| Library / Tipiṭaka / तिपिटक • Tipiṭaka / सम्मोहविनोदनी-अट्ठकथा • Sammohavinodanī-aṭṭhakathā |
(७.) सत्तकनिद्देसवण्णना
(7.) Sattakaniddesavaṇṇanā
९४९. सत्तकनिद्देसे थामगतट्ठेन अप्पहीनट्ठेन च अनुसेन्तीति अनुसया। वट्टस्मिं सत्ते संयोजेन्ति घटेन्तीति संयोजनानि। समुदाचारवसेन परियुट्ठहन्तीति परियुट्ठानानि। कामरागोव परियुट्ठानं कामरागपरियुट्ठानं। सेसेसुपि एसेव नयो।
949. Sattakaniddese thāmagataṭṭhena appahīnaṭṭhena ca anusentīti anusayā. Vaṭṭasmiṃ satte saṃyojenti ghaṭentīti saṃyojanāni. Samudācāravasena pariyuṭṭhahantīti pariyuṭṭhānāni. Kāmarāgova pariyuṭṭhānaṃ kāmarāgapariyuṭṭhānaṃ. Sesesupi eseva nayo.
९५०. असतं धम्मा, लामकट्ठेन वा असन्ता धम्माति असद्धम्मा। रागादीहि दोसेहि दुट्ठानि चरितानीति दुच्चरितानि। तेन तेनाकारेन मञ्ञन्तीति माना।
950. Asataṃ dhammā, lāmakaṭṭhena vā asantā dhammāti asaddhammā. Rāgādīhi dosehi duṭṭhāni caritānīti duccaritāni. Tena tenākārena maññantīti mānā.
९५१. दिट्ठिनिद्देसे रूपीति रूपवा। चातुमहाभूतिकोति चतुमहाभूतमयो। मातापितूनं एतन्ति मातापेत्तिकं। किन्तं? सुक्कसोणितं। मातापेत्तिके सम्भूतो जातोति मातापेत्तिकसम्भवो। इध रूपकायसीसेन मनुस्सत्तभावं अत्ताति वदति। दुतियो तं पटिक्खिपित्वा दिब्बत्तभावं वदति। दिब्बोति देवलोके सम्भूतो। कामावचरोति छकामावचरदेवपरियापन्नो । कबळीकारं भक्खयतीति कबळीकारभक्खो। मनोमयोति झानमनेन निब्बत्तो। सब्बङ्गपच्चङ्गीति सब्बङ्गपच्चङ्गयुत्तो। अहीनिन्द्रियोति परिपुण्णिन्द्रियो; यानि ब्रह्मलोके अत्थि तेसं वसेन, इतरेसञ्च सण्ठानवसेनेतं वुत्तं। आकासानञ्चायतनूपगोति आकासानञ्चायतनभावं उपगतो। इतरेसुपि एसेव नयो। सेसं सब्बत्थ उत्तानत्थमेवाति।
951. Diṭṭhiniddese rūpīti rūpavā. Cātumahābhūtikoti catumahābhūtamayo. Mātāpitūnaṃ etanti mātāpettikaṃ. Kintaṃ? Sukkasoṇitaṃ. Mātāpettike sambhūto jātoti mātāpettikasambhavo. Idha rūpakāyasīsena manussattabhāvaṃ attāti vadati. Dutiyo taṃ paṭikkhipitvā dibbattabhāvaṃ vadati. Dibboti devaloke sambhūto. Kāmāvacaroti chakāmāvacaradevapariyāpanno . Kabaḷīkāraṃ bhakkhayatīti kabaḷīkārabhakkho. Manomayoti jhānamanena nibbatto. Sabbaṅgapaccaṅgīti sabbaṅgapaccaṅgayutto. Ahīnindriyoti paripuṇṇindriyo; yāni brahmaloke atthi tesaṃ vasena, itaresañca saṇṭhānavasenetaṃ vuttaṃ. Ākāsānañcāyatanūpagoti ākāsānañcāyatanabhāvaṃ upagato. Itaresupi eseva nayo. Sesaṃ sabbattha uttānatthamevāti.
सत्तकनिद्देसवण्णना।
Sattakaniddesavaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / विभङ्गपाळि • Vibhaṅgapāḷi / १७. खुद्दकवत्थुविभङ्गो • 17. Khuddakavatthuvibhaṅgo
टीका • Tīkā / अभिधम्मपिटक (टीका) • Abhidhammapiṭaka (ṭīkā) / विभङ्ग-मूलटीका • Vibhaṅga-mūlaṭīkā / १७. खुद्दकवत्थुविभङ्गो • 17. Khuddakavatthuvibhaṅgo
