| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. து³தியவக்³கோ³
2. Dutiyavaggo
1. ஸத்ததா⁴துஸுத்தவண்ணனா
1. Sattadhātusuttavaṇṇanā
95. து³தியவக்³க³ஸ்ஸ பட²மே ஆபா⁴தா⁴தூதி ஆலோகதா⁴து. ஆலோகஸ்ஸபி ஆலோககஸிணே பரிகம்மங் கத்வா உப்பன்னஜ்ஜா²னஸ்ஸாபீதி ஸஹாரம்மணஸ்ஸ ஜா²னஸ்ஸ ஏதங் நாமங். ஸுப⁴தா⁴தூதி ஸுப⁴கஸிணே உப்பன்னஜ்ஜா²னவஸேன ஸஹாரம்மணஜ்ஜா²னமேவ . ஆகாஸானஞ்சாயதனமேவ ஆகாஸானஞ்சாயதனதா⁴து. ஸஞ்ஞாவேத³யிதனிரோதோ⁴வ ஸஞ்ஞாவேத³யிதனிரோத⁴தா⁴து. இதி ப⁴க³வா அனுஸந்தி⁴குஸலஸ்ஸ பி⁴க்கு²னோ தத்த² நிஸீதி³த்வா பஞ்ஹங் புச்சி²துகாமஸ்ஸ ஓகாஸங் தெ³ந்தோ தே³ஸனங் நிட்டா²பேஸி.
95. Dutiyavaggassa paṭhame ābhādhātūti ālokadhātu. Ālokassapi ālokakasiṇe parikammaṃ katvā uppannajjhānassāpīti sahārammaṇassa jhānassa etaṃ nāmaṃ. Subhadhātūti subhakasiṇe uppannajjhānavasena sahārammaṇajjhānameva . Ākāsānañcāyatanameva ākāsānañcāyatanadhātu. Saññāvedayitanirodhova saññāvedayitanirodhadhātu. Iti bhagavā anusandhikusalassa bhikkhuno tattha nisīditvā pañhaṃ pucchitukāmassa okāsaṃ dento desanaṃ niṭṭhāpesi.
அந்த⁴காரங் படிச்சாதி அந்த⁴காரோ ஹி ஆலோகேன பரிச்சி²ன்னோ, ஆலோகோபி அந்த⁴காரேன. அந்த⁴காரேன ஹி ஸோ பாகடோ ஹோதி. தஸ்மா ‘‘அந்த⁴காரங் படிச்ச பஞ்ஞாயதீ’’தி ஆஹ. அஸுப⁴ங் படிச்சாதி எத்தா²பி ஏஸேவ நயோ. அஸுப⁴ஞ்ஹி ஸுபே⁴ன, ஸுப⁴ஞ்ச அஸுபே⁴ன பரிச்சி²ன்னங், அஸுபே⁴ ஸதி ஸுப⁴ங் பஞ்ஞாயதி, தஸ்மா ஏவமாஹ. ரூபங் படிச்சாதி ரூபாவசரஸமாபத்திங் படிச்ச. ரூபாவசரஸமாபத்தியா ஹி ஸதி ஆகாஸானஞ்சாயதனஸமாபத்தி நாம ஹோதி ரூபஸமதிக்கமோ வா, தஸ்மா ஏவமாஹ. விஞ்ஞாணஞ்சாயதனதா⁴துஆதீ³ஸுபி ஏஸேவ நயோ. நிரோத⁴ங் படிச்சாதி சதுன்னங் க²ந்தா⁴னங் படிஸங்கா²அப்பவத்திங் படிச்ச. க²ந்த⁴னிரோத⁴ஞ்ஹி படிச்ச நிரோத⁴ஸமாபத்தி நாம பஞ்ஞாயதி, ந க²ந்த⁴பவத்திங், தஸ்மா ஏவமாஹ. எத்த² ச சதுன்னங் க²ந்தா⁴னங் நிரோதோ⁴வ நிரோத⁴ஸமாபத்தீதி வேதி³தப்³போ³.
Andhakāraṃpaṭiccāti andhakāro hi ālokena paricchinno, ālokopi andhakārena. Andhakārena hi so pākaṭo hoti. Tasmā ‘‘andhakāraṃ paṭicca paññāyatī’’ti āha. Asubhaṃ paṭiccāti etthāpi eseva nayo. Asubhañhi subhena, subhañca asubhena paricchinnaṃ, asubhe sati subhaṃ paññāyati, tasmā evamāha. Rūpaṃ paṭiccāti rūpāvacarasamāpattiṃ paṭicca. Rūpāvacarasamāpattiyā hi sati ākāsānañcāyatanasamāpatti nāma hoti rūpasamatikkamo vā, tasmā evamāha. Viññāṇañcāyatanadhātuādīsupi eseva nayo. Nirodhaṃ paṭiccāti catunnaṃ khandhānaṃ paṭisaṅkhāappavattiṃ paṭicca. Khandhanirodhañhi paṭicca nirodhasamāpatti nāma paññāyati, na khandhapavattiṃ, tasmā evamāha. Ettha ca catunnaṃ khandhānaṃ nirodhova nirodhasamāpattīti veditabbo.
கத²ங் ஸமாபத்தி பத்தப்³பா³தி கத²ங் ஸமாபத்தியோ கீதி³ஸா ஸமாபத்தியோ நாம ஹுத்வா பத்தப்³பா³தி? ஸஞ்ஞாஸமாபத்தி பத்தப்³பா³தி ஸஞ்ஞாய அத்தி²பா⁴வேன ஸஞ்ஞாஸமாபத்தியோ ஸஞ்ஞாஸமாபத்தியோ நாம ஹுத்வா பத்தப்³பா³. ஸங்கா²ராவஸேஸஸமாபத்தி பத்தப்³பா³தி ஸுகு²மஸங்கா²ரானங் அவஸிட்ட²தாய ஸங்கா²ராவஸேஸஸமாபத்தி நாம ஹுத்வா பத்தப்³பா³. நிரோத⁴ஸமாபத்தி பத்தப்³பா³தி நிரோதோ⁴வ நிரோத⁴ஸமாபத்தி நிரோத⁴ஸமாபத்தி நாம ஹுத்வா பத்தப்³பா³தி அத்தோ². பட²மங்.
Kathaṃ samāpatti pattabbāti kathaṃ samāpattiyo kīdisā samāpattiyo nāma hutvā pattabbāti? Saññāsamāpatti pattabbāti saññāya atthibhāvena saññāsamāpattiyo saññāsamāpattiyo nāma hutvā pattabbā. Saṅkhārāvasesasamāpatti pattabbāti sukhumasaṅkhārānaṃ avasiṭṭhatāya saṅkhārāvasesasamāpatti nāma hutvā pattabbā. Nirodhasamāpatti pattabbāti nirodhova nirodhasamāpatti nirodhasamāpatti nāma hutvā pattabbāti attho. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸத்ததா⁴துஸுத்தங் • 1. Sattadhātusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸத்ததா⁴துஸுத்தவண்ணனா • 1. Sattadhātusuttavaṇṇanā
