| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
4. ஸமத²க்க²ந்த⁴கோ
4. Samathakkhandhako
ஸதிவினயகதா²தி³வண்ணனா
Sativinayakathādivaṇṇanā
195. ஸமத²க்க²ந்த⁴கே கீ²ணாஸவஸ்ஸ விபுலஸதிங் நிஸ்ஸாய தா³தப்³போ³ வினயோ சோத³னாதி³அஸாருப்பானங் வினயனுபாயோ ஸதிவினயோ.
195. Samathakkhandhake khīṇāsavassa vipulasatiṃ nissāya dātabbo vinayo codanādiasāruppānaṃ vinayanupāyo sativinayo.
196. சித்தவிபரியாஸகதோதி கதசித்தவிபரியாஸோ. க³க்³க³ங் பி⁴க்கு²ங்…பே॰… சோதெ³ந்தீதி எத்த² பன உம்மத்தகஸ்ஸ இத³ங் உம்மத்தகங், அஜ்ஜா²சிண்ணங். ததே³வ சித்தவிபரியாஸேன கதந்தி சித்தவிபரியாஸகதங். தேன உம்மத்தகேன சித்தவிபரியாஸகதேன அஜ்ஜா²சிண்ணேன அனாசாரேன ஆபன்னாய ஆபத்தியா க³க்³க³ங் பி⁴க்கு²ங் சோதெ³ந்தீதி ஏவமத்தோ² த³ட்ட²ப்³போ³. பட²மங் மூள்ஹோ ஹுத்வா பச்சா² அமூள்ஹபா⁴வங் உபக³தஸ்ஸ தா³தப்³போ³ வினயோ அமூள்ஹவினயோ.
196.Cittavipariyāsakatoti katacittavipariyāso. Gaggaṃ bhikkhuṃ…pe… codentīti ettha pana ummattakassa idaṃ ummattakaṃ, ajjhāciṇṇaṃ. Tadeva cittavipariyāsena katanti cittavipariyāsakataṃ. Tena ummattakena cittavipariyāsakatena ajjhāciṇṇena anācārena āpannāya āpattiyā gaggaṃ bhikkhuṃ codentīti evamattho daṭṭhabbo. Paṭhamaṃ mūḷho hutvā pacchā amūḷhabhāvaṃ upagatassa dātabbo vinayo amūḷhavinayo.
202. த⁴ம்மவாதீ³னங் யேபு⁴ய்யபா⁴வஸம்பாதி³கா கிரியா யேபு⁴ய்யஸிகாதி இமஸ்மிங் அத்தே² ஸ-காராக³மஸஹிதோ இக-பச்சயந்தோயங் ஸத்³தோ³தி த³ஸ்ஸேதுங் ஆஹ ‘‘யஸ்ஸா’’திஆதி³. தத்த² யஸ்ஸா கிரியாயாதி கூ³ள்ஹகவிவட்டகாதி³னா ஸலாகக்³கா³ஹாபககிரியாய. யேபு⁴ய்யபா⁴வங் நிஸ்ஸிதஸமத²கிரியா யேபு⁴ய்யஸிகாதி ஏவங் யேபு⁴ய்யஸிகாஸத்³த³ஸ்ஸ அத்தோ² க³ஹேதப்³போ³. ஏவஞ்ஹி அயங் அதி⁴கரணஸமதோ² நாம ஹோதி. யதா²வுத்தஸலாகக்³கா³ஹேன ஹி த⁴ம்மவாதீ³னங் யேபு⁴ய்யபா⁴வே ஸித்³தே⁴ பச்சா² தங் யேபு⁴ய்யபா⁴வங் நிஸ்ஸாயேவ அதி⁴கரணவூபஸமோ ஹோதி, ந த⁴ம்மவாதீ³னங் ப³ஹுதரபா⁴வஸாத⁴ககிரியாமத்தேன.
202. Dhammavādīnaṃ yebhuyyabhāvasampādikā kiriyā yebhuyyasikāti imasmiṃ atthe sa-kārāgamasahito ika-paccayantoyaṃ saddoti dassetuṃ āha ‘‘yassā’’tiādi. Tattha yassā kiriyāyāti gūḷhakavivaṭṭakādinā salākaggāhāpakakiriyāya. Yebhuyyabhāvaṃ nissitasamathakiriyā yebhuyyasikāti evaṃ yebhuyyasikāsaddassa attho gahetabbo. Evañhi ayaṃ adhikaraṇasamatho nāma hoti. Yathāvuttasalākaggāhena hi dhammavādīnaṃ yebhuyyabhāve siddhe pacchā taṃ yebhuyyabhāvaṃ nissāyeva adhikaraṇavūpasamo hoti, na dhammavādīnaṃ bahutarabhāvasādhakakiriyāmattena.
207. ‘‘ஸேஸமெத்த² தஜ்ஜனீயாதீ³ஸு வுத்தனயமேவா’’தி ஏதேன தஜ்ஜனீயாதி³ஸத்தகம்மானி விய இத³ம்பி தஸ்ஸபாபியஸிகாகம்மங் அஸுசிபா⁴வாதி³தோ³ஸயுத்தஸ்ஸ, ஸங்க⁴ஸ்ஸ ச வினிச்ச²யே அதிட்ட²மானஸ்ஸ கத்தப்³ப³ங் விஸுங் ஏகங் நிக்³க³ஹகம்மந்தி த³ஸ்ஸேதி. ஏதஸ்மிஞ்ஹி நிக்³க³ஹகம்மே கதே ஸோ புக்³க³லோ ‘‘அஹங் ஸுத்³தோ⁴’’தி அத்தனோ ஸுத்³தி⁴யா ஸாத⁴னத்த²ங் ஸங்க⁴மஜ்ஜ²ங் ஓதரிதுங், ஸங்கோ⁴ சஸ்ஸ வினிச்ச²யங் தா³துங் ந லப⁴தி, தங் கம்மகரணமத்தேனேவ ச தங் அதி⁴கரணங் வூபஸந்தங் ஹோதி.
207.‘‘Sesamettha tajjanīyādīsu vuttanayamevā’’ti etena tajjanīyādisattakammāni viya idampi tassapāpiyasikākammaṃ asucibhāvādidosayuttassa, saṅghassa ca vinicchaye atiṭṭhamānassa kattabbaṃ visuṃ ekaṃ niggahakammanti dasseti. Etasmiñhi niggahakamme kate so puggalo ‘‘ahaṃ suddho’’ti attano suddhiyā sādhanatthaṃ saṅghamajjhaṃ otarituṃ, saṅgho cassa vinicchayaṃ dātuṃ na labhati, taṃ kammakaraṇamatteneva ca taṃ adhikaraṇaṃ vūpasantaṃ hoti.
கத²ங் பனேதங் கம்மங் படிப்பஸ்ஸம்ப⁴தீதி? கேசி பனெத்த² ‘‘ஸோ ததா² நிக்³க³ஹிதோ நிக்³க³ஹிதோவ ஹோதி, ஓஸாரணங் ந லப⁴தி. தேனேவ பாளியங் ஓஸாரணா ந வுத்தா’’தி வத³ந்தி. அஞ்ஞே பன ‘‘பாளியங் ந உபஸம்பாதே³தப்³ப³ந்திஆதி³னா ஸம்மாவத்தனஸ்ஸ வுத்தத்தா ஸம்மாவத்தித்வா லஜ்ஜித⁴ம்மே ஓக்கந்தஸ்ஸ ஓஸாரணா அவுத்தாபி தஜ்ஜனீயாதீ³ஸு விய நயதோ கம்மவாசங் யோஜெத்வா ஓஸாரணா காதப்³பா³ ஏவா’’தி வத³ந்தி, இத³ங் யுத்தங். தேனேவ அட்ட²கதா²யங் வக்க²தி ‘‘ஸசே ஸீலவா ப⁴விஸ்ஸதி, வத்தங் பரிபூரெத்வா படிப்பஸ்ஸத்³தி⁴ங் லபி⁴ஸ்ஸதி. நோ சே, ததா²னாஸிதகோவ ப⁴விஸ்ஸதீ’’தி (சூளவ॰ அட்ட²॰ 238). தஸ்ஸபாபியஸிகாகம்மந்தி ச அலுத்தஸமாஸோயேவ. தேனாஹ ‘‘இத³ங் ஹீ’’தி ஆதி³.
Kathaṃ panetaṃ kammaṃ paṭippassambhatīti? Keci panettha ‘‘so tathā niggahito niggahitova hoti, osāraṇaṃ na labhati. Teneva pāḷiyaṃ osāraṇā na vuttā’’ti vadanti. Aññe pana ‘‘pāḷiyaṃ na upasampādetabbantiādinā sammāvattanassa vuttattā sammāvattitvā lajjidhamme okkantassa osāraṇā avuttāpi tajjanīyādīsu viya nayato kammavācaṃ yojetvā osāraṇā kātabbā evā’’ti vadanti, idaṃ yuttaṃ. Teneva aṭṭhakathāyaṃ vakkhati ‘‘sace sīlavā bhavissati, vattaṃ paripūretvā paṭippassaddhiṃ labhissati. No ce, tathānāsitakova bhavissatī’’ti (cūḷava. aṭṭha. 238). Tassapāpiyasikākammanti ca aluttasamāsoyeva. Tenāha ‘‘idaṃ hī’’ti ādi.
ஸதிவினயகதா²தி³வண்ணனா நிட்டி²தா.
Sativinayakathādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
2. ஸதிவினயோ • 2. Sativinayo
3. அமூள்ஹவினயோ • 3. Amūḷhavinayo
5. யேபு⁴ய்யஸிகா • 5. Yebhuyyasikā
6. தஸ்ஸபாபியஸிகா • 6. Tassapāpiyasikā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā
ஸதிவினயகதா² • Sativinayakathā
அமூள்ஹவினயகதா² • Amūḷhavinayakathā
யேபு⁴ய்யஸிகாகதா² • Yebhuyyasikākathā
தஸ்ஸபாபியஸிகாகதா² • Tassapāpiyasikākathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸதிவினயாதி³கதா²வண்ணனா • Sativinayādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
ஸதிவினயகதா²வண்ணனா • Sativinayakathāvaṇṇanā
அமூள்ஹவினயகதா²வண்ணனா • Amūḷhavinayakathāvaṇṇanā
தஸ்ஸபாபியஸிகாகதா²வண்ணனா • Tassapāpiyasikākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
2. ஸதிவினயகதா² • 2. Sativinayakathā
3. அமூள்ஹவினயகதா² • 3. Amūḷhavinayakathā
5. யேபு⁴ய்யஸிகாகதா² • 5. Yebhuyyasikākathā
6. தஸ்ஸபாபியஸிகாகதா² • 6. Tassapāpiyasikākathā
