| Library / Tipiṭaka / ཏིཔིཊཀ • Tipiṭaka / མཧཱཝགྒ-ཨཊྛཀཐཱ • Mahāvagga-aṭṭhakathā |
སཏྟཱཧཀརཎཱིཡཱནུཛཱནནཀཐཱ
Sattāhakaraṇīyānujānanakathā
༡༨༧-༨. སཏྟཱཧཀརཎཱིཡེསུ – སཏྟཱཧཀརཎཱིཡེན གནྟུནྟི སཏྟཱཧབྦྷནྟརེ ཡཾ ཀཏྟབྦཾ ཏཾ སཏྟཱཧཀརཎཱིཡཾ, ཏེན སཏྟཱཧཀརཎཱིཡེན ཀརཎབྷཱུཏེན གནྟུཾ ཨནུཛཱནཱམཱིཏི ཨཏྠོ། པཧིཏེ གནྟུནྟི ཨིམེཧི སཏྟཧི བྷིཀྑུཨཱདཱིཧི དཱུཏེ པཧིཏེཡེཝ གནྟུཾ ཨནུཛཱནཱམཱིཏི ཨཏྠོ། སཏྟཱཧཾ སནྣིཝཏྟོ ཀཱཏབྦོཏི སཏྟཱཧེཡེཝ སནྣིཝཏྟིཏབྦོ, ཨཊྛམོ ཨརུཎོ ཏཏྠེཝ ན ཨུཊྛཱཔེཏབྦོཏི ཨཏྠོ།
187-8. Sattāhakaraṇīyesu – sattāhakaraṇīyena gantunti sattāhabbhantare yaṃ kattabbaṃ taṃ sattāhakaraṇīyaṃ, tena sattāhakaraṇīyena karaṇabhūtena gantuṃ anujānāmīti attho. Pahite gantunti imehi sattahi bhikkhuādīhi dūte pahiteyeva gantuṃ anujānāmīti attho. Sattāhaṃ sannivatto kātabboti sattāheyeva sannivattitabbo, aṭṭhamo aruṇo tattheva na uṭṭhāpetabboti attho.
བྷིཀྑུནིསངྒྷཾ ཨུདྡིསྶཱཏི ཨིཏོ པཊྛཱཡ ཝཙྩཀུཊི ཛནྟཱགྷརཾ ཛནྟཱགྷརསཱལཱཏི ཨིམཱནི ཏཱིཎི པརིཧཱིནཱནི།
Bhikkhunisaṅghaṃ uddissāti ito paṭṭhāya vaccakuṭi jantāgharaṃ jantāgharasālāti imāni tīṇi parihīnāni.
༡༨༩. ཨུདོསིཏཱདཱིནི ཨུདོསིཏསིཀྑཱཔདཱདཱིསུ ཝུཏྟཱནེཝ། རསཝཏཱིཏི བྷཏྟགེཧཾ ཝུཙྩཏི། ཝཱརེཡྻཾ སཉྩརིཏྟསིཀྑཱཔདེ ཝུཏྟམེཝ། པུརཱཡཾ སུཏྟནྟོ པལུཛྫཏཱིཏི ཡཱཝ ཨཡཾ སུཏྟནྟོ ན པལུཛྫཏི, ཡཱཝ ཨཡཾ སུཏྟནྟོ ན ཝིནསྶཏི། ཨཉྙཏརཾ ཝཱ པནསྶ ཀིཙྩཾ ཧོཏི ཀརཎཱིཡཾ ཝཱཏི ཨེཏེན པརིསངྑཏཾ ཡཾཀིཉྩི ཀརཎཱིཡཾ སངྒཧིཏཾ ཧོཏི། སབྦཏྠ ཙ ‘‘ཨིཙྪཱམི དཱནཉྩ དཱཏུཾ དྷམྨཉྩ སོཏུཾ བྷིཀྑཱུ ཙ པསྶིཏུ’’ནྟི ཨིམིནཱཝ ཀཔྤིཡཝཙནེན པེསིཏེ གནྟབྦཾ, ཨེཏེསཾ ཝཱ ཝེཝཙནེན། པེཡྻཱལཀྐམོ པན ཨེཝཾ ཝེདིཏབྦོ, ཡཐཱ ‘‘ཨུཔཱསཀེན སངྒྷཾ ཨུདྡིསྶ ཝིཧཱརཱདཡོ ཀཱརཱཔིཏཱ ཧོནྟི, སམྦཧུལེ བྷིཀྑཱུ ཨུདྡིསྶ, ཨེཀཾ བྷིཀྑུཾ ཨུདྡིསྶ, བྷིཀྑུནིསངྒྷཾ ཨུདྡིསྶ, སམྦཧུལཱ བྷིཀྑུནིཡོ, ཨེཀཾ བྷིཀྑུནིཾ, སམྦཧུལཱ སིཀྑམཱནཱཡོ, ཨེཀཾ སིཀྑམཱནཾ, སམྦཧུལེ སཱམཎེརེ, ཨེཀཾ སཱམཎེརཾ, སམྦཧུལཱ སཱམཎེརིཡོ, ཨེཀཾ སཱམཎེརིཾ ཨུདྡིསྶ ཨཏྟནོ ཨཏྠཱཡ ནིཝེསནཾ ཀཱརཱཔིཏཾ ཧོཏཱི’’ཏི ཝུཏྟཾ; ཨེཝམེཝ ‘‘ཨུཔཱསིཀཱཡ, བྷིཀྑུནཱ, བྷིཀྑུནིཡཱ, སིཀྑམཱནཱཡ, སཱམཎེརེན, སཱམཎེརིཡཱ སངྒྷཾ ཨུདྡིསྶཱ’’ཏི སབྦཾ ཝཏྟབྦཾ། ཨེཏེསུ སཏྟཔྤཀཱརེསུ ཀརཎཱིཡེསུ པཧིཏེ གནྟབྦཾ།
189.Udositādīni udositasikkhāpadādīsu vuttāneva. Rasavatīti bhattagehaṃ vuccati. Vāreyyaṃ sañcarittasikkhāpade vuttameva. Purāyaṃ suttanto palujjatīti yāva ayaṃ suttanto na palujjati, yāva ayaṃ suttanto na vinassati. Aññataraṃ vā panassa kiccaṃ hoti karaṇīyaṃ vāti etena parisaṅkhataṃ yaṃkiñci karaṇīyaṃ saṅgahitaṃ hoti. Sabbattha ca ‘‘icchāmi dānañca dātuṃ dhammañca sotuṃ bhikkhū ca passitu’’nti imināva kappiyavacanena pesite gantabbaṃ, etesaṃ vā vevacanena. Peyyālakkamo pana evaṃ veditabbo, yathā ‘‘upāsakena saṅghaṃ uddissa vihārādayo kārāpitā honti, sambahule bhikkhū uddissa, ekaṃ bhikkhuṃ uddissa, bhikkhunisaṅghaṃ uddissa, sambahulā bhikkhuniyo, ekaṃ bhikkhuniṃ, sambahulā sikkhamānāyo, ekaṃ sikkhamānaṃ, sambahule sāmaṇere, ekaṃ sāmaṇeraṃ, sambahulā sāmaṇeriyo, ekaṃ sāmaṇeriṃ uddissa attano atthāya nivesanaṃ kārāpitaṃ hotī’’ti vuttaṃ; evameva ‘‘upāsikāya, bhikkhunā, bhikkhuniyā, sikkhamānāya, sāmaṇerena, sāmaṇeriyā saṅghaṃ uddissā’’ti sabbaṃ vattabbaṃ. Etesu sattappakāresu karaṇīyesu pahite gantabbaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝགྒཔཱལི༹ • Mahāvaggapāḷi / ༡༠༩. སཏྟཱཧཀརཎཱིཡཱནུཛཱནནཱ • 109. Sattāhakaraṇīyānujānanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སཏྟཱཧཀརཎཱིཡཱནུཛཱནནཀཐཱཝཎྞནཱ • Sattāhakaraṇīyānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / སཏྟཱཧཀརཎཱིཡཱནུཛཱནནཀཐཱཝཎྞནཱ • Sattāhakaraṇīyānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཝསྶཱུཔནཱཡིཀཨནུཛཱནནཀཐཱདིཝཎྞནཱ • Vassūpanāyikaanujānanakathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༠༩. སཏྟཱཧཀརཎཱིཡཱནུཛཱནནཀཐཱ • 109. Sattāhakaraṇīyānujānanakathā
