| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಸತ್ತಾಹಕರಣೀಯಾನುಜಾನನಕಥಾ
Sattāhakaraṇīyānujānanakathā
೧೮೭-೮. ಸತ್ತಾಹಕರಣೀಯೇಸು – ಸತ್ತಾಹಕರಣೀಯೇನ ಗನ್ತುನ್ತಿ ಸತ್ತಾಹಬ್ಭನ್ತರೇ ಯಂ ಕತ್ತಬ್ಬಂ ತಂ ಸತ್ತಾಹಕರಣೀಯಂ, ತೇನ ಸತ್ತಾಹಕರಣೀಯೇನ ಕರಣಭೂತೇನ ಗನ್ತುಂ ಅನುಜಾನಾಮೀತಿ ಅತ್ಥೋ। ಪಹಿತೇ ಗನ್ತುನ್ತಿ ಇಮೇಹಿ ಸತ್ತಹಿ ಭಿಕ್ಖುಆದೀಹಿ ದೂತೇ ಪಹಿತೇಯೇವ ಗನ್ತುಂ ಅನುಜಾನಾಮೀತಿ ಅತ್ಥೋ। ಸತ್ತಾಹಂ ಸನ್ನಿವತ್ತೋ ಕಾತಬ್ಬೋತಿ ಸತ್ತಾಹೇಯೇವ ಸನ್ನಿವತ್ತಿತಬ್ಬೋ, ಅಟ್ಠಮೋ ಅರುಣೋ ತತ್ಥೇವ ನ ಉಟ್ಠಾಪೇತಬ್ಬೋತಿ ಅತ್ಥೋ।
187-8. Sattāhakaraṇīyesu – sattāhakaraṇīyena gantunti sattāhabbhantare yaṃ kattabbaṃ taṃ sattāhakaraṇīyaṃ, tena sattāhakaraṇīyena karaṇabhūtena gantuṃ anujānāmīti attho. Pahite gantunti imehi sattahi bhikkhuādīhi dūte pahiteyeva gantuṃ anujānāmīti attho. Sattāhaṃ sannivatto kātabboti sattāheyeva sannivattitabbo, aṭṭhamo aruṇo tattheva na uṭṭhāpetabboti attho.
ಭಿಕ್ಖುನಿಸಙ್ಘಂ ಉದ್ದಿಸ್ಸಾತಿ ಇತೋ ಪಟ್ಠಾಯ ವಚ್ಚಕುಟಿ ಜನ್ತಾಘರಂ ಜನ್ತಾಘರಸಾಲಾತಿ ಇಮಾನಿ ತೀಣಿ ಪರಿಹೀನಾನಿ।
Bhikkhunisaṅghaṃ uddissāti ito paṭṭhāya vaccakuṭi jantāgharaṃ jantāgharasālāti imāni tīṇi parihīnāni.
೧೮೯. ಉದೋಸಿತಾದೀನಿ ಉದೋಸಿತಸಿಕ್ಖಾಪದಾದೀಸು ವುತ್ತಾನೇವ। ರಸವತೀತಿ ಭತ್ತಗೇಹಂ ವುಚ್ಚತಿ। ವಾರೇಯ್ಯಂ ಸಞ್ಚರಿತ್ತಸಿಕ್ಖಾಪದೇ ವುತ್ತಮೇವ। ಪುರಾಯಂ ಸುತ್ತನ್ತೋ ಪಲುಜ್ಜತೀತಿ ಯಾವ ಅಯಂ ಸುತ್ತನ್ತೋ ನ ಪಲುಜ್ಜತಿ, ಯಾವ ಅಯಂ ಸುತ್ತನ್ತೋ ನ ವಿನಸ್ಸತಿ। ಅಞ್ಞತರಂ ವಾ ಪನಸ್ಸ ಕಿಚ್ಚಂ ಹೋತಿ ಕರಣೀಯಂ ವಾತಿ ಏತೇನ ಪರಿಸಙ್ಖತಂ ಯಂಕಿಞ್ಚಿ ಕರಣೀಯಂ ಸಙ್ಗಹಿತಂ ಹೋತಿ। ಸಬ್ಬತ್ಥ ಚ ‘‘ಇಚ್ಛಾಮಿ ದಾನಞ್ಚ ದಾತುಂ ಧಮ್ಮಞ್ಚ ಸೋತುಂ ಭಿಕ್ಖೂ ಚ ಪಸ್ಸಿತು’’ನ್ತಿ ಇಮಿನಾವ ಕಪ್ಪಿಯವಚನೇನ ಪೇಸಿತೇ ಗನ್ತಬ್ಬಂ, ಏತೇಸಂ ವಾ ವೇವಚನೇನ। ಪೇಯ್ಯಾಲಕ್ಕಮೋ ಪನ ಏವಂ ವೇದಿತಬ್ಬೋ, ಯಥಾ ‘‘ಉಪಾಸಕೇನ ಸಙ್ಘಂ ಉದ್ದಿಸ್ಸ ವಿಹಾರಾದಯೋ ಕಾರಾಪಿತಾ ಹೋನ್ತಿ, ಸಮ್ಬಹುಲೇ ಭಿಕ್ಖೂ ಉದ್ದಿಸ್ಸ, ಏಕಂ ಭಿಕ್ಖುಂ ಉದ್ದಿಸ್ಸ, ಭಿಕ್ಖುನಿಸಙ್ಘಂ ಉದ್ದಿಸ್ಸ, ಸಮ್ಬಹುಲಾ ಭಿಕ್ಖುನಿಯೋ, ಏಕಂ ಭಿಕ್ಖುನಿಂ, ಸಮ್ಬಹುಲಾ ಸಿಕ್ಖಮಾನಾಯೋ, ಏಕಂ ಸಿಕ್ಖಮಾನಂ, ಸಮ್ಬಹುಲೇ ಸಾಮಣೇರೇ, ಏಕಂ ಸಾಮಣೇರಂ, ಸಮ್ಬಹುಲಾ ಸಾಮಣೇರಿಯೋ, ಏಕಂ ಸಾಮಣೇರಿಂ ಉದ್ದಿಸ್ಸ ಅತ್ತನೋ ಅತ್ಥಾಯ ನಿವೇಸನಂ ಕಾರಾಪಿತಂ ಹೋತೀ’’ತಿ ವುತ್ತಂ; ಏವಮೇವ ‘‘ಉಪಾಸಿಕಾಯ, ಭಿಕ್ಖುನಾ, ಭಿಕ್ಖುನಿಯಾ, ಸಿಕ್ಖಮಾನಾಯ, ಸಾಮಣೇರೇನ, ಸಾಮಣೇರಿಯಾ ಸಙ್ಘಂ ಉದ್ದಿಸ್ಸಾ’’ತಿ ಸಬ್ಬಂ ವತ್ತಬ್ಬಂ। ಏತೇಸು ಸತ್ತಪ್ಪಕಾರೇಸು ಕರಣೀಯೇಸು ಪಹಿತೇ ಗನ್ತಬ್ಬಂ।
189.Udositādīni udositasikkhāpadādīsu vuttāneva. Rasavatīti bhattagehaṃ vuccati. Vāreyyaṃ sañcarittasikkhāpade vuttameva. Purāyaṃ suttanto palujjatīti yāva ayaṃ suttanto na palujjati, yāva ayaṃ suttanto na vinassati. Aññataraṃ vā panassa kiccaṃ hoti karaṇīyaṃ vāti etena parisaṅkhataṃ yaṃkiñci karaṇīyaṃ saṅgahitaṃ hoti. Sabbattha ca ‘‘icchāmi dānañca dātuṃ dhammañca sotuṃ bhikkhū ca passitu’’nti imināva kappiyavacanena pesite gantabbaṃ, etesaṃ vā vevacanena. Peyyālakkamo pana evaṃ veditabbo, yathā ‘‘upāsakena saṅghaṃ uddissa vihārādayo kārāpitā honti, sambahule bhikkhū uddissa, ekaṃ bhikkhuṃ uddissa, bhikkhunisaṅghaṃ uddissa, sambahulā bhikkhuniyo, ekaṃ bhikkhuniṃ, sambahulā sikkhamānāyo, ekaṃ sikkhamānaṃ, sambahule sāmaṇere, ekaṃ sāmaṇeraṃ, sambahulā sāmaṇeriyo, ekaṃ sāmaṇeriṃ uddissa attano atthāya nivesanaṃ kārāpitaṃ hotī’’ti vuttaṃ; evameva ‘‘upāsikāya, bhikkhunā, bhikkhuniyā, sikkhamānāya, sāmaṇerena, sāmaṇeriyā saṅghaṃ uddissā’’ti sabbaṃ vattabbaṃ. Etesu sattappakāresu karaṇīyesu pahite gantabbaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೧೦೯. ಸತ್ತಾಹಕರಣೀಯಾನುಜಾನನಾ • 109. Sattāhakaraṇīyānujānanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಸತ್ತಾಹಕರಣೀಯಾನುಜಾನನಕಥಾವಣ್ಣನಾ • Sattāhakaraṇīyānujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಸತ್ತಾಹಕರಣೀಯಾನುಜಾನನಕಥಾವಣ್ಣನಾ • Sattāhakaraṇīyānujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ವಸ್ಸೂಪನಾಯಿಕಅನುಜಾನನಕಥಾದಿವಣ್ಣನಾ • Vassūpanāyikaanujānanakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೦೯. ಸತ್ತಾಹಕರಣೀಯಾನುಜಾನನಕಥಾ • 109. Sattāhakaraṇīyānujānanakathā
