| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
සත්‌තකවාරවණ්‌ණනා
Sattakavāravaṇṇanā
327. සත්‌තකෙසු – සත්‌ත සාමීචියොති පුබ්‌බෙ වුත්‌තෙසු ඡසු ‘‘සා ච භික්‌ඛුනී අනබ්‌භිතා, තා ච භික්‌ඛුනියො ගාරය්‌හා, අයං තත්‌ථ සාමීචී’’ති ඉමං පක්‌ඛිපිත්‌වා සත්‌ත වෙදිතබ්‌බා. සත්‌ත අධම්‌මිකා පටිඤ්‌ඤාතකරණාති ‘‘භික්‌ඛු පාරාජිකං අජ්‌ඣාපන්‌නො හොති, පාරාජිකෙන චොදියමානො ‘සඞ්‌ඝාදිසෙසං අජ්‌ඣාපන්‌නොම්‌හී’ති පටිජානාති, තං සඞ්‌ඝො සඞ්‌ඝාදිසෙසෙන කාරෙති, අධම්‌මිකං පටිඤ්‌ඤාතකරණ’’න්‌ති එවං සමථක්‌ඛන්‌ධකෙ නිද්‌දිට්‌ඨා. ධම්‌මිකාපි තත්‌ථෙව නිද්‌දිට්‌ඨා. සත්‌තන්‌නං අනාපත්‌ති සත්‌තාහකරණීයෙන ගන්‌තුන්‌ති වස්‌සූපනායිකක්‌ඛන්‌ධකෙ වුත්‌තං . සත්‌තානිසංසා විනයධරෙති ‘‘තස්‌සාධෙය්‍යො උපොසථො පවාරණා’’ති ඉමෙහි සද්‌ධිං පඤ්‌චකෙ වුත්‌තා පඤ්‌ච සත්‌ත හොන්‌ති. සත්‌ත පරමානීති ඡක්‌කෙ වුත්‌තානියෙව සත්‌තකවසෙන යොජෙතබ්‌බානි. කතචීවරන්‌තිආදීනි ද්‌වෙ සත්‌තකානි කථිනක්‌ඛන්‌ධකෙ නිද්‌දිට්‌ඨානි.
327. Sattakesu – satta sāmīciyoti pubbe vuttesu chasu ‘‘sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīcī’’ti imaṃ pakkhipitvā satta veditabbā. Satta adhammikā paṭiññātakaraṇāti ‘‘bhikkhu pārājikaṃ ajjhāpanno hoti, pārājikena codiyamāno ‘saṅghādisesaṃ ajjhāpannomhī’ti paṭijānāti, taṃ saṅgho saṅghādisesena kāreti, adhammikaṃ paṭiññātakaraṇa’’nti evaṃ samathakkhandhake niddiṭṭhā. Dhammikāpi tattheva niddiṭṭhā. Sattannaṃ anāpatti sattāhakaraṇīyena gantunti vassūpanāyikakkhandhake vuttaṃ . Sattānisaṃsā vinayadhareti ‘‘tassādheyyo uposatho pavāraṇā’’ti imehi saddhiṃ pañcake vuttā pañca satta honti. Satta paramānīti chakke vuttāniyeva sattakavasena yojetabbāni. Katacīvarantiādīni dve sattakāni kathinakkhandhake niddiṭṭhāni.
භික්‌ඛුස්‌ස න හොති ආපත්‌ති දට්‌ඨබ්‌බා, භික්‌ඛුස්‌ස හොති ආපත්‌ති දට්‌ඨබ්‌බා, භික්‌ඛුස්‌ස හොති ආපත්‌ති පටිකාතබ්‌බාති ඉමානි තීණි සත්‌තකානි, ද්‌වෙ අධම්‌මිකානි, එකං ධම්‌මිකං; තානි තීණිපි චම්‌පෙය්‍යකෙ නිද්‌දිට්‌ඨානි. අසද්‌ධම්‌මාති අසතං ධම්‌මා, අසන්‌තො වා ධම්‌මා; අසොභනා හීනා ලාමකාති අත්‌ථො. සද්‌ධම්‌මාති සතං බුද්‌ධාදීනං ධම්‌මා; සන්‌තො වා ධම්‌මා සුන්‌දරා උත්‌තමාති අත්‌ථො. සෙසං සබ්‌බත්‌ථ උත්‌තානමෙවාති.
Bhikkhussa na hoti āpatti daṭṭhabbā, bhikkhussa hoti āpatti daṭṭhabbā, bhikkhussa hoti āpatti paṭikātabbāti imāni tīṇi sattakāni, dve adhammikāni, ekaṃ dhammikaṃ; tāni tīṇipi campeyyake niddiṭṭhāni. Asaddhammāti asataṃ dhammā, asanto vā dhammā; asobhanā hīnā lāmakāti attho. Saddhammāti sataṃ buddhādīnaṃ dhammā; santo vā dhammā sundarā uttamāti attho. Sesaṃ sabbattha uttānamevāti.
සත්‌තකවාරවණ්‌ණනා නිට්‌ඨිතා.
Sattakavāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 7. සත්‌තකවාරො • 7. Sattakavāro
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සත්‌තකවාරවණ්‌ණනා • Sattakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / සත්‌තකවාරවණ්‌ණනා • Sattakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / එකුත්‌තරිකනයො සත්‌තකවාරවණ්‌ණනා • Ekuttarikanayo sattakavāravaṇṇanā
