| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. দুতিযৰগ্গো
2. Dutiyavaggo
১. সত্তজটিলসুত্তং
1. Sattajaṭilasuttaṃ
১২২. একং সমযং ভগৰা সাৰত্থিযং ৰিহরতি পুব্বারামে মিগারমাতুপাসাদে। তেন খো পন সমযেন ভগৰা সাযন্হসমযং পটিসল্লানা ৰুট্ঠিতো বহিদ্ৰারকোট্ঠকে নিসিন্নো হোতি। অথ খো রাজা পসেনদি কোসলো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি।
122. Ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena bhagavā sāyanhasamayaṃ paṭisallānā vuṭṭhito bahidvārakoṭṭhake nisinno hoti. Atha kho rājā pasenadi kosalo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi.
তেন খো পন সমযেন সত্ত চ জটিলা সত্ত চ নিগণ্ঠা সত্ত চ অচেলকা সত্ত চ একসাটকা সত্ত চ পরিব্বাজকা পরূল়্হকচ্ছনখলোমা খারিৰিৰিধমাদায 1 ভগৰতো অৰিদূরে অতিক্কমন্তি। অথ খো রাজা পসেনদি কোসলো উট্ঠাযাসনা একংসং উত্তরাসঙ্গং করিত্ৰা দক্খিণজাণুমণ্ডলং পথৰিযং নিহন্ত্ৰা যেন তে সত্ত চ জটিলা সত্ত চ নিগণ্ঠা সত্ত চ অচেলকা সত্ত চ একসাটকা সত্ত চ পরিব্বাজকা তেনঞ্জলিং পণামেত্ৰা তিক্খত্তুং নামং সাৰেসি – ‘‘রাজাহং, ভন্তে, পসেনদি কোসলো…পে॰… রাজাহং, ভন্তে, পসেনদি কোসলো’’তি।
Tena kho pana samayena satta ca jaṭilā satta ca nigaṇṭhā satta ca acelakā satta ca ekasāṭakā satta ca paribbājakā parūḷhakacchanakhalomā khārivividhamādāya 2 bhagavato avidūre atikkamanti. Atha kho rājā pasenadi kosalo uṭṭhāyāsanā ekaṃsaṃ uttarāsaṅgaṃ karitvā dakkhiṇajāṇumaṇḍalaṃ pathaviyaṃ nihantvā yena te satta ca jaṭilā satta ca nigaṇṭhā satta ca acelakā satta ca ekasāṭakā satta ca paribbājakā tenañjaliṃ paṇāmetvā tikkhattuṃ nāmaṃ sāvesi – ‘‘rājāhaṃ, bhante, pasenadi kosalo…pe… rājāhaṃ, bhante, pasenadi kosalo’’ti.
অথ খো রাজা পসেনদি কোসলো অচিরপক্কন্তেসু তেসু সত্তসু চ জটিলেসু সত্তসু চ নিগণ্ঠেসু সত্তসু চ অচেলকেসু সত্তসু চ একসাটকেসু সত্তসু চ পরিব্বাজকেসু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘যে তে, ভন্তে, লোকে অরহন্তো ৰা অরহত্তমগ্গং ৰা সমাপন্না এতে তেসং অঞ্ঞতরা’’তি।
Atha kho rājā pasenadi kosalo acirapakkantesu tesu sattasu ca jaṭilesu sattasu ca nigaṇṭhesu sattasu ca acelakesu sattasu ca ekasāṭakesu sattasu ca paribbājakesu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā pasenadi kosalo bhagavantaṃ etadavoca – ‘‘ye te, bhante, loke arahanto vā arahattamaggaṃ vā samāpannā ete tesaṃ aññatarā’’ti.
‘‘দুজ্জানং খো এতং, মহারাজ, তযা গিহিনা কামভোগিনা পুত্তসম্বাধসযনং অজ্ঝাৰসন্তেন কাসিকচন্দনং পচ্চনুভোন্তেন মালাগন্ধৰিলেপনং ধারযন্তেন জাতরূপরজতং সাদিযন্তেন – ‘ইমে ৰা অরহন্তো, ইমে ৰা অরহত্তমগ্গং সমাপন্না’’’তি।
‘‘Dujjānaṃ kho etaṃ, mahārāja, tayā gihinā kāmabhoginā puttasambādhasayanaṃ ajjhāvasantena kāsikacandanaṃ paccanubhontena mālāgandhavilepanaṃ dhārayantena jātarūparajataṃ sādiyantena – ‘ime vā arahanto, ime vā arahattamaggaṃ samāpannā’’’ti.
‘‘সংৰাসেন খো, মহারাজ, সীলং ৰেদিতব্বং। তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন। সংৰোহারেন খো, মহারাজ, সোচেয্যং ৰেদিতব্বং। তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন। আপদাসু খো, মহারাজ, থামো ৰেদিতব্বো। সো চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন। সাকচ্ছায , খো, মহারাজ, পঞ্ঞা ৰেদিতব্বা। সা চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’’তি।
‘‘Saṃvāsena kho, mahārāja, sīlaṃ veditabbaṃ. Tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Saṃvohārena kho, mahārāja, soceyyaṃ veditabbaṃ. Tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Āpadāsu kho, mahārāja, thāmo veditabbo. So ca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Sākacchāya , kho, mahārāja, paññā veditabbā. Sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’’ti.
‘‘অচ্ছরিযং , ভন্তে, অব্ভুতং ভন্তে! যাৰ সুভাসিতমিদং, ভন্তে, ভগৰতা – ‘দুজ্জানং খো এতং, মহারাজ, তযা গিহিনা কামভোগিনা পুত্তসম্বাধসযনং অজ্ঝাৰসন্তেন কাসিকচন্দনং পচ্চনুভোন্তেন মালাগন্ধৰিলেপনং ধারযন্তেন জাতরূপরজতং সাদিযন্তেন – ইমে ৰা অরহন্তো, ইমে ৰা অরহত্তমগ্গং সমাপন্না’তি। সংৰাসেন খো, মহারাজ, সীলং ৰেদিতব্বং। তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন। সংৰোহারেন খো মহারাজ , সোচেয্যং ৰেদিতব্বং। তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন। আপদাসু খো, মহারাজ, থামো ৰেদিতব্বো। সো চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন। সাকচ্ছায খো, মহারাজ, পঞ্ঞা ৰেদিতব্বা। সা চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’’তি।
‘‘Acchariyaṃ , bhante, abbhutaṃ bhante! Yāva subhāsitamidaṃ, bhante, bhagavatā – ‘dujjānaṃ kho etaṃ, mahārāja, tayā gihinā kāmabhoginā puttasambādhasayanaṃ ajjhāvasantena kāsikacandanaṃ paccanubhontena mālāgandhavilepanaṃ dhārayantena jātarūparajataṃ sādiyantena – ime vā arahanto, ime vā arahattamaggaṃ samāpannā’ti. Saṃvāsena kho, mahārāja, sīlaṃ veditabbaṃ. Tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Saṃvohārena kho mahārāja , soceyyaṃ veditabbaṃ. Tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Āpadāsu kho, mahārāja, thāmo veditabbo. So ca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Sākacchāya kho, mahārāja, paññā veditabbā. Sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’’ti.
অথ খো ভগৰা এতমত্থং ৰিদিত্ৰা তাযং ৰেলাযং ইমা গাথাযো অভাসি –
Atha kho bhagavā etamatthaṃ viditvā tāyaṃ velāyaṃ imā gāthāyo abhāsi –
‘‘ন ৰণ্ণরূপেন নরো সুজানো,
‘‘Na vaṇṇarūpena naro sujāno,
ন ৰিস্সসে ইত্তরদস্সনেন।
Na vissase ittaradassanena;
সুসঞ্ঞতানঞ্হি ৰিযঞ্জনেন,
Susaññatānañhi viyañjanena,
অসঞ্ঞতা লোকমিমং চরন্তি॥
Asaññatā lokamimaṃ caranti.
‘‘পতিরূপকো মত্তিকাকুণ্ডলোৰ,
‘‘Patirūpako mattikākuṇḍalova,
লোহড্ঢমাসোৰ সুৰণ্ণছন্নো।
Lohaḍḍhamāsova suvaṇṇachanno;
অন্তো অসুদ্ধা বহি সোভমানা’’তি॥
Anto asuddhā bahi sobhamānā’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সত্তজটিলসুত্তৰণ্ণনা • 1. Sattajaṭilasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. সত্তজটিলসুত্তৰণ্ণনা • 1. Sattajaṭilasuttavaṇṇanā
