ஸத்தகவாரவண்ணனா

327. ஸத்தகேஸு – ஸத்த ஸாமீசியோதி புப்³பே³ வுத்தேஸு ச²ஸு ‘‘ஸா ச பி⁴க்கு²னீ அனப்³பி⁴தா, தா ச பி⁴க்கு²னியோ கா³ரய்ஹா, அயங் தத்த² ஸாமீசீ’’தி இமங் பக்கி²பித்வா ஸத்த வேதி³தப்³பா³. ஸத்த அத⁴ம்மிகா படிஞ்ஞாதகரணாதி ‘‘பி⁴க்கு² பாராஜிகங் அஜ்ஜா²பன்னோ ஹோதி, பாராஜிகேன சோதி³யமானோ ‘ஸங்கா⁴தி³ஸேஸங் அஜ்ஜா²பன்னொம்ஹீ’தி படிஜானாதி, தங் ஸங்கோ⁴ ஸங்கா⁴தி³ஸேஸேன காரேதி, அத⁴ம்மிகங் படிஞ்ஞாதகரண’’ந்தி ஏவங் ஸமத²க்க²ந்த⁴கே நித்³தி³ட்டா². த⁴ம்மிகாபி தத்தே²வ நித்³தி³ட்டா². ஸத்தன்னங் அனாபத்தி ஸத்தாஹகரணீயேன க³ந்துந்தி வஸ்ஸூபனாயிகக்க²ந்த⁴கே வுத்தங் . ஸத்தானிஸங்ஸா வினயத⁴ரேதி ‘‘தஸ்ஸாதெ⁴ய்யோ உபோஸதோ² பவாரணா’’தி இமேஹி ஸத்³தி⁴ங் பஞ்சகே வுத்தா பஞ்ச ஸத்த ஹொந்தி. ஸத்த பரமானீதி ச²க்கே வுத்தானியேவ ஸத்தகவஸேன யோஜேதப்³பா³னி. கதசீவரந்திஆதீ³னி த்³வே ஸத்தகானி கதி²னக்க²ந்த⁴கே நித்³தி³ட்டா²னி.

பி⁴க்கு²ஸ்ஸ ந ஹோதி ஆபத்தி த³ட்ட²ப்³பா³, பி⁴க்கு²ஸ்ஸ ஹோதி ஆபத்தி த³ட்ட²ப்³பா³, பி⁴க்கு²ஸ்ஸ ஹோதி ஆபத்தி படிகாதப்³பா³தி இமானி தீணி ஸத்தகானி, த்³வே அத⁴ம்மிகானி, ஏகங் த⁴ம்மிகங்; தானி தீணிபி சம்பெய்யகே நித்³தி³ட்டா²னி. அஸத்³த⁴ம்மாதி அஸதங் த⁴ம்மா, அஸந்தோ வா த⁴ம்மா; அஸோப⁴னா ஹீனா லாமகாதி அத்தோ². ஸத்³த⁴ம்மாதி ஸதங் பு³த்³தா⁴தீ³னங் த⁴ம்மா; ஸந்தோ வா த⁴ம்மா ஸுந்த³ரா உத்தமாதி அத்தோ². ஸேஸங் ஸப்³ப³த்த² உத்தானமேவாதி.

ஸத்தகவாரவண்ணனா நிட்டி²தா.