| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
5. ஸத்தக்க²த்துபரமகதா²வண்ணனா
5. Sattakkhattuparamakathāvaṇṇanā
641-645. அஸ்ஸாதி இமஸ்ஸ ஸத்தக்க²த்துபரமஸ்ஸ. தேனாஹ ‘‘ஸத்தக்க²த்துபரமபா⁴வே ச நியாமங் இச்ச²ஸீ’’தி. யேன ஆனந்தரியகம்மேன. அந்தராதி ஸத்த ப⁴வே அனிப்³ப³த்தெத்வா தேஸங் அந்தரேயேவ. கேசீதி அப⁴யகி³ரிவாஸினோ. அபரேதி பத³காரா. தஸ்ஸாதி யோ ஸத்தக்க²த்துபரமோதி வா, கோலங்கோலோதி வா, ஏகபீ³ஜீதி வா ப⁴க³வதா ஞாணேன பரிச்சி²ந்தி³த்வா ப்³யாகதோ, தஸ்ஸ யதா²வுத்தபரிச்சே²தா³ அந்தரா உபரிமக்³கா³தி⁴க³மோ நத்தி² அவிதத²தே³ஸனத்தா. யதா²பரிச்சே²த³மேவ தஸ்ஸ அபி⁴ஸமயோ, ஸ்வாயங் விபா⁴கோ³ தேஸங்யேவ புக்³க³லானங் இந்த்³ரியபரோபரியத்தேன வேதி³தப்³போ³ ப⁴வனியாமேன தாதி³ஸஸ்ஸ கஸ்ஸசி அபா⁴வதோ. யஸ்மா கஸ்ஸசி முது³கானிபி இந்த்³ரியானி பச்சயவிஸேஸேன திக்க²பா⁴வங் ஆபஜ்ஜெய்யுங், தஸ்மா தாதி³ஸங் ஸந்தா⁴ய ‘‘ப⁴ப்³போ³தி வுச்சதி, ந ஸோ அப⁴ப்³போ³ நாமா’’தி ச வுத்தங். யஸ்மா பன ப⁴க³வா ந தாதி³ஸங் ‘‘ஸத்தக்க²த்துபரமோ’’திஆதி³னா நியமெத்வா ப்³யாகரோதி, தஸ்மா ஆஹ ‘‘ந பன அந்தரா அபி⁴ஸமேதுங் ப⁴ப்³ப³தா வுத்தா’’தி. அயஞ்ச நயோ ஏகந்தேன இச்சி²தப்³போ³. அஞ்ஞதா² புக்³க³லஸ்ஸ ஸங்கரோ ஸியாதி த³ஸ்ஸெந்தோ ‘‘யதி³ சா’’திஆதி³மாஹ.
641-645. Assāti imassa sattakkhattuparamassa. Tenāha ‘‘sattakkhattuparamabhāve ca niyāmaṃ icchasī’’ti. Yena ānantariyakammena. Antarāti satta bhave anibbattetvā tesaṃ antareyeva. Kecīti abhayagirivāsino. Apareti padakārā. Tassāti yo sattakkhattuparamoti vā, kolaṃkoloti vā, ekabījīti vā bhagavatā ñāṇena paricchinditvā byākato, tassa yathāvuttaparicchedā antarā uparimaggādhigamo natthi avitathadesanattā. Yathāparicchedameva tassa abhisamayo, svāyaṃ vibhāgo tesaṃyeva puggalānaṃ indriyaparopariyattena veditabbo bhavaniyāmena tādisassa kassaci abhāvato. Yasmā kassaci mudukānipi indriyāni paccayavisesena tikkhabhāvaṃ āpajjeyyuṃ, tasmā tādisaṃ sandhāya ‘‘bhabboti vuccati, na so abhabbo nāmā’’ti ca vuttaṃ. Yasmā pana bhagavā na tādisaṃ ‘‘sattakkhattuparamo’’tiādinā niyametvā byākaroti, tasmā āha ‘‘na pana antarā abhisametuṃ bhabbatā vuttā’’ti. Ayañca nayo ekantena icchitabbo. Aññathā puggalassa saṅkaro siyāti dassento ‘‘yadi cā’’tiādimāha.
ஸத்தக்க²த்துபரமகதா²வண்ணனா நிட்டி²தா.
Sattakkhattuparamakathāvaṇṇanā niṭṭhitā.
த்³வாத³ஸமவக்³க³வண்ணனா நிட்டி²தா.
Dvādasamavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (120) 5. ஸத்தக்க²த்துபரமகதா² • (120) 5. Sattakkhattuparamakathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 5. ஸத்தக்க²த்துபரமகதா²வண்ணனா • 5. Sattakkhattuparamakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 5. ஸத்தக்க²த்துபரமகதா²வண்ணனா • 5. Sattakkhattuparamakathāvaṇṇanā
