| Library / Tipiṭaka / ತಿಪಿಟಕ • Tipiṭaka / ಸಮ್ಮೋಹವಿನೋದನೀ-ಅಟ್ಠಕಥಾ • Sammohavinodanī-aṭṭhakathā |
(೭.) ಸತ್ತಕನಿದ್ದೇಸವಣ್ಣನಾ
(7.) Sattakaniddesavaṇṇanā
೯೪೯. ಸತ್ತಕನಿದ್ದೇಸೇ ಥಾಮಗತಟ್ಠೇನ ಅಪ್ಪಹೀನಟ್ಠೇನ ಚ ಅನುಸೇನ್ತೀತಿ ಅನುಸಯಾ। ವಟ್ಟಸ್ಮಿಂ ಸತ್ತೇ ಸಂಯೋಜೇನ್ತಿ ಘಟೇನ್ತೀತಿ ಸಂಯೋಜನಾನಿ। ಸಮುದಾಚಾರವಸೇನ ಪರಿಯುಟ್ಠಹನ್ತೀತಿ ಪರಿಯುಟ್ಠಾನಾನಿ। ಕಾಮರಾಗೋವ ಪರಿಯುಟ್ಠಾನಂ ಕಾಮರಾಗಪರಿಯುಟ್ಠಾನಂ। ಸೇಸೇಸುಪಿ ಏಸೇವ ನಯೋ।
949. Sattakaniddese thāmagataṭṭhena appahīnaṭṭhena ca anusentīti anusayā. Vaṭṭasmiṃ satte saṃyojenti ghaṭentīti saṃyojanāni. Samudācāravasena pariyuṭṭhahantīti pariyuṭṭhānāni. Kāmarāgova pariyuṭṭhānaṃ kāmarāgapariyuṭṭhānaṃ. Sesesupi eseva nayo.
೯೫೦. ಅಸತಂ ಧಮ್ಮಾ, ಲಾಮಕಟ್ಠೇನ ವಾ ಅಸನ್ತಾ ಧಮ್ಮಾತಿ ಅಸದ್ಧಮ್ಮಾ। ರಾಗಾದೀಹಿ ದೋಸೇಹಿ ದುಟ್ಠಾನಿ ಚರಿತಾನೀತಿ ದುಚ್ಚರಿತಾನಿ। ತೇನ ತೇನಾಕಾರೇನ ಮಞ್ಞನ್ತೀತಿ ಮಾನಾ।
950. Asataṃ dhammā, lāmakaṭṭhena vā asantā dhammāti asaddhammā. Rāgādīhi dosehi duṭṭhāni caritānīti duccaritāni. Tena tenākārena maññantīti mānā.
೯೫೧. ದಿಟ್ಠಿನಿದ್ದೇಸೇ ರೂಪೀತಿ ರೂಪವಾ। ಚಾತುಮಹಾಭೂತಿಕೋತಿ ಚತುಮಹಾಭೂತಮಯೋ। ಮಾತಾಪಿತೂನಂ ಏತನ್ತಿ ಮಾತಾಪೇತ್ತಿಕಂ। ಕಿನ್ತಂ? ಸುಕ್ಕಸೋಣಿತಂ। ಮಾತಾಪೇತ್ತಿಕೇ ಸಮ್ಭೂತೋ ಜಾತೋತಿ ಮಾತಾಪೇತ್ತಿಕಸಮ್ಭವೋ। ಇಧ ರೂಪಕಾಯಸೀಸೇನ ಮನುಸ್ಸತ್ತಭಾವಂ ಅತ್ತಾತಿ ವದತಿ। ದುತಿಯೋ ತಂ ಪಟಿಕ್ಖಿಪಿತ್ವಾ ದಿಬ್ಬತ್ತಭಾವಂ ವದತಿ। ದಿಬ್ಬೋತಿ ದೇವಲೋಕೇ ಸಮ್ಭೂತೋ। ಕಾಮಾವಚರೋತಿ ಛಕಾಮಾವಚರದೇವಪರಿಯಾಪನ್ನೋ । ಕಬಳೀಕಾರಂ ಭಕ್ಖಯತೀತಿ ಕಬಳೀಕಾರಭಕ್ಖೋ। ಮನೋಮಯೋತಿ ಝಾನಮನೇನ ನಿಬ್ಬತ್ತೋ। ಸಬ್ಬಙ್ಗಪಚ್ಚಙ್ಗೀತಿ ಸಬ್ಬಙ್ಗಪಚ್ಚಙ್ಗಯುತ್ತೋ। ಅಹೀನಿನ್ದ್ರಿಯೋತಿ ಪರಿಪುಣ್ಣಿನ್ದ್ರಿಯೋ; ಯಾನಿ ಬ್ರಹ್ಮಲೋಕೇ ಅತ್ಥಿ ತೇಸಂ ವಸೇನ, ಇತರೇಸಞ್ಚ ಸಣ್ಠಾನವಸೇನೇತಂ ವುತ್ತಂ। ಆಕಾಸಾನಞ್ಚಾಯತನೂಪಗೋತಿ ಆಕಾಸಾನಞ್ಚಾಯತನಭಾವಂ ಉಪಗತೋ। ಇತರೇಸುಪಿ ಏಸೇವ ನಯೋ। ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ।
951. Diṭṭhiniddese rūpīti rūpavā. Cātumahābhūtikoti catumahābhūtamayo. Mātāpitūnaṃ etanti mātāpettikaṃ. Kintaṃ? Sukkasoṇitaṃ. Mātāpettike sambhūto jātoti mātāpettikasambhavo. Idha rūpakāyasīsena manussattabhāvaṃ attāti vadati. Dutiyo taṃ paṭikkhipitvā dibbattabhāvaṃ vadati. Dibboti devaloke sambhūto. Kāmāvacaroti chakāmāvacaradevapariyāpanno . Kabaḷīkāraṃ bhakkhayatīti kabaḷīkārabhakkho. Manomayoti jhānamanena nibbatto. Sabbaṅgapaccaṅgīti sabbaṅgapaccaṅgayutto. Ahīnindriyoti paripuṇṇindriyo; yāni brahmaloke atthi tesaṃ vasena, itaresañca saṇṭhānavasenetaṃ vuttaṃ. Ākāsānañcāyatanūpagoti ākāsānañcāyatanabhāvaṃ upagato. Itaresupi eseva nayo. Sesaṃ sabbattha uttānatthamevāti.
ಸತ್ತಕನಿದ್ದೇಸವಣ್ಣನಾ।
Sattakaniddesavaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ವಿಭಙ್ಗಪಾಳಿ • Vibhaṅgapāḷi / ೧೭. ಖುದ್ದಕವತ್ಥುವಿಭಙ್ಗೋ • 17. Khuddakavatthuvibhaṅgo
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ವಿಭಙ್ಗ-ಮೂಲಟೀಕಾ • Vibhaṅga-mūlaṭīkā / ೧೭. ಖುದ್ದಕವತ್ಥುವಿಭಙ್ಗೋ • 17. Khuddakavatthuvibhaṅgo
