| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೨. ದುತಿಯವಗ್ಗೋ
2. Dutiyavaggo
೧. ಸತ್ತಜಟಿಲಸುತ್ತವಣ್ಣನಾ
1. Sattajaṭilasuttavaṇṇanā
೧೨೨. ಪುಬ್ಬಾರಾಮಸಙ್ಖಾತೇತಿ ಸಾವತ್ಥಿನಗರಸ್ಸ ಪುಬ್ಬದಿಸಾಯ ಕತತ್ತಾ ಪುಬ್ಬಾರಾಮೇತಿ ಸಙ್ಖಂ ಗತೇ। ತತ್ರಾತಿ ‘‘ಮಿಗಾರಮಾತುಯಾ ಪಾಸಾದೇ’’ತಿ ತಸ್ಮಿಂ ಸಂಖಿತ್ತವಚನೇ। ಅಯಂ ಇದಾನಿ ವುಚ್ಚಮಾನಾ ಅನುಪುಬ್ಬಿಕಥಾ ಆದಿತೋ ಪಟ್ಠಾಯ ಅನುಕ್ಕಮಕಥಾ। ಪತ್ಥನಂ ಅಕಾಸಿ ತಸ್ಸ ಭಗವತೋ ಅಗ್ಗುಪಟ್ಠಾಯಿಕಂ ಏಕಂ ಉಪಾಸಿಕಂ ದಿಸ್ವಾ ತಂ ಠಾನನ್ತರಂ ಆಕಙ್ಖನ್ತೀ। ಮೇಣ್ಡಕಪುತ್ತಸ್ಸಾತಿ ಮೇಣ್ಡಕಸೇಟ್ಠಿಪುತ್ತಸ್ಸ। ಮಾತಿಟ್ಠಾನೇ ಠಪೇಸಿ ತಸ್ಸಾ ಉಪಕಾರಂ ಗರುಭಾವಞ್ಚ ದಿಸ್ವಾ। ತಾಯ ಕಾರಿತೇ ಪಾಸಾದೇತಿ ತಾಯ ಮಹಾಉಪಾಸಿಕಾಯ ಮಹಾಲತಾಪಸಾಧನಂ ವಿಸ್ಸಜ್ಜೇತ್ವಾ ನವಹಿ ಕೋಟೀಹಿ ಕರೀಸಮತ್ತೇ ಭೂಮಿಭಾಗೇ ಕಾರಿತೇ ಸಹಸ್ಸಗಬ್ಭಪಟಿಮಣ್ಡಿತೇ ಪಾಸಾದೇ।
122.Pubbārāmasaṅkhāteti sāvatthinagarassa pubbadisāya katattā pubbārāmeti saṅkhaṃ gate. Tatrāti ‘‘migāramātuyā pāsāde’’ti tasmiṃ saṃkhittavacane. Ayaṃ idāni vuccamānā anupubbikathā ādito paṭṭhāya anukkamakathā. Patthanaṃ akāsi tassa bhagavato aggupaṭṭhāyikaṃ ekaṃ upāsikaṃ disvā taṃ ṭhānantaraṃ ākaṅkhantī. Meṇḍakaputtassāti meṇḍakaseṭṭhiputtassa. Mātiṭṭhāneṭhapesi tassā upakāraṃ garubhāvañca disvā. Tāya kārite pāsādeti tāya mahāupāsikāya mahālatāpasādhanaṃ vissajjetvā navahi koṭīhi karīsamatte bhūmibhāge kārite sahassagabbhapaṭimaṇḍite pāsāde.
ಪರೂಳ್ಹಕಚ್ಛಾತಿ ಪರೂಳ್ಹಕಚ್ಛಲೋಮಾ। ಕಮಣ್ಡಲುಘಟಿಕಾದಿಂ ಪಬ್ಬಜಿತಪರಿಕ್ಖಾರಂ। ನಗ್ಗಭೋಗ್ಗನಿಸ್ಸಿರಿಕಾನನ್ತಿ ನಗ್ಗಾನಞ್ಚೇವ ಭೋಗ್ಗಾನಞ್ಚ ನಿಸ್ಸಿರಿಕಾನಞ್ಚ। ತೇ ಹಿ ಅನಿವತ್ಥವತ್ಥತಾಯ ನಗ್ಗಾ ಚೇವ, ಅಚೇಲಕವತಾದಿನಾ ಭೋಗ್ಗಸರೀರತಾಯ ಭೋಗ್ಗಾ, ಸೋಭಾರಹಿತತಾಯ ನಿಸ್ಸಿರಿಕಾ ಚ। ಅತ್ತನಾ ದಿಟ್ಠಸುತಂ ಪಟಿಚ್ಛಾದೇತ್ವಾ ನ ಕಥೇಯ್ಯುನ್ತಿ ಅಕಾರಣಮೇತಂ ತೇಸಂ ರಞ್ಞಾ ಪಯುತ್ತಚರಪುರಿಸಭಾವತೋ। ಏವಂ ಕತೇ ಪನ ತೇ ‘‘ಅಞ್ಞೇಪಿ ಪಬ್ಬಜಿತಾ ಅತ್ಥೀತಿ ಅಯಂ ಜಾನಾತೀ’’ತಿ ಮಞ್ಞೇಯ್ಯುನ್ತಿ ಕೋಹಞ್ಞಚಿತ್ತೋ ಏವಂ ಅಕಾಸೀತಿ ಸಕ್ಕಾ ವಿಞ್ಞಾತುಂ। ತಥಾ ಹಿ ತೇನತ್ಥೇನ ಅಪರಿತೋಸಮಾನೋ ‘‘ಅಪಿಚಾ’’ತಿಆದಿಮಾಹ।
Parūḷhakacchāti parūḷhakacchalomā. Kamaṇḍalughaṭikādiṃ pabbajitaparikkhāraṃ. Naggabhogganissirikānanti naggānañceva bhoggānañca nissirikānañca. Te hi anivatthavatthatāya naggā ceva, acelakavatādinā bhoggasarīratāya bhoggā, sobhārahitatāya nissirikā ca. Attanā diṭṭhasutaṃpaṭicchādetvā na katheyyunti akāraṇametaṃ tesaṃ raññā payuttacarapurisabhāvato. Evaṃ kate pana te ‘‘aññepi pabbajitā atthīti ayaṃ jānātī’’ti maññeyyunti kohaññacitto evaṃ akāsīti sakkā viññātuṃ. Tathā hi tenatthena aparitosamāno ‘‘apicā’’tiādimāha.
ಕಾಸಿಕಚನ್ದನನ್ತಿ ಉಜ್ಜಲಚನ್ದನಂ। ತಂ ಕಿರ ವಣ್ಣವಸೇನ ಸಮುಜ್ಜಲಂ ಹೋತಿ ಪಭಸ್ಸರಂ, ತದತ್ಥಮೇವ ನಂ ಸಣ್ಹತರಂ ಕರೋನ್ತಿ। ತೇನಾಹ ‘‘ಕಾಸಿಕಚನ್ದನನ್ತಿ ಸಣ್ಹಚನ್ದನ’’ನ್ತಿ। ವಣ್ಣಗನ್ಧತ್ಥಾಯಾತಿ ವಣ್ಣಸೋಭತ್ಥಞ್ಚೇವ ಸುಗನ್ಧಭಾವತ್ಥಞ್ಚ। ವಣ್ಣಗನ್ಧತ್ಥಾಯಾತಿ ಛವಿರಾಗಕರಣತ್ಥಞ್ಚೇವ ಸುಗನ್ಧತ್ಥಾಯ ಚ। ‘‘ಗಿಹಿನಾ’’ತಿಆದೀಹಿ ಪದೇಹಿ ಏವಂ ಪಮಾದವಿಹಾರಿನಾ ತಯಾ ಅರಹನ್ತೋ ದುವಿಞ್ಞೇಯ್ಯಾತಿ ದಸ್ಸೇತಿ।
Kāsikacandananti ujjalacandanaṃ. Taṃ kira vaṇṇavasena samujjalaṃ hoti pabhassaraṃ, tadatthameva naṃ saṇhataraṃ karonti. Tenāha ‘‘kāsikacandananti saṇhacandana’’nti. Vaṇṇagandhatthāyāti vaṇṇasobhatthañceva sugandhabhāvatthañca. Vaṇṇagandhatthāyāti chavirāgakaraṇatthañceva sugandhatthāya ca. ‘‘Gihinā’’tiādīhi padehi evaṃ pamādavihārinā tayā arahanto duviññeyyāti dasseti.
ಸಂವಾಸೋ ನಾಮ ಇಧ ಕಾಲೇನ ಉಪಸಙ್ಕಮನನ್ತಿ ದಸ್ಸೇನ್ತೋ ‘‘ಉಪಸಙ್ಕಮನ್ತೇನಾ’’ತಿ ಆಹ। ಕಾಯವಾಚಾಹಿ ಅಸಂಯತೇನಪಿ ಸಂಯತಾಕಾರೋ, ಅಸಂವುತಿನ್ದ್ರಿಯೇನಪಿ ಸಂವುತಿನ್ದ್ರಿಯಾಕಾರೋ। ಪರಿಗ್ಗಹೇಸ್ಸಾಮೀತಿ ವೀಮಂಸಿಸ್ಸಾಮಿ ‘‘ಪರಿಸುದ್ಧಂ ನು ಖೋ, ನೋ’’ತಿ। ಸಪ್ಪಞ್ಞೇನಾತಿ ಸೀಲಪರಿಗ್ಗಣ್ಹನಪಞ್ಞಾಯ ಸಪ್ಪಞ್ಞೇನ। ಜಾನಿತುಂ ನ ಸಕ್ಕೋತಿ ಸಭಾವಸ್ಸ ಸತೋ ಸೀಲಸ್ಸ ಅನುಪಧಾರಣತೋ।
Saṃvāso nāma idha kālena upasaṅkamananti dassento ‘‘upasaṅkamantenā’’ti āha. Kāyavācāhi asaṃyatenapi saṃyatākāro, asaṃvutindriyenapi saṃvutindriyākāro. Pariggahessāmīti vīmaṃsissāmi ‘‘parisuddhaṃ nu kho, no’’ti. Sappaññenāti sīlapariggaṇhanapaññāya sappaññena. Jānituṃ na sakkoti sabhāvassa sato sīlassa anupadhāraṇato.
ಕಥನೇನಾತಿ ಅಪರಾಪರಂ ಕಥನೇನ। ತಥಾ ಹಿ ವಕ್ಖತಿ ‘‘ಏಕಚ್ಚಸ್ಸ ಹೀ’’ತಿಆದಿ। ಅರಿಯವೋಹಾರೋತಿ ದಿಟ್ಠಾದಿಲಕ್ಖಣೇನ ವೋಹರಿತೋ ‘‘ದಿಟ್ಠಂ ಅದಿಟ್ಠ’’ನ್ತಿಆದಿನಾ ಪವುತ್ತಸದ್ದವೋಹಾರೋ। ತಸ್ಸ ಪನ ಕಾರಣಮೇವ ಗಣ್ಹನ್ತೋ ‘‘ಏತ್ಥ ಚೇತನಾ’’ತಿ ಆಹ। ಏಸ ನಯೋ ಅನರಿಯವೋಹಾರೇಪಿ। ಪರಮತ್ಥತೋ ಹಿ ಸಚ್ಚವಾಚಾದಯೋ ಮುಸಾವಾದಾದಯೋ ಚೇತನಾಲಕ್ಖಣಾತಿ। ಪಞ್ಞತ್ತಿವೋಹಾರೋ ತಥಾ ತಥಾ ವೋಹರಿತಬ್ಬತೋ ಏವಮಾಹ ‘‘ಸಂವೋಹಾರೇನ ಖೋ, ಮಹಾರಾಜ, ಸೋಚೇಯ್ಯಂ ವೇದಿತಬ್ಬ’’ನ್ತಿ।
Kathanenāti aparāparaṃ kathanena. Tathā hi vakkhati ‘‘ekaccassa hī’’tiādi. Ariyavohāroti diṭṭhādilakkhaṇena voharito ‘‘diṭṭhaṃ adiṭṭha’’ntiādinā pavuttasaddavohāro. Tassa pana kāraṇameva gaṇhanto ‘‘ettha cetanā’’ti āha. Esa nayo anariyavohārepi. Paramatthato hi saccavācādayo musāvādādayo cetanālakkhaṇāti. Paññattivohāro tathā tathā voharitabbato evamāha ‘‘saṃvohārena kho, mahārāja, soceyyaṃ veditabba’’nti.
ಞಾಣಥಾಮೋತಿ ಞಾಣಗುಣಬಲಂ, ಯೇನ ಠಾನುಪ್ಪತ್ತಿಕಪಟಿಭಾನಾದಿನಾ ಅಚ್ಚಾಯಿಕಕಿಚ್ಚಕರಣೀಯಾನಿ ನಿಟ್ಠಾಪೇತಿ। ಸಂಕಥಾಯಾತಿ ಅತ್ಥವೀಮಂಸನವಸೇನ ಪವತ್ತಾಯ ಸಮ್ಮಾಕಥಾಯ। ಉಪ್ಪಿಲವತಿ ಲಹುಕಭಾವತೋ। ಹೇಟ್ಠಾಚರಕಾತಿ ಅವಚರಕಾ। ಯೇ ಅನುಪವಿಸಿತ್ವಾ ಪರೇಸಂ ರಹಸ್ಸವೀಮಂಸನವಸೇನ ಪವತ್ತಾ, ತೇಸು ಓಚರಕವೋಹಾರೋತಿ ವುತ್ತಂ ‘‘ಚರಾ ಹೀ’’ತಿಆದಿ।
Ñāṇathāmoti ñāṇaguṇabalaṃ, yena ṭhānuppattikapaṭibhānādinā accāyikakiccakaraṇīyāni niṭṭhāpeti. Saṃkathāyāti atthavīmaṃsanavasena pavattāya sammākathāya. Uppilavati lahukabhāvato. Heṭṭhācarakāti avacarakā. Ye anupavisitvā paresaṃ rahassavīmaṃsanavasena pavattā, tesu ocarakavohāroti vuttaṃ ‘‘carā hī’’tiādi.
ವಣ್ಣಸಣ್ಠಾನೇನಾತಿ ವಣ್ಣೇನ ವಾ ಸಣ್ಠಾನೇನ ವಾ ವಣ್ಣಪೋಕ್ಖರತಾಯ ವಾ ಸಣ್ಠಾನಸಮ್ಪತ್ತಿಯಾ ವಾ। ಸುಜಾನೋ ಪೇಸಲೋ ವಿಸ್ಸಸೇತಿ ಯೋಜನಾ। ಲಹುಕದಸ್ಸನೇನಾತಿ ಪರಿತ್ತದಸ್ಸನೇನ ವಿಜ್ಜುಕೇನ ವಿಯ। ಪರಿಕ್ಖಾರಭಣ್ಡಕೇನಾತಿ ಪಬ್ಬಜಿತಪರಿಕ್ಖಾರಭೂತೇನ ಭಣ್ಡಕೇನ। ಲೋಹಡ್ಢಮಾಸೋತಿ ಲೋಹಮಯೋ ಉಪಡ್ಢಗ್ಘನಕಮಾಸೋ।
Vaṇṇasaṇṭhānenāti vaṇṇena vā saṇṭhānena vā vaṇṇapokkharatāya vā saṇṭhānasampattiyā vā. Sujāno pesalo vissaseti yojanā. Lahukadassanenāti parittadassanena vijjukena viya. Parikkhārabhaṇḍakenāti pabbajitaparikkhārabhūtena bhaṇḍakena. Lohaḍḍhamāsoti lohamayo upaḍḍhagghanakamāso.
ಸತ್ತಜಟಿಲಸುತ್ತವಣ್ಣನಾ ನಿಟ್ಠಿತಾ।
Sattajaṭilasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ಸತ್ತಜಟಿಲಸುತ್ತಂ • 1. Sattajaṭilasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧. ಸತ್ತಜಟಿಲಸುತ್ತವಣ್ಣನಾ • 1. Sattajaṭilasuttavaṇṇanā
