| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
109. ஸத்தாஹகரணீயானுஜானநகதா²
109. Sattāhakaraṇīyānujānanakathā
187. ஸத்தாஹகரணீயேஸு ஏவங் வினிச்ச²யோ வேதி³தப்³போ³தி யோஜனா. ‘‘ஸத்தாஹகரணீயேனா’’தி பத³ஸ்ஸ ஸத்தமீஸமாஸஞ்ச அனீயஸத்³த³ஸ்ஸ கம்மத்த²ஞ்ச த³ஸ்ஸெந்தோ ஆஹ ‘‘ஸத்தாஹப்³ப⁴ந்தரே யங் கத்தப்³ப³’’ந்தி . தத்த² ‘‘ஸத்தாஹப்³ப⁴ந்தரே’’தி இமினா ஸத்தமீஸமாஸங் த³ஸ்ஸேதி, ‘‘கத்தப்³ப³’’ந்தி இமினா கம்மத்த²ங். ‘‘ஸத்தாஹப்³ப⁴ந்தரே’’தி இமினா ஸத்தாஹஸ்ஸ அப்³ப⁴ந்தரங் ஸத்தாஹந்தி உத்தரபத³லோபங் த³ஸ்ஸேதி. பஹிதே க³ந்துந்தி எத்த² பஹிதேஸத்³த³ஸ்ஸ கத்துகம்மானி த³ஸ்ஸேதுங் வுத்தங் ‘‘பி⁴க்கு²ஆதீ³ஹி தூ³தே’’தி. தத்த² ‘‘பி⁴க்கு²ஆதீ³ஹீ’’தி இமினா கத்தாரங் த³ஸ்ஸேதி, ‘‘தூ³தே’’தி இமினா கம்மங். ஸத்தாஹந்தி எத்த² உத்தரபத³லோபஞ்ச பு⁴ம்மத்தே² உபயோக³வசனஞ்ச த³ஸ்ஸெந்தோ ஆஹ ‘‘அந்தோஸத்தாஹேயேவா’’தி. தத்தே²வாதி தஸ்மிங் பஹிதட்டா²னேயேவ. ‘‘ந உட்டா²பேதப்³போ³’’தி இமினா ‘‘ஸத்தாஹேயேவா’’தி எத்த² ஏவஸத்³த³ஸ்ஸ ப²லங் த³ஸ்ஸேதி.
187. Sattāhakaraṇīyesu evaṃ vinicchayo veditabboti yojanā. ‘‘Sattāhakaraṇīyenā’’ti padassa sattamīsamāsañca anīyasaddassa kammatthañca dassento āha ‘‘sattāhabbhantare yaṃ kattabba’’nti . Tattha ‘‘sattāhabbhantare’’ti iminā sattamīsamāsaṃ dasseti, ‘‘kattabba’’nti iminā kammatthaṃ. ‘‘Sattāhabbhantare’’ti iminā sattāhassa abbhantaraṃ sattāhanti uttarapadalopaṃ dasseti. Pahite gantunti ettha pahitesaddassa kattukammāni dassetuṃ vuttaṃ ‘‘bhikkhuādīhi dūte’’ti. Tattha ‘‘bhikkhuādīhī’’ti iminā kattāraṃ dasseti, ‘‘dūte’’ti iminā kammaṃ. Sattāhanti ettha uttarapadalopañca bhummatthe upayogavacanañca dassento āha ‘‘antosattāheyevā’’ti. Tatthevāti tasmiṃ pahitaṭṭhāneyeva. ‘‘Na uṭṭhāpetabbo’’ti iminā ‘‘sattāheyevā’’ti ettha evasaddassa phalaṃ dasseti.
189. ரஸோ ஏதஸ்மிங் அத்தீ²தி ரஸவதீதி வுத்தே ப⁴த்தகே³ஹங் க³ஹேதப்³ப³ந்தி ஆஹ ‘‘ப⁴த்தகே³ஹங் வுச்சதீ’’தி. ப⁴த்தகே³ஹந்தி ப⁴த்தபசனகே³ஹங். புராயங் ஸுத்தந்தோதி எத்த² புரா அயந்தி பத³ச்சே²த³ங் கத்வா புராஸத்³தோ³ யாவபரியாயோதி ஆஹ ‘‘யாவ அயங் ஸுத்தந்தோ’’தி. ந பலுஜ்ஜதீதி எத்த² லுஜதா⁴து வினாஸத்தோ²தி ஆஹ ‘‘ந வினஸ்ஸதீ’’தி. பரிஸங்க²தந்தி பரிஸங்க²ரிதப்³ப³ங். ஸப்³ப³த்தா²தி ஸப்³பே³ஸு பஹிதேஸு. இமினாவ கப்பியவசனேனாதி இமினா ஏவ கப்பியேன திவாக்யஸங்கா²தேன வசனேன. ஏதேஸந்தி ஏதேஸங் திண்ணங் வாக்யானங். வேவசனேனாதி ‘‘யஞ்ஞஞ்ச யஜிதுங், ஸுத்தஞ்ச உக்³க³ண்ஹிதுங், ஸமணே ச த³ஸ்ஸிது’’ந்தி பரியாயேன. ஸத்தஸூதி உபாஸக உபாஸிக பி⁴க்கு²பி⁴க்கு²னீ ஸிக்க²மான ஸாமணேர ஸாமணேரீ ஸங்கா²தாஸு ஸத்தஸு.
189. Raso etasmiṃ atthīti rasavatīti vutte bhattagehaṃ gahetabbanti āha ‘‘bhattagehaṃ vuccatī’’ti. Bhattagehanti bhattapacanagehaṃ. Purāyaṃ suttantoti ettha purā ayanti padacchedaṃ katvā purāsaddo yāvapariyāyoti āha ‘‘yāva ayaṃ suttanto’’ti. Na palujjatīti ettha lujadhātu vināsatthoti āha ‘‘na vinassatī’’ti. Parisaṅkhatanti parisaṅkharitabbaṃ. Sabbatthāti sabbesu pahitesu. Imināva kappiyavacanenāti iminā eva kappiyena tivākyasaṅkhātena vacanena. Etesanti etesaṃ tiṇṇaṃ vākyānaṃ. Vevacanenāti ‘‘yaññañca yajituṃ, suttañca uggaṇhituṃ, samaṇe ca dassitu’’nti pariyāyena. Sattasūti upāsaka upāsika bhikkhubhikkhunī sikkhamāna sāmaṇera sāmaṇerī saṅkhātāsu sattasu.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 109. ஸத்தாஹகரணீயானுஜானநா • 109. Sattāhakaraṇīyānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸத்தாஹகரணீயானுஜானநகதா² • Sattāhakaraṇīyānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸத்தாஹகரணீயானுஜானநகதா²வண்ணனா • Sattāhakaraṇīyānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸத்தாஹகரணீயானுஜானநகதா²வண்ணனா • Sattāhakaraṇīyānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வஸ்ஸூபனாயிகஅனுஜானநகதா²தி³வண்ணனா • Vassūpanāyikaanujānanakathādivaṇṇanā
