| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. দুতিযৰগ্গো
2. Dutiyavaggo
১. সত্তধাতুসুত্তং
1. Sattadhātusuttaṃ
৯৫. সাৰত্থিযং ৰিহরতি…পে॰… ‘‘সত্তিমা , ভিক্খৰে, ধাতুযো। কতমা সত্ত? আভাধাতু, সুভধাতু, আকাসানঞ্চাযতনধাতু, ৰিঞ্ঞাণঞ্চাযতনধাতু, আকিঞ্চঞ্ঞাযতনধাতু, নেৰসঞ্ঞানাসঞ্ঞাযতনধাতু, সঞ্ঞাৰেদযিতনিরোধধাতু – ইমা খো, ভিক্খৰে, সত্ত ধাতুযো’’তি।
95. Sāvatthiyaṃ viharati…pe… ‘‘sattimā , bhikkhave, dhātuyo. Katamā satta? Ābhādhātu, subhadhātu, ākāsānañcāyatanadhātu, viññāṇañcāyatanadhātu, ākiñcaññāyatanadhātu, nevasaññānāsaññāyatanadhātu, saññāvedayitanirodhadhātu – imā kho, bhikkhave, satta dhātuyo’’ti.
এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘যা চাযং, ভন্তে, আভাধাতু যা চ সুভধাতু যা চ আকাসানঞ্চাযতনধাতু যা চ ৰিঞ্ঞাণঞ্চাযতনধাতু যা চ আকিঞ্চঞ্ঞাযতনধাতু যা চ নেৰসঞ্ঞানাসঞ্ঞাযতনধাতু যা চ সঞ্ঞাৰেদযিতনিরোধধাতু – ইমা নু খো, ভন্তে, ধাতুযো কিং পটিচ্চ পঞ্ঞাযন্তী’’তি?
Evaṃ vutte, aññataro bhikkhu bhagavantaṃ etadavoca – ‘‘yā cāyaṃ, bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kiṃ paṭicca paññāyantī’’ti?
‘‘যাযং, ভিক্খু, আভাধাতু – অযং ধাতু অন্ধকারং পটিচ্চ পঞ্ঞাযতি। যাযং, ভিক্খু, সুভধাতু – অযং ধাতু অসুভং পটিচ্চ পঞ্ঞাযতি। যাযং, ভিক্খু, আকাসানঞ্চাযতনধাতু – অযং ধাতু রূপং পটিচ্চ পঞ্ঞাযতি। যাযং, ভিক্খু, ৰিঞ্ঞাণঞ্চাযতনধাতু – অযং ধাতু আকাসানঞ্চাযতনং পটিচ্চ পঞ্ঞাযতি। যাযং, ভিক্খু, আকিঞ্চঞ্ঞাযতনধাতু – অযং ধাতু ৰিঞ্ঞাণঞ্চাযতনং পটিচ্চ পঞ্ঞাযতি। যাযং, ভিক্খু, নেৰসঞ্ঞানাসঞ্ঞাযতনধাতু – অযং ধাতু আকিঞ্চঞ্ঞাযতনং পটিচ্চ পঞ্ঞাযতি। যাযং, ভিক্খু, সঞ্ঞাৰেদযিতনিরোধধাতু – অযং ধাতু নিরোধং পটিচ্চ পঞ্ঞাযতী’’তি।
‘‘Yāyaṃ, bhikkhu, ābhādhātu – ayaṃ dhātu andhakāraṃ paṭicca paññāyati. Yāyaṃ, bhikkhu, subhadhātu – ayaṃ dhātu asubhaṃ paṭicca paññāyati. Yāyaṃ, bhikkhu, ākāsānañcāyatanadhātu – ayaṃ dhātu rūpaṃ paṭicca paññāyati. Yāyaṃ, bhikkhu, viññāṇañcāyatanadhātu – ayaṃ dhātu ākāsānañcāyatanaṃ paṭicca paññāyati. Yāyaṃ, bhikkhu, ākiñcaññāyatanadhātu – ayaṃ dhātu viññāṇañcāyatanaṃ paṭicca paññāyati. Yāyaṃ, bhikkhu, nevasaññānāsaññāyatanadhātu – ayaṃ dhātu ākiñcaññāyatanaṃ paṭicca paññāyati. Yāyaṃ, bhikkhu, saññāvedayitanirodhadhātu – ayaṃ dhātu nirodhaṃ paṭicca paññāyatī’’ti.
‘‘যা চাযং , ভন্তে, আভাধাতু যা চ সুভধাতু যা চ আকাসানঞ্চাযতনধাতু যা চ ৰিঞ্ঞাণঞ্চাযতনধাতু যা চ আকিঞ্চঞ্ঞাযতনধাতু যা চ নেৰসঞ্ঞানাসঞ্ঞাযতনধাতু যা চ সঞ্ঞাৰেদযিতনিরোধধাতু – ইমা নু খো, ভন্তে, ধাতুযো কথং সমাপত্তি পত্তব্বা’’তি?
‘‘Yā cāyaṃ , bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kathaṃ samāpatti pattabbā’’ti?
‘‘যা চাযং, ভিক্খু, আভাধাতু যা চ সুভধাতু যা চ আকাসানঞ্চাযতনধাতু যা চ ৰিঞ্ঞাণঞ্চাযতনধাতু যা চ আকিঞ্চঞ্ঞাযতনধাতু – ইমা ধাতুযো সঞ্ঞাসমাপত্তি পত্তব্বা। যাযং, ভিক্খু, নেৰসঞ্ঞানাসঞ্ঞাযতনধাতু – অযং ধাতু সঙ্খারাৰসেসসমাপত্তি পত্তব্বা । যাযং, ভিক্খু, সঞ্ঞাৰেদযিতনিরোধধাতু – অযং ধাতু নিরোধসমাপত্তি পত্তব্বা’’তি। পঠমং।
‘‘Yā cāyaṃ, bhikkhu, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu – imā dhātuyo saññāsamāpatti pattabbā. Yāyaṃ, bhikkhu, nevasaññānāsaññāyatanadhātu – ayaṃ dhātu saṅkhārāvasesasamāpatti pattabbā . Yāyaṃ, bhikkhu, saññāvedayitanirodhadhātu – ayaṃ dhātu nirodhasamāpatti pattabbā’’ti. Paṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সত্তধাতুসুত্তৰণ্ণনা • 1. Sattadhātusuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. সত্তধাতুসুত্তৰণ্ণনা • 1. Sattadhātusuttavaṇṇanā
