| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৫. সত্তক্খত্তুপরমকথাৰণ্ণনা
5. Sattakkhattuparamakathāvaṇṇanā
৫৪১-৫৪৫. ইদানি সত্তক্খত্তুপরমকথা নাম হোতি, তত্থ যস্মা ‘‘সত্তক্খত্তুপরমো’’তি ৰুত্তং, তস্মা ‘‘সত্তক্খত্তুপরমো পুগ্গলো সত্তক্খত্তুপরমতায নিযতো’’তি যেসং লদ্ধি, সেয্যথাপি উত্তরাপথকানং; তেসং ঠপেত্ৰা ‘‘অরিযমগ্গং অঞ্ঞো তস্স নিযমো নত্থি, যেন সো সত্তক্খত্তুপরমতায নিযতো ভৰেয্যা’’তি ইমং ৰিভাগং দস্সেতুং পুচ্ছা সকৰাদিস্স, পটিঞ্ঞা ইতরস্স।
641-645. Idāni sattakkhattuparamakathā nāma hoti, tattha yasmā ‘‘sattakkhattuparamo’’ti vuttaṃ, tasmā ‘‘sattakkhattuparamo puggalo sattakkhattuparamatāya niyato’’ti yesaṃ laddhi, seyyathāpi uttarāpathakānaṃ; tesaṃ ṭhapetvā ‘‘ariyamaggaṃ añño tassa niyamo natthi, yena so sattakkhattuparamatāya niyato bhaveyyā’’ti imaṃ vibhāgaṃ dassetuṃ pucchā sakavādissa, paṭiññā itarassa.
মাতা জীৰিতাতিআদীসু অযমধিপ্পাযো – দ্ৰে নিযামা সম্মত্তনিযামো চ মিচ্ছত্তনিযামো চ। সম্মত্তনিযামো অরিযমগ্গো। সো অৰিনিপাতধম্মতঞ্চেৰ ফলুপ্পত্তিঞ্চ নিযমেতি। মিচ্ছত্তনিযামো আনন্তরিযকম্মং। তং অনন্তরা নিরযূপপত্তিং নিযমেতি। তত্থ সত্তক্খত্তুপরমো সোতাপত্তিমগ্গেন অৰিনিপাতধম্মতায চ ফলুপ্পত্তিযা চ নিযমিতো। সেসমগ্গনিযামো পনস্স নত্থি অনধিগতত্তা, আনন্তরিযম্পি কাতুং সো অভব্বো। ত্ৰং পনস্স নিযামং ইচ্ছসি, তেন তং ৰদাম – ‘‘কিং তে সো ইমিনা মিচ্ছত্তনিযামেন নিযমিতো’’তি।
Mātā jīvitātiādīsu ayamadhippāyo – dve niyāmā sammattaniyāmo ca micchattaniyāmo ca. Sammattaniyāmo ariyamaggo. So avinipātadhammatañceva phaluppattiñca niyameti. Micchattaniyāmo ānantariyakammaṃ. Taṃ anantarā nirayūpapattiṃ niyameti. Tattha sattakkhattuparamo sotāpattimaggena avinipātadhammatāya ca phaluppattiyā ca niyamito. Sesamagganiyāmo panassa natthi anadhigatattā, ānantariyampi kātuṃ so abhabbo. Tvaṃ panassa niyāmaṃ icchasi, tena taṃ vadāma – ‘‘kiṃ te so iminā micchattaniyāmena niyamito’’ti.
অভব্বো অন্তরাতি পঞ্হেসু আনন্তরিযাভাৰং সন্ধায পটিক্খিপতি, সত্তক্খত্তুপরমং সন্ধায পটিজানাতি। অত্থি সো নিযামোতি পঞ্হে সত্তক্খত্তুপরমতায নিযামং অপস্সন্তো পটিক্খিপতি। অত্থি তে সতিপট্ঠানাতিআদি নিযামসঙ্খাতে মগ্গধম্মে দস্সেতুং ৰুত্তং। তস্স পন পুন পঠমমগ্গানুপ্পত্তিতো তেপি নত্থি, তস্মা পটিক্খিপতি। সেসমেত্থ উত্তানত্থমেৰ। ননু সো সত্তক্খত্তুপরমোতি এত্থ ভগৰা ‘‘অযং পুগ্গলো এত্তকে ভৰে সন্ধাৰিত্ৰা পরিনিব্বাযিস্সতি, অযং এত্তকে’’তি অত্তনো ঞাণবলেন ব্যাকরোতি, ন ভৰনিযামং নাম কিঞ্চি তেন সত্তক্খত্তুপরমো, কোলংকোলো, একবীজী ৰাতি ৰুত্তং, তস্মা অসাধকমেতন্তি।
Abhabbo antarāti pañhesu ānantariyābhāvaṃ sandhāya paṭikkhipati, sattakkhattuparamaṃ sandhāya paṭijānāti. Atthi so niyāmoti pañhe sattakkhattuparamatāya niyāmaṃ apassanto paṭikkhipati. Atthi te satipaṭṭhānātiādi niyāmasaṅkhāte maggadhamme dassetuṃ vuttaṃ. Tassa pana puna paṭhamamaggānuppattito tepi natthi, tasmā paṭikkhipati. Sesamettha uttānatthameva. Nanu so sattakkhattuparamoti ettha bhagavā ‘‘ayaṃ puggalo ettake bhave sandhāvitvā parinibbāyissati, ayaṃ ettake’’ti attano ñāṇabalena byākaroti, na bhavaniyāmaṃ nāma kiñci tena sattakkhattuparamo, kolaṃkolo, ekabījī vāti vuttaṃ, tasmā asādhakametanti.
সত্তক্খত্তুপরমকথাৰণ্ণনা।
Sattakkhattuparamakathāvaṇṇanā.
৬৪৬-৬৪৭. কোলংকোলএকবীজিকথাযোপি ইমিনাৰুপাযেন ৰেদিতব্বা।
646-647. Kolaṃkolaekabījikathāyopi imināvupāyena veditabbā.
কোলংকোলএকবীজিকথাৰণ্ণনা।
Kolaṃkolaekabījikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi
(১২০) ৫. সত্তক্খত্তুপরমকথা • (120) 5. Sattakkhattuparamakathā
(১২১) ৬. কোলঙ্কোলকথা • (121) 6. Kolaṅkolakathā
(১২২) ৭. একবীজীকথা • (122) 7. Ekabījīkathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৫. সত্তক্খত্তুপরমকথাৰণ্ণনা • 5. Sattakkhattuparamakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৫. সত্তক্খত্তুপরমকথাৰণ্ণনা • 5. Sattakkhattuparamakathāvaṇṇanā
