| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. དུཏིཡཝགྒོ
2. Dutiyavaggo
༡. སཏྟདྷཱཏུསུཏྟཾ
1. Sattadhātusuttaṃ
༩༥. སཱཝཏྠིཡཾ ཝིཧརཏི…པེ॰… ‘‘སཏྟིམཱ , བྷིཀྑཝེ, དྷཱཏུཡོ། ཀཏམཱ སཏྟ? ཨཱབྷཱདྷཱཏུ, སུབྷདྷཱཏུ, ཨཱཀཱསཱནཉྩཱཡཏནདྷཱཏུ, ཝིཉྙཱཎཉྩཱཡཏནདྷཱཏུ, ཨཱཀིཉྩཉྙཱཡཏནདྷཱཏུ, ནེཝསཉྙཱནཱསཉྙཱཡཏནདྷཱཏུ, སཉྙཱཝེདཡིཏནིརོདྷདྷཱཏུ – ཨིམཱ ཁོ, བྷིཀྑཝེ, སཏྟ དྷཱཏུཡོ’’ཏི།
95. Sāvatthiyaṃ viharati…pe… ‘‘sattimā , bhikkhave, dhātuyo. Katamā satta? Ābhādhātu, subhadhātu, ākāsānañcāyatanadhātu, viññāṇañcāyatanadhātu, ākiñcaññāyatanadhātu, nevasaññānāsaññāyatanadhātu, saññāvedayitanirodhadhātu – imā kho, bhikkhave, satta dhātuyo’’ti.
ཨེཝཾ ཝུཏྟེ, ཨཉྙཏརོ བྷིཀྑུ བྷགཝནྟཾ ཨེཏདཝོཙ – ‘‘ཡཱ ཙཱཡཾ, བྷནྟེ, ཨཱབྷཱདྷཱཏུ ཡཱ ཙ སུབྷདྷཱཏུ ཡཱ ཙ ཨཱཀཱསཱནཉྩཱཡཏནདྷཱཏུ ཡཱ ཙ ཝིཉྙཱཎཉྩཱཡཏནདྷཱཏུ ཡཱ ཙ ཨཱཀིཉྩཉྙཱཡཏནདྷཱཏུ ཡཱ ཙ ནེཝསཉྙཱནཱསཉྙཱཡཏནདྷཱཏུ ཡཱ ཙ སཉྙཱཝེདཡིཏནིརོདྷདྷཱཏུ – ཨིམཱ ནུ ཁོ, བྷནྟེ, དྷཱཏུཡོ ཀིཾ པཊིཙྩ པཉྙཱཡནྟཱི’’ཏི?
Evaṃ vutte, aññataro bhikkhu bhagavantaṃ etadavoca – ‘‘yā cāyaṃ, bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kiṃ paṭicca paññāyantī’’ti?
‘‘ཡཱཡཾ, བྷིཀྑུ, ཨཱབྷཱདྷཱཏུ – ཨཡཾ དྷཱཏུ ཨནྡྷཀཱརཾ པཊིཙྩ པཉྙཱཡཏི། ཡཱཡཾ, བྷིཀྑུ, སུབྷདྷཱཏུ – ཨཡཾ དྷཱཏུ ཨསུབྷཾ པཊིཙྩ པཉྙཱཡཏི། ཡཱཡཾ, བྷིཀྑུ, ཨཱཀཱསཱནཉྩཱཡཏནདྷཱཏུ – ཨཡཾ དྷཱཏུ རཱུཔཾ པཊིཙྩ པཉྙཱཡཏི། ཡཱཡཾ, བྷིཀྑུ, ཝིཉྙཱཎཉྩཱཡཏནདྷཱཏུ – ཨཡཾ དྷཱཏུ ཨཱཀཱསཱནཉྩཱཡཏནཾ པཊིཙྩ པཉྙཱཡཏི། ཡཱཡཾ, བྷིཀྑུ, ཨཱཀིཉྩཉྙཱཡཏནདྷཱཏུ – ཨཡཾ དྷཱཏུ ཝིཉྙཱཎཉྩཱཡཏནཾ པཊིཙྩ པཉྙཱཡཏི། ཡཱཡཾ, བྷིཀྑུ, ནེཝསཉྙཱནཱསཉྙཱཡཏནདྷཱཏུ – ཨཡཾ དྷཱཏུ ཨཱཀིཉྩཉྙཱཡཏནཾ པཊིཙྩ པཉྙཱཡཏི། ཡཱཡཾ, བྷིཀྑུ, སཉྙཱཝེདཡིཏནིརོདྷདྷཱཏུ – ཨཡཾ དྷཱཏུ ནིརོདྷཾ པཊིཙྩ པཉྙཱཡཏཱི’’ཏི།
‘‘Yāyaṃ, bhikkhu, ābhādhātu – ayaṃ dhātu andhakāraṃ paṭicca paññāyati. Yāyaṃ, bhikkhu, subhadhātu – ayaṃ dhātu asubhaṃ paṭicca paññāyati. Yāyaṃ, bhikkhu, ākāsānañcāyatanadhātu – ayaṃ dhātu rūpaṃ paṭicca paññāyati. Yāyaṃ, bhikkhu, viññāṇañcāyatanadhātu – ayaṃ dhātu ākāsānañcāyatanaṃ paṭicca paññāyati. Yāyaṃ, bhikkhu, ākiñcaññāyatanadhātu – ayaṃ dhātu viññāṇañcāyatanaṃ paṭicca paññāyati. Yāyaṃ, bhikkhu, nevasaññānāsaññāyatanadhātu – ayaṃ dhātu ākiñcaññāyatanaṃ paṭicca paññāyati. Yāyaṃ, bhikkhu, saññāvedayitanirodhadhātu – ayaṃ dhātu nirodhaṃ paṭicca paññāyatī’’ti.
‘‘ཡཱ ཙཱཡཾ , བྷནྟེ, ཨཱབྷཱདྷཱཏུ ཡཱ ཙ སུབྷདྷཱཏུ ཡཱ ཙ ཨཱཀཱསཱནཉྩཱཡཏནདྷཱཏུ ཡཱ ཙ ཝིཉྙཱཎཉྩཱཡཏནདྷཱཏུ ཡཱ ཙ ཨཱཀིཉྩཉྙཱཡཏནདྷཱཏུ ཡཱ ཙ ནེཝསཉྙཱནཱསཉྙཱཡཏནདྷཱཏུ ཡཱ ཙ སཉྙཱཝེདཡིཏནིརོདྷདྷཱཏུ – ཨིམཱ ནུ ཁོ, བྷནྟེ, དྷཱཏུཡོ ཀཐཾ སམཱཔཏྟི པཏྟབྦཱ’’ཏི?
‘‘Yā cāyaṃ , bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kathaṃ samāpatti pattabbā’’ti?
‘‘ཡཱ ཙཱཡཾ, བྷིཀྑུ, ཨཱབྷཱདྷཱཏུ ཡཱ ཙ སུབྷདྷཱཏུ ཡཱ ཙ ཨཱཀཱསཱནཉྩཱཡཏནདྷཱཏུ ཡཱ ཙ ཝིཉྙཱཎཉྩཱཡཏནདྷཱཏུ ཡཱ ཙ ཨཱཀིཉྩཉྙཱཡཏནདྷཱཏུ – ཨིམཱ དྷཱཏུཡོ སཉྙཱསམཱཔཏྟི པཏྟབྦཱ། ཡཱཡཾ, བྷིཀྑུ, ནེཝསཉྙཱནཱསཉྙཱཡཏནདྷཱཏུ – ཨཡཾ དྷཱཏུ སངྑཱརཱཝསེསསམཱཔཏྟི པཏྟབྦཱ ། ཡཱཡཾ, བྷིཀྑུ, སཉྙཱཝེདཡིཏནིརོདྷདྷཱཏུ – ཨཡཾ དྷཱཏུ ནིརོདྷསམཱཔཏྟི པཏྟབྦཱ’’ཏི། པཋམཾ།
‘‘Yā cāyaṃ, bhikkhu, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu – imā dhātuyo saññāsamāpatti pattabbā. Yāyaṃ, bhikkhu, nevasaññānāsaññāyatanadhātu – ayaṃ dhātu saṅkhārāvasesasamāpatti pattabbā . Yāyaṃ, bhikkhu, saññāvedayitanirodhadhātu – ayaṃ dhātu nirodhasamāpatti pattabbā’’ti. Paṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. སཏྟདྷཱཏུསུཏྟཝཎྞནཱ • 1. Sattadhātusuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. སཏྟདྷཱཏུསུཏྟཝཎྞནཱ • 1. Sattadhātusuttavaṇṇanā
