| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. து³தியவக்³கோ³
2. Dutiyavaggo
1. ஸத்தஜடிலஸுத்தங்
1. Sattajaṭilasuttaṃ
122. ஏகங் ஸமயங் ப⁴க³வா ஸாவத்தி²யங் விஹரதி புப்³பா³ராமே மிகா³ரமாதுபாஸாதே³. தேன கோ² பன ஸமயேன ப⁴க³வா ஸாயன்ஹஸமயங் படிஸல்லானா வுட்டி²தோ ப³ஹித்³வாரகொட்ட²கே நிஸின்னோ ஹோதி. அத² கோ² ராஜா பஸேனதி³ கோஸலோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
122. Ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena bhagavā sāyanhasamayaṃ paṭisallānā vuṭṭhito bahidvārakoṭṭhake nisinno hoti. Atha kho rājā pasenadi kosalo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi.
தேன கோ² பன ஸமயேன ஸத்த ச ஜடிலா ஸத்த ச நிக³ண்டா² ஸத்த ச அசேலகா ஸத்த ச ஏகஸாடகா ஸத்த ச பரிப்³பா³ஜகா பரூள்ஹகச்ச²னக²லோமா கா²ரிவிவித⁴மாதா³ய 1 ப⁴க³வதோ அவிதூ³ரே அதிக்கமந்தி. அத² கோ² ராஜா பஸேனதி³ கோஸலோ உட்டா²யாஸனா ஏகங்ஸங் உத்தராஸங்க³ங் கரித்வா த³க்கி²ணஜாணுமண்ட³லங் பத²வியங் நிஹந்த்வா யேன தே ஸத்த ச ஜடிலா ஸத்த ச நிக³ண்டா² ஸத்த ச அசேலகா ஸத்த ச ஏகஸாடகா ஸத்த ச பரிப்³பா³ஜகா தேனஞ்ஜலிங் பணாமெத்வா திக்க²த்துங் நாமங் ஸாவேஸி – ‘‘ராஜாஹங், ப⁴ந்தே, பஸேனதி³ கோஸலோ…பே॰… ராஜாஹங், ப⁴ந்தே, பஸேனதி³ கோஸலோ’’தி.
Tena kho pana samayena satta ca jaṭilā satta ca nigaṇṭhā satta ca acelakā satta ca ekasāṭakā satta ca paribbājakā parūḷhakacchanakhalomā khārivividhamādāya 2 bhagavato avidūre atikkamanti. Atha kho rājā pasenadi kosalo uṭṭhāyāsanā ekaṃsaṃ uttarāsaṅgaṃ karitvā dakkhiṇajāṇumaṇḍalaṃ pathaviyaṃ nihantvā yena te satta ca jaṭilā satta ca nigaṇṭhā satta ca acelakā satta ca ekasāṭakā satta ca paribbājakā tenañjaliṃ paṇāmetvā tikkhattuṃ nāmaṃ sāvesi – ‘‘rājāhaṃ, bhante, pasenadi kosalo…pe… rājāhaṃ, bhante, pasenadi kosalo’’ti.
அத² கோ² ராஜா பஸேனதி³ கோஸலோ அசிரபக்கந்தேஸு தேஸு ஸத்தஸு ச ஜடிலேஸு ஸத்தஸு ச நிக³ண்டே²ஸு ஸத்தஸு ச அசேலகேஸு ஸத்தஸு ச ஏகஸாடகேஸு ஸத்தஸு ச பரிப்³பா³ஜகேஸு யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ராஜா பஸேனதி³ கோஸலோ ப⁴க³வந்தங் ஏதத³வோச – ‘‘யே தே, ப⁴ந்தே, லோகே அரஹந்தோ வா அரஹத்தமக்³க³ங் வா ஸமாபன்னா ஏதே தேஸங் அஞ்ஞதரா’’தி.
Atha kho rājā pasenadi kosalo acirapakkantesu tesu sattasu ca jaṭilesu sattasu ca nigaṇṭhesu sattasu ca acelakesu sattasu ca ekasāṭakesu sattasu ca paribbājakesu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā pasenadi kosalo bhagavantaṃ etadavoca – ‘‘ye te, bhante, loke arahanto vā arahattamaggaṃ vā samāpannā ete tesaṃ aññatarā’’ti.
‘‘து³ஜ்ஜானங் கோ² ஏதங், மஹாராஜ, தயா கி³ஹினா காமபோ⁴கி³னா புத்தஸம்பா³த⁴ஸயனங் அஜ்ஜா²வஸந்தேன காஸிகசந்த³னங் பச்சனுபொ⁴ந்தேன மாலாக³ந்த⁴விலேபனங் தா⁴ரயந்தேன ஜாதரூபரஜதங் ஸாதி³யந்தேன – ‘இமே வா அரஹந்தோ, இமே வா அரஹத்தமக்³க³ங் ஸமாபன்னா’’’தி.
‘‘Dujjānaṃ kho etaṃ, mahārāja, tayā gihinā kāmabhoginā puttasambādhasayanaṃ ajjhāvasantena kāsikacandanaṃ paccanubhontena mālāgandhavilepanaṃ dhārayantena jātarūparajataṃ sādiyantena – ‘ime vā arahanto, ime vā arahattamaggaṃ samāpannā’’’ti.
‘‘ஸங்வாஸேன கோ², மஹாராஜ, ஸீலங் வேதி³தப்³ப³ங். தஞ்ச கோ² தீ³கே⁴ன அத்³து⁴னா, ந இத்தரங்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேன. ஸங்வோஹாரேன கோ², மஹாராஜ, ஸோசெய்யங் வேதி³தப்³ப³ங். தஞ்ச கோ² தீ³கே⁴ன அத்³து⁴னா, ந இத்தரங்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேன. ஆபதா³ஸு கோ², மஹாராஜ, தா²மோ வேதி³தப்³போ³. ஸோ ச கோ² தீ³கே⁴ன அத்³து⁴னா, ந இத்தரங்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேன. ஸாகச்சா²ய , கோ², மஹாராஜ, பஞ்ஞா வேதி³தப்³பா³. ஸா ச கோ² தீ³கே⁴ன அத்³து⁴னா, ந இத்தரங்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’’தி.
‘‘Saṃvāsena kho, mahārāja, sīlaṃ veditabbaṃ. Tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Saṃvohārena kho, mahārāja, soceyyaṃ veditabbaṃ. Tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Āpadāsu kho, mahārāja, thāmo veditabbo. So ca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Sākacchāya , kho, mahārāja, paññā veditabbā. Sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’’ti.
‘‘அச்ச²ரியங் , ப⁴ந்தே, அப்³பு⁴தங் ப⁴ந்தே! யாவ ஸுபா⁴ஸிதமித³ங், ப⁴ந்தே, ப⁴க³வதா – ‘து³ஜ்ஜானங் கோ² ஏதங், மஹாராஜ, தயா கி³ஹினா காமபோ⁴கி³னா புத்தஸம்பா³த⁴ஸயனங் அஜ்ஜா²வஸந்தேன காஸிகசந்த³னங் பச்சனுபொ⁴ந்தேன மாலாக³ந்த⁴விலேபனங் தா⁴ரயந்தேன ஜாதரூபரஜதங் ஸாதி³யந்தேன – இமே வா அரஹந்தோ, இமே வா அரஹத்தமக்³க³ங் ஸமாபன்னா’தி. ஸங்வாஸேன கோ², மஹாராஜ, ஸீலங் வேதி³தப்³ப³ங். தஞ்ச கோ² தீ³கே⁴ன அத்³து⁴னா, ந இத்தரங்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேன. ஸங்வோஹாரேன கோ² மஹாராஜ , ஸோசெய்யங் வேதி³தப்³ப³ங். தஞ்ச கோ² தீ³கே⁴ன அத்³து⁴னா, ந இத்தரங்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேன. ஆபதா³ஸு கோ², மஹாராஜ, தா²மோ வேதி³தப்³போ³. ஸோ ச கோ² தீ³கே⁴ன அத்³து⁴னா, ந இத்தரங்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேன. ஸாகச்சா²ய கோ², மஹாராஜ, பஞ்ஞா வேதி³தப்³பா³. ஸா ச கோ² தீ³கே⁴ன அத்³து⁴னா, ந இத்தரங்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’’தி.
‘‘Acchariyaṃ , bhante, abbhutaṃ bhante! Yāva subhāsitamidaṃ, bhante, bhagavatā – ‘dujjānaṃ kho etaṃ, mahārāja, tayā gihinā kāmabhoginā puttasambādhasayanaṃ ajjhāvasantena kāsikacandanaṃ paccanubhontena mālāgandhavilepanaṃ dhārayantena jātarūparajataṃ sādiyantena – ime vā arahanto, ime vā arahattamaggaṃ samāpannā’ti. Saṃvāsena kho, mahārāja, sīlaṃ veditabbaṃ. Tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Saṃvohārena kho mahārāja , soceyyaṃ veditabbaṃ. Tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Āpadāsu kho, mahārāja, thāmo veditabbo. So ca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Sākacchāya kho, mahārāja, paññā veditabbā. Sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’’ti.
அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமா கா³தா²யோ அபா⁴ஸி –
Atha kho bhagavā etamatthaṃ viditvā tāyaṃ velāyaṃ imā gāthāyo abhāsi –
‘‘ந வண்ணரூபேன நரோ ஸுஜானோ,
‘‘Na vaṇṇarūpena naro sujāno,
ந விஸ்ஸஸே இத்தரத³ஸ்ஸனேன;
Na vissase ittaradassanena;
ஸுஸஞ்ஞதானஞ்ஹி வியஞ்ஜனேன,
Susaññatānañhi viyañjanena,
அஸஞ்ஞதா லோகமிமங் சரந்தி.
Asaññatā lokamimaṃ caranti.
‘‘பதிரூபகோ மத்திகாகுண்ட³லோவ,
‘‘Patirūpako mattikākuṇḍalova,
லோஹட்³ட⁴மாஸோவ ஸுவண்ணச²ன்னோ;
Lohaḍḍhamāsova suvaṇṇachanno;
அந்தோ அஸுத்³தா⁴ ப³ஹி ஸோப⁴மானா’’தி.
Anto asuddhā bahi sobhamānā’’ti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸத்தஜடிலஸுத்தவண்ணனா • 1. Sattajaṭilasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸத்தஜடிலஸுத்தவண்ணனா • 1. Sattajaṭilasuttavaṇṇanā
