| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೧೦೯. ಸತ್ತಾಹಕರಣೀಯಾನುಜಾನನಾ
109. Sattāhakaraṇīyānujānanā
೧೮೭. ಅಥ ಖೋ ಭಗವಾ ರಾಜಗಹೇ ಯಥಾಭಿರನ್ತಂ ವಿಹರಿತ್ವಾ ಯೇನ ಸಾವತ್ಥಿ ತೇನ ಚಾರಿಕಂ ಪಕ್ಕಾಮಿ। ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಸಾವತ್ಥಿ ತದವಸರಿ। ತತ್ರ ಸುದಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ। ತೇನ ಖೋ ಪನ ಸಮಯೇನ ಕೋಸಲೇಸು ಜನಪದೇ ಉದೇನೇನ ಉಪಾಸಕೇನ ಸಙ್ಘಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ। ಸೋ ಭಿಕ್ಖೂನಂ ಸನ್ತಿಕೇ ದೂತಂ ಪಾಹೇಸಿ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ। ಭಿಕ್ಖೂ ಏವಮಾಹಂಸು – ‘‘ಭಗವತಾ, ಆವುಸೋ, ಪಞ್ಞತ್ತಂ ‘ನ ವಸ್ಸಂ ಉಪಗನ್ತ್ವಾ ಪುರಿಮಂ ವಾ ತೇಮಾಸಂ ಪಚ್ಛಿಮಂ ವಾ ತೇಮಾಸಂ ಅವಸಿತ್ವಾ ಚಾರಿಕಾ ಪಕ್ಕಮಿತಬ್ಬಾ’ತಿ। ಆಗಮೇತು ಉದೇನೋ ಉಪಾಸಕೋ, ಯಾವ ಭಿಕ್ಖೂ ವಸ್ಸಂ ವಸನ್ತಿ। ವಸ್ಸಂವುಟ್ಠಾ ಆಗಮಿಸ್ಸನ್ತಿ। ಸಚೇ ಪನಸ್ಸ ಅಚ್ಚಾಯಿಕಂ ಕರಣೀಯಂ, ತತ್ಥೇವ ಆವಾಸಿಕಾನಂ ಭಿಕ್ಖೂನಂ ಸನ್ತಿಕೇ ವಿಹಾರಂ ಪತಿಟ್ಠಾಪೇತೂ’’ತಿ। ಉದೇನೋ ಉಪಾಸಕೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭದನ್ತಾ ಮಯಾ ಪಹಿತೇ ನ ಆಗಚ್ಛಿಸ್ಸನ್ತಿ। ಅಹಞ್ಹಿ ದಾಯಕೋ ಕಾರಕೋ ಸಙ್ಘುಪಟ್ಠಾಕೋ’’ತಿ। ಅಸ್ಸೋಸುಂ ಖೋ ಭಿಕ್ಖೂ ಉದೇನಸ್ಸ ಉಪಾಸಕಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ। ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ। ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಸತ್ತನ್ನಂ ಸತ್ತಾಹಕರಣೀಯೇನ ಪಹಿತೇ ಗನ್ತುಂ, ನ ತ್ವೇವ ಅಪ್ಪಹಿತೇ। ಭಿಕ್ಖುಸ್ಸ, ಭಿಕ್ಖುನಿಯಾ, ಸಿಕ್ಖಮಾನಾಯ, ಸಾಮಣೇರಸ್ಸ, ಸಾಮಣೇರಿಯಾ, ಉಪಾಸಕಸ್ಸ, ಉಪಾಸಿಕಾಯ – ಅನುಜಾನಾಮಿ, ಭಿಕ್ಖವೇ, ಇಮೇಸಂ ಸತ್ತನ್ನಂ ಸತ್ತಾಹಕರಣೀಯೇನ ಪಹಿತೇ ಗನ್ತುಂ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ’’।
187. Atha kho bhagavā rājagahe yathābhirantaṃ viharitvā yena sāvatthi tena cārikaṃ pakkāmi. Anupubbena cārikaṃ caramāno yena sāvatthi tadavasari. Tatra sudaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena kosalesu janapade udenena upāsakena saṅghaṃ uddissa vihāro kārāpito hoti. So bhikkhūnaṃ santike dūtaṃ pāhesi – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti. Bhikkhū evamāhaṃsu – ‘‘bhagavatā, āvuso, paññattaṃ ‘na vassaṃ upagantvā purimaṃ vā temāsaṃ pacchimaṃ vā temāsaṃ avasitvā cārikā pakkamitabbā’ti. Āgametu udeno upāsako, yāva bhikkhū vassaṃ vasanti. Vassaṃvuṭṭhā āgamissanti. Sace panassa accāyikaṃ karaṇīyaṃ, tattheva āvāsikānaṃ bhikkhūnaṃ santike vihāraṃ patiṭṭhāpetū’’ti. Udeno upāsako ujjhāyati khiyyati vipāceti – ‘‘kathañhi nāma bhadantā mayā pahite na āgacchissanti. Ahañhi dāyako kārako saṅghupaṭṭhāko’’ti. Assosuṃ kho bhikkhū udenassa upāsakassa ujjhāyantassa khiyyantassa vipācentassa. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, sattannaṃ sattāhakaraṇīyena pahite gantuṃ, na tveva appahite. Bhikkhussa, bhikkhuniyā, sikkhamānāya, sāmaṇerassa, sāmaṇeriyā, upāsakassa, upāsikāya – anujānāmi, bhikkhave, imesaṃ sattannaṃ sattāhakaraṇīyena pahite gantuṃ, na tveva appahite. Sattāhaṃ sannivatto kātabbo’’.
೧೮೮. ಇಧ ಪನ, ಭಿಕ್ಖವೇ, ಉಪಾಸಕೇನ ಸಙ್ಘಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ। ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ।
188. Idha pana, bhikkhave, upāsakena saṅghaṃ uddissa vihāro kārāpito hoti. So ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ಇಧ ಪನ, ಭಿಕ್ಖವೇ, ಉಪಾಸಕೇನ ಸಙ್ಘಂ ಉದ್ದಿಸ್ಸ ಅಡ್ಢಯೋಗೋ ಕಾರಾಪಿತೋ ಹೋತಿ…ಪೇ॰… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ಕಪ್ಪಿಯಕುಟಿ ಕಾರಾಪಿತಾ ಹೋತಿ… ವಚ್ಚಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ … ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ … ಉದಪಾನಸಾಲಾ ಕಾರಾಪಿತಾ ಹೋತಿ… ಜನ್ತಾಘರಂ ಕಾರಾಪಿತಂ ಹೋತಿ… ಜನ್ತಾಘರಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ। ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ।
Idha pana, bhikkhave, upāsakena saṅghaṃ uddissa aḍḍhayogo kārāpito hoti…pe… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… kappiyakuṭi kārāpitā hoti… vaccakuṭi kārāpitā hoti… caṅkamo kārāpito hoti … caṅkamanasālā kārāpitā hoti… udapāno kārāpito hoti … udapānasālā kārāpitā hoti… jantāgharaṃ kārāpitaṃ hoti… jantāgharasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. So ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ಇಧ ಪನ, ಭಿಕ್ಖವೇ, ಉಪಾಸಕೇನ ಸಮ್ಬಹುಲೇ ಭಿಕ್ಖೂ ಉದ್ದಿಸ್ಸ…ಪೇ॰… ಏಕಂ ಭಿಕ್ಖುಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ… ಅಡ್ಢಯೋಗೋ ಕಾರಾಪಿತೋ ಹೋತಿ… ಪಾಸಾದೋ ಕಾರಾಪಿತೋ ಹೋತಿ … ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ಕಪ್ಪಿಯಕುಟಿ ಕಾರಾಪಿತಾ ಹೋತಿ… ವಚ್ಚಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಜನ್ತಾಘರಂ ಕಾರಾಪಿತಂ ಹೋತಿ… ಜನ್ತಾಘರಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ। ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ।
Idha pana, bhikkhave, upāsakena sambahule bhikkhū uddissa…pe… ekaṃ bhikkhuṃ uddissa vihāro kārāpito hoti… aḍḍhayogo kārāpito hoti… pāsādo kārāpito hoti … hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… kappiyakuṭi kārāpitā hoti… vaccakuṭi kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… jantāgharaṃ kārāpitaṃ hoti… jantāgharasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. So ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ಇಧ ಪನ, ಭಿಕ್ಖವೇ, ಉಪಾಸಕೇನ ಭಿಕ್ಖುನಿಸಙ್ಘಂ ಉದ್ದಿಸ್ಸ…ಪೇ॰… ಸಮ್ಬಹುಲಾ ಭಿಕ್ಖುನಿಯೋ ಉದ್ದಿಸ್ಸ…ಪೇ॰… ಏಕಂ ಭಿಕ್ಖುನಿಂ ಉದ್ದಿಸ್ಸ…ಪೇ॰… ಸಮ್ಬಹುಲಾ ಸಿಕ್ಖಮಾನಾಯೋ ಉದ್ದಿಸ್ಸ…ಪೇ॰… ಏಕಂ ಸಿಕ್ಖಮಾನಂ ಉದ್ದಿಸ್ಸ…ಪೇ॰… ಸಮ್ಬಹುಲೇ ಸಾಮಣೇರೇ ಉದ್ದಿಸ್ಸ…ಪೇ॰… ಏಕಂ ಸಾಮಣೇರಂ ಉದ್ದಿಸ್ಸ…ಪೇ॰… ಸಮ್ಬಹುಲಾ ಸಾಮಣೇರಿಯೋ ಉದ್ದಿಸ್ಸ…ಪೇ॰… ಏಕಂ ಸಾಮಣೇರಿಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ…ಪೇ॰… ಅಡ್ಢಯೋಗೋ ಕಾರಾಪಿತೋ ಹೋತಿ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ … ಕಪ್ಪಿಯಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ। ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ , ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ।
Idha pana, bhikkhave, upāsakena bhikkhunisaṅghaṃ uddissa…pe… sambahulā bhikkhuniyo uddissa…pe… ekaṃ bhikkhuniṃ uddissa…pe… sambahulā sikkhamānāyo uddissa…pe… ekaṃ sikkhamānaṃ uddissa…pe… sambahule sāmaṇere uddissa…pe… ekaṃ sāmaṇeraṃ uddissa…pe… sambahulā sāmaṇeriyo uddissa…pe… ekaṃ sāmaṇeriṃ uddissa vihāro kārāpito hoti…pe… aḍḍhayogo kārāpito hoti… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti … kappiyakuṭi kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. So ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ , dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
೧೮೯. ಇಧ ಪನ, ಭಿಕ್ಖವೇ, ಉಪಾಸಕೇನ ಅತ್ತನೋ ಅತ್ಥಾಯ ನಿವೇಸನಂ ಕಾರಾಪಿತಂ ಹೋತಿ…ಪೇ॰… ಸಯನಿಘರಂ ಕಾರಾಪಿತಂ ಹೋತಿ… ಉದೋಸಿತೋ ಕಾರಾಪಿತೋ ಹೋತಿ… ಅಟ್ಟೋ ಕಾರಾಪಿತೋ ಹೋತಿ… ಮಾಳೋ ಕಾರಾಪಿತೋ ಹೋತಿ… ಆಪಣೋ ಕಾರಾಪಿತೋ ಹೋತಿ… ಆಪಣಸಾಲಾ ಕಾರಾಪಿತಾ ಹೋತಿ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ರಸವತೀ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ … ಆರಾಮವತ್ಥು ಕಾರಾಪಿತಂ ಹೋತಿ… ಪುತ್ತಸ್ಸ ವಾ ವಾರೇಯ್ಯಂ ಹೋತಿ… ಧೀತುಯಾ ವಾ ವಾರೇಯ್ಯಂ ಹೋತಿ… ಗಿಲಾನೋ ವಾ ಹೋತಿ… ಅಭಿಞ್ಞಾತಂ ವಾ ಸುತ್ತನ್ತಂ ಭಣತಿ। ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘ಆಗಚ್ಛನ್ತು ಭದನ್ತಾ, ಇಮಂ ಸುತ್ತನ್ತಂ ಪರಿಯಾಪುಣಿಸ್ಸನ್ತಿ, ಪುರಾಯಂ ಸುತ್ತನ್ತೋ ನ ಪಲುಜ್ಜತೀ’ತಿ। ಅಞ್ಞತರಂ ವಾ ಪನಸ್ಸ ಕಿಚ್ಚಂ ಹೋತಿ – ಕರಣೀಯಂ ವಾ, ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ।
189. Idha pana, bhikkhave, upāsakena attano atthāya nivesanaṃ kārāpitaṃ hoti…pe… sayanigharaṃ kārāpitaṃ hoti… udosito kārāpito hoti… aṭṭo kārāpito hoti… māḷo kārāpito hoti… āpaṇo kārāpito hoti… āpaṇasālā kārāpitā hoti… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… rasavatī kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti … ārāmavatthu kārāpitaṃ hoti… puttassa vā vāreyyaṃ hoti… dhītuyā vā vāreyyaṃ hoti… gilāno vā hoti… abhiññātaṃ vā suttantaṃ bhaṇati. So ce bhikkhūnaṃ santike dūtaṃ pahiṇeyya – ‘āgacchantu bhadantā, imaṃ suttantaṃ pariyāpuṇissanti, purāyaṃ suttanto na palujjatī’ti. Aññataraṃ vā panassa kiccaṃ hoti – karaṇīyaṃ vā, so ce bhikkhūnaṃ santike dūtaṃ pahiṇeyya – ‘‘āgacchantu bhadantā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
೧೯೦. ಇಧ ಪನ, ಭಿಕ್ಖವೇ, ಉಪಾಸಿಕಾಯ ಸಙ್ಘಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ। ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ।
190. Idha pana, bhikkhave, upāsikāya saṅghaṃ uddissa vihāro kārāpito hoti. Sā ce bhikkhūnaṃ santike dūtaṃ pahiṇeyya – ‘‘āgacchantu ayyā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ಇಧ ಪನ, ಭಿಕ್ಖವೇ, ಉಪಾಸಿಕಾಯ ಸಙ್ಘಂ ಉದ್ದಿಸ್ಸ ಅಡ್ಢಯೋಗೋ ಕಾರಾಪಿತೋ ಹೋತಿ…ಪೇ॰… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ಕಪ್ಪಿಯಕುಟಿ ಕಾರಾಪಿತಾ ಹೋತಿ… ವಚ್ಚಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಜನ್ತಾಘರಂ ಕಾರಾಪಿತಂ ಹೋತಿ… ಜನ್ತಾಘರಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ। ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ।
Idha pana, bhikkhave, upāsikāya saṅghaṃ uddissa aḍḍhayogo kārāpito hoti…pe… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… kappiyakuṭi kārāpitā hoti… vaccakuṭi kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… jantāgharaṃ kārāpitaṃ hoti… jantāgharasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. Sā ce bhikkhūnaṃ santike dūtaṃ pahiṇeyya – ‘‘āgacchantu ayyā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ಇಧ ಪನ, ಭಿಕ್ಖವೇ, ಉಪಾಸಿಕಾಯ ಸಮ್ಬಹುಲೇ ಭಿಕ್ಖೂ ಉದ್ದಿಸ್ಸ…ಪೇ॰… ಏಕಂ ಭಿಕ್ಖುಂ ಉದ್ದಿಸ್ಸ…ಪೇ॰… ಭಿಕ್ಖುನಿಸಙ್ಘಂ ಉದ್ದಿಸ್ಸ…ಪೇ॰… ಸಮ್ಬಹುಲಾ ಭಿಕ್ಖುನಿಯೋ ಉದ್ದಿಸ್ಸ…ಪೇ॰… ಏಕಂ ಭಿಕ್ಖುನಿಂ ಉದ್ದಿಸ್ಸ…ಪೇ॰… ಸಮ್ಬಹುಲಾ ಸಿಕ್ಖಮಾನಾಯೋ ಉದ್ದಿಸ್ಸ…ಪೇ॰… ಏಕಂ ಸಿಕ್ಖಮಾನಂ ಉದ್ದಿಸ್ಸ…ಪೇ॰… ಸಮ್ಬಹುಲೇ ಸಾಮಣೇರೇ ಉದ್ದಿಸ್ಸ…ಪೇ॰… ಏಕಂ ಸಾಮಣೇರಂ ಉದ್ದಿಸ್ಸ…ಪೇ॰… ಸಮ್ಬಹುಲಾ ಸಾಮಣೇರಿಯೋ ಉದ್ದಿಸ್ಸ…ಪೇ॰… ಏಕಂ ಸಾಮಣೇರಿಂ ಉದ್ದಿಸ್ಸ…ಪೇ॰…।
Idha pana, bhikkhave, upāsikāya sambahule bhikkhū uddissa…pe… ekaṃ bhikkhuṃ uddissa…pe… bhikkhunisaṅghaṃ uddissa…pe… sambahulā bhikkhuniyo uddissa…pe… ekaṃ bhikkhuniṃ uddissa…pe… sambahulā sikkhamānāyo uddissa…pe… ekaṃ sikkhamānaṃ uddissa…pe… sambahule sāmaṇere uddissa…pe… ekaṃ sāmaṇeraṃ uddissa…pe… sambahulā sāmaṇeriyo uddissa…pe… ekaṃ sāmaṇeriṃ uddissa…pe….
೧೯೧. ಇಧ ಪನ, ಭಿಕ್ಖವೇ, ಉಪಾಸಿಕಾಯ ಅತ್ತನೋ ಅತ್ಥಾಯ ನಿವೇಸನಂ ಕಾರಾಪಿತಂ ಹೋತಿ…ಪೇ॰… ಸಯನಿಘರಂ ಕಾರಾಪಿತಂ ಹೋತಿ… ಉದೋಸಿತೋ ಕಾರಾಪಿತೋ ಹೋತಿ… ಅಟ್ಟೋ ಕಾರಾಪಿತೋ ಹೋತಿ… ಮಾಳೋ ಕಾರಾಪಿತೋ ಹೋತಿ… ಆಪಣೋ ಕಾರಾಪಿತೋ ಹೋತಿ… ಆಪಣಸಾಲಾ ಕಾರಾಪಿತಾ ಹೋತಿ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ರಸವತೀ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ … ಉದಪಾನಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ… ಪುತ್ತಸ್ಸ ವಾ ವಾರೇಯ್ಯಂ ಹೋತಿ… ಧೀತುಯಾ ವಾ ವಾರೇಯ್ಯಂ ಹೋತಿ… ಗಿಲಾನಾ ವಾ ಹೋತಿ… ಅಭಿಞ್ಞಾತಂ ವಾ ಸುತ್ತನ್ತಂ ಭಣತಿ। ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಅಯ್ಯಾ, ಇಮಂ ಸುತ್ತನ್ತಂ ಪರಿಯಾಪುಣಿಸ್ಸನ್ತಿ, ಪುರಾಯಂ ಸುತ್ತನ್ತೋ ಪಲುಜ್ಜತೀ’’ತಿ। ಅಞ್ಞತರಂ ವಾ ಪನಸ್ಸಾ ಕಿಚ್ಚಂ ಹೋತಿ ಕರಣೀಯಂ ವಾ, ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ।
191. Idha pana, bhikkhave, upāsikāya attano atthāya nivesanaṃ kārāpitaṃ hoti…pe… sayanigharaṃ kārāpitaṃ hoti… udosito kārāpito hoti… aṭṭo kārāpito hoti… māḷo kārāpito hoti… āpaṇo kārāpito hoti… āpaṇasālā kārāpitā hoti… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti… koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… rasavatī kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti … udapānasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti… puttassa vā vāreyyaṃ hoti… dhītuyā vā vāreyyaṃ hoti… gilānā vā hoti… abhiññātaṃ vā suttantaṃ bhaṇati. Sā ce bhikkhūnaṃ santike dūtaṃ pahiṇeyya – ‘‘āgacchantu ayyā, imaṃ suttantaṃ pariyāpuṇissanti, purāyaṃ suttanto palujjatī’’ti. Aññataraṃ vā panassā kiccaṃ hoti karaṇīyaṃ vā, sā ce bhikkhūnaṃ santike dūtaṃ pahiṇeyya – ‘‘āgacchantu ayyā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
೧೯೨. ಇಧ ಪನ, ಭಿಕ್ಖವೇ, ಭಿಕ್ಖುನಾ ಸಙ್ಘಂ ಉದ್ದಿಸ್ಸ…ಪೇ॰… ಭಿಕ್ಖುನಿಯಾ ಸಙ್ಘಂ ಉದ್ದಿಸ್ಸ… ಸಿಕ್ಖಮಾನಾಯ ಸಙ್ಘಂ ಉದ್ದಿಸ್ಸ… ಸಾಮಣೇರೇನ ಸಙ್ಘಂ ಉದ್ದಿಸ್ಸ… ಸಾಮಣೇರಿಯಾ ಸಙ್ಘಂ ಉದ್ದಿಸ್ಸ … ಸಮ್ಬಹುಲೇ ಭಿಕ್ಖೂ ಉದ್ದಿಸ್ಸ… ಏಕಂ ಭಿಕ್ಖುಂ ಉದ್ದಿಸ್ಸ… ಭಿಕ್ಖುನಿಸಙ್ಘಂ ಉದ್ದಿಸ್ಸ… ಸಮ್ಬಹುಲಾ ಭಿಕ್ಖುನಿಯೋ ಉದ್ದಿಸ್ಸ… ಏಕಂ ಭಿಕ್ಖುನಿಂ ಉದ್ದಿಸ್ಸ… ಸಮ್ಬಹುಲಾ ಸಿಕ್ಖಮಾನಾಯೋ ಉದ್ದಿಸ್ಸ… ಏಕಂ ಸಿಕ್ಖಮಾನಂ ಉದ್ದಿಸ್ಸ… ಸಮ್ಬಹುಲೇ ಸಾಮಣೇರೇ ಉದ್ದಿಸ್ಸ… ಏಕಂ ಸಾಮಣೇರಂ ಉದ್ದಿಸ್ಸ… ಸಮ್ಬಹುಲಾ ಸಾಮಣೇರಿಯೋ ಉದ್ದಿಸ್ಸ… ಏಕಂ ಸಾಮಣೇರಿಂ ಉದ್ದಿಸ್ಸ… ಅತ್ತನೋ ಅತ್ಥಾಯ ವಿಹಾರೋ ಕಾರಾಪಿತೋ ಹೋತಿ…ಪೇ॰… ಅಡ್ಢಯೋಗೋ ಕಾರಾಪಿತೋ ಹೋತಿ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ … ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ಕಪ್ಪಿಯಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ। ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ… ‘‘ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋತಿ।
192. Idha pana, bhikkhave, bhikkhunā saṅghaṃ uddissa…pe… bhikkhuniyā saṅghaṃ uddissa… sikkhamānāya saṅghaṃ uddissa… sāmaṇerena saṅghaṃ uddissa… sāmaṇeriyā saṅghaṃ uddissa … sambahule bhikkhū uddissa… ekaṃ bhikkhuṃ uddissa… bhikkhunisaṅghaṃ uddissa… sambahulā bhikkhuniyo uddissa… ekaṃ bhikkhuniṃ uddissa… sambahulā sikkhamānāyo uddissa… ekaṃ sikkhamānaṃ uddissa… sambahule sāmaṇere uddissa… ekaṃ sāmaṇeraṃ uddissa… sambahulā sāmaṇeriyo uddissa… ekaṃ sāmaṇeriṃ uddissa… attano atthāya vihāro kārāpito hoti…pe… aḍḍhayogo kārāpito hoti… pāsādo kārāpito hoti… hammiyaṃ kārāpitaṃ hoti… guhā kārāpitā hoti… pariveṇaṃ kārāpitaṃ hoti … koṭṭhako kārāpito hoti… upaṭṭhānasālā kārāpitā hoti… aggisālā kārāpitā hoti… kappiyakuṭi kārāpitā hoti… caṅkamo kārāpito hoti… caṅkamanasālā kārāpitā hoti… udapāno kārāpito hoti… udapānasālā kārāpitā hoti… pokkharaṇī kārāpitā hoti… maṇḍapo kārāpito hoti… ārāmo kārāpito hoti… ārāmavatthu kārāpitaṃ hoti. Sā ce bhikkhūnaṃ santike dūtaṃ pahiṇeyya… ‘‘āgacchantu ayyā, icchāmi dānañca dātuṃ, dhammañca sotuṃ, bhikkhū ca passitu’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabboti.
ಸತ್ತಾಹಕರಣೀಯಾನುಜಾನತಾ ನಿಟ್ಠಿತಾ।
Sattāhakaraṇīyānujānatā niṭṭhitā.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಸತ್ತಾಹಕರಣೀಯಾನುಜಾನನಕಥಾ • Sattāhakaraṇīyānujānanakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಸತ್ತಾಹಕರಣೀಯಾನುಜಾನನಕಥಾವಣ್ಣನಾ • Sattāhakaraṇīyānujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಸತ್ತಾಹಕರಣೀಯಾನುಜಾನನಕಥಾವಣ್ಣನಾ • Sattāhakaraṇīyānujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ವಸ್ಸೂಪನಾಯಿಕಅನುಜಾನನಕಥಾದಿವಣ್ಣನಾ • Vassūpanāyikaanujānanakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೦೯. ಸತ್ತಾಹಕರಣೀಯಾನುಜಾನನಕಥಾ • 109. Sattāhakaraṇīyānujānanakathā
