| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
সত্তকৰারৰণ্ণনা
Sattakavāravaṇṇanā
৩২৭. সত্তকেসু – সত্ত সামীচিযোতি পুব্বে ৰুত্তেসু ছসু ‘‘সা চ ভিক্খুনী অনব্ভিতা, তা চ ভিক্খুনিযো গারয্হা, অযং তত্থ সামীচী’’তি ইমং পক্খিপিত্ৰা সত্ত ৰেদিতব্বা। সত্ত অধম্মিকা পটিঞ্ঞাতকরণাতি ‘‘ভিক্খু পারাজিকং অজ্ঝাপন্নো হোতি, পারাজিকেন চোদিযমানো ‘সঙ্ঘাদিসেসং অজ্ঝাপন্নোম্হী’তি পটিজানাতি, তং সঙ্ঘো সঙ্ঘাদিসেসেন কারেতি, অধম্মিকং পটিঞ্ঞাতকরণ’’ন্তি এৰং সমথক্খন্ধকে নিদ্দিট্ঠা। ধম্মিকাপি তত্থেৰ নিদ্দিট্ঠা। সত্তন্নং অনাপত্তি সত্তাহকরণীযেন গন্তুন্তি ৰস্সূপনাযিকক্খন্ধকে ৰুত্তং । সত্তানিসংসা ৰিনযধরেতি ‘‘তস্সাধেয্যো উপোসথো পৰারণা’’তি ইমেহি সদ্ধিং পঞ্চকে ৰুত্তা পঞ্চ সত্ত হোন্তি। সত্ত পরমানীতি ছক্কে ৰুত্তানিযেৰ সত্তকৰসেন যোজেতব্বানি। কতচীৰরন্তিআদীনি দ্ৰে সত্তকানি কথিনক্খন্ধকে নিদ্দিট্ঠানি।
327. Sattakesu – satta sāmīciyoti pubbe vuttesu chasu ‘‘sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīcī’’ti imaṃ pakkhipitvā satta veditabbā. Satta adhammikā paṭiññātakaraṇāti ‘‘bhikkhu pārājikaṃ ajjhāpanno hoti, pārājikena codiyamāno ‘saṅghādisesaṃ ajjhāpannomhī’ti paṭijānāti, taṃ saṅgho saṅghādisesena kāreti, adhammikaṃ paṭiññātakaraṇa’’nti evaṃ samathakkhandhake niddiṭṭhā. Dhammikāpi tattheva niddiṭṭhā. Sattannaṃ anāpatti sattāhakaraṇīyena gantunti vassūpanāyikakkhandhake vuttaṃ . Sattānisaṃsā vinayadhareti ‘‘tassādheyyo uposatho pavāraṇā’’ti imehi saddhiṃ pañcake vuttā pañca satta honti. Satta paramānīti chakke vuttāniyeva sattakavasena yojetabbāni. Katacīvarantiādīni dve sattakāni kathinakkhandhake niddiṭṭhāni.
ভিক্খুস্স ন হোতি আপত্তি দট্ঠব্বা, ভিক্খুস্স হোতি আপত্তি দট্ঠব্বা, ভিক্খুস্স হোতি আপত্তি পটিকাতব্বাতি ইমানি তীণি সত্তকানি, দ্ৰে অধম্মিকানি, একং ধম্মিকং; তানি তীণিপি চম্পেয্যকে নিদ্দিট্ঠানি। অসদ্ধম্মাতি অসতং ধম্মা, অসন্তো ৰা ধম্মা; অসোভনা হীনা লামকাতি অত্থো। সদ্ধম্মাতি সতং বুদ্ধাদীনং ধম্মা; সন্তো ৰা ধম্মা সুন্দরা উত্তমাতি অত্থো। সেসং সব্বত্থ উত্তানমেৰাতি।
Bhikkhussa na hoti āpatti daṭṭhabbā, bhikkhussa hoti āpatti daṭṭhabbā, bhikkhussa hoti āpatti paṭikātabbāti imāni tīṇi sattakāni, dve adhammikāni, ekaṃ dhammikaṃ; tāni tīṇipi campeyyake niddiṭṭhāni. Asaddhammāti asataṃ dhammā, asanto vā dhammā; asobhanā hīnā lāmakāti attho. Saddhammāti sataṃ buddhādīnaṃ dhammā; santo vā dhammā sundarā uttamāti attho. Sesaṃ sabbattha uttānamevāti.
সত্তকৰারৰণ্ণনা নিট্ঠিতা।
Sattakavāravaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৭. সত্তকৰারো • 7. Sattakavāro
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সত্তকৰারৰণ্ণনা • Sattakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সত্তকৰারৰণ্ণনা • Sattakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / একুত্তরিকনযো সত্তকৰারৰণ্ণনা • Ekuttarikanayo sattakavāravaṇṇanā
