| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. து³தியவக்³கோ³
2. Dutiyavaggo
1. ஸத்ததா⁴துஸுத்தங்
1. Sattadhātusuttaṃ
95. ஸாவத்தி²யங் விஹரதி…பே॰… ‘‘ஸத்திமா , பி⁴க்க²வே, தா⁴துயோ. கதமா ஸத்த? ஆபா⁴தா⁴து, ஸுப⁴தா⁴து, ஆகாஸானஞ்சாயதனதா⁴து, விஞ்ஞாணஞ்சாயதனதா⁴து, ஆகிஞ்சஞ்ஞாயதனதா⁴து, நேவஸஞ்ஞானாஸஞ்ஞாயதனதா⁴து, ஸஞ்ஞாவேத³யிதனிரோத⁴தா⁴து – இமா கோ², பி⁴க்க²வே, ஸத்த தா⁴துயோ’’தி.
95. Sāvatthiyaṃ viharati…pe… ‘‘sattimā , bhikkhave, dhātuyo. Katamā satta? Ābhādhātu, subhadhātu, ākāsānañcāyatanadhātu, viññāṇañcāyatanadhātu, ākiñcaññāyatanadhātu, nevasaññānāsaññāyatanadhātu, saññāvedayitanirodhadhātu – imā kho, bhikkhave, satta dhātuyo’’ti.
ஏவங் வுத்தே, அஞ்ஞதரோ பி⁴க்கு² ப⁴க³வந்தங் ஏதத³வோச – ‘‘யா சாயங், ப⁴ந்தே, ஆபா⁴தா⁴து யா ச ஸுப⁴தா⁴து யா ச ஆகாஸானஞ்சாயதனதா⁴து யா ச விஞ்ஞாணஞ்சாயதனதா⁴து யா ச ஆகிஞ்சஞ்ஞாயதனதா⁴து யா ச நேவஸஞ்ஞானாஸஞ்ஞாயதனதா⁴து யா ச ஸஞ்ஞாவேத³யிதனிரோத⁴தா⁴து – இமா நு கோ², ப⁴ந்தே, தா⁴துயோ கிங் படிச்ச பஞ்ஞாயந்தீ’’தி?
Evaṃ vutte, aññataro bhikkhu bhagavantaṃ etadavoca – ‘‘yā cāyaṃ, bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kiṃ paṭicca paññāyantī’’ti?
‘‘யாயங், பி⁴க்கு², ஆபா⁴தா⁴து – அயங் தா⁴து அந்த⁴காரங் படிச்ச பஞ்ஞாயதி. யாயங், பி⁴க்கு², ஸுப⁴தா⁴து – அயங் தா⁴து அஸுப⁴ங் படிச்ச பஞ்ஞாயதி. யாயங், பி⁴க்கு², ஆகாஸானஞ்சாயதனதா⁴து – அயங் தா⁴து ரூபங் படிச்ச பஞ்ஞாயதி. யாயங், பி⁴க்கு², விஞ்ஞாணஞ்சாயதனதா⁴து – அயங் தா⁴து ஆகாஸானஞ்சாயதனங் படிச்ச பஞ்ஞாயதி. யாயங், பி⁴க்கு², ஆகிஞ்சஞ்ஞாயதனதா⁴து – அயங் தா⁴து விஞ்ஞாணஞ்சாயதனங் படிச்ச பஞ்ஞாயதி. யாயங், பி⁴க்கு², நேவஸஞ்ஞானாஸஞ்ஞாயதனதா⁴து – அயங் தா⁴து ஆகிஞ்சஞ்ஞாயதனங் படிச்ச பஞ்ஞாயதி. யாயங், பி⁴க்கு², ஸஞ்ஞாவேத³யிதனிரோத⁴தா⁴து – அயங் தா⁴து நிரோத⁴ங் படிச்ச பஞ்ஞாயதீ’’தி.
‘‘Yāyaṃ, bhikkhu, ābhādhātu – ayaṃ dhātu andhakāraṃ paṭicca paññāyati. Yāyaṃ, bhikkhu, subhadhātu – ayaṃ dhātu asubhaṃ paṭicca paññāyati. Yāyaṃ, bhikkhu, ākāsānañcāyatanadhātu – ayaṃ dhātu rūpaṃ paṭicca paññāyati. Yāyaṃ, bhikkhu, viññāṇañcāyatanadhātu – ayaṃ dhātu ākāsānañcāyatanaṃ paṭicca paññāyati. Yāyaṃ, bhikkhu, ākiñcaññāyatanadhātu – ayaṃ dhātu viññāṇañcāyatanaṃ paṭicca paññāyati. Yāyaṃ, bhikkhu, nevasaññānāsaññāyatanadhātu – ayaṃ dhātu ākiñcaññāyatanaṃ paṭicca paññāyati. Yāyaṃ, bhikkhu, saññāvedayitanirodhadhātu – ayaṃ dhātu nirodhaṃ paṭicca paññāyatī’’ti.
‘‘யா சாயங் , ப⁴ந்தே, ஆபா⁴தா⁴து யா ச ஸுப⁴தா⁴து யா ச ஆகாஸானஞ்சாயதனதா⁴து யா ச விஞ்ஞாணஞ்சாயதனதா⁴து யா ச ஆகிஞ்சஞ்ஞாயதனதா⁴து யா ச நேவஸஞ்ஞானாஸஞ்ஞாயதனதா⁴து யா ச ஸஞ்ஞாவேத³யிதனிரோத⁴தா⁴து – இமா நு கோ², ப⁴ந்தே, தா⁴துயோ கத²ங் ஸமாபத்தி பத்தப்³பா³’’தி?
‘‘Yā cāyaṃ , bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kathaṃ samāpatti pattabbā’’ti?
‘‘யா சாயங், பி⁴க்கு², ஆபா⁴தா⁴து யா ச ஸுப⁴தா⁴து யா ச ஆகாஸானஞ்சாயதனதா⁴து யா ச விஞ்ஞாணஞ்சாயதனதா⁴து யா ச ஆகிஞ்சஞ்ஞாயதனதா⁴து – இமா தா⁴துயோ ஸஞ்ஞாஸமாபத்தி பத்தப்³பா³. யாயங், பி⁴க்கு², நேவஸஞ்ஞானாஸஞ்ஞாயதனதா⁴து – அயங் தா⁴து ஸங்கா²ராவஸேஸஸமாபத்தி பத்தப்³பா³ . யாயங், பி⁴க்கு², ஸஞ்ஞாவேத³யிதனிரோத⁴தா⁴து – அயங் தா⁴து நிரோத⁴ஸமாபத்தி பத்தப்³பா³’’தி. பட²மங்.
‘‘Yā cāyaṃ, bhikkhu, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu – imā dhātuyo saññāsamāpatti pattabbā. Yāyaṃ, bhikkhu, nevasaññānāsaññāyatanadhātu – ayaṃ dhātu saṅkhārāvasesasamāpatti pattabbā . Yāyaṃ, bhikkhu, saññāvedayitanirodhadhātu – ayaṃ dhātu nirodhasamāpatti pattabbā’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸத்ததா⁴துஸுத்தவண்ணனா • 1. Sattadhātusuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸத்ததா⁴துஸுத்தவண்ணனா • 1. Sattadhātusuttavaṇṇanā
