| Library / Tipiṭaka / तिपिटक • Tipiṭaka / अपदानपाळि • Apadānapāḷi |
८. सत्ताहपब्बजितत्थेरअपदानं
8. Sattāhapabbajitattheraapadānaṃ
३३.
33.
‘‘विपस्सिस्स भगवतो, सङ्घो सक्कतमानितो।
‘‘Vipassissa bhagavato, saṅgho sakkatamānito;
ब्यसनं मे अनुप्पत्तं, ञातिभेदो पुरे अहु॥
Byasanaṃ me anuppattaṃ, ñātibhedo pure ahu.
३४.
34.
‘‘पब्बज्जं उपगन्त्वान, ब्यसनुपसमायहं।
‘‘Pabbajjaṃ upagantvāna, byasanupasamāyahaṃ;
सत्ताहाभिरतो तत्थ, सत्थुसासनकम्यता॥
Sattāhābhirato tattha, satthusāsanakamyatā.
३५.
35.
‘‘एकनवुतितो कप्पे, यमहं पब्बजिं तदा।
‘‘Ekanavutito kappe, yamahaṃ pabbajiṃ tadā;
दुग्गतिं नाभिजानामि, पब्बज्जाय इदं फलं॥
Duggatiṃ nābhijānāmi, pabbajjāya idaṃ phalaṃ.
३६.
36.
‘‘सत्तसट्ठिम्हितो कप्पे, सत्त आसुं महीपती।
‘‘Sattasaṭṭhimhito kappe, satta āsuṃ mahīpatī;
सुनिक्खमाति ञायन्ति, चक्कवत्ती महब्बला॥
Sunikkhamāti ñāyanti, cakkavattī mahabbalā.
३७.
37.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा सत्ताहपब्बजितो थेरो इमा गाथायो अभासित्थाति।
Itthaṃ sudaṃ āyasmā sattāhapabbajito thero imā gāthāyo abhāsitthāti.
सत्ताहपब्बजितत्थेरस्सापदानं अट्ठमं।
Sattāhapabbajitattherassāpadānaṃ aṭṭhamaṃ.
