| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
2. д̣̇уд̇ияаваг̇г̇о
2. Dutiyavaggo
1. сад̇д̇аж̇адиласуд̇д̇аван̣н̣анаа
1. Sattajaṭilasuttavaṇṇanā
122. д̣̇уд̇ияаваг̇г̇асса батамз буб̣б̣аараамз миг̇аарамаад̇убаасаад̣̇зд̇и буб̣б̣аараамасан̇каад̇з вихаарз миг̇аарамаад̇уяаа баасаад̣̇з. д̇ад̇рааяам̣ анубуб̣б̣игат̇аа – ад̇ийд̇з сад̇асахассагаббамад̇т̇агз згаа убаасигаа бад̣̇умуд̇д̇арам̣ бхаг̇аванд̇ам̣ ниманд̇зд̇ваа б̣уд̣̇д̇хаббамукасса бхигкусан̇гхасса сад̇асахассад̣̇аанам̣ д̣̇ад̇ваа бхаг̇авад̇о баад̣̇амуулз нибаж̇ж̇ид̇ваа – ‘‘анааг̇ад̇з д̇умхаад̣̇исасса б̣уд̣̇д̇хасса аг̇г̇убадтааяигаа хомий’’д̇и бад̇т̇анам̣ агааси. саа габбасад̇асахассам̣ д̣̇звзсу жа мануссзсу жа сам̣сарид̇ваа амхаагам̣ бхаг̇авад̇о гаалз бхад̣̇д̣̇ияанаг̇арз мзн̣д̣агабуд̇д̇асса д̇ханан̃жаяасздтино г̇зхз суманад̣̇звияаа гужчисмим̣ бадисанд̇хим̣ г̇ан̣хи . ж̇аад̇агаалз жассаа висаакаад̇и наамам̣ агам̣су. саа яад̣̇аа бхаг̇аваа бхад̣̇д̣̇ияанаг̇арам̣ аг̇амааси, д̇ад̣̇аа бан̃жахи д̣̇ааригаасад̇зхи сад̣̇д̇хим̣ бхаг̇авад̇о бажжуг̇г̇аманам̣ г̇ад̇аа батамад̣̇ассанамхиязва сод̇аабаннаа ахоси. абарабхааг̇з саавад̇т̇ияам̣ миг̇аарасздтибуд̇д̇асса бун̣н̣авад̣дханагумаарасса г̇зхам̣ г̇ад̇аа. д̇ад̇т̇а нам̣ миг̇аарасздти маад̇идтаанз табзси, д̇асмаа миг̇аарамаад̇аад̇и вужжад̇и. д̇ааяа гаарид̇з баасаад̣̇з.
122. Dutiyavaggassa paṭhame pubbārāme migāramātupāsādeti pubbārāmasaṅkhāte vihāre migāramātuyā pāsāde. Tatrāyaṃ anupubbikathā – atīte satasahassakappamatthake ekā upāsikā padumuttaraṃ bhagavantaṃ nimantetvā buddhappamukhassa bhikkhusaṅghassa satasahassadānaṃ datvā bhagavato pādamūle nipajjitvā – ‘‘anāgate tumhādisassa buddhassa aggupaṭṭhāyikā homī’’ti patthanaṃ akāsi. Sā kappasatasahassaṃ devesu ca manussesu ca saṃsaritvā amhākaṃ bhagavato kāle bhaddiyanagare meṇḍakaputtassa dhanañcayaseṭṭhino gehe sumanadeviyā kucchismiṃ paṭisandhiṃ gaṇhi . Jātakāle cassā visākhāti nāmaṃ akaṃsu. Sā yadā bhagavā bhaddiyanagaraṃ agamāsi, tadā pañcahi dārikāsatehi saddhiṃ bhagavato paccuggamanaṃ gatā paṭhamadassanamhiyeva sotāpannā ahosi. Aparabhāge sāvatthiyaṃ migāraseṭṭhiputtassa puṇṇavaḍḍhanakumārassa gehaṃ gatā. Tattha naṃ migāraseṭṭhi mātiṭṭhāne ṭhapesi, tasmā migāramātāti vuccati. Tāya kārite pāsāde.
б̣ахи д̣̇ваарагодтагзд̇и баасаад̣̇ад̣̇ваарагодтагасса б̣ахи, на вихаарад̣̇ваарагодтагасса. со гира баасаад̣̇о лохабаасаад̣̇о вияа саманд̇аа жад̇уд̣̇ваарагодтагаяуд̇д̇зна баагаарзна баригкид̇д̇о. д̇зсу баажийнад̣̇ваарагодтагасса б̣ахи баасаад̣̇ажчааяааяам̣ баажийналогад̇хаад̇ум̣ ологзнд̇о бан̃н̃ад̇д̇з вараб̣уд̣̇д̇хаасанз нисинно ход̇и.
Bahi dvārakoṭṭhaketi pāsādadvārakoṭṭhakassa bahi, na vihāradvārakoṭṭhakassa. So kira pāsādo lohapāsādo viya samantā catudvārakoṭṭhakayuttena pākārena parikkhitto. Tesu pācīnadvārakoṭṭhakassa bahi pāsādacchāyāyaṃ pācīnalokadhātuṃ olokento paññatte varabuddhāsane nisinno hoti.
баруул̣хагажчанакаломаад̇и баруул̣хагажчаа баруул̣ханакаа баруул̣халомаа, гажчаад̣̇ийсу д̣̇ийгхаломаа д̣̇ийгханакаа жаад̇и ад̇т̇о. каарививид̇ханд̇и вивид̇хакаарим̣ наанаббагаарагам̣ баб̣б̣аж̇ид̇абаригкаарабхан̣д̣агам̣. авид̣̇уурз ад̇иггаманд̇ийд̇и авид̣̇уурамаг̇г̇зна наг̇арам̣ бависанд̇и. рааж̇аахам̣ , бханд̇зд̇и ахам̣, бханд̇з, рааж̇аа басзнад̣̇и госало, маяхам̣ наамам̣ д̇умхз ж̇аанаат̇аад̇и. гасмаа бана рааж̇аа логз аг̇г̇абуг̇г̇аласса санд̇игз нисинно зваруубаанам̣ наг̇г̇абхог̇г̇аниссиригаанам̣ ан̃ж̇алим̣ баг̇г̇ан̣хаад̇ийд̇и. сан̇г̇ан̣ханад̇т̇ааяа. звам̣ хисса ахоси – ‘‘сажаахам̣ зд̇д̇агамби зд̇зсам̣ на гариссаами , ‘маяам̣ буд̇д̇ад̣̇аарам̣ бахааяа зд̇ассад̇т̇ааяа д̣̇уб̣бхож̇анад̣̇угкасзяяаад̣̇ийни анубхома, аяам̣ амхаагам̣ ан̃ж̇алимад̇д̇амби на гарод̇ий’д̇и ад̇д̇анаа д̣̇идтам̣ суд̇ам̣ бадижчаад̣̇зд̇ваа на гат̇зяяум̣. звам̣ гад̇з бана аниг̇уухид̇ваа гат̇зссанд̇ий’’д̇и. д̇асмаа звамагааси. абижа сад̇т̇у аж̇жхаасаяаж̇аананад̇т̇ам̣ звамагааси.
Parūḷhakacchanakhalomāti parūḷhakacchā parūḷhanakhā parūḷhalomā, kacchādīsu dīghalomā dīghanakhā cāti attho. Khārivividhanti vividhakhāriṃ nānappakārakaṃ pabbajitaparikkhārabhaṇḍakaṃ. Avidūre atikkamantīti avidūramaggena nagaraṃ pavisanti. Rājāhaṃ, bhanteti ahaṃ, bhante, rājā pasenadi kosalo, mayhaṃ nāmaṃ tumhe jānāthāti. Kasmā pana rājā loke aggapuggalassa santike nisinno evarūpānaṃ naggabhogganissirikānaṃ añjaliṃ paggaṇhātīti. Saṅgaṇhanatthāya. Evaṃ hissa ahosi – ‘‘sacāhaṃ ettakampi etesaṃ na karissāmi , ‘mayaṃ puttadāraṃ pahāya etassatthāya dubbhojanadukkhaseyyādīni anubhoma, ayaṃ amhākaṃ añjalimattampi na karotī’ti attanā diṭṭhaṃ sutaṃ paṭicchādetvā na katheyyuṃ. Evaṃ kate pana anigūhitvā kathessantī’’ti. Tasmā evamakāsi. Apica satthu ajjhāsayajānanatthaṃ evamakāsi.
гаасигажанд̣̇ананд̇и сан̣хажанд̣̇анам̣. маалааг̇анд̇хавилзбананд̇и ван̣н̣аг̇анд̇хад̇т̇ааяа маалам̣, суг̇анд̇хабхаавад̇т̇ааяа г̇анд̇хам̣, ван̣н̣аг̇анд̇хад̇т̇ааяа вилзбанан̃жа д̇хаарзнд̇зна.
Kāsikacandananti saṇhacandanaṃ. Mālāgandhavilepananti vaṇṇagandhatthāya mālaṃ, sugandhabhāvatthāya gandhaṃ, vaṇṇagandhatthāya vilepanañca dhārentena.
сам̣ваасзнаад̇и сахаваасзна. сийлам̣ взд̣̇ид̇аб̣б̣анд̇и аяам̣ сусийло ваа д̣̇уссийло ваад̇и сам̣васанд̇зна убасан̇гаманд̇зна ж̇аанид̇аб̣б̣о. д̇ан̃жа ко д̣̇ийгхзна ад̣̇д̇хунаа на ид̇д̇аранд̇и д̇ан̃жа сийлам̣ д̣̇ийгхзна гаалзна взд̣̇ид̇аб̣б̣ам̣, на ид̇д̇арзна. д̣̇вийхад̇ийхан̃хи сам̣яад̇аагааро жа сам̣вуд̇инд̣̇рияаагааро жа на саггаа д̣̇ассзд̇ум̣. манасигарод̇аад̇и сийламасса бариг̇г̇ахзссаамийд̇и манасигаронд̇зна бажжавзгканд̇знзва саггаа ж̇аанид̇ум̣, на ид̇арзна. бан̃н̃авад̇аад̇и д̇амби саббан̃н̃знзва бан̣д̣ид̇зна. б̣аало хи манасигаронд̇оби ж̇аанид̇ум̣ на саггод̇и.
Saṃvāsenāti sahavāsena. Sīlaṃ veditabbanti ayaṃ susīlo vā dussīlo vāti saṃvasantena upasaṅkamantena jānitabbo. Tañca kho dīghena addhunā na ittaranti tañca sīlaṃ dīghena kālena veditabbaṃ, na ittarena. Dvīhatīhañhi saṃyatākāro ca saṃvutindriyākāro ca na sakkā dassetuṃ. Manasikarotāti sīlamassa pariggahessāmīti manasikarontena paccavekkhanteneva sakkā jānituṃ, na itarena. Paññavatāti tampi sappaññeneva paṇḍitena. Bālo hi manasikarontopi jānituṃ na sakkoti.
сам̣вохаарзнаад̇и гат̇анзна.
Saṃvohārenāti kathanena.
‘‘яо хи гожи мануссзсу, вохаарам̣ убаж̇ийвад̇и;
‘‘Yo hi koci manussesu, vohāraṃ upajīvati;
звам̣ ваасздта ж̇аанаахи, ваан̣иж̇о со на б̣раахман̣о’’д̇и. (ма. ни. 2.457) –
Evaṃ vāseṭṭha jānāhi, vāṇijo so na brāhmaṇo’’ti. (ma. ni. 2.457) –
зд̇т̇а хи б̣яавахааро вохааро наама. ‘‘жад̇д̇ааро арияавохаараа жад̇д̇ааро анарияавохаараа’’д̇и (д̣̇ий. ни. 3.313) зд̇т̇а жзд̇анаа. ‘‘сан̇каа саман̃н̃аа бан̃н̃ад̇д̇и вохааро’’д̇и (д̇ха. са. 1313-1315) зд̇т̇а бан̃н̃ад̇д̇и. ‘‘вохаарамад̇д̇зна со вохарзяяаа’’д̇и (сам̣. ни. 1.25) зд̇т̇а гат̇аа вохааро. ид̇хааби зсова ад̇хиббзд̇о. згажжасса хи саммукаа гат̇аа бараммукааяа гат̇ааяа на самзд̇и, бараммукаа гат̇аа жа саммукааяа гат̇ааяа, д̇ат̇аа буримагат̇аа жа бажчимагат̇ааяа, бажчимагат̇аа жа буримагат̇ааяа. со гат̇знд̇знзва саггаа ж̇аанид̇ум̣ ‘‘асужи зсо буг̇г̇ало’’д̇и. сужисийласса бана буримам̣ бажчимзна, бажчиман̃жа буримзна самзд̇и, саммукаагат̇ид̇ам̣ бараммукаагат̇ид̇зна, бараммукаагат̇ид̇ан̃жа саммукаагат̇ид̇зна, д̇асмаа гат̇знд̇зна саггаа сужибхааво ж̇аанид̇унд̇и багаасзнд̇о звамааха.
Ettha hi byavahāro vohāro nāma. ‘‘Cattāro ariyavohārā cattāro anariyavohārā’’ti (dī. ni. 3.313) ettha cetanā. ‘‘Saṅkhā samaññā paññatti vohāro’’ti (dha. sa. 1313-1315) ettha paññatti. ‘‘Vohāramattena so vohareyyā’’ti (saṃ. ni. 1.25) ettha kathā vohāro. Idhāpi esova adhippeto. Ekaccassa hi sammukhā kathā parammukhāya kathāya na sameti, parammukhā kathā ca sammukhāya kathāya, tathā purimakathā ca pacchimakathāya, pacchimakathā ca purimakathāya. So kathenteneva sakkā jānituṃ ‘‘asuci eso puggalo’’ti. Sucisīlassa pana purimaṃ pacchimena, pacchimañca purimena sameti, sammukhākathitaṃ parammukhākathitena, parammukhākathitañca sammukhākathitena, tasmā kathentena sakkā sucibhāvo jānitunti pakāsento evamāha.
т̇аамод̇и н̃аан̣ат̇аамо. яасса хи н̃аан̣ат̇аамо над̇т̇и, со уббаннзсу убад̣̇д̣̇авзсу г̇ахзд̇аб̣б̣аг̇г̇ахан̣ам̣ гад̇аб̣б̣агижжам̣ абассанд̇о ад̣̇ваарагхарам̣ бавидто вияа жарад̇и. д̇знааха аабад̣̇аасу ко, махаарааж̇а, т̇аамо взд̣̇ид̇аб̣б̣од̇и. саагажчааяаад̇и сам̣гат̇ааяа. д̣̇уббан̃н̃асса хи гат̇аа уд̣̇агз г̇зн̣д̣у вияа уббалавад̇и, бан̃н̃авад̇о гат̇знд̇асса бадибхаанам̣ ананд̇арам̣ ход̇и. уд̣̇агавибпанд̣̇ид̇знзва хи мажчо куд̣̇д̣̇аго ваа маханд̇о ваад̇и н̃ааяад̇и. ожарагаад̇и хздтаажарагаа. жараа хи баб̣б̣ад̇амад̇т̇агзна жаранд̇ааби хздтаа – жарагаава хонд̇и. ожарид̇ваад̇и аважарид̇ваа виймам̣сид̇ваа, д̇ам̣ д̇ам̣ бавад̇д̇им̣ н̃ад̇ваад̇и ад̇т̇о. раж̇ож̇алланд̇и раж̇ан̃жа ж̇аллан̃жа. ван̣н̣аруубзнаад̇и ван̣н̣асан̣таанзна. ид̇д̇арад̣̇ассанзнаад̇и лахугад̣̇ассанзна. вияан̃ж̇анзнаад̇и баригкаарабхан̣д̣агзна. бад̇ируубаго мад̇д̇игаагун̣д̣аловаад̇и суван̣н̣агун̣д̣алабад̇ируубаго мад̇д̇игаагун̣д̣алова. лохад̣дхамаасод̇и лохад̣дхамаасаго. батамам̣.
Thāmoti ñāṇathāmo. Yassa hi ñāṇathāmo natthi, so uppannesu upaddavesu gahetabbaggahaṇaṃ katabbakiccaṃ apassanto advāragharaṃ paviṭṭho viya carati. Tenāha āpadāsu kho, mahārāja, thāmo veditabboti. Sākacchāyāti saṃkathāya. Duppaññassa hi kathā udake geṇḍu viya uppalavati, paññavato kathentassa paṭibhānaṃ anantaraṃ hoti. Udakavipphanditeneva hi maccho khuddako vā mahanto vāti ñāyati. Ocarakāti heṭṭhācarakā. Carā hi pabbatamatthakena carantāpi heṭṭhā – carakāva honti. Ocaritvāti avacaritvā vīmaṃsitvā, taṃ taṃ pavattiṃ ñatvāti attho. Rajojallanti rajañca jallañca. Vaṇṇarūpenāti vaṇṇasaṇṭhānena. Ittaradassanenāti lahukadassanena. Viyañjanenāti parikkhārabhaṇḍakena. Patirūpako mattikākuṇḍalovāti suvaṇṇakuṇḍalapatirūpako mattikākuṇḍalova. Lohaḍḍhamāsoti lohaḍḍhamāsako. Paṭhamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 1. сад̇д̇аж̇адиласуд̇д̇ам̣ • 1. Sattajaṭilasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 1. сад̇д̇аж̇адиласуд̇д̇аван̣н̣анаа • 1. Sattajaṭilasuttavaṇṇanā
