| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. සත්‌තකම්‌මසුත්‌තං
3. Sattakammasuttaṃ
203. ‘‘අසප්‌පුරිසඤ්‌ච වො, භික්‌ඛවෙ, දෙසෙස්‌සාමි, අසප්‌පුරිසෙන අසප්‌පුරිසතරඤ්‌ච ; සප්‌පුරිසඤ්‌ච, සප්‌පුරිසෙන සප්‌පුරිසතරඤ්‌ච. තං සුණාථ…පෙ.….
203. ‘‘Asappurisañca vo, bhikkhave, desessāmi, asappurisena asappurisatarañca ; sappurisañca, sappurisena sappurisatarañca. Taṃ suṇātha…pe….
‘‘කතමො ච, භික්‌ඛවෙ, අසප්‌පුරිසො? ඉධ, භික්‌ඛවෙ, එකච්‌චො පාණාතිපාතී හොති, අදින්‌නාදායී හොති, කාමෙසුමිච්‌ඡාචාරී හොති, මුසාවාදී හොති, පිසුණවාචො හොති, ඵරුසවාචො හොති, සම්‌ඵප්‌පලාපී හොති. අයං වුච්‌චති, භික්‌ඛවෙ, අසප්‌පුරිසො.
‘‘Katamo ca, bhikkhave, asappuriso? Idha, bhikkhave, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti. Ayaṃ vuccati, bhikkhave, asappuriso.
‘‘කතමො ච, භික්‌ඛවෙ, අසප්‌පුරිසෙන අසප්‌පුරිසතරො? ඉධ, භික්‌ඛවෙ, එකච්‌චො අත්‌තනා ච පාණාතිපාතී හොති, පරඤ්‌ච පාණාතිපාතෙ සමාදපෙති; අත්‌තනා ච අදින්‌නාදායී හොති, පරඤ්‌ච අදින්‌නාදානෙ සමාදපෙති; අත්‌තනා ච කාමෙසුමිච්‌ඡාචාරී හොති, පරඤ්‌ච කාමෙසුමිච්‌ඡාචාරෙ සමාදපෙති; අත්‌තනා ච මුසාවාදී හොති, පරඤ්‌ච මුසාවාදෙ සමාදපෙති; අත්‌තනා ච පිසුණවාචො හොති, පරඤ්‌ච පිසුණාය වාචාය සමාදපෙති; අත්‌තනා ච ඵරුසවාචො හොති, පරඤ්‌ච ඵරුසාය වාචාය සමාදපෙති; අත්‌තනා ච සම්‌ඵප්‌පලාපී හොති, පරඤ්‌ච සම්‌ඵප්‌පලාපෙ සමාදපෙති. අයං වුච්‌චති, භික්‌ඛවෙ, අසප්‌පුරිසෙන අසප්‌පුරිසතරො.
‘‘Katamo ca, bhikkhave, asappurisena asappurisataro? Idha, bhikkhave, ekacco attanā ca pāṇātipātī hoti, parañca pāṇātipāte samādapeti; attanā ca adinnādāyī hoti, parañca adinnādāne samādapeti; attanā ca kāmesumicchācārī hoti, parañca kāmesumicchācāre samādapeti; attanā ca musāvādī hoti, parañca musāvāde samādapeti; attanā ca pisuṇavāco hoti, parañca pisuṇāya vācāya samādapeti; attanā ca pharusavāco hoti, parañca pharusāya vācāya samādapeti; attanā ca samphappalāpī hoti, parañca samphappalāpe samādapeti. Ayaṃ vuccati, bhikkhave, asappurisena asappurisataro.
‘‘කතමො ච, භික්‌ඛවෙ, සප්‌පුරිසො? ඉධ, භික්‌ඛවෙ, එකච්‌චො පාණාතිපාතා පටිවිරතො හොති, අදින්‌නාදානා පටිවිරතො හොති, කාමෙසුමිච්‌ඡාචාරා පටිවිරතො හොති, මුසාවාදා පටිවිරතො හොති, පිසුණාය වාචාය පටිවිරතො හොති, ඵරුසාය වාචාය පටිවිරතො, හොති, සම්‌ඵප්‌පලාපා පටිවිරතො හොති. අයං වුච්‌චති, භික්‌ඛවෙ, සප්‌පුරිසො.
‘‘Katamo ca, bhikkhave, sappuriso? Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato, hoti, samphappalāpā paṭivirato hoti. Ayaṃ vuccati, bhikkhave, sappuriso.
‘‘කතමො ච, භික්‌ඛවෙ, සප්‌පුරිසෙන සප්‌පුරිසතරො? ඉධ භික්‌ඛවෙ, එකච්‌චො අත්‌තනා ච පාණාතිපාතා පටිවිරතො හොති, පරඤ්‌ච පාණාතිපාතා වෙරමණියා සමාදපෙති; අත්‌තනා ච අදින්‌නාදානා පටිවිරතො හොති, පරඤ්‌ච අදින්‌නාදානා වෙරමණියා සමාදපෙති; අත්‌තනා ච කාමෙසුමිච්‌ඡාචාරා පටිවිරතො හොති, පරඤ්‌ච කාමෙසුමිච්‌ඡාචාරා වෙරමණියා සමාදපෙති; අත්‌තනා ච මුසාවාදා පටිවිරතො හොති, පරඤ්‌ච මුසාවාදා වෙරමණියා සමාදපෙති; අත්‌තනා ච පිසුණාය වාචාය පටිවිරතො හොති, පරඤ්‌ච පිසුණාය වාචාය වෙරමණියා සමාදපෙති; අත්‌තනා ච ඵරුසාය වාචාය පටිවිරතො හොති, පරඤ්‌ච ඵරුසාය වාචාය වෙරමණියා සමාදපෙති; අත්‌තනා ච සම්‌ඵප්‌පලාපා පටිවිරතො හොති, පරඤ්‌ච සම්‌ඵප්‌පලාපා වෙරමණියා සමාදපෙති. අයං වුච්‌චති, භික්‌ඛවෙ, සප්‌පුරිසෙන සප්‌පුරිසතරො’’ති. තතියං.
‘‘Katamo ca, bhikkhave, sappurisena sappurisataro? Idha bhikkhave, ekacco attanā ca pāṇātipātā paṭivirato hoti, parañca pāṇātipātā veramaṇiyā samādapeti; attanā ca adinnādānā paṭivirato hoti, parañca adinnādānā veramaṇiyā samādapeti; attanā ca kāmesumicchācārā paṭivirato hoti, parañca kāmesumicchācārā veramaṇiyā samādapeti; attanā ca musāvādā paṭivirato hoti, parañca musāvādā veramaṇiyā samādapeti; attanā ca pisuṇāya vācāya paṭivirato hoti, parañca pisuṇāya vācāya veramaṇiyā samādapeti; attanā ca pharusāya vācāya paṭivirato hoti, parañca pharusāya vācāya veramaṇiyā samādapeti; attanā ca samphappalāpā paṭivirato hoti, parañca samphappalāpā veramaṇiyā samādapeti. Ayaṃ vuccati, bhikkhave, sappurisena sappurisataro’’ti. Tatiyaṃ.
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. සික්‌ඛාපදසුත්‌තාදිවණ්‌ණනා • 1-10. Sikkhāpadasuttādivaṇṇanā
