āvajjanakiriyāsamuṭṭhitattā ca javanaṃ, sabbampi vā chadvārappavattaṃ kiriyāmayapavattaṃ nāma, tasmiṃ sati jāgaritaṃ nāma hotīti pariggaṇhanto jāgarite sampajānakārī nāma. Apica rattindivaṃ cha koṭṭhāse katvā pañca koṭṭhāse jaggantopi jāgarite sampajānakārī nāma hotīti.
вимуд̇д̇ааяад̇анасийсз тад̇ваа д̇хаммам̣ д̣̇зсзнд̇оби б̣аад̇д̇им̣сад̇иражчаанагат̇ам̣ бахааяа д̣̇асагат̇аавад̇т̇униссид̇асаббааяагат̇ам̣ гат̇знд̇оби бхаасид̇з самбаж̇аанагаарий наама ход̇и. адтад̇им̣сааяа аарамман̣зсу жид̇д̇аружияам̣ аарамман̣ам̣ манасигаарам̣ бавад̇д̇знд̇оби д̣̇уд̇ияаж̇жхаанам̣ самаабанноби д̇ун̣хийбхаавз самбаж̇аанагаарий наама. д̣̇уд̇ияан̃хи жхаанам̣ важийсан̇каараббахаанад̇о висзсад̇о д̇ун̣хийбхааво наамаад̇и. одтз жаад̇иаад̣̇ийсу жа-сад̣̇д̣̇зна ган̣тасийсанаабхиаад̣̇ийнам̣ сан̇г̇ахо д̣̇адтаб̣б̣о. д̇ад̣̇ануруубам̣ баяог̇анд̇и д̇асса уббад̇д̇ияаа анужчавигам̣ жид̇д̇асса бавад̇д̇иаагаарасан̃н̃ид̇ам̣ баяог̇ам̣, яад̇о саб̣б̣з вижаараад̣̇аяо нибпаж̇ж̇анд̇и. убаад̣̇ааруубабавад̇д̇ияаад̇и вин̃н̃ад̇д̇ивигаарасахид̇асад̣̇д̣̇ааяад̇ануббад̇д̇ияаа. званд̇и вуд̇д̇аббагаарзна. сад̇д̇асуби таанзсу асаммуяханавасзна ‘‘миссага’’нд̇и вуд̇д̇ам̣. маг̇г̇асаммаасад̇ияааби гааяаанубассанаад̣̇иануруубад̇д̇аа самбаж̇ан̃н̃аануруубабуб̣б̣абхааг̇ам̣ сад̇д̇адтаанияасса зганд̇алогияад̇д̇аа.
Vimuttāyatanasīse ṭhatvā dhammaṃ desentopi bāttiṃsatiracchānakathaṃ pahāya dasakathāvatthunissitasappāyakathaṃ kathentopi bhāsite sampajānakārī nāma hoti. Aṭṭhatiṃsāya ārammaṇesu cittaruciyaṃ ārammaṇaṃ manasikāraṃ pavattentopi dutiyajjhānaṃ samāpannopi tuṇhībhāve sampajānakārī nāma. Dutiyañhi jhānaṃ vacīsaṅkhārappahānato visesato tuṇhībhāvo nāmāti. Oṭṭhe cātiādīsu ca-saddena kaṇṭhasīsanābhiādīnaṃ saṅgaho daṭṭhabbo. Tadanurūpaṃ payoganti tassa uppattiyā anucchavikaṃ cittassa pavattiākārasaññitaṃ payogaṃ, yato sabbe vicārādayo nipphajjanti. Upādārūpapavattiyāti viññattivikārasahitasaddāyatanuppattiyā. Evanti vuttappakārena. Sattasupi ṭhānesu asammuyhanavasena ‘‘missaka’’nti vuttaṃ. Maggasammāsatiyāpi kāyānupassanādianurūpattā sampajaññānurūpapubbabhāgaṃ sattaṭṭhāniyassa ekantalokiyattā.
сад̇исуд̇д̇аван̣н̣анаа нидтид̇аа.
Satisuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 2. сад̇исуд̇д̇ам̣ • 2. Satisuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 2. сад̇исуд̇д̇аван̣н̣анаа • 2. Satisuttavaṇṇanā
