| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. ஸத்தக்க²த்துபரமகதா²வண்ணனா
5. Sattakkhattuparamakathāvaṇṇanā
541-545. இதா³னி ஸத்தக்க²த்துபரமகதா² நாம ஹோதி, தத்த² யஸ்மா ‘‘ஸத்தக்க²த்துபரமோ’’தி வுத்தங், தஸ்மா ‘‘ஸத்தக்க²த்துபரமோ புக்³க³லோ ஸத்தக்க²த்துபரமதாய நியதோ’’தி யேஸங் லத்³தி⁴, ஸெய்யதா²பி உத்தராபத²கானங்; தேஸங் ட²பெத்வா ‘‘அரியமக்³க³ங் அஞ்ஞோ தஸ்ஸ நியமோ நத்தி², யேன ஸோ ஸத்தக்க²த்துபரமதாய நியதோ ப⁴வெய்யா’’தி இமங் விபா⁴க³ங் த³ஸ்ஸேதுங் புச்சா² ஸகவாதி³ஸ்ஸ, படிஞ்ஞா இதரஸ்ஸ.
641-645. Idāni sattakkhattuparamakathā nāma hoti, tattha yasmā ‘‘sattakkhattuparamo’’ti vuttaṃ, tasmā ‘‘sattakkhattuparamo puggalo sattakkhattuparamatāya niyato’’ti yesaṃ laddhi, seyyathāpi uttarāpathakānaṃ; tesaṃ ṭhapetvā ‘‘ariyamaggaṃ añño tassa niyamo natthi, yena so sattakkhattuparamatāya niyato bhaveyyā’’ti imaṃ vibhāgaṃ dassetuṃ pucchā sakavādissa, paṭiññā itarassa.
மாதா ஜீவிதாதிஆதீ³ஸு அயமதி⁴ப்பாயோ – த்³வே நியாமா ஸம்மத்தனியாமோ ச மிச்ச²த்தனியாமோ ச. ஸம்மத்தனியாமோ அரியமக்³கோ³. ஸோ அவினிபாதத⁴ம்மதஞ்சேவ ப²லுப்பத்திஞ்ச நியமேதி. மிச்ச²த்தனியாமோ ஆனந்தரியகம்மங். தங் அனந்தரா நிரயூபபத்திங் நியமேதி. தத்த² ஸத்தக்க²த்துபரமோ ஸோதாபத்திமக்³கே³ன அவினிபாதத⁴ம்மதாய ச ப²லுப்பத்தியா ச நியமிதோ. ஸேஸமக்³க³னியாமோ பனஸ்ஸ நத்தி² அனதி⁴க³தத்தா, ஆனந்தரியம்பி காதுங் ஸோ அப⁴ப்³போ³. த்வங் பனஸ்ஸ நியாமங் இச்ச²ஸி, தேன தங் வதா³ம – ‘‘கிங் தே ஸோ இமினா மிச்ச²த்தனியாமேன நியமிதோ’’தி.
Mātā jīvitātiādīsu ayamadhippāyo – dve niyāmā sammattaniyāmo ca micchattaniyāmo ca. Sammattaniyāmo ariyamaggo. So avinipātadhammatañceva phaluppattiñca niyameti. Micchattaniyāmo ānantariyakammaṃ. Taṃ anantarā nirayūpapattiṃ niyameti. Tattha sattakkhattuparamo sotāpattimaggena avinipātadhammatāya ca phaluppattiyā ca niyamito. Sesamagganiyāmo panassa natthi anadhigatattā, ānantariyampi kātuṃ so abhabbo. Tvaṃ panassa niyāmaṃ icchasi, tena taṃ vadāma – ‘‘kiṃ te so iminā micchattaniyāmena niyamito’’ti.
அப⁴ப்³போ³ அந்தராதி பஞ்ஹேஸு ஆனந்தரியாபா⁴வங் ஸந்தா⁴ய படிக்கி²பதி, ஸத்தக்க²த்துபரமங் ஸந்தா⁴ய படிஜானாதி. அத்தி² ஸோ நியாமோதி பஞ்ஹே ஸத்தக்க²த்துபரமதாய நியாமங் அபஸ்ஸந்தோ படிக்கி²பதி. அத்தி² தே ஸதிபட்டா²னாதிஆதி³ நியாமஸங்கா²தே மக்³க³த⁴ம்மே த³ஸ்ஸேதுங் வுத்தங். தஸ்ஸ பன புன பட²மமக்³கா³னுப்பத்திதோ தேபி நத்தி², தஸ்மா படிக்கி²பதி. ஸேஸமெத்த² உத்தானத்த²மேவ. நனு ஸோ ஸத்தக்க²த்துபரமோதி எத்த² ப⁴க³வா ‘‘அயங் புக்³க³லோ எத்தகே ப⁴வே ஸந்தா⁴வித்வா பரினிப்³பா³யிஸ்ஸதி, அயங் எத்தகே’’தி அத்தனோ ஞாணப³லேன ப்³யாகரோதி, ந ப⁴வனியாமங் நாம கிஞ்சி தேன ஸத்தக்க²த்துபரமோ, கோலங்கோலோ, ஏகபீ³ஜீ வாதி வுத்தங், தஸ்மா அஸாத⁴கமேதந்தி.
Abhabbo antarāti pañhesu ānantariyābhāvaṃ sandhāya paṭikkhipati, sattakkhattuparamaṃ sandhāya paṭijānāti. Atthi so niyāmoti pañhe sattakkhattuparamatāya niyāmaṃ apassanto paṭikkhipati. Atthi te satipaṭṭhānātiādi niyāmasaṅkhāte maggadhamme dassetuṃ vuttaṃ. Tassa pana puna paṭhamamaggānuppattito tepi natthi, tasmā paṭikkhipati. Sesamettha uttānatthameva. Nanu so sattakkhattuparamoti ettha bhagavā ‘‘ayaṃ puggalo ettake bhave sandhāvitvā parinibbāyissati, ayaṃ ettake’’ti attano ñāṇabalena byākaroti, na bhavaniyāmaṃ nāma kiñci tena sattakkhattuparamo, kolaṃkolo, ekabījī vāti vuttaṃ, tasmā asādhakametanti.
ஸத்தக்க²த்துபரமகதா²வண்ணனா.
Sattakkhattuparamakathāvaṇṇanā.
646-647. கோலங்கோலஏகபீ³ஜிகதா²யோபி இமினாவுபாயேன வேதி³தப்³பா³.
646-647. Kolaṃkolaekabījikathāyopi imināvupāyena veditabbā.
கோலங்கோலஏகபீ³ஜிகதா²வண்ணனா.
Kolaṃkolaekabījikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi
(120) 5. ஸத்தக்க²த்துபரமகதா² • (120) 5. Sattakkhattuparamakathā
(121) 6. கோலங்கோலகதா² • (121) 6. Kolaṅkolakathā
(122) 7. ஏகபீ³ஜீகதா² • (122) 7. Ekabījīkathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 5. ஸத்தக்க²த்துபரமகதா²வண்ணனா • 5. Sattakkhattuparamakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 5. ஸத்தக்க²த்துபரமகதா²வண்ணனா • 5. Sattakkhattuparamakathāvaṇṇanā
