| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
(7.) ஸத்தகனித்³தே³ஸாதி³வண்ணனா
(7.) Sattakaniddesādivaṇṇanā
806. ஸத்தவிதே⁴ன ஞாணவத்து²னித்³தே³ஸே ஜாதிபச்சயா ஜராமரணந்திஆதி³னா நயேன பவத்தினிவத்திவஸேன ஏகாத³ஸஸு படிச்சஸமுப்பாத³ங்கே³ஸு ஏகேகஸ்மிங் காலத்தயபே⁴த³தோ பச்சவெக்க²ணஞாணங் வத்வா புன ‘‘யம்பிஸ்ஸ தங் த⁴ம்மட்டி²திஞாண’’ந்தி ஏவங் ததே³வ ஞாணங் ஸங்கே²பதோ க²யத⁴ம்மதாதீ³ஹி பகாரேஹி வுத்தங். தத்த² ஜாதிபச்சயா ஜராமரணங், அஸதி ஜாதியா நத்தி² ஜராமரணந்தி ஞாணத்³வயங் பச்சுப்பன்னத்³தா⁴னவஸேன வுத்தங். அதீதம்பி அத்³தா⁴னங், அனாக³தம்பி அத்³தா⁴னந்தி ஏவங் அதீதே ஞாணத்³வயங், அனாக³தே ஞாணத்³வயந்தி ச². தானி த⁴ம்மட்டி²திஞாணேன ஸத்³தி⁴ங் ஸத்த. தத்த² த⁴ம்மட்டி²திஞாணந்தி பச்சயாகாரஞாணங். பச்சயாகாரோ ஹி த⁴ம்மானங் பவத்திட்டி²திகாரணத்தா த⁴ம்மட்டி²தீதி வுச்சதி; தத்த² ஞாணங் த⁴ம்மட்டி²திஞாணங். ஏதஸ்ஸேவ ச²ப்³பி³த⁴ஸ்ஸ ஞாணஸ்ஸேதங் அதி⁴வசனங். ஏவங் ஏகேகஸ்மிங் அங்கே³ இமானி ஸத்த ஸத்த கத்வா ஏகாத³ஸஸு அங்கே³ஸு ஸத்தஸத்ததி ஹொந்தி. தத்த² க²யத⁴ம்மந்தி க²யக³மனஸபா⁴வங். வயத⁴ம்மந்தி வயக³மனஸபா⁴வங். விராக³த⁴ம்மந்தி விரஜ்ஜனஸபா⁴வங். நிரோத⁴த⁴ம்மந்தி நிருஜ்ஜ²னஸபா⁴வங். இமினா கிங் கதி²தங்? அபரவிபஸ்ஸனாய புரிமவிபஸ்ஸனாஸம்மஸனங் கதி²தங். தேன கிங் கதி²தங் ஹோதி? ஸத்தக்க²த்துங் விபஸ்ஸனாபடிவிபஸ்ஸனா கதி²தா. பட²மஞாணேன ஹி ஸப்³ப³ஸங்கா²ரே அனிச்சா து³க்கா² அனத்தாதி தி³ஸ்வா தங் ஞாணங் து³தியேன த³ட்டு²ங் வட்டதி, து³தியங் ததியேன, ததியங் சதுத்தே²ன, சதுத்த²ங் பஞ்சமேன, பஞ்சமங் ச²ட்டே²ன, ச²ட்ட²ங் ஸத்தமேன. ஏவங் ஸத்த விபஸ்ஸனாபடிவிபஸ்ஸனா கதி²தா ஹொந்தீதி.
806. Sattavidhena ñāṇavatthuniddese jātipaccayā jarāmaraṇantiādinā nayena pavattinivattivasena ekādasasu paṭiccasamuppādaṅgesu ekekasmiṃ kālattayabhedato paccavekkhaṇañāṇaṃ vatvā puna ‘‘yampissa taṃ dhammaṭṭhitiñāṇa’’nti evaṃ tadeva ñāṇaṃ saṅkhepato khayadhammatādīhi pakārehi vuttaṃ. Tattha jātipaccayā jarāmaraṇaṃ, asati jātiyā natthi jarāmaraṇanti ñāṇadvayaṃ paccuppannaddhānavasena vuttaṃ. Atītampi addhānaṃ, anāgatampi addhānanti evaṃ atīte ñāṇadvayaṃ, anāgate ñāṇadvayanti cha. Tāni dhammaṭṭhitiñāṇena saddhiṃ satta. Tattha dhammaṭṭhitiñāṇanti paccayākārañāṇaṃ. Paccayākāro hi dhammānaṃ pavattiṭṭhitikāraṇattā dhammaṭṭhitīti vuccati; tattha ñāṇaṃ dhammaṭṭhitiñāṇaṃ. Etasseva chabbidhassa ñāṇassetaṃ adhivacanaṃ. Evaṃ ekekasmiṃ aṅge imāni satta satta katvā ekādasasu aṅgesu sattasattati honti. Tattha khayadhammanti khayagamanasabhāvaṃ. Vayadhammanti vayagamanasabhāvaṃ. Virāgadhammanti virajjanasabhāvaṃ. Nirodhadhammanti nirujjhanasabhāvaṃ. Iminā kiṃ kathitaṃ? Aparavipassanāya purimavipassanāsammasanaṃ kathitaṃ. Tena kiṃ kathitaṃ hoti? Sattakkhattuṃ vipassanāpaṭivipassanā kathitā. Paṭhamañāṇena hi sabbasaṅkhāre aniccā dukkhā anattāti disvā taṃ ñāṇaṃ dutiyena daṭṭhuṃ vaṭṭati, dutiyaṃ tatiyena, tatiyaṃ catutthena, catutthaṃ pañcamena, pañcamaṃ chaṭṭhena, chaṭṭhaṃ sattamena. Evaṃ satta vipassanāpaṭivipassanā kathitā hontīti.
ஸத்தகனித்³தே³ஸவண்ணனா.
Sattakaniddesavaṇṇanā.
807. அட்ட²விதே⁴ன ஞாணவத்து²னித்³தே³ஸே ஸோதாபத்திமக்³கே³ பஞ்ஞாதி ஸோதாபத்திமக்³க³ம்ஹி பஞ்ஞா. இமினா ஸம்பயுத்தபஞ்ஞாவ கதி²தா. ஸேஸபதே³ஸுபி ஏஸேவ நயோதி.
807. Aṭṭhavidhena ñāṇavatthuniddese sotāpattimagge paññāti sotāpattimaggamhi paññā. Iminā sampayuttapaññāva kathitā. Sesapadesupi eseva nayoti.
அட்ட²கனித்³தே³ஸவண்ணனா.
Aṭṭhakaniddesavaṇṇanā.
808. நவவிதே⁴ன ஞாணவத்து²னித்³தே³ஸே அனுபுப்³ப³விஹாரஸமாபத்தீஸூதி அனுபுப்³ப³விஹாரஸங்கா²தாஸு ஸமாபத்தீஸு. தாஸங் அனுபுப்³பே³ன அனுபடிபாடியா விஹாரிதப்³ப³ட்டே²ன அனுபுப்³ப³விஹாரதா, ஸமாபஜ்ஜிதப்³ப³ட்டே²ன ஸமாபத்திதா த³ட்ட²ப்³பா³. தத்த² பட²மஜ்ஜா²னஸமாபத்தியா பஞ்ஞாதிஆத³யோ அட்ட² ஸம்பயுத்தபஞ்ஞா வேதி³தப்³பா³ . நவமா பச்சவெக்க²ணபஞ்ஞா. ஸா ஹி நிரோத⁴ஸமாபத்திங் ஸந்ததோ பணீததோ பச்சவெக்க²மானஸ்ஸ பவத்ததி. தேன வுத்தங் – ‘‘ஸஞ்ஞாவேத³யிதனிரோத⁴ஸமாபத்தியா வுட்டி²தஸ்ஸ பச்சவெக்க²ணஞாண’’ந்தி.
808. Navavidhena ñāṇavatthuniddese anupubbavihārasamāpattīsūti anupubbavihārasaṅkhātāsu samāpattīsu. Tāsaṃ anupubbena anupaṭipāṭiyā vihāritabbaṭṭhena anupubbavihāratā, samāpajjitabbaṭṭhena samāpattitā daṭṭhabbā. Tattha paṭhamajjhānasamāpattiyā paññātiādayo aṭṭha sampayuttapaññā veditabbā . Navamā paccavekkhaṇapaññā. Sā hi nirodhasamāpattiṃ santato paṇītato paccavekkhamānassa pavattati. Tena vuttaṃ – ‘‘saññāvedayitanirodhasamāpattiyā vuṭṭhitassa paccavekkhaṇañāṇa’’nti.
நவகனித்³தே³ஸவண்ணனா.
Navakaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 16. ஞாணவிப⁴ங்கோ³ • 16. Ñāṇavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 16. ஞாணவிப⁴ங்கோ³ • 16. Ñāṇavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 16. ஞாணவிப⁴ங்கோ³ • 16. Ñāṇavibhaṅgo
