| Library / Tipiṭaka / ཏིཔིཊཀ • Tipiṭaka / པརིཝཱར-ཨཊྛཀཐཱ • Parivāra-aṭṭhakathā |
སཏྟཀཝཱརཝཎྞནཱ
Sattakavāravaṇṇanā
༣༢༧. སཏྟཀེསུ – སཏྟ སཱམཱིཙིཡོཏི པུབྦེ ཝུཏྟེསུ ཚསུ ‘‘སཱ ཙ བྷིཀྑུནཱི ཨནབྦྷིཏཱ, ཏཱ ཙ བྷིཀྑུནིཡོ གཱརཡ྄ཧཱ, ཨཡཾ ཏཏྠ སཱམཱིཙཱི’’ཏི ཨིམཾ པཀྑིཔིཏྭཱ སཏྟ ཝེདིཏབྦཱ། སཏྟ ཨདྷམྨིཀཱ པཊིཉྙཱཏཀརཎཱཏི ‘‘བྷིཀྑུ པཱརཱཛིཀཾ ཨཛ྄ཛྷཱཔནྣོ ཧོཏི, པཱརཱཛིཀེན ཙོདིཡམཱནོ ‘སངྒྷཱདིསེསཾ ཨཛ྄ཛྷཱཔནྣོམྷཱི’ཏི པཊིཛཱནཱཏི, ཏཾ སངྒྷོ སངྒྷཱདིསེསེན ཀཱརེཏི, ཨདྷམྨིཀཾ པཊིཉྙཱཏཀརཎ’’ནྟི ཨེཝཾ སམཐཀྑནྡྷཀེ ནིདྡིཊྛཱ། དྷམྨིཀཱཔི ཏཏྠེཝ ནིདྡིཊྛཱ། སཏྟནྣཾ ཨནཱཔཏྟི སཏྟཱཧཀརཎཱིཡེན གནྟུནྟི ཝསྶཱུཔནཱཡིཀཀྑནྡྷཀེ ཝུཏྟཾ ། སཏྟཱནིསཾསཱ ཝིནཡདྷརེཏི ‘‘ཏསྶཱདྷེཡྻོ ཨུཔོསཐོ པཝཱརཎཱ’’ཏི ཨིམེཧི སདྡྷིཾ པཉྩཀེ ཝུཏྟཱ པཉྩ སཏྟ ཧོནྟི། སཏྟ པརམཱནཱིཏི ཚཀྐེ ཝུཏྟཱནིཡེཝ སཏྟཀཝསེན ཡོཛེཏབྦཱནི། ཀཏཙཱིཝརནྟིཨཱདཱིནི དྭེ སཏྟཀཱནི ཀཐིནཀྑནྡྷཀེ ནིདྡིཊྛཱནི།
327. Sattakesu – satta sāmīciyoti pubbe vuttesu chasu ‘‘sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīcī’’ti imaṃ pakkhipitvā satta veditabbā. Satta adhammikā paṭiññātakaraṇāti ‘‘bhikkhu pārājikaṃ ajjhāpanno hoti, pārājikena codiyamāno ‘saṅghādisesaṃ ajjhāpannomhī’ti paṭijānāti, taṃ saṅgho saṅghādisesena kāreti, adhammikaṃ paṭiññātakaraṇa’’nti evaṃ samathakkhandhake niddiṭṭhā. Dhammikāpi tattheva niddiṭṭhā. Sattannaṃ anāpatti sattāhakaraṇīyena gantunti vassūpanāyikakkhandhake vuttaṃ . Sattānisaṃsā vinayadhareti ‘‘tassādheyyo uposatho pavāraṇā’’ti imehi saddhiṃ pañcake vuttā pañca satta honti. Satta paramānīti chakke vuttāniyeva sattakavasena yojetabbāni. Katacīvarantiādīni dve sattakāni kathinakkhandhake niddiṭṭhāni.
བྷིཀྑུསྶ ན ཧོཏི ཨཱཔཏྟི དཊྛབྦཱ, བྷིཀྑུསྶ ཧོཏི ཨཱཔཏྟི དཊྛབྦཱ, བྷིཀྑུསྶ ཧོཏི ཨཱཔཏྟི པཊིཀཱཏབྦཱཏི ཨིམཱནི ཏཱིཎི སཏྟཀཱནི, དྭེ ཨདྷམྨིཀཱནི, ཨེཀཾ དྷམྨིཀཾ; ཏཱནི ཏཱིཎིཔི ཙམྤེཡྻཀེ ནིདྡིཊྛཱནི། ཨསདྡྷམྨཱཏི ཨསཏཾ དྷམྨཱ, ཨསནྟོ ཝཱ དྷམྨཱ; ཨསོབྷནཱ ཧཱིནཱ ལཱམཀཱཏི ཨཏྠོ། སདྡྷམྨཱཏི སཏཾ བུདྡྷཱདཱིནཾ དྷམྨཱ; སནྟོ ཝཱ དྷམྨཱ སུནྡརཱ ཨུཏྟམཱཏི ཨཏྠོ། སེསཾ སབྦཏྠ ཨུཏྟཱནམེཝཱཏི།
Bhikkhussa na hoti āpatti daṭṭhabbā, bhikkhussa hoti āpatti daṭṭhabbā, bhikkhussa hoti āpatti paṭikātabbāti imāni tīṇi sattakāni, dve adhammikāni, ekaṃ dhammikaṃ; tāni tīṇipi campeyyake niddiṭṭhāni. Asaddhammāti asataṃ dhammā, asanto vā dhammā; asobhanā hīnā lāmakāti attho. Saddhammāti sataṃ buddhādīnaṃ dhammā; santo vā dhammā sundarā uttamāti attho. Sesaṃ sabbattha uttānamevāti.
སཏྟཀཝཱརཝཎྞནཱ ནིཊྛིཏཱ།
Sattakavāravaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༧. སཏྟཀཝཱརོ • 7. Sattakavāro
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སཏྟཀཝཱརཝཎྞནཱ • Sattakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / སཏྟཀཝཱརཝཎྞནཱ • Sattakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨེཀུཏྟརིཀནཡོ སཏྟཀཝཱརཝཎྞནཱ • Ekuttarikanayo sattakavāravaṇṇanā
