| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஸத்தகவாரவண்ணனா
Sattakavāravaṇṇanā
327. ஸத்தகேஸு ச²க்கே வுத்தானியேவ ஸத்தகவஸேன யோஜேதப்³பா³னீதி ச²க்கே வுத்தசுத்³த³ஸபரமானி த்³விதா⁴ கத்வா த்³வின்னங் ஸத்தகானங் வஸேன யோஜேதப்³பா³னி.
327. Sattakesu chakke vuttāniyeva sattakavasena yojetabbānīti chakke vuttacuddasaparamāni dvidhā katvā dvinnaṃ sattakānaṃ vasena yojetabbāni.
ஆபத்திங் ஜானாதீதி ஆபத்திங்யேவ ‘‘ஆபத்தீ’’தி ஜானாதி. ஸேஸபதே³ஸுபி ஏஸேவ நயோ. ஆபி⁴சேதஸிகானந்தி எத்த² (ம॰ நி॰ அட்ட²॰ 1.66) அபி⁴சேதோதி பாகதிககாமாவசரசித்தேஹி ஸுந்த³ரதாய படிபக்க²தோ விஸுத்³த⁴த்தா ச அபி⁴க்கந்தங் விஸுத்³த⁴சித்தங் வுச்சதி, உபசாரஜ்ஜா²னசித்தஸ்ஸேதங் அதி⁴வசனங். அபி⁴சேதஸி ஜாதானி ஆபி⁴சேதஸிகானி, அபி⁴சேதோஸன்னிஸ்ஸிதானீதி வா ஆபி⁴சேதஸிகானி. தி³ட்ட²த⁴ம்மஸுக²விஹாரானந்தி தி³ட்ட²த⁴ம்மே ஸுக²விஹாரானங். தி³ட்ட²த⁴ம்மோதி பச்சக்கோ² அத்தபா⁴வோ வுச்சதி, தத்த² ஸுக²விஹாரபூ⁴தானந்தி அத்தோ². ரூபாவசரஜ்ஜா²னானமேதங் அதி⁴வசனங். தானி ஹி அப்பெத்வா நிஸின்னா ஜா²யினோ இமஸ்மிஞ்ஞேவ அத்தபா⁴வே அஸங்கிலிட்ட²ங் நெக்க²ம்மஸுக²ங் விந்த³ந்தி, தஸ்மா ‘‘தி³ட்ட²த⁴ம்மஸுக²விஹாரானீ’’தி வுச்சந்தி. நிகாமலாபீ⁴தி நிகாமேன லாபீ⁴, அத்தனோ இச்சா²வஸேன லாபீ⁴, இச்சி²திச்சி²தக்க²ணே ஸமாபஜ்ஜிதுங் ஸமத்தோ²தி வுத்தங் ஹோதி. அகிச்ச²லாபீ⁴தி ஸுகே²னேவ பச்சனீகத⁴ம்மே விக்க²ம்பெ⁴த்வா ஸமாபஜ்ஜிதுங் ஸமத்தோ²தி வுத்தங் ஹோதி. அகஸிரலாபீ⁴தி அகஸிரானங் லாபீ⁴ விபுலானங், யதா²பரிச்சே²தே³னேவ வுட்டா²துங் ஸமத்தோ²தி வுத்தங் ஹோதி. ஏகச்சோ ஹி லாபீ⁴யேவ ஹோதி, ந பன ஸக்கோதி இச்சி²திச்சி²தக்க²ணே ஸமாபஜ்ஜிதுங். ஏகச்சோ ஸக்கோதி ததா² ஸமாபஜ்ஜிதுங், பாரிபந்தி²கே பன கிச்சே²ன விக்க²ம்பே⁴தி. ஏகச்சோ ததா² ச ஸமாபஜ்ஜதி, பாரிபந்தி²கே ச அகிச்சே²னேவ விக்க²ம்பே⁴தி, ந ஸக்கோதி காலமானநாளிகயந்தங் விய யதா²பரிச்சே²தே³யேவ வுட்டா²துங்.
Āpattiṃ jānātīti āpattiṃyeva ‘‘āpattī’’ti jānāti. Sesapadesupi eseva nayo. Ābhicetasikānanti ettha (ma. ni. aṭṭha. 1.66) abhicetoti pākatikakāmāvacaracittehi sundaratāya paṭipakkhato visuddhattā ca abhikkantaṃ visuddhacittaṃ vuccati, upacārajjhānacittassetaṃ adhivacanaṃ. Abhicetasi jātāni ābhicetasikāni, abhicetosannissitānīti vā ābhicetasikāni. Diṭṭhadhammasukhavihārānanti diṭṭhadhamme sukhavihārānaṃ. Diṭṭhadhammoti paccakkho attabhāvo vuccati, tattha sukhavihārabhūtānanti attho. Rūpāvacarajjhānānametaṃ adhivacanaṃ. Tāni hi appetvā nisinnā jhāyino imasmiññeva attabhāve asaṃkiliṭṭhaṃ nekkhammasukhaṃ vindanti, tasmā ‘‘diṭṭhadhammasukhavihārānī’’ti vuccanti. Nikāmalābhīti nikāmena lābhī, attano icchāvasena lābhī, icchiticchitakkhaṇe samāpajjituṃ samatthoti vuttaṃ hoti. Akicchalābhīti sukheneva paccanīkadhamme vikkhambhetvā samāpajjituṃ samatthoti vuttaṃ hoti. Akasiralābhīti akasirānaṃ lābhī vipulānaṃ, yathāparicchedeneva vuṭṭhātuṃ samatthoti vuttaṃ hoti. Ekacco hi lābhīyeva hoti, na pana sakkoti icchiticchitakkhaṇe samāpajjituṃ. Ekacco sakkoti tathā samāpajjituṃ, pāripanthike pana kicchena vikkhambheti. Ekacco tathā ca samāpajjati, pāripanthike ca akiccheneva vikkhambheti, na sakkoti kālamānanāḷikayantaṃ viya yathāparicchedeyeva vuṭṭhātuṃ.
ஆஸவானங் க²யாதி அரஹத்தமக்³கே³ன ஸப்³ப³கிலேஸானங் க²யா. அனாஸவந்தி ஆஸவவிரஹிதங். சேதோவிமுத்திங் பஞ்ஞாவிமுத்திந்தி எத்த² சேதோ-வசனேன அரஹத்தப²லஸம்பயுத்தோ ஸமாதி⁴, பஞ்ஞா-வசனேன தங்ஸம்பயுத்தா ச பஞ்ஞா வுத்தா. தத்த² ச ஸமாதி⁴ ராக³தோ விமுத்தத்தா சேதோவிமுத்தி, பஞ்ஞா அவிஜ்ஜாய விமுத்தத்தா பஞ்ஞாவிமுத்தீதி வேதி³தப்³பா³. வுத்தஞ்ஹேதங் ப⁴க³வதா ‘‘யோ ஹிஸ்ஸ, பி⁴க்க²வே, ஸமாதி⁴, தத³ஸ்ஸ ஸமாதி⁴ந்த்³ரியங் (ஸங்॰ நி॰ 5.520). யா ஹிஸ்ஸ, பி⁴க்க²வே, பஞ்ஞா, தத³ஸ்ஸ பஞ்ஞிந்த்³ரியங் (ஸங்॰ நி॰ 5.516). இதி கோ², பி⁴க்க²வே, ராக³விராகா³ சேதோவிமுத்தி அவிஜ்ஜாவிராகா³ பஞ்ஞாவிமுத்தீ’’தி (அ॰ நி॰ 2.32). அபிசெத்த² ஸமத²ப²லங் சேதோவிமுத்தி, விபஸ்ஸனாப²லங் பஞ்ஞாவிமுத்தீதி வேதி³தப்³பா³தி. தி³ட்டே²வ த⁴ம்மேதி இமஸ்மிங்யேவ அத்தபா⁴வே. ஸயங் அபி⁴ஞ்ஞா ஸச்சி²கத்வாதி அத்தனாயேவ பஞ்ஞாய பச்சக்க²ங் கத்வா, அபரப்பச்சயேன ஞத்வாதி அத்தோ². ஸுதமயஞாணாதி³னா விய பரப்பச்சயதங் நயக்³கா³ஹஞ்ச முஞ்சித்வா பரதோகோ⁴ஸானுக³தபா⁴வனாதி⁴க³மபூ⁴தாய அத்தனோயேவ பஞ்ஞாய பச்சக்க²ங் கத்வா, ந ஸயம்பூ⁴ஞாணபூ⁴தாயாதி அதி⁴ப்பாயோ. உபஸம்பஜ்ஜ விஹரதீதி பாபுணித்வா ஸம்பாதெ³த்வா விஹரதி.
Āsavānaṃ khayāti arahattamaggena sabbakilesānaṃ khayā. Anāsavanti āsavavirahitaṃ. Cetovimuttiṃ paññāvimuttinti ettha ceto-vacanena arahattaphalasampayutto samādhi, paññā-vacanena taṃsampayuttā ca paññā vuttā. Tattha ca samādhi rāgato vimuttattā cetovimutti, paññā avijjāya vimuttattā paññāvimuttīti veditabbā. Vuttañhetaṃ bhagavatā ‘‘yo hissa, bhikkhave, samādhi, tadassa samādhindriyaṃ (saṃ. ni. 5.520). Yā hissa, bhikkhave, paññā, tadassa paññindriyaṃ (saṃ. ni. 5.516). Iti kho, bhikkhave, rāgavirāgā cetovimutti avijjāvirāgā paññāvimuttī’’ti (a. ni. 2.32). Apicettha samathaphalaṃ cetovimutti, vipassanāphalaṃ paññāvimuttīti veditabbāti. Diṭṭheva dhammeti imasmiṃyeva attabhāve. Sayaṃ abhiññā sacchikatvāti attanāyeva paññāya paccakkhaṃ katvā, aparappaccayena ñatvāti attho. Sutamayañāṇādinā viya parappaccayataṃ nayaggāhañca muñcitvā paratoghosānugatabhāvanādhigamabhūtāya attanoyeva paññāya paccakkhaṃ katvā, na sayambhūñāṇabhūtāyāti adhippāyo. Upasampajja viharatīti pāpuṇitvā sampādetvā viharati.
ஸத்தகவாரவண்ணனா நிட்டி²தா.
Sattakavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 7. ஸத்தகவாரோ • 7. Sattakavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / ஸத்தகவாரவண்ணனா • Sattakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸத்தகவாரவண்ணனா • Sattakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ ஸத்தகவாரவண்ணனா • Ekuttarikanayo sattakavāravaṇṇanā
