Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā

    ༥. སཏོཀཱརིཉཱཎནིདྡེསཝཎྞནཱ

    5. Satokāriñāṇaniddesavaṇṇanā

    ༡༦༣. སཏོཀཱརིཉཱཎནིདྡེསེ མཱཏིཀཱཡཾ ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ། ཨཡཉྷི ཨེཏྠ ཨིདྷ-སདྡོ སབྦཔྤཀཱརཨཱནཱཔཱནསྶཏིསམཱདྷིནིབྦཏྟཀསྶ པུགྒལསྶ སནྣིསྶཡབྷཱུཏསཱསནཔརིདཱིཔནོ, ཨཉྙསཱསནསྶ ཏཐཱབྷཱཝཔཊིསེདྷནོ ཙ། ཝུཏྟཉྷེཏཾ – ‘‘ཨིདྷེཝ, བྷིཀྑཝེ, སམཎོ…པེ॰… སུཉྙཱ པརཔྤཝཱདཱ སམཎེབྷི ཨཉྙེཧཱི’’ཏི (མ॰ ནི॰ ༡.༡༣༩; ཨ॰ ནི॰ ༤.༢༤༡)།

    163. Satokāriñāṇaniddese mātikāyaṃ idha bhikkhūti imasmiṃ sāsane bhikkhu. Ayañhi ettha idha-saddo sabbappakāraānāpānassatisamādhinibbattakassa puggalassa sannissayabhūtasāsanaparidīpano, aññasāsanassa tathābhāvapaṭisedhano ca. Vuttañhetaṃ – ‘‘idheva, bhikkhave, samaṇo…pe… suññā parappavādā samaṇebhi aññehī’’ti (ma. ni. 1.139; a. ni. 4.241).

    ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱཏི ཨིདམསྶ ཨཱནཱཔཱནསྶཏིསམཱདྷི བྷཱཝནཱནུརཱུཔསེནཱསནཔརིགྒཧཔརིདཱིཔནཾ། ཨིམསྶ ཧི བྷིཀྑུནོ དཱིགྷརཏྟཾ རཱུཔཱདཱིསུ ཨཱརམྨཎེསུ ཨནུཝིསཊཾ ཙིཏྟཾ ཨཱནཱཔཱནསྶཏིསམཱདྷིཨཱརམྨཎཾ ཨབྷིརུཧིཏུཾ ན ཨིཙྪཏི, ཀཱུཊགོཎཡུཏྟརཐོ ཝིཡ ཨུཔྤཐམེཝ དྷཱཝཏི། ཏསྨཱ སེཡྻཐཱཔི ནཱམ གོཔོ ཀཱུཊདྷེནུཡཱ སབྦཾ ཁཱིརཾ པིཝིཏྭཱ ཝཌྜྷིཏཾ ཀཱུཊཝཙྪཾ དམེཏུཀཱམོ དྷེནུཏོ ཨཔནེཏྭཱ ཨེཀམནྟེ མཧནྟཾ ཐམྦྷཾ ནིཁཎིཏྭཱ ཏཏྠ ཡོཏྟེན བནྡྷེཡྻ, ཨཐསྶ སོ ཝཙྪོ ཨིཏོ ཙིཏོ ཙ ཝིཔྥནྡིཏྭཱ པལཱཡིཏུཾ ཨསཀྐོནྟོ ཏམེཝ ཐམྦྷཾ ཨུཔནིསཱིདེཡྻ ཝཱ ཨུཔནིཔཛྫེཡྻ ཝཱ, ཨེཝམེཝ ཨིམིནཱཔི བྷིཀྑུནཱ དཱིགྷརཏྟཾ རཱུཔཱརམྨཎཱདིརསཔཱནཝཌྜྷིཏཾ དུཊྛཙིཏྟཾ དམེཏུཀཱམེན རཱུཔཱདིཨཱརམྨཎཏོ ཨཔནེཏྭཱ ཨརཉྙཾ ཝཱ རུཀྑམཱུལཾ ཝཱ སུཉྙཱགཱརཾ ཝཱ པཝེསེཏྭཱ ཏཏྠ ཨསྶཱསཔསྶཱསཐམྦྷེ སཏིཡོཏྟེན བནྡྷིཏབྦཾ། ཨེཝམསྶ ཏཾ ཙིཏྟཾ ཨིཏོ ཙིཏོ ཙ ཝིཔྥནྡིཏྭཱཔི པུབྦེ ཨཱཙིཎྞཱརམྨཎཾ ཨལབྷམཱནཾ སཏིཡོཏྟཾ ཚིནྡིཏྭཱ པལཱཡིཏུཾ ཨསཀྐོནྟཾ ཏམེཝཱརམྨཎཾ ཨུཔཙཱརཔྤནཱཝསེན ཨུཔནིསཱིདཏི ཙེཝ ཨུཔནིཔཛྫཏི ཙ། ཏེནཱཧུ པོརཱཎཱ –

    Araññagato vā rukkhamūlagato vā suññāgāragato vāti idamassa ānāpānassatisamādhi bhāvanānurūpasenāsanapariggahaparidīpanaṃ. Imassa hi bhikkhuno dīgharattaṃ rūpādīsu ārammaṇesu anuvisaṭaṃ cittaṃ ānāpānassatisamādhiārammaṇaṃ abhiruhituṃ na icchati, kūṭagoṇayuttaratho viya uppathameva dhāvati. Tasmā seyyathāpi nāma gopo kūṭadhenuyā sabbaṃ khīraṃ pivitvā vaḍḍhitaṃ kūṭavacchaṃ dametukāmo dhenuto apanetvā ekamante mahantaṃ thambhaṃ nikhaṇitvā tattha yottena bandheyya, athassa so vaccho ito cito ca vipphanditvā palāyituṃ asakkonto tameva thambhaṃ upanisīdeyya vā upanipajjeyya vā, evameva imināpi bhikkhunā dīgharattaṃ rūpārammaṇādirasapānavaḍḍhitaṃ duṭṭhacittaṃ dametukāmena rūpādiārammaṇato apanetvā araññaṃ vā rukkhamūlaṃ vā suññāgāraṃ vā pavesetvā tattha assāsapassāsathambhe satiyottena bandhitabbaṃ. Evamassa taṃ cittaṃ ito cito ca vipphanditvāpi pubbe āciṇṇārammaṇaṃ alabhamānaṃ satiyottaṃ chinditvā palāyituṃ asakkontaṃ tamevārammaṇaṃ upacārappanāvasena upanisīdati ceva upanipajjati ca. Tenāhu porāṇā –

    ‘‘ཡཐཱ ཐམྦྷེ ནིབནྡྷེཡྻ, ཝཙྪཾ དམཾ ནརོ ཨིདྷ།

    ‘‘Yathā thambhe nibandheyya, vacchaṃ damaṃ naro idha;

    བནྡྷེཡྻེཝཾ སཀཾ ཙིཏྟཾ, སཏིཡཱརམྨཎེ དལ༹ྷ’’ནྟི༎ (ཝིསུདྡྷི॰ ༡.༢༡༧; པཱརཱ॰ ཨཊྛ॰ ༢.༡༦༥; དཱི॰ ནི॰ ཨཊྛ॰ ༢.༣༧༤; མ॰ ནི॰ ཨཊྛ॰ ༡.༡༠༧) –

    Bandheyyevaṃ sakaṃ cittaṃ, satiyārammaṇe daḷha’’nti. (visuddhi. 1.217; pārā. aṭṭha. 2.165; dī. ni. aṭṭha. 2.374; ma. ni. aṭṭha. 1.107) –

    ཨེཝམསྶ ཏཾ སེནཱསནཾ བྷཱཝནཱནུརཱུཔཾ ཧོཏི། ཨཐ ཝཱ ཡསྨཱ ཨིདཾ ཀམྨཊྛཱནཔྤབྷེདེ མུདྡྷབྷཱུཏཾ སབྦབུདྡྷཔཙྩེཀབུདྡྷབུདྡྷསཱཝཀཱནཾ ཝིསེསཱདྷིགམདིཊྛདྷམྨསུཁཝིཧཱརཔདཊྛཱནཾ ཨཱནཱཔཱནསྶཏིཀམྨཊྛཱནཾ ཨིཏྠིཔུརིསཧཏྠིཨསྶཱདིསདྡསམཱཀུལཾ གཱམནྟཾ ཨཔརིཙྩཛིཏྭཱ ན སུཀརཾ བྷཱཝེཏུཾ སདྡཀཎྚཀཏྟཱ ཛྷཱནསྶ། ཨགཱམཀེ པན ཨརཉྙེ སུཀརཾ ཡོགཱཝཙརེན ཨིདཾ ཀམྨཊྛཱནཾ པརིགྒཧེཏྭཱ ཨཱནཱཔཱནཙཏུཀྐཛ྄ཛྷཱནཾ ནིབྦཏྟེཏྭཱ ཏདེཝ པཱདཀཾ ཀཏྭཱ སངྑཱརེ སམྨསིཏྭཱ ཨགྒཕལཾ ཨརཧཏྟཾ པཱཔུཎིཏུཾ། ཏསྨཱ ཏསྶ ཨནུརཱུཔཾ སེནཱསནཾ ཨུཔདིསནྟོ བྷགཝཱ ‘‘ཨརཉྙགཏོ ཝཱ’’ཏིཨཱདིམཱཧ, ཏཐེཝ ཐེརོ།

    Evamassa taṃ senāsanaṃ bhāvanānurūpaṃ hoti. Atha vā yasmā idaṃ kammaṭṭhānappabhede muddhabhūtaṃ sabbabuddhapaccekabuddhabuddhasāvakānaṃ visesādhigamadiṭṭhadhammasukhavihārapadaṭṭhānaṃ ānāpānassatikammaṭṭhānaṃ itthipurisahatthiassādisaddasamākulaṃ gāmantaṃ apariccajitvā na sukaraṃ bhāvetuṃ saddakaṇṭakattā jhānassa. Agāmake pana araññe sukaraṃ yogāvacarena idaṃ kammaṭṭhānaṃ pariggahetvā ānāpānacatukkajjhānaṃ nibbattetvā tadeva pādakaṃ katvā saṅkhāre sammasitvā aggaphalaṃ arahattaṃ pāpuṇituṃ. Tasmā tassa anurūpaṃ senāsanaṃ upadisanto bhagavā ‘‘araññagato vā’’tiādimāha, tatheva thero.

    ཝཏྠུཝིཛྫཱཙརིཡོ ཝིཡ ཧི བྷགཝཱ, སོ ཡཐཱ ཝཏྠུཝིཛྫཱཙརིཡོ ནགརབྷཱུམིཾ པསྶིཏྭཱ སུཊྛུ ཨུཔཔརིཀྑིཏྭཱ ‘‘ཨེཏྠ ནགརཾ མཱཔེཐཱ’’ཏི ཨུཔདིསཏི, སོཏྠིནཱ ཙ ནགརེ ནིཊྛིཏེ རཱཛཀུལཏོ མཧཱསཀྐཱརཾ ལབྷཏི, ཨེཝམེཝཾ ཡོགཱཝཙརསྶ ཨནུརཱུཔཾ སེནཱསནཾ ཨུཔཔརིཀྑིཏྭཱ ‘‘ཨེཏྠ ཀམྨཊྛཱནཾ ཨནུཡུཉྫིཏབྦ’’ནྟི ཨུཔདིསཏི, ཏཏོ ཏཏྠ ཀམྨཊྛཱནམནུཡུཏྟེན ཡོགིནཱ ཀམེན ཨརཧཏྟེ པཏྟེ ‘‘སམྨཱསམྦུདྡྷོ ཝཏ སོ བྷགཝཱ’’ཏི མཧནྟཾ སཀྐཱརཾ ལབྷཏི། ཨཡཾ པན བྷིཀྑུ ‘‘དཱིཔིསདིསོ’’ཏི ཝུཙྩཏི། ཡཐཱ ཧི མཧཱདཱིཔིརཱཛཱ ཨརཉྙེ ཏིཎགཧནཾ ཝཱ ཝནགཧནཾ ཝཱ པབྦཏགཧནཾ ཝཱ ནིསྶཱཡ ནིལཱིཡིཏྭཱ ཝནམཧིཾསགོཀཎྞསཱུཀརཱདཡོ མིགེ གཎྷཱཏི, ཨེཝམེཝཾ ཨཡཾ ཨརཉྙཱདཱིསུ ཀམྨཊྛཱནམནུཡུཉྫནྟོ བྷིཀྑུ ཡཐཱཀྐམེན སོཏཱཔཏྟིསཀདཱགཱམིཨནཱགཱམིཨརཧཏྟམགྒེ ཙེཝ ཨརིཡཕལཱནི ཙ གཎྷཱཏཱིཏི ཝེདིཏབྦོ། ཏེནཱཧུ པོརཱཎཱ –

    Vatthuvijjācariyo viya hi bhagavā, so yathā vatthuvijjācariyo nagarabhūmiṃ passitvā suṭṭhu upaparikkhitvā ‘‘ettha nagaraṃ māpethā’’ti upadisati, sotthinā ca nagare niṭṭhite rājakulato mahāsakkāraṃ labhati, evamevaṃ yogāvacarassa anurūpaṃ senāsanaṃ upaparikkhitvā ‘‘ettha kammaṭṭhānaṃ anuyuñjitabba’’nti upadisati, tato tattha kammaṭṭhānamanuyuttena yoginā kamena arahatte patte ‘‘sammāsambuddho vata so bhagavā’’ti mahantaṃ sakkāraṃ labhati. Ayaṃ pana bhikkhu ‘‘dīpisadiso’’ti vuccati. Yathā hi mahādīpirājā araññe tiṇagahanaṃ vā vanagahanaṃ vā pabbatagahanaṃ vā nissāya nilīyitvā vanamahiṃsagokaṇṇasūkarādayo mige gaṇhāti, evamevaṃ ayaṃ araññādīsu kammaṭṭhānamanuyuñjanto bhikkhu yathākkamena sotāpattisakadāgāmianāgāmiarahattamagge ceva ariyaphalāni ca gaṇhātīti veditabbo. Tenāhu porāṇā –

    ‘‘ཡཐཱཔི དཱིཔིཀོ ནཱམ, ནིལཱིཡིཏྭཱ གཎྷཏེ མིགེ།

    ‘‘Yathāpi dīpiko nāma, nilīyitvā gaṇhate mige;

    ཏཐེཝཱཡཾ བུདྡྷཔུཏྟོ, ཡུཏྟཡོགོ ཝིཔསྶཀོ།

    Tathevāyaṃ buddhaputto, yuttayogo vipassako;

    ཨརཉྙཾ པཝིསིཏྭཱན, གཎྷཱཏི ཕལམུཏྟམ’’ནྟི༎ (མི॰ པ॰ ༦.༡.༥)།

    Araññaṃ pavisitvāna, gaṇhāti phalamuttama’’nti. (mi. pa. 6.1.5);

    ཏེནསྶ པརཀྐམཛཝཡོགྒབྷཱུམིཾ ཨརཉྙསེནཱསནཾ དསྶེནྟོ ‘‘ཨརཉྙགཏོ ཝཱ’’ཏིཨཱདིམཱཧ།

    Tenassa parakkamajavayoggabhūmiṃ araññasenāsanaṃ dassento ‘‘araññagato vā’’tiādimāha.

    ཏཏྠ ཨརཉྙགཏོཏི ཨུཔརི ཝུཏྟལཀྑཎཾ ཡཾཀིཉྩི པཝིཝེཀསུཁཾ ཨརཉྙཾ གཏོ། རུཀྑམཱུལགཏོཏི རུཀྑསམཱིཔཾ གཏོ། སུཉྙཱགཱརགཏོཏི སུཉྙཾ ཝིཝིཏྟོཀཱསཾ གཏོ། ཨེཏྠ ཙ ཋཔེཏྭཱ ཨརཉྙཉྩ རུཀྑམཱུལཉྩ ཨཝསེསསཏྟཝིདྷསེནཱསནཾ གཏོཔི ‘‘སུཉྙཱགཱརགཏོ’’ཏི ཝཏྟུཾ ཝཊྚཏི། ནཝཝིདྷཉྷི སེནཱསནཾ། ཡཐཱཧ – ‘‘སོ ཝིཝིཏྟཾ སེནཱསནཾ བྷཛཏི ཨརཉྙཾ རུཀྑམཱུལཾ པབྦཏཾ ཀནྡརཾ གིརིགུཧཾ སུསཱནཾ ཝནཔཏྠཾ ཨབྦྷོཀཱསཾ པལཱལཔུཉྫ’’ནྟི (ཝིབྷ॰ ༥༠༨)། ཨེཝམསྶ ཨུཏུཏྟཡཱནུཀཱུལཾ དྷཱཏུཙརིཡཱནུཀཱུལཉྩ ཨཱནཱཔཱནསྶཏིབྷཱཝནཱནུརཱུཔཾ སེནཱསནཾ ཨུཔདིསིཏྭཱ ཨལཱིནཱནུདྡྷཙྩཔཀྑིཀཾ སནྟམིརིཡཱཔཐཾ ཨུཔདིསནྟོ ནིསཱིདཏཱིཏི ཨཱཧ། ཨཐསྶ ནིསཛྫཱཡ དལ༹ྷབྷཱཝཾ ཨསྶཱསཔསྶཱསཱནཾ པཝཏྟནསམཏྠཏཾ ཨཱརམྨཎཔརིགྒཧཱུཔཱཡཉྩ དསྶེནྟོ པལླངྐཾ ཨཱབྷུཛིཏྭཱཏིཨཱདིམཱཧ། ཏཏྠ པལླངྐནྟི སམནྟཏོ ཨཱུརུབདྡྷཱསནཾ། ཨཱབྷུཛིཏྭཱཏི བནྡྷིཏྭཱ། ཨུཛུཾ ཀཱཡཾ པཎིདྷཱཡཱཏི ཨུཔརིམསརཱིརཾ ཨུཛུཀཾ ཋཔེཏྭཱ ཨཊྛཱརས པིཊྛིཀཎྚཀེ ཀོཊིཡཱ ཀོཊིཾ པཊིཔཱདེཏྭཱ། ཨེཝཉྷི ནིསིནྣསྶ དྷམྨམཾསནྷཱརཱུནི ན པཎམནྟི། ཨཐསྶ ཡཱ ཏེསཾ པཎམནཔཙྩཡཱ ཁཎེ ཁཎེ ཝེདནཱ ཨུཔྤཛྫེཡྻུཾ, ཏཱ ན ཨུཔྤཛྫནྟི། ཏཱསུ ཨནུཔྤཛྫམཱནཱསུ ཙིཏྟཾ ཨེཀགྒཾ ཧོཏི, ཀམྨཊྛཱནཾ ན པརིཔཏཏི, ཝུདྡྷིཾ ཕཱཏིཾ ཨུཔགཙྪཏི།

    Tattha araññagatoti upari vuttalakkhaṇaṃ yaṃkiñci pavivekasukhaṃ araññaṃ gato. Rukkhamūlagatoti rukkhasamīpaṃ gato. Suññāgāragatoti suññaṃ vivittokāsaṃ gato. Ettha ca ṭhapetvā araññañca rukkhamūlañca avasesasattavidhasenāsanaṃ gatopi ‘‘suññāgāragato’’ti vattuṃ vaṭṭati. Navavidhañhi senāsanaṃ. Yathāha – ‘‘so vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñja’’nti (vibha. 508). Evamassa ututtayānukūlaṃ dhātucariyānukūlañca ānāpānassatibhāvanānurūpaṃ senāsanaṃ upadisitvā alīnānuddhaccapakkhikaṃ santamiriyāpathaṃ upadisanto nisīdatīti āha. Athassa nisajjāya daḷhabhāvaṃ assāsapassāsānaṃ pavattanasamatthataṃ ārammaṇapariggahūpāyañca dassento pallaṅkaṃ ābhujitvātiādimāha. Tattha pallaṅkanti samantato ūrubaddhāsanaṃ. Ābhujitvāti bandhitvā. Ujuṃ kāyaṃ paṇidhāyāti uparimasarīraṃ ujukaṃ ṭhapetvā aṭṭhārasa piṭṭhikaṇṭake koṭiyā koṭiṃ paṭipādetvā. Evañhi nisinnassa dhammamaṃsanhārūni na paṇamanti. Athassa yā tesaṃ paṇamanapaccayā khaṇe khaṇe vedanā uppajjeyyuṃ, tā na uppajjanti. Tāsu anuppajjamānāsu cittaṃ ekaggaṃ hoti, kammaṭṭhānaṃ na paripatati, vuddhiṃ phātiṃ upagacchati.

    པརིམུཁཾ སཏིཾ ཨུཔཊྛཔེཏྭཱཏི ཀམྨཊྛཱནཱབྷིམུཁཾ སཏིཾ ཋཔཡིཏྭཱ། སོ སཏོཝ ཨསྶསཏི སཏོ པསྶསཏཱིཏི སོ བྷིཀྑུ ཨེཝཾ ནིསཱིདིཏྭཱ ཨེཝཉྩ སཏིཾ ཨུཔཊྛཔེཏྭཱ ཏཾ སཏིཾ ཨཝིཛཧནྟོ སཏོ ཨེཝ ཨསྶསཏི སཏོ པསྶསཏི, སཏོཀཱརཱི ཧོཏཱིཏི ཝུཏྟཾ ཧོཏི།

    Parimukhaṃsatiṃ upaṭṭhapetvāti kammaṭṭhānābhimukhaṃ satiṃ ṭhapayitvā. So satova assasati sato passasatīti so bhikkhu evaṃ nisīditvā evañca satiṃ upaṭṭhapetvā taṃ satiṃ avijahanto sato eva assasati sato passasati, satokārī hotīti vuttaṃ hoti.

    ཨིདཱནི ཡེཧི པཀཱརེཧི སཏོཀཱརཱི ཧོཏི, ཏེ པཀཱརེ དསྶེཏུཾ དཱིགྷཾ ཝཱ ཨསྶསནྟོཏིཨཱདིམཱཧ། ཏཏྠ དཱིགྷཾ ཝཱ ཨསྶསནྟོཏི དཱིགྷཾ ཝཱ ཨསྶཱསཾ པཝཏྟཡནྟོ། ཏཐཱ རསྶཾ། ཡཱ པན ནེསཾ དཱིགྷརསྶཏཱ, སཱ ཀཱལཝསེན ཝེདིཏབྦཱ། ཀདཱཙི ཧི མནུསྶཱ ཧཏྠིཨཧིཨཱདཡོ ཝིཡ ཀཱལཝསེན དཱིགྷཾ ཨསྶསནྟི ཙ པསྶསནྟི ཙ, ཀདཱཙི སུནཁསསཱདཡོ ཝིཡ རསྶཾ། ཨཉྙཐཱ ཧི ཙུཎྞཝིཙུཎྞཱ ཨསྶཱསཔསྶཱསཱ དཱིགྷརསྶཱ ནཱམ ན ཧོནྟི ། ཏསྨཱ ཏེ དཱིགྷཾ ཀཱལཾ པཝིསནྟཱ ཙ ནིཀྑམནྟཱ ཙ དཱིགྷཱ, རསྶཾ ཀཱལཾ པཝིསནྟཱ ཙ ནིཀྑམནྟཱ ཙ རསྶཱཏི ཝེདིཏབྦཱ། ཏཏྲཱཡཾ བྷིཀྑུ ཨུཔརི ཝུཏྟེཧི ནཝཧཱཀཱརེཧི དཱིགྷཾ ཨསྶསནྟོ ཙ པསྶསནྟོ ཙ དཱིགྷཾ ཨསྶསཱམི, པསྶསཱམཱིཏི པཛཱནཱཏི, ཏཐཱ རསྶཾ།

    Idāni yehi pakārehi satokārī hoti, te pakāre dassetuṃ dīghaṃ vā assasantotiādimāha. Tattha dīghaṃ vā assasantoti dīghaṃ vā assāsaṃ pavattayanto. Tathā rassaṃ. Yā pana nesaṃ dīgharassatā, sā kālavasena veditabbā. Kadāci hi manussā hatthiahiādayo viya kālavasena dīghaṃ assasanti ca passasanti ca, kadāci sunakhasasādayo viya rassaṃ. Aññathā hi cuṇṇavicuṇṇā assāsapassāsā dīgharassā nāma na honti . Tasmā te dīghaṃ kālaṃ pavisantā ca nikkhamantā ca dīghā, rassaṃ kālaṃ pavisantā ca nikkhamantā ca rassāti veditabbā. Tatrāyaṃ bhikkhu upari vuttehi navahākārehi dīghaṃ assasanto ca passasanto ca dīghaṃ assasāmi, passasāmīti pajānāti, tathā rassaṃ.

    ཨེཝཾ པཛཱནཏོ ཙ –

    Evaṃ pajānato ca –

    ‘‘དཱིགྷོ རསྶོ ཙ ཨསྶཱསོ, པསྶཱསོཔི ཙ ཏཱདིསོ།

    ‘‘Dīgho rasso ca assāso, passāsopi ca tādiso;

    ཙཏྟཱརོ ཝཎྞཱ ཝཏྟནྟི, ནཱསིཀགྒེཝ བྷིཀྑུནོ’’ཏི༎ (ཝིསུདྡྷི॰ ༡.༢༡༩; པཱརཱ॰ ཨཊྛ॰ ༢.༡༦༥)།

    Cattāro vaṇṇā vattanti, nāsikaggeva bhikkhuno’’ti. (visuddhi. 1.219; pārā. aṭṭha. 2.165);

    ནཝནྣཉྩསྶ ཨཱཀཱརཱནཾ ཨེཀེནཱཀཱརེན ཀཱཡཱནུཔསྶནཱསཏིཔཊྛཱནབྷཱཝནཱ སམྤཛྫཏཱིཏི ཝེདིཏབྦཱ། སབྦཀཱཡཔཊིསཾཝེདཱི ཨསྶསིསྶཱམཱིཏི སིཀྑཏི། སབྦཀཱཡཔཊིསཾཝེདཱི པསྶསིསྶཱམཱིཏི སིཀྑཏཱིཏི སཀལསྶ ཨསྶཱསཀཱཡསྶཱདིམཛ྄ཛྷཔརིཡོསཱནཾ ཝིདིཏཾ ཀརོནྟོ པཱཀཊཾ ཀརོནྟོ ཨསྶསིསྶཱམཱིཏི སིཀྑཏི། སཀལསྶ པསྶཱསཀཱཡསྶཱདིམཛ྄ཛྷཔརིཡོསཱནཾ ཝིདིཏཾ ཀརོནྟོ པཱཀཊཾ ཀརོནྟོ པསྶསིསྶཱམཱིཏི སིཀྑཏི། ཨེཝཾ ཝིདིཏཾ ཀརོནྟོ པཱཀཊཾ ཀརོནྟོ ཉཱཎསམྤཡུཏྟཙིཏྟེན ཨསྶསཏི ཙེཝ པསྶསཏི ཙ། ཏསྨཱ ‘‘ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝུཙྩཏི། ཨེཀསྶ ཧི བྷིཀྑུནོ ཙུཎྞཝིཙུཎྞཝིསཊེ (ཝིསུདྡྷི॰ ༡.༢༡༩; པཱརཱ॰ ༢.༡༦༥) ཨསྶཱསཀཱཡེ, པསྶཱསཀཱཡེ ཝཱ ཨཱདི པཱཀཊོ ཧོཏི, ན མཛ྄ཛྷཔརིཡོསཱནཾ། སོ ཨཱདིམེཝ པརིགྒཧེཏུཾ སཀྐོཏི, མཛ྄ཛྷཔརིཡོསཱནེ ཀིལམཏི། ཨེཀསྶ མཛ྄ཛྷཾ པཱཀཊཾ ཧོཏི, ན ཨཱདིཔརིཡོསཱནཾ། སོ མཛ྄ཛྷམེཝ པརིགྒཧེཏུཾ སཀྐོཏི, ཨཱདིཔརིཡོསཱནེ ཀིལམཏི། ཨེཀསྶ པརིཡོསཱནཾ པཱཀཊཾ ཧོཏི, ན ཨཱདིམཛ྄ཛྷཾ། སོ པརིཡོསཱནཾཡེཝ པརིགྒཧེཏུཾ སཀྐོཏི, ཨཱདིམཛ྄ཛྷེ ཀིལམཏི། ཨེཀསྶ སབྦཾ པཱཀཊཾ ཧོཏི, སོ སབྦམྤི པརིགྒཧེཏུཾ སཀྐོཏི , ན ཀཏྠཙི ཀིལམཏི། ཏཱདིསེན བྷཝིཏབྦནྟི དསྶེནྟོ ཨཱཧ – ‘‘སབྦཀཱཡཔཊིསཾཝེདཱི’’ཏིཨཱདི།

    Navannañcassa ākārānaṃ ekenākārena kāyānupassanāsatipaṭṭhānabhāvanā sampajjatīti veditabbā. Sabbakāyapaṭisaṃvedī assasissāmīti sikkhati. Sabbakāyapaṭisaṃvedī passasissāmīti sikkhatīti sakalassa assāsakāyassādimajjhapariyosānaṃ viditaṃ karonto pākaṭaṃ karonto assasissāmīti sikkhati. Sakalassa passāsakāyassādimajjhapariyosānaṃ viditaṃ karonto pākaṭaṃ karonto passasissāmīti sikkhati. Evaṃ viditaṃ karonto pākaṭaṃ karonto ñāṇasampayuttacittena assasati ceva passasati ca. Tasmā ‘‘assasissāmi passasissāmīti sikkhatī’’ti vuccati. Ekassa hi bhikkhuno cuṇṇavicuṇṇavisaṭe (visuddhi. 1.219; pārā. 2.165) assāsakāye, passāsakāye vā ādi pākaṭo hoti, na majjhapariyosānaṃ. So ādimeva pariggahetuṃ sakkoti, majjhapariyosāne kilamati. Ekassa majjhaṃ pākaṭaṃ hoti, na ādipariyosānaṃ. So majjhameva pariggahetuṃ sakkoti, ādipariyosāne kilamati. Ekassa pariyosānaṃ pākaṭaṃ hoti, na ādimajjhaṃ. So pariyosānaṃyeva pariggahetuṃ sakkoti, ādimajjhe kilamati. Ekassa sabbaṃ pākaṭaṃ hoti, so sabbampi pariggahetuṃ sakkoti , na katthaci kilamati. Tādisena bhavitabbanti dassento āha – ‘‘sabbakāyapaṭisaṃvedī’’tiādi.

    ཏཏྠ སིཀྑཏཱིཏི ཨེཝཾ གྷཊཏི ཝཱཡམཏི། ཡོ ཝཱ ཏཐཱབྷཱུཏསྶ སཾཝརོ, ཨཡམེཏྠ ཨདྷིསཱིལསིཀྑཱ། ཡོ ཏཐཱབྷཱུཏསྶ སམཱདྷི, ཨཡཾ ཨདྷིཙིཏྟསིཀྑཱ། ཡཱ ཏཐཱབྷཱུཏསྶ པཉྙཱ, ཨཡཾ ཨདྷིཔཉྙཱསིཀྑཱཏི ཨིམཱ ཏིསྶོ སིཀྑཱཡོ ཏསྨིཾ ཨཱརམྨཎེ ཏཱཡ སཏིཡཱ ཏེན མནསིཀཱརེན སིཀྑཏི ཨཱསེཝཏི བྷཱཝེཏི བཧུལཱིཀརོཏཱིཏི ཨེཝམེཏྠ ཨཏྠོ དཊྛབྦོ། ཏཏྠ ཡསྨཱ པུརིམནཡེན ཀེཝལཾ ཨསྶསིཏབྦཾ པསྶསིཏབྦམེཝ ཙ, ན ཨཉྙཾ ཀིཉྩི ཀཱཏབྦཾ, ཨིཏོ པཊྛཱཡ པན ཉཱཎུཔྤཱདནཱདཱིསུ ཡོགོ ཀརཎཱིཡོ། ཏསྨཱ ཏཏྠ ‘‘ཨསྶསཱམཱིཏི པཛཱནཱཏི པསྶསཱམཱིཏི པཛཱནཱཏི’’ཙྩེཝ ཝཏྟམཱནཀཱལཝསེན པཱལི༹ཾ ཝཏྭཱ ཨིཏོ པཊྛཱཡ ཀཏྟབྦསྶ ཉཱཎུཔྤཱདནཱདིནོ ཨཱ-ཀཱརསྶ དསྶནཏྠཾ ‘‘སབྦཀཱཡཔཊིསཾཝེདཱི ཨསྶསིསྶཱམཱི’’ཏིཨཱདིནཱ ནཡེན ཨནཱགཏཀཱལཝསེན པཱལི༹ ཨཱརོཔིཏཱཏི ཝེདིཏབྦཱ།

    Tattha sikkhatīti evaṃ ghaṭati vāyamati. Yo vā tathābhūtassa saṃvaro, ayamettha adhisīlasikkhā. Yo tathābhūtassa samādhi, ayaṃ adhicittasikkhā. Yā tathābhūtassa paññā, ayaṃ adhipaññāsikkhāti imā tisso sikkhāyo tasmiṃ ārammaṇe tāya satiyā tena manasikārena sikkhati āsevati bhāveti bahulīkarotīti evamettha attho daṭṭhabbo. Tattha yasmā purimanayena kevalaṃ assasitabbaṃ passasitabbameva ca, na aññaṃ kiñci kātabbaṃ, ito paṭṭhāya pana ñāṇuppādanādīsu yogo karaṇīyo. Tasmā tattha ‘‘assasāmīti pajānāti passasāmīti pajānāti’’cceva vattamānakālavasena pāḷiṃ vatvā ito paṭṭhāya kattabbassa ñāṇuppādanādino ā-kārassa dassanatthaṃ ‘‘sabbakāyapaṭisaṃvedī assasissāmī’’tiādinā nayena anāgatakālavasena pāḷi āropitāti veditabbā.

    པསྶམྦྷཡཾ ཀཱཡསངྑཱརཾ…པེ॰… སིཀྑཏཱིཏི ཨོལཱ༹རིཀཾ ཨསྶཱསཔསྶཱསསངྑཱཏཾ ཀཱཡསངྑཱརཾ པསྶམྦྷེནྟོ པཊིཔྤསྶམྦྷེནྟོ ནིརོདྷེནྟོ ཝཱུཔསམེནྟོ ཨསྶསིསྶཱམི པསྶསིསྶཱམཱིཏི སིཀྑཏི།

    Passambhayaṃ kāyasaṅkhāraṃ…pe… sikkhatīti oḷārikaṃ assāsapassāsasaṅkhātaṃ kāyasaṅkhāraṃ passambhento paṭippassambhento nirodhento vūpasamento assasissāmi passasissāmīti sikkhati.

    ཏཏྲེཝཾ ཨོལཱ༹རིཀསུཁུམཏཱ ཙ པསྶདྡྷི ཙ ཝེདིཏབྦཱ – ཨིམསྶ ཧི བྷིཀྑུནོ པུབྦེ ཨཔརིགྒཧིཏཀཱལེ ཀཱཡོ ཙ ཙིཏྟཉྩ སདརཐཱ ཧོནྟི ཨོལཱ༹རིཀཱ། ཀཱཡཙིཏྟཱནཾ ཨོལཱ༹རིཀཏྟེ ཨཝཱུཔསནྟེ ཨསྶཱསཔསྶཱསཱཔི ཨོལཱ༹རིཀཱ ཧོནྟི, བལཝཏརཱ ཧུཏྭཱ པཝཏྟནྟི, ནཱསིཀཱ ནཔྤཧོཏི, མུཁེན ཨསྶསནྟོཔི པསྶསནྟོཔི ཏིཊྛཏི། ཡདཱ པནསྶ ཀཱཡོཔི ཙིཏྟམྤི པརིགྒཧིཏཱ ཧོནྟི, ཏདཱ ཏེ སནྟཱ ཧོནྟི ཝཱུཔསནྟཱ། ཏེསུ ཝཱུཔསནྟེསུ ཨསྶཱསཔསྶཱསཱ སུཁུམཱ ཧུཏྭཱ པཝཏྟནྟི, ‘‘ཨཏྠི ནུ ཁོ, ནཏྠཱི’’ཏི ཝིཙེཏབྦཱཀཱརཔྤཏྟཱ ཧོནྟི། སེཡྻཐཱཔི པུརིསསྶ དྷཱཝིཏྭཱ པབྦཏཱ ཝཱ ཨོརོཧིཏྭཱ མཧཱབྷཱརཾ ཝཱ སཱིསཏོ ཨོརོཔེཏྭཱ ཋིཏསྶ ཨོལཱ༹རིཀཱ ཨསྶཱསཔསྶཱསཱ ཧོནྟི, ནཱསིཀཱ ནཔྤཧོཏི, མུཁེན ཨསྶསནྟོཔི པསྶསནྟོཔི ཏིཊྛཏི། ཡདཱ པནེས ཏཾ པརིསྶམཾ ཝིནོདེཏྭཱ ནྷཏྭཱ ཙ པིཝིཏྭཱ ཙ ཨལླསཱཊཀཾ ཧདཡེ ཀཏྭཱ སཱིཏཱཡ ཚཱཡཱཡ ནིཔནྣོ ཧོཏི, ཨཐསྶ ཏེ ཨསྶཱསཔསྶཱསཱ སུཁུམཱ ཧོནྟི ‘‘ཨཏྠི ནུ ཁོ, ནཏྠཱི’’ཏི ཝིཙེཏབྦཱཀཱརཔྤཏྟཱ, ཨེཝམེཝཾ ཨིམསྶ བྷིཀྑུནོ ཨཔརིགྒཧིཏཀཱལེཏི ཝིཏྠཱརེཏབྦཾ། ཏཐཱ ཧིསྶ པུབྦེ ཨཔརིགྒཧིཏཀཱལེ ‘‘ཨོལཱ༹རིཀོལཱ༹རིཀེ ཀཱཡསངྑཱརེ པསྶམྦྷེམཱི’’ཏི ཨཱབྷོགསམནྣཱཧཱརམནསིཀཱརོ ནཏྠི, པརིགྒཧིཏཀཱལེ པན ཨཏྠི། ཏེནསྶ ཨཔརིགྒཧིཏཀཱལཏོ པརིགྒཧིཏཀཱལེ ཀཱཡསངྑཱརོ སུཁུམོ ཧོཏི། ཏེནཱཧུ པོརཱཎཱ –

    Tatrevaṃ oḷārikasukhumatā ca passaddhi ca veditabbā – imassa hi bhikkhuno pubbe apariggahitakāle kāyo ca cittañca sadarathā honti oḷārikā. Kāyacittānaṃ oḷārikatte avūpasante assāsapassāsāpi oḷārikā honti, balavatarā hutvā pavattanti, nāsikā nappahoti, mukhena assasantopi passasantopi tiṭṭhati. Yadā panassa kāyopi cittampi pariggahitā honti, tadā te santā honti vūpasantā. Tesu vūpasantesu assāsapassāsā sukhumā hutvā pavattanti, ‘‘atthi nu kho, natthī’’ti vicetabbākārappattā honti. Seyyathāpi purisassa dhāvitvā pabbatā vā orohitvā mahābhāraṃ vā sīsato oropetvā ṭhitassa oḷārikā assāsapassāsā honti, nāsikā nappahoti, mukhena assasantopi passasantopi tiṭṭhati. Yadā panesa taṃ parissamaṃ vinodetvā nhatvā ca pivitvā ca allasāṭakaṃ hadaye katvā sītāya chāyāya nipanno hoti, athassa te assāsapassāsā sukhumā honti ‘‘atthi nu kho, natthī’’ti vicetabbākārappattā, evamevaṃ imassa bhikkhuno apariggahitakāleti vitthāretabbaṃ. Tathā hissa pubbe apariggahitakāle ‘‘oḷārikoḷārike kāyasaṅkhāre passambhemī’’ti ābhogasamannāhāramanasikāro natthi, pariggahitakāle pana atthi. Tenassa apariggahitakālato pariggahitakāle kāyasaṅkhāro sukhumo hoti. Tenāhu porāṇā –

    ‘‘སཱརདྡྷེ ཀཱཡེ ཙིཏྟེ ཙ, ཨདྷིམཏྟཾ པཝཏྟཏི།

    ‘‘Sāraddhe kāye citte ca, adhimattaṃ pavattati;

    ཨསཱརདྡྷམྷི ཀཱཡམྷི, སུཁུམཾ སམྤཝཏྟཏཱི’’ཏི༎ (ཝིསུདྡྷི॰ ༡.༢༢༠; པཱརཱ॰ ཨཊྛ॰ ༢.༡༦༥)།

    Asāraddhamhi kāyamhi, sukhumaṃ sampavattatī’’ti. (visuddhi. 1.220; pārā. aṭṭha. 2.165);

    པརིགྒཧེཔི ཨོལཱ༹རིཀོ, པཋམཛ྄ཛྷཱནཱུཔཙཱརེ སུཁུམོ། ཏསྨིམྤི ཨོལཱ༹རིཀོ, པཋམཛ྄ཛྷཱནེ སུཁུམོ། པཋམཛ྄ཛྷཱནེ ཙ དུཏིཡཛ྄ཛྷཱནཱུཔཙཱརེ ཙ ཨོལཱ༹རིཀོ, དུཏིཡཛ྄ཛྷཱནེ སུཁུམོ། དུཏིཡཛ྄ཛྷཱནེ ཙ ཏཏིཡཛ྄ཛྷཱནཱུཔཙཱརེ ཙ ཨོལཱ༹རིཀོ, ཏཏིཡཛ྄ཛྷཱནེ སུཁུམོ། ཏཏིཡཛ྄ཛྷཱནེ ཙ ཙཏུཏྠཛ྄ཛྷཱནཱུཔཙཱརེ ཙ ཨོལཱ༹རིཀོ, ཙཏུཏྠཛ྄ཛྷཱནེ ཨཏིསུཁུམོ ཨཔྤཝཏྟིམེཝ པཱཔུཎཱཏི། ཨིདཾ ཏཱཝ དཱིགྷབྷཱཎཀསཾཡུཏྟབྷཱཎཀཱནཾ མཏཾ།

    Pariggahepi oḷāriko, paṭhamajjhānūpacāre sukhumo. Tasmimpi oḷāriko, paṭhamajjhāne sukhumo. Paṭhamajjhāne ca dutiyajjhānūpacāre ca oḷāriko, dutiyajjhāne sukhumo. Dutiyajjhāne ca tatiyajjhānūpacāre ca oḷāriko, tatiyajjhāne sukhumo. Tatiyajjhāne ca catutthajjhānūpacāre ca oḷāriko, catutthajjhāne atisukhumo appavattimeva pāpuṇāti. Idaṃ tāva dīghabhāṇakasaṃyuttabhāṇakānaṃ mataṃ.

    མཛ྄ཛྷིམབྷཱཎཀཱ པན ‘‘པཋམཛ྄ཛྷཱནེ ཨོལཱ༹རིཀོ, དུཏིཡཛ྄ཛྷཱནཱུཔཙཱརེ སུཁུམོ’’ཏི ཨེཝཾ ཧེཊྛིམཧེཊྛིམཛ྄ཛྷཱནཏོ ཨུཔརཱུཔརིཛ྄ཛྷཱནཱུཔཙཱརེཔི སུཁུམཏརཾ ཨིཙྪནྟི། སབྦེསཾཡེཝ པན མཏེན ཨཔརིགྒཧིཏཀཱལེ པཝཏྟཀཱཡསངྑཱརོ པརིགྒཧིཏཀཱལེ པཊིཔྤསྶམྦྷཏི, པརིགྒཧིཏཀཱལེ པཝཏྟཀཱཡསངྑཱརོ པཋམཛ྄ཛྷཱནཱུཔཙཱརེ…པེ॰… ཙཏུཏྠཛ྄ཛྷཱནཱུཔཙཱརེ པཝཏྟཀཱཡསངྑཱརོ ཙཏུཏྠཛ྄ཛྷཱནེ པཊིཔྤསྶམྦྷཏི། ཨཡཾ ཏཱཝ སམཐེ ནཡོ།

    Majjhimabhāṇakā pana ‘‘paṭhamajjhāne oḷāriko, dutiyajjhānūpacāre sukhumo’’ti evaṃ heṭṭhimaheṭṭhimajjhānato uparūparijjhānūpacārepi sukhumataraṃ icchanti. Sabbesaṃyeva pana matena apariggahitakāle pavattakāyasaṅkhāro pariggahitakāle paṭippassambhati, pariggahitakāle pavattakāyasaṅkhāro paṭhamajjhānūpacāre…pe… catutthajjhānūpacāre pavattakāyasaṅkhāro catutthajjhāne paṭippassambhati. Ayaṃ tāva samathe nayo.

    ཝིཔསྶནཱཡཾ པན ཨཔརིགྒཧིཏཀཱལེ པཝཏྟཀཱཡསངྑཱརོ ཨོལཱ༹རིཀོ, མཧཱབྷཱུཏཔརིགྒཧེ སུཁུམོ། སོཔི ཨོལཱ༹རིཀོ, ཨུཔཱདཱརཱུཔཔརིགྒཧེ སུཁུམོ། སོཔི ཨོལཱ༹རིཀོ, སཀལརཱུཔཔརིགྒཧེ སུཁུམོ། སོཔི ཨོལཱ༹རིཀོ, ཨརཱུཔཔརིགྒཧེ སུཁུམོ། སོཔི ཨོལཱ༹རིཀོ, རཱུཔཱརཱུཔཔརིགྒཧེ སུཁུམོ། སོཔི ཨོལཱ༹རིཀོ, པཙྩཡཔརིགྒཧེ སུཁུམོ། སོཔི ཨོལཱ༹རིཀོ, སཔྤཙྩཡནཱམརཱུཔདསྶནེ སུཁུམོ། སོཔི ཨོལཱ༹རིཀོ, ལཀྑཎཱརམྨཎིཀ ཝིཔསྶནཱཡ སུཁུམོ། སོཔི དུབྦལཝིཔསྶནཱཡ ཨོལཱ༹རིཀོ, བལཝཝིཔསྶནཱཡ སུཁུམོ། ཏཏྠ པུབྦེ ཝུཏྟནཡེནེཝ པུརིམསྶ པུརིམསྶ པཙྪིམེན པཙྪིམེན པཊིཔྤསྶདྡྷི ཝེདིཏབྦཱ། ཨེཝམེཏྠ ཨོལཱ༹རིཀསུཁུམཏཱ པཊིཔྤསྶདྡྷི ཙ ཝེདིཏབྦཱ། ཨཡཾ ཏཱཝེཏྠ ཀཱཡཱནུཔསྶནཱཝསེན ཝུཏྟསྶ པཋམཙཏུཀྐསྶ ཨནུཔུབྦཔདཝཎྞནཱ།

    Vipassanāyaṃ pana apariggahitakāle pavattakāyasaṅkhāro oḷāriko, mahābhūtapariggahe sukhumo. Sopi oḷāriko, upādārūpapariggahe sukhumo. Sopi oḷāriko, sakalarūpapariggahe sukhumo. Sopi oḷāriko, arūpapariggahe sukhumo. Sopi oḷāriko, rūpārūpapariggahe sukhumo. Sopi oḷāriko, paccayapariggahe sukhumo. Sopi oḷāriko, sappaccayanāmarūpadassane sukhumo. Sopi oḷāriko, lakkhaṇārammaṇika vipassanāya sukhumo. Sopi dubbalavipassanāya oḷāriko, balavavipassanāya sukhumo. Tattha pubbe vuttanayeneva purimassa purimassa pacchimena pacchimena paṭippassaddhi veditabbā. Evamettha oḷārikasukhumatā paṭippassaddhi ca veditabbā. Ayaṃ tāvettha kāyānupassanāvasena vuttassa paṭhamacatukkassa anupubbapadavaṇṇanā.

    ཡསྨཱ པནེཏྠ ཨིདམེཝ ཙཏུཀྐཾ ཨཱདིཀམྨིཀསྶ ཀམྨཊྛཱནཝསེན ཝུཏྟཾ, ཨིཏརཱནི པན ཏཱིཎི ཙཏུཀྐཱནི ཨེཏྠ པཏྟཛ྄ཛྷཱནསྶ ཝེདནཱཙིཏྟདྷམྨཱནུཔསྶནཱཝསེན, ཏསྨཱ ཨིམཾ ཀམྨཊྛཱནཾ བྷཱཝེཏྭཱ ཨཱནཱཔཱནཙཏུཀྐཛ྄ཛྷཱནཔདཊྛཱནཱཡ ཝིཔསྶནཱཡ སཧ པཊིསམྦྷིདཱཧི ཨརཧཏྟཾ པཱཔུཎིཏུཀཱམེན ཨཱདིཀམྨིཀེན ཀུལཔུཏྟེན ཝིསུདྡྷིམགྒེ ཝུཏྟནཡེན སཱིལཔརིསོདྷནཱདཱིནི སབྦཀིཙྩཱནི ཀཏྭཱ སཏྟངྒསམནྣཱགཏསྶ ཨཱཙརིཡསྶ སནྟིཀེ པཉྩསནྡྷིཀཾ ཀམྨཊྛཱནཾ ཨུགྒཧེཏབྦཾ། ཏཏྲིམེ པཉྩ སནྡྷཡོ ཨུགྒཧོ པརིཔུཙྪཱ ཨུཔཊྛཱནཾ ཨཔྤནཱ ལཀྑཎནྟི། ཏཏྠ ཨུགྒཧོ ནཱམ ཀམྨཊྛཱནསྶ ཨུགྒཎྷནཾ། པརིཔུཙྪཱ ནཱམ ཀམྨཊྛཱནསྶ པརིཔུཙྪནཾ། ཨུཔཊྛཱནཾ ནཱམ ཀམྨཊྛཱནསྶ ཨུཔཊྛཱནཾ། ཨཔྤནཱ ནཱམ ཀམྨཊྛཱནསྶ ཨཔྤནཱ། ལཀྑཎཾ ནཱམ ཀམྨཊྛཱནསྶ ལཀྑཎཾ, ‘‘ཨེཝཾ ལཀྑཎམིདཾ ཀམྨཊྛཱན’’ནྟི ཀམྨཊྛཱནསབྷཱཝཱུཔདྷཱརཎནྟི ཝུཏྟཾ ཧོཏི།

    Yasmā panettha idameva catukkaṃ ādikammikassa kammaṭṭhānavasena vuttaṃ, itarāni pana tīṇi catukkāni ettha pattajjhānassa vedanācittadhammānupassanāvasena, tasmā imaṃ kammaṭṭhānaṃ bhāvetvā ānāpānacatukkajjhānapadaṭṭhānāya vipassanāya saha paṭisambhidāhi arahattaṃ pāpuṇitukāmena ādikammikena kulaputtena visuddhimagge vuttanayena sīlaparisodhanādīni sabbakiccāni katvā sattaṅgasamannāgatassa ācariyassa santike pañcasandhikaṃ kammaṭṭhānaṃ uggahetabbaṃ. Tatrime pañca sandhayo uggaho paripucchā upaṭṭhānaṃ appanā lakkhaṇanti. Tattha uggaho nāma kammaṭṭhānassa uggaṇhanaṃ. Paripucchā nāma kammaṭṭhānassa paripucchanaṃ. Upaṭṭhānaṃ nāma kammaṭṭhānassa upaṭṭhānaṃ. Appanā nāma kammaṭṭhānassa appanā. Lakkhaṇaṃ nāma kammaṭṭhānassa lakkhaṇaṃ, ‘‘evaṃ lakkhaṇamidaṃ kammaṭṭhāna’’nti kammaṭṭhānasabhāvūpadhāraṇanti vuttaṃ hoti.

    ཨེཝཾ པཉྩསནྡྷིཀཾ ཀམྨཊྛཱནཾ ཨུགྒཎྷནྟོ ཨཏྟནཱཔི ན ཀིལམཏི, ཨཱཙརིཡམྤི ན ཝིཧེསེཏི། ཏསྨཱ ཐོཀཾ ཨུདྡིསཱཔེཏྭཱ བཧུཾ ཀཱལཾ སཛ྄ཛྷཱཡིཏྭཱ ཨེཝཾ པཉྩསནྡྷིཀཾ ཀམྨཊྛཱནཾ ཨུགྒཧེཏྭཱ ཨཱཙརིཡསྶ སནྟིཀེ ཝཱ ཨཉྙཏྠ ཝཱ ཨཊྛཱརས དོསཡུཏྟེ ཝིཧཱརེ ཝཛྫེཏྭཱ པཉྩངྒསམནྣཱགཏེ སེནཱསནེ ཝསནྟེན ཨུཔཙྪིནྣཁུདྡཀཔལིབོདྷེན ཀཏབྷཏྟཀིཙྩེན བྷཏྟསམྨདཾ པཊིཝིནོདེཏྭཱ སུཁནིསིནྣེན རཏནཏྟཡགུཎཱནུསྶརཎེན ཙིཏྟཾ སམྤཧཾསེཏྭཱ ཨཱཙརིཡུགྒཧཏོ ཨེཀཔདམྤི ཨཔརིཧཱཔེནྟེན ཨིདཾ ཨཱནཱཔཱནསྶཏིཀམྨཊྛཱནཾ མནསི ཀཱཏབྦཾ། ཏཏྲཱཡཾ མནསིཀཱརཝིདྷི –

    Evaṃ pañcasandhikaṃ kammaṭṭhānaṃ uggaṇhanto attanāpi na kilamati, ācariyampi na viheseti. Tasmā thokaṃ uddisāpetvā bahuṃ kālaṃ sajjhāyitvā evaṃ pañcasandhikaṃ kammaṭṭhānaṃ uggahetvā ācariyassa santike vā aññattha vā aṭṭhārasa dosayutte vihāre vajjetvā pañcaṅgasamannāgate senāsane vasantena upacchinnakhuddakapalibodhena katabhattakiccena bhattasammadaṃ paṭivinodetvā sukhanisinnena ratanattayaguṇānussaraṇena cittaṃ sampahaṃsetvā ācariyuggahato ekapadampi aparihāpentena idaṃ ānāpānassatikammaṭṭhānaṃ manasi kātabbaṃ. Tatrāyaṃ manasikāravidhi –

    ‘‘གཎནཱ ཨནུབནྡྷནཱ, ཕུསནཱ ཋཔནཱ སལླཀྑཎཱ།

    ‘‘Gaṇanā anubandhanā, phusanā ṭhapanā sallakkhaṇā;

    ཝིཝཊྚནཱ པཱརིསུདྡྷི, ཏེསཉྩ པཊིཔསྶནཱ’’ཏི༎

    Vivaṭṭanā pārisuddhi, tesañca paṭipassanā’’ti.

    ཏཏྠ གཎནཱཏི གཎནཱཡེཝ། ཨནུབནྡྷནཱཏི ཨནུགམནཱ། ཕུསནཱཏི ཕུཊྛཊྛཱནཾ། ཋཔནཱཏི ཨཔྤནཱ། སལླཀྑཎཱཏི ཝིཔསྶནཱ། ཝིཝཊྚནཱཏི མགྒོ། པཱརིསུདྡྷཱིཏི ཕལཾ། ཏེསཉྩ པཊིཔསྶནཱཏི པཙྩཝེཀྑཎཱ། ཏཏྠ ཨིམིནཱ ཨཱདིཀམྨིཀེན ཀུལཔུཏྟེན པཋམཾ གཎནཱཡ ཨིདཾ ཀམྨཊྛཱནཾ མནསི ཀཱཏབྦཾ། གཎེནྟེན པན པཉྩནྣཾ ཧེཊྛཱ ན ཋཔེཏབྦཾ, དསནྣཾ ཨུཔརི ན ནེཏབྦཾ, ཨནྟརཱ ཁཎྜཾ ན དསྶེཏབྦཾ། པཉྩནྣཾ ཧེཊྛཱ ཋཔེནྟསྶ ཧི སམྦཱདྷེ ཨོཀཱསེ ཙིཏྟུཔྤཱདོ ཝིཔྥནྡཏི སམྦཱདྷེ ཝཛེ སནྣིརུདྡྷགོགཎོ ཝིཡ། དསནྣཾ ཨུཔརི ནེནྟསྶ གཎནནིསྶིཏོཝ ཙིཏྟུཔྤཱདོ ཧོཏི། ཨནྟརཱ ཁཎྜཾ དསྶེནྟསྶ ‘‘སིཁཱཔྤཏྟཾ ནུ ཁོ མེ ཀམྨཊྛཱནཾ, ནོ’’ཏི ཙིཏྟཾ ཝིཀམྤཏི, ཏསྨཱ ཨེཏེ དོསེ ཝཛྫེཏྭཱ གཎེཏབྦཾ།

    Tattha gaṇanāti gaṇanāyeva. Anubandhanāti anugamanā. Phusanāti phuṭṭhaṭṭhānaṃ. Ṭhapanāti appanā. Sallakkhaṇāti vipassanā. Vivaṭṭanāti maggo. Pārisuddhīti phalaṃ. Tesañca paṭipassanāti paccavekkhaṇā. Tattha iminā ādikammikena kulaputtena paṭhamaṃ gaṇanāya idaṃ kammaṭṭhānaṃ manasi kātabbaṃ. Gaṇentena pana pañcannaṃ heṭṭhā na ṭhapetabbaṃ, dasannaṃ upari na netabbaṃ, antarā khaṇḍaṃ na dassetabbaṃ. Pañcannaṃ heṭṭhā ṭhapentassa hi sambādhe okāse cittuppādo vipphandati sambādhe vaje sanniruddhagogaṇo viya. Dasannaṃ upari nentassa gaṇananissitova cittuppādo hoti. Antarā khaṇḍaṃ dassentassa ‘‘sikhāppattaṃ nu kho me kammaṭṭhānaṃ, no’’ti cittaṃ vikampati, tasmā ete dose vajjetvā gaṇetabbaṃ.

    གཎེནྟེན ཙ པཋམཾ དནྡྷགཎནཱཡ དྷཉྙམཱཔཀགཎནཱཡ གཎེཏབྦཾ། དྷཉྙམཱཔཀོ ཧི ནཱལི༹ཾ པཱུརེཏྭཱ ‘‘ཨེཀ’’ནྟི ཝཏྭཱ ཨོཀིརཏི, པུན པཱུརེནྟོ ཀིཉྩི ཀཙཝརཾ དིསྭཱ ཚཌྜེནྟོ ‘‘ཨེཀཾ ཨེཀ’’ནྟི ཝདཏི། ཨེསེཝ ནཡོ དྭེ དྭེཏིཨཱདཱིསུ། ཨེཝམེཝཾ ཨིམིནཱཔི ཨསྶཱསཔསྶཱསེསུ ཡོ ཨུཔཊྛཱཏི, ཏཾ གཧེཏྭཱ ‘‘ཨེཀཾ ཨེཀ’’ནྟིཨཱདིཾ ཀཏྭཱ ཡཱཝ ‘‘དས དསཱ’’ཏི པཝཏྟམཱནཾ པཝཏྟམཱནཾ ཨུཔལཀྑེཏྭཱཝ གཎེཏབྦཾ། ཏསྶ ཨེཝཾ གཎཡཏོ ནིཀྑམནྟཱ ཙ པཝིསནྟཱ ཙ ཨསྶཱསཔསྶཱསཱ པཱཀཊཱ ཧོནྟི།

    Gaṇentena ca paṭhamaṃ dandhagaṇanāya dhaññamāpakagaṇanāya gaṇetabbaṃ. Dhaññamāpako hi nāḷiṃ pūretvā ‘‘eka’’nti vatvā okirati, puna pūrento kiñci kacavaraṃ disvā chaḍḍento ‘‘ekaṃ eka’’nti vadati. Eseva nayo dve dvetiādīsu. Evamevaṃ imināpi assāsapassāsesu yo upaṭṭhāti, taṃ gahetvā ‘‘ekaṃ eka’’ntiādiṃ katvā yāva ‘‘dasa dasā’’ti pavattamānaṃ pavattamānaṃ upalakkhetvāva gaṇetabbaṃ. Tassa evaṃ gaṇayato nikkhamantā ca pavisantā ca assāsapassāsā pākaṭā honti.

    ཨཐཱནེན ཏཾ དནྡྷགཎནཾ དྷཉྙམཱཔཀགཎནཾ པཧཱཡ སཱིགྷགཎནཱཡ གོཔཱལཀགཎནཱཡ གཎེཏབྦཾ། ཚེཀོ ཧི གོཔཱལཀོ སཀྑརཱདཡོ ཨུཙྪངྒེན གཧེཏྭཱ རཛྫུདཎྜཧཏྠོ པཱཏོཝ ཝཛཾ གནྟྭཱ གཱཝོ པིཊྛིཡཾ པཧརིཏྭཱ པལིགྷཏྠམྦྷམཏྠཀེ ནིསིནྣོ དྭཱརཾ པཏྟཾ པཏྟཾཡེཝ གཱཝཾ ‘‘ཨེཀོ དྭེ’’ཏི སཀྑརཾ ཁིཔིཏྭཱ ཁིཔིཏྭཱ གཎེཏི། ཏིཡཱམརཏྟིཾ སམྦཱདྷེ ཨོཀཱསེ དུཀྑཾ ཝུཏྠགོགཎོ ནིཀྑམནྟོ ཨཉྙམཉྙཾ ཨུཔནིགྷཾསནྟོ ཝེགེན ཝེགེན པུཉྫཔུཉྫོ ཧུཏྭཱ ནིཀྑམཏི། སོ ཝེགེན ཝེགེན ‘‘ཏཱིཎི ཙཏྟཱརི པཉྩ དསཱ’’ཏི གཎེཏིཡེཝ, ཨེཝམསྶཱཔི པུརིམནཡེན གཎཡཏོ ཨསྶཱསཔསྶཱསཱ པཱཀཊཱ ཧུཏྭཱ སཱིགྷཾ སཱིགྷཾ པུནཔྤུནཾ སཉྩརནྟི། ཏཏོ ཏེན ‘‘པུནཔྤུནཾ སཉྩརནྟཱི’’ཏི ཉཏྭཱ ཨནྟོ ཙ བཧི ཙ ཨགྒཧེཏྭཱ དྭཱརཔྤཏྟཾ དྭཱརཔྤཏྟཾཡེཝ གཧེཏྭཱ ‘‘ཨེཀོ དྭེ ཏཱིཎི ཙཏྟཱརི པཉྩ, ཨེཀོ དྭེ ཏཱིཎི ཙཏྟཱརི པཉྩ ཚ, ཨེཀོ དྭེ ཏཱིཎི ཙཏྟཱརི པཉྩ ཚ སཏྟ…པེ॰… ཨཊྛ ནཝ དསཱ’’ཏི སཱིགྷཾ སཱིགྷཾ གཎེཏབྦམེཝ། གཎནཱཔཊིབདྡྷེ ཧི ཀམྨཊྛཱནེ གཎནབལེནེཝ ཙིཏྟཾ ཨེཀགྒཾ ཧོཏི ཨརིཏྟུཔཏྠམྦྷནཝསེན ཙཎྜསོཏེ ནཱཝཱཋཔནམིཝ།

    Athānena taṃ dandhagaṇanaṃ dhaññamāpakagaṇanaṃ pahāya sīghagaṇanāya gopālakagaṇanāya gaṇetabbaṃ. Cheko hi gopālako sakkharādayo ucchaṅgena gahetvā rajjudaṇḍahattho pātova vajaṃ gantvā gāvo piṭṭhiyaṃ paharitvā palighatthambhamatthake nisinno dvāraṃ pattaṃ pattaṃyeva gāvaṃ ‘‘eko dve’’ti sakkharaṃ khipitvā khipitvā gaṇeti. Tiyāmarattiṃ sambādhe okāse dukkhaṃ vutthagogaṇo nikkhamanto aññamaññaṃ upanighaṃsanto vegena vegena puñjapuñjo hutvā nikkhamati. So vegena vegena ‘‘tīṇi cattāri pañca dasā’’ti gaṇetiyeva, evamassāpi purimanayena gaṇayato assāsapassāsā pākaṭā hutvā sīghaṃ sīghaṃ punappunaṃ sañcaranti. Tato tena ‘‘punappunaṃ sañcarantī’’ti ñatvā anto ca bahi ca aggahetvā dvārappattaṃ dvārappattaṃyeva gahetvā ‘‘eko dve tīṇi cattāri pañca, eko dve tīṇi cattāri pañca cha, eko dve tīṇi cattāri pañca cha satta…pe… aṭṭha nava dasā’’ti sīghaṃ sīghaṃ gaṇetabbameva. Gaṇanāpaṭibaddhe hi kammaṭṭhāne gaṇanabaleneva cittaṃ ekaggaṃ hoti arittupatthambhanavasena caṇḍasote nāvāṭhapanamiva.

    ཏསྶེཝཾ སཱིགྷཾ སཱིགྷཾ གཎཡཏོ ཀམྨཊྛཱནཾ ནིརནྟརཾ པཝཏྟཾ ཝིཡ ཧུཏྭཱ ཨུཔཊྛཱཏི། ཨཐ ‘‘ནིརནྟརཾ པཝཏྟཏཱི’’ཏི ཉཏྭཱ ཨནྟོ ཙ བཧི ཙ ཝཱཏཾ ཨཔརིགྒཧེཏྭཱ པུརིམནཡེནེཝ ཝེགེན ཝེགེན གཎེཏབྦཾ། ཨནྟོཔཝིསནཝཱཏེན ཧི སདྡྷིཾ ཙིཏྟཾ པཝེསཡཏོ ཨབྦྷནྟརཾ ཝཱཏབྦྷཱཧཏཾ མེདཔཱུརིཏཾ ཝིཡ ཧོཏི། བཧིནིཀྑམནཝཱཏེན སདྡྷིཾ ཙིཏྟཾ ནཱིཧརཏོ བཧིདྡྷཱ པུཐུཏྟཱརམྨཎེ ཙིཏྟཾ ཝིཀྑིཔཏི། ཕུཊྛཕུཊྛོཀཱསེ པན སཏིཾ ཋཔེཏྭཱ བྷཱཝེནྟསྶེཝ བྷཱཝནཱ སམྤཛྫཏི། ཏེན ཝུཏྟཾ – ‘‘ཨནྟོ ཙ བཧི ཙ ཝཱཏཾ ཨཔརིགྒཧེཏྭཱ པུརིམནཡེནེཝ ཝེགེན ཝེགེན གཎེཏབྦ’’ནྟི།

    Tassevaṃ sīghaṃ sīghaṃ gaṇayato kammaṭṭhānaṃ nirantaraṃ pavattaṃ viya hutvā upaṭṭhāti. Atha ‘‘nirantaraṃ pavattatī’’ti ñatvā anto ca bahi ca vātaṃ apariggahetvā purimanayeneva vegena vegena gaṇetabbaṃ. Antopavisanavātena hi saddhiṃ cittaṃ pavesayato abbhantaraṃ vātabbhāhataṃ medapūritaṃ viya hoti. Bahinikkhamanavātena saddhiṃ cittaṃ nīharato bahiddhā puthuttārammaṇe cittaṃ vikkhipati. Phuṭṭhaphuṭṭhokāse pana satiṃ ṭhapetvā bhāventasseva bhāvanā sampajjati. Tena vuttaṃ – ‘‘anto ca bahi ca vātaṃ apariggahetvā purimanayeneva vegena vegena gaṇetabba’’nti.

    ཀཱིཝཙིརཾ པནེཏཾ གཎེཏབྦནྟི? ཡཱཝ ཝིནཱ གཎནཱཡ ཨསྶཱསཔསྶཱསཱརམྨཎེ སཏི སནྟིཊྛཏི། བཧི ཝིསཊཝིཏཀྐཝིཙྪེདཾ ཀཏྭཱ ཨསྶཱསཔསྶཱསཱརམྨཎེ སཏི སཎྛཱཔནཏྠཾཡེཝ ཧི གཎནཱཏི།

    Kīvaciraṃ panetaṃ gaṇetabbanti? Yāva vinā gaṇanāya assāsapassāsārammaṇe sati santiṭṭhati. Bahi visaṭavitakkavicchedaṃ katvā assāsapassāsārammaṇe sati saṇṭhāpanatthaṃyeva hi gaṇanāti.

    ཨེཝཾ གཎནཱཡ མནསི ཀཏྭཱ ཨནུབནྡྷནཱཡ མནསི ཀཱཏབྦཾ། ཨནུབནྡྷནཱ ནཱམ གཎནཾ པཊིསཾཧརིཏྭཱ སཏིཡཱ ནིརནྟརཾ ཨསྶཱསཔསྶཱསཱནཾ ཨནུགམནཾ། ཏཉྩ ཁོ ན ཨཱདིམཛ྄ཛྷཔརིཡོསཱནཱནུགམནཝསེན། ཨཱདིམཛ྄ཛྷཔརིཡོསཱནཱནི ཏསྶཱནུགམནེ ཨཱདཱིནཝཱ ཙ ཧེཊྛཱ ཝུཏྟཱཡེཝ།

    Evaṃ gaṇanāya manasi katvā anubandhanāya manasi kātabbaṃ. Anubandhanā nāma gaṇanaṃ paṭisaṃharitvā satiyā nirantaraṃ assāsapassāsānaṃ anugamanaṃ. Tañca kho na ādimajjhapariyosānānugamanavasena. Ādimajjhapariyosānāni tassānugamane ādīnavā ca heṭṭhā vuttāyeva.

    ཏསྨཱ ཨནུབནྡྷནཱཡ མནསིཀརོནྟེན ན ཨཱདིམཛ྄ཛྷཔརིཡོསཱནཝསེན མནསི ཀཱཏབྦཾ, ཨཔིཙ ཁོ ཕུསནཱཝསེན ཙ ཋཔནཱཝསེན ཙ མནསི ཀཱཏབྦཾ། གཎནཱནུབནྡྷནཱཝསེན ཝིཡ ཧི ཕུསནཱཋཔནཱཝསེན ཝིསུཾ མནསིཀཱརོ ནཏྠི, ཕུཊྛཕུཊྛཊྛཱནེཡེཝ པན གཎེནྟོ གཎནཱཡ ཙ ཕུསནཱཡ ཙ མནསི ཀརོཏི, ཏཏྠེཝ གཎནཾ པཊིསཾཧརིཏྭཱ ཏེ སཏིཡཱ ཨནུབནྡྷནྟོ, ཨཔྤནཱཝསེན ཙ ཙིཏྟཾ ཋཔེནྟོ ‘‘ཨནུབནྡྷནཱཡ ཙ ཕུསནཱཡ ཙ ཋཔནཱཡ ཙ མནསི ཀརོཏཱི’’ཏི ཝུཙྩཏི། སྭཱཡམཏྠོ ཨཊྛཀཐཱསུ ཝུཏྟཔངྒུལ༹དོཝཱརིཀོཔམཱཧི ཨིདྷེཝ པཱལི༹ཡཾ ཝུཏྟཀཀཙཱུཔམཱཡ ཙ ཝེདིཏབྦོ།

    Tasmā anubandhanāya manasikarontena na ādimajjhapariyosānavasena manasi kātabbaṃ, apica kho phusanāvasena ca ṭhapanāvasena ca manasi kātabbaṃ. Gaṇanānubandhanāvasena viya hi phusanāṭhapanāvasena visuṃ manasikāro natthi, phuṭṭhaphuṭṭhaṭṭhāneyeva pana gaṇento gaṇanāya ca phusanāya ca manasi karoti, tattheva gaṇanaṃ paṭisaṃharitvā te satiyā anubandhanto, appanāvasena ca cittaṃ ṭhapento ‘‘anubandhanāya ca phusanāya ca ṭhapanāya ca manasi karotī’’ti vuccati. Svāyamattho aṭṭhakathāsu vuttapaṅguḷadovārikopamāhi idheva pāḷiyaṃ vuttakakacūpamāya ca veditabbo.

    ཏཏྲཱཡཾ པངྒུལོ༹པམཱ – སེཡྻཐཱཔི པངྒུལོ༹ དོལཱཡ ཀཱིལ༹ཏཾ མཱཏཱཔུཏྟཱནཾ དོལཾ ཁིཔིཏྭཱ ཏཏྠེཝ དོལཱཐམྦྷམཱུལེ ནིསིནྣོ ཀམེན ཨཱགཙྪནྟསྶ ཙ གཙྪནྟསྶ ཙ དོལཱཕལཀསྶ ཨུབྷོ ཀོཊིཡོ མཛ྄ཛྷཉྩ པསྶཏི, ན ཙ ཨུབྷོཀོཊིམཛ྄ཛྷཱནཾ དསྶནཏྠཾ བྱཱཝཊོ ཧོཏི, ཨེཝམེཝ བྷིཀྑུ སཏིཝསེན ཨུཔནིབནྡྷནཏྠམྦྷམཱུལེ ཋཏྭཱ ཨསྶཱསཔསྶཱསདོལཾ ཁིཔིཏྭཱ ཏཏྠེཝ ནིམིཏྟེ སཏིཡཱ ནིསཱིདནྟོ ཀམེན ཨཱགཙྪནྟཱནཉྩ གཙྪནྟཱནཉྩ ཕུཊྛཊྛཱནེ ཨསྶཱསཔསྶཱསཱནཾ ཨཱདིམཛ྄ཛྷཔརིཡོསཱནཾ སཏིཡཱ ཨནུགཙྪནྟོ ཏཏྠེཝ (ཝིསུདྡྷི॰ ༡.༢༢༥) ཙིཏྟཾ ཋཔེཏྭཱ པསྶཏི, ན ཙ ཏེསཾ དསྶནཏྠཾ བྱཱཝཊོ ཧོཏི། ཨཡཾ པངྒུལོ༹པམཱ།

    Tatrāyaṃ paṅguḷopamā – seyyathāpi paṅguḷo dolāya kīḷataṃ mātāputtānaṃ dolaṃ khipitvā tattheva dolāthambhamūle nisinno kamena āgacchantassa ca gacchantassa ca dolāphalakassa ubho koṭiyo majjhañca passati, na ca ubhokoṭimajjhānaṃ dassanatthaṃ byāvaṭo hoti, evameva bhikkhu sativasena upanibandhanatthambhamūle ṭhatvā assāsapassāsadolaṃ khipitvā tattheva nimitte satiyā nisīdanto kamena āgacchantānañca gacchantānañca phuṭṭhaṭṭhāne assāsapassāsānaṃ ādimajjhapariyosānaṃ satiyā anugacchanto tattheva (visuddhi. 1.225) cittaṃ ṭhapetvā passati, na ca tesaṃ dassanatthaṃ byāvaṭo hoti. Ayaṃ paṅguḷopamā.

    ཨཡཾ པན དོཝཱརིཀོཔམཱ – སེཡྻཐཱཔི དོཝཱརིཀོ ནགརསྶ ཨནྟོ ཙ བཧི ཙ པུརིསེ ‘‘ཀོ ཏྭཾ, ཀུཏོ ཝཱ ཨཱགཏོ, ཀུཧིཾ ཝཱ གཙྪསི, ཀིཾ ཝཱ ཏེ ཧཏྠེ’’ཏི ན ཝཱིམཾསཏི། ན ཧི ཏསྶ ཏེ བྷཱརཱ, དྭཱརཔྤཏྟཾ དྭཱརཔྤཏྟཾཡེཝ པན ཝཱིམཾསཏི, ཨེཝམེཝ ཨིམསྶ བྷིཀྑུནོ ཨནྟོཔཝིཊྛཝཱཏཱ ཙ བཧིནིཀྑནྟཝཱཏཱ ཙ ན བྷཱརཱ ཧོནྟི, དྭཱརཔྤཏྟཱ དྭཱརཔྤཏྟཱཡེཝ བྷཱརཱཏི ཨཡཾ དོཝཱརིཀོཔམཱ།

    Ayaṃ pana dovārikopamā – seyyathāpi dovāriko nagarassa anto ca bahi ca purise ‘‘ko tvaṃ, kuto vā āgato, kuhiṃ vā gacchasi, kiṃ vā te hatthe’’ti na vīmaṃsati. Na hi tassa te bhārā, dvārappattaṃ dvārappattaṃyeva pana vīmaṃsati, evameva imassa bhikkhuno antopaviṭṭhavātā ca bahinikkhantavātā ca na bhārā honti, dvārappattā dvārappattāyeva bhārāti ayaṃ dovārikopamā.

    ཀཀཙཱུཔམཱ པན ‘‘ནིམིཏྟཾ ཨསྶཱསཔསྶཱསཱ’’ཏིཨཱདིནཱ (པཊི॰ མ॰ ༡.༡༥༩) ནཡེན ཨིདྷ ཝུཏྟཱཡེཝ། ཨིདྷ པནསྶ ཨཱགཏཱགཏཝསེན ཨམནསིཀཱརམཏྟམེཝ པཡོཛནནྟི ཝེདིཏབྦཾ།

    Kakacūpamā pana ‘‘nimittaṃ assāsapassāsā’’tiādinā (paṭi. ma. 1.159) nayena idha vuttāyeva. Idha panassa āgatāgatavasena amanasikāramattameva payojananti veditabbaṃ.

    ཨིདཾ ཀམྨཊྛཱནཾ མནསིཀརོཏོ ཀསྶཙི ན ཙིརེནེཝ ནིམིཏྟཉྩ ཨུཔྤཛྫཏི, ཨཝསེསཛྷཱནངྒཔཊིམཎྜིཏཱ ཨཔྤནཱསངྑཱཏཱ ཋཔནཱ ཙ སམྤཛྫཏི། ཀསྶཙི པན གཎནཱཝསེནེཝ མནསིཀཱརཀཱལཏོ པབྷུཏི ཡཐཱ སཱརདྡྷཀཱཡསྶ མཉྩེ ཝཱ པཱིཋེ ཝཱ ནིསཱིདཏོ མཉྩཔཱིཋཾ ཨོནམཏི ཝིཀཱུཛཏི, པཙྩཏྠརཎཾ ཝལིཾ གཎྷཱཏི, ཨསཱརདྡྷཀཱཡསྶ པན ནིསཱིདཏོ ནེཝ མཉྩཔཱིཋཾ ཨོནམཏི ན ཝིཀཱུཛཏི, ན པཙྩཏྠརཎཾ ཝལིཾ གཎྷཱཏི, ཏཱུལཔིཙུཔཱུརིཏཾ ཝིཡ མཉྩཔཱིཋཾ ཧོཏི ། ཀསྨཱ? ཡསྨཱ ཨསཱརདྡྷོ ཀཱཡོ ལཧུཀོ ཧོཏི, ཨེཝམེཝཾ གཎནཱཝསེན མནསིཀཱརཀཱལཏོ པབྷུཏི ཨནུཀྐམཏོ ཨོལཱ༹རིཀཨསྶཱསཔསྶཱསནིརོདྷཝསེན ཀཱཡདརཐེ ཝཱུཔསནྟེ ཀཱཡོཔི ཙིཏྟམྤི ལཧུཀཾ ཧོཏི, སརཱིརཾ ཨཱཀཱསེ ལངྒྷནཱཀཱརཔྤཏྟཾ ཝིཡ ཧོཏི།

    Idaṃ kammaṭṭhānaṃ manasikaroto kassaci na cireneva nimittañca uppajjati, avasesajhānaṅgapaṭimaṇḍitā appanāsaṅkhātā ṭhapanā ca sampajjati. Kassaci pana gaṇanāvaseneva manasikārakālato pabhuti yathā sāraddhakāyassa mañce vā pīṭhe vā nisīdato mañcapīṭhaṃ onamati vikūjati, paccattharaṇaṃ valiṃ gaṇhāti, asāraddhakāyassa pana nisīdato neva mañcapīṭhaṃ onamati na vikūjati, na paccattharaṇaṃ valiṃ gaṇhāti, tūlapicupūritaṃ viya mañcapīṭhaṃ hoti . Kasmā? Yasmā asāraddho kāyo lahuko hoti, evamevaṃ gaṇanāvasena manasikārakālato pabhuti anukkamato oḷārikaassāsapassāsanirodhavasena kāyadarathe vūpasante kāyopi cittampi lahukaṃ hoti, sarīraṃ ākāse laṅghanākārappattaṃ viya hoti.

    ཏསྶ ཨོལཱ༹རིཀེ ཨསྶཱསཔསྶཱསེ ནིརུདྡྷེ སུཁུམཨསྶཱསཔསྶཱསནིམིཏྟཱརམྨཎཾ ཙིཏྟཾ པཝཏྟཏི ། ཏསྨིམྤི ནིརུདྡྷེ ཨཔརཱཔརཾ ཏཏོ སུཁུམཏརཾ སུཁུམཏརཾ ཨསྶཱསཔསྶཱསནིམིཏྟཱརམྨཎཾ པཝཏྟཏིཡེཝ། སྭཱཡམཏྠོ ཨུཔརི ཝུཏྟཀཾསཐཱལོཔམཱཡ ཝེདིཏབྦོ།

    Tassa oḷārike assāsapassāse niruddhe sukhumaassāsapassāsanimittārammaṇaṃ cittaṃ pavattati . Tasmimpi niruddhe aparāparaṃ tato sukhumataraṃ sukhumataraṃ assāsapassāsanimittārammaṇaṃ pavattatiyeva. Svāyamattho upari vuttakaṃsathālopamāya veditabbo.

    ཡཐཱ ཧི ཨཉྙཱནི ཀམྨཊྛཱནཱནི ཨུཔརཱུཔརི ཝིབྷཱུཏཱནི ཧོནྟི, ན ཏཐཱ ཨིདཾ། ཨིདཾ པན ཨུཔརཱུཔརི བྷཱཝེནྟསྶ སུཁུམཏྟཾ གཙྪཏི, ཨུཔཊྛཱནམྤི ན ཨུཔགཙྪཏི། ཨེཝཾ ཨནུཔཊྛཧནྟེ པན ཏསྨིཾ ཏེན བྷིཀྑུནཱ ‘‘ཨཱཙརིཡཾ པུཙྪིསྶཱམཱི’’ཏི ཝཱ ‘‘ནཊྛཾ དཱནི མེ ཀམྨཊྛཱན’’ནྟི ཝཱ ཨུཊྛཱཡཱསནཱ ན གནྟབྦཾ། ཨིརིཡཱཔཐཾ ཝིཀོཔེཏྭཱ གཙྪཏོ ཧི ཀམྨཊྛཱནཾ ནཝནཝམེཝ ཧོཏི། ཏསྨཱ ཡཐཱནིསིནྣེནེཝ དེསཏོ ཨཱཧརིཏབྦཾ།

    Yathā hi aññāni kammaṭṭhānāni uparūpari vibhūtāni honti, na tathā idaṃ. Idaṃ pana uparūpari bhāventassa sukhumattaṃ gacchati, upaṭṭhānampi na upagacchati. Evaṃ anupaṭṭhahante pana tasmiṃ tena bhikkhunā ‘‘ācariyaṃ pucchissāmī’’ti vā ‘‘naṭṭhaṃ dāni me kammaṭṭhāna’’nti vā uṭṭhāyāsanā na gantabbaṃ. Iriyāpathaṃ vikopetvā gacchato hi kammaṭṭhānaṃ navanavameva hoti. Tasmā yathānisinneneva desato āharitabbaṃ.

    ཏཏྲཱཡཾ ཨཱཧརཎཱུཔཱཡོ – ཏེན བྷིཀྑུནཱ ཀམྨཊྛཱནསྶ ཨནུཔཊྛཱནབྷཱཝཾ ཉཏྭཱ ཨིཏི པཊིསཉྩིཀྑིཏབྦཾ ‘‘ཨིམེ ཨསྶཱསཔསྶཱསཱ ནཱམ ཀཏྠ ཨཏྠི, ཀཏྠ ནཏྠི། ཀསྶ ཝཱ ཨཏྠི, ཀསྶ ཝཱ ནཏྠཱི’’ཏི། ཨཐེཝཾ པཊིསཉྩིཀྑཏོ ‘‘ཨིམེ ཨནྟོམཱཏུཀུཙྪིཡཾ ནཏྠི, ཨུདཀེ ནིམུགྒཱནཾ ནཏྠི, ཏཐཱ ཨསཉྙཱིབྷཱུཏཱནཾ མཏཱནཾ ཙཏུཏྠཛ྄ཛྷཱནསམཱཔནྣཱནཾ རཱུཔཱརཱུཔབྷཝསམངྒཱིནཾ ནིརོདྷསམཱཔནྣཱན’’ནྟི ཉཏྭཱ ཨེཝཾ ཨཏྟནཱཝ ཨཏྟཱ པཊིཙོདེཏབྦོ ‘‘ནནུ, ཏྭཾ པཎྜིཏ, ནེཝ མཱཏུཀུཙྪིགཏོ, ན ཨུདཀེ ནིམུགྒོ, ན ཨསཉྙཱིབྷཱུཏོ, ན མཏོ, ན ཙཏུཏྠཛ྄ཛྷཱནསམཱཔནྣོ, ན རཱུཔཱརཱུཔབྷཝསམངྒཱི, ན ནིརོདྷསམཱཔནྣོ། ཨཏྠིཡེཝ ཏེ ཨསྶཱསཔསྶཱསཱ, མནྡཔཉྙཏཱཡ པན པརིགྒཧེཏུཾ ན སཀྐོསཱི’’ཏི། ཨཐཱནེན པཀཏིཕུཊྛཝསེན ཙིཏྟཾ ཋཔེཏྭཱ མནསིཀཱརོ པཝཏྟེཏབྦོ། ཨིམེ ཧི དཱིགྷནཱསིཀསྶ ནཱསཱཔུཊཾ གྷཊྚེནྟཱ པཝཏྟནྟི, རསྶནཱསིཀསྶ ཨུཏྟརོཊྛཾ། ཏསྨཱནེན ཨིམཾ ནཱམ ཋཱནཾ གྷཊྚེནྟཱིཏི ནིམིཏྟཾ ཋཔེཏབྦཾ། ཨིམམེཝ ཧི ཨཏྠཝསཾ པཊིཙྩ ཝུཏྟཾ བྷགཝཏཱ – ‘‘ནཱཧཾ, བྷིཀྑཝེ, མུཊྛསྶཏིསྶ ཨསམྤཛཱནསྶ ཨཱནཱཔཱནསྶཏིབྷཱཝནཾ ཝདཱམཱི’’ཏི (མ॰ ནི॰ ༣.༡༤༩; སཾ॰ ནི॰ ༥.༩༩༢)། ཀིཉྩཱཔི ཧི ཡཾཀིཉྩི ཀམྨཊྛཱནཾ སཏསྶ སམྤཛཱནསྶེཝ སམྤཛྫཏི, ཨིཏོ ཨཉྙཾ པན མནསིཀརོནྟསྶ པཱཀཊཾ ཧོཏི། ཨིདཾ པན ཨཱནཱཔཱནསྶཏིཀམྨཊྛཱནཾ གརུཀཾ གརུཀབྷཱཝནཾ བུདྡྷཔཙྩེཀབུདྡྷབུདྡྷཔུཏྟཱནཾ མཧཱཔུརིསཱནཾཡེཝ མནསིཀཱརབྷཱུམིབྷཱུཏཾ, ན ཙེཝ ཨིཏྟརཾ, ན ཙ ཨིཏྟརསཏྟསམཱསེཝིཏཾ། ཡཐཱ ཡཐཱ མནསི ཀརཱིཡཏི, ཏཐཱ ཏཐཱ སནྟཉྩེཝ ཧོཏི སུཁུམཉྩ། ཏསྨཱ ཨེཏྠ བལཝཏཱི སཏི ཙ པཉྙཱ ཙ ཨིཙྪིཏབྦཱ།

    Tatrāyaṃ āharaṇūpāyo – tena bhikkhunā kammaṭṭhānassa anupaṭṭhānabhāvaṃ ñatvā iti paṭisañcikkhitabbaṃ ‘‘ime assāsapassāsā nāma kattha atthi, kattha natthi. Kassa vā atthi, kassa vā natthī’’ti. Athevaṃ paṭisañcikkhato ‘‘ime antomātukucchiyaṃ natthi, udake nimuggānaṃ natthi, tathā asaññībhūtānaṃ matānaṃ catutthajjhānasamāpannānaṃ rūpārūpabhavasamaṅgīnaṃ nirodhasamāpannāna’’nti ñatvā evaṃ attanāva attā paṭicodetabbo ‘‘nanu, tvaṃ paṇḍita, neva mātukucchigato, na udake nimuggo, na asaññībhūto, na mato, na catutthajjhānasamāpanno, na rūpārūpabhavasamaṅgī, na nirodhasamāpanno. Atthiyeva te assāsapassāsā, mandapaññatāya pana pariggahetuṃ na sakkosī’’ti. Athānena pakatiphuṭṭhavasena cittaṃ ṭhapetvā manasikāro pavattetabbo. Ime hi dīghanāsikassa nāsāpuṭaṃ ghaṭṭentā pavattanti, rassanāsikassa uttaroṭṭhaṃ. Tasmānena imaṃ nāma ṭhānaṃ ghaṭṭentīti nimittaṃ ṭhapetabbaṃ. Imameva hi atthavasaṃ paṭicca vuttaṃ bhagavatā – ‘‘nāhaṃ, bhikkhave, muṭṭhassatissa asampajānassa ānāpānassatibhāvanaṃ vadāmī’’ti (ma. ni. 3.149; saṃ. ni. 5.992). Kiñcāpi hi yaṃkiñci kammaṭṭhānaṃ satassa sampajānasseva sampajjati, ito aññaṃ pana manasikarontassa pākaṭaṃ hoti. Idaṃ pana ānāpānassatikammaṭṭhānaṃ garukaṃ garukabhāvanaṃ buddhapaccekabuddhabuddhaputtānaṃ mahāpurisānaṃyeva manasikārabhūmibhūtaṃ, na ceva ittaraṃ, na ca ittarasattasamāsevitaṃ. Yathā yathā manasi karīyati, tathā tathā santañceva hoti sukhumañca. Tasmā ettha balavatī sati ca paññā ca icchitabbā.

    ཡཐཱ ཧི མཊྛསཱཊཀསྶ ཏུནྣཀརཎཀཱལེ སཱུཙིཔི སུཁུམཱ ཨིཙྪིཏབྦཱ, སཱུཙིཔཱསཝེདྷནམྤི ཏཏོ སུཁུམཏརཾ, ཨེཝམེཝཾ མཊྛསཱཊཀསདིསསྶ ཨིམསྶ ཀམྨཊྛཱནསྶ བྷཱཝནཱཀཱལེ སཱུཙིཔཊིབྷཱགཱ སཏིཔི སཱུཙིཔཱསཝེདྷནཔཊིབྷཱགཱ ཏཾསམྤཡུཏྟཱ པཉྙཱཔི བལཝཏཱི ཨིཙྪིཏབྦཱ། ཏཱཧི ཙ པན སཏིཔཉྙཱཧི སམནྣཱགཏེན བྷིཀྑུནཱ ན ཏེ ཨསྶཱསཔསྶཱསཱ ཨཉྙཏྲ པཀཏིཕུཊྛོཀཱསཱ པརིཡེསིཏབྦཱ།

    Yathā hi maṭṭhasāṭakassa tunnakaraṇakāle sūcipi sukhumā icchitabbā, sūcipāsavedhanampi tato sukhumataraṃ, evamevaṃ maṭṭhasāṭakasadisassa imassa kammaṭṭhānassa bhāvanākāle sūcipaṭibhāgā satipi sūcipāsavedhanapaṭibhāgā taṃsampayuttā paññāpi balavatī icchitabbā. Tāhi ca pana satipaññāhi samannāgatena bhikkhunā na te assāsapassāsā aññatra pakatiphuṭṭhokāsā pariyesitabbā.

    ཡཐཱ ཧི ཀསྶཀོ ཁེཏྟཾ ཀསིཏྭཱ བལཱིབདྡེ མུཉྩིཏྭཱ གོཙརམུཁེ ཀཏྭཱ ཚཱཡཱཡ ནིསིནྣོ ཝིསྶམེཡྻ, ཨཐསྶ ཏེ བལཱིབདྡཱ ཝེགེན ཨཊཝིཾ པཝིསེཡྻུཾ། ཡོ ཧོཏི ཚེཀོ ཀསྶཀོ, སོ པུན ཏེ གཧེཏྭཱ ཡོཛེཏུཀཱམོ ན ཏེསཾ ཨནུཔདཾ གནྟྭཱ ཨཊཝིཾ ཨཱཧིཎྜཏི། ཨཐ ཁོ རསྨིཉྩ པཏོདཉྩ གཧེཏྭཱ ཨུཛུཀམེཝ ཏེསཾ ནིཔཱཏནཏིཏྠཾ གནྟྭཱ ནིསཱིདཏི ཝཱ ནིཔཛྫཏི ཝཱ། ཨཐ ཏེ གོཎེ དིཝསབྷཱགཾ ཙརིཏྭཱ ནིཔཱཏནཏིཏྠཾ ཨོཏརིཏྭཱ ནྷཏྭཱ ཙ པིཝིཏྭཱ ཙ པཙྩུཏྟརིཏྭཱ ཋིཏེ དིསྭཱ རསྨིཡཱ བནྡྷིཏྭཱ པཏོདེན ཝིཛ྄ཛྷནྟོ ཨཱནེཏྭཱ ཡོཛེཏྭཱ པུན ཀམྨཾ ཀརོཏི། ཨེཝམེཝཾ ཏེན བྷིཀྑུནཱ ན ཏེ ཨསྶཱསཔསྶཱསཱ ཨཉྙཏྲ པཀཏིཕུཊྛོཀཱསཱ པརིཡེསིཏབྦཱ། སཏིརསྨིཾ པན པཉྙཱཔཏོདཉྩ གཧེཏྭཱ པཀཏིཕུཊྛོཀཱསེ ཙིཏྟཾ ཋཔེཏྭཱ མནསིཀཱརོ པཝཏྟེཏབྦོ། ཨེཝཾ ཧིསྶ མནསིཀརོཏོ ན ཙིརསྶེཝ ཏེ ཨུཔཊྛཧནྟི ནིཔཱཏནཏིཏྠེ ཝིཡ གོཎཱ། ཏཏོ ཏེན སཏིརསྨིཡཱ བནྡྷིཏྭཱ ཏསྨིཾཡེཝ ཋཱནེ ཡོཛེཏྭཱ པཉྙཱཔཏོདེན ཝིཛ྄ཛྷནྟེན པུནཔྤུནཾ ཀམྨཊྛཱནཾ ཨནུཡུཉྫིཏབྦཾ། ཏསྶེཝམནུཡུཉྫཏོ ན ཙིརསྶེཝ ནིམིཏྟཾ ཨུཔཊྛཱཏི། ཏཾ པནེཏཾ ན སབྦེསཾ ཨེཀསདིསཾ ཧོཏི, ཨཔིཙ ཁོ ཀསྶཙི སུཁསམྥསྶཾ ཨུཔྤཱདཡམཱནོ ཏཱུལཔིཙུ ཝིཡ ཀཔྤཱསཔིཙུ ཝིཡ ཝཱཏདྷཱརཱ ཝིཡ ཙ ཨུཔཊྛཱཏཱིཏི ཨེཀཙྩེ ཨཱཧུ།

    Yathā hi kassako khettaṃ kasitvā balībadde muñcitvā gocaramukhe katvā chāyāya nisinno vissameyya, athassa te balībaddā vegena aṭaviṃ paviseyyuṃ. Yo hoti cheko kassako, so puna te gahetvā yojetukāmo na tesaṃ anupadaṃ gantvā aṭaviṃ āhiṇḍati. Atha kho rasmiñca patodañca gahetvā ujukameva tesaṃ nipātanatitthaṃ gantvā nisīdati vā nipajjati vā. Atha te goṇe divasabhāgaṃ caritvā nipātanatitthaṃ otaritvā nhatvā ca pivitvā ca paccuttaritvā ṭhite disvā rasmiyā bandhitvā patodena vijjhanto ānetvā yojetvā puna kammaṃ karoti. Evamevaṃ tena bhikkhunā na te assāsapassāsā aññatra pakatiphuṭṭhokāsā pariyesitabbā. Satirasmiṃ pana paññāpatodañca gahetvā pakatiphuṭṭhokāse cittaṃ ṭhapetvā manasikāro pavattetabbo. Evaṃ hissa manasikaroto na cirasseva te upaṭṭhahanti nipātanatitthe viya goṇā. Tato tena satirasmiyā bandhitvā tasmiṃyeva ṭhāne yojetvā paññāpatodena vijjhantena punappunaṃ kammaṭṭhānaṃ anuyuñjitabbaṃ. Tassevamanuyuñjato na cirasseva nimittaṃ upaṭṭhāti. Taṃ panetaṃ na sabbesaṃ ekasadisaṃ hoti, apica kho kassaci sukhasamphassaṃ uppādayamāno tūlapicu viya kappāsapicu viya vātadhārā viya ca upaṭṭhātīti ekacce āhu.

    ཨཡཾ པན ཨཊྛཀཐཱསུ ཝིནིཙྪཡོ – ཨིདཉྷི ཀསྶཙི ཏཱརཀརཱུཔཾ ཝིཡ མཎིགུལི༹ཀཱ ཝིཡ མུཏྟཱགུལི༹ཀཱ ཝིཡ ཙ, ཀསྶཙི ཁརསམྥསྶཾ ཧུཏྭཱ ཀཔྤཱསཊྛི ཝིཡ དཱརུསཱརསཱུཙི ཝིཡ ཙ, ཀསྶཙི དཱིགྷཔཱམངྒསུཏྟཾ ཝིཡ ཀུསུམདཱམཾ ཝིཡ དྷཱུམསིཁཱ ཝིཡ ཙ, ཀསྶཙི ཝིཏྠཏཾ མཀྐཊཀསུཏྟཾ ཝིཡ ཝལཱཧཀཔཊལཾ ཝིཡ པདུམཔུཔྥཾ ཝིཡ རཐཙཀྐཾ ཝིཡ ཙནྡམཎྜལཾ ཝིཡ སཱུརིཡམཎྜལཾ ཝིཡ ཙ ཨུཔཊྛཱཏི, ཏཉྩ པནེཏཾ ཡཐཱ སམྦཧུལེསུ བྷིཀྑཱུསུ སུཏྟནྟཾ སཛ྄ཛྷཱཡིཏྭཱ ནིསིནྣེསུ ཨེཀེན བྷིཀྑུནཱ ‘‘ཏུམྷཱཀཾ ཀཱིདིསཾ ཧུཏྭཱ ཨིདཾ སུཏྟཾ ཨུཔཊྛཱཏཱི’’ཏི ཝུཏྟེ ཨེཀོ ‘‘མཡ྄ཧཾ མཧཏཱི པབྦཏེཡྻཱ ནདཱི ཝིཡ ཧུཏྭཱ ཨུཔཊྛཱཏཱི’’ཏི ཨཱཧ། ཨཔརོ ‘‘མཡ྄ཧཾ ཨེཀཱ ཝནརཱཛི ཝིཡ’’། ཨཉྙོ ‘‘མཡ྄ཧཾ ཨེཀོ སཱིཏཙྪཱཡོ སཱཁཱསམྤནྣོ ཕལབྷཱརབྷརིཏོ རུཀྑོ ཝིཡཱ’’ཏི། ཏེསཉྷི ཏཾ ཨེཀམེཝ སུཏྟཾ སཉྙཱནཱནཏཱཡ ནཱནཏོ ཨུཔཊྛཱཏི། ཨེཝཾ ཨེཀམེཝ ཀམྨཊྛཱནཾ སཉྙཱནཱནཏཱཡ ནཱནཏོ ཨུཔཊྛཱཏི། སཉྙཛཉྷི ཨེཏཾ སཉྙཱནིདཱནཾ སཉྙཱཔབྷཝཾ, ཏསྨཱ སཉྙཱནཱནཏཱཡ ནཱནཏོ ཨུཔཊྛཱཏཱིཏི ཝེདིཏབྦཾ།

    Ayaṃ pana aṭṭhakathāsu vinicchayo – idañhi kassaci tārakarūpaṃ viya maṇiguḷikā viya muttāguḷikā viya ca, kassaci kharasamphassaṃ hutvā kappāsaṭṭhi viya dārusārasūci viya ca, kassaci dīghapāmaṅgasuttaṃ viya kusumadāmaṃ viya dhūmasikhā viya ca, kassaci vitthataṃ makkaṭakasuttaṃ viya valāhakapaṭalaṃ viya padumapupphaṃ viya rathacakkaṃ viya candamaṇḍalaṃ viya sūriyamaṇḍalaṃ viya ca upaṭṭhāti, tañca panetaṃ yathā sambahulesu bhikkhūsu suttantaṃ sajjhāyitvā nisinnesu ekena bhikkhunā ‘‘tumhākaṃ kīdisaṃ hutvā idaṃ suttaṃ upaṭṭhātī’’ti vutte eko ‘‘mayhaṃ mahatī pabbateyyā nadī viya hutvā upaṭṭhātī’’ti āha. Aparo ‘‘mayhaṃ ekā vanarāji viya’’. Añño ‘‘mayhaṃ eko sītacchāyo sākhāsampanno phalabhārabharito rukkho viyā’’ti. Tesañhi taṃ ekameva suttaṃ saññānānatāya nānato upaṭṭhāti. Evaṃ ekameva kammaṭṭhānaṃ saññānānatāya nānato upaṭṭhāti. Saññajañhi etaṃ saññānidānaṃ saññāpabhavaṃ, tasmā saññānānatāya nānato upaṭṭhātīti veditabbaṃ.

    ཨེཝཾ ཨུཔཊྛིཏེ པན ནིམིཏྟེ ཏེན བྷིཀྑུནཱ ཨཱཙརིཡསྶ སནྟིཀཾ གནྟྭཱ ཨཱརོཙེཏབྦཾ ‘‘མཡ྄ཧཾ, བྷནྟེ, ཨེཝརཱུཔཾ ནཱམ ཨུཔཊྛཱཏཱི’’ཏི། ཨཱཙརིཡེན པན ‘‘ནིམིཏྟམིདཾ, ཨཱཝུསོ, ཀམྨཊྛཱནཾ པུནཔྤུནཾ མནསི ཀརོཧི སཔྤུརིསཱ’’ཏི ཝཏྟབྦོ། ཨཐཱནེན ནིམིཏྟེཡེཝ ཙིཏྟཾ ཋཔེཏབྦཾ། ཨེཝམསྶཱཡཾ ཨིཏོ པབྷུཏི ཋཔནཱཝསེན བྷཱཝནཱ ཧོཏི། ཝུཏྟཉྷེཏཾ པོརཱཎེཧི –

    Evaṃ upaṭṭhite pana nimitte tena bhikkhunā ācariyassa santikaṃ gantvā ārocetabbaṃ ‘‘mayhaṃ, bhante, evarūpaṃ nāma upaṭṭhātī’’ti. Ācariyena pana ‘‘nimittamidaṃ, āvuso, kammaṭṭhānaṃ punappunaṃ manasi karohi sappurisā’’ti vattabbo. Athānena nimitteyeva cittaṃ ṭhapetabbaṃ. Evamassāyaṃ ito pabhuti ṭhapanāvasena bhāvanā hoti. Vuttañhetaṃ porāṇehi –

    ‘‘ནིམིཏྟེ ཋཔཡཾ ཙིཏྟཾ, ནཱནཱཀཱརཾ ཝིབྷཱཝཡཾ།

    ‘‘Nimitte ṭhapayaṃ cittaṃ, nānākāraṃ vibhāvayaṃ;

    དྷཱིརོ ཨསྶཱསཔསྶཱསེ, སཀཾ ཙིཏྟཾ ནིབནྡྷཏཱི’’ཏི༎ (པཱརཱ॰ ཨཊྛ॰ ༢.༡༦༥; ཝིསུདྡྷི॰ ༡.༢༣༢)།

    Dhīro assāsapassāse, sakaṃ cittaṃ nibandhatī’’ti. (pārā. aṭṭha. 2.165; visuddhi. 1.232);

    ཏསྶེཝཾ ནིམིཏྟུཔཊྛཱནཏོ པབྷུཏི ནཱིཝརཎཱནི ཝིཀྑམྦྷིཏཱནེཝ ཧོནྟི, ཀིལེསཱ སནྣིསིནྣཱཝ, ཙིཏྟཾ ཨུཔཙཱརསམཱདྷིནཱ སམཱཧིཏམེཝ། ཨཐཱནེན ཏཾ ནིམིཏྟཾ ནེཝ ཝཎྞཏོ མནསི ཀཱཏབྦཾ, ན ལཀྑཎཏོ པཙྩཝེཀྑིཏབྦཾ, ཨཔིཙ ཁོ ཁཏྟིཡམཧེསིཡཱ ཙཀྐཝཏྟིགབྦྷོ ཝིཡ ཀསྶཀེན སཱལིཡཝགབྦྷོ ཝིཡ ཙ ཨཱཝཱསཱདཱིནི སཏྟ ཨསཔྤཱཡཱནི ཝཛྫེཏྭཱ ཏཱནེཝ སཏྟ སཔྤཱཡཱནི སེཝནྟེན སཱདྷུཀཾ རཀྑིཏབྦཾ, ཨཐ ནཾ ཨེཝཾ རཀྑིཏྭཱ པུནཔྤུནཾ མནསིཀཱརཝསེན ཝུདྡྷིཾ ཝིརཱུལ༹ྷིཾ གམཡིཏྭཱ དསཝིདྷཾ ཨཔྤནཱཀོསལླཾ སམྤཱདེཏབྦཾ, ཝཱིརིཡསམཏཱ ཡོཛེཏབྦཱ། ཏསྶེཝཾ གྷཊེནྟསྶ ཝིསུདྡྷིམགྒེ ཝུཏྟཱནུཀྐམེན ཏསྨིཾ ནིམིཏྟེ ཙཏུཀྐཔཉྩཀཛ྄ཛྷཱནཱནི ནིབྦཏྟནྟི། ཨེཝཾ ནིབྦཏྟཙཏུཀྐཔཉྩཀཛ྄ཛྷཱནོ པནེཏྠ བྷིཀྑུ སལླཀྑཎཱཝིཝཊྚནཱཝསེན ཀམྨཊྛཱནཾ ཝཌྜྷེཏྭཱ པཱརིསུདྡྷིཾ པཏྟུཀཱམོ ཏདེཝ ཛྷཱནཾ པཉྩཧཱཀཱརེཧི ཝསིཔྤཏྟཾ པགུཎཾ ཀཏྭཱ ནཱམརཱུཔཾ ཝཝཏྠཔེཏྭཱ ཝིཔསྶནཾ པཊྛཔེཏི། ཀཐཾ? སོ ཧི སམཱཔཏྟིཏོ ཝུཊྛཱཡ ཨསྶཱསཔསྶཱསཱནཾ སམུདཡོ ཀརཛཀཱཡོ ཙ ཙིཏྟཉྩཱཏི པསྶཏི། ཡཐཱ ཧི ཀམྨཱརགགྒརིཡཱ དྷམམཱནཱཡ བྷསྟཉྩ པུརིསསྶ ཙ ཏཛྫཾ ཝཱཡཱམཾ པཊིཙྩ ཝཱཏོ སཉྩརཏི, ཨེཝམེཝཾ ཀཱཡཉྩ ཙིཏྟཉྩ པཊིཙྩ ཨསྶཱསཔསྶཱསཱཏི། ཏཏོ ཨསྶཱསཔསྶཱསེ ཙ ཀཱཡཉྩ རཱུཔནྟི, ཙིཏྟཉྩ ཏཾསམྤཡུཏྟེ ཙ དྷམྨེ ཨརཱུཔནྟི ཝཝཏྠཔེཏི།

    Tassevaṃ nimittupaṭṭhānato pabhuti nīvaraṇāni vikkhambhitāneva honti, kilesā sannisinnāva, cittaṃ upacārasamādhinā samāhitameva. Athānena taṃ nimittaṃ neva vaṇṇato manasi kātabbaṃ, na lakkhaṇato paccavekkhitabbaṃ, apica kho khattiyamahesiyā cakkavattigabbho viya kassakena sāliyavagabbho viya ca āvāsādīni satta asappāyāni vajjetvā tāneva satta sappāyāni sevantena sādhukaṃ rakkhitabbaṃ, atha naṃ evaṃ rakkhitvā punappunaṃ manasikāravasena vuddhiṃ virūḷhiṃ gamayitvā dasavidhaṃ appanākosallaṃ sampādetabbaṃ, vīriyasamatā yojetabbā. Tassevaṃ ghaṭentassa visuddhimagge vuttānukkamena tasmiṃ nimitte catukkapañcakajjhānāni nibbattanti. Evaṃ nibbattacatukkapañcakajjhāno panettha bhikkhu sallakkhaṇāvivaṭṭanāvasena kammaṭṭhānaṃ vaḍḍhetvā pārisuddhiṃ pattukāmo tadeva jhānaṃ pañcahākārehi vasippattaṃ paguṇaṃ katvā nāmarūpaṃ vavatthapetvā vipassanaṃ paṭṭhapeti. Kathaṃ? So hi samāpattito vuṭṭhāya assāsapassāsānaṃ samudayo karajakāyo ca cittañcāti passati. Yathā hi kammāragaggariyā dhamamānāya bhastañca purisassa ca tajjaṃ vāyāmaṃ paṭicca vāto sañcarati, evamevaṃ kāyañca cittañca paṭicca assāsapassāsāti. Tato assāsapassāse ca kāyañca rūpanti, cittañca taṃsampayutte ca dhamme arūpanti vavatthapeti.

    ཨེཝཾ ནཱམརཱུཔཾ ཝཝཏྠཔེཏྭཱ ཏསྶ པཙྩཡཾ པརིཡེསཏི, པརིཡེསནྟོ ཙ ཏཾ དིསྭཱ ཏཱིསུཔི ཨདྡྷཱསུ ནཱམརཱུཔསྶ པཝཏྟིཾ ཨཱརབྦྷ ཀངྑཾ ཝིཏརཏི, ཝིཏིཎྞཀངྑོ ཀལཱཔསམྨསནཝསེན ‘‘ཨནིཙྩཾ དུཀྑམནཏྟཱ’’ཏི ཏིལཀྑཎཾ ཨཱརོཔེཏྭཱ ཨུདཡབྦཡཱནུཔསྶནཱཡ པུབྦབྷཱགེ ཨུཔྤནྣེ ཨོབྷཱསཱདཡོ དས ཝིཔསྶནུཔཀྐིལེསེ པཧཱཡ ཨུཔཀྐིལེསཝིམུཏྟཾ ཨུདཡབྦཡཱནུཔསྶནཱཉཱཎཾ ‘‘མགྒོ’’ཏི ཝཝཏྠཔེཏྭཱ ཨུདཡཾ པཧཱཡ བྷངྒཱནུཔསྶནཾ པཏྭཱ ནིརནྟརཾ བྷངྒཱནུཔསྶནེན བྷཡཏོ ཨུཔཊྛིཏེསུ སབྦསངྑཱརེསུ ནིབྦིནྡནྟོ ཝིརཛྫནྟོ ཝིམུཙྩནྟོ ཡཐཱཀྐམེན ཙཏྟཱརོ ཨརིཡམགྒེ པཱཔུཎིཏྭཱ ཨརཧཏྟཕལེ པཏིཊྛཱཡ ཨེཀཱུནཝཱིསཏིབྷེདསྶ པཙྩཝེཀྑཎཱཉཱཎསྶ པརིཡནྟཾ པཏྟོ སདེཝཀསྶ ལོཀསྶ ཨགྒདཀྑིཎེཡྻོ ཧོཏི། ཨེཏྟཱཝཏཱ ཙསྶ གཎནཾ ཨཱདིཾ ཀཏྭཱ ཝིཔསྶནཱཔརིཡོསཱནཱ ཨཱནཱཔཱནསྶཏིསམཱདྷིབྷཱཝནཱ སམཏྟཱ ཧོཏཱིཏི། ཨཡཾ སབྦཱཀཱརཏོ པཋམཙཏུཀྐཝཎྞནཱ།

    Evaṃ nāmarūpaṃ vavatthapetvā tassa paccayaṃ pariyesati, pariyesanto ca taṃ disvā tīsupi addhāsu nāmarūpassa pavattiṃ ārabbha kaṅkhaṃ vitarati, vitiṇṇakaṅkho kalāpasammasanavasena ‘‘aniccaṃ dukkhamanattā’’ti tilakkhaṇaṃ āropetvā udayabbayānupassanāya pubbabhāge uppanne obhāsādayo dasa vipassanupakkilese pahāya upakkilesavimuttaṃ udayabbayānupassanāñāṇaṃ ‘‘maggo’’ti vavatthapetvā udayaṃ pahāya bhaṅgānupassanaṃ patvā nirantaraṃ bhaṅgānupassanena bhayato upaṭṭhitesu sabbasaṅkhāresu nibbindanto virajjanto vimuccanto yathākkamena cattāro ariyamagge pāpuṇitvā arahattaphale patiṭṭhāya ekūnavīsatibhedassa paccavekkhaṇāñāṇassa pariyantaṃ patto sadevakassa lokassa aggadakkhiṇeyyo hoti. Ettāvatā cassa gaṇanaṃ ādiṃ katvā vipassanāpariyosānā ānāpānassatisamādhibhāvanā samattā hotīti. Ayaṃ sabbākārato paṭhamacatukkavaṇṇanā.

    ཨིཏརེསུ པན ཏཱིསུ ཙཏུཀྐེསུ ཡསྨཱ ཝིསུཾ ཀམྨཊྛཱནབྷཱཝནཱནཡོ ནཱམ ནཏྠི, ཏསྨཱ ཨནུཔདཝཎྞནཱནཡེནེཝ ཏེསཾ ཨེཝམཏྠོ ཝེདིཏབྦོ། པཱིཏིཔཊིསཾཝེདཱིཏི པཱིཏིཾ པཊིསཾཝིདིཏཾ ཀརོནྟོ པཱཀཊཾ ཀརོནྟོ ཨསྶསིསྶཱམི པསྶསིསྶཱམཱིཏི སིཀྑཏི། ཏཏྠ དྭཱིཧཱཀཱརེཧི པཱིཏི པཊིསཾཝིདིཏཱ ཧོཏི ཨཱརམྨཎཏོ ཙ ཨསམྨོཧཏོ ཙ།

    Itaresu pana tīsu catukkesu yasmā visuṃ kammaṭṭhānabhāvanānayo nāma natthi, tasmā anupadavaṇṇanānayeneva tesaṃ evamattho veditabbo. Pītipaṭisaṃvedīti pītiṃ paṭisaṃviditaṃ karonto pākaṭaṃ karonto assasissāmi passasissāmīti sikkhati. Tattha dvīhākārehi pīti paṭisaṃviditā hoti ārammaṇato ca asammohato ca.

    ཀཐཾ ཨཱརམྨཎཏོ པཱིཏི པཊིསཾཝིདིཏཱ ཧོཏི? སཔྤཱིཏིཀེ དྭེ ཛྷཱནེ སམཱཔཛྫཏི, ཏསྶ སམཱཔཏྟིཀྑཎེ ཛྷཱནཔཊིལཱབྷེན ཨཱརམྨཎཏོ པཱིཏི པཊིསཾཝིདིཏཱ ཧོཏི ཨཱརམྨཎསྶ པཊིསཾཝིདིཏཏྟཱ།

    Kathaṃ ārammaṇato pīti paṭisaṃviditā hoti? Sappītike dve jhāne samāpajjati, tassa samāpattikkhaṇe jhānapaṭilābhena ārammaṇato pīti paṭisaṃviditā hoti ārammaṇassa paṭisaṃviditattā.

    ཀཐཾ ཨསམྨོཧཏོ? སཔྤཱིཏིཀེ དྭེ ཛྷཱནེ སམཱཔཛྫིཏྭཱ ཝུཊྛཱཡ ཛྷཱནསམྤཡུཏྟཾ པཱིཏིཾ ཁཡཏོ ཝཡཏོ སམྨསཏི, ཏསྶ ཝིཔསྶནཱཀྑཎེ ལཀྑཎཔཊིཝེདྷེན ཨསམྨོཧཏོ པཱིཏི པཊིསཾཝིདིཏཱ ཧོཏི། ཨེཏེནེཝ ནཡེན ཨཝསེསཔདཱནིཔི ཨཏྠཏོ ཝེདིཏབྦཱནི། ཨིདཾ པནེཏྠ ཝིསེསམཏྟཾ – ཏིཎྞཾ ཛྷཱནཱནཾ ཝསེན སུཁཔཊིསཾཝིདིཏཱ ཧོཏི། ཙཏུནྣམྤི ཛྷཱནཱནཾ ཝསེན ཙིཏྟསངྑཱརཔཊིསཾཝིདིཏཱ ཝེདིཏབྦཱ། ཙིཏྟསངྑཱརོཏི ཝེདནཱསཉྙཱཀྑནྡྷཱ། པསྶམྦྷཡཾ ཙིཏྟསངྑཱརནྟི ཨོལཱ༹རིཀཾ ཨོལཱ༹རིཀཾ ཙིཏྟསངྑཱརཾ པསྶམྦྷེནྟོ, ནིརོདྷེནྟོཏི ཨཏྠོ། སོ ཝིཏྠཱརཏོ ཀཱཡསངྑཱརེ ཝུཏྟནཡེན ཝེདིཏབྦོ། ཨཔིཙེཏྠ པཱིཏིཔདེ པཱིཏིསཱིསེན ཝེདནཱ ཝུཏྟཱ, སུཁཔདེ སརཱུཔེནེཝ ཝེདནཱ། དྭཱིསུ ཙིཏྟསངྑཱརཔདེསུ ‘‘སཉྙཱ ཙ ཝེདནཱ ཙ ཙེཏསིཀཱ, ཨེཏེ དྷམྨཱ ཙིཏྟཔཊིབདྡྷཱ ཙིཏྟསངྑཱརཱ’’ཏི (པཊི॰ མ॰ ༡.༡༧༤; མ॰ ནི॰ ༡.༤༦༣) ཝཙནཏོ སཉྙཱསམྤཡུཏྟཱ ཝེདནཱཏི ཨེཝཾ ཝེདནཱནུཔསྶནཱནཡེན ཨིདཾ ཙཏུཀྐཾ བྷཱསིཏནྟི ཝེདིཏབྦཾ།

    Kathaṃ asammohato? Sappītike dve jhāne samāpajjitvā vuṭṭhāya jhānasampayuttaṃ pītiṃ khayato vayato sammasati, tassa vipassanākkhaṇe lakkhaṇapaṭivedhena asammohato pīti paṭisaṃviditā hoti. Eteneva nayena avasesapadānipi atthato veditabbāni. Idaṃ panettha visesamattaṃ – tiṇṇaṃ jhānānaṃ vasena sukhapaṭisaṃviditā hoti. Catunnampi jhānānaṃ vasena cittasaṅkhārapaṭisaṃviditā veditabbā. Cittasaṅkhāroti vedanāsaññākkhandhā. Passambhayaṃ cittasaṅkhāranti oḷārikaṃ oḷārikaṃ cittasaṅkhāraṃ passambhento, nirodhentoti attho. So vitthārato kāyasaṅkhāre vuttanayena veditabbo. Apicettha pītipade pītisīsena vedanā vuttā, sukhapade sarūpeneva vedanā. Dvīsu cittasaṅkhārapadesu ‘‘saññā ca vedanā ca cetasikā, ete dhammā cittapaṭibaddhā cittasaṅkhārā’’ti (paṭi. ma. 1.174; ma. ni. 1.463) vacanato saññāsampayuttā vedanāti evaṃ vedanānupassanānayena idaṃ catukkaṃ bhāsitanti veditabbaṃ.

    ཏཏིཡཙཏུཀྐེཔི ཙཏུནྣཾ ཛྷཱནཱནཾ ཝསེན ཙིཏྟཔཊིསཾཝིདིཏཱ ཝེདིཏབྦཱ། ཨབྷིཔྤམོདཡཾ ཙིཏྟནྟི ཙིཏྟཾ མོདེནྟོ པམོདེནྟོ ཧཱསེནྟོ པཧཱསེནྟོ ཨསྶསིསྶཱམི པསྶསིསྶཱམཱིཏི སིཀྑཏི། ཏཏྠ དྭཱིཧཱཀཱརེཧི ཨབྷིཔྤམོདོ ཧོཏི སམཱདྷིཝསེན ཙ ཝིཔསྶནཱཝསེན ཙ།

    Tatiyacatukkepi catunnaṃ jhānānaṃ vasena cittapaṭisaṃviditā veditabbā. Abhippamodayaṃ cittanti cittaṃ modento pamodento hāsento pahāsento assasissāmi passasissāmīti sikkhati. Tattha dvīhākārehi abhippamodo hoti samādhivasena ca vipassanāvasena ca.

    ཀཐཾ སམཱདྷིཝསེན? སཔྤཱིཏིཀེ དྭེ ཛྷཱནེ སམཱཔཛྫཏི, སོ སམཱཔཏྟིཀྑཎེ སམྤཡུཏྟཱཡ པཱིཏིཡཱ ཙིཏྟཾ ཨཱམོདེཏི པམོདེཏི། ཀཐཾ ཝིཔསྶནཱཝསེན? སཔྤཱིཏིཀེ དྭེ ཛྷཱནེ སམཱཔཛྫིཏྭཱ ཝུཊྛཱཡ ཛྷཱནསམྤཡུཏྟཾ པཱིཏིཾ ཁཡཏོ ཝཡཏོ སམྨསཏི། ཨེཝཾ ཝིཔསྶནཱཀྑཎེ ཛྷཱནསམྤཡུཏྟཾ པཱིཏིཾ ཨཱརམྨཎཾ ཀཏྭཱ ཙིཏྟཾ ཨཱམོདེཏི པམོདེཏི། ཨེཝཾ པཊིཔནྣོ ‘‘ཨབྷིཔྤམོདཡཾ ཙིཏྟཾ ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝུཙྩཏི།

    Kathaṃ samādhivasena? Sappītike dve jhāne samāpajjati, so samāpattikkhaṇe sampayuttāya pītiyā cittaṃ āmodeti pamodeti. Kathaṃ vipassanāvasena? Sappītike dve jhāne samāpajjitvā vuṭṭhāya jhānasampayuttaṃ pītiṃ khayato vayato sammasati. Evaṃ vipassanākkhaṇe jhānasampayuttaṃ pītiṃ ārammaṇaṃ katvā cittaṃ āmodeti pamodeti. Evaṃ paṭipanno ‘‘abhippamodayaṃ cittaṃ assasissāmi passasissāmīti sikkhatī’’ti vuccati.

    སམཱདཧཾ ཙིཏྟནྟི པཋམཛ྄ཛྷཱནཱདིཝསེན ཨཱརམྨཎེ ཙིཏྟཾ སམཾ ཨཱདཧནྟོ སམཾ ཋཔེནྟོ, ཏཱནི ཝཱ པན ཛྷཱནཱནི སམཱཔཛྫིཏྭཱ ཝུཊྛཱཡ ཛྷཱནསམྤཡུཏྟཾ ཙིཏྟཾ ཁཡཏོ ཝཡཏོ སམྨསཏོ ཝིཔསྶནཱཀྑཎེ ལཀྑཎཔཊིཝེདྷེན ཨུཔྤཛྫཏི ཁཎིཀཙིཏྟེཀགྒཏཱ, ཨེཝཾ ཨུཔྤནྣཱཡ ཁཎིཀཙིཏྟེཀགྒཏཱཡ ཝསེནཔི ཨཱརམྨཎེ ཙིཏྟཾ སམཾ ཨཱདཧནྟོ སམཾ ཋཔེནྟོ ‘‘སམཱདཧཾ ཙིཏྟཾ ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝུཙྩཏི།

    Samādahaṃ cittanti paṭhamajjhānādivasena ārammaṇe cittaṃ samaṃ ādahanto samaṃ ṭhapento, tāni vā pana jhānāni samāpajjitvā vuṭṭhāya jhānasampayuttaṃ cittaṃ khayato vayato sammasato vipassanākkhaṇe lakkhaṇapaṭivedhena uppajjati khaṇikacittekaggatā, evaṃ uppannāya khaṇikacittekaggatāya vasenapi ārammaṇe cittaṃ samaṃ ādahanto samaṃ ṭhapento ‘‘samādahaṃ cittaṃ assasissāmi passasissāmīti sikkhatī’’ti vuccati.

    ཝིམོཙཡཾ ཙིཏྟནྟི པཋམཛ྄ཛྷཱནེན ནཱིཝརཎེཧི ཙིཏྟཾ མོཙེནྟོ ཝིམོཙེནྟོ, དུཏིཡེན ཝིཏཀྐཝིཙཱརེཧི, ཏཏིཡེན པཱིཏིཡཱ, ཙཏུཏྠེན སུཁདུཀྑེཧི ཙིཏྟཾ མོཙེནྟོ ཝིམོཙེནྟོ, ཏཱནི ཝཱ པན ཛྷཱནཱནི སམཱཔཛྫིཏྭཱ ཝུཊྛཱཡ ཛྷཱནསམྤཡུཏྟཾ ཙིཏྟཾ ཁཡཏོ ཝཡཏོ སམྨསཏི། སོ ཝིཔསྶནཱཀྑཎེ ཨནིཙྩཱནུཔསྶནཱཡ ནིཙྩསཉྙཱཏོ ཙིཏྟཾ མོཙེནྟོ ཝིམོཙེནྟོ, དུཀྑཱནུཔསྶནཱཡ སུཁསཉྙཱཏོ, ཨནཏྟཱནུཔསྶནཱཡ ཨཏྟསཉྙཱཏོ, ནིབྦིདཱནུཔསྶནཱཡ ནནྡིཏོ, ཝིརཱགཱནུཔསྶནཱཡ རཱགཏོ, ནིརོདྷཱནུཔསྶནཱཡ སམུདཡཏོ, པཊིནིསྶགྒཱནུཔསྶནཱཡ ཨཱདཱནཏོ ཙིཏྟཾ མོཙེནྟོ ཝིམོཙེནྟོ ཨསྶསཏི ཙེཝ པསྶསཏི ཙ། ཏེན ཝུཙྩཏི – ‘‘ཝིམོཙཡཾ ཙིཏྟཾ ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི། ཨེཝཾ ཙིཏྟཱནུཔསྶནཱཝསེན ཨིདཾ ཙཏུཀྐཾ བྷཱསིཏནྟི ཝེདིཏབྦཾ།

    Vimocayaṃcittanti paṭhamajjhānena nīvaraṇehi cittaṃ mocento vimocento, dutiyena vitakkavicārehi, tatiyena pītiyā, catutthena sukhadukkhehi cittaṃ mocento vimocento, tāni vā pana jhānāni samāpajjitvā vuṭṭhāya jhānasampayuttaṃ cittaṃ khayato vayato sammasati. So vipassanākkhaṇe aniccānupassanāya niccasaññāto cittaṃ mocento vimocento, dukkhānupassanāya sukhasaññāto, anattānupassanāya attasaññāto, nibbidānupassanāya nandito, virāgānupassanāya rāgato, nirodhānupassanāya samudayato, paṭinissaggānupassanāya ādānato cittaṃ mocento vimocento assasati ceva passasati ca. Tena vuccati – ‘‘vimocayaṃ cittaṃ assasissāmi passasissāmīti sikkhatī’’ti. Evaṃ cittānupassanāvasena idaṃ catukkaṃ bhāsitanti veditabbaṃ.

    ཙཏུཏྠཙཏུཀྐེ པན ཨནིཙྩཱནུཔསྶཱིཏི ཨེཏྠ ཏཱཝ ཨནིཙྩཾ ཝེདིཏབྦཾ, ཨནིཙྩཏཱ ཝེདིཏབྦཱ, ཨནིཙྩཱནུཔསྶནཱ ཝེདིཏབྦཱ, ཨནིཙྩཱནུཔསྶཱི ཝེདིཏབྦོ། ཏཏྠ ཨནིཙྩནྟི པཉྩཀྑནྡྷཱ། ཀསྨཱ? ཨུཔྤཱདཝཡཉྙཐཏྟབྷཱཝཱ། ཨནིཙྩཏཱཏི ཏེསཾཡེཝ ཨུཔྤཱདཝཡཉྙཐཏྟཾ, ཧུཏྭཱ ཨབྷཱཝོ ཝཱ, ནིབྦཏྟཱནཾ ཏེནེཝཱཀཱརེན ཨཊྛཏྭཱ ཁཎབྷངྒེན བྷེདོཏི ཨཏྠོ། ཨནིཙྩཱནུཔསྶནཱཏི ཏསྶཱ ཨནིཙྩཏཱཡ ཝསེན རཱུཔཱདཱིསུ ‘‘ཨནིཙྩ’’ནྟི ཨནུཔསྶནཱ། ཨནིཙྩཱནུཔསྶཱིཏི ཏཱཡ ཨནུཔསྶནཱཡ སམནྣཱགཏོ། ཏསྨཱ ཨེཝཾབྷཱུཏོ ཨསྶསནྟོ ཙ པསྶསནྟོ ཙ ཨིདྷ ‘‘ཨནིཙྩཱནུཔསྶཱི ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝེདིཏབྦོ།

    Catutthacatukke pana aniccānupassīti ettha tāva aniccaṃ veditabbaṃ, aniccatā veditabbā, aniccānupassanā veditabbā, aniccānupassī veditabbo. Tattha aniccanti pañcakkhandhā. Kasmā? Uppādavayaññathattabhāvā. Aniccatāti tesaṃyeva uppādavayaññathattaṃ, hutvā abhāvo vā, nibbattānaṃ tenevākārena aṭṭhatvā khaṇabhaṅgena bhedoti attho. Aniccānupassanāti tassā aniccatāya vasena rūpādīsu ‘‘anicca’’nti anupassanā. Aniccānupassīti tāya anupassanāya samannāgato. Tasmā evaṃbhūto assasanto ca passasanto ca idha ‘‘aniccānupassī assasissāmi passasissāmīti sikkhatī’’ti veditabbo.

    ཝིརཱགཱནུཔསྶཱིཏི ཨེཏྠ པན དྭེ ཝིརཱགཱ ཁཡཝིརཱགོ ཙ ཨཙྩནྟཝིརཱགོ ཙ། ཏཏྠ ཁཡཝིརཱགོཏི སངྑཱརཱནཾ ཁཎབྷངྒོ། ཨཙྩནྟཝིརཱགོཏི ནིབྦཱནཾ། ཝིརཱགཱནུཔསྶནཱཏི ཏདུབྷཡདསྶནཝསེན པཝཏྟཱ ཝིཔསྶནཱ ཙ མགྒོ ཙ། ཏཱཡ དུཝིདྷཱཡཔི ཨནུཔསྶནཱཡ སམནྣཱགཏོ ཧུཏྭཱ ཨསྶསནྟོ ཙ པསྶསནྟོ ཙ ‘‘ཝིརཱགཱནུཔསྶཱི ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝེདིཏབྦོ། ནིརོདྷཱནུཔསྶཱིཔདེཔི ཨེསེཝ ནཡོ།

    Virāgānupassīti ettha pana dve virāgā khayavirāgo ca accantavirāgo ca. Tattha khayavirāgoti saṅkhārānaṃ khaṇabhaṅgo. Accantavirāgoti nibbānaṃ. Virāgānupassanāti tadubhayadassanavasena pavattā vipassanā ca maggo ca. Tāya duvidhāyapi anupassanāya samannāgato hutvā assasanto ca passasanto ca ‘‘virāgānupassī assasissāmi passasissāmīti sikkhatī’’ti veditabbo. Nirodhānupassīpadepi eseva nayo.

    པཊིནིསྶགྒཱནུཔསྶཱིཏི ཨེཏྠཱཔི དྭེ པཊིནིསྶགྒཱ པརིཙྩཱགཔཊིནིསྶགྒོ ཙ པཀྑནྡནཔཊིནིསྶགྒོ ཙ། པཊིནིསྶགྒོཡེཝ ཨནུཔསྶནཱ པཊིནིསྶགྒཱནུཔསྶནཱ, ཝིཔསྶནཱམགྒཱནམེཏཾ ཨདྷིཝཙནཾ། ཝིཔསྶནཱཏི ཏདངྒཝསེན སདྡྷིཾ ཁནྡྷཱབྷིསངྑཱརེཧི ཀིལེསེ པརིཙྩཛཏི, སངྑཏདོསདསྶནེན ཙ ཏབྦིཔརཱིཏེ ནིབྦཱནེ ཏནྣིནྣཏཱཡ པཀྑནྡཏཱིཏི པརིཙྩཱགཔཊིནིསྶགྒོ ཙེཝ པཀྑནྡནཔཊིནིསྶགྒོ ཙཱཏི ཝུཙྩཏི། མགྒོ སམུཙྪེདཝསེན སདྡྷིཾ ཁནྡྷཱབྷིསངྑཱརེཧི ཀིལེསེ པརིཙྩཛཏི, ཨཱརམྨཎཀརཎེན ཙ ནིབྦཱནེ པཀྑནྡཏཱིཏི པརིཙྩཱགཔཊིནིསྶགྒོ ཙེཝ པཀྑནྡནཔཊིནིསྶགྒོ ཙཱཏི ཝུཙྩཏི། ཨུབྷཡམྤི པན པུརིམཔུརིམཉཱཎཱནཾ ཨནུཨནུ པསྶནཏོ ཨནུཔསྶནཱཏི ཝུཙྩཏི། ཏཱཡ དུཝིདྷཱཡཔི པཊིནིསྶགྒཱནུཔསྶནཱཡ སམནྣཱགཏོ ཧུཏྭཱ ཨསྶསནྟོ ཙ པསྶསནྟོ ཙ ‘‘པཊིནིསྶགྒཱནུཔསྶཱི ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝེདིཏབྦོ།

    Paṭinissaggānupassīti etthāpi dve paṭinissaggā pariccāgapaṭinissaggo ca pakkhandanapaṭinissaggo ca. Paṭinissaggoyeva anupassanā paṭinissaggānupassanā, vipassanāmaggānametaṃ adhivacanaṃ. Vipassanāti tadaṅgavasena saddhiṃ khandhābhisaṅkhārehi kilese pariccajati, saṅkhatadosadassanena ca tabbiparīte nibbāne tanninnatāya pakkhandatīti pariccāgapaṭinissaggo ceva pakkhandanapaṭinissaggo cāti vuccati. Maggo samucchedavasena saddhiṃ khandhābhisaṅkhārehi kilese pariccajati, ārammaṇakaraṇena ca nibbāne pakkhandatīti pariccāgapaṭinissaggo ceva pakkhandanapaṭinissaggo cāti vuccati. Ubhayampi pana purimapurimañāṇānaṃ anuanu passanato anupassanāti vuccati. Tāya duvidhāyapi paṭinissaggānupassanāya samannāgato hutvā assasanto ca passasanto ca ‘‘paṭinissaggānupassī assasissāmi passasissāmīti sikkhatī’’ti veditabbo.

    ཨེཏྠ ཙ ‘‘ཨནིཙྩཱནུཔསྶཱི’’ཏི ཏརུཎཝིཔསྶནཱཡ ཝསེན ཝུཏྟཾ, ‘‘ཝིརཱགཱནུཔསྶཱི’’ཏི ཏཏོ བལཝཏརཱཡ སངྑཱརེསུ ཝིརཛྫནསམཏྠཱཡ ཝིཔསྶནཱཡ ཝསེན, ‘‘ནིརོདྷཱནུཔསྶཱི’’ཏི ཏཏོ བལཝཏརཱཡ ཀིལེསནིརོདྷནསམཏྠཱཡ ཝིཔསྶནཱཡ ཝསེན , ‘‘པཊིནིསྶགྒཱནུཔསྶཱི’’ཏི མགྒསྶ ཨཱསནྣབྷཱུཏཱཡ ཨཏིཏིཀྑཱཡ ཝིཔསྶནཱཡ ཝསེན ཝུཏྟནྟི ཝེདིཏབྦཾ། ཡཏྠ པན མགྒོཔི ལབྦྷཏི, སོ ཨབྷིནྣོཡེཝ། ཨེཝམིདཾ ཙཏུཀྐཾ སུདྡྷཝིཔསྶནཱཝསེན ཝུཏྟཾ, པུརིམཱནི པན ཏཱིཎི སམཐཝིཔསྶནཱཝསེནཱཏི།

    Ettha ca ‘‘aniccānupassī’’ti taruṇavipassanāya vasena vuttaṃ, ‘‘virāgānupassī’’ti tato balavatarāya saṅkhāresu virajjanasamatthāya vipassanāya vasena, ‘‘nirodhānupassī’’ti tato balavatarāya kilesanirodhanasamatthāya vipassanāya vasena , ‘‘paṭinissaggānupassī’’ti maggassa āsannabhūtāya atitikkhāya vipassanāya vasena vuttanti veditabbaṃ. Yattha pana maggopi labbhati, so abhinnoyeva. Evamidaṃ catukkaṃ suddhavipassanāvasena vuttaṃ, purimāni pana tīṇi samathavipassanāvasenāti.

    ཨཱནཱཔཱནསྶཏིམཱཏིཀཱཝཎྞནཱ ནིཊྛིཏཱ།

    Ānāpānassatimātikāvaṇṇanā niṭṭhitā.

    ༡༦༤. ཨིདཱནི ཡཐཱནིཀྑིཏྟཾ མཱཏིཀཾ པཊིཔཱཊིཡཱ བྷཱཛེཏྭཱ དསྶེཏུཾ ཨིདྷཱཏི ཨིམིསྶཱ དིཊྛིཡཱཏིཨཱདི ཨཱརདྡྷཾ། ཏཏྠ ཨིམིསྶཱ དིཊྛིཡཱཏིཨཱདཱིཧི དསཧི པདེཧི སིཀྑཏྟཡསངྑཱཏཾ སབྦཉྙུབུདྡྷསཱསནམེཝ ཀཐིཏཾ། ཏཉྷི བུདྡྷེན བྷགཝཏཱ དིཊྛཏྟཱ དིཊྛཱིཏི ཝུཙྩཏི, ཏསྶེཝ ཁམནཝསེན ཁནྟི, རུཙྩནཝསེན རུཙི, གཧཎཝསེན ཨཱདཱཡོ, སབྷཱཝཊྛེན དྷམྨོ, སིཀྑིཏབྦཊྛེན ཝིནཡོ, ཏདུབྷཡེནཔི དྷམྨཝིནཡོ, པཝུཏྟཝསེན པཱཝཙནཾ, སེཊྛཙརིཡཊྛེན བྲཧྨཙརིཡཾ , ཨནུསིཊྛིདཱནཝསེན སཏྠུསཱསནནྟི ཝུཙྩཏི། ཏསྨཱ ‘‘ཨིམིསྶཱ དིཊྛིཡཱ’’ཏིཨཱདཱིསུ ཨིམིསྶཱ བུདྡྷདིཊྛིཡཱ, ཨིམིསྶཱ བུདྡྷཁནྟིཡཱ, ཨིམིསྶཱ བུདྡྷརུཙིཡཱ, ཨིམསྨིཾ བུདྡྷཨཱདཱཡེ, ཨིམསྨིཾ བུདྡྷདྷམྨེ, ཨིམསྨིཾ བུདྡྷཝིནཡེ, ཨིམསྨིཾ བུདྡྷདྷམྨཝིནཡེ, ཨིམསྨིཾ བུདྡྷཔཱཝཙནེ, ཨིམསྨིཾ བུདྡྷབྲཧྨཙརིཡེ, ཨིམསྨིཾ བུདྡྷསཏྠུསཱསནེཏི ཨཏྠོ ཝེདིཏབྦོ། ཨཔིཙེཏཾ སིཀྑཏྟཡསངྑཱཏཾ སཀལཾ པཱཝཙནཾ བྷགཝཏཱ དིཊྛཏྟཱ སམྨཱདིཊྛིཔཙྩཡཏྟཱ སམྨཱདིཊྛིཔུབྦངྒམཏྟཱ ཙ དིཊྛི། བྷགཝཏོ ཁམནཝསེན ཁནྟི། རུཙྩནཝསེན རུཙི། གཧཎཝསེན ཨཱདཱཡོ ། ཨཏྟནོ ཀཱརཀཾ ཨཔཱཡེ ཨཔཏམཱནཾ དྷཱརེཏཱིཏི དྷམྨོ། སོཝ སཾཀིལེསཔཀྑཾ ཝིནེཏཱིཏི ཝིནཡོ། དྷམྨོ ཙ སོ ཝིནཡོ ཙཱཏི དྷམྨཝིནཡོ, ཀུསལདྷམྨེཧི ཝཱ ཨཀུསལདྷམྨཱནཾ ཨེས ཝིནཡོཏི དྷམྨཝིནཡོ། ཏེནེཝ ཝུཏྟཾ – ‘‘ཡེ ཙ ཁོ ཏྭཾ, གོཏམི, དྷམྨེ ཛཱནེཡྻཱསི ཨིམེ དྷམྨཱ ཝིརཱགཱཡ སཾཝཏྟནྟི, ནོ སརཱགཱཡ…པེ॰… ཨེཀཾསེན, གོཏམི, དྷཱརེཡྻཱསི ཨེསོ དྷམྨོ ཨེསོ ཝིནཡོ ཨེཏཾ སཏྠུསཱསན’’ནྟི (ཨ॰ ནི॰ ༨.༥༣; ཙཱུལ༹ཝ॰ ༤༠༦)། དྷམྨེན ཝཱ ཝིནཡོ, ན དཎྜཱདཱིཧཱིཏི དྷམྨཝིནཡོ། ཝུཏྟམྤི ཙེཏཾ –

    164. Idāni yathānikkhittaṃ mātikaṃ paṭipāṭiyā bhājetvā dassetuṃ idhāti imissā diṭṭhiyātiādi āraddhaṃ. Tattha imissā diṭṭhiyātiādīhi dasahi padehi sikkhattayasaṅkhātaṃ sabbaññubuddhasāsanameva kathitaṃ. Tañhi buddhena bhagavatā diṭṭhattā diṭṭhīti vuccati, tasseva khamanavasena khanti, ruccanavasena ruci, gahaṇavasena ādāyo, sabhāvaṭṭhena dhammo, sikkhitabbaṭṭhena vinayo, tadubhayenapi dhammavinayo, pavuttavasena pāvacanaṃ, seṭṭhacariyaṭṭhena brahmacariyaṃ, anusiṭṭhidānavasena satthusāsananti vuccati. Tasmā ‘‘imissā diṭṭhiyā’’tiādīsu imissā buddhadiṭṭhiyā, imissā buddhakhantiyā, imissā buddharuciyā, imasmiṃ buddhaādāye, imasmiṃ buddhadhamme, imasmiṃ buddhavinaye, imasmiṃ buddhadhammavinaye, imasmiṃ buddhapāvacane, imasmiṃ buddhabrahmacariye, imasmiṃ buddhasatthusāsaneti attho veditabbo. Apicetaṃ sikkhattayasaṅkhātaṃ sakalaṃ pāvacanaṃ bhagavatā diṭṭhattā sammādiṭṭhipaccayattā sammādiṭṭhipubbaṅgamattā ca diṭṭhi. Bhagavato khamanavasena khanti. Ruccanavasena ruci. Gahaṇavasena ādāyo . Attano kārakaṃ apāye apatamānaṃ dhāretīti dhammo. Sova saṃkilesapakkhaṃ vinetīti vinayo. Dhammo ca so vinayo cāti dhammavinayo, kusaladhammehi vā akusaladhammānaṃ esa vinayoti dhammavinayo. Teneva vuttaṃ – ‘‘ye ca kho tvaṃ, gotami, dhamme jāneyyāsi ime dhammā virāgāya saṃvattanti, no sarāgāya…pe… ekaṃsena, gotami, dhāreyyāsi eso dhammo eso vinayo etaṃ satthusāsana’’nti (a. ni. 8.53; cūḷava. 406). Dhammena vā vinayo, na daṇḍādīhīti dhammavinayo. Vuttampi cetaṃ –

    ‘‘དཎྜེནེཀེ དམཡནྟི, ཨངྐུསེཧི ཀསཱཧི ཙ།

    ‘‘Daṇḍeneke damayanti, aṅkusehi kasāhi ca;

    ཨདཎྜེན ཨསཏྠེན, ནཱགོ དནྟོ མཧེསིནཱ’’ཏི༎ (མ॰ ནི॰ ༢.༣༥༢; ཙཱུལ༹ཝ॰ ༣༤༢)།

    Adaṇḍena asatthena, nāgo danto mahesinā’’ti. (ma. ni. 2.352; cūḷava. 342);

    ཏཐཱ ‘‘དྷམྨེན ནཡམཱནཱནཾ, ཀཱ ཨུསཱུཡཱ ཝིཛཱནཏ’’ནྟི (མཧཱཝ॰ ༦༣)། དྷམྨཱཡ ཝཱ ཝིནཡོ དྷམྨཝིནཡོ། ཨནཝཛྫདྷམྨཏྠཾ ཧེས ཝིནཡོ, ན བྷཝབྷོགཱམིསཏྠཾ། ཏེནཱཧ བྷགཝཱ – ‘‘ནཡིདཾ, བྷིཀྑཝེ, བྲཧྨཙརིཡཾ ཝུསྶཏི ཛནཀུཧནཏྠ’’ནྟི (ཨིཏིཝུ॰ ༣༥; ཨ॰ ནི॰ ༤.༢༥) ཝིཏྠཱརོ། པུཎྞཏྠེརོཔི ཨཱཧ – ‘‘ཨནུཔཱདཱཔརིནིབྦཱནཏྠཾ ཁོ, ཨཱཝུསོ, བྷགཝཏི བྲཧྨཙརིཡཾ ཝུསྶཏཱི’’ཏི (མ॰ ནི॰ ༡.༢༥༩)། ཝིསུདྡྷཾ ཝཱ ནཡཏཱིཏི ཝིནཡོ, དྷམྨཏོ ཝིནཡོ དྷམྨཝིནཡོ། སཾསཱརདྷམྨཏོ ཧི སོཀཱདིདྷམྨཏོ ཝཱ ཨེས ཝིསུདྡྷཾ ནིབྦཱནཾ ནཡཏི, དྷམྨསྶ ཝཱ ཝིནཡོ, ན ཏིཏྠཀརཱནནྟི དྷམྨཝིནཡོ། དྷམྨབྷཱུཏོ ཧི བྷགཝཱ, ཏསྶེཝ ཨེས ཝིནཡོ། ཡསྨཱ ཝཱ དྷམྨཱ ཨེཝ ཨབྷིཉྙེཡྻཱ པརིཉྙེཡྻཱ པཧཱཏབྦཱ བྷཱཝེཏབྦཱ སཙྪིཀཱཏབྦཱ ཙ, ཏསྨཱ ཨེས དྷམྨེསུ ཝིནཡོ, ན སཏྟེསུ ན ཛཱིཝེསུ ཙཱཏི དྷམྨཝིནཡོ། སཱཏྠསབྱཉྫནཏཱདཱིཧི ཨཉྙེསཾ ཝཙནཏོ པདྷཱནཾ ཝཙནནྟི པཝཙནཾ, པཝཙནམེཝ པཱཝཙནཾ། སབྦཙརིཡཱཧི ཝིསིཊྛཙརིཡབྷཱཝེན བྲཧྨཙརིཡཾ། དེཝམནུསྶཱནཾ སཏྠུབྷཱུཏསྶ བྷགཝཏོ སཱསནནྟི སཏྠུསཱསནཾ, སཏྠུབྷཱུཏཾ ཝཱ སཱསནནྟིཔི སཏྠུསཱསནཾ། ‘‘ཡོ ཝོ, ཨཱནནྡ, མཡཱ དྷམྨོ ཙ ཝིནཡོ ཙ དེསིཏོ པཉྙཏྟོ, སོ ཝོ མམཙྩཡེན སཏྠཱ’’ཏི (དཱི॰ ནི॰ ༢.༢༡༦) ཧི དྷམྨཝིནཡོཝ སཏྠཱཏི ཝུཏྟོ། ཨེཝམེཏེསཾ པདཱནཾ ཨཏྠོ ཝེདིཏབྦོ། ཡསྨཱ པན ཨིམསྨིཾཡེཝ སཱསནེ སབྦཱཀཱརཨཱནཱཔཱནསྶཏིསམཱདྷིནིབྦཏྟཀོ བྷིཀྑུ ཝིཛྫཏི, ན ཨཉྙཏྲ, ཏསྨཱ ཏཏྠ ཏཏྠ ‘‘ཨིམིསྶཱ’’ཏི ཙ ‘‘ཨིམསྨི’’ནྟི ཙ ཨཡཾ ནིཡམོ ཀཏོཏི ཝེདིཏབྦོ། ཨཡཾ ‘‘ཨིདྷཱ’’ཏིམཱཏིཀཱཡ ནིདྡེསསྶ ཨཏྠོ།

    Tathā ‘‘dhammena nayamānānaṃ, kā usūyā vijānata’’nti (mahāva. 63). Dhammāya vā vinayo dhammavinayo. Anavajjadhammatthaṃ hesa vinayo, na bhavabhogāmisatthaṃ. Tenāha bhagavā – ‘‘nayidaṃ, bhikkhave, brahmacariyaṃ vussati janakuhanattha’’nti (itivu. 35; a. ni. 4.25) vitthāro. Puṇṇattheropi āha – ‘‘anupādāparinibbānatthaṃ kho, āvuso, bhagavati brahmacariyaṃ vussatī’’ti (ma. ni. 1.259). Visuddhaṃ vā nayatīti vinayo, dhammato vinayo dhammavinayo. Saṃsāradhammato hi sokādidhammato vā esa visuddhaṃ nibbānaṃ nayati, dhammassa vā vinayo, na titthakarānanti dhammavinayo. Dhammabhūto hi bhagavā, tasseva esa vinayo. Yasmā vā dhammā eva abhiññeyyā pariññeyyā pahātabbā bhāvetabbā sacchikātabbā ca, tasmā esa dhammesu vinayo, na sattesu na jīvesu cāti dhammavinayo. Sātthasabyañjanatādīhi aññesaṃ vacanato padhānaṃ vacananti pavacanaṃ, pavacanameva pāvacanaṃ. Sabbacariyāhi visiṭṭhacariyabhāvena brahmacariyaṃ. Devamanussānaṃ satthubhūtassa bhagavato sāsananti satthusāsanaṃ, satthubhūtaṃ vā sāsanantipi satthusāsanaṃ. ‘‘Yo vo, ānanda, mayā dhammo ca vinayo ca desito paññatto, so vo mamaccayena satthā’’ti (dī. ni. 2.216) hi dhammavinayova satthāti vutto. Evametesaṃ padānaṃ attho veditabbo. Yasmā pana imasmiṃyeva sāsane sabbākāraānāpānassatisamādhinibbattako bhikkhu vijjati, na aññatra, tasmā tattha tattha ‘‘imissā’’ti ca ‘‘imasmi’’nti ca ayaṃ niyamo katoti veditabbo. Ayaṃ ‘‘idhā’’timātikāya niddesassa attho.

    པུཐུཛྫནཀལྱཱཎཀོ ཝཱཏིཨཱདིནཱ ཙ བྷིཀྑུསདྡསྶ ཝཙནཏྠཾ ཨཝཏྭཱ ཨིདྷཱདྷིཔྤེཏབྷིཀྑུཡེཝ དསྶིཏོ། ཏཏྠ པུཐུཛྫནོ ཙ སོ ཀིལེསཱནཾ ཨསམུཙྪིནྣཏྟཱ, ཀལྱཱཎོ ཙ སཱིལཱདིཔཊིཔཏྟིཡུཏྟཏྟཱཏི པུཐུཛྫནཀལྱཱཎོ, པུཐུཛྫནཀལྱཱཎོཝ པུཐུཛྫནཀལྱཱཎཀོ། ཨདྷིསཱིལཱདཱིནི སིཀྑཏཱིཏི སེཀྑོ། སོཏཱཔནྣོ ཝཱ སཀདཱགཱམཱི ཝཱ ཨནཱགཱམཱི ཝཱ། ཨཀུཔྤོ ཙལཡིཏུམསཀྐུཎེཡྻོ ཨརཧཏྟཕལདྷམྨོ ཨསྶཱཏི ཨཀུཔྤདྷམྨོ། སོཔི ཧི ཨིམཾ སམཱདྷིཾ བྷཱཝེཏི།

    Puthujjanakalyāṇakovātiādinā ca bhikkhusaddassa vacanatthaṃ avatvā idhādhippetabhikkhuyeva dassito. Tattha puthujjano ca so kilesānaṃ asamucchinnattā, kalyāṇo ca sīlādipaṭipattiyuttattāti puthujjanakalyāṇo, puthujjanakalyāṇova puthujjanakalyāṇako. Adhisīlādīni sikkhatīti sekkho. Sotāpanno vā sakadāgāmī vā anāgāmī vā. Akuppo calayitumasakkuṇeyyo arahattaphaladhammo assāti akuppadhammo. Sopi hi imaṃ samādhiṃ bhāveti.

    ཨརཉྙནིདྡེསེ ཝིནཡཔརིཡཱཡེན ཏཱཝ ‘‘ཋཔེཏྭཱ གཱམཉྩ གཱམཱུཔཙཱརཉྩ ཨཝསེསཾ ཨརཉྙ’’ནྟི (པཱརཱ॰ ༩༢) ཨཱགཏཾ། སུཏྟནྟཔརིཡཱཡེན ཨཱརཉྙཀཾ བྷིཀྑུཾ སནྡྷཱཡ ‘‘ཨཱརཉྙཀཾ ནཱམ སེནཱསནཾ པཉྩདྷནུསཏིཀཾ པཙྪིམ’’ནྟི (པཱཙི॰ ༥༧༣) ཨཱགཏཾ། ཝིནཡསུཏྟནྟཱ པན ཨུབྷོཔི པརིཡཱཡདེསནཱ ནཱམ, ཨབྷིདྷམྨོ ནིཔྤརིཡཱཡདེསནཱཏི ཨབྷིདྷམྨཔརིཡཱཡེན (ཝིབྷ॰ ༥༢༩) ཨརཉྙཾ དསྶེཏུཾ ནིཀྑམིཏྭཱ བཧི ཨིནྡཁཱིལཱཏི ཝུཏྟཾ, ཨིནྡཁཱིལཏོ བཧི ནིཀྑམིཏྭཱཏི ཨཏྠོ། ནིཀྑམིཏྭཱ བཧི ཨིནྡཁཱིལནྟིཔི པཱཋོ, ཨིནྡཁཱིལཾ ཨཏིཀྐམིཏྭཱ བཧཱིཏི ཝུཏྟཾ ཧོཏི། ཨིནྡཁཱིལོཏི ཙེཏྠ གཱམསྶ ཝཱ ནགརསྶ ཝཱ ཨུམྨཱརོ།

    Araññaniddese vinayapariyāyena tāva ‘‘ṭhapetvā gāmañca gāmūpacārañca avasesaṃ arañña’’nti (pārā. 92) āgataṃ. Suttantapariyāyena āraññakaṃ bhikkhuṃ sandhāya ‘‘āraññakaṃ nāma senāsanaṃ pañcadhanusatikaṃ pacchima’’nti (pāci. 573) āgataṃ. Vinayasuttantā pana ubhopi pariyāyadesanā nāma, abhidhammo nippariyāyadesanāti abhidhammapariyāyena (vibha. 529) araññaṃ dassetuṃ nikkhamitvā bahi indakhīlāti vuttaṃ, indakhīlato bahi nikkhamitvāti attho. Nikkhamitvā bahi indakhīlantipi pāṭho, indakhīlaṃ atikkamitvā bahīti vuttaṃ hoti. Indakhīloti cettha gāmassa vā nagarassa vā ummāro.

    རུཀྑམཱུལནིདྡེསེ རུཀྑམཱུལསྶ པཱཀཊཏྟཱ ཏཾ ཨཝཏྭཱཝ ཡཏྠཱཏིཨཱདིམཱཧ། ཏཏྠ ཡཏྠཱཏི ཡསྨིཾ རུཀྑམཱུལེ། ཨཱསནྟི ནིསཱིདནྟི ཨེཏྠཱཏི ཨཱསནཾ། པཉྙཏྟནྟི ཋཔིཏཾ། མཉྩོ ཝཱཏིཨཱདཱིནི ཨཱསནསྶ པབྷེདཝཙནཱནི། མཉྩོཔི ཧི ནིསཛྫཱཡཔི ཨོཀཱསཏྟཱ ཨིདྷ ཨཱསནེསུ ཝུཏྟོ། སོ པན མསཱརཀབུནྡིཀཱབདྡྷཀུལཱི༹རཔཱདཀཨཱཧཙྩཔཱདཀཱནཾ ཨཉྙཏརོ། པཱིཋཾ ཏེསཾ ཨཉྙཏརམེཝ། བྷིསཱིཏི ཨུཎྞཱབྷིསིཙོལ༹བྷིསིཝཱཀབྷིསིཏིཎབྷིསིཔཎྞབྷིསཱིནཾ ཨཉྙཏརཱ། ཏཊྚིཀཱཏི ཏཱལཔཎྞཱདཱིཧི ཙིནིཏྭཱ ཀཏཱ། ཙམྨཁཎྜོཏི ནིསཛྫཱརཧོ ཡོ ཀོཙི ཙམྨཁཎྜོ། ཏིཎསནྠརཱདཡོ ཏིཎཱདཱིནི གུམྦེཏྭཱ ཀཏཱ། ཏཏྠཱཏི ཏསྨིཾ རུཀྑམཱུལེ། ཙངྐམཏི ཝཱཏིཨཱདཱིཧི རུཀྑམཱུལསྶ ཙཏུཨིརིཡཱཔཐཔཝཏྟནཡོགྱཏཱ ཀཐིཏཱ། ‘‘ཡཏྠཱ’’ཏིཨཱདཱིཧི སབྦཔདེཧི རུཀྑམཱུལསྶ སནྡཙྪཱཡཏཱ ཛནཝིཝིཏྟཏཱ ཙ ཝུཏྟཱ ཧོཏི། ཀེནཙཱིཏི ཀེནཙི སམཱུཧེན། ཏཾ སམཱུཧཾ བྷིནྡིཏྭཱ ཝིཏྠཱརེནྟོ གཧཊྛེཧི ཝཱ པབྦཛིཏེཧི ཝཱཏི ཨཱཧ། ཨནཱཀིཎྞནྟི ཨསཾཀིཎྞཾ ཨསམྦཱདྷཾ། ཡསྶ སེནཱསནསྶ སམནྟཱ གཱཝུཏམྤི ཨཌྜྷཡོཛནམྤི པབྦཏགཧནཾ ཝནགཧནཾ ནདཱིགཧནཾ ཧོཏི, ན ཀོཙི ཨཝེལཱཡ ཨུཔསངྐམིཏུཾ སཀྐོཏི, ཨིདཾ སནྟིཀེཔི ཨནཱཀིཎྞཾ ནཱམ། ཡཾ པན ཨཌྜྷཡོཛནིཀཾ ཝཱ ཡོཛནིཀཾ ཝཱ ཧོཏི, ཨིདཾ དཱུརཏཱཡ ཨེཝ ཨནཱཀིཎྞཾ ནཱམ།

    Rukkhamūlaniddese rukkhamūlassa pākaṭattā taṃ avatvāva yatthātiādimāha. Tattha yatthāti yasmiṃ rukkhamūle. Āsanti nisīdanti etthāti āsanaṃ. Paññattanti ṭhapitaṃ. Mañco vātiādīni āsanassa pabhedavacanāni. Mañcopi hi nisajjāyapi okāsattā idha āsanesu vutto. So pana masārakabundikābaddhakuḷīrapādakaāhaccapādakānaṃ aññataro. Pīṭhaṃ tesaṃ aññatarameva. Bhisīti uṇṇābhisicoḷabhisivākabhisitiṇabhisipaṇṇabhisīnaṃ aññatarā. Taṭṭikāti tālapaṇṇādīhi cinitvā katā. Cammakhaṇḍoti nisajjāraho yo koci cammakhaṇḍo. Tiṇasantharādayo tiṇādīni gumbetvā katā. Tatthāti tasmiṃ rukkhamūle. Caṅkamati vātiādīhi rukkhamūlassa catuiriyāpathapavattanayogyatā kathitā. ‘‘Yatthā’’tiādīhi sabbapadehi rukkhamūlassa sandacchāyatā janavivittatā ca vuttā hoti. Kenacīti kenaci samūhena. Taṃ samūhaṃ bhinditvā vitthārento gahaṭṭhehi vā pabbajitehi vāti āha. Anākiṇṇanti asaṃkiṇṇaṃ asambādhaṃ. Yassa senāsanassa samantā gāvutampi aḍḍhayojanampi pabbatagahanaṃ vanagahanaṃ nadīgahanaṃ hoti, na koci avelāya upasaṅkamituṃ sakkoti, idaṃ santikepi anākiṇṇaṃ nāma. Yaṃ pana aḍḍhayojanikaṃ vā yojanikaṃ vā hoti, idaṃ dūratāya eva anākiṇṇaṃ nāma.

    ཝིཧཱརོཏི ཨཌྜྷཡོགཱདིམུཏྟཀོ ཨཝསེསཱཝཱསོ། ཨཌྜྷཡོགོཏི སུཔཎྞཝངྐགེཧཾ། པཱསཱདོཏི དྭེ ཀཎྞིཀཱ གཧེཏྭཱ ཀཏོ དཱིགྷཔཱསཱདོ། ཧམྨིཡནྟི ཨུཔརིཨཱཀཱསཏལེ པཏིཊྛིཏཀཱུཊཱགཱརཔཱསཱདོཡེཝ། གུཧཱཏི ཨིཊྛཀཱགུཧཱ སིལཱགུཧཱ དཱརུགུཧཱ པཾསུགུཧཱཏི ཨེཝཉྷི ཁནྡྷཀཊྛཀཐཱཡཾ (ཙཱུལ༹ཝ॰ ཨཊྛ॰ ༢༩༤) ཝུཏྟཾ། ཝིབྷངྒཊྛཀཐཱཡཾ པན ཝིཧཱརོཏི སམནྟཱ པརིཧཱརཔཐཾ ཨནྟོཡེཝ རཏྟིཊྛཱནདིཝཱཊྛཱནཱནི ཙ དསྶེཏྭཱ ཀཏསེནཱསནཾ། གུཧཱཏི བྷཱུམིགུཧཱ, ཡཏྠ རཏྟིནྡིཝཾ དཱིཔཾ ལདྡྷུཾ ཝཊྚཏི། པབྦཏགུཧཱ ཝཱ བྷཱུམིགུཧཱ ཝཱཏི ཨིདཾ དྭཡཾ ཝིསེསེཏྭཱ ཝུཏྟཾ། མཱཏིཀཱཡ སབྦཀཱལསཱདྷཱརཎལཀྑཎཝསེན ‘‘ནིསཱིདཏཱི’’ཏི ཝཏྟམཱནཝཙནཾ ཀཏཾ, ཨིདྷ པན ནིསིནྣསྶ བྷཱཝནཱརམྦྷསབྦྷཱཝཏོ ནིསཛྫཱརམྦྷཔརིཡོསཱནདསྶནཏྠཾ ནིསིནྣོཏི ནིཊྛཱནཝཙནཾ ཀཏཾ། ཡསྨཱ པན ཨུཛུཾ ཀཱཡཾ པཎིདྷཱཡ ནིསིནྣསྶ ཀཱཡོ ཨུཛུཀོ ཧོཏི, ཏསྨཱ བྱཉྫནེ ཨཱདརཾ ཨཀཏྭཱ ཨདྷིཔྤེཏམ ཨེཝ དསྶེནྟོ ཨུཛུཀོཏིཨཱདིམཱཧ། ཏཏྠ ཋིཏོ སུཔཎིཧིཏོཏི ཨུཛུཀཾ པཎིཧིཏཏྟཱ ཨུཛུཀོ ཧུཏྭཱ ཋིཏོ, ན སཡམེཝཱཏི ཨཏྠོ། པརིགྒཧཊྛོཏི པརིགྒཧིཏཊྛོ། ཀིཾ པརིགྒཧིཏཾ? ནིཡྻཱནཾ། ཀིཾ ནིཡྻཱནཾ? ཨཱནཱཔཱནསྶཏིསམཱདྷིཡེཝ ཡཱཝ ཨརཧཏྟམགྒཱ ནིཡྻཱནཾ། ཏེནཱཧནིཡྻཱནཊྛོཏི མུཁསདྡསྶ ཛེཊྛཀཏྠཝསེན སཾསཱརཏོ ནིཡྻཱནཊྛོ ཝུཏྟོ། ཨུཔཊྛཱནཊྛོཏི སབྷཱཝཊྛོཡེཝ། སབྦེཧི པནེཏེཧི པདེཧི པརིགྒཧིཏནིཡྻཱནཾ སཏིཾ ཀཏྭཱཏི ཨཏྠོ ཝུཏྟོ ཧོཏི། ཀེཙི པན ‘‘པརིགྒཧཊྛོཏི སཏིཡཱ པརིགྒཧཊྛོ, ནིཡྻཱནཊྛོཏི ཨསྶཱསཔསྶཱསཱནཾ པཝིསནནིཀྑམནདྭཱརཊྛོ’’ཏི ཝཎྞཡནྟི། པརིགྒཧིཏཨསྶཱསཔསྶཱསནིཡྻཱནཾ སཏིཾ ཨུཔཊྛཔེཏྭཱཏི ཝུཏྟཾ ཧོཏི།

    Vihāroti aḍḍhayogādimuttako avasesāvāso. Aḍḍhayogoti supaṇṇavaṅkagehaṃ. Pāsādoti dve kaṇṇikā gahetvā kato dīghapāsādo. Hammiyanti upariākāsatale patiṭṭhitakūṭāgārapāsādoyeva. Guhāti iṭṭhakāguhā silāguhā dāruguhā paṃsuguhāti evañhi khandhakaṭṭhakathāyaṃ (cūḷava. aṭṭha. 294) vuttaṃ. Vibhaṅgaṭṭhakathāyaṃ pana vihāroti samantā parihārapathaṃ antoyeva rattiṭṭhānadivāṭṭhānāni ca dassetvā katasenāsanaṃ. Guhāti bhūmiguhā, yattha rattindivaṃ dīpaṃ laddhuṃ vaṭṭati. Pabbataguhā vā bhūmiguhā vāti idaṃ dvayaṃ visesetvā vuttaṃ. Mātikāya sabbakālasādhāraṇalakkhaṇavasena ‘‘nisīdatī’’ti vattamānavacanaṃ kataṃ, idha pana nisinnassa bhāvanārambhasabbhāvato nisajjārambhapariyosānadassanatthaṃ nisinnoti niṭṭhānavacanaṃ kataṃ. Yasmā pana ujuṃ kāyaṃ paṇidhāya nisinnassa kāyo ujuko hoti, tasmā byañjane ādaraṃ akatvā adhippetama eva dassento ujukotiādimāha. Tattha ṭhito supaṇihitoti ujukaṃ paṇihitattā ujuko hutvā ṭhito, na sayamevāti attho. Pariggahaṭṭhoti pariggahitaṭṭho. Kiṃ pariggahitaṃ? Niyyānaṃ. Kiṃ niyyānaṃ? Ānāpānassatisamādhiyeva yāva arahattamaggā niyyānaṃ. Tenāhaniyyānaṭṭhoti mukhasaddassa jeṭṭhakatthavasena saṃsārato niyyānaṭṭho vutto. Upaṭṭhānaṭṭhoti sabhāvaṭṭhoyeva. Sabbehi panetehi padehi pariggahitaniyyānaṃ satiṃ katvāti attho vutto hoti. Keci pana ‘‘pariggahaṭṭhoti satiyā pariggahaṭṭho, niyyānaṭṭhoti assāsapassāsānaṃ pavisananikkhamanadvāraṭṭho’’ti vaṇṇayanti. Pariggahitaassāsapassāsaniyyānaṃ satiṃ upaṭṭhapetvāti vuttaṃ hoti.

    ༡༦༥. བཱཏྟིཾསཱཡ ཨཱཀཱརེཧཱིཏི ཏཱསུ ཏཱསུ ཨཝཏྠཱསུ ཡཐཱཀྐམེན ལབྦྷམཱནཱནཾ ཨནཝསེསཔརིཡཱདཱནཝསེན ཝུཏྟཾ། དཱིགྷཾ ཨསྶཱསཝསེནཱཏི མཱཏིཀཱཡ ‘‘དཱིགྷ’’ནྟིཝུཏྟཨསྶཱསཝསེན། ཨེཝཾ སེསེསུ། ཨེཀགྒཏནྟི ཨེཀགྒབྷཱཝཾ། ཨཝིཀྑེཔནྟི ཨཝིཀྑིཔནཾ། ཨེཀགྒཏཱ ཨེཝ ཧི ནཱནཱརམྨཎེསུ ཙིཏྟསྶ ཨཝིཀྑིཔནཏོ ཨཝིཀྑེཔོཏི ཝུཙྩཏི། པཛཱནཏོཏི ཨསམྨོཧཝསེན པཛཱནནྟསྶ, ཝིནྡནྟསྶཱཏི ཝཱ ཨཏྠོ། ‘‘ཨཝིཀྑེཔོ མེ པཊིལདྡྷོ’’ཏི ཨཱརམྨཎཀརཎཝསེན པཛཱནནྟསྶ ཝཱ། ཏཱཡ སཏིཡཱཏི ཏཱཡ ཨུཔཊྛིཏཱཡ སཏིཡཱ། ཏེན ཉཱཎེནཱཏི ཏེན ཨཝིཀྑེཔཛཱནནཉཱཎེན། སཏོ ཀཱརཱི ཧོཏཱིཏི ཨེཏྠ ཡསྨཱ ཉཱཎསམྤཡུཏྟཱ ཨེཝ སཏི སཏཱིཏི ཨདྷིཔྤེཏཱ, ཡཐཱཧ – ‘‘སཏིམཱ ཧོཏི པརམེན སཏིནེཔཀྐེན སམནྣཱགཏོ’’ཏི (ཝིབྷ॰ ༤༦༧)། ཏསྨཱ ‘‘སཏོ’’ཏི ཝཙནེནེཝ ཉཱཎམྤི གཧིཏམེཝ ཧོཏི།

    165.Bāttiṃsāya ākārehīti tāsu tāsu avatthāsu yathākkamena labbhamānānaṃ anavasesapariyādānavasena vuttaṃ. Dīghaṃ assāsavasenāti mātikāya ‘‘dīgha’’ntivuttaassāsavasena. Evaṃ sesesu. Ekaggatanti ekaggabhāvaṃ. Avikkhepanti avikkhipanaṃ. Ekaggatā eva hi nānārammaṇesu cittassa avikkhipanato avikkhepoti vuccati. Pajānatoti asammohavasena pajānantassa, vindantassāti vā attho. ‘‘Avikkhepo me paṭiladdho’’ti ārammaṇakaraṇavasena pajānantassa vā. Tāya satiyāti tāya upaṭṭhitāya satiyā. Tena ñāṇenāti tena avikkhepajānanañāṇena. Sato kārī hotīti ettha yasmā ñāṇasampayuttā eva sati satīti adhippetā, yathāha – ‘‘satimā hoti paramena satinepakkena samannāgato’’ti (vibha. 467). Tasmā ‘‘sato’’ti vacaneneva ñāṇampi gahitameva hoti.

    ༡༦༦. ཨདྡྷཱནསངྑཱཏེཏི དཱིགྷསངྑཱཏེ ཀཱལེ། དཱིགྷོ ཧི མགྒོ ཨདྡྷཱནོཏི ཝུཙྩཏི། ཨཡམྤི ཀཱལོ དཱིགྷཏྟཱ ཨདྡྷཱནོ ཝིཡ ཨདྡྷཱནོཏི ཝུཏྟོ། ‘‘ཨསྶསཏཱི’’ཏི ཙ ‘‘པསྶསཏཱི’’ཏི ཙ ཨསྶཱསཉྩ པསྶཱསཉྩ ཝིསུཾ ཝིསུཾ ཝཏྭཱཔི བྷཱཝནཱཡ ནིརནྟརཔྤཝཏྟིདསྶནཏྠཾ ‘‘ཨསྶསཏིཔི པསྶསཏིཔཱི’’ཏི པུན སམཱསེཏྭཱ ཝུཏྟཾ། ཚནྡོ ཨུཔྤཛྫཏཱིཏི བྷཱཝནཱབྷིཝུདྡྷིཡཱ བྷིཡྻོབྷཱཝཱཡ ཚནྡོ ཛཱཡཏི། སུཁུམཏརནྟི པསྶམྦྷནསབྦྷཱཝཏོ ཝུཏྟཾ། པཱམོཛྫཾ ཨུཔྤཛྫཏཱིཏི བྷཱཝནཱཔཱརིཔཱུརིཡཱ པཱིཏི ཛཱཡཏི། ཨསྶཱསཔསྶཱསཱཔི ཙིཏྟཾ ཝིཝཏྟཏཱིཏི ཨསྶཱསཔསྶཱསེ ནིསྶཱཡ པཊིབྷཱགནིམིཏྟེ ཨུཔྤཛྫནྟེ པཀཏིཨསྶཱསཔསྶཱསཏོ ཙིཏྟཾ ནིཝཏྟཏི། ཨུཔེཀྑཱ སཎྛཱཏཱིཏི ཏསྨིཾ པཊིབྷཱགནིམིཏྟེ ཨུཔཙཱརཔྤནཱསམཱདྷིཔཏྟིཡཱ པུན སམཱདྷཱནེ བྱཱཔཱརཱབྷཱཝཏོ ཏཏྲམཛ྄ཛྷཏྟུཔེཀྑཱ སཎྛཱཏི ནཱམ། ནཝཧཱཀཱརེཧཱིཏི ཨེཏྠ བྷཱཝནཱརམྦྷཏོ པབྷུཏི པུརེ ཚནྡུཔྤཱདཱ ‘‘ཨསྶསཏིཔི པསྶསཏིཔཱི’’ཏི ཝུཏྟཱ ཏཡོ ཨཱཀཱརཱ, ཚནྡུཔྤཱདཏོ པབྷུཏི པུརེ པཱམོཛྫུཔྤཱདཱ ཏཡོ, པཱམོཛྫུཔྤཱདཏོ པབྷུཏི ཏཡོཏི ནཝ ཨཱཀཱརཱ། ཀཱཡོཏི ཙུཎྞཝིཙུཎྞཱཔི ཨསྶཱསཔསྶཱསཱ སམཱུཧཊྛེན ཀཱཡོ། པཀཏིཨསྶཱསཔཀཏིཔསྶཱསེ ནིསྶཱཡ ཨུཔྤནྣནིམིཏྟམྤི ཨསྶཱསཔསྶཱསཱཏི ནཱམཾ ལབྷཏི། ཨུཔཊྛཱནཾ སཏཱིཏི ཏཾ ཨཱརམྨཎཾ ཨུཔེཙྩ ཏིཊྛཏཱིཏི སཏི ཨུཔཊྛཱནཾ ནཱམ། ཨནུཔསྶནཱ ཉཱཎནྟི སམཐཝསེན ནིམིཏྟཀཱཡཱནུཔསྶནཱ, ཝིཔསྶནཱཝསེན ནཱམཀཱཡརཱུཔཀཱཡཱནུཔསྶནཱ ཉཱཎནྟི ཨཏྠོ། ཀཱཡོ ཨུཔཊྛཱནནྟི སོ ཀཱཡོ ཨུཔེཙྩ ཏིཊྛཏི ཨེཏྠ སཏཱིཏི ཨུཔཊྛཱནཾ ནཱམ། ནོ སཏཱིཏི སོ ཀཱཡོ སཏི ནཱམ ན ཧོཏཱིཏི ཨཏྠོ། ཏཱཡ སཏིཡཱཏི ཨིདཱནི ཝུཏྟཱཡ སཏིཡཱ། ཏེན ཉཱཎེནཱཏི ཨིདཱནེཝ ཝུཏྟེན ཉཱཎེན། ཏཾ ཀཱཡཾ ཨནུཔསྶཏཱིཏི སམཐཝིཔསྶནཱཝསེན ཡཐཱཝུཏྟཾ ཀཱཡཾ ཨནུགནྟྭཱ ཛྷཱནསམྤཡུཏྟཉཱཎེན ཝཱ ཝིཔསྶནཱཉཱཎེན ཝཱ པསྶཏི།

    166.Addhānasaṅkhāteti dīghasaṅkhāte kāle. Dīgho hi maggo addhānoti vuccati. Ayampi kālo dīghattā addhāno viya addhānoti vutto. ‘‘Assasatī’’ti ca ‘‘passasatī’’ti ca assāsañca passāsañca visuṃ visuṃ vatvāpi bhāvanāya nirantarappavattidassanatthaṃ ‘‘assasatipi passasatipī’’ti puna samāsetvā vuttaṃ. Chando uppajjatīti bhāvanābhivuddhiyā bhiyyobhāvāya chando jāyati. Sukhumataranti passambhanasabbhāvato vuttaṃ. Pāmojjaṃ uppajjatīti bhāvanāpāripūriyā pīti jāyati. Assāsapassāsāpi cittaṃ vivattatīti assāsapassāse nissāya paṭibhāganimitte uppajjante pakatiassāsapassāsato cittaṃ nivattati. Upekkhā saṇṭhātīti tasmiṃ paṭibhāganimitte upacārappanāsamādhipattiyā puna samādhāne byāpārābhāvato tatramajjhattupekkhā saṇṭhāti nāma. Navahākārehīti ettha bhāvanārambhato pabhuti pure chanduppādā ‘‘assasatipi passasatipī’’ti vuttā tayo ākārā, chanduppādato pabhuti pure pāmojjuppādā tayo, pāmojjuppādato pabhuti tayoti nava ākārā. Kāyoti cuṇṇavicuṇṇāpi assāsapassāsā samūhaṭṭhena kāyo. Pakatiassāsapakatipassāse nissāya uppannanimittampi assāsapassāsāti nāmaṃ labhati. Upaṭṭhānaṃ satīti taṃ ārammaṇaṃ upecca tiṭṭhatīti sati upaṭṭhānaṃ nāma. Anupassanā ñāṇanti samathavasena nimittakāyānupassanā, vipassanāvasena nāmakāyarūpakāyānupassanā ñāṇanti attho. Kāyo upaṭṭhānanti so kāyo upecca tiṭṭhati ettha satīti upaṭṭhānaṃ nāma. No satīti so kāyo sati nāma na hotīti attho. Tāya satiyāti idāni vuttāya satiyā. Tena ñāṇenāti idāneva vuttena ñāṇena. Taṃ kāyaṃ anupassatīti samathavipassanāvasena yathāvuttaṃ kāyaṃ anugantvā jhānasampayuttañāṇena vā vipassanāñāṇena vā passati.

    མཱཏིཀཱཡ ཀཱཡཱདཱིནཾ པདཱནཾ ཨབྷཱཝེཔི ཨིམསྶ ཙཏུཀྐསྶ ཀཱཡཱནུཔསྶནཱཝསེན ཝུཏྟཏྟཱ ཨིདཱནི ཝཏྟབྦཾ ‘‘ཀཱཡེ ཀཱཡཱནུཔསྶནཱསཏིཔཊྛཱནབྷཱཝནཱ’’ཏི ཝཙནཾ སནྡྷཱཡ ཀཱཡཔདནིདྡེསོ ཀཏོ། ཀཱཡེ ཀཱཡཱནུཔསྶནཱཏི བཧུཝིདྷེ ཀཱཡེ ཏསྶ ཏསྶ ཀཱཡསྶ ཨནུཔསྶནཱ། ཨཐ ཝཱ ཀཱཡེ ཀཱཡཱནུཔསྶནཱ, ན ཨཉྙདྷམྨཱནུཔསྶནཱཏི ཝུཏྟཾ ཧོཏི། ཨནིཙྩདུཀྑཱནཏྟཱསུབྷབྷཱུཏེ ཀཱཡེ ན ནིཙྩསུཁཏྟསུབྷཱནུཔསྶནཱ, ཨཐ ཁོ ཨནིཙྩདུཀྑཱནཏྟཱསུབྷཏོ ཀཱཡསྶེཝ ཨནུཔསྶནཱ། ཨཐ ཝཱ ཀཱཡེ ཨཧནྟི ཝཱ མམནྟི ཝཱ ཨིཏྠཱིཏི ཝཱ པུརིསོཏི ཝཱ གཧེཏབྦསྶ ཀསྶཙི ཨནནུཔསྶནཏོ ཏསྶེཝ ཀཱཡམཏྟསྶ ཨནུཔསྶནཱཏི ཝུཏྟཾ ཧོཏི། ཨུཔརི ཝེདནཱསུ ཝེདནཱནུཔསྶནཱཏིཨཱདཱིསུ ཏཱིསུཔི ཨེསེཝ ནཡོ། སཏིཡེཝ ཨུཔཊྛཱནཾ སཏིཔཊྛཱནཾ, ཀཱཡཱནུཔསྶནཱཡ སམྤཡུཏྟཾ སཏིཔཊྛཱནཾ ཀཱཡཱནུཔསྶནཱསཏིཔཊྛཱནཾ, ཏསྶ བྷཱཝནཱ ཀཱཡཱནུཔསྶནཱསཏིཔཊྛཱནབྷཱཝནཱ།

    Mātikāya kāyādīnaṃ padānaṃ abhāvepi imassa catukkassa kāyānupassanāvasena vuttattā idāni vattabbaṃ ‘‘kāye kāyānupassanāsatipaṭṭhānabhāvanā’’ti vacanaṃ sandhāya kāyapadaniddeso kato. Kāye kāyānupassanāti bahuvidhe kāye tassa tassa kāyassa anupassanā. Atha vā kāye kāyānupassanā, na aññadhammānupassanāti vuttaṃ hoti. Aniccadukkhānattāsubhabhūte kāye na niccasukhattasubhānupassanā, atha kho aniccadukkhānattāsubhato kāyasseva anupassanā. Atha vā kāye ahanti vā mamanti vā itthīti vā purisoti vā gahetabbassa kassaci ananupassanato tasseva kāyamattassa anupassanāti vuttaṃ hoti. Upari vedanāsu vedanānupassanātiādīsu tīsupi eseva nayo. Satiyeva upaṭṭhānaṃ satipaṭṭhānaṃ, kāyānupassanāya sampayuttaṃ satipaṭṭhānaṃ kāyānupassanāsatipaṭṭhānaṃ, tassa bhāvanā kāyānupassanāsatipaṭṭhānabhāvanā.

    ༡༦༧. ཏཾ ཀཱཡནྟི ཨནིདྡིཊྛེཔི ནཱམརཱུཔཀཱཡེ ཀཱཡསདྡེན ཏསྶཱཔི སངྒཧིཏཏྟཱ ནིདྡིཊྛཾ ཝིཡ ཀཏྭཱ ཝུཏྟཾ། ཨནིཙྩཱནུཔསྶནཱདཡོ ཧི ནཱམརཱུཔཀཱཡེ ཨེཝ ལབྦྷནྟི, ན ནིམིཏྟཀཱཡེ། ཨནུཔསྶནཱ ཙ བྷཱཝནཱ ཙ ཝུཏྟཏྠཱ ཨེཝ། དཱིགྷཾ ཨསྶཱསཔསྶཱསཝསེནཱཏིཨཱདི ཨཱནཱཔཱནསྶཏིབྷཱཝནཱཡ ཨཱནིསཾསཾ དསྶེཏུཾ ཝུཏྟཾ། ཏསྶཱ ཧི སཏིཝེཔུལླཏཱཉཱཎཝེཔུལླཏཱ ཙ ཨཱནིསཾསོ། ཏཏྠ ཙིཏྟསྶ ཨེཀགྒཏཾ ཨཝིཀྑེཔཾ པཛཱནཏོཏི པཊིལདྡྷཛ྄ཛྷཱནསྶ ཝིཔསྶནཱཀཱལེ ཙིཏྟེཀགྒཏཾ སནྡྷཱཡ ཝུཏྟཾ། ཝིདིཏཱ ཝེདནཱཏི སཱམཉྙཏོ ཨུདཡདསྶནེན ཝིདིཏཱ ཝེདནཱ། ཝིདིཏཱ ཨུཔཊྛཧནྟཱིཏི ཁཡཏོ ཝཡཏོ སུཉྙཏོ ཝིདིཏཱ ཨུཔཊྛཧནྟི། ཝིདིཏཱ ཨབྦྷཏྠཾ གཙྪནྟཱིཏི སཱམཉྙཏོ ཝཡདསྶནེན ཝིདིཏཱ ཝིནཱསཾ གཙྪནྟི, བྷིཛྫནྟཱིཏི ཨཏྠོ། སཉྙཱཝིཏཀྐེསུཔི ཨེསེཝ ནཡོ། ཨིམེསུ པན ཏཱིསུ ཝུཏྟེསུ སེསཱ རཱུཔདྷམྨཱཔི ཝུཏྟཱ ཧོནྟི། ཀསྨཱ པན ཨིམེ ཏཡོ ཨེཝ ཝུཏྟཱཏི ཙེ? དུཔྤརིགྒཧཏྟཱ། ཝེདནཱསུ ཏཱཝ སུཁདུཀྑཱ པཱཀཊཱ, ཨུཔེཀྑཱ པན སུཁུམཱ དུཔྤརིགྒཧཱ, ན སུཊྛུ པཱཀཊཱ། སཱཔི ཙསྶ པཱཀཊཱ ཧོཏི, སཉྙཱ ཨཱཀཱརམཏྟགྒཱཧཀཏྟཱ ན ཡཐཱསབྷཱཝགྒཱཧིནཱི ། སཱ ཙ སབྷཱཝསཱམཉྙལཀྑཎགྒཱཧཀེན ཝིཔསྶནཱཉཱཎེན སམྤཡུཏྟཱ ཨཏི ཝིཡ ཨཔཱཀཊཱ། སཱཔི ཙསྶ པཱཀཊཱ ཧོཏི, ཝིཏཀྐོ ཉཱཎཔཏིརཱུཔཀཏྟཱ ཉཱཎཏོ ཝིསུཾ ཀཏྭཱ དུཔྤརིགྒཧོ། ཉཱཎཔཏིརཱུཔཀོ ཧི ཝིཏཀྐོ། ཡཐཱཧ – ‘‘ཡཱ ཙཱཝུསོ ཝིསཱཁ, སམྨཱདིཊྛི ཡོ ཙ སམྨཱསངྐཔྤོ, ཨིམེ དྷམྨཱ པཉྙཱཀྑནྡྷེ སངྒཧིཏཱ’’ཏི (མ॰ ནི॰ ༡.༤༦༢)། སོཔི ཙསྶ ཝིཏཀྐོ པཱཀཊོ ཧོཏཱིཏི ཨེཝཾ དུཔྤརིགྒཧེསུ ཝུཏྟེསུ སེསཱ ཝུཏྟཱཝ ཧོནྟཱིཏི། ཨིམེསཾ པན པདཱནཾ ནིདྡེསེ ཀཐཾ ཝིདིཏཱ ཝེདནཱ ཨུཔྤཛྫནྟཱིཏི པུཙྪིཏྭཱ ཏཾ ཨཝིསྶཛྫེཏྭཱཝ ཝེདནུཔྤཱདསྶ ཝིདིཏཏྟེཡེཝ ཝིསྶཛྫིཏེ ཝེདནཱཡ ཝིདིཏཏྟཾ ཝིསྶཛྫིཏཾ ཧོཏཱིཏི ཀཐཾ ཝེདནཱཡ ཨུཔྤཱདོ ཝིདིཏོ ཧོཏཱིཏིཨཱདིམཱཧ། སེསེསུཔི ཨེསེཝ ནཡོ། ཨཝིཛྫཱསམུདཡཱ ཨཝིཛྫཱནིརོདྷཱཏིཨཱདཡོ ཧེཊྛཱ ཝུཏྟཏྠཱ ཨེཝ། ཨིམིནཱཝ ནཡེན སཉྙཱཝིཏཀྐཱཔི ཝེདིཏབྦཱ། ཝིཏཀྐཝཱརེ པན ‘‘ཕསྶསམུདཡཱ ཕསྶནིརོདྷཱ’’ཏི ཨཝཏྭཱ ཕསྶཊྛཱནེ སཉྙཱསམུདཡཱ སཉྙཱནིརོདྷཱཏི ཝུཏྟཾ། ཏཾ ཀསྨཱ ཨིཏི ཙེ? སཉྙཱམཱུལཀཏྟཱ ཝིཏཀྐསྶ། ‘‘སཉྙཱནཱནཏྟཾ པཊིཙྩ ཨུཔྤཛྫཏི སངྐཔྤནཱནཏྟ’’ནྟི (དཱི॰ ནི॰ ༣.༣༥༩) ཧི ཝུཏྟཾ།

    167. Taṃ kāyanti aniddiṭṭhepi nāmarūpakāye kāyasaddena tassāpi saṅgahitattā niddiṭṭhaṃ viya katvā vuttaṃ. Aniccānupassanādayo hi nāmarūpakāye eva labbhanti, na nimittakāye. Anupassanā ca bhāvanā ca vuttatthā eva. Dīghaṃ assāsapassāsavasenātiādi ānāpānassatibhāvanāya ānisaṃsaṃ dassetuṃ vuttaṃ. Tassā hi sativepullatāñāṇavepullatā ca ānisaṃso. Tattha cittassa ekaggataṃ avikkhepaṃ pajānatoti paṭiladdhajjhānassa vipassanākāle cittekaggataṃ sandhāya vuttaṃ. Viditā vedanāti sāmaññato udayadassanena viditā vedanā. Viditā upaṭṭhahantīti khayato vayato suññato viditā upaṭṭhahanti. Viditā abbhatthaṃ gacchantīti sāmaññato vayadassanena viditā vināsaṃ gacchanti, bhijjantīti attho. Saññāvitakkesupi eseva nayo. Imesu pana tīsu vuttesu sesā rūpadhammāpi vuttā honti. Kasmā pana ime tayo eva vuttāti ce? Duppariggahattā. Vedanāsu tāva sukhadukkhā pākaṭā, upekkhā pana sukhumā duppariggahā, na suṭṭhu pākaṭā. Sāpi cassa pākaṭā hoti, saññā ākāramattaggāhakattā na yathāsabhāvaggāhinī . Sā ca sabhāvasāmaññalakkhaṇaggāhakena vipassanāñāṇena sampayuttā ati viya apākaṭā. Sāpi cassa pākaṭā hoti, vitakko ñāṇapatirūpakattā ñāṇato visuṃ katvā duppariggaho. Ñāṇapatirūpako hi vitakko. Yathāha – ‘‘yā cāvuso visākha, sammādiṭṭhi yo ca sammāsaṅkappo, ime dhammā paññākkhandhe saṅgahitā’’ti (ma. ni. 1.462). Sopi cassa vitakko pākaṭo hotīti evaṃ duppariggahesu vuttesu sesā vuttāva hontīti. Imesaṃ pana padānaṃ niddese kathaṃ viditā vedanā uppajjantīti pucchitvā taṃ avissajjetvāva vedanuppādassa viditatteyeva vissajjite vedanāya viditattaṃ vissajjitaṃ hotīti kathaṃ vedanāya uppādo vidito hotītiādimāha. Sesesupi eseva nayo. Avijjāsamudayā avijjānirodhātiādayo heṭṭhā vuttatthā eva. Imināva nayena saññāvitakkāpi veditabbā. Vitakkavāre pana ‘‘phassasamudayā phassanirodhā’’ti avatvā phassaṭṭhāne saññāsamudayā saññānirodhāti vuttaṃ. Taṃ kasmā iti ce? Saññāmūlakattā vitakkassa. ‘‘Saññānānattaṃ paṭicca uppajjati saṅkappanānatta’’nti (dī. ni. 3.359) hi vuttaṃ.

    ཨནིཙྩཏོ མནསིཀརོཏོཏིཨཱདཱིསུ ཙ ‘‘ཝེདནཾ ཨནིཙྩཏོ མནསིཀརོཏོ’’ཏིཨཱདིནཱ ནཡེན ཏསྨིཾ ཏསྨིཾ ཝཱརེ སོ སོཡེཝ དྷམྨོ ཡོཛེཏབྦོ། ཡསྨཱ པན ཝིཔསྶནཱསམྤཡུཏྟཱ ཝེདནཱ ཝིཔསྶནཱཀིཙྩཀརཎེ ཨསམཏྠཏྟཱ ཝིཔསྶནཱཡ ཨནུཔཀཱརིཀཱ, ཏསྨཱཡེཝ ཙ བོདྷིཔཀྑིཡདྷམྨེསུ ནཱགཏཱ། ཝིཔསྶནཱསམྤཡུཏྟཱཡ པན སཉྙཱཡ ཀིཙྩམེཝ ཨཔརིབྱཏྟཾ, ཏསྨཱ སཱ ཝིཔསྶནཱཡ ཨེཀནྟམནུཔཀཱརིཀཱ ཨེཝ། ཝིཏཀྐཾ པན ཝིནཱ ཝིཔསྶནཱཀིཙྩམེཝ ནཏྠི། ཝིཏཀྐསཧཱཡཱ ཧི ཝིཔསྶནཱ སཀཀིཙྩཾ ཀརོཏི། ཡཐཱཧ –

    Aniccato manasikarototiādīsu ca ‘‘vedanaṃ aniccato manasikaroto’’tiādinā nayena tasmiṃ tasmiṃ vāre so soyeva dhammo yojetabbo. Yasmā pana vipassanāsampayuttā vedanā vipassanākiccakaraṇe asamatthattā vipassanāya anupakārikā, tasmāyeva ca bodhipakkhiyadhammesu nāgatā. Vipassanāsampayuttāya pana saññāya kiccameva aparibyattaṃ, tasmā sā vipassanāya ekantamanupakārikā eva. Vitakkaṃ pana vinā vipassanākiccameva natthi. Vitakkasahāyā hi vipassanā sakakiccaṃ karoti. Yathāha –

    ‘‘པཉྙཱ ཨཏྟནོ དྷམྨཏཱཡ ཨནིཙྩཾ དུཀྑམནཏྟཱཏི ཨཱརམྨཎཾ ནིཙྪེཏུཾ ན སཀྐོཏི, ཝིཏཀྐེ པན ཨཱཀོཊེཏྭཱ ཨཱཀོཊེཏྭཱ དེནྟེ སཀྐོཏི། ཀཐཾ? ཡཐཱ ཧི ཧེརཉྙིཀོ ཀཧཱཔཎཾ ཧཏྠེ ཋཔེཏྭཱ སབྦབྷཱགེསུ ཨོལོཀེཏུཀཱམོ སམཱནོཔི ན ཙཀྑུཏལེནེཝ པརིཝཏྟེཏུཾ སཀྐོཏི, ཨངྒུལིཔབྦེཧི པན པརིཝཏྟེཏྭཱ པརིཝཏྟེཏྭཱ ཨིཏོ ཙིཏོ ཙ ཨོལོཀེཏུཾ སཀྐོཏི, ཨེཝམེཝ ན པཉྙཱ ཨཏྟནོ དྷམྨཏཱཡ ཨནིཙྩཱདིཝསེན ཨཱརམྨཎཾ ནིཙྪེཏུཾ སཀྐོཏི, ཨབྷིནིརོཔནལཀྑཎེན པན ཨཱཧནནཔརིཡཱཧནནརསེན ཝིཏཀྐེན ཨཱཀོཊེནྟེན ཝིཡ པརིཝཏྟེནྟེན ཝིཡ ཙ ཨཱདཱཡཱདཱཡ དིནྣམེཝ ནིཙྪེཏུཾ སཀྐོཏཱི’’ཏི (ཝིསུདྡྷི॰ ༢.༥༦༨)།

    ‘‘Paññā attano dhammatāya aniccaṃ dukkhamanattāti ārammaṇaṃ nicchetuṃ na sakkoti, vitakke pana ākoṭetvā ākoṭetvā dente sakkoti. Kathaṃ? Yathā hi heraññiko kahāpaṇaṃ hatthe ṭhapetvā sabbabhāgesu oloketukāmo samānopi na cakkhutaleneva parivattetuṃ sakkoti, aṅgulipabbehi pana parivattetvā parivattetvā ito cito ca oloketuṃ sakkoti, evameva na paññā attano dhammatāya aniccādivasena ārammaṇaṃ nicchetuṃ sakkoti, abhiniropanalakkhaṇena pana āhananapariyāhananarasena vitakkena ākoṭentena viya parivattentena viya ca ādāyādāya dinnameva nicchetuṃ sakkotī’’ti (visuddhi. 2.568).

    ཏསྨཱ ཝེདནཱསཉྙཱནཾ ཝིཔསྶནཱཡ ཨནུཔཀཱརཏྟཱ ལཀྑཎམཏྟཝསེནེཝ དསྶེཏུཾ ‘‘ཝེདནཱཡ སཉྙཱཡཱ’’ཏི ཏཏྠ ཏཏྠ ཨེཀཝཙནེན ནིདྡེསོ ཀཏོ། ཡཏྟཀོ པན ཝིཔསྶནཱཡ བྷེདོ, ཏཏྟཀོ ཨེཝ ཝིཏཀྐསྶཱཏི དསྶེཏུཾ ‘‘ཝིཏཀྐཱན’’ནྟི ཏཏྠ ཏཏྠ བཧུཝཙནེན ནིདྡེསོ ཀཏོཏི ཝཏྟུཾ ཡུཛྫཏི།

    Tasmā vedanāsaññānaṃ vipassanāya anupakārattā lakkhaṇamattavaseneva dassetuṃ ‘‘vedanāya saññāyā’’ti tattha tattha ekavacanena niddeso kato. Yattako pana vipassanāya bhedo, tattako eva vitakkassāti dassetuṃ ‘‘vitakkāna’’nti tattha tattha bahuvacanena niddeso katoti vattuṃ yujjati.

    ༡༦༨. པུན དཱིགྷཾ ཨསྶཱསཔསྶཱསཝསེནཱཏིཨཱདི ཨཱནཱཔཱནསྶཏིབྷཱཝནཱཡ སམྤཏྟིཾ བྷཱཝནཱཕལཉྩ དསྶེཏུཾ ཝུཏྟཾ། ཏཏྠ སམོདྷཱནེཏཱིཏི ཨཱརམྨཎཾ ཋཔེཏི, ཨཱརམྨཎཾ པཏིཊྛཱཔེཏཱིཏི ཝཱ ཨཏྠོ། སམོདཧནབྱཱཔཱརཱབྷཱཝེཔི བྷཱཝནཱཔཱརིཔཱུརིཡཱ ཨེཝ སམོདཧཏི ནཱམ། གོཙརནྟི ཝིཔསྶནཱཀྑཎེ སངྑཱརཱརམྨཎཾ, མགྒཀྑཎེ ཕལཀྑཎེ ཙ ནིབྦཱནཱརམྨཎཾ། སམཏྠནྟི སམམེཝ ཨཏྠོ, སམསྶ ཝཱ ཨཏྠོཏི སམཏྠོ། ཏཾ སམཏྠཾ། སེསེསུཔི ཨེསེཝ ནཡོ། མགྒཾ སམོདྷཱནེཏཱིཏི མགྒཕལཀྑཎེཡེཝ གོཙརཾ ནིབྦཱནམེཝ། ཨཡཾ པུགྒལོཏི ཨཱནཱཔཱནསྶཏིབྷཱཝནཾ ཨནུཡུཏྟོ ཡོགཱཝཙརོཝ། ཨིམསྨིཾ ཨཱརམྨཎེཏི ཨེཏྠ པན ‘‘ཀཱཡེ’’ཏིཔདེན སངྒཧིཏེ ནཱམརཱུཔཀཱཡསངྑཱཏེ སངྑཏཱརམྨཎེ ཏེནེཝ ཀམེན མགྒེ ནིབྦཱནཱརམྨཎེ ཙ། ཡཾ ཏསྶཱཏིཨཱདཱིཧི ཨཱརམྨཎགོཙརསདྡཱནཾ ཨེཀཏྠཏཱ ཝུཏྟཱ། ཏསྶཱཏི ཏསྶ པུགྒལསྶ། པཛཱནཱཏཱིཏི པུགྒལོ པཛཱནནཱ པཉྙཱཏི པུགྒལོ པཉྙཱཡ པཛཱནཱཏཱིཏི ཝུཏྟཾ ཧོཏི། ཨཱརམྨཎསྶ ཨུཔཊྛཱནནྟི ཝིཔསྶནཱཀྑཎེ སངྑཱརཱརམྨཎསྶ, མགྒཕལཀྑཎེ ནིབྦཱནཱརམྨཎསྶ ཨུཔཊྛཱནཾ སཏི། ཨེཏྠ ཙ ཀམྨཏྠེ སཱམིཝཙནཾ ཡཐཱ རཉྙོ ཨུཔཊྛཱནནྟི། ཨཝིཀྑེཔོཏི སམཱདྷི། ཨདྷིཊྛཱནནྟི ཡཐཱཝུཏྟསངྑཱརཱརམྨཎཾ ནིབྦཱནཱརམྨཎཉྩ ། ཏཉྷི ཨདྷིཊྛཱཏི ཨེཏྠ ཙིཏྟནྟི ཨདྷིཊྛཱནཾ། ཝོདཱནནྟི ཉཱཎཾ། ཏཉྷི ཝོདཱཡཏི ཝིསུཛ྄ཛྷཏི ཏེན ཙིཏྟནྟི ཝོདཱནཾ། ལཱིནཔཀྑིཀོ སམཱདྷི ཨལཱིནབྷཱཝཔྤཏྟིཡཱ སམབྷཱུཏཏྟཱ སམཾ, ཨུདྡྷཙྩཔཀྑིཀཾ ཉཱཎཾ ཨནུདྡྷཏབྷཱཝཔྤཏྟིཡཱ སམབྷཱུཏཏྟཱ སམཾ། ཏེན ཝིཔསྶནཱམགྒཕལཀྑཎེསུ སམཐཝིཔསྶནཱནཾ ཡུགནདྡྷཏཱ ཝུཏྟཱ ཧོཏི། སཏི པན སབྦཏྠིཀཏྟཱ ཏདུབྷཡསམཏཱཡ ཨུཔཀཱརིཀཱཏི སམཾ, ཨཱརམྨཎཾ སམཏཱདྷིཊྛཱནཏྟཱ སམཾ། ཨནཝཛྫཊྛོཏི ཝིཔསྶནཱཡ ཨནཝཛྫསབྷཱཝོ། ནིཀླེསཊྛོཏི མགྒསྶ ནིཀྐིལེསསབྷཱཝོ། ནིཀྐིལེསཊྛོཏི ཝཱ པཱཋོ། ཝོདཱནཊྛོཏི ཕལསྶ པརིསུདྡྷསབྷཱཝོ། པརམཊྛོཏི ནིབྦཱནསྶ སབྦདྷམྨུཏྟམསབྷཱཝོ། པཊིཝིཛ྄ཛྷཏཱིཏི ཏཾ ཏཾ སབྷཱཝཾ ཨསམྨོཧཏོ པཊིཝིཛ྄ཛྷཏི། ཨེཏྠ ཙ ‘‘ཨཱརམྨཎསྶ ཨུཔཊྛཱན’’ནྟིཨཱདཱིཧི སམྨཱ པཊིཝེདྷོ ཝུཏྟོ། ཨེཏྠེཝ ཙ ཝོདཱནཊྛཔཊིཝེདྷསྶ ཝུཏྟཏྟཱ ཏེན ཨེཀལཀྑཎཱ ཨནཝཛྫཊྛནིཀྐིལེསཊྛཔརམཊྛཱ ལཀྑཎཧཱརཝསེན ཝུཏྟཱཡེཝ ཧོནྟི། ཡཐཱཧ –

    168. Puna dīghaṃ assāsapassāsavasenātiādi ānāpānassatibhāvanāya sampattiṃ bhāvanāphalañca dassetuṃ vuttaṃ. Tattha samodhānetīti ārammaṇaṃ ṭhapeti, ārammaṇaṃ patiṭṭhāpetīti vā attho. Samodahanabyāpārābhāvepi bhāvanāpāripūriyā eva samodahati nāma. Gocaranti vipassanākkhaṇe saṅkhārārammaṇaṃ, maggakkhaṇe phalakkhaṇe ca nibbānārammaṇaṃ. Samatthanti samameva attho, samassa vā atthoti samattho. Taṃ samatthaṃ. Sesesupi eseva nayo. Maggaṃ samodhānetīti maggaphalakkhaṇeyeva gocaraṃ nibbānameva. Ayaṃ puggaloti ānāpānassatibhāvanaṃ anuyutto yogāvacarova. Imasmiṃ ārammaṇeti ettha pana ‘‘kāye’’tipadena saṅgahite nāmarūpakāyasaṅkhāte saṅkhatārammaṇe teneva kamena magge nibbānārammaṇe ca. Yaṃ tassātiādīhi ārammaṇagocarasaddānaṃ ekatthatā vuttā. Tassāti tassa puggalassa. Pajānātīti puggalo pajānanā paññāti puggalo paññāya pajānātīti vuttaṃ hoti. Ārammaṇassa upaṭṭhānanti vipassanākkhaṇe saṅkhārārammaṇassa, maggaphalakkhaṇe nibbānārammaṇassa upaṭṭhānaṃ sati. Ettha ca kammatthe sāmivacanaṃ yathā rañño upaṭṭhānanti. Avikkhepoti samādhi. Adhiṭṭhānanti yathāvuttasaṅkhārārammaṇaṃ nibbānārammaṇañca . Tañhi adhiṭṭhāti ettha cittanti adhiṭṭhānaṃ. Vodānanti ñāṇaṃ. Tañhi vodāyati visujjhati tena cittanti vodānaṃ. Līnapakkhiko samādhi alīnabhāvappattiyā samabhūtattā samaṃ, uddhaccapakkhikaṃ ñāṇaṃ anuddhatabhāvappattiyā samabhūtattā samaṃ. Tena vipassanāmaggaphalakkhaṇesu samathavipassanānaṃ yuganaddhatā vuttā hoti. Sati pana sabbatthikattā tadubhayasamatāya upakārikāti samaṃ, ārammaṇaṃ samatādhiṭṭhānattā samaṃ. Anavajjaṭṭhoti vipassanāya anavajjasabhāvo. Niklesaṭṭhoti maggassa nikkilesasabhāvo. Nikkilesaṭṭhoti vā pāṭho. Vodānaṭṭhoti phalassa parisuddhasabhāvo. Paramaṭṭhoti nibbānassa sabbadhammuttamasabhāvo. Paṭivijjhatīti taṃ taṃ sabhāvaṃ asammohato paṭivijjhati. Ettha ca ‘‘ārammaṇassa upaṭṭhāna’’ntiādīhi sammā paṭivedho vutto. Ettheva ca vodānaṭṭhapaṭivedhassa vuttattā tena ekalakkhaṇā anavajjaṭṭhanikkilesaṭṭhaparamaṭṭhā lakkhaṇahāravasena vuttāyeva honti. Yathāha –

    ‘‘ཝུཏྟམྷི ཨེཀདྷམྨེ, ཡེ དྷམྨཱ ཨེཀལཀྑཎཱ ཀེཙི།

    ‘‘Vuttamhi ekadhamme, ye dhammā ekalakkhaṇā keci;

    ཝུཏྟཱ བྷཝནྟི སབྦེ, སོ ཧཱརོ ལཀྑཎོ ནཱམཱ’’ཏི༎ (ནེཏྟི॰ ༤.༥ ནིདྡེསཝཱར)།

    Vuttā bhavanti sabbe, so hāro lakkhaṇo nāmā’’ti. (netti. 4.5 niddesavāra);

    ཨནཝཛྫཊྛོ ནིཀྐིལེསཊྛོ ཙེཏྠ ཨཝིཀྑེཔསངྑཱཏསྶ སམསྶ ཨཏྠོ པཡོཛནནྟི སམཏྠོ, ཝོདཱནཊྛོ ཝིཔསྶནཱམགྒཝོདཱནཾ སནྡྷཱཡ སམམེཝ ཨཏྠོཏི སམཏྠོ, ཕལཝོདཱནཾ སནྡྷཱཡ མགྒཝོདཱནསངྑཱཏསྶ སམསྶ ཨཏྠོཏི སམཏྠོ, པརམཊྛོ པན སམམེཝ ཨཏྠོཏི ཝཱ ནིབྦཱནཔཡོཛནཏྟཱ སབྦསྶ སམསྶ ཨཏྠོཏི ཝཱ སམཏྠོ, ཏཾ ཝུཏྟཔྤཀཱརཾ སམཉྩ སམཏྠཉྩ ཨེཀདེསསརཱུཔེཀསེསཾ ཀཏྭཱ སམཏྠཉྩ པཊིཝིཛ྄ཛྷཏཱིཏི ཝུཏྟཾ། ཨིནྡྲིཡབལབོཛ྄ཛྷངྒདྷམྨཱ ཝིཔསྶནཱམགྒཕལཀྑཎེཔི ལབྦྷནྟི, མགྒོ ཙ ཏིསྶོ ཙ ཝིསུདྡྷིཡོ མགྒཕལཀྑཎེཡེཝ, ཝིམོཀྑོ ཙ ཝིཛྫཱ ཙ ཁཡེ ཉཱཎཉྩ མགྒཀྑཎེཡེཝ, ཝིམུཏྟི ཙ ཨནུཔྤཱདེ ཉཱཎཉྩ ཕལཀྑཎེཡེཝ, སེསཱ ཝིཔསྶནཱཀྑཎེཔཱིཏི། དྷམྨཝཱརེ ཨིམེ དྷམྨེ ཨིམསྨིཾ ཨཱརམྨཎེ སམོདྷཱནེཏཱིཏི ནིབྦཱནཾ ཋཔེཏྭཱ སེསཱ ཡཐཱཡོགཾ ཝེདིཏབྦཱ། ཨིདཾ པན ཡེབྷུཡྻཝསེན ཝུཏྟཾ། ཨཝུཏྟཏྠཱ པནེཏྠ ཧེཊྛཱ ཝུཏྟཱ ཨེཝ། ཨེཀེཀཙཏུཀྐཝསེནེཏྠ ནིཡྻཱནེ དསྶིཏེཔི ཙཏུཀྐནྟོགདྷསྶ ཨེཀེཀསྶཱཔི བྷཱགསྶ ནིཡྻཱནསྶ ཨུཔནིསྶཡཏྟཱ ཨེཀེཀབྷཱགཝསེན ནིཡྻཱནཾ དསྶིཏཾ། ན ཧི ཨེཀེཀཾ ཝིནཱ ནིཡྻཱནཾ ཧོཏཱིཏི།

    Anavajjaṭṭho nikkilesaṭṭho cettha avikkhepasaṅkhātassa samassa attho payojananti samattho, vodānaṭṭho vipassanāmaggavodānaṃ sandhāya samameva atthoti samattho, phalavodānaṃ sandhāya maggavodānasaṅkhātassa samassa atthoti samattho, paramaṭṭho pana samameva atthoti vā nibbānapayojanattā sabbassa samassa atthoti vā samattho, taṃ vuttappakāraṃ samañca samatthañca ekadesasarūpekasesaṃ katvā samatthañca paṭivijjhatīti vuttaṃ. Indriyabalabojjhaṅgadhammā vipassanāmaggaphalakkhaṇepi labbhanti, maggo ca tisso ca visuddhiyo maggaphalakkhaṇeyeva, vimokkho ca vijjā ca khaye ñāṇañca maggakkhaṇeyeva, vimutti ca anuppāde ñāṇañca phalakkhaṇeyeva, sesā vipassanākkhaṇepīti. Dhammavāre ime dhamme imasmiṃ ārammaṇe samodhānetīti nibbānaṃ ṭhapetvā sesā yathāyogaṃ veditabbā. Idaṃ pana yebhuyyavasena vuttaṃ. Avuttatthā panettha heṭṭhā vuttā eva. Ekekacatukkavasenettha niyyāne dassitepi catukkantogadhassa ekekassāpi bhāgassa niyyānassa upanissayattā ekekabhāgavasena niyyānaṃ dassitaṃ. Na hi ekekaṃ vinā niyyānaṃ hotīti.

    དཱིགྷཾཨསྶཱསཔསྶཱསནིདྡེསཝཎྞནཱ ནིཊྛིཏཱ།

    Dīghaṃassāsapassāsaniddesavaṇṇanā niṭṭhitā.

    ༡༦༩. རསྶནིདྡེསེ ཨིཏྟརསངྑཱཏེཏི པརིཏྟསངྑཱཏེ ཀཱལེ། སེསམེཏྠ ཝུཏྟནཡེན ཝེདིཏབྦཾ།

    169. Rassaniddese ittarasaṅkhāteti parittasaṅkhāte kāle. Sesamettha vuttanayena veditabbaṃ.

    ༡༧༠. སབྦཀཱཡཔཊིསཾཝེདིནིདྡེསེ ཨརཱུཔདྷམྨེསུ ཝེདནཱཡ ཨོལཱ༹རིཀཏྟཱ སུཁགྒཧཎཏྠཾ པཋམཾ ཨིཊྛཱནིཊྛཱརམྨཎསཾཝེདིཀཱ ཝེདནཱ ཝུཏྟཱ, ཏཏོ ཡཾ ཝེདེཏི, ཏཾ སཉྫཱནཱཏཱིཏི ཨེཝཾ ཝེདནཱཝིསཡསྶ ཨཱཀཱརགྒཱཧིཀཱ སཉྙཱ, ཏཏོ སཉྙཱཝསེན ཨབྷིསངྑཱརིཀཱ ཙེཏནཱ, ཏཏོ ‘‘ཕུཊྛོ ཝེདེཏི, ཕུཊྛོ སཉྫཱནཱཏི, ཕུཊྛོ ཙེཏེཏཱི’’ཏི (སཾ॰ ནི॰ ༤.༩༣) ཝཙནཏོ ཕསྶོ, ཏཏོ སབྦེསཾ སཱདྷཱརཎལཀྑཎོ མནསིཀཱརོ, ཙེཏནཱདཱིཧི སངྑཱརཀྑནྡྷོ ཝུཏྟོ། ཨེཝཾ ཏཱིསུ ཁནྡྷེསུ ཝུཏྟེསུ ཏཾནིསྶཡོ ཝིཉྙཱཎཀྑནྡྷོ ཝུཏྟོཝ ཧོཏི། ནཱམཉྩཱཏི ཝུཏྟཔྤཀཱརཾ ནཱམཉྩ། ནཱམཀཱཡོ ཙཱཏི ཨིདཾ པན ནཱམེན ནིབྦཱནསྶཔི སངྒཧིཏཏྟཱ ལོཀུཏྟརཱནཉྩ ཨཝིཔསྶནུཔགཏྟཱ ཏཾ ཨཔནེཏུཾ ཝུཏྟཾ། ‘‘ཀཱཡོ’’ཏི ཧི ཝཙནེན ནིབྦཱནཾ ཨཔནཱིཏཾ ཧོཏི ནིབྦཱནསྶ རཱསིཝིནིམུཏྟཏྟཱ། ཡེ ཙ ཝུཙྩནྟི ཙིཏྟསངྑཱརཱཏི ‘‘སཉྙཱ ཙ ཝེདནཱ ཙ ཙེཏསིཀཱ ཨེཏེ དྷམྨཱ ཙིཏྟཔཊིབདྡྷཱ ཙིཏྟསངྑཱརཱ’’ཏི (པཊི॰ མ॰ ༡.༡༧༤; མ॰ ནི॰ ༡.༤༦༣) ཨེཝཾ ཝུཙྩམཱནཱཔི ཙིཏྟསངྑཱརཱ ཨིདྷ ནཱམཀཱཡེནེཝ སངྒཧིཏཱཏི ཝུཏྟཾ ཧོཏི། མཧཱབྷཱུཏཱཏི མཧནྟཔཱཏུབྷཱཝཏོ མཧཱབྷཱུཏསཱམཉྙཏོ མཧཱཔརིཧཱརཏོ མཧཱཝིཀཱརཏོ མཧནྟབྷཱུཏཏྟཱ ཙཱཏི མཧཱབྷཱུཏཱ། ཏེ པན – པཐཝཱི ཨཱཔོ ཏེཛོ ཝཱཡོཏི ཙཏྟཱརོ། ཙཏུནྣཉྩ མཧཱབྷཱུཏཱནཾ ཨུཔཱདཱཡརཱུཔནྟི ཨུཔཡོགཏྠེ སཱམིཝཙནཾ, ཙཏྟཱརོ མཧཱབྷཱུཏེ ཨུཔཱདཱཡ ནིསྶཱཡ ཨམུཉྩིཏྭཱ པཝཏྟརཱུཔནྟི ཨཏྠོ། ཏཾ པན – ཙཀྑུ སོཏཾ གྷཱནཾ ཛིཝ྄ཧཱ ཀཱཡོ རཱུཔཾ སདྡོ གནྡྷོ རསོ ཨིཏྠིནྡྲིཡཾ པུརིསིནྡྲིཡཾ ཛཱིཝིཏིནྡྲིཡཾ ཧདཡཝཏྠུ ཨོཛཱ ཀཱཡཝིཉྙཏྟི ཝཙཱིཝིཉྙཏྟི ཨཱཀཱསདྷཱཏུ རཱུཔསྶ ལཧུཏཱ མུདུཏཱ ཀམྨཉྙཏྟཱ ཨུཔཙཡོ སནྟཏི ཛརཏཱ ཨནིཙྩཏཱཏི ཙཏུཝཱིསཏིཝིདྷཾ། ཨསྶཱསོ ཙ པསྶཱསོ ཙཱཏི པཱཀཏིཀོཡེཝ། ཨསྶཱསཔསྶཱསེ ནིསྶཱཡ ཨུཔྤནྣཾ པཊིབྷཱགནིམིཏྟམྤི ཏདེཝ ནཱམཾ ལབྷཏི པཐཝཱིཀསིཎཱདཱིནི ཝིཡ། རཱུཔསརིཀྑཀཏྟཱ རཱུཔནྟི ཙ ནཱམཾ ལབྷཏི ‘‘བཧིདྡྷཱ རཱུཔཱནི པསྶཏཱི’’ཏིཨཱདཱིསུ (དྷ॰ ས॰ ༢༠༤; དཱི॰ ནི॰ ༣.༣༣༨) ཝིཡ། ནིམིཏྟཉྩ ཨུཔནིབནྡྷནཱཏི སཏིཨུཔནིབནྡྷནཱཡ ནིམིཏྟབྷཱུཏཾ ཨསྶཱསཔསྶཱསཱནཾ ཕུསནཊྛཱནཾ། ཡེ ཙ ཝུཙྩནྟི ཀཱཡསངྑཱརཱཏི ‘‘ཨསྶཱསཔསྶཱསཱ ཀཱཡིཀཱ ཨེཏེ དྷམྨཱ ཀཱཡཔཊིབདྡྷཱ ཀཱཡསངྑཱརཱ’’ཏི (པཊི॰ མ॰ ༡.༡༧༡; མ॰ ནི॰ ༡.༤༦༣) ཨེཝཾ ཝུཙྩམཱནཱཔི ཀཱཡསངྑཱརཱ ཨིདྷ རཱུཔཀཱཡེནེཝ སངྒཧིཏཱཏི ཝུཏྟཾ ཧོཏི།

    170. Sabbakāyapaṭisaṃvediniddese arūpadhammesu vedanāya oḷārikattā sukhaggahaṇatthaṃ paṭhamaṃ iṭṭhāniṭṭhārammaṇasaṃvedikā vedanā vuttā, tato yaṃ vedeti, taṃ sañjānātīti evaṃ vedanāvisayassa ākāraggāhikā saññā, tato saññāvasena abhisaṅkhārikā cetanā, tato ‘‘phuṭṭho vedeti, phuṭṭho sañjānāti, phuṭṭho cetetī’’ti (saṃ. ni. 4.93) vacanato phasso, tato sabbesaṃ sādhāraṇalakkhaṇo manasikāro, cetanādīhi saṅkhārakkhandho vutto. Evaṃ tīsu khandhesu vuttesu taṃnissayo viññāṇakkhandho vuttova hoti. Nāmañcāti vuttappakāraṃ nāmañca. Nāmakāyo cāti idaṃ pana nāmena nibbānassapi saṅgahitattā lokuttarānañca avipassanupagattā taṃ apanetuṃ vuttaṃ. ‘‘Kāyo’’ti hi vacanena nibbānaṃ apanītaṃ hoti nibbānassa rāsivinimuttattā. Ye ca vuccanti cittasaṅkhārāti ‘‘saññā ca vedanā ca cetasikā ete dhammā cittapaṭibaddhā cittasaṅkhārā’’ti (paṭi. ma. 1.174; ma. ni. 1.463) evaṃ vuccamānāpi cittasaṅkhārā idha nāmakāyeneva saṅgahitāti vuttaṃ hoti. Mahābhūtāti mahantapātubhāvato mahābhūtasāmaññato mahāparihārato mahāvikārato mahantabhūtattā cāti mahābhūtā. Te pana – pathavī āpo tejo vāyoti cattāro. Catunnañca mahābhūtānaṃ upādāyarūpanti upayogatthe sāmivacanaṃ, cattāro mahābhūte upādāya nissāya amuñcitvā pavattarūpanti attho. Taṃ pana – cakkhu sotaṃ ghānaṃ jivhā kāyo rūpaṃ saddo gandho raso itthindriyaṃ purisindriyaṃ jīvitindriyaṃ hadayavatthu ojā kāyaviññatti vacīviññatti ākāsadhātu rūpassa lahutā mudutā kammaññattā upacayo santati jaratā aniccatāti catuvīsatividhaṃ. Assāso ca passāso cāti pākatikoyeva. Assāsapassāse nissāya uppannaṃ paṭibhāganimittampi tadeva nāmaṃ labhati pathavīkasiṇādīni viya. Rūpasarikkhakattā rūpanti ca nāmaṃ labhati ‘‘bahiddhā rūpāni passatī’’tiādīsu (dha. sa. 204; dī. ni. 3.338) viya. Nimittañca upanibandhanāti satiupanibandhanāya nimittabhūtaṃ assāsapassāsānaṃ phusanaṭṭhānaṃ. Ye ca vuccanti kāyasaṅkhārāti ‘‘assāsapassāsā kāyikā ete dhammā kāyapaṭibaddhā kāyasaṅkhārā’’ti (paṭi. ma. 1.171; ma. ni. 1.463) evaṃ vuccamānāpi kāyasaṅkhārā idha rūpakāyeneva saṅgahitāti vuttaṃ hoti.

    ཏེ ཀཱཡཱ པཊིཝིདིཏཱ ཧོནྟཱིཏི ཛྷཱནཀྑཎེ ཨསྶཱསཔསྶཱསནིམིཏྟཀཱཡཱ ཝིཔསྶནཱཀྑཎེ ཨཝསེསརཱུཔཱརཱུཔཀཱཡཱ ཨཱརམྨཎཏོ པཊིཝིདིཏཱ ཧོནྟི, མགྒཀྑཎེ ཨསམྨོཧཏོ པཊིཝིདིཏཱ ཧོནྟི། ཨསྶཱསཔསྶཱསཝསེན པཊིལདྡྷཛ྄ཛྷཱནསྶ ཡོགིསྶ ཨུཔྤནྣཝིཔསྶནཱམགྒེཔི སནྡྷཱཡ དཱིགྷཾ ཨསྶཱསཔསྶཱསཝསེནཱཏིཨཱདི ཝུཏྟཾ།

    Tekāyā paṭividitā hontīti jhānakkhaṇe assāsapassāsanimittakāyā vipassanākkhaṇe avasesarūpārūpakāyā ārammaṇato paṭividitā honti, maggakkhaṇe asammohato paṭividitā honti. Assāsapassāsavasena paṭiladdhajjhānassa yogissa uppannavipassanāmaggepi sandhāya dīghaṃ assāsapassāsavasenātiādi vuttaṃ.

    ཨཱཝཛྫཏོ པཛཱནཏོཏིཨཱདཱིནི སཱིལཀཐཱཡཾ ཝུཏྟཏྠཱནི། ཏེ ཝུཏྟཔྤཀཱརེ ཀཱཡེ ཨནྟོཀརིཏྭཱ ‘‘སབྦཀཱཡཔཊིསཾཝེདཱི’’ཏི ཝུཏྟཾ།

    Āvajjato pajānatotiādīni sīlakathāyaṃ vuttatthāni. Te vuttappakāre kāye antokaritvā ‘‘sabbakāyapaṭisaṃvedī’’ti vuttaṃ.

    སབྦཀཱཡཔཊིསཾཝེདཱི ཨསྶཱསཔསྶཱསཱནཾ སཾཝརཊྛེནཱཏིཨཱདཱིསུ ‘‘སབྦཀཱཡཔཊིསཾཝེདཱི’’ཏིཝུཏྟཨསྶཱསཔསྶཱསཏོ ཨུཔྤནྣཛ྄ཛྷཱནཝིཔསྶནཱམགྒེསུ སཾཝརོཡེཝ སཾཝརཊྛེན སཱིལཝིསུདྡྷི། ཨཝིཀྑེཔོཡེཝ ཨཝིཀྑེཔཊྛེན ཙིཏྟཝིསུདྡྷི། པཉྙཱཡེཝ དསྶནཊྛེན དིཊྛིཝིསུདྡྷི། ཛྷཱནཝིཔསྶནཱསུ ཝིརཏིཨབྷཱཝེཔི པཱཔཱབྷཱཝམཏྟམེཝ སཾཝརོ ནཱམཱཏི ཝེདིཏབྦཾ།

    Sabbakāyapaṭisaṃvedī assāsapassāsānaṃ saṃvaraṭṭhenātiādīsu ‘‘sabbakāyapaṭisaṃvedī’’tivuttaassāsapassāsato uppannajjhānavipassanāmaggesu saṃvaroyeva saṃvaraṭṭhena sīlavisuddhi. Avikkhepoyeva avikkhepaṭṭhena cittavisuddhi. Paññāyeva dassanaṭṭhena diṭṭhivisuddhi. Jhānavipassanāsu viratiabhāvepi pāpābhāvamattameva saṃvaro nāmāti veditabbaṃ.

    ༡༧༡. པསྶམྦྷཡནྟིཨཱདཱིནཾ ནིདྡེསེ ཀཱཡིཀཱཏི རཱུཔཀཱཡེ བྷཝཱ། ཀཱཡཔཊིབདྡྷཱཏི ཀཱཡཾ པཊིབདྡྷཱ ཀཱཡཾ ནིསྶིཏཱ, ཀཱཡེ སཏི ཧོནྟི, ཨསཏི ན ཧོནྟི, ཏསྨཱཡེཝ ཏེ ཀཱཡེན སངྑརཱིཡནྟཱིཏི ཀཱཡསངྑཱརཱ། པསྶམྦྷེནྟོཏི ནིབྦཱཔེནྟོ སནྣིསཱིདཱཔེནྟོ། པསྶམྦྷནཝཙནེནེཝ ཨོལཱ༹རིཀཱནཾ པསྶམྦྷནཾ སིདྡྷཾ། ནིརོདྷེནྟོཏི ཨོལཱ༹རིཀཱནཾ ཨནུཔྤཱདནེན ནིརོདྷེནྟོ། ཝཱུཔསམེནྟོཏི ཨོལཱ༹རིཀེཡེཝ ཨེཀསནྟཏིཔརིཎཱམནཡེན སནྟབྷཱཝཾ ནཡནྟོ། སིཀྑཏཱིཏི ཨདྷིཀཱརཝསེན ཨསྶསིསྶཱམཱིཏི སིཀྑཏཱིཏི སམྦནྡྷོ, ཏིསྶོ སིཀྑཱ སིཀྑཏཱིཏི ཝཱ ཨཏྠོ།

    171.Passambhayantiādīnaṃ niddese kāyikāti rūpakāye bhavā. Kāyapaṭibaddhāti kāyaṃ paṭibaddhā kāyaṃ nissitā, kāye sati honti, asati na honti, tasmāyeva te kāyena saṅkharīyantīti kāyasaṅkhārā. Passambhentoti nibbāpento sannisīdāpento. Passambhanavacaneneva oḷārikānaṃ passambhanaṃ siddhaṃ. Nirodhentoti oḷārikānaṃ anuppādanena nirodhento. Vūpasamentoti oḷārikeyeva ekasantatipariṇāmanayena santabhāvaṃ nayanto. Sikkhatīti adhikāravasena assasissāmīti sikkhatīti sambandho, tisso sikkhā sikkhatīti vā attho.

    ཨིདཱནི ཨོལཱ༹རིཀཔསྶམྦྷནཾ དསྶེཏུཾ ཡཐཱརཱུཔེཧཱིཏིཨཱདིམཱཧ། ཏཏྠ ཡཐཱརཱུཔེཧཱིཏི ཡཱདིསེཧི། ཨཱནམནཱཏི པཙྪཏོ ནམནཱ། ཝིནམནཱཏི ཨུབྷཡཔསྶཏོ ནམནཱ། སནྣམནཱཏི སབྦཏོཔི ནམནྟསྶ སུཊྛུ ནམནཱ། པཎམནཱཏི པུརཏོ ནམནཱ། ཨིཉྫནཱཏི ཀམྤནཱ། ཕནྡནཱཏི ཨཱིསཀཾ ཙལནཱ། པཀམྤནཱཏི བྷུསཾ ཀམྤནཱ། ཡཐཱརཱུཔེཧི ཀཱཡསངྑཱརེཧི ཀཱཡསྶ ཨཱནམནཱ…པེ॰… པཀམྤནཱ, ཏཐཱརཱུཔཾ ཀཱཡསངྑཱརཾ པསྶམྦྷཡནྟི ཙ, ཡཱ ཀཱཡསྶ ཨཱནམནཱ…པེ॰… པཀམྤནཱ, ཏཉྩ པསྶམྦྷཡནྟི ཙ སམྦནྡྷོ ཀཱཏབྦོ། ཀཱཡསངྑཱརེསུ ཧི པསྶམྦྷིཏེསུ ཀཱཡསྶ ཨཱནམནཱདཡོ ཙ པསྶམྦྷིཏཱཡེཝ ཧོནྟཱིཏི། ཡཐཱརཱུཔེཧི ཀཱཡསངྑཱརེཧི ཀཱཡསྶ ན ཨཱནམནཱདིཀཱ ཧོཏི, ཏཐཱརཱུཔཾ སནྟཾ སུཁུམམྤི ཀཱཡསངྑཱརཾ པསྶམྦྷཡནྟི ཙ, ཡཱ ཀཱཡསྶ ན ཨཱནམནཱདིཀཱ, ཏཉྩ སནྟཾ སུཁུམཾ པསྶམྦྷཡནྟི ཙ སམྦནྡྷཏོ ཝེདིཏབྦཾ། སནྟཾ སུཁུམནྟི ཙ བྷཱཝནཔུཾསཀཝཙནམེཏཾ། ཨིཏི ཀིརཱཏི ཨེཏྠ ཨིཏི ཨེཝམཏྠེ, ཀིར ཡདིཨཏྠེ། ཡདི ཨེཝཾ སུཁུམཀེཔི ཨསྶཱསཔསྶཱསེ པསྶམྦྷཡཾ ཨསྶསིསྶཱམི པསྶསིསྶཱམཱིཏི སིཀྑཏཱིཏི ཙོདཀེན ཙོདནཱ ཨཱརདྡྷཱ ཧོཏི། ཨཐ ཝཱ ཀིརཱཏི ཙོདཀཝཙནཏྟཱ ཨསདྡཧནཏྠེ ཨསཧནཏྠེ པརོཀྑཏྠེ ཙ ཡུཛྫཏིཡེཝ, ཨེཝཾ སུཁུམཱནམྤི པསྶམྦྷནཾ སིཀྑཏཱིཏི ན སདྡཧཱམི ན སཧཱམི ཨཔཙྩཀྑཾ མེཏི ཝུཏྟཾ ཧོཏི།

    Idāni oḷārikapassambhanaṃ dassetuṃ yathārūpehītiādimāha. Tattha yathārūpehīti yādisehi. Ānamanāti pacchato namanā. Vinamanāti ubhayapassato namanā. Sannamanāti sabbatopi namantassa suṭṭhu namanā. Paṇamanāti purato namanā. Iñjanāti kampanā. Phandanāti īsakaṃ calanā. Pakampanāti bhusaṃ kampanā. Yathārūpehi kāyasaṅkhārehi kāyassa ānamanā…pe… pakampanā, tathārūpaṃ kāyasaṅkhāraṃ passambhayanti ca, yā kāyassa ānamanā…pe… pakampanā, tañca passambhayanti ca sambandho kātabbo. Kāyasaṅkhāresu hi passambhitesu kāyassa ānamanādayo ca passambhitāyeva hontīti. Yathārūpehi kāyasaṅkhārehi kāyassa na ānamanādikā hoti, tathārūpaṃ santaṃ sukhumampi kāyasaṅkhāraṃ passambhayanti ca, yā kāyassa na ānamanādikā, tañca santaṃ sukhumaṃ passambhayanti ca sambandhato veditabbaṃ. Santaṃ sukhumanti ca bhāvanapuṃsakavacanametaṃ. Iti kirāti ettha iti evamatthe, kira yadiatthe. Yadi evaṃ sukhumakepi assāsapassāse passambhayaṃ assasissāmi passasissāmīti sikkhatīti codakena codanā āraddhā hoti. Atha vā kirāti codakavacanattā asaddahanatthe asahanatthe parokkhatthe ca yujjatiyeva, evaṃ sukhumānampi passambhanaṃ sikkhatīti na saddahāmi na sahāmi apaccakkhaṃ meti vuttaṃ hoti.

    ཨེཝཾ སནྟེཏི ཨེཝཾ སུཁུམཱནཾ པསྶམྦྷནེ སནྟེ། ཝཱཏཱུཔལདྡྷིཡཱ ཙ པབྷཱཝནཱ ན ཧོཏཱིཏི ཨསྶཱསཔསྶཱསཝཱཏསྶ ཨུཔལདྡྷིཡཱ། ཨུཔལདྡྷཱིཏི ཝིཉྙཱཎཾ། ཨསྶཱསཔསྶཱསཝཱཏཾ ཨུཔལབྦྷམཱནསྶ ཏདཱརམྨཎསྶ བྷཱཝནཱཝིཉྙཱཎསྶ པབྷཱཝནཱ ཨུཔྤཱདནཱ ན ཧོཏི, ཏསྶ ཨཱརམྨཎསྶ བྷཱཝནཱ ན ཧོཏཱིཏི ཨཏྠོ། ཨསྶཱསཔསྶཱསཱནཉྩ པབྷཱཝནཱ ན ཧོཏཱིཏི བྷཱཝནཱཡ སུཁུམཀཱནམྤི ཨསྶཱསཔསྶཱསཱནཾ ནིརོདྷནཏོ ཏེསཉྩ ཨུཔྤཱདནཱ པཝཏྟནཱ ན ཧོཏཱིཏི ཨཏྠོ། ཨཱནཱཔཱནསྶཏིཡཱ ཙ པབྷཱཝནཱ ན ཧོཏཱིཏི ཨསྶཱསཔསྶཱསཱབྷཱཝཏོཡེཝ ཏདཱརམྨཎཱཡ བྷཱཝནཱཝིཉྙཱཎསམྤཡུཏྟཱཡ སཏིཡཱ ཙ པཝཏྟནཱ ན ཧོཏི། ཏསྨཱཡེཝ ཏཾསམྤཡུཏྟསྶ ཨཱནཱཔཱནསྶཏིསམཱདྷིསྶ ཙ བྷཱཝནཱ ན ཧོཏི། ན ཙ ནཾ ཏནྟི ཨེཏྠ ཙ ནནྟི ནིཔཱཏམཏྟཾ ‘‘བྷིཀྑུ ཙ ན’’ནྟིཨཱདཱིསུ (པཱརཱ॰ ༢༧༣) ཝིཡ། ཏཾ ཝུཏྟཝིདྷིཾ སམཱཔཏྟིཾ པཎྜིཏཱ ན སམཱཔཛྫནྟིཔི ཏཏོ ན ཝུཊྛཧནྟིཔཱིཏི སམྦནྡྷོ། ཙོདནཱཔཀྑསྶ པརིཧཱརཝཙནེ ཨིཏི ཀིརཱཏི ཨེཝམེཝ། ཨེཏྠ ཨེཝཀཱརཏྠེ ཀིརསདྡོ དཊྛབྦོ། ཨེཝཾ སནྟེཏི ཨེཝཾ པསྶམྦྷནེ སནྟེ ཨེཝ།

    Evaṃ santeti evaṃ sukhumānaṃ passambhane sante. Vātūpaladdhiyā ca pabhāvanā na hotīti assāsapassāsavātassa upaladdhiyā. Upaladdhīti viññāṇaṃ. Assāsapassāsavātaṃ upalabbhamānassa tadārammaṇassa bhāvanāviññāṇassa pabhāvanā uppādanā na hoti, tassa ārammaṇassa bhāvanā na hotīti attho. Assāsapassāsānañca pabhāvanā na hotīti bhāvanāya sukhumakānampi assāsapassāsānaṃ nirodhanato tesañca uppādanā pavattanā na hotīti attho. Ānāpānassatiyā ca pabhāvanā na hotīti assāsapassāsābhāvatoyeva tadārammaṇāya bhāvanāviññāṇasampayuttāya satiyā ca pavattanā na hoti. Tasmāyeva taṃsampayuttassa ānāpānassatisamādhissa ca bhāvanā na hoti. Na ca naṃ tanti ettha ca nanti nipātamattaṃ ‘‘bhikkhu ca na’’ntiādīsu (pārā. 273) viya. Taṃ vuttavidhiṃ samāpattiṃ paṇḍitā na samāpajjantipi tato na vuṭṭhahantipīti sambandho. Codanāpakkhassa parihāravacane iti kirāti evameva. Ettha evakāratthe kirasaddo daṭṭhabbo. Evaṃ santeti evaṃ passambhane sante eva.

    ཡཐཱ ཀཐཾ ཝིཡཱཏི ཡཐཱ ཏཾ ཝུཏྟཝིདྷཱནཾ ཧོཏི, ཏཐཱ ཏཾ ཀཐཾ ཝིཡཱཏི ཨུཔམཾ པུཙྪཏི། ཨིདཱནི སེཡྻཐཱཔཱིཏི ཏཾ ཨུཔམཾ དསྶེཏི། ཀཾསེཏི ཀཾསམཡབྷཱཛནེ། ནིམིཏྟནྟི ཏེསཾ སདྡཱནཾ ཨཱཀཱརཾ། ‘‘ནིམིཏྟ’’ནྟི ཙ སཱམིཨཏྠེ ཨུཔཡོགཝཙནཾ, ནིམིཏྟསྶཱཏི ཨཏྠོ། སདྡནིམིཏྟཉྩ སདྡཏོ ཨནཉྙཾ། སུགྒཧིཏཏྟཱཏི སུཊྛུ ཨུགྒཧིཏཏྟཱ། སུགཧིཏཏྟཱཏིཔི པཱཋོ, སུཊྛུ གཧིཏཏྟཱཏི ཨཏྠོ། སུམནསིཀཏཏྟཱཏི སུཊྛུ ཨཱཝཛྫིཏཏྟཱ། སཱུཔདྷཱརིཏཏྟཱཏི སུཊྛུ ཙིཏྟེ ཋཔིཏཏྟཱ། སུཁུམསདྡནིམིཏྟཱརམྨཎཏཱཔཱིཏི ཏདཱ སུཁུམཱནམྤི སདྡཱནཾ ནིརུདྡྷཏྟཱ ཨནུགྒཧིཏསདྡནིམིཏྟསྶ ཨནཱརམྨཎམྤི སུཁུམཏརཾ སདྡནིམིཏྟཾ ཨཱརམྨཎཾ ཀཏྭཱ སུཁུམཏརཾ སདྡནིམིཏྟཱརམྨཎམྤི ཙིཏྟཾ པཝཏྟཏི, སུཁུམཏརསདྡནིམིཏྟཱརམྨཎབྷཱཝཏོཔཱིཏི ཝཱ ཨཏྠོ། ཨིམིནཱཝ ནཡེན ཨཔྤནཱཡམྤི ཨཏྠོ ཝེདིཏབྦོ།

    Yathā kathaṃ viyāti yathā taṃ vuttavidhānaṃ hoti, tathā taṃ kathaṃ viyāti upamaṃ pucchati. Idāni seyyathāpīti taṃ upamaṃ dasseti. Kaṃseti kaṃsamayabhājane. Nimittanti tesaṃ saddānaṃ ākāraṃ. ‘‘Nimitta’’nti ca sāmiatthe upayogavacanaṃ, nimittassāti attho. Saddanimittañca saddato anaññaṃ. Suggahitattāti suṭṭhu uggahitattā. Sugahitattātipi pāṭho, suṭṭhu gahitattāti attho. Sumanasikatattāti suṭṭhu āvajjitattā. Sūpadhāritattāti suṭṭhu citte ṭhapitattā. Sukhumasaddanimittārammaṇatāpīti tadā sukhumānampi saddānaṃ niruddhattā anuggahitasaddanimittassa anārammaṇampi sukhumataraṃ saddanimittaṃ ārammaṇaṃ katvā sukhumataraṃ saddanimittārammaṇampi cittaṃ pavattati, sukhumatarasaddanimittārammaṇabhāvatopīti vā attho. Imināva nayena appanāyampi attho veditabbo.

    པསྶམྦྷཡནྟིཨཱདཱིསུ ‘‘པསྶམྦྷཡཾ ཀཱཡསངྑཱར’’ནྟི ཝུཏྟཱ ཨསྶཱསཔསྶཱསཱ ཀཱཡོཏི ཝཱ ‘‘པསྶམྦྷཡཾ ཀཱཡསངྑཱར’’ནྟི ཨེཏྠ ཨསྶཱསཔསྶཱསཱ ཀཱཡོཏི ཝཱ ཡོཛནཱ ཝེདིཏབྦཱ། བྷཱཝནཱཝིསུདྡྷིཡཱ ཀཱཡསངྑཱརེ པསྶམྦྷམཱནེཔི ཨོལཱ༹རིཀཾ ཀཱཡསངྑཱརཾ པསྶམྦྷེམཱིཏི ཡོགིནོ ཨཱབྷོགེ སཏི ཏེནཱདརེན ཨཏིཝིཡ པསྶམྦྷཏི། ཨནུཔཊྛཧནྟམྤི སུཁུམཾ སུཨཱནཡཾ ཧོཏི།

    Passambhayantiādīsu ‘‘passambhayaṃ kāyasaṅkhāra’’nti vuttā assāsapassāsā kāyoti vā ‘‘passambhayaṃ kāyasaṅkhāra’’nti ettha assāsapassāsā kāyoti vā yojanā veditabbā. Bhāvanāvisuddhiyā kāyasaṅkhāre passambhamānepi oḷārikaṃ kāyasaṅkhāraṃ passambhemīti yogino ābhoge sati tenādarena ativiya passambhati. Anupaṭṭhahantampi sukhumaṃ suānayaṃ hoti.

    ཨཊྛ ཨནུཔསྶནཱཉཱཎཱནཱིཏི ‘‘དཱིགྷཾ རསྶཾ སབྦཀཱཡཔཊིསཾཝེདཱི པསྶམྦྷཡཾ ཀཱཡསངྑཱར’’ནྟི ཝུཏྟེསུ ཙཏཱུསུ ཝཏྠཱུསུ ཨསྶཱསཝསེན ཙཏསྶོ, པསྶཱསཝསེན ཙཏསྶོཏི ཨཊྛ ཨནུཔསྶནཱཉཱཎཱནི། ཨཊྛ ཙ ཨུཔཊྛཱནཱནུསྶཏིཡོཏི ‘‘དཱིགྷཾ ཨསྶཱསཝསེན ཙིཏྟསྶ ཨེཀགྒཏཾ ཨཝིཀྑེཔཾ པཛཱནཏོ སཏི ཨུཔཊྛིཏཱ ཧོཏཱི’’ཏིཨཱདིནཱ (པཊི॰ མ॰ ༡.༡༧༠) ནཡེན ཝུཏྟེསུ ཙཏཱུསུ ཝཏྠཱུསུ ཨསྶཱསཝསེན ཙཏསྶོ, པསྶཱསཝསེན ཙཏསྶོཏི ཨཊྛ ཙ ཨུཔཊྛཱནཱནུསྶཏིཡོ། ཨཊྛ ཙུཔཊྛཱནཱནུསྶཏིཡོཏིཔི པཱཋོ། ཙཏྟཱརི སུཏྟནྟིཀཝཏྠཱུནཱིཏི བྷགཝཏཱ ཨཱནཱཔཱནསྶཏིསུཏྟནྟེ (མ॰ ནི॰ ༣.༡༤༤ ཨཱདཡོ) ཝུཏྟཏྟཱ པཋམཙཏུཀྐཝསེན ཙཏྟཱརི སུཏྟནྟིཀཝཏྠཱུནཱིཏི།

    Aṭṭhaanupassanāñāṇānīti ‘‘dīghaṃ rassaṃ sabbakāyapaṭisaṃvedī passambhayaṃ kāyasaṅkhāra’’nti vuttesu catūsu vatthūsu assāsavasena catasso, passāsavasena catassoti aṭṭha anupassanāñāṇāni. Aṭṭha ca upaṭṭhānānussatiyoti ‘‘dīghaṃ assāsavasena cittassa ekaggataṃ avikkhepaṃ pajānato sati upaṭṭhitā hotī’’tiādinā (paṭi. ma. 1.170) nayena vuttesu catūsu vatthūsu assāsavasena catasso, passāsavasena catassoti aṭṭha ca upaṭṭhānānussatiyo. Aṭṭha cupaṭṭhānānussatiyotipi pāṭho. Cattāri suttantikavatthūnīti bhagavatā ānāpānassatisuttante (ma. ni. 3.144 ādayo) vuttattā paṭhamacatukkavasena cattāri suttantikavatthūnīti.

    པཋམཙཏུཀྐནིདྡེསཝཎྞནཱ ནིཊྛིཏཱ།

    Paṭhamacatukkaniddesavaṇṇanā niṭṭhitā.

    ༡༧༢. དུཏིཡཙཏུཀྐསྶ པཱིཏིཔཊིསཾཝེདིནིདྡེསེ ཨུཔྤཛྫཏི པཱིཏི པཱམོཛྫནྟི ཨེཏྠ པཱིཏཱིཏི མཱུལཔདཾ། པཱམོཛྫནྟི ཏསྶ ཨཏྠཔདཾ, པམུདིཏབྷཱཝོཏི ཨཏྠོ། ཡཱ པཱིཏི པཱམོཛྫནྟིཨཱདཱིསུ ཡཱ ‘‘པཱིཏཱི’’ཏི ཙ ‘‘པཱམོཛྫ’’ནྟི ཙ ཨེཝམཱདཱིནི ནཱམཱནི ལབྷཏི, སཱ པཱིཏཱིཏི ཝུཏྟཾ ཧོཏི། ཏཏྠ པཱིཏཱིཏི སབྷཱཝཔདཾ། པམུདིཏསྶ བྷཱཝོ པཱམོཛྫཾ། ཨཱམོདནཱཀཱརོ ཨཱམོདནཱ། པམོདནཱཀཱརོ པམོདནཱ། ཡཐཱ ཝཱ བྷེསཛྫཱནཾ ཝཱ ཏེལཱནཾ ཝཱ ཨུཎྷོདཀསཱིཏོདཀཱནཾ ཝཱ ཨེཀཏོཀརཎཾ མོདནཱཏི ཝུཙྩཏི, ཨེཝམཡམྤི དྷམྨཱནཾ ཨེཀཏོཀརཎེན མོདནཱ, ཨུཔསགྒཝསེན པན པདཾ མཎྜེཏྭཱ ཨཱམོདནཱ པམོདནཱཏི ཝུཏྟཾ། ཧཱསེཏཱིཏི ཧཱསོ, པཧཱསེཏཱིཏི པཧཱསོ, ཧཊྛཔཧཊྛཱཀཱརཱནམེཏཾ ཨདྷིཝཙནཾ། ཝིཏྟཱིཏི ཝིཏྟཾ, དྷནསྶེཏཾ ནཱམཾ། ཨཡཾ པན སོམནསྶཔཙྩཡཏྟཱ ཝིཏྟིསརིཀྑཏཱཡ ཝིཏྟི། ཡཐཱ ཧི དྷནིནོ དྷནཾ པཊིཙྩ སོམནསྶཾ ཨུཔྤཛྫཏི, ཨེཝཾ པཱིཏིམཏོཔི པཱིཏིཾ པཊིཙྩ སོམནསྶཾ ཨུཔྤཛྫཏི། ཏསྨཱ ‘‘ཝིཏྟཱི’’ཏི ཝུཏྟཱ། ཏུཊྛིསབྷཱཝསཎྛིཏཱཡ ཧི པཱིཏིཡཱ ཨེཏཾ ནཱམཾ། པཱིཏིམཱ པན པུགྒལོ ཀཱཡཙིཏྟཱནཾ ཨུགྒཏཏྟཱ ཨབྦྷུགྒཏཏྟཱ ‘‘ཨུདགྒོ’’ཏི ཝུཙྩཏི, ཨུདགྒསྶ བྷཱགོ ཨོདགྱཾ། ཨཏྟནོ མནཏཱ ཨཏྟམནཏཱ། ཨནབྷིརདྡྷསྶ ཧི མནོ དུཀྑཔདཊྛཱནཏྟཱ ན ཨཏྟནོ མནོ ནཱམ ཧོཏི, ཨབྷིརདྡྷསྶ སུཁཔདཊྛཱནཏྟཱ ཨཏྟནོ མནོ ནཱམ ཧོཏི, ཨིཏི ཨཏྟནོ མནཏཱ ཨཏྟམནཏཱ, སཀམནཏཱ སཀམནསྶ བྷཱཝོཏི ཨཏྠོ། སཱ པན ཡསྨཱ ན ཨཉྙསྶ ཀསྶཙི ཨཏྟནོ མནཏཱ, ཙིཏྟསྶེཝ པནེསོ བྷཱཝོ ཙེཏསིཀོ དྷམྨོ, ཏསྨཱ ཨཏྟམནཏཱ ཙིཏྟསྶཱཏི ཝུཏྟཱ། སེསམེཏྠ ཙ ཨུཔརི ཙ ཧེཊྛཱ ཝུཏྟནཡེན ཡོཛེཏྭཱ ཝེདིཏབྦཾ།

    172. Dutiyacatukkassa pītipaṭisaṃvediniddese uppajjati pīti pāmojjanti ettha pītīti mūlapadaṃ. Pāmojjanti tassa atthapadaṃ, pamuditabhāvoti attho. Yā pīti pāmojjantiādīsu yā ‘‘pītī’’ti ca ‘‘pāmojja’’nti ca evamādīni nāmāni labhati, sā pītīti vuttaṃ hoti. Tattha pītīti sabhāvapadaṃ. Pamuditassa bhāvo pāmojjaṃ. Āmodanākāro āmodanā. Pamodanākāro pamodanā. Yathā vā bhesajjānaṃ vā telānaṃ vā uṇhodakasītodakānaṃ vā ekatokaraṇaṃ modanāti vuccati, evamayampi dhammānaṃ ekatokaraṇena modanā, upasaggavasena pana padaṃ maṇḍetvā āmodanā pamodanāti vuttaṃ. Hāsetīti hāso, pahāsetīti pahāso, haṭṭhapahaṭṭhākārānametaṃ adhivacanaṃ. Vittīti vittaṃ, dhanassetaṃ nāmaṃ. Ayaṃ pana somanassapaccayattā vittisarikkhatāya vitti. Yathā hi dhanino dhanaṃ paṭicca somanassaṃ uppajjati, evaṃ pītimatopi pītiṃ paṭicca somanassaṃ uppajjati. Tasmā ‘‘vittī’’ti vuttā. Tuṭṭhisabhāvasaṇṭhitāya hi pītiyā etaṃ nāmaṃ. Pītimā pana puggalo kāyacittānaṃ uggatattā abbhuggatattā ‘‘udaggo’’ti vuccati, udaggassa bhāgo odagyaṃ. Attano manatā attamanatā. Anabhiraddhassa hi mano dukkhapadaṭṭhānattā na attano mano nāma hoti, abhiraddhassa sukhapadaṭṭhānattā attano mano nāma hoti, iti attano manatā attamanatā, sakamanatā sakamanassa bhāvoti attho. Sā pana yasmā na aññassa kassaci attano manatā, cittasseva paneso bhāvo cetasiko dhammo, tasmā attamanatā cittassāti vuttā. Sesamettha ca upari ca heṭṭhā vuttanayena yojetvā veditabbaṃ.

    ༡༧༣. སུཁཔཊིསཾཝེདིནིདྡེསེ དྭེ སུཁཱནཱིཏི སམཐཝིཔསྶནཱབྷཱུམིདསྶནཏྠཾ ཝུཏྟཾ། ཀཱཡིཀཉྷི སུཁཾ ཝིཔསྶནཱཡ བྷཱུམི, ཙེཏསིཀཾ སུཁཾ སམཐསྶ ཙ ཝིཔསྶནཱཡ ཙ བྷཱུམི། ཀཱཡིཀནྟི པསཱདཀཱཡཾ ཝིནཱ ཨནུཔྤཏྟིཏོ ཀཱཡེ ནིཡུཏྟནྟི ཀཱཡིཀཾ། ཙེཏསིཀནྟི ཨཝིཔྤཡོགཝསེན ཙེཏསི ནིཡུཏྟནྟི ཙེཏསིཀཾ། ཏཏྠ ཀཱཡིཀཔདེན ཙེཏསིཀཾ སུཁཾ པཊིཀྑིཔཏི, སུཁཔདེན ཀཱཡིཀཾ དུཀྑཾ། ཏཐཱ ཙེཏསིཀཔདེན ཀཱཡིཀཾ སུཁཾ པཊིཀྑིཔཏི, སུཁཔདེན ཙེཏསིཀཾ དུཀྑཾ། སཱཏནྟི མདྷུརཾ སུམདྷུརཾ། སུཁནྟི སུཁམེཝ, ན དུཀྑཾ། ཀཱཡསམྥསྶཛནྟི ཀཱཡསམྥསྶེ ཛཱཏཾ། སཱཏཾ སུཁཾ ཝེདཡིཏནྟི སཱཏཾ ཝེདཡིཏཾ, ན ཨསཱཏཾ ཝེདཡིཏཾ། སུཁཾ ཝེདཡིཏཾ, ན དུཀྑཾ ཝེདཡིཏཾ། པརཏོ ཏཱིཎི པདཱནི ཨིཏྠིལིངྒཝསེན ཝུཏྟཱནི། སཱཏཱ ཝེདནཱ, ན ཨསཱཏཱ། སུཁཱ ཝེདནཱ, ན དུཀྑཱཏི ཨཡམེཝ པནེཏྠ ཨཏྠོ།

    173. Sukhapaṭisaṃvediniddese dve sukhānīti samathavipassanābhūmidassanatthaṃ vuttaṃ. Kāyikañhi sukhaṃ vipassanāya bhūmi, cetasikaṃ sukhaṃ samathassa ca vipassanāya ca bhūmi. Kāyikanti pasādakāyaṃ vinā anuppattito kāye niyuttanti kāyikaṃ. Cetasikanti avippayogavasena cetasi niyuttanti cetasikaṃ. Tattha kāyikapadena cetasikaṃ sukhaṃ paṭikkhipati, sukhapadena kāyikaṃ dukkhaṃ. Tathā cetasikapadena kāyikaṃ sukhaṃ paṭikkhipati, sukhapadena cetasikaṃ dukkhaṃ. Sātanti madhuraṃ sumadhuraṃ. Sukhanti sukhameva, na dukkhaṃ. Kāyasamphassajanti kāyasamphasse jātaṃ. Sātaṃ sukhaṃvedayitanti sātaṃ vedayitaṃ, na asātaṃ vedayitaṃ. Sukhaṃ vedayitaṃ, na dukkhaṃ vedayitaṃ. Parato tīṇi padāni itthiliṅgavasena vuttāni. Sātā vedanā, na asātā. Sukhā vedanā, na dukkhāti ayameva panettha attho.

    ཙེཏསིཀསུཁནིདྡེསོ ཝུཏྟཔཊིཔཀྑནཡེན ཡོཛེཏབྦོ། ཏེ སུཁཱཏི ལིངྒཝིཔལླཱསོ ཀཏོ, ཏཱནི སུཁཱནཱིཏི ཝུཏྟཾ ཧོཏི། སེསམེཏྠ ཙཏུཀྐེ ཧེཊྛཱ པཋམཙཏུཀྐེ ཝུཏྟནཡེནེཝ ཝེདིཏབྦཾ། ཙཏྟཱརི སུཏྟནྟིཀཝཏྠཱུནི དུཏིཡཙཏུཀྐཝསེན ཝེདིཏབྦཱནཱིཏི།

    Cetasikasukhaniddeso vuttapaṭipakkhanayena yojetabbo. Te sukhāti liṅgavipallāso kato, tāni sukhānīti vuttaṃ hoti. Sesamettha catukke heṭṭhā paṭhamacatukke vuttanayeneva veditabbaṃ. Cattāri suttantikavatthūni dutiyacatukkavasena veditabbānīti.

    དུཏིཡཙཏུཀྐནིདྡེསཝཎྞནཱ ནིཊྛིཏཱ།

    Dutiyacatukkaniddesavaṇṇanā niṭṭhitā.

    ༡༧༦. ཏཏིཡཙཏུཀྐནིདྡེསེ ཙིཏྟནྟི མཱུལཔདཾ། ཝིཉྙཱཎནྟི ཨཏྠཔདཾ། ཡཾ ཙིཏྟནྟིཨཱདི པཱིཏིཡཾ ཝུཏྟནཡེན ཡོཛེཏབྦཾ། ཏཏྠ ཙིཏྟནྟིཨཱདཱིསུ ཙིཏྟཝིཙིཏྟཏཱཡ ཙིཏྟཾ། ཨཱརམྨཎཾ མིནམཱནཾ ཛཱནཱཏཱིཏི མནོ། མཱནསནྟི མནོཡེཝ། ‘‘ཨནྟལིཀྑཙརོ པཱསོ, ཡྭཱཡཾ ཙརཏི མཱནསོ’’ཏི (སཾ॰ ནི॰ ༡.༡༥༡; མཧཱཝ॰ ༣༣) ཧི ཨེཏྠ པན སམྤཡུཏྟཀདྷམྨོ མཱནསོཏི ཝུཏྟོ།

    176. Tatiyacatukkaniddese cittanti mūlapadaṃ. Viññāṇanti atthapadaṃ. Yaṃ cittantiādi pītiyaṃ vuttanayena yojetabbaṃ. Tattha cittantiādīsu cittavicittatāya cittaṃ. Ārammaṇaṃ minamānaṃ jānātīti mano. Mānasanti manoyeva. ‘‘Antalikkhacaro pāso, yvāyaṃ carati mānaso’’ti (saṃ. ni. 1.151; mahāva. 33) hi ettha pana sampayuttakadhammo mānasoti vutto.

    ‘‘ཀཐཉྷི བྷགཝཱ ཏུཡ྄ཧཾ, སཱཝཀོ སཱསནེ རཏོ།

    ‘‘Kathañhi bhagavā tuyhaṃ, sāvako sāsane rato;

    ཨཔྤཏྟམཱནསོ སེཀྑོ, ཀཱལཾ ཀཡིརཱ ཛནེ སུཏཱ’’ཏི༎ (སཾ॰ ནི॰ ༡.༡༥༩) –

    Appattamānaso sekkho, kālaṃ kayirā jane sutā’’ti. (saṃ. ni. 1.159) –

    ཨེཏྠ ཨརཧཏྟཾ མཱནསནྟི ཝུཏྟཾ། ཨིདྷ པན མནོཝ མཱནསཾ། བྱཉྫནཝསེན ཧེཏཾ པདཾ ཝཌྜྷིཏཾ།

    Ettha arahattaṃ mānasanti vuttaṃ. Idha pana manova mānasaṃ. Byañjanavasena hetaṃ padaṃ vaḍḍhitaṃ.

    ཧདཡནྟི ཙིཏྟཾ། ‘‘ཙིཏྟཾ ཝཱ ཏེ ཁིཔིསྶཱམི, ཧདཡཾ ཝཱ ཏེ ཕཱལེསྶཱམཱི’’ཏི (སཾ॰ ནི॰ ༡.༢༣༧; སུ॰ ནི॰ ཨཱལ༹ཝཀསུཏྟ) ཨེཏྠ ཨུརོ ཧདཡནྟི ཝུཏྟཾ། ‘‘ཧདཡཱ ཧདཡཾ མཉྙེ ཨཉྙཱཡ ཏཙྪཏཱི’’ཏི (མ॰ ནི॰ ༡.༦༣) ཨེཏྠ ཙིཏྟཾ། ‘‘ཝཀྐཾ ཧདཡ’’ནྟི (དཱི॰ ནི॰ ༢.༣༧༧; མ॰ ནི॰ ༡.༡༡༠) ཨེཏྠ ཧདཡཝཏྠུ། ཨིདྷ པན ཙིཏྟམེཝ ཨབྦྷནྟརཊྛེན ‘‘ཧདཡ’’ནྟི ཝུཏྟཾ། ཏདེཝ པརིསུདྡྷཊྛེན པཎྜརཾ། བྷཝངྒཾ སནྡྷཱཡེཏཾ ཝུཏྟཾ། ཡཐཱཧ – ‘‘པབྷསྶརམིདཾ, བྷིཀྑཝེ, ཙིཏྟཾ, ཏཉྩ ཁོ ཨཱགནྟུཀེཧི ཨུཔཀྐིལེསེཧི ཨུཔཀྐིལིཊྛ’’ནྟི (ཨ॰ ནི॰ ༡.༤༩)། ཏཏོ ནིཀྑནྟཏྟཱ པན ཨཀུསལམྤི གངྒཱཡ ནིཀྑནྟཱ ནདཱི གངྒཱ ཝིཡ, གོདྷཱཝརིཏོ ནིཀྑནྟཱ གོདྷཱཝརཱི ཝིཡ ཙ ‘‘པཎྜར’’ནྟྭེཝ ཝུཏྟཾ། ཡསྨཱ པན ཨཱརམྨཎཝིཛཱནནལཀྑཎཾ ཙིཏྟཾ ཨུཔཀྐིལེསེན ཀིལེསོ ན ཧོཏི, སབྷཱཝཏོ པརིསུདྡྷམེཝ ཧོཏི, ཨུཔཀྐིལེསཡོགེ པན སཏི ཨུཔཀྐིལིཊྛཾ ནཱམ ཧོཏི, ཏསྨཱཔི ‘‘པཎྜར’’ནྟི ཝཏྟུཾ ཡུཛྫཏི།

    Hadayanti cittaṃ. ‘‘Cittaṃ vā te khipissāmi, hadayaṃ vā te phālessāmī’’ti (saṃ. ni. 1.237; su. ni. āḷavakasutta) ettha uro hadayanti vuttaṃ. ‘‘Hadayā hadayaṃ maññe aññāya tacchatī’’ti (ma. ni. 1.63) ettha cittaṃ. ‘‘Vakkaṃ hadaya’’nti (dī. ni. 2.377; ma. ni. 1.110) ettha hadayavatthu. Idha pana cittameva abbhantaraṭṭhena ‘‘hadaya’’nti vuttaṃ. Tadeva parisuddhaṭṭhena paṇḍaraṃ. Bhavaṅgaṃ sandhāyetaṃ vuttaṃ. Yathāha – ‘‘pabhassaramidaṃ, bhikkhave, cittaṃ, tañca kho āgantukehi upakkilesehi upakkiliṭṭha’’nti (a. ni. 1.49). Tato nikkhantattā pana akusalampi gaṅgāya nikkhantā nadī gaṅgā viya, godhāvarito nikkhantā godhāvarī viya ca ‘‘paṇḍara’’ntveva vuttaṃ. Yasmā pana ārammaṇavijānanalakkhaṇaṃ cittaṃ upakkilesena kileso na hoti, sabhāvato parisuddhameva hoti, upakkilesayoge pana sati upakkiliṭṭhaṃ nāma hoti, tasmāpi ‘‘paṇḍara’’nti vattuṃ yujjati.

    མནོ མནཱཡཏནནྟི ཨིདྷ པན མནོགཧཎཾ མནསྶེཝ ཨཱཡཏནབྷཱཝདཱིཔནཏྠཾ། ཏེནེཏཾ དཱིཔེཏི – ‘‘ནཡིདཾ དེཝཱཡཏནཾ ཝིཡ མནསྶ ཨཱཡཏནཏྟཱ མནཱཡཏནཾ, ཨཐ ཁོ མནོ ཨེཝ ཨཱཡཏནཾ མནཱཡཏན’’ནྟི།

    Mano manāyatananti idha pana manogahaṇaṃ manasseva āyatanabhāvadīpanatthaṃ. Tenetaṃ dīpeti – ‘‘nayidaṃ devāyatanaṃ viya manassa āyatanattā manāyatanaṃ, atha kho mano eva āyatanaṃ manāyatana’’nti.

    ཨཱཡཏནཊྛོ ཧེཊྛཱ ཝུཏྟོཡེཝ། མནཏེ ཨིཏི མནོ, ཝིཛཱནཱཏཱིཏི ཨཏྠོ། ཨཊྛཀཐཱཙརིཡཱ པནཱཧུ – ནཱལི༹ཡཱ མིནམཱནོ ཝིཡ མཧཱཏུལཱཡ དྷཱརཡམཱནོ ཝིཡ ཙ ཨཱརམྨཎཾ ཛཱནཱཏཱིཏི མནོ, ཏདེཝ མནནལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ, མནོཝ ཨིནྡྲིཡཾ མནིནྡྲིཡཾ།

    Āyatanaṭṭho heṭṭhā vuttoyeva. Manate iti mano, vijānātīti attho. Aṭṭhakathācariyā panāhu – nāḷiyā minamāno viya mahātulāya dhārayamāno viya ca ārammaṇaṃ jānātīti mano, tadeva mananalakkhaṇe indaṭṭhaṃ kāretīti indriyaṃ, manova indriyaṃ manindriyaṃ.

    ཝིཛཱནཱཏཱིཏི ཝིཉྙཱཎཾ། ཝིཉྙཱཎམེཝ ཁནྡྷོ ཝིཉྙཱཎཀྑནྡྷོ། རུལ༹ྷིཏོ ཁནྡྷོ ཝུཏྟོ། རཱསཊྛེན ཧི ཝིཉྙཱཎཀྑནྡྷསྶ ཨེཀདེསོ ཨེཀཾ ཝིཉྙཱཎཾ། ཏསྨཱ ཡཐཱ རུཀྑསྶ ཨེཀདེསཾ ཚིནྡནྟོ རུཀྑཾ ཚིནྡཏཱིཏི ཝུཙྩཏི, ཨེཝམེཝ ཝིཉྙཱཎཀྑནྡྷསྶ ཨེཀདེསབྷཱུཏཾ ཨེཀམྤི ཝིཉྙཱཎཾ རུལ༹ྷིཏོ ‘‘ཝིཉྙཱཎཀྑནྡྷོ’’ཏི ཝུཏྟཾ། ཡསྨཱ པན རཱསཊྛོཡེཝ ཁནྡྷཊྛོ ན ཧོཏི, ཀོཊྛཱསཊྛོཔི ཁནྡྷཊྛོཡེཝ, ཏསྨཱ ཀོཊྛཱསཊྛེན ཝིཉྙཱཎཀོཊྛཱསོཏིཔི ཨཏྠོ། ཏཛྫཱ མནོཝིཉྙཱཎདྷཱཏཱུཏི ཏེསཾ ཕསྶཱདཱིནཾ སམྤཡུཏྟདྷམྨཱནཾ ཨནུཙྪཝིཀཱ མནོཝིཉྙཱཎདྷཱཏུ། ཨིམསྨིཉྷི པདེ ཨེཀམེཝ ཙིཏྟཾ མིནནཊྛེན མནོ, ཝིཛཱནནཊྛེན ཝིཉྙཱཎཾ, སབྷཱཝཊྛེན, ནིསྶཏྟཊྛེན ཝཱ དྷཱཏཱུཏི ཏཱིཧི ནཱམེཧི ཝུཏྟཾ།

    Vijānātīti viññāṇaṃ. Viññāṇameva khandho viññāṇakkhandho. Ruḷhito khandho vutto. Rāsaṭṭhena hi viññāṇakkhandhassa ekadeso ekaṃ viññāṇaṃ. Tasmā yathā rukkhassa ekadesaṃ chindanto rukkhaṃ chindatīti vuccati, evameva viññāṇakkhandhassa ekadesabhūtaṃ ekampi viññāṇaṃ ruḷhito ‘‘viññāṇakkhandho’’ti vuttaṃ. Yasmā pana rāsaṭṭhoyeva khandhaṭṭho na hoti, koṭṭhāsaṭṭhopi khandhaṭṭhoyeva, tasmā koṭṭhāsaṭṭhena viññāṇakoṭṭhāsotipi attho. Tajjā manoviññāṇadhātūti tesaṃ phassādīnaṃ sampayuttadhammānaṃ anucchavikā manoviññāṇadhātu. Imasmiñhi pade ekameva cittaṃ minanaṭṭhena mano, vijānanaṭṭhena viññāṇaṃ, sabhāvaṭṭhena, nissattaṭṭhena vā dhātūti tīhi nāmehi vuttaṃ.

    ༡༧༧.

    177.

    ཨབྷིཔྤམོདོཏི ཨདྷིཀཱ ཏུཊྛི།

    Abhippamodoti adhikā tuṭṭhi.

    ༡༧༨. སམཱདྷིནིདྡེསེ ཨཙལབྷཱཝེན ཨཱརམྨཎེ ཏིཊྛཏཱིཏི ཋིཏི། པརཏོ པདདྭཡཾ ཨུཔསགྒཝསེན ཝཌྜྷིཏཾ ། ཨཔིཙ སམྤཡུཏྟདྷམྨེ ཨཱརམྨཎམྷི སམྤིཎྜེཏྭཱ ཏིཊྛཏཱིཏི སཎྛིཏི། ཨཱརམྨཎཾ ཨོགཱཧེཏྭཱ ཨནུཔཝིསིཏྭཱ ཏིཊྛཏཱིཏི ཨཝཊྛིཏི། ཀུསལཔཀྑསྨིཾ ཧི ཙཏྟཱརོ དྷམྨཱ ཨཱརམྨཎཾ ཨོགཱཧནྟི སདྡྷཱ སཏི སམཱདྷི པཉྙཱཏི། ཏེནེཝ སདྡྷཱ ‘‘ཨོཀཔྤནཱ’’ཏི ཝུཏྟཱ, སཏི ‘‘ཨཔིལཱཔནཏཱ’’ཏི, སམཱདྷི ‘‘ཨཝཊྛིཏཱི’’ཏི, པཉྙཱ ‘‘པརིཡོགཱཧནཱ’’ཏི། ཨཀུསལཔཀྑེ པན ཏཡོ དྷམྨཱ ཨཱརམྨཎཾ ཨོགཱཧནྟི ཏཎྷཱ དིཊྛི ཨཝིཛྫཱཏི། ཏེནེཝ ཏེ ‘‘ཨོགྷཱ’’ཏི ཝུཏྟཱ། ཨུདྡྷཙྩཝིཙིཀིཙྪཱཝསེན པཝཏྟསྶ ཝིསཱཧཱརསྶ པཊིཔཀྑཏོ ཨཝིསཱཧཱརོ, ཨཝིསཱཧརཎནྟི ཨཏྠོ། ཨུདྡྷཙྩཝིཙིཀིཙྪཱཝསེནེཝ གཙྪནྟཾ ཙིཏྟཾ ཝིཀྑིཔཏི ནཱམ, ཨཡཾ པན ཏཐཱ ན ཧོཏཱིཏི ཨཝིཀྑེཔོ། ཨུདྡྷཙྩཝིཙིཀིཙྪཱཝསེནེཝ ཙིཏྟཾ ཝིསཱཧཊཾ ནཱམ ཧོཏི, ཨིཏོ ཙིཏོ ཙ ཧརཱིཡཏི, ཨཡཾ པན ཨཝིསཱཧཊསྶ མཱནསསྶ བྷཱཝོཏི ཨཝིསཱཧཊམཱནསཏཱ།

    178. Samādhiniddese acalabhāvena ārammaṇe tiṭṭhatīti ṭhiti. Parato padadvayaṃ upasaggavasena vaḍḍhitaṃ . Apica sampayuttadhamme ārammaṇamhi sampiṇḍetvā tiṭṭhatīti saṇṭhiti. Ārammaṇaṃ ogāhetvā anupavisitvā tiṭṭhatīti avaṭṭhiti. Kusalapakkhasmiṃ hi cattāro dhammā ārammaṇaṃ ogāhanti saddhā sati samādhi paññāti. Teneva saddhā ‘‘okappanā’’ti vuttā, sati ‘‘apilāpanatā’’ti, samādhi ‘‘avaṭṭhitī’’ti, paññā ‘‘pariyogāhanā’’ti. Akusalapakkhe pana tayo dhammā ārammaṇaṃ ogāhanti taṇhā diṭṭhi avijjāti. Teneva te ‘‘oghā’’ti vuttā. Uddhaccavicikicchāvasena pavattassa visāhārassa paṭipakkhato avisāhāro, avisāharaṇanti attho. Uddhaccavicikicchāvaseneva gacchantaṃ cittaṃ vikkhipati nāma, ayaṃ pana tathā na hotīti avikkhepo. Uddhaccavicikicchāvaseneva cittaṃ visāhaṭaṃ nāma hoti, ito cito ca harīyati, ayaṃ pana avisāhaṭassa mānasassa bhāvoti avisāhaṭamānasatā.

    སམཐོཏི ཏིཝིདྷོ སམཐོ ཙིཏྟསམཐོ ཨདྷིཀརཎསམཐོ སབྦསངྑཱརསམཐོཏི། ཏཏྠ ཨཊྛསུ སམཱཔཏྟཱིསུ ཙིཏྟེཀགྒཏཱ ཙིཏྟསམཐོ ནཱམ། ཏཉྷི ཨཱགམྨ ཙིཏྟཙལནཾ ཙིཏྟཝིཔྥནྡནཾ སམྨཏི ཝཱུཔསམྨཏི, ཏསྨཱ སོ ‘‘ཙིཏྟསམཐོ’’ཏི ཝུཙྩཏི། སམྨུཁཱཝིནཡཱདིསཏྟཝིདྷོ ཨདྷིཀརཎསམཐོ ནཱམ། ཏཉྷི ཨཱགམྨ ཏཱནི ཏཱནི ཨདྷིཀརཎཱནི སམྨནྟི ཝཱུཔསམྨནྟི, ཏསྨཱ སོ ‘‘ཨདྷིཀརཎསམཐོ’’ཏི ཝུཙྩཏི། ཡསྨཱ པན སབྦེ སངྑཱརཱ ནིབྦཱནཾ ཨཱགམྨ སམྨནྟི ཝཱུཔསམྨནྟི, ཏསྨཱ ཏཾ སབྦསངྑཱརསམཐོཏི ཝུཙྩཏི། ཨིམསྨིཾ ཨཏྠེ ཙིཏྟསམཐོ ཨདྷིཔྤེཏོ། སམཱདྷིལཀྑཎེ ཨིནྡཊྛཾ ཀཱརེཏཱིཏི སམཱདྷིནྡྲིཡཾ། ཨུདྡྷཙྩེ ན ཀམྤཏཱིཏི སམཱདྷིབལཾ། སམྨཱསམཱདྷཱིཏི ཡཱཐཱཝསམཱདྷི ནིཡྻཱནིཀསམཱདྷི ཀུསལསམཱདྷི།

    Samathoti tividho samatho cittasamatho adhikaraṇasamatho sabbasaṅkhārasamathoti. Tattha aṭṭhasu samāpattīsu cittekaggatā cittasamatho nāma. Tañhi āgamma cittacalanaṃ cittavipphandanaṃ sammati vūpasammati, tasmā so ‘‘cittasamatho’’ti vuccati. Sammukhāvinayādisattavidho adhikaraṇasamatho nāma. Tañhi āgamma tāni tāni adhikaraṇāni sammanti vūpasammanti, tasmā so ‘‘adhikaraṇasamatho’’ti vuccati. Yasmā pana sabbe saṅkhārā nibbānaṃ āgamma sammanti vūpasammanti, tasmā taṃ sabbasaṅkhārasamathoti vuccati. Imasmiṃ atthe cittasamatho adhippeto. Samādhilakkhaṇe indaṭṭhaṃ kāretīti samādhindriyaṃ. Uddhacce na kampatīti samādhibalaṃ. Sammāsamādhīti yāthāvasamādhi niyyānikasamādhi kusalasamādhi.

    ༡༧༩. རཱགཏོ ཝིམོཙཡཾ ཙིཏྟནྟིཨཱདཱིཧི དསཧི ཀིལེསཝཏྠཱུཧི ཝིམོཙནཾ ཝུཏྟཾ། ཐིནགྒཧཎེནེཝ ཙེཏྠ མིདྡྷགྒཧཎཾ, ཨུདྡྷཙྩགྒཧཎེནེཝ ཙ ཀུཀྐུཙྩགྒཧཎཾ ཀཏཾ ཧོཏཱིཏི ཨཉྙེསུ པཱཋེསུ སཧཙཱརིཏྟཱ ཀིལེསཝཏྠུཏོ ཝིམོཙནཝཙནེནེཝ པཋམཛ྄ཛྷཱནཱདཱིཧི ནཱིཝརཎཱདིཏོ ཝིམོཙནཾ, ཨནིཙྩཱནུཔསྶནཱདཱིཧི ནིཙྩསཉྙཱདིཏོ ཙ ཝིམོཙནཾ ཝུཏྟམེཝ ཧོཏཱིཏི། ཀཐཾ ཏཾ ཙིཏྟཾ ཨནུཔསྶཏཱིཏི ཨེཏྠ པེཡྻཱལེ ཙ ཨནིཙྩཱནུཔསྶནཱདཱིཧི ནིཙྩསཉྙཱདཱིནཾ པཧཱནཾ ཝུཏྟམེཝ། ཙཏྟཱརི སུཏྟནྟིཀཝཏྠཱུནི ཏཏིཡཙཏུཀྐཝསེན ཝེདིཏབྦཱནཱིཏི།

    179.Rāgato vimocayaṃ cittantiādīhi dasahi kilesavatthūhi vimocanaṃ vuttaṃ. Thinaggahaṇeneva cettha middhaggahaṇaṃ, uddhaccaggahaṇeneva ca kukkuccaggahaṇaṃ kataṃ hotīti aññesu pāṭhesu sahacārittā kilesavatthuto vimocanavacaneneva paṭhamajjhānādīhi nīvaraṇādito vimocanaṃ, aniccānupassanādīhi niccasaññādito ca vimocanaṃ vuttameva hotīti. Kathaṃ taṃ cittaṃ anupassatīti ettha peyyāle ca aniccānupassanādīhi niccasaññādīnaṃ pahānaṃ vuttameva. Cattāri suttantikavatthūni tatiyacatukkavasena veditabbānīti.

    ཏཏིཡཙཏུཀྐནིདྡེསཝཎྞནཱ ནིཊྛིཏཱ།

    Tatiyacatukkaniddesavaṇṇanā niṭṭhitā.

    ༡༨༠. ཙཏུཏྠཙཏུཀྐནིདྡེསེ ‘‘ཨནིདྡིཊྛེ ནཔུཾསཀ’’ནྟི ཝཙནཏོ ཨསུཀནྟི ཨནིདྡིཊྛཏྟཱ ‘‘ཨནིཙྩནྟི ཀིཾ ཨནིཙྩ’’ནྟི ནཔུཾསཀཝཙནེན པུཙྪཱ ཀཏཱ། ཨུཔྤཱདཝཡཊྛེནཱཏི ཨུཔྤཱདཝཡསངྑཱཏེན ཨཏྠེན, ཨུཔྤཱདཝཡསབྷཱཝེནཱཏི ཨཏྠོ། ཨེཏྠ ཙ པཉྩཀྑནྡྷཱ སབྷཱཝལཀྑཎཾ, པཉྩནྣཾ ཁནྡྷཱནཾ ཨུཔྤཱདཝཡཱ ཝིཀཱརལཀྑཎཾ། ཨེཏེན ཧུཏྭཱ ཨབྷཱཝེན ཨནིཙྩཱཏི ཝུཏྟཾ ཧོཏི། ཏེནེཝ ཙ ཨཊྛཀཐཱཡཾ ‘‘སངྑཏལཀྑཎཝསེན ཨནིཙྩཏཱཏི ཏེསཾཡེཝ ཨུཔྤཱདཝཡཉྙཐཏྟ’’ནྟི ཙ ཝཏྭཱཔི ‘‘ཧུཏྭཱ ཨབྷཱཝོ ཝཱ’’ཏི ཝུཏྟཾ། ཨེཏེན ཧུཏྭཱ ཨབྷཱཝཱཀཱརོ ཨནིཙྩལཀྑཎནྟི ཝུཏྟཾ ཧོཏི། ‘‘པཉྩནྣཾ ཁནྡྷཱནཾ ཨུདཡབྦཡཾ པསྶནྟོ ཨིམཱནི པཉྙཱཡ ལཀྑཎཱནཱི’’ཏི པེཡྻཱལཾ ཀཏྭཱ ཝུཏྟཾ། དྷམྨཱཏི རཱུཔཀྑནྡྷཱདཡོ ཡཐཱཝུཏྟདྷམྨཱ།

    180. Catutthacatukkaniddese ‘‘aniddiṭṭhe napuṃsaka’’nti vacanato asukanti aniddiṭṭhattā ‘‘aniccanti kiṃ anicca’’nti napuṃsakavacanena pucchā katā. Uppādavayaṭṭhenāti uppādavayasaṅkhātena atthena, uppādavayasabhāvenāti attho. Ettha ca pañcakkhandhā sabhāvalakkhaṇaṃ, pañcannaṃ khandhānaṃ uppādavayā vikāralakkhaṇaṃ. Etena hutvā abhāvena aniccāti vuttaṃ hoti. Teneva ca aṭṭhakathāyaṃ ‘‘saṅkhatalakkhaṇavasena aniccatāti tesaṃyeva uppādavayaññathatta’’nti ca vatvāpi ‘‘hutvā abhāvo vā’’ti vuttaṃ. Etena hutvā abhāvākāro aniccalakkhaṇanti vuttaṃ hoti. ‘‘Pañcannaṃ khandhānaṃ udayabbayaṃ passanto imāni paññāya lakkhaṇānī’’ti peyyālaṃ katvā vuttaṃ. Dhammāti rūpakkhandhādayo yathāvuttadhammā.

    ཝིརཱགཱནུཔསྶཱིནིདྡེསེ རཱུཔེ ཨཱདཱིནཝཾ དིསྭཱཏི བྷངྒཱནུཔསྶནཏོ པཊྛཱཡ པརཏོ ཝུཏྟེཧི ཨནིཙྩཊྛཱདཱིཧི རཱུཔཀྑནྡྷེ ཨཱདཱིནཝཾ དིསྭཱ། རཱུཔཝིརཱགེཏི ནིབྦཱནེ། ནིབྦཱནཉྷི ཨཱགམྨ རཱུཔཾ ཝིརཛྫཏི ཨཔུནརུཔྤཏྟིདྷམྨཏཾ ཨཱཔཛྫནེན ནིརུཛ྄ཛྷཏི, ཏསྨཱ ནིབྦཱནཾ ‘‘རཱུཔཝིརཱགོ’’ཏི ཝུཙྩཏི། ཚནྡཛཱཏོ ཧོཏཱིཏི ཨནུསྶཝཝསེན ཨུཔྤནྣདྷམྨཙྪནྡོ ཧོཏི། སདྡྷཱདྷིམུཏྟོཏི ཏསྨིཾཡེཝ ནིབྦཱནེ སདྡྷཱཡ ཙ ཨདྷིམུཏྟོ ནིཙྪིཏོ། ཙིཏྟཉྩསྶ སྭཱདྷིཊྛིཏནྟི ཨསྶ ཡོགིསྶ ཙིཏྟཾ ཁཡཝིརཱགསངྑཱཏེ རཱུཔབྷངྒེ ཨཱརམྨཎཝསེན , ཨཙྩནྟ ཝིརཱགསངྑཱཏེ རཱུཔཝིརཱགེ ནིབྦཱནེ ཨནུསྶཝཝསེན སུཊྛུ ཨདྷིཊྛིཏཾ སུཊྛུ པཏིཊྛིཏཾ ཧོཏཱིཏི སམྦནྡྷཏོ ཝེདིཏབྦཾ། རཱུཔེ ཝིརཱགཱནུཔསྶཱིཏི རཱུཔསྶ ཁཡཝིརཱགོ རཱུཔེ ཝིརཱགོཏི པཀཏིབྷུམྨཝཙནེན ཝུཏྟོ། རཱུཔསྶ ཨཙྩནྟཝིརཱགོ རཱུཔེ ཝིརཱགོཏི ནིམིཏྟཏྠེ བྷུམྨཝཙནེན ཝུཏྟོ། ཏཾ དུཝིདྷམྤི ཝིརཱགཾ ཨཱརམྨཎཏོ ཨཛ྄ཛྷཱསཡཏོ ཙ ཨནུཔསྶནསཱིལོ ‘‘རཱུཔེ ཝིརཱགཱནུཔསྶཱི’’ཏི ཝུཏྟོ། ཨེས ནཡོ ཝེདནཱདཱིསུ། ནིརོདྷཱནུཔསྶཱིཔདནིདྡེསེཔི ཨེསེཝ ནཡོ།

    Virāgānupassīniddese rūpe ādīnavaṃ disvāti bhaṅgānupassanato paṭṭhāya parato vuttehi aniccaṭṭhādīhi rūpakkhandhe ādīnavaṃ disvā. Rūpavirāgeti nibbāne. Nibbānañhi āgamma rūpaṃ virajjati apunaruppattidhammataṃ āpajjanena nirujjhati, tasmā nibbānaṃ ‘‘rūpavirāgo’’ti vuccati. Chandajāto hotīti anussavavasena uppannadhammacchando hoti. Saddhādhimuttoti tasmiṃyeva nibbāne saddhāya ca adhimutto nicchito. Cittañcassa svādhiṭṭhitanti assa yogissa cittaṃ khayavirāgasaṅkhāte rūpabhaṅge ārammaṇavasena , accanta virāgasaṅkhāte rūpavirāge nibbāne anussavavasena suṭṭhu adhiṭṭhitaṃ suṭṭhu patiṭṭhitaṃ hotīti sambandhato veditabbaṃ. Rūpe virāgānupassīti rūpassa khayavirāgo rūpe virāgoti pakatibhummavacanena vutto. Rūpassa accantavirāgo rūpe virāgoti nimittatthe bhummavacanena vutto. Taṃ duvidhampi virāgaṃ ārammaṇato ajjhāsayato ca anupassanasīlo ‘‘rūpe virāgānupassī’’ti vutto. Esa nayo vedanādīsu. Nirodhānupassīpadaniddesepi eseva nayo.

    ༡༨༡. ཀཏིཧཱཀཱརེཧཱིཏིཨཱདི པནེཏྠ ཝིསེསོ – ཏཏྠ ཨཝིཛྫཱདཱིནཾ པཊིཙྩསམུཔྤཱདངྒཱནཾ ཨཱདཱིནཝནིརོདྷདསྶནེནེཝ རཱུཔཱདཱིནམྤི ཨཱདཱིནཝནིརོདྷཱ དསྶིཏཱ ཧོནྟི ཏེསམྤི པཊིཙྩསམུཔྤཱདངྒཱནཏིཝཏྟནཏོ། ཨིམིནཱ ཨེཝ ཙ ཝིསེསཝཙནེན ཝིརཱགཱནུཔསྶནཏོ ནིརོདྷཱནུཔསྶནཱཡ ཝིསིཊྛབྷཱཝོ ཝུཏྟོ ཧོཏི། ཏཏྠ ཨནིཙྩཊྛེནཱཏི ཁཡཊྛེན, ཧུཏྭཱ ཨབྷཱཝཊྛེན ཝཱ། དུཀྑཊྛེནཱཏི བྷཡཊྛེན, པཊིཔཱིལ༹ནཊྛེན ཝཱ། ཨནཏྟཊྛེནཱཏི ཨསཱརཀཊྛེན, ཨཝསཝཏྟནཊྛེན ཝཱ། སནྟཱཔཊྛེནཱཏི ཀིལེསསནྟཱཔནཊྛེན། ཝིཔརིཎཱམཊྛེནཱཏི ཛརཱབྷངྒཝསེན དྭིདྷཱ པརིཎཱམནཊྛེན། ནིདཱནནིརོདྷེནཱཏི མཱུལཔཙྩཡཱབྷཱཝེན། ནིརུཛ྄ཛྷཏཱིཏི ན བྷཝཏི། སམུདཡནིརོདྷེནཱཏི ཨཱསནྣཔཙྩཡཱབྷཱཝེན། མཱུལཔཙྩཡོ ཧི བྱཱདྷིསྶ ཨསཔྤཱཡབྷོཛནཾ ཝིཡ ནིདཱནནྟི ཝུཏྟོ, ཨཱསནྣཔཙྩཡོ བྱཱདྷིསྶ ཝཱཏཔིཏྟསེམྷཱ ཝིཡ སམུདཡོཏི ཝུཏྟོ། ནིདཱནཉྷི ནིཙྪཡེན དདཱཏི ཕལམིཏི ནིདཱནཾ, སམུདཡོ པན སུཊྛུ ཨུདེཏི ཨེཏསྨཱ ཕལམིཏི སམུདཡོ། ཛཱཏིནིརོདྷེནཱཏི མཱུལཔཙྩཡསྶ ཨུཔྤཏྟིཨབྷཱཝེན། པབྷཝནིརོདྷེནཱཏི ཨཱསནྣཔཙྩཡསྶ ཨུཔྤཏྟིཨབྷཱཝེན། ཛཱཏིཡེཝ ཧི པབྷཝཏི ཨེཏསྨཱ དུཀྑནྟི པབྷཝོཏི ཝཏྟུཾ ཡུཛྫཏི། ཧེཏུནིརོདྷེནཱཏི ཛནཀཔཙྩཡཱབྷཱཝེན། པཙྩཡནིརོདྷེནཱཏི ཨུཔཏྠམྦྷཀཔཙྩཡཱབྷཱཝེན། མཱུལཔཙྩཡོཔི ཧི ཨཱསནྣཔཙྩཡོ ཙ ཛནཀཔཙྩཡོ ཨུཔཏྠམྦྷཀཔཙྩཡོ ཙ ཧོཏིཡེཝ། ཨེཏེཧི ཏིཀྑཝིཔསྶནཱཀྑཎེ ཏདངྒནིརོདྷོ, མགྒཀྑཎེ སམུཙྪེདནིརོདྷོ ཝུཏྟོ ཧོཏི། ཉཱཎུཔྤཱདེནཱཏི ཏིཀྑཝིཔསྶནཱཉཱཎསྶ ཝཱ མགྒཉཱཎསྶ ཝཱ ཨུཔྤཱདེན། ནིརོདྷུཔཊྛཱནེནཱཏི ཝིཔསྶནཱཀྑཎེ པཙྩཀྑཏོ ཁཡནིརོདྷསྶ ཨནུསྶཝཝསེན ནིརོདྷསངྑཱཏསྶ ནིབྦཱནསྶ ཨུཔཊྛཱནེན, མགྒཀྑཎེ པཙྩཀྑཏོ ཙ ནིབྦཱནསྶ ཨུཔཊྛཱནེན། ཨེཏེཧི ཝིསཡཝིསཡིནིཡམོཝ ཀཏོ ཧོཏི, ཏདངྒསམུཙྪེདནིརོདྷོ ཙ ཝུཏྟོ ཧོཏི།

    181.Katihākārehītiādi panettha viseso – tattha avijjādīnaṃ paṭiccasamuppādaṅgānaṃ ādīnavanirodhadassaneneva rūpādīnampi ādīnavanirodhā dassitā honti tesampi paṭiccasamuppādaṅgānativattanato. Iminā eva ca visesavacanena virāgānupassanato nirodhānupassanāya visiṭṭhabhāvo vutto hoti. Tattha aniccaṭṭhenāti khayaṭṭhena, hutvā abhāvaṭṭhena vā. Dukkhaṭṭhenāti bhayaṭṭhena, paṭipīḷanaṭṭhena vā. Anattaṭṭhenāti asārakaṭṭhena, avasavattanaṭṭhena vā. Santāpaṭṭhenāti kilesasantāpanaṭṭhena. Vipariṇāmaṭṭhenāti jarābhaṅgavasena dvidhā pariṇāmanaṭṭhena. Nidānanirodhenāti mūlapaccayābhāvena. Nirujjhatīti na bhavati. Samudayanirodhenāti āsannapaccayābhāvena. Mūlapaccayo hi byādhissa asappāyabhojanaṃ viya nidānanti vutto, āsannapaccayo byādhissa vātapittasemhā viya samudayoti vutto. Nidānañhi nicchayena dadāti phalamiti nidānaṃ, samudayo pana suṭṭhu udeti etasmā phalamiti samudayo. Jātinirodhenāti mūlapaccayassa uppattiabhāvena. Pabhavanirodhenāti āsannapaccayassa uppattiabhāvena. Jātiyeva hi pabhavati etasmā dukkhanti pabhavoti vattuṃ yujjati. Hetunirodhenāti janakapaccayābhāvena. Paccayanirodhenāti upatthambhakapaccayābhāvena. Mūlapaccayopi hi āsannapaccayo ca janakapaccayo upatthambhakapaccayo ca hotiyeva. Etehi tikkhavipassanākkhaṇe tadaṅganirodho, maggakkhaṇe samucchedanirodho vutto hoti. Ñāṇuppādenāti tikkhavipassanāñāṇassa vā maggañāṇassa vā uppādena. Nirodhupaṭṭhānenāti vipassanākkhaṇe paccakkhato khayanirodhassa anussavavasena nirodhasaṅkhātassa nibbānassa upaṭṭhānena, maggakkhaṇe paccakkhato ca nibbānassa upaṭṭhānena. Etehi visayavisayiniyamova kato hoti, tadaṅgasamucchedanirodho ca vutto hoti.

    ༡༨༢. པཊིནིསྶགྒཱནུཔསྶཱིཔདནིདྡེསེ རཱུཔཾ པརིཙྩཛཏཱིཏི ཨཱདཱིནཝདསྶནེན ནིརཔེཀྑཏཱཡ རཱུཔཀྑནྡྷཾ པརིཙྩཛཏི། པརིཙྩཱགཔཊིནིསྶགྒོཏི པརིཙྩཱགཊྛེན པཊིནིསྶགྒོཏི ཝུཏྟཾ ཧོཏི། ཨེཏེན པཊིནིསྶགྒཔདསྶ པརིཙྩཱགཊྛོ ཝུཏྟོ, ཏསྨཱ ཀིལེསཱནཾ པཛཧནནྟི ཨཏྠོ། ཨེཏྠ ཙ ཝུཊྛཱནགཱམིནཱི ཝིཔསྶནཱ ཀིལེསེ ཏདངྒཝསེན པརིཙྩཛཏི, མགྒོ སམུཙྪེདཝསེན། རཱུཔནིརོདྷེ ནིབྦཱནེ ཙིཏྟཾ པཀྑནྡཏཱིཏི ཝུཊྛཱནགཱམིནཱི ཏཾནིནྣཏཱཡ པཀྑནྡཏི, མགྒོ ཨཱརམྨཎཀརཎེན། པཀྑནྡནཔཊིནིསྶགྒོཏི པཀྑནྡནཊྛེན པཊིནིསྶགྒོཏི ཝུཏྟཾ ཧོཏི། ཨེཏེན པཊིནིསྶགྒཔདསྶ པཀྑནྡནཊྛོ ཝུཏྟོ, ཏསྨཱ ཙིཏྟསྶ ནིབྦཱནེ ཝིསྶཛྫནནྟི ཨཏྠོ། ཙཏྟཱརི སུཏྟནྟིཀཝཏྠཱུནི ཙཏུཏྠཙཏུཀྐཝསེན ཝེདིཏབྦཱནི། ཨིམསྨིཾ ཙཏུཀྐེ ཛརཱམརཎེ ཝཏྟབྦཾཧེཊྛཱ ཝུཏྟནཡེནེཝ ཝེདིཏབྦཾ། སཏིཔཊྛཱནེསུ ཙ ‘‘ཀཱཡེ ཀཱཡཱནུཔསྶནཱ, ཙིཏྟེ ཙིཏྟཱནུཔསྶནཱ’’ཏི ཀཱཡཙིཏྟཱནཾ ཨེཀཏྟཝོཧཱརཝསེན ཨེཀཝཙནནིདྡེསོ ཀཏོ། ‘‘ཝེདནཱསུ ཝེདནཱནུཔསྶནཱ, དྷམྨེསུ དྷམྨཱནུཔསྶནཱ’’ཏི ཝེདནཱདྷམྨཱནཾ ནཱནཏྟཝོཧཱརཝསེན བཧུཝཙནནིདྡེསོ ཀཏོཏི ཝེདིཏབྦོཏི།

    182. Paṭinissaggānupassīpadaniddese rūpaṃ pariccajatīti ādīnavadassanena nirapekkhatāya rūpakkhandhaṃ pariccajati. Pariccāgapaṭinissaggoti pariccāgaṭṭhena paṭinissaggoti vuttaṃ hoti. Etena paṭinissaggapadassa pariccāgaṭṭho vutto, tasmā kilesānaṃ pajahananti attho. Ettha ca vuṭṭhānagāminī vipassanā kilese tadaṅgavasena pariccajati, maggo samucchedavasena. Rūpanirodhe nibbāne cittaṃ pakkhandatīti vuṭṭhānagāminī taṃninnatāya pakkhandati, maggo ārammaṇakaraṇena. Pakkhandanapaṭinissaggoti pakkhandanaṭṭhena paṭinissaggoti vuttaṃ hoti. Etena paṭinissaggapadassa pakkhandanaṭṭho vutto, tasmā cittassa nibbāne vissajjananti attho. Cattāri suttantikavatthūni catutthacatukkavasena veditabbāni. Imasmiṃ catukke jarāmaraṇe vattabbaṃheṭṭhā vuttanayeneva veditabbaṃ. Satipaṭṭhānesu ca ‘‘kāye kāyānupassanā, citte cittānupassanā’’ti kāyacittānaṃ ekattavohāravasena ekavacananiddeso kato. ‘‘Vedanāsu vedanānupassanā, dhammesu dhammānupassanā’’ti vedanādhammānaṃ nānattavohāravasena bahuvacananiddeso katoti veditabboti.

    ཙཏུཏྠཙཏུཀྐནིདྡེསཝཎྞནཱ ནིཊྛིཏཱ།

    Catutthacatukkaniddesavaṇṇanā niṭṭhitā.

    ནིཊྛིཏཱ ཙ སཏོཀཱརིཉཱཎནིདྡེསཝཎྞནཱ།

    Niṭṭhitā ca satokāriñāṇaniddesavaṇṇanā.




    Next: ༦. ཉཱཎརཱསིཚཀྐནིདྡེསཝཎྞནཱ • 6. Ñāṇarāsichakkaniddesavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / པཊིསམྦྷིདཱམགྒཔཱལི༹ • Paṭisambhidāmaggapāḷi / ༥. སཏོཀཱརིཉཱཎནིདྡེསོ • 5. Satokāriñāṇaniddeso


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact