| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. து³தியவக்³கோ³
2. Dutiyavaggo
1. ஸத்தஜடிலஸுத்தவண்ணனா
1. Sattajaṭilasuttavaṇṇanā
122. து³தியவக்³க³ஸ்ஸ பட²மே புப்³பா³ராமே மிகா³ரமாதுபாஸாதே³தி புப்³பா³ராமஸங்கா²தே விஹாரே மிகா³ரமாதுயா பாஸாதே³. தத்ராயங் அனுபுப்³பி³கதா² – அதீதே ஸதஸஹஸ்ஸகப்பமத்த²கே ஏகா உபாஸிகா பது³முத்தரங் ப⁴க³வந்தங் நிமந்தெத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ ஸதஸஹஸ்ஸதா³னங் த³த்வா ப⁴க³வதோ பாத³மூலே நிபஜ்ஜித்வா – ‘‘அனாக³தே தும்ஹாதி³ஸஸ்ஸ பு³த்³த⁴ஸ்ஸ அக்³கு³பட்டா²யிகா ஹோமீ’’தி பத்த²னங் அகாஸி. ஸா கப்பஸதஸஹஸ்ஸங் தே³வேஸு ச மனுஸ்ஸேஸு ச ஸங்ஸரித்வா அம்ஹாகங் ப⁴க³வதோ காலே ப⁴த்³தி³யனக³ரே மெண்ட³கபுத்தஸ்ஸ த⁴னஞ்சயஸெட்டி²னோ கே³ஹே ஸுமனதே³வியா குச்சி²ஸ்மிங் படிஸந்தி⁴ங் க³ண்ஹி . ஜாதகாலே சஸ்ஸா விஸாகா²தி நாமங் அகங்ஸு. ஸா யதா³ ப⁴க³வா ப⁴த்³தி³யனக³ரங் அக³மாஸி, ததா³ பஞ்சஹி தா³ரிகாஸதேஹி ஸத்³தி⁴ங் ப⁴க³வதோ பச்சுக்³க³மனங் க³தா பட²மத³ஸ்ஸனம்ஹியேவ ஸோதாபன்னா அஹோஸி. அபரபா⁴கே³ ஸாவத்தி²யங் மிகா³ரஸெட்டி²புத்தஸ்ஸ புண்ணவட்³ட⁴னகுமாரஸ்ஸ கே³ஹங் க³தா. தத்த² நங் மிகா³ரஸெட்டி² மாதிட்டா²னே ட²பேஸி, தஸ்மா மிகா³ரமாதாதி வுச்சதி. தாய காரிதே பாஸாதே³.
122. Dutiyavaggassa paṭhame pubbārāme migāramātupāsādeti pubbārāmasaṅkhāte vihāre migāramātuyā pāsāde. Tatrāyaṃ anupubbikathā – atīte satasahassakappamatthake ekā upāsikā padumuttaraṃ bhagavantaṃ nimantetvā buddhappamukhassa bhikkhusaṅghassa satasahassadānaṃ datvā bhagavato pādamūle nipajjitvā – ‘‘anāgate tumhādisassa buddhassa aggupaṭṭhāyikā homī’’ti patthanaṃ akāsi. Sā kappasatasahassaṃ devesu ca manussesu ca saṃsaritvā amhākaṃ bhagavato kāle bhaddiyanagare meṇḍakaputtassa dhanañcayaseṭṭhino gehe sumanadeviyā kucchismiṃ paṭisandhiṃ gaṇhi . Jātakāle cassā visākhāti nāmaṃ akaṃsu. Sā yadā bhagavā bhaddiyanagaraṃ agamāsi, tadā pañcahi dārikāsatehi saddhiṃ bhagavato paccuggamanaṃ gatā paṭhamadassanamhiyeva sotāpannā ahosi. Aparabhāge sāvatthiyaṃ migāraseṭṭhiputtassa puṇṇavaḍḍhanakumārassa gehaṃ gatā. Tattha naṃ migāraseṭṭhi mātiṭṭhāne ṭhapesi, tasmā migāramātāti vuccati. Tāya kārite pāsāde.
ப³ஹி த்³வாரகொட்ட²கேதி பாஸாத³த்³வாரகொட்ட²கஸ்ஸ ப³ஹி, ந விஹாரத்³வாரகொட்ட²கஸ்ஸ. ஸோ கிர பாஸாதோ³ லோஹபாஸாதோ³ விய ஸமந்தா சதுத்³வாரகொட்ட²கயுத்தேன பாகாரேன பரிக்கி²த்தோ. தேஸு பாசீனத்³வாரகொட்ட²கஸ்ஸ ப³ஹி பாஸாத³ச்சா²யாயங் பாசீனலோகதா⁴துங் ஓலோகெந்தோ பஞ்ஞத்தே வரபு³த்³தா⁴ஸனே நிஸின்னோ ஹோதி.
Bahi dvārakoṭṭhaketi pāsādadvārakoṭṭhakassa bahi, na vihāradvārakoṭṭhakassa. So kira pāsādo lohapāsādo viya samantā catudvārakoṭṭhakayuttena pākārena parikkhitto. Tesu pācīnadvārakoṭṭhakassa bahi pāsādacchāyāyaṃ pācīnalokadhātuṃ olokento paññatte varabuddhāsane nisinno hoti.
பரூள்ஹகச்ச²னக²லோமாதி பரூள்ஹகச்சா² பரூள்ஹனகா² பரூள்ஹலோமா, கச்சா²தீ³ஸு தீ³க⁴லோமா தீ³க⁴னகா² சாதி அத்தோ². கா²ரிவிவித⁴ந்தி விவித⁴கா²ரிங் நானப்பகாரகங் பப்³ப³ஜிதபரிக்கா²ரப⁴ண்ட³கங். அவிதூ³ரே அதிக்கமந்தீதி அவிதூ³ரமக்³கே³ன நக³ரங் பவிஸந்தி. ராஜாஹங் , ப⁴ந்தேதி அஹங், ப⁴ந்தே, ராஜா பஸேனதி³ கோஸலோ, மய்ஹங் நாமங் தும்ஹே ஜானாதா²தி. கஸ்மா பன ராஜா லோகே அக்³க³புக்³க³லஸ்ஸ ஸந்திகே நிஸின்னோ ஏவரூபானங் நக்³க³பொ⁴க்³க³னிஸ்ஸிரிகானங் அஞ்ஜலிங் பக்³க³ண்ஹாதீதி. ஸங்க³ண்ஹனத்தா²ய. ஏவங் ஹிஸ்ஸ அஹோஸி – ‘‘ஸசாஹங் எத்தகம்பி ஏதேஸங் ந கரிஸ்ஸாமி , ‘மயங் புத்ததா³ரங் பஹாய ஏதஸ்ஸத்தா²ய து³ப்³போ⁴ஜனது³க்க²ஸெய்யாதீ³னி அனுபோ⁴ம, அயங் அம்ஹாகங் அஞ்ஜலிமத்தம்பி ந கரோதீ’தி அத்தனா தி³ட்ட²ங் ஸுதங் படிச்சா²தெ³த்வா ந கதெ²ய்யுங். ஏவங் கதே பன அனிகூ³ஹித்வா கதெ²ஸ்ஸந்தீ’’தி. தஸ்மா ஏவமகாஸி. அபிச ஸத்து² அஜ்ஜா²ஸயஜானநத்த²ங் ஏவமகாஸி.
Parūḷhakacchanakhalomāti parūḷhakacchā parūḷhanakhā parūḷhalomā, kacchādīsu dīghalomā dīghanakhā cāti attho. Khārivividhanti vividhakhāriṃ nānappakārakaṃ pabbajitaparikkhārabhaṇḍakaṃ. Avidūre atikkamantīti avidūramaggena nagaraṃ pavisanti. Rājāhaṃ, bhanteti ahaṃ, bhante, rājā pasenadi kosalo, mayhaṃ nāmaṃ tumhe jānāthāti. Kasmā pana rājā loke aggapuggalassa santike nisinno evarūpānaṃ naggabhogganissirikānaṃ añjaliṃ paggaṇhātīti. Saṅgaṇhanatthāya. Evaṃ hissa ahosi – ‘‘sacāhaṃ ettakampi etesaṃ na karissāmi , ‘mayaṃ puttadāraṃ pahāya etassatthāya dubbhojanadukkhaseyyādīni anubhoma, ayaṃ amhākaṃ añjalimattampi na karotī’ti attanā diṭṭhaṃ sutaṃ paṭicchādetvā na katheyyuṃ. Evaṃ kate pana anigūhitvā kathessantī’’ti. Tasmā evamakāsi. Apica satthu ajjhāsayajānanatthaṃ evamakāsi.
காஸிகசந்த³னந்தி ஸண்ஹசந்த³னங். மாலாக³ந்த⁴விலேபனந்தி வண்ணக³ந்த⁴த்தா²ய மாலங், ஸுக³ந்த⁴பா⁴வத்தா²ய க³ந்த⁴ங், வண்ணக³ந்த⁴த்தா²ய விலேபனஞ்ச தா⁴ரெந்தேன.
Kāsikacandananti saṇhacandanaṃ. Mālāgandhavilepananti vaṇṇagandhatthāya mālaṃ, sugandhabhāvatthāya gandhaṃ, vaṇṇagandhatthāya vilepanañca dhārentena.
ஸங்வாஸேனாதி ஸஹவாஸேன. ஸீலங் வேதி³தப்³ப³ந்தி அயங் ஸுஸீலோ வா து³ஸ்ஸீலோ வாதி ஸங்வஸந்தேன உபஸங்கமந்தேன ஜானிதப்³போ³. தஞ்ச கோ² தீ³கே⁴ன அத்³து⁴னா ந இத்தரந்தி தஞ்ச ஸீலங் தீ³கே⁴ன காலேன வேதி³தப்³ப³ங், ந இத்தரேன. த்³வீஹதீஹஞ்ஹி ஸங்யதாகாரோ ச ஸங்வுதிந்த்³ரியாகாரோ ச ந ஸக்கா த³ஸ்ஸேதுங். மனஸிகரோதாதி ஸீலமஸ்ஸ பரிக்³க³ஹெஸ்ஸாமீதி மனஸிகரொந்தேன பச்சவெக்க²ந்தேனேவ ஸக்கா ஜானிதுங், ந இதரேன. பஞ்ஞவதாதி தம்பி ஸப்பஞ்ஞேனேவ பண்டி³தேன. பா³லோ ஹி மனஸிகரொந்தோபி ஜானிதுங் ந ஸக்கோதி.
Saṃvāsenāti sahavāsena. Sīlaṃ veditabbanti ayaṃ susīlo vā dussīlo vāti saṃvasantena upasaṅkamantena jānitabbo. Tañca kho dīghena addhunā na ittaranti tañca sīlaṃ dīghena kālena veditabbaṃ, na ittarena. Dvīhatīhañhi saṃyatākāro ca saṃvutindriyākāro ca na sakkā dassetuṃ. Manasikarotāti sīlamassa pariggahessāmīti manasikarontena paccavekkhanteneva sakkā jānituṃ, na itarena. Paññavatāti tampi sappaññeneva paṇḍitena. Bālo hi manasikarontopi jānituṃ na sakkoti.
ஸங்வோஹாரேனாதி கத²னேன.
Saṃvohārenāti kathanena.
‘‘யோ ஹி கோசி மனுஸ்ஸேஸு, வோஹாரங் உபஜீவதி;
‘‘Yo hi koci manussesu, vohāraṃ upajīvati;
ஏவங் வாஸெட்ட² ஜானாஹி, வாணிஜோ ஸோ ந ப்³ராஹ்மணோ’’தி. (ம॰ நி॰ 2.457) –
Evaṃ vāseṭṭha jānāhi, vāṇijo so na brāhmaṇo’’ti. (ma. ni. 2.457) –
எத்த² ஹி ப்³யவஹாரோ வோஹாரோ நாம. ‘‘சத்தாரோ அரியவோஹாரா சத்தாரோ அனரியவோஹாரா’’தி (தீ³॰ நி॰ 3.313) எத்த² சேதனா. ‘‘ஸங்கா² ஸமஞ்ஞா பஞ்ஞத்தி வோஹாரோ’’தி (த⁴॰ ஸ॰ 1313-1315) எத்த² பஞ்ஞத்தி. ‘‘வோஹாரமத்தேன ஸோ வோஹரெய்யா’’தி (ஸங்॰ நி॰ 1.25) எத்த² கதா² வோஹாரோ. இதா⁴பி ஏஸோவ அதி⁴ப்பேதோ. ஏகச்சஸ்ஸ ஹி ஸம்முகா² கதா² பரம்முகா²ய கதா²ய ந ஸமேதி, பரம்முகா² கதா² ச ஸம்முகா²ய கதா²ய, ததா² புரிமகதா² ச பச்சி²மகதா²ய, பச்சி²மகதா² ச புரிமகதா²ய. ஸோ கதெ²ந்தேனேவ ஸக்கா ஜானிதுங் ‘‘அஸுசி ஏஸோ புக்³க³லோ’’தி. ஸுசிஸீலஸ்ஸ பன புரிமங் பச்சி²மேன, பச்சி²மஞ்ச புரிமேன ஸமேதி, ஸம்முகா²கதி²தங் பரம்முகா²கதி²தேன, பரம்முகா²கதி²தஞ்ச ஸம்முகா²கதி²தேன, தஸ்மா கதெ²ந்தேன ஸக்கா ஸுசிபா⁴வோ ஜானிதுந்தி பகாஸெந்தோ ஏவமாஹ.
Ettha hi byavahāro vohāro nāma. ‘‘Cattāro ariyavohārā cattāro anariyavohārā’’ti (dī. ni. 3.313) ettha cetanā. ‘‘Saṅkhā samaññā paññatti vohāro’’ti (dha. sa. 1313-1315) ettha paññatti. ‘‘Vohāramattena so vohareyyā’’ti (saṃ. ni. 1.25) ettha kathā vohāro. Idhāpi esova adhippeto. Ekaccassa hi sammukhā kathā parammukhāya kathāya na sameti, parammukhā kathā ca sammukhāya kathāya, tathā purimakathā ca pacchimakathāya, pacchimakathā ca purimakathāya. So kathenteneva sakkā jānituṃ ‘‘asuci eso puggalo’’ti. Sucisīlassa pana purimaṃ pacchimena, pacchimañca purimena sameti, sammukhākathitaṃ parammukhākathitena, parammukhākathitañca sammukhākathitena, tasmā kathentena sakkā sucibhāvo jānitunti pakāsento evamāha.
தா²மோதி ஞாணதா²மோ. யஸ்ஸ ஹி ஞாணதா²மோ நத்தி², ஸோ உப்பன்னேஸு உபத்³த³வேஸு க³ஹேதப்³ப³க்³க³ஹணங் கதப்³ப³கிச்சங் அபஸ்ஸந்தோ அத்³வாரக⁴ரங் பவிட்டோ² விய சரதி. தேனாஹ ஆபதா³ஸு கோ², மஹாராஜ, தா²மோ வேதி³தப்³போ³தி. ஸாகச்சா²யாதி ஸங்கதா²ய. து³ப்பஞ்ஞஸ்ஸ ஹி கதா² உத³கே கெ³ண்டு³ விய உப்பலவதி, பஞ்ஞவதோ கதெ²ந்தஸ்ஸ படிபா⁴னங் அனந்தரங் ஹோதி. உத³கவிப்ப²ந்தி³தேனேவ ஹி மச்சோ² கு²த்³த³கோ வா மஹந்தோ வாதி ஞாயதி. ஓசரகாதி ஹெட்டா²சரகா. சரா ஹி பப்³ப³தமத்த²கேன சரந்தாபி ஹெட்டா² – சரகாவ ஹொந்தி. ஓசரித்வாதி அவசரித்வா வீமங்ஸித்வா, தங் தங் பவத்திங் ஞத்வாதி அத்தோ². ரஜோஜல்லந்தி ரஜஞ்ச ஜல்லஞ்ச. வண்ணரூபேனாதி வண்ணஸண்டா²னேன. இத்தரத³ஸ்ஸனேனாதி லஹுகத³ஸ்ஸனேன. வியஞ்ஜனேனாதி பரிக்கா²ரப⁴ண்ட³கேன. பதிரூபகோ மத்திகாகுண்ட³லோவாதி ஸுவண்ணகுண்ட³லபதிரூபகோ மத்திகாகுண்ட³லோவ. லோஹட்³ட⁴மாஸோதி லோஹட்³ட⁴மாஸகோ. பட²மங்.
Thāmoti ñāṇathāmo. Yassa hi ñāṇathāmo natthi, so uppannesu upaddavesu gahetabbaggahaṇaṃ katabbakiccaṃ apassanto advāragharaṃ paviṭṭho viya carati. Tenāha āpadāsu kho, mahārāja, thāmo veditabboti. Sākacchāyāti saṃkathāya. Duppaññassa hi kathā udake geṇḍu viya uppalavati, paññavato kathentassa paṭibhānaṃ anantaraṃ hoti. Udakavipphanditeneva hi maccho khuddako vā mahanto vāti ñāyati. Ocarakāti heṭṭhācarakā. Carā hi pabbatamatthakena carantāpi heṭṭhā – carakāva honti. Ocaritvāti avacaritvā vīmaṃsitvā, taṃ taṃ pavattiṃ ñatvāti attho. Rajojallanti rajañca jallañca. Vaṇṇarūpenāti vaṇṇasaṇṭhānena. Ittaradassanenāti lahukadassanena. Viyañjanenāti parikkhārabhaṇḍakena. Patirūpako mattikākuṇḍalovāti suvaṇṇakuṇḍalapatirūpako mattikākuṇḍalova. Lohaḍḍhamāsoti lohaḍḍhamāsako. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸத்தஜடிலஸுத்தங் • 1. Sattajaṭilasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸத்தஜடிலஸுத்தவண்ணனா • 1. Sattajaṭilasuttavaṇṇanā
