| Library / Tipiṭaka / තිපිටක • Tipiṭaka / සම්‌මොහවිනොදනී-අට්‌ඨකථා • Sammohavinodanī-aṭṭhakathā |
(7.) සත්‌තකනිද්‌දෙසවණ්‌ණනා
(7.) Sattakaniddesavaṇṇanā
949. සත්‌තකනිද්‌දෙසෙ ථාමගතට්‌ඨෙන අප්‌පහීනට්‌ඨෙන ච අනුසෙන්‌තීති අනුසයා. වට්‌ටස්‌මිං සත්‌තෙ සංයොජෙන්‌ති ඝටෙන්‌තීති සංයොජනානි. සමුදාචාරවසෙන පරියුට්‌ඨහන්‌තීති පරියුට්‌ඨානානි. කාමරාගොව පරියුට්‌ඨානං කාමරාගපරියුට්‌ඨානං. සෙසෙසුපි එසෙව නයො.
949. Sattakaniddese thāmagataṭṭhena appahīnaṭṭhena ca anusentīti anusayā. Vaṭṭasmiṃ satte saṃyojenti ghaṭentīti saṃyojanāni. Samudācāravasena pariyuṭṭhahantīti pariyuṭṭhānāni. Kāmarāgova pariyuṭṭhānaṃ kāmarāgapariyuṭṭhānaṃ. Sesesupi eseva nayo.
950. අසතං ධම්‌මා, ලාමකට්‌ඨෙන වා අසන්‌තා ධම්‌මාති අසද්‌ධම්‌මා. රාගාදීහි දොසෙහි දුට්‌ඨානි චරිතානීති දුච්‌චරිතානි. තෙන තෙනාකාරෙන මඤ්‌ඤන්‌තීති මානා.
950. Asataṃ dhammā, lāmakaṭṭhena vā asantā dhammāti asaddhammā. Rāgādīhi dosehi duṭṭhāni caritānīti duccaritāni. Tena tenākārena maññantīti mānā.
951. දිට්‌ඨිනිද්‌දෙසෙ රූපීති රූපවා. චාතුමහාභූතිකොති චතුමහාභූතමයො. මාතාපිතූනං එතන්‌ති මාතාපෙත්‌තිකං. කින්‌තං? සුක්‌කසොණිතං. මාතාපෙත්‌තිකෙ සම්‌භූතො ජාතොති මාතාපෙත්‌තිකසම්‌භවො. ඉධ රූපකායසීසෙන මනුස්‌සත්‌තභාවං අත්‌තාති වදති. දුතියො තං පටික්‌ඛිපිත්‌වා දිබ්‌බත්‌තභාවං වදති. දිබ්‌බොති දෙවලොකෙ සම්‌භූතො. කාමාවචරොති ඡකාමාවචරදෙවපරියාපන්‌නො . කබළීකාරං භක්‌ඛයතීති කබළීකාරභක්‌ඛො. මනොමයොති ඣානමනෙන නිබ්‌බත්‌තො. සබ්‌බඞ්‌ගපච්‌චඞ්‌ගීති සබ්‌බඞ්‌ගපච්‌චඞ්‌ගයුත්‌තො. අහීනින්‌ද්‍රියොති පරිපුණ්‌ණින්‌ද්‍රියො; යානි බ්‍රහ්‌මලොකෙ අත්‌ථි තෙසං වසෙන, ඉතරෙසඤ්‌ච සණ්‌ඨානවසෙනෙතං වුත්‌තං. ආකාසානඤ්‌චායතනූපගොති ආකාසානඤ්‌චායතනභාවං උපගතො. ඉතරෙසුපි එසෙව නයො. සෙසං සබ්‌බත්‌ථ උත්‌තානත්‌ථමෙවාති.
951. Diṭṭhiniddese rūpīti rūpavā. Cātumahābhūtikoti catumahābhūtamayo. Mātāpitūnaṃ etanti mātāpettikaṃ. Kintaṃ? Sukkasoṇitaṃ. Mātāpettike sambhūto jātoti mātāpettikasambhavo. Idha rūpakāyasīsena manussattabhāvaṃ attāti vadati. Dutiyo taṃ paṭikkhipitvā dibbattabhāvaṃ vadati. Dibboti devaloke sambhūto. Kāmāvacaroti chakāmāvacaradevapariyāpanno . Kabaḷīkāraṃ bhakkhayatīti kabaḷīkārabhakkho. Manomayoti jhānamanena nibbatto. Sabbaṅgapaccaṅgīti sabbaṅgapaccaṅgayutto. Ahīnindriyoti paripuṇṇindriyo; yāni brahmaloke atthi tesaṃ vasena, itaresañca saṇṭhānavasenetaṃ vuttaṃ. Ākāsānañcāyatanūpagoti ākāsānañcāyatanabhāvaṃ upagato. Itaresupi eseva nayo. Sesaṃ sabbattha uttānatthamevāti.
සත්‌තකනිද්‌දෙසවණ්‌ණනා.
Sattakaniddesavaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / විභඞ්‌ගපාළි • Vibhaṅgapāḷi / 17. ඛුද්‌දකවත්‌ථුවිභඞ්‌ගො • 17. Khuddakavatthuvibhaṅgo
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / විභඞ්‌ග-මූලටීකා • Vibhaṅga-mūlaṭīkā / 17. ඛුද්‌දකවත්‌ථුවිභඞ්‌ගො • 17. Khuddakavatthuvibhaṅgo
