| Library / Tipiṭaka / තිපිටක • Tipiṭaka / පුග්‌ගලපඤ්‌ඤත්‌තිපාළි • Puggalapaññattipāḷi |
7. සත්‌තකපුග්‌ගලපඤ්‌ඤත්‌ති
7. Sattakapuggalapaññatti
203. කථඤ්‌ච පුග්‌ගලො සකිං නිමුග්‌ගො නිමුග්‌ගොව හොති? ඉධෙකච්‌චො පුග්‌ගලො සමන්‌නාගතො හොති එකන්‌තකාළකෙහි අකුසලෙහි ධම්‌මෙහි. එවං පුග්‌ගලො සකිං නිමුග්‌ගො නිමුග්‌ගොව හොති.
203. Kathañca puggalo sakiṃ nimuggo nimuggova hoti? Idhekacco puggalo samannāgato hoti ekantakāḷakehi akusalehi dhammehi. Evaṃ puggalo sakiṃ nimuggo nimuggova hoti.
කථඤ්‌ච පුග්‌ගලො උම්‌මුජ්‌ජිත්‌වා නිමුජ්‌ජති? ඉධෙකච්‌චො පුග්‌ගලො උම්‌මුජ්‌ජති ‘‘සාහු සද්‌ධා කුසලෙසු ධම්‌මෙසු, සාධු 1 හිරී කුසලෙසු ධම්‌මෙසු, සාධු ඔත්‌තප්‌පං කුසලෙසු ධම්‌මෙසු, සාධු වීරියං 2 කුසලෙසු ධම්‌මෙසු, සාධු පඤ්‌ඤා කුසලෙසු ධම්‌මෙසූ’’ති. තස්‌ස සා සද්‌ධා නෙව තිට්‌ඨති නො වඩ්‌ඪති හායතියෙව , තස්‌ස සා හිරී නෙව තිට්‌ඨති නො වඩ්‌ඪති හායතියෙව, තස්‌ස තං ඔත්‌තප්‌පං නෙව තිට්‌ඨති නො වඩ්‌ඪති හායතියෙව, තස්‌ස තං වීරියං නෙව තිට්‌ඨති නො වඩ්‌ඪති හායතියෙව, තස්‌ස සා පඤ්‌ඤා නෙව තිට්‌ඨති නො වඩ්‌ඪති හායතියෙව. එවං පුග්‌ගලො උම්‌මුජ්‌ජිත්‌වා නිමුජ්‌ජති.
Kathañca puggalo ummujjitvā nimujjati? Idhekacco puggalo ummujjati ‘‘sāhu saddhā kusalesu dhammesu, sādhu 3 hirī kusalesu dhammesu, sādhu ottappaṃ kusalesu dhammesu, sādhu vīriyaṃ 4 kusalesu dhammesu, sādhu paññā kusalesu dhammesū’’ti. Tassa sā saddhā neva tiṭṭhati no vaḍḍhati hāyatiyeva , tassa sā hirī neva tiṭṭhati no vaḍḍhati hāyatiyeva, tassa taṃ ottappaṃ neva tiṭṭhati no vaḍḍhati hāyatiyeva, tassa taṃ vīriyaṃ neva tiṭṭhati no vaḍḍhati hāyatiyeva, tassa sā paññā neva tiṭṭhati no vaḍḍhati hāyatiyeva. Evaṃ puggalo ummujjitvā nimujjati.
කථඤ්‌ච පුග්‌ගලො උම්‌මුජ්‌ජිත්‌වා ඨිතො හොති? ඉධෙකච්‌චො පුග්‌ගලො උම්‌මුජ්‌ජති ‘‘සාහු සද්‌ධා කුසලෙසු ධම්‌මෙසු, සාධු හිරී කුසලෙසු ධම්‌මෙසු, සාධු ඔත්‌තප්‌පං කුසලෙසු ධම්‌මෙසු, සාධු වීරියං කුසලෙසු ධම්‌මෙසු, සාධු පඤ්‌ඤා කුසලෙසු ධම්‌මෙසූ’’ති. තස්‌ස සා සද්‌ධා නෙව හායති නො වඩ්‌ඪති ඨිතා හොති, තස්‌ස සා හිරී නෙව හායති නො වඩ්‌ඪති ඨිතා හොති, තස්‌ස තං ඔත්‌තප්‌පං නෙව හායති නො වඩ්‌ඪති ඨිතං හොති, තස්‌ස තං වීරියං නෙව හායති නො වඩ්‌ඪති ඨිතං හොති, තස්‌ස සා පඤ්‌ඤා නෙව හායති නො වඩ්‌ඪති ඨිතා හොති. එවං පුග්‌ගලො උම්‌මුජ්‌ජිත්‌වා ඨිතො හොති.
Kathañca puggalo ummujjitvā ṭhito hoti? Idhekacco puggalo ummujjati ‘‘sāhu saddhā kusalesu dhammesu, sādhu hirī kusalesu dhammesu, sādhu ottappaṃ kusalesu dhammesu, sādhu vīriyaṃ kusalesu dhammesu, sādhu paññā kusalesu dhammesū’’ti. Tassa sā saddhā neva hāyati no vaḍḍhati ṭhitā hoti, tassa sā hirī neva hāyati no vaḍḍhati ṭhitā hoti, tassa taṃ ottappaṃ neva hāyati no vaḍḍhati ṭhitaṃ hoti, tassa taṃ vīriyaṃ neva hāyati no vaḍḍhati ṭhitaṃ hoti, tassa sā paññā neva hāyati no vaḍḍhati ṭhitā hoti. Evaṃ puggalo ummujjitvā ṭhito hoti.
කථඤ්‌ච පුග්‌ගලො උම්‌මුජ්‌ජිත්‌වා විපස්‌සති විලොකෙති? ඉධෙකච්‌චො පුග්‌ගලො උම්‌මුජ්‌ජති ‘‘සාහු සද්‌ධා කුසලෙසු ධම්‌මෙසු, සාධු හිරී කුසලෙසු ධම්‌මෙසු, සාධු ඔත්‌තප්‌පං කුසලෙසු ධම්‌මෙසු, සාධු වීරියං කුසලෙසු ධම්‌මෙසු, සාධු පඤ්‌ඤා කුසලෙසු ධම්‌මෙසූ’’ති. සො තිණ්‌ණං සංයොජනානං පරික්‌ඛයා සොතාපන්‌නො හොති අවිනිපාතධම්‌මො නියතො සම්‌බොධිපරායනො. එවං පුග්‌ගලො උම්‌මුජ්‌ජිත්‌වා විපස්‌සති විලොකෙති.
Kathañca puggalo ummujjitvā vipassati viloketi? Idhekacco puggalo ummujjati ‘‘sāhu saddhā kusalesu dhammesu, sādhu hirī kusalesu dhammesu, sādhu ottappaṃ kusalesu dhammesu, sādhu vīriyaṃ kusalesu dhammesu, sādhu paññā kusalesu dhammesū’’ti. So tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyano. Evaṃ puggalo ummujjitvā vipassati viloketi.
කථඤ්‌ච පුග්‌ගලො උම්‌මුජ්‌ජිත්‌වා පතරති? ඉධෙකච්‌චො පුග්‌ගලො උම්‌මුජ්‌ජති ‘‘සාහු සද්‌ධා කුසලෙසු ධම්‌මෙසු, සාධු හිරී කුසලෙසු ධම්‌මෙසු, සාධු ඔත්‌තප්‌පං කුසලෙසු ධම්‌මෙසු, සාධු වීරියං කුසලෙසු ධම්‌මෙසු, සාධු පඤ්‌ඤා කුසලෙසු ධම්‌මෙසූ’’ති. සො තිණ්‌ණං සංයොජනානං පරික්‌ඛයා රාගදොසමොහානං තනුත්‌තා සකදාගාමී හොති සකිදෙව ඉමං ලොකං ආගන්‌ත්‌වා දුක්‌ඛස්‌සන්‌තකරො හොති. එවං පුග්‌ගලො උම්‌මුජ්‌ජිත්‌වා පතරති.
Kathañca puggalo ummujjitvā patarati? Idhekacco puggalo ummujjati ‘‘sāhu saddhā kusalesu dhammesu, sādhu hirī kusalesu dhammesu, sādhu ottappaṃ kusalesu dhammesu, sādhu vīriyaṃ kusalesu dhammesu, sādhu paññā kusalesu dhammesū’’ti. So tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmī hoti sakideva imaṃ lokaṃ āgantvā dukkhassantakaro hoti. Evaṃ puggalo ummujjitvā patarati.
කථඤ්‌ච පුග්‌ගලො උම්‌මුජ්‌ජිත්‌වා පතිගාධප්‌පත්‌තො හොති? ඉධෙකච්‌චො පුග්‌ගලො උම්‌මුජ්‌ජති ‘‘සාහු සද්‌ධා කුසලෙසු ධම්‌මෙසු, සාධු හිරී කුසලෙසු ධම්‌මෙසු, සාධු ඔත්‌තප්‌පං කුසලෙසු ධම්‌මෙසු, සාධු වීරියං කුසලෙසු ධම්‌මෙසු, සාධු පඤ්‌ඤා කුසලෙසු ධම්‌මෙසූ’’ති. සො පඤ්‌චන්‌නං ඔරම්‌භාගියානං සංයොජනානං පරික්‌ඛයා ඔපපාතිකො හොති තත්‌ථ පරිනිබ්‌බායී අනාවත්‌තිධම්‌මො තස්‌මා ලොකා. එවං පුග්‌ගලො උම්‌මුජ්‌ජිත්‌වා පතිගාධප්‌පත්‌තො හොති.
Kathañca puggalo ummujjitvā patigādhappatto hoti? Idhekacco puggalo ummujjati ‘‘sāhu saddhā kusalesu dhammesu, sādhu hirī kusalesu dhammesu, sādhu ottappaṃ kusalesu dhammesu, sādhu vīriyaṃ kusalesu dhammesu, sādhu paññā kusalesu dhammesū’’ti. So pañcannaṃ orambhāgiyānaṃ saṃyojanānaṃ parikkhayā opapātiko hoti tattha parinibbāyī anāvattidhammo tasmā lokā. Evaṃ puggalo ummujjitvā patigādhappatto hoti.
කථඤ්‌ච පුග්‌ගලො උම්‌මුජ්‌ජිත්‌වා තිණ්‌ණො හොති පාරඞ්‌ගතො ථලෙ තිට්‌ඨති බ්‍රාහ්‌මණො? ඉධෙකච්‌චො පුග්‌ගලො උම්‌මුජ්‌ජති ‘‘සාහු සද්‌ධා කුසලෙසු ධම්‌මෙසු , සාධු හිරී කුසලෙසු ධම්‌මෙසු, සාධු ඔත්‌තප්‌පං කුසලෙසු ධම්‌මෙසු, සාධු වීරියං කුසලෙසු ධම්‌මෙසු, සාධු පඤ්‌ඤා කුසලෙසු ධම්‌මෙසූ’’ති. සො ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. එවං පුග්‌ගලො උම්‌මුජ්‌ජිත්‌වා තිණ්‌ණො හොති පාරඞ්‌ගතො ථලෙ තිට්‌ඨති බ්‍රාහ්‌මණො.
Kathañca puggalo ummujjitvā tiṇṇo hoti pāraṅgato thale tiṭṭhati brāhmaṇo? Idhekacco puggalo ummujjati ‘‘sāhu saddhā kusalesu dhammesu , sādhu hirī kusalesu dhammesu, sādhu ottappaṃ kusalesu dhammesu, sādhu vīriyaṃ kusalesu dhammesu, sādhu paññā kusalesu dhammesū’’ti. So āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ puggalo ummujjitvā tiṇṇo hoti pāraṅgato thale tiṭṭhati brāhmaṇo.
204. කතමො ච පුග්‌ගලො උභතොභාගවිමුත්‌තො? ඉධෙකච්‌චො පුග්‌ගලො අට්‌ඨ විමොක්‌ඛෙ කායෙන ඵුසිත්‌වා විහරති පඤ්‌ඤාය චස්‌ස දිස්‌වා ආසවා පරික්‌ඛීණා හොන්‌ති. අයං වුච්‌චති පුග්‌ගලො උභතොභාගවිමුත්‌තො.
204. Katamo ca puggalo ubhatobhāgavimutto? Idhekacco puggalo aṭṭha vimokkhe kāyena phusitvā viharati paññāya cassa disvā āsavā parikkhīṇā honti. Ayaṃ vuccati puggalo ubhatobhāgavimutto.
205. කතමො ච පුග්‌ගලො පඤ්‌ඤාවිමුත්‌තො…පෙ.… කායසක්‌ඛී… දිට්‌ඨිප්‌පත්‌තො… සද්‌ධාවිමුත්‌තො… ධම්‌මානුසාරී ….
205. Katamo ca puggalo paññāvimutto…pe… kāyasakkhī… diṭṭhippatto… saddhāvimutto… dhammānusārī ….
206. කතමො ච පුග්‌ගලො සද්‌ධානුසාරී? යස්‌ස පුග්‌ගලස්‌ස සොතාපත්‌තිඵලසච්‌ඡිකිරියාය පටිපන්‌නස්‌ස සද්‌ධින්‌ද්‍රියං අධිමත්‌තං හොති, සද්‌ධාවාහිං සද්‌ධාපුබ්‌බඞ්‌ගමං අරියමග්‌ගං භාවෙති. අයං වුච්‌චති පුග්‌ගලො සද්‌ධානුසාරී. සොතාපත්‌තිඵලසච්‌ඡිකිරියාය පටිපන්‌නො පුග්‌ගලො සද්‌ධානුසාරී, ඵලෙ ඨිතො සද්‌ධාවිමුත්‌තොති.
206. Katamo ca puggalo saddhānusārī? Yassa puggalassa sotāpattiphalasacchikiriyāya paṭipannassa saddhindriyaṃ adhimattaṃ hoti, saddhāvāhiṃ saddhāpubbaṅgamaṃ ariyamaggaṃ bhāveti. Ayaṃ vuccati puggalo saddhānusārī. Sotāpattiphalasacchikiriyāya paṭipanno puggalo saddhānusārī, phale ṭhito saddhāvimuttoti.
සත්‌තකනිද්‌දෙසො.
Sattakaniddeso.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 7. සත්‌තකනිද්‌දෙසවණ්‌ණනා • 7. Sattakaniddesavaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 7. සත්‌තකනිද්‌දෙසවණ්‌ණනා • 7. Sattakaniddesavaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 7. සත්‌තකනිද්‌දෙසවණ්‌ණනා • 7. Sattakaniddesavaṇṇanā
