| Library / Tipiṭaka / တိပိဋက • Tipiṭaka / ပရိဝာရ-အဋ္ဌကထာ • Parivāra-aṭṭhakathā |
သတ္တကဝာရဝဏ္ဏနာ
Sattakavāravaṇṇanā
၃၂၇. သတ္တကေသု – သတ္တ သာမီစိယောတိ ပုဗ္ဗေ ဝုတ္တေသု ဆသု ‘‘သာ စ ဘိက္ခုနီ အနဗ္ဘိတာ, တာ စ ဘိက္ခုနိယော ဂာရယ္ဟာ, အယံ တတ္ထ သာမီစီ’’တိ ဣမံ ပက္ခိပိတ္ဝာ သတ္တ ဝေဒိတဗ္ဗာ။ သတ္တ အဓမ္မိကာ ပဋိညာတကရဏာတိ ‘‘ဘိက္ခု ပာရာဇိကံ အဇ္ဈာပန္နော ဟောတိ, ပာရာဇိကေန စောဒိယမာနော ‘သင္ဃာဒိသေသံ အဇ္ဈာပန္နောမ္ဟီ’တိ ပဋိဇာနာတိ, တံ သင္ဃော သင္ဃာဒိသေသေန ကာရေတိ, အဓမ္မိကံ ပဋိညာတကရဏ’’န္တိ ဧဝံ သမထက္ခန္ဓကေ နိဒ္ဒိဋ္ဌာ။ ဓမ္မိကာပိ တတ္ထေဝ နိဒ္ဒိဋ္ဌာ။ သတ္တန္နံ အနာပတ္တိ သတ္တာဟကရဏီယေန ဂန္တုန္တိ ဝသ္သူပနာယိကက္ခန္ဓကေ ဝုတ္တံ ။ သတ္တာနိသံသာ ဝိနယဓရေတိ ‘‘တသ္သာဓေယ္ယော ဥပောသထော ပဝာရဏာ’’တိ ဣမေဟိ သဒ္ဓိံ ပဉ္စကေ ဝုတ္တာ ပဉ္စ သတ္တ ဟောန္တိ။ သတ္တ ပရမာနီတိ ဆက္ကေ ဝုတ္တာနိယေဝ သတ္တကဝသေန ယောဇေတဗ္ဗာနိ။ ကတစီဝရန္တိအာဒီနိ ဒ္ဝေ သတ္တကာနိ ကထိနက္ခန္ဓကေ နိဒ္ဒိဋ္ဌာနိ။
327. Sattakesu – satta sāmīciyoti pubbe vuttesu chasu ‘‘sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīcī’’ti imaṃ pakkhipitvā satta veditabbā. Satta adhammikā paṭiññātakaraṇāti ‘‘bhikkhu pārājikaṃ ajjhāpanno hoti, pārājikena codiyamāno ‘saṅghādisesaṃ ajjhāpannomhī’ti paṭijānāti, taṃ saṅgho saṅghādisesena kāreti, adhammikaṃ paṭiññātakaraṇa’’nti evaṃ samathakkhandhake niddiṭṭhā. Dhammikāpi tattheva niddiṭṭhā. Sattannaṃ anāpatti sattāhakaraṇīyena gantunti vassūpanāyikakkhandhake vuttaṃ . Sattānisaṃsā vinayadhareti ‘‘tassādheyyo uposatho pavāraṇā’’ti imehi saddhiṃ pañcake vuttā pañca satta honti. Satta paramānīti chakke vuttāniyeva sattakavasena yojetabbāni. Katacīvarantiādīni dve sattakāni kathinakkhandhake niddiṭṭhāni.
ဘိက္ခုသ္သ န ဟောတိ အာပတ္တိ ဒဋ္ဌဗ္ဗာ, ဘိက္ခုသ္သ ဟောတိ အာပတ္တိ ဒဋ္ဌဗ္ဗာ, ဘိက္ခုသ္သ ဟောတိ အာပတ္တိ ပဋိကာတဗ္ဗာတိ ဣမာနိ တီဏိ သတ္တကာနိ, ဒ္ဝေ အဓမ္မိကာနိ, ဧကံ ဓမ္မိကံ; တာနိ တီဏိပိ စမ္ပေယ္ယကေ နိဒ္ဒိဋ္ဌာနိ။ အသဒ္ဓမ္မာတိ အသတံ ဓမ္မာ, အသန္တော ဝာ ဓမ္မာ; အသောဘနာ ဟီနာ လာမကာတိ အတ္ထော။ သဒ္ဓမ္မာတိ သတံ ဗုဒ္ဓာဒီနံ ဓမ္မာ; သန္တော ဝာ ဓမ္မာ သုန္ဒရာ ဥတ္တမာတိ အတ္ထော။ သေသံ သဗ္ဗတ္ထ ဥတ္တာနမေဝာတိ။
Bhikkhussa na hoti āpatti daṭṭhabbā, bhikkhussa hoti āpatti daṭṭhabbā, bhikkhussa hoti āpatti paṭikātabbāti imāni tīṇi sattakāni, dve adhammikāni, ekaṃ dhammikaṃ; tāni tīṇipi campeyyake niddiṭṭhāni. Asaddhammāti asataṃ dhammā, asanto vā dhammā; asobhanā hīnā lāmakāti attho. Saddhammāti sataṃ buddhādīnaṃ dhammā; santo vā dhammā sundarā uttamāti attho. Sesaṃ sabbattha uttānamevāti.
သတ္တကဝာရဝဏ္ဏနာ နိဋ္ဌိတာ။
Sattakavāravaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၇. သတ္တကဝာရော • 7. Sattakavāro
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / သတ္တကဝာရဝဏ္ဏနာ • Sattakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / သတ္တကဝာရဝဏ္ဏနာ • Sattakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ဧကုတ္တရိကနယော သတ္တကဝာရဝဏ္ဏနာ • Ekuttarikanayo sattakavāravaṇṇanā
