| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၀၉. သတ္တာဟကရဏီယာနုဇာနနာ
109. Sattāhakaraṇīyānujānanā
၁၈၇. အထ ခော ဘဂဝာ ရာဇဂဟေ ယထာဘိရန္တံ ဝိဟရိတ္ဝာ ယေန သာဝတ္ထိ တေန စာရိကံ ပက္ကာမိ။ အနုပုဗ္ဗေန စာရိကံ စရမာနော ယေန သာဝတ္ထိ တဒဝသရိ။ တတ္ရ သုဒံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ကောသလေသု ဇနပဒေ ဥဒေနေန ဥပာသကေန သင္ဃံ ဥဒ္ဒိသ္သ ဝိဟာရော ကာရာပိတော ဟောတိ။ သော ဘိက္ခူနံ သန္တိကေ ဒူတံ ပာဟေသိ – ‘‘အာဂစ္ဆန္တု ဘဒန္တာ, ဣစ္ဆာမိ ဒာနဉ္စ ဒာတုံ, ဓမ္မဉ္စ သောတုံ, ဘိက္ခူ စ ပသ္သိတု’’န္တိ။ ဘိက္ခူ ဧဝမာဟံသု – ‘‘ဘဂဝတာ, အာဝုသော, ပညတ္တံ ‘န ဝသ္သံ ဥပဂန္တ္ဝာ ပုရိမံ ဝာ တေမာသံ ပစ္ဆိမံ ဝာ တေမာသံ အဝသိတ္ဝာ စာရိကာ ပက္ကမိတဗ္ဗာ’တိ။ အာဂမေတု ဥဒေနော ဥပာသကော, ယာဝ ဘိက္ခူ ဝသ္သံ ဝသန္တိ။ ဝသ္သံဝုဋ္ဌာ အာဂမိသ္သန္တိ။ သစေ ပနသ္သ အစ္စာယိကံ ကရဏီယံ, တတ္ထေဝ အာဝာသိကာနံ ဘိက္ခူနံ သန္တိကေ ဝိဟာရံ ပတိဋ္ဌာပေတူ’’တိ။ ဥဒေနော ဥပာသကော ဥဇ္ဈာယတိ ခိယ္ယတိ ဝိပာစေတိ – ‘‘ကထဉ္ဟိ နာမ ဘဒန္တာ မယာ ပဟိတေ န အာဂစ္ဆိသ္သန္တိ။ အဟဉ္ဟိ ဒာယကော ကာရကော သင္ဃုပဋ္ဌာကော’’တိ။ အသ္သောသုံ ခော ဘိက္ခူ ဥဒေနသ္သ ဥပာသကသ္သ ဥဇ္ဈာယန္တသ္သ ခိယ္ယန္တသ္သ ဝိပာစေန္တသ္သ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, သတ္တန္နံ သတ္တာဟကရဏီယေန ပဟိတေ ဂန္တုံ, န တ္ဝေဝ အပ္ပဟိတေ။ ဘိက္ခုသ္သ, ဘိက္ခုနိယာ, သိက္ခမာနာယ, သာမဏေရသ္သ, သာမဏေရိယာ, ဥပာသကသ္သ, ဥပာသိကာယ – အနုဇာနာမိ, ဘိက္ခဝေ, ဣမေသံ သတ္တန္နံ သတ္တာဟကရဏီယေန ပဟိတေ ဂန္တုံ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော’’။
187. Atha kho bhagavā rājagahe yathābhirantaṃ viharitvā yena sāvatthi tena cārikaṃ pakkāmi. Anupubbena cārikaṃ caramāno yena sāvatthi tadavasari. Tatra sudaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena kosalesu janapade udenena upāsakena saṅghaṃ uddissa vihāro kārāpito hoti. So bhikkhūnaṃ santike dūtaṃ pāhesi – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti. Bhikkhū evamāhaṃsu – ‘‘bhagavatā, āvuso, paññattaṃ ‘na vassaṃ upagantvā purimaṃ vā temāsaṃ pacchimaṃ vā temāsaṃ avasitvā cārikā pakkamitabbā’ti. Āgametu udeno upāsako, yāva bhikkhū vassaṃ vasanti. Vassaṃvuṭṭhā āgamissanti. Sace panassa accāyikaṃ karaṇīyaṃ, tattheva āvāsikānaṃ bhikkhūnaṃ santike vihāraṃ patiṭṭhāpetū’’ti. Udeno upāsako ujjhāyati khiyyati vipāceti – ‘‘kathañhi nāma bhadantā mayā pahite na āgacchissanti. Ahañhi dāyako kārako saṅghupaṭṭhāko’’ti. Assosuṃ kho bhikkhū udenassa upāsakassa ujjhāyantassa khiyyantassa vipācentassa. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, sattannaṃ sattāhakaraṇīyena pahite gantuṃ, na tveva appahite. Bhikkhussa, bhikkhuniyā, sikkhamānāya, sāmaṇerassa, sāmaṇeriyā, upāsakassa, upāsikāya – anujānāmi, bhikkhave, imesaṃ sattannaṃ sattāhakaraṇīyena pahite gantuṃ, na tveva appahite. Sattāhaṃ sannivatto kātabbo’’.
၁၈၈. ဣဓ ပန, ဘိက္ခဝေ, ဥပာသကေန သင္ဃံ ဥဒ္ဒိသ္သ ဝိဟာရော ကာရာပိတော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယ္ယ – ‘‘အာဂစ္ဆန္တု ဘဒန္တာ, ဣစ္ဆာမိ ဒာနဉ္စ ဒာတုံ, ဓမ္မဉ္စ သောတုံ, ဘိက္ခူ စ ပသ္သိတု’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, ပဟိတေ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။
188. Idha pana, bhikkhave, upāsakena saṅghaṃ uddissa vihāro kārāpito hoti. So ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ဣဓ ပန, ဘိက္ခဝေ, ဥပာသကေန သင္ဃံ ဥဒ္ဒိသ္သ အဍ္ဎယောဂော ကာရာပိတော ဟောတိ။ပေ.။ ပာသာဒော ကာရာပိတော ဟောတိ။ ဟမ္မိယံ ကာရာပိတံ ဟောတိ။ ဂုဟာ ကာရာပိတာ ဟောတိ။ ပရိဝေဏံ ကာရာပိတံ ဟောတိ။ ကောဋ္ဌကော ကာရာပိတော ဟောတိ။ ဥပဋ္ဌာနသာလာ ကာရာပိတာ ဟောတိ။ အဂ္ဂိသာလာ ကာရာပိတာ ဟောတိ။ ကပ္ပိယကုဋိ ကာရာပိတာ ဟောတိ။ ဝစ္စကုဋိ ကာရာပိတာ ဟောတိ။ စင္ကမော ကာရာပိတော ဟောတိ ။ စင္ကမနသာလာ ကာရာပိတာ ဟောတိ။ ဥဒပာနော ကာရာပိတော ဟောတိ ။ ဥဒပာနသာလာ ကာရာပိတာ ဟောတိ။ ဇန္တာဃရံ ကာရာပိတံ ဟောတိ။ ဇန္တာဃရသာလာ ကာရာပိတာ ဟောတိ။ ပောက္ခရဏီ ကာရာပိတာ ဟောတိ။ မဏ္ဍပော ကာရာပိတော ဟောတိ။ အာရာမော ကာရာပိတော ဟောတိ။ အာရာမဝတ္ထု ကာရာပိတံ ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယ္ယ – ‘‘အာဂစ္ဆန္တု ဘဒန္တာ, ဣစ္ဆာမိ ဒာနဉ္စ ဒာတုံ, ဓမ္မဉ္စ သောတုံ, ဘိက္ခူ စ ပသ္သိတု’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, ပဟိတေ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။
Idha pana, bhikkhave, upāsakena saṅghaṃ uddissa aḍḍhayogo kārāpito hoti…pe… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… kappiyakuṭi kārāpitā hoti… vaccakuṭi kārāpitā hoti… caṅkamo kārāpito hoti … caṅkamanasālā kārāpitā hoti… udapāno kārāpito hoti … udapānasālā kārāpitā hoti… jantāgharaṃ kārāpitaṃ hoti… jantāgharasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. So ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ဣဓ ပန, ဘိက္ခဝေ, ဥပာသကေန သမ္ဗဟုလေ ဘိက္ခူ ဥဒ္ဒိသ္သ။ပေ.။ ဧကံ ဘိက္ခုံ ဥဒ္ဒိသ္သ ဝိဟာရော ကာရာပိတော ဟောတိ။ အဍ္ဎယောဂော ကာရာပိတော ဟောတိ။ ပာသာဒော ကာရာပိတော ဟောတိ ။ ဟမ္မိယံ ကာရာပိတံ ဟောတိ။ ဂုဟာ ကာရာပိတာ ဟောတိ။ ပရိဝေဏံ ကာရာပိတံ ဟောတိ။ ကောဋ္ဌကော ကာရာပိတော ဟောတိ။ ဥပဋ္ဌာနသာလာ ကာရာပိတာ ဟောတိ။ အဂ္ဂိသာလာ ကာရာပိတာ ဟောတိ။ ကပ္ပိယကုဋိ ကာရာပိတာ ဟောတိ။ ဝစ္စကုဋိ ကာရာပိတာ ဟောတိ။ စင္ကမော ကာရာပိတော ဟောတိ။ စင္ကမနသာလာ ကာရာပိတာ ဟောတိ။ ဥဒပာနော ကာရာပိတော ဟောတိ။ ဥဒပာနသာလာ ကာရာပိတာ ဟောတိ။ ဇန္တာဃရံ ကာရာပိတံ ဟောတိ။ ဇန္တာဃရသာလာ ကာရာပိတာ ဟောတိ။ ပောက္ခရဏီ ကာရာပိတာ ဟောတိ။ မဏ္ဍပော ကာရာပိတော ဟောတိ။ အာရာမော ကာရာပိတော ဟောတိ။ အာရာမဝတ္ထု ကာရာပိတံ ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယ္ယ – ‘‘အာဂစ္ဆန္တု ဘဒန္တာ, ဣစ္ဆာမိ ဒာနဉ္စ ဒာတုံ, ဓမ္မဉ္စ သောတုံ, ဘိက္ခူ စ ပသ္သိတု’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, ပဟိတေ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။
Idha pana, bhikkhave, upāsakena sambahule bhikkhū uddissa…pe… ekaṃ bhikkhuṃ uddissa vihāro kārāpito hoti… aḍḍhayogo kārāpito hoti… pāsādo kārāpito hoti … hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… kappiyakuṭi kārāpitā hoti… vaccakuṭi kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… jantāgharaṃ kārāpitaṃ hoti… jantāgharasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. So ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ဣဓ ပန, ဘိက္ခဝေ, ဥပာသကေန ဘိက္ခုနိသင္ဃံ ဥဒ္ဒိသ္သ။ပေ.။ သမ္ဗဟုလာ ဘိက္ခုနိယော ဥဒ္ဒိသ္သ။ပေ.။ ဧကံ ဘိက္ခုနိံ ဥဒ္ဒိသ္သ။ပေ.။ သမ္ဗဟုလာ သိက္ခမာနာယော ဥဒ္ဒိသ္သ။ပေ.။ ဧကံ သိက္ခမာနံ ဥဒ္ဒိသ္သ။ပေ.။ သမ္ဗဟုလေ သာမဏေရေ ဥဒ္ဒိသ္သ။ပေ.။ ဧကံ သာမဏေရံ ဥဒ္ဒိသ္သ။ပေ.။ သမ္ဗဟုလာ သာမဏေရိယော ဥဒ္ဒိသ္သ။ပေ.။ ဧကံ သာမဏေရိံ ဥဒ္ဒိသ္သ ဝိဟာရော ကာရာပိတော ဟောတိ။ပေ.။ အဍ္ဎယောဂော ကာရာပိတော ဟောတိ။ ပာသာဒော ကာရာပိတော ဟောတိ။ ဟမ္မိယံ ကာရာပိတံ ဟောတိ။ ဂုဟာ ကာရာပိတာ ဟောတိ။ ပရိဝေဏံ ကာရာပိတံ ဟောတိ။ ကောဋ္ဌကော ကာရာပိတော ဟောတိ။ ဥပဋ္ဌာနသာလာ ကာရာပိတာ ဟောတိ။ အဂ္ဂိသာလာ ကာရာပိတာ ဟောတိ ။ ကပ္ပိယကုဋိ ကာရာပိတာ ဟောတိ။ စင္ကမော ကာရာပိတော ဟောတိ။ စင္ကမနသာလာ ကာရာပိတာ ဟောတိ။ ဥဒပာနော ကာရာပိတော ဟောတိ။ ဥဒပာနသာလာ ကာရာပိတာ ဟောတိ။ ပောက္ခရဏီ ကာရာပိတာ ဟောတိ။ မဏ္ဍပော ကာရာပိတော ဟောတိ။ အာရာမော ကာရာပိတော ဟောတိ။ အာရာမဝတ္ထု ကာရာပိတံ ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယ္ယ – ‘‘အာဂစ္ဆန္တု ဘဒန္တာ, ဣစ္ဆာမိ ဒာနဉ္စ ဒာတုံ , ဓမ္မဉ္စ သောတုံ, ဘိက္ခူ စ ပသ္သိတု’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, ပဟိတေ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။
Idha pana, bhikkhave, upāsakena bhikkhunisaṅghaṃ uddissa…pe… sambahulā bhikkhuniyo uddissa…pe… ekaṃ bhikkhuniṃ uddissa…pe… sambahulā sikkhamānāyo uddissa…pe… ekaṃ sikkhamānaṃ uddissa…pe… sambahule sāmaṇere uddissa…pe… ekaṃ sāmaṇeraṃ uddissa…pe… sambahulā sāmaṇeriyo uddissa…pe… ekaṃ sāmaṇeriṃ uddissa vihāro kārāpito hoti…pe… aḍḍhayogo kārāpito hoti… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti … kappiyakuṭi kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. So ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ , dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
၁၈၉. ဣဓ ပန, ဘိက္ခဝေ, ဥပာသကေန အတ္တနော အတ္ထာယ နိဝေသနံ ကာရာပိတံ ဟောတိ။ပေ.။ သယနိဃရံ ကာရာပိတံ ဟောတိ။ ဥဒောသိတော ကာရာပိတော ဟောတိ။ အဋ္ဋော ကာရာပိတော ဟောတိ။ မာဠော ကာရာပိတော ဟောတိ။ အာပဏော ကာရာပိတော ဟောတိ။ အာပဏသာလာ ကာရာပိတာ ဟောတိ။ ပာသာဒော ကာရာပိတော ဟောတိ။ ဟမ္မိယံ ကာရာပိတံ ဟောတိ။ ဂုဟာ ကာရာပိတာ ဟောတိ။ ပရိဝေဏံ ကာရာပိတံ ဟောတိ။ ကောဋ္ဌကော ကာရာပိတော ဟောတိ။ ဥပဋ္ဌာနသာလာ ကာရာပိတာ ဟောတိ။ အဂ္ဂိသာလာ ကာရာပိတာ ဟောတိ။ ရသဝတီ ကာရာပိတာ ဟောတိ။ စင္ကမော ကာရာပိတော ဟောတိ။ စင္ကမနသာလာ ကာရာပိတာ ဟောတိ။ ဥဒပာနော ကာရာပိတော ဟောတိ။ ဥဒပာနသာလာ ကာရာပိတာ ဟောတိ။ ပောက္ခရဏီ ကာရာပိတာ ဟောတိ။ မဏ္ဍပော ကာရာပိတော ဟောတိ။ အာရာမော ကာရာပိတော ဟောတိ ။ အာရာမဝတ္ထု ကာရာပိတံ ဟောတိ။ ပုတ္တသ္သ ဝာ ဝာရေယ္ယံ ဟောတိ။ ဓီတုယာ ဝာ ဝာရေယ္ယံ ဟောတိ။ ဂိလာနော ဝာ ဟောတိ။ အဘိညာတံ ဝာ သုတ္တန္တံ ဘဏတိ။ သော စေ ဘိက္ခူနံ သန္တိကေ ဒူတံ ပဟိဏေယ္ယ – ‘အာဂစ္ဆန္တု ဘဒန္တာ, ဣမံ သုတ္တန္တံ ပရိယာပုဏိသ္သန္တိ, ပုရာယံ သုတ္တန္တော န ပလုဇ္ဇတီ’တိ။ အညတရံ ဝာ ပနသ္သ ကိစ္စံ ဟောတိ – ကရဏီယံ ဝာ, သော စေ ဘိက္ခူနံ သန္တိကေ ဒူတံ ပဟိဏေယ္ယ – ‘‘အာဂစ္ဆန္တု ဘဒန္တာ, ဣစ္ဆာမိ ဒာနဉ္စ ဒာတုံ, ဓမ္မဉ္စ သောတုံ, ဘိက္ခူ စ ပသ္သိတု’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, ပဟိတေ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။
189. Idha pana, bhikkhave, upāsakena attano atthāya nivesanaṃ kārāpitaṃ hoti…pe… sayanigharaṃ kārāpitaṃ hoti… udosito kārāpito hoti… aṭṭo kārāpito hoti… māḷo kārāpito hoti… āpaṇo kārāpito hoti… āpaṇasālā kārāpitā hoti… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… rasavatī kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti … ārāmavatthu kārāpitaṃ hoti… puttassa vā vāreyyaṃ hoti… dhītuyā vā vāreyyaṃ hoti… gilāno vā hoti… abhiññātaṃ vā suttantaṃ bhaṇati. So ce bhikkhūnaṃ santike dūtaṃ pahiṇeyya – ‘āgacchantu bhadantā, imaṃ suttantaṃ pariyāpuṇissanti, purāyaṃ suttanto na palujjatī’ti. Aññataraṃ vā panassa kiccaṃ hoti – karaṇīyaṃ vā, so ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
၁၉၀. ဣဓ ပန, ဘိက္ခဝေ, ဥပာသိကာယ သင္ဃံ ဥဒ္ဒိသ္သ ဝိဟာရော ကာရာပိတော ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယ္ယ – ‘‘အာဂစ္ဆန္တု အယ္ယာ, ဣစ္ဆာမိ ဒာနဉ္စ ဒာတုံ, ဓမ္မဉ္စ သောတုံ, ဘိက္ခူ စ ပသ္သိတု’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, ပဟိတေ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။
190. Idha pana, bhikkhave, upāsikāya saṅghaṃ uddissa vihāro kārāpito hoti. Sā ce bhikkhūnaṃ santike dūtaṃ pahiṇeyya – ‘‘āgacchantu ayyā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ဣဓ ပန, ဘိက္ခဝေ, ဥပာသိကာယ သင္ဃံ ဥဒ္ဒိသ္သ အဍ္ဎယောဂော ကာရာပိတော ဟောတိ။ပေ.။ ပာသာဒော ကာရာပိတော ဟောတိ။ ဟမ္မိယံ ကာရာပိတံ ဟောတိ။ ဂုဟာ ကာရာပိတာ ဟောတိ။ ပရိဝေဏံ ကာရာပိတံ ဟောတိ။ ကောဋ္ဌကော ကာရာပိတော ဟောတိ။ ဥပဋ္ဌာနသာလာ ကာရာပိတာ ဟောတိ။ အဂ္ဂိသာလာ ကာရာပိတာ ဟောတိ။ ကပ္ပိယကုဋိ ကာရာပိတာ ဟောတိ။ ဝစ္စကုဋိ ကာရာပိတာ ဟောတိ။ စင္ကမော ကာရာပိတော ဟောတိ။ စင္ကမနသာလာ ကာရာပိတာ ဟောတိ။ ဥဒပာနော ကာရာပိတော ဟောတိ။ ဥဒပာနသာလာ ကာရာပိတာ ဟောတိ။ ဇန္တာဃရံ ကာရာပိတံ ဟောတိ။ ဇန္တာဃရသာလာ ကာရာပိတာ ဟောတိ။ ပောက္ခရဏီ ကာရာပိတာ ဟောတိ။ မဏ္ဍပော ကာရာပိတော ဟောတိ။ အာရာမော ကာရာပိတော ဟောတိ။ အာရာမဝတ္ထု ကာရာပိတံ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယ္ယ – ‘‘အာဂစ္ဆန္တု အယ္ယာ, ဣစ္ဆာမိ ဒာနဉ္စ ဒာတုံ, ဓမ္မဉ္စ သောတုံ, ဘိက္ခူ စ ပသ္သိတု’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, ပဟိတေ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။
Idha pana, bhikkhave, upāsikāya saṅghaṃ uddissa aḍḍhayogo kārāpito hoti…pe… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… kappiyakuṭi kārāpitā hoti… vaccakuṭi kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… jantāgharaṃ kārāpitaṃ hoti… jantāgharasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. Sā ce bhikkhūnaṃ santike dūtaṃ pahiṇeyya – ‘‘āgacchantu ayyā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ဣဓ ပန, ဘိက္ခဝေ, ဥပာသိကာယ သမ္ဗဟုလေ ဘိက္ခူ ဥဒ္ဒိသ္သ။ပေ.။ ဧကံ ဘိက္ခုံ ဥဒ္ဒိသ္သ။ပေ.။ ဘိက္ခုနိသင္ဃံ ဥဒ္ဒိသ္သ။ပေ.။ သမ္ဗဟုလာ ဘိက္ခုနိယော ဥဒ္ဒိသ္သ။ပေ.။ ဧကံ ဘိက္ခုနိံ ဥဒ္ဒိသ္သ။ပေ.။ သမ္ဗဟုလာ သိက္ခမာနာယော ဥဒ္ဒိသ္သ။ပေ.။ ဧကံ သိက္ခမာနံ ဥဒ္ဒိသ္သ။ပေ.။ သမ္ဗဟုလေ သာမဏေရေ ဥဒ္ဒိသ္သ။ပေ.။ ဧကံ သာမဏေရံ ဥဒ္ဒိသ္သ။ပေ.။ သမ္ဗဟုလာ သာမဏေရိယော ဥဒ္ဒိသ္သ။ပေ.။ ဧကံ သာမဏေရိံ ဥဒ္ဒိသ္သ။ပေ.။။
Idha pana, bhikkhave, upāsikāya sambahule bhikkhū uddissa…pe… ekaṃ bhikkhuṃ uddissa…pe… bhikkhunisaṅghaṃ uddissa…pe… sambahulā bhikkhuniyo uddissa…pe… ekaṃ bhikkhuniṃ uddissa…pe… sambahulā sikkhamānāyo uddissa…pe… ekaṃ sikkhamānaṃ uddissa…pe… sambahule sāmaṇere uddissa…pe… ekaṃ sāmaṇeraṃ uddissa…pe… sambahulā sāmaṇeriyo uddissa…pe… ekaṃ sāmaṇeriṃ uddissa…pe….
၁၉၁. ဣဓ ပန, ဘိက္ခဝေ, ဥပာသိကာယ အတ္တနော အတ္ထာယ နိဝေသနံ ကာရာပိတံ ဟောတိ။ပေ.။ သယနိဃရံ ကာရာပိတံ ဟောတိ။ ဥဒောသိတော ကာရာပိတော ဟောတိ။ အဋ္ဋော ကာရာပိတော ဟောတိ။ မာဠော ကာရာပိတော ဟောတိ။ အာပဏော ကာရာပိတော ဟောတိ။ အာပဏသာလာ ကာရာပိတာ ဟောတိ။ ပာသာဒော ကာရာပိတော ဟောတိ။ ဟမ္မိယံ ကာရာပိတံ ဟောတိ။ ဂုဟာ ကာရာပိတာ ဟောတိ။ ပရိဝေဏံ ကာရာပိတံ ဟောတိ။ ကောဋ္ဌကော ကာရာပိတော ဟောတိ။ ဥပဋ္ဌာနသာလာ ကာရာပိတာ ဟောတိ။ အဂ္ဂိသာလာ ကာရာပိတာ ဟောတိ။ ရသဝတီ ကာရာပိတာ ဟောတိ။ စင္ကမော ကာရာပိတော ဟောတိ။ စင္ကမနသာလာ ကာရာပိတာ ဟောတိ။ ဥဒပာနော ကာရာပိတော ဟောတိ ။ ဥဒပာနသာလာ ကာရာပိတာ ဟောတိ။ ပောက္ခရဏီ ကာရာပိတာ ဟောတိ။ မဏ္ဍပော ကာရာပိတော ဟောတိ။ အာရာမော ကာရာပိတော ဟောတိ။ အာရာမဝတ္ထု ကာရာပိတံ ဟောတိ။ ပုတ္တသ္သ ဝာ ဝာရေယ္ယံ ဟောတိ။ ဓီတုယာ ဝာ ဝာရေယ္ယံ ဟောတိ။ ဂိလာနာ ဝာ ဟောတိ။ အဘိညာတံ ဝာ သုတ္တန္တံ ဘဏတိ။ သာ စေ ဘိက္ခူနံ သန္တိကေ ဒူတံ ပဟိဏေယ္ယ – ‘‘အာဂစ္ဆန္တု အယ္ယာ, ဣမံ သုတ္တန္တံ ပရိယာပုဏိသ္သန္တိ, ပုရာယံ သုတ္တန္တော ပလုဇ္ဇတီ’’တိ။ အညတရံ ဝာ ပနသ္သာ ကိစ္စံ ဟောတိ ကရဏီယံ ဝာ, သာ စေ ဘိက္ခူနံ သန္တိကေ ဒူတံ ပဟိဏေယ္ယ – ‘‘အာဂစ္ဆန္တု အယ္ယာ, ဣစ္ဆာမိ ဒာနဉ္စ ဒာတုံ, ဓမ္မဉ္စ သောတုံ, ဘိက္ခူ စ ပသ္သိတု’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, ပဟိတေ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။
191. Idha pana, bhikkhave, upāsikāya attano atthāya nivesanaṃ kārāpitaṃ hoti…pe… sayanigharaṃ kārāpitaṃ hoti… udosito kārāpito hoti… aṭṭo kārāpito hoti… māḷo kārāpito hoti… āpaṇo kārāpito hoti… āpaṇasālā kārāpitā hoti… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… rasavatī kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti … udapānasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti… puttassa vā vāreyyaṃ hoti… dhītuyā vā vāreyyaṃ hoti… gilānā vā hoti… abhiññātaṃ vā suttantaṃ bhaṇati. Sā ce bhikkhūnaṃ santike dūtaṃ pahiṇeyya – ‘‘āgacchantu ayyā, imaṃ suttantaṃ pariyāpuṇissanti, purāyaṃ suttanto palujjatī’’ti. Aññataraṃ vā panassā kiccaṃ hoti karaṇīyaṃ vā, sā ce bhikkhūnaṃ santike dūtaṃ pahiṇeyya – ‘‘āgacchantu ayyā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
၁၉၂. ဣဓ ပန, ဘိက္ခဝေ, ဘိက္ခုနာ သင္ဃံ ဥဒ္ဒိသ္သ။ပေ.။ ဘိက္ခုနိယာ သင္ဃံ ဥဒ္ဒိသ္သ။ သိက္ခမာနာယ သင္ဃံ ဥဒ္ဒိသ္သ။ သာမဏေရေန သင္ဃံ ဥဒ္ဒိသ္သ။ သာမဏေရိယာ သင္ဃံ ဥဒ္ဒိသ္သ ။ သမ္ဗဟုလေ ဘိက္ခူ ဥဒ္ဒိသ္သ။ ဧကံ ဘိက္ခုံ ဥဒ္ဒိသ္သ။ ဘိက္ခုနိသင္ဃံ ဥဒ္ဒိသ္သ။ သမ္ဗဟုလာ ဘိက္ခုနိယော ဥဒ္ဒိသ္သ။ ဧကံ ဘိက္ခုနိံ ဥဒ္ဒိသ္သ။ သမ္ဗဟုလာ သိက္ခမာနာယော ဥဒ္ဒိသ္သ။ ဧကံ သိက္ခမာနံ ဥဒ္ဒိသ္သ။ သမ္ဗဟုလေ သာမဏေရေ ဥဒ္ဒိသ္သ။ ဧကံ သာမဏေရံ ဥဒ္ဒိသ္သ။ သမ္ဗဟုလာ သာမဏေရိယော ဥဒ္ဒိသ္သ။ ဧကံ သာမဏေရိံ ဥဒ္ဒိသ္သ။ အတ္တနော အတ္ထာယ ဝိဟာရော ကာရာပိတော ဟောတိ။ပေ.။ အဍ္ဎယောဂော ကာရာပိတော ဟောတိ။ ပာသာဒော ကာရာပိတော ဟောတိ။ ဟမ္မိယံ ကာရာပိတံ ဟောတိ။ ဂုဟာ ကာရာပိတာ ဟောတိ။ ပရိဝေဏံ ကာရာပိတံ ဟောတိ ။ ကောဋ္ဌကော ကာရာပိတော ဟောတိ။ ဥပဋ္ဌာနသာလာ ကာရာပိတာ ဟောတိ။ အဂ္ဂိသာလာ ကာရာပိတာ ဟောတိ။ ကပ္ပိယကုဋိ ကာရာပိတာ ဟောတိ။ စင္ကမော ကာရာပိတော ဟောတိ။ စင္ကမနသာလာ ကာရာပိတာ ဟောတိ။ ဥဒပာနော ကာရာပိတော ဟောတိ။ ဥဒပာနသာလာ ကာရာပိတာ ဟောတိ။ ပောက္ခရဏီ ကာရာပိတာ ဟောတိ။ မဏ္ဍပော ကာရာပိတော ဟောတိ။ အာရာမော ကာရာပိတော ဟောတိ။ အာရာမဝတ္ထု ကာရာပိတံ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယ္ယ။ ‘‘အာဂစ္ဆန္တု အယ္ယာ, ဣစ္ဆာမိ ဒာနဉ္စ ဒာတုံ, ဓမ္မဉ္စ သောတုံ, ဘိက္ခူ စ ပသ္သိတု’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, ပဟိတေ, န တ္ဝေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗောတိ။
192. Idha pana, bhikkhave, bhikkhunā saṅghaṃ uddissa…pe… bhikkhuniyā saṅghaṃ uddissa… sikkhamānāya saṅghaṃ uddissa… sāmaṇerena saṅghaṃ uddissa… sāmaṇeriyā saṅghaṃ uddissa … sambahule bhikkhū uddissa… ekaṃ bhikkhuṃ uddissa… bhikkhunisaṅghaṃ uddissa… sambahulā bhikkhuniyo uddissa… ekaṃ bhikkhuniṃ uddissa… sambahulā sikkhamānāyo uddissa… ekaṃ sikkhamānaṃ uddissa… sambahule sāmaṇere uddissa… ekaṃ sāmaṇeraṃ uddissa… sambahulā sāmaṇeriyo uddissa… ekaṃ sāmaṇeriṃ uddissa… attano atthāya vihāro kārāpito hoti…pe… aḍḍhayogo kārāpito hoti… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti … koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… kappiyakuṭi kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. Sā ce bhikkhūnaṃ santike dūtaṃ pahiṇeyya… ‘‘āgacchantu ayyā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabboti.
သတ္တာဟကရဏီယာနုဇာနတာ နိဋ္ဌိတာ။
Sattāhakaraṇīyānujānatā niṭṭhitā.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / သတ္တာဟကရဏီယာနုဇာနနကထာ • Sattāhakaraṇīyānujānanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / သတ္တာဟကရဏီယာနုဇာနနကထာဝဏ္ဏနာ • Sattāhakaraṇīyānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / သတ္တာဟကရဏီယာနုဇာနနကထာဝဏ္ဏနာ • Sattāhakaraṇīyānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဝသ္သူပနာယိကအနုဇာနနကထာဒိဝဏ္ဏနာ • Vassūpanāyikaanujānanakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၀၉. သတ္တာဟကရဏီယာနုဇာနနကထာ • 109. Sattāhakaraṇīyānujānanakathā
