| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. දුතියවග්‌ගො
2. Dutiyavaggo
1. සත්‌තධාතුසුත්‌තං
1. Sattadhātusuttaṃ
95. සාවත්‌ථියං විහරති…පෙ.… ‘‘සත්‌තිමා , භික්‌ඛවෙ, ධාතුයො. කතමා සත්‌ත? ආභාධාතු, සුභධාතු, ආකාසානඤ්‌චායතනධාතු, විඤ්‌ඤාණඤ්‌චායතනධාතු, ආකිඤ්‌චඤ්‌ඤායතනධාතු, නෙවසඤ්‌ඤානාසඤ්‌ඤායතනධාතු, සඤ්‌ඤාවෙදයිතනිරොධධාතු – ඉමා ඛො, භික්‌ඛවෙ, සත්‌ත ධාතුයො’’ති.
95. Sāvatthiyaṃ viharati…pe… ‘‘sattimā , bhikkhave, dhātuyo. Katamā satta? Ābhādhātu, subhadhātu, ākāsānañcāyatanadhātu, viññāṇañcāyatanadhātu, ākiñcaññāyatanadhātu, nevasaññānāsaññāyatanadhātu, saññāvedayitanirodhadhātu – imā kho, bhikkhave, satta dhātuyo’’ti.
එවං වුත්‌තෙ, අඤ්‌ඤතරො භික්‌ඛු භගවන්‌තං එතදවොච – ‘‘යා චායං, භන්‌තෙ, ආභාධාතු යා ච සුභධාතු යා ච ආකාසානඤ්‌චායතනධාතු යා ච විඤ්‌ඤාණඤ්‌චායතනධාතු යා ච ආකිඤ්‌චඤ්‌ඤායතනධාතු යා ච නෙවසඤ්‌ඤානාසඤ්‌ඤායතනධාතු යා ච සඤ්‌ඤාවෙදයිතනිරොධධාතු – ඉමා නු ඛො, භන්‌තෙ, ධාතුයො කිං පටිච්‌ච පඤ්‌ඤායන්‌තී’’ති?
Evaṃ vutte, aññataro bhikkhu bhagavantaṃ etadavoca – ‘‘yā cāyaṃ, bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kiṃ paṭicca paññāyantī’’ti?
‘‘යායං, භික්‌ඛු, ආභාධාතු – අයං ධාතු අන්‌ධකාරං පටිච්‌ච පඤ්‌ඤායති. යායං, භික්‌ඛු, සුභධාතු – අයං ධාතු අසුභං පටිච්‌ච පඤ්‌ඤායති. යායං, භික්‌ඛු, ආකාසානඤ්‌චායතනධාතු – අයං ධාතු රූපං පටිච්‌ච පඤ්‌ඤායති. යායං, භික්‌ඛු, විඤ්‌ඤාණඤ්‌චායතනධාතු – අයං ධාතු ආකාසානඤ්‌චායතනං පටිච්‌ච පඤ්‌ඤායති. යායං, භික්‌ඛු, ආකිඤ්‌චඤ්‌ඤායතනධාතු – අයං ධාතු විඤ්‌ඤාණඤ්‌චායතනං පටිච්‌ච පඤ්‌ඤායති. යායං, භික්‌ඛු, නෙවසඤ්‌ඤානාසඤ්‌ඤායතනධාතු – අයං ධාතු ආකිඤ්‌චඤ්‌ඤායතනං පටිච්‌ච පඤ්‌ඤායති. යායං, භික්‌ඛු, සඤ්‌ඤාවෙදයිතනිරොධධාතු – අයං ධාතු නිරොධං පටිච්‌ච පඤ්‌ඤායතී’’ති.
‘‘Yāyaṃ, bhikkhu, ābhādhātu – ayaṃ dhātu andhakāraṃ paṭicca paññāyati. Yāyaṃ, bhikkhu, subhadhātu – ayaṃ dhātu asubhaṃ paṭicca paññāyati. Yāyaṃ, bhikkhu, ākāsānañcāyatanadhātu – ayaṃ dhātu rūpaṃ paṭicca paññāyati. Yāyaṃ, bhikkhu, viññāṇañcāyatanadhātu – ayaṃ dhātu ākāsānañcāyatanaṃ paṭicca paññāyati. Yāyaṃ, bhikkhu, ākiñcaññāyatanadhātu – ayaṃ dhātu viññāṇañcāyatanaṃ paṭicca paññāyati. Yāyaṃ, bhikkhu, nevasaññānāsaññāyatanadhātu – ayaṃ dhātu ākiñcaññāyatanaṃ paṭicca paññāyati. Yāyaṃ, bhikkhu, saññāvedayitanirodhadhātu – ayaṃ dhātu nirodhaṃ paṭicca paññāyatī’’ti.
‘‘යා චායං , භන්‌තෙ, ආභාධාතු යා ච සුභධාතු යා ච ආකාසානඤ්‌චායතනධාතු යා ච විඤ්‌ඤාණඤ්‌චායතනධාතු යා ච ආකිඤ්‌චඤ්‌ඤායතනධාතු යා ච නෙවසඤ්‌ඤානාසඤ්‌ඤායතනධාතු යා ච සඤ්‌ඤාවෙදයිතනිරොධධාතු – ඉමා නු ඛො, භන්‌තෙ, ධාතුයො කථං සමාපත්‌ති පත්‌තබ්‌බා’’ති?
‘‘Yā cāyaṃ , bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kathaṃ samāpatti pattabbā’’ti?
‘‘යා චායං, භික්‌ඛු, ආභාධාතු යා ච සුභධාතු යා ච ආකාසානඤ්‌චායතනධාතු යා ච විඤ්‌ඤාණඤ්‌චායතනධාතු යා ච ආකිඤ්‌චඤ්‌ඤායතනධාතු – ඉමා ධාතුයො සඤ්‌ඤාසමාපත්‌ති පත්‌තබ්‌බා. යායං, භික්‌ඛු, නෙවසඤ්‌ඤානාසඤ්‌ඤායතනධාතු – අයං ධාතු සඞ්‌ඛාරාවසෙසසමාපත්‌ති පත්‌තබ්‌බා . යායං, භික්‌ඛු, සඤ්‌ඤාවෙදයිතනිරොධධාතු – අයං ධාතු නිරොධසමාපත්‌ති පත්‌තබ්‌බා’’ති. පඨමං.
‘‘Yā cāyaṃ, bhikkhu, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu – imā dhātuyo saññāsamāpatti pattabbā. Yāyaṃ, bhikkhu, nevasaññānāsaññāyatanadhātu – ayaṃ dhātu saṅkhārāvasesasamāpatti pattabbā . Yāyaṃ, bhikkhu, saññāvedayitanirodhadhātu – ayaṃ dhātu nirodhasamāpatti pattabbā’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. සත්‌තධාතුසුත්‌තවණ්‌ණනා • 1. Sattadhātusuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. සත්‌තධාතුසුත්‌තවණ්‌ණනා • 1. Sattadhātusuttavaṇṇanā
