| Library / Tipiṭaka / တိပိဋက • Tipiṭaka / ပဉ္စပကရဏ-မူလဋီကာ • Pañcapakaraṇa-mūlaṭīkā |
၇. သတ္တကနိဒ္ဒေသဝဏ္ဏနာ
7. Sattakaniddesavaṇṇanā
၂၀၃. သဒ္ဓာ နာမ သာဓုလဒ္ဓိကာတိ ဥမ္မုဇ္ဇတီတိ ဧတေန ကုသလေသု ဓမ္မေသု အန္တောဂဓာ, ဗောဓိပက္ခိယဓမ္မေသု ဝာ အဓိမောက္ခဘူတာ သဒ္ဓာ သာဓူတိ ဥမ္မုဇ္ဇမာနံ ကုသလံ ဒသ္သေတိ, ဧဝံ ဟိရီယာဒီသု စ။ ကုသလေသု ဓမ္မေသူတိ ဧတ္ထ ဘုမ္မနိဒ္ဒေသော တဒန္တောဂဓတာယ တဒုပကာရတာယ ဝာ ဝေဒိတဗ္ဗော။ ဧတ္ထ စ ဥမ္မုဇ္ဇတိ သာဟု သဒ္ဓာ ကုသလေသု ဓမ္မေသူတိအာဒိနာ သဒ္ဓာဒီနံ ဥမ္မုဇ္ဇနပညာယ သဒ္ဓာဒီနံ ဥပ္ပတ္တိံ ဒသ္သေတိ။ တေနေဝ ‘‘တသ္သ သာ သဒ္ဓာ နေဝ တိဋ္ဌတီ’’တိအာဒိ ဝုတ္တံ။ ‘‘သာဟု သဒ္ဓာ ကုသလေသု ဓမ္မေသူ’’တိ ဝာ ဥမ္မုဇ္ဇနသ္သ ဥပကာရကံ အာနိသံသဒသ္သနံ ဝတ္ဝာ ‘‘ဥမ္မုဇ္ဇတီ’’တိ ဧတေန သဒ္ဓာသင္ခာတမေဝ ဥမ္မုဇ္ဇနံ ဒသ္သိတန္တိ ဝေဒိတဗ္ဗံ။ စင္ကဝာရေတိ ရဇကာနံ ခာရပရိသာဝနေ။ ဧကကမ္မနိဗ္ဗတ္တာ ပဋိသန္ဓိဘဝင္ဂစုတိသန္တတိ ဧကော စိတ္တဝာရောတိ စုတိတော အနန္တရော ယထာဂဟိတော ဒုတိယော ဟောတီတိ အာဟ ‘‘ဒုတိယစိတ္တဝာရေနာ’’တိ။ ဥမ္မုဇ္ဇိတ္ဝာ ဌိတာဒယော စတ္တာရော တာယ တာယ ဇာတိယာ အရဟတ္တံ အသစ္ဆိကရောန္တာ အနေကေ ပုဂ္ဂလာ ဝေဒိတဗ္ဗာ, သစ္ဆိကရောန္တော ပန ဧကောပိ ပုဗ္ဗဘာဂေ တတိယပုဂ္ဂလာဒိဘာဝံ အာပဇ္ဇိတ္ဝာ အန္တေ သတ္တမပုဂ္ဂလော ဟောတီတိ။
203. Saddhānāma sādhuladdhikāti ummujjatīti etena kusalesu dhammesu antogadhā, bodhipakkhiyadhammesu vā adhimokkhabhūtā saddhā sādhūti ummujjamānaṃ kusalaṃ dasseti, evaṃ hirīyādīsu ca. Kusalesu dhammesūti ettha bhummaniddeso tadantogadhatāya tadupakāratāya vā veditabbo. Ettha ca ummujjati sāhu saddhā kusalesu dhammesūtiādinā saddhādīnaṃ ummujjanapaññāya saddhādīnaṃ uppattiṃ dasseti. Teneva ‘‘tassa sā saddhā neva tiṭṭhatī’’tiādi vuttaṃ. ‘‘Sāhu saddhā kusalesu dhammesū’’ti vā ummujjanassa upakārakaṃ ānisaṃsadassanaṃ vatvā ‘‘ummujjatī’’ti etena saddhāsaṅkhātameva ummujjanaṃ dassitanti veditabbaṃ. Caṅkavāreti rajakānaṃ khāraparisāvane. Ekakammanibbattā paṭisandhibhavaṅgacutisantati eko cittavāroti cutito anantaro yathāgahito dutiyo hotīti āha ‘‘dutiyacittavārenā’’ti. Ummujjitvā ṭhitādayo cattāro tāya tāya jātiyā arahattaṃ asacchikarontā aneke puggalā veditabbā, sacchikaronto pana ekopi pubbabhāge tatiyapuggalādibhāvaṃ āpajjitvā ante sattamapuggalo hotīti.
သတ္တကနိဒ္ဒေသဝဏ္ဏနာ နိဋ္ဌိတာ။
Sattakaniddesavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ပုဂ္ဂလပညတ္တိပာဠိ • Puggalapaññattipāḷi / ၇. သတ္တကပုဂ္ဂလပညတ္တိ • 7. Sattakapuggalapaññatti
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၇. သတ္တကနိဒ္ဒေသဝဏ္ဏနာ • 7. Sattakaniddesavaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၇. သတ္တကနိဒ္ဒေသဝဏ္ဏနာ • 7. Sattakaniddesavaṇṇanā
