| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. দুতিযৰগ্গো
2. Dutiyavaggo
১. সত্তজটিলসুত্তৰণ্ণনা
1. Sattajaṭilasuttavaṇṇanā
১২২. পুব্বারামসঙ্খাতেতি সাৰত্থিনগরস্স পুব্বদিসায কতত্তা পুব্বারামেতি সঙ্খং গতে। তত্রাতি ‘‘মিগারমাতুযা পাসাদে’’তি তস্মিং সংখিত্তৰচনে। অযং ইদানি ৰুচ্চমানা অনুপুব্বিকথা আদিতো পট্ঠায অনুক্কমকথা। পত্থনং অকাসি তস্স ভগৰতো অগ্গুপট্ঠাযিকং একং উপাসিকং দিস্ৰা তং ঠানন্তরং আকঙ্খন্তী। মেণ্ডকপুত্তস্সাতি মেণ্ডকসেট্ঠিপুত্তস্স। মাতিট্ঠানে ঠপেসি তস্সা উপকারং গরুভাৰঞ্চ দিস্ৰা। তায কারিতে পাসাদেতি তায মহাউপাসিকায মহালতাপসাধনং ৰিস্সজ্জেত্ৰা নৰহি কোটীহি করীসমত্তে ভূমিভাগে কারিতে সহস্সগব্ভপটিমণ্ডিতে পাসাদে।
122.Pubbārāmasaṅkhāteti sāvatthinagarassa pubbadisāya katattā pubbārāmeti saṅkhaṃ gate. Tatrāti ‘‘migāramātuyā pāsāde’’ti tasmiṃ saṃkhittavacane. Ayaṃ idāni vuccamānā anupubbikathā ādito paṭṭhāya anukkamakathā. Patthanaṃ akāsi tassa bhagavato aggupaṭṭhāyikaṃ ekaṃ upāsikaṃ disvā taṃ ṭhānantaraṃ ākaṅkhantī. Meṇḍakaputtassāti meṇḍakaseṭṭhiputtassa. Mātiṭṭhāneṭhapesi tassā upakāraṃ garubhāvañca disvā. Tāya kārite pāsādeti tāya mahāupāsikāya mahālatāpasādhanaṃ vissajjetvā navahi koṭīhi karīsamatte bhūmibhāge kārite sahassagabbhapaṭimaṇḍite pāsāde.
পরূল়্হকচ্ছাতি পরূল়্হকচ্ছলোমা। কমণ্ডলুঘটিকাদিং পব্বজিতপরিক্খারং। নগ্গভোগ্গনিস্সিরিকানন্তি নগ্গানঞ্চেৰ ভোগ্গানঞ্চ নিস্সিরিকানঞ্চ। তে হি অনিৰত্থৰত্থতায নগ্গা চেৰ, অচেলকৰতাদিনা ভোগ্গসরীরতায ভোগ্গা, সোভারহিততায নিস্সিরিকা চ। অত্তনা দিট্ঠসুতং পটিচ্ছাদেত্ৰা ন কথেয্যুন্তি অকারণমেতং তেসং রঞ্ঞা পযুত্তচরপুরিসভাৰতো। এৰং কতে পন তে ‘‘অঞ্ঞেপি পব্বজিতা অত্থীতি অযং জানাতী’’তি মঞ্ঞেয্যুন্তি কোহঞ্ঞচিত্তো এৰং অকাসীতি সক্কা ৰিঞ্ঞাতুং। তথা হি তেনত্থেন অপরিতোসমানো ‘‘অপিচা’’তিআদিমাহ।
Parūḷhakacchāti parūḷhakacchalomā. Kamaṇḍalughaṭikādiṃ pabbajitaparikkhāraṃ. Naggabhogganissirikānanti naggānañceva bhoggānañca nissirikānañca. Te hi anivatthavatthatāya naggā ceva, acelakavatādinā bhoggasarīratāya bhoggā, sobhārahitatāya nissirikā ca. Attanā diṭṭhasutaṃpaṭicchādetvā na katheyyunti akāraṇametaṃ tesaṃ raññā payuttacarapurisabhāvato. Evaṃ kate pana te ‘‘aññepi pabbajitā atthīti ayaṃ jānātī’’ti maññeyyunti kohaññacitto evaṃ akāsīti sakkā viññātuṃ. Tathā hi tenatthena aparitosamāno ‘‘apicā’’tiādimāha.
কাসিকচন্দনন্তি উজ্জলচন্দনং। তং কির ৰণ্ণৰসেন সমুজ্জলং হোতি পভস্সরং, তদত্থমেৰ নং সণ্হতরং করোন্তি। তেনাহ ‘‘কাসিকচন্দনন্তি সণ্হচন্দন’’ন্তি। ৰণ্ণগন্ধত্থাযাতি ৰণ্ণসোভত্থঞ্চেৰ সুগন্ধভাৰত্থঞ্চ। ৰণ্ণগন্ধত্থাযাতি ছৰিরাগকরণত্থঞ্চেৰ সুগন্ধত্থায চ। ‘‘গিহিনা’’তিআদীহি পদেহি এৰং পমাদৰিহারিনা তযা অরহন্তো দুৰিঞ্ঞেয্যাতি দস্সেতি।
Kāsikacandananti ujjalacandanaṃ. Taṃ kira vaṇṇavasena samujjalaṃ hoti pabhassaraṃ, tadatthameva naṃ saṇhataraṃ karonti. Tenāha ‘‘kāsikacandananti saṇhacandana’’nti. Vaṇṇagandhatthāyāti vaṇṇasobhatthañceva sugandhabhāvatthañca. Vaṇṇagandhatthāyāti chavirāgakaraṇatthañceva sugandhatthāya ca. ‘‘Gihinā’’tiādīhi padehi evaṃ pamādavihārinā tayā arahanto duviññeyyāti dasseti.
সংৰাসো নাম ইধ কালেন উপসঙ্কমনন্তি দস্সেন্তো ‘‘উপসঙ্কমন্তেনা’’তি আহ। কাযৰাচাহি অসংযতেনপি সংযতাকারো, অসংৰুতিন্দ্রিযেনপি সংৰুতিন্দ্রিযাকারো। পরিগ্গহেস্সামীতি ৰীমংসিস্সামি ‘‘পরিসুদ্ধং নু খো, নো’’তি। সপ্পঞ্ঞেনাতি সীলপরিগ্গণ্হনপঞ্ঞায সপ্পঞ্ঞেন। জানিতুং ন সক্কোতি সভাৰস্স সতো সীলস্স অনুপধারণতো।
Saṃvāso nāma idha kālena upasaṅkamananti dassento ‘‘upasaṅkamantenā’’ti āha. Kāyavācāhi asaṃyatenapi saṃyatākāro, asaṃvutindriyenapi saṃvutindriyākāro. Pariggahessāmīti vīmaṃsissāmi ‘‘parisuddhaṃ nu kho, no’’ti. Sappaññenāti sīlapariggaṇhanapaññāya sappaññena. Jānituṃ na sakkoti sabhāvassa sato sīlassa anupadhāraṇato.
কথনেনাতি অপরাপরং কথনেন। তথা হি ৰক্খতি ‘‘একচ্চস্স হী’’তিআদি। অরিযৰোহারোতি দিট্ঠাদিলক্খণেন ৰোহরিতো ‘‘দিট্ঠং অদিট্ঠ’’ন্তিআদিনা পৰুত্তসদ্দৰোহারো। তস্স পন কারণমেৰ গণ্হন্তো ‘‘এত্থ চেতনা’’তি আহ। এস নযো অনরিযৰোহারেপি। পরমত্থতো হি সচ্চৰাচাদযো মুসাৰাদাদযো চেতনালক্খণাতি। পঞ্ঞত্তিৰোহারো তথা তথা ৰোহরিতব্বতো এৰমাহ ‘‘সংৰোহারেন খো, মহারাজ, সোচেয্যং ৰেদিতব্ব’’ন্তি।
Kathanenāti aparāparaṃ kathanena. Tathā hi vakkhati ‘‘ekaccassa hī’’tiādi. Ariyavohāroti diṭṭhādilakkhaṇena voharito ‘‘diṭṭhaṃ adiṭṭha’’ntiādinā pavuttasaddavohāro. Tassa pana kāraṇameva gaṇhanto ‘‘ettha cetanā’’ti āha. Esa nayo anariyavohārepi. Paramatthato hi saccavācādayo musāvādādayo cetanālakkhaṇāti. Paññattivohāro tathā tathā voharitabbato evamāha ‘‘saṃvohārena kho, mahārāja, soceyyaṃ veditabba’’nti.
ঞাণথামোতি ঞাণগুণবলং, যেন ঠানুপ্পত্তিকপটিভানাদিনা অচ্চাযিককিচ্চকরণীযানি নিট্ঠাপেতি। সংকথাযাতি অত্থৰীমংসনৰসেন পৰত্তায সম্মাকথায। উপ্পিলৰতি লহুকভাৰতো। হেট্ঠাচরকাতি অৰচরকা। যে অনুপৰিসিত্ৰা পরেসং রহস্সৰীমংসনৰসেন পৰত্তা, তেসু ওচরকৰোহারোতি ৰুত্তং ‘‘চরা হী’’তিআদি।
Ñāṇathāmoti ñāṇaguṇabalaṃ, yena ṭhānuppattikapaṭibhānādinā accāyikakiccakaraṇīyāni niṭṭhāpeti. Saṃkathāyāti atthavīmaṃsanavasena pavattāya sammākathāya. Uppilavati lahukabhāvato. Heṭṭhācarakāti avacarakā. Ye anupavisitvā paresaṃ rahassavīmaṃsanavasena pavattā, tesu ocarakavohāroti vuttaṃ ‘‘carā hī’’tiādi.
ৰণ্ণসণ্ঠানেনাতি ৰণ্ণেন ৰা সণ্ঠানেন ৰা ৰণ্ণপোক্খরতায ৰা সণ্ঠানসম্পত্তিযা ৰা। সুজানো পেসলো ৰিস্সসেতি যোজনা। লহুকদস্সনেনাতি পরিত্তদস্সনেন ৰিজ্জুকেন ৰিয। পরিক্খারভণ্ডকেনাতি পব্বজিতপরিক্খারভূতেন ভণ্ডকেন। লোহড্ঢমাসোতি লোহমযো উপড্ঢগ্ঘনকমাসো।
Vaṇṇasaṇṭhānenāti vaṇṇena vā saṇṭhānena vā vaṇṇapokkharatāya vā saṇṭhānasampattiyā vā. Sujāno pesalo vissaseti yojanā. Lahukadassanenāti parittadassanena vijjukena viya. Parikkhārabhaṇḍakenāti pabbajitaparikkhārabhūtena bhaṇḍakena. Lohaḍḍhamāsoti lohamayo upaḍḍhagghanakamāso.
সত্তজটিলসুত্তৰণ্ণনা নিট্ঠিতা।
Sattajaṭilasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. সত্তজটিলসুত্তং • 1. Sattajaṭilasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সত্তজটিলসুত্তৰণ্ণনা • 1. Sattajaṭilasuttavaṇṇanā
