| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ஸத்தாஹகரணீயானுஜானநகதா²
Sattāhakaraṇīyānujānanakathā
187-8. ஸத்தாஹகரணீயேஸு – ஸத்தாஹகரணீயேன க³ந்துந்தி ஸத்தாஹப்³ப⁴ந்தரே யங் கத்தப்³ப³ங் தங் ஸத்தாஹகரணீயங், தேன ஸத்தாஹகரணீயேன கரணபூ⁴தேன க³ந்துங் அனுஜானாமீதி அத்தோ². பஹிதே க³ந்துந்தி இமேஹி ஸத்தஹி பி⁴க்கு²ஆதீ³ஹி தூ³தே பஹிதேயேவ க³ந்துங் அனுஜானாமீதி அத்தோ². ஸத்தாஹங் ஸன்னிவத்தோ காதப்³போ³தி ஸத்தாஹேயேவ ஸன்னிவத்திதப்³போ³, அட்ட²மோ அருணோ தத்தே²வ ந உட்டா²பேதப்³போ³தி அத்தோ².
187-8. Sattāhakaraṇīyesu – sattāhakaraṇīyena gantunti sattāhabbhantare yaṃ kattabbaṃ taṃ sattāhakaraṇīyaṃ, tena sattāhakaraṇīyena karaṇabhūtena gantuṃ anujānāmīti attho. Pahite gantunti imehi sattahi bhikkhuādīhi dūte pahiteyeva gantuṃ anujānāmīti attho. Sattāhaṃ sannivatto kātabboti sattāheyeva sannivattitabbo, aṭṭhamo aruṇo tattheva na uṭṭhāpetabboti attho.
பி⁴க்கு²னிஸங்க⁴ங் உத்³தி³ஸ்ஸாதி இதோ பட்டா²ய வச்சகுடி ஜந்தாக⁴ரங் ஜந்தாக⁴ரஸாலாதி இமானி தீணி பரிஹீனானி.
Bhikkhunisaṅghaṃ uddissāti ito paṭṭhāya vaccakuṭi jantāgharaṃ jantāgharasālāti imāni tīṇi parihīnāni.
189. உதோ³ஸிதாதீ³னி உதோ³ஸிதஸிக்கா²பதா³தீ³ஸு வுத்தானேவ. ரஸவதீதி ப⁴த்தகே³ஹங் வுச்சதி. வாரெய்யங் ஸஞ்சரித்தஸிக்கா²பதே³ வுத்தமேவ. புராயங் ஸுத்தந்தோ பலுஜ்ஜதீதி யாவ அயங் ஸுத்தந்தோ ந பலுஜ்ஜதி, யாவ அயங் ஸுத்தந்தோ ந வினஸ்ஸதி. அஞ்ஞதரங் வா பனஸ்ஸ கிச்சங் ஹோதி கரணீயங் வாதி ஏதேன பரிஸங்க²தங் யங்கிஞ்சி கரணீயங் ஸங்க³ஹிதங் ஹோதி. ஸப்³ப³த்த² ச ‘‘இச்சா²மி தா³னஞ்ச தா³துங் த⁴ம்மஞ்ச ஸோதுங் பி⁴க்கூ² ச பஸ்ஸிது’’ந்தி இமினாவ கப்பியவசனேன பேஸிதே க³ந்தப்³ப³ங், ஏதேஸங் வா வேவசனேன. பெய்யாலக்கமோ பன ஏவங் வேதி³தப்³போ³, யதா² ‘‘உபாஸகேன ஸங்க⁴ங் உத்³தி³ஸ்ஸ விஹாராத³யோ காராபிதா ஹொந்தி, ஸம்ப³ஹுலே பி⁴க்கூ² உத்³தி³ஸ்ஸ, ஏகங் பி⁴க்கு²ங் உத்³தி³ஸ்ஸ, பி⁴க்கு²னிஸங்க⁴ங் உத்³தி³ஸ்ஸ, ஸம்ப³ஹுலா பி⁴க்கு²னியோ, ஏகங் பி⁴க்கு²னிங், ஸம்ப³ஹுலா ஸிக்க²மானாயோ, ஏகங் ஸிக்க²மானங், ஸம்ப³ஹுலே ஸாமணேரே, ஏகங் ஸாமணேரங், ஸம்ப³ஹுலா ஸாமணேரியோ, ஏகங் ஸாமணேரிங் உத்³தி³ஸ்ஸ அத்தனோ அத்தா²ய நிவேஸனங் காராபிதங் ஹோதீ’’தி வுத்தங்; ஏவமேவ ‘‘உபாஸிகாய, பி⁴க்கு²னா, பி⁴க்கு²னியா, ஸிக்க²மானாய, ஸாமணேரேன, ஸாமணேரியா ஸங்க⁴ங் உத்³தி³ஸ்ஸா’’தி ஸப்³ப³ங் வத்தப்³ப³ங். ஏதேஸு ஸத்தப்பகாரேஸு கரணீயேஸு பஹிதே க³ந்தப்³ப³ங்.
189.Udositādīni udositasikkhāpadādīsu vuttāneva. Rasavatīti bhattagehaṃ vuccati. Vāreyyaṃ sañcarittasikkhāpade vuttameva. Purāyaṃ suttanto palujjatīti yāva ayaṃ suttanto na palujjati, yāva ayaṃ suttanto na vinassati. Aññataraṃ vā panassa kiccaṃ hoti karaṇīyaṃ vāti etena parisaṅkhataṃ yaṃkiñci karaṇīyaṃ saṅgahitaṃ hoti. Sabbattha ca ‘‘icchāmi dānañca dātuṃ dhammañca sotuṃ bhikkhū ca passitu’’nti imināva kappiyavacanena pesite gantabbaṃ, etesaṃ vā vevacanena. Peyyālakkamo pana evaṃ veditabbo, yathā ‘‘upāsakena saṅghaṃ uddissa vihārādayo kārāpitā honti, sambahule bhikkhū uddissa, ekaṃ bhikkhuṃ uddissa, bhikkhunisaṅghaṃ uddissa, sambahulā bhikkhuniyo, ekaṃ bhikkhuniṃ, sambahulā sikkhamānāyo, ekaṃ sikkhamānaṃ, sambahule sāmaṇere, ekaṃ sāmaṇeraṃ, sambahulā sāmaṇeriyo, ekaṃ sāmaṇeriṃ uddissa attano atthāya nivesanaṃ kārāpitaṃ hotī’’ti vuttaṃ; evameva ‘‘upāsikāya, bhikkhunā, bhikkhuniyā, sikkhamānāya, sāmaṇerena, sāmaṇeriyā saṅghaṃ uddissā’’ti sabbaṃ vattabbaṃ. Etesu sattappakāresu karaṇīyesu pahite gantabbaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 109. ஸத்தாஹகரணீயானுஜானநா • 109. Sattāhakaraṇīyānujānanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸத்தாஹகரணீயானுஜானநகதா²வண்ணனா • Sattāhakaraṇīyānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸத்தாஹகரணீயானுஜானநகதா²வண்ணனா • Sattāhakaraṇīyānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வஸ்ஸூபனாயிகஅனுஜானநகதா²தி³வண்ணனா • Vassūpanāyikaanujānanakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 109. ஸத்தாஹகரணீயானுஜானநகதா² • 109. Sattāhakaraṇīyānujānanakathā
